Na soema moro wi sa go dan leki na Jezus Kristus?
„Masra, na soema wi sa go? Joe abi wortoe foe teego libi; en wi ben bribi en ben kon sabi dati joe de na Santawan.” — Johannes 6:68, 69.
1, 2. (a) Foe sainde onsekerheid no de tapoe na aksi, na soema kristen soema moe go, te wi loekoe san Jezus ben taki? (b) San den wortoe foe Jezus ben taki foe na kisi foe libi en sortoe toe groepoe?
INI na ten disi pe toemsi bigi bosroiti moe teki, no wan onsekerheid de ini na prakseri foe kristen soema di gi densrefi krin krin abra tapoe na aksi, na soema den moe go. Na pasi de krin gi den. Jezus ben taki gi dem wan di ben de na hen ini na ten foe hen tesi: „Mi de na pasi en na waarheid en na libi. No wan soema e kon na a Tata, dan nanga jepi foe mi” (Joh. 14:6). Na a srefi okasi dati a ben taki ooktoe ete: „Mi de na troe droifibon èn mi Tata na droifidjariman. . . . Na soema di tan ini wanfasi nanga mi, en mi ini wanfasi nanga hen, hen de meki foeroe froktoe; bikasi aparti foe mi, joe no kan doe no wan sani.” — Joh. 15:1, 5.
2 Fa den wortoe disi foe Jezus kon de troe ini na libi foe den apostel en tra fositen discipel! En te ini na ten foe wi den kon de troe. Aladi den ben taki gi den wan di ben sa kisi wan presi ini Gado hemel kownoekondre, tog den e verteri foeroe waarheid, di ala den foetoeboi foe Kristus kan njan boen foe den. A fesi ini hen diniwroko Jezus ben taki: „Gado ben lobi grontapoe sote, dati a ben gi hen wan enkri gebore Pikin, dati ibri soema di sori bribi ini hen, no ben sa pori, ma ben sa abi teego libi” (Joh. 3:16). En den wortoe disi abi na srefi krakti gi ala „skapoe”, di Jezus ben taki foe den ini Johannes 10:16: „Mi abi tra skapoe ete, di no de foe disi koi; den disi toe mi moe tjari, en den sa jere mi sten, en den sa de wàn ipi, wàn herder.”
3. (a) San na wàn fasi fa Jezus ben de nanga hen foetoeboi sensi a opo go na hemel? (b) Tapoe sortoe tra fasi a ben de nanga den toe?
3 Nanga jepi foe Jezus Kristus Jehovah Gado ben seti sani foeroe foe tjari hen dienstknegti di ben gi densrefi abra ini na progressief leti foe na waarheid, nanga teego libi na den fesi. Sjatoe, bifo Jezus ben opo go na hemel a ben tranga na bribi foe so wan 500 foe hen discipel di ben konmakandra na Galiléa, nanga den wortoe: „Loekoe! mi de nanga joe ala den dé te leki na bosroiti foe na seti foe sani” (Matt. 28:20; 1 Kor. 15:6). Fa a ben dè nanga den? Nanga jepi foe hen santa jeje, ma ooktoe tapoe wan tra fasi. Di Jezus ben taki foe na de-noja foe hen nanga na kaba foe na seti foe sani, a ben gi hen foetoeboi na djaranti dati a ben sa poti wan „getrouw nanga voorzigti foetoeboi” di ben sa doe hen afersi. en di ben sa gi hen foetoeboi njanjan na a reti ten. Foedi na srafoe-groepoe disi ben sa doe hen wroko getrouw, Jezus ben sa poti hen tapoe ala hen goedoe na a ten foe hen tweede konbaka. Ja ooktoe nanga jepi foe na „getrouw nanga voorzigti srafoe” disi, Jezus ben de nanga hen foetoeboi. — Matt. 24:45-47.
„WAN POSTOE NANGA JEPI FOE NA WAARHEID”
4. (a) San kan taki foe na gemeente foe Jezus, foedi Jezus ben hori getrouw na hen pramisi? (b) Sortoe profétitori di e gi dekati e kon troe tapoe Jezus troe foetoeboi ini disi ten?
4 Foedi Jezus Kristus ben de nanga hen salfoe foetoeboi, dan na kristen gemeente ben de troe troe, soleki Paulus skrifi foe hen, „wan postoe en jepi gi na waarheid” (1 Tim. 3:15). A ben sori krin dati a abi Gado geest nanga na meki foe den froktoe foe na geest (Gal. 5:22, 23). Ini disi en foeroe tra fasi, den kristen kotoigi foe Jehovah de tra fasi leki den foeroe sekte foe na kristenheid — wan jeje Israël ini nen. Foedi Jezus Kristus de nanga den, dan den dekati wortoe ini Jesaja 65:13, 14 e kon troe ini den: „Disi na (Soevereine) Masra Jehovah ben taki: ’Loekoe! Mi knegti sa njan, ma oenoe sa pina foe angri. Loekoe! Mi knegti sa dringi, ma oenoe sa pina foe dré watra. Loekoe! Mi knegti sa prisiri, ma oenoe sa kisi sjen. Loekoe! Mi knegti sa bari wan prisiri-babari foe na boen atifasi foe den, ma oenoe sa bari tranga foe na pen na ati en oenoe sa bari kré foe soso foe na broko foe oenoe verstan.’” — Herziene Engelse uitgave van 1971.
5, 6. (a) Tapoe sortoe toe bigi waarheidpunt a „srafoe”-klasse biten kaba ben verteri san den e bribi? (b) Foe sainde den soema ini na Bigi Babylon no kan verstan na leri foe na verloesoe-paiman? (c) Na sortoe toe fasi na leri foe den bijbelondrosoekoeman tapoe na tori foe na tweede konbaka foe Jezus ben de so aparti?
5 Na difrenti dati ben bigin sori hensrefi foe sensi na fosi bigin foe na modern historia foe Jehovah pipel. Den di ben doe wroko leki na „getrouw en voorzigti srafoe” ondro na tiri foe Jezus Kristus ben sori den krakti bribi ini na bijbel — ooktoe na Genesistori foe na meki foe sani — leki na Wortoe foe Jehovah di ben skrifi nanga hen geest, soleki Jezus di ben sori so wan krakti bribi ini na Wortoe (Matt. 4:4-10; 19:4-6). Spesroetoe krakti ben poti tapoe na fundament leri foe na verloesoe-paiman, di Jezus Kristus, na Manpikin foe Gado, ben gi nanga na ofrandi dede foe hen (1 Tim. 2:5, 6). No wan soema ini na Bigi Babylon kan warderi na leri disi joisti, foedi den de hori na den sortoe leri di no de ini bijbel leki na Dri-wan-gado, dati na sili no e dede, en kisi teego pina, ofoe foedi den de taki dati a no de so, dati Jezus ben habi wan libi na fesi bifo a ben de libisoema en dati a ben gebore foe wan wendje. — Matt. 1:23; Joh. 1:1.
6 Krosibé nanga wan krin verstan foe na leri foe na verloesoe-paiman de na joisti verstan foe na doel nanga na fasi foe Kristus tweede konbaka en „de noja”. Den ernstig „bijbel ondrosoekoeman” dati, soleki den ben kari Kotoigi na a ten dati, ben de den enkri wan di ben si krin na difrenti na mindri na libisoema Jezus Kristus, di ben gi na verloesoe-paiman, nanga na glori, jeje soema, di ben opobaka foe dede en di e konbaka sondro foe si hen foe rigeri leki kownoe ini Gado kownoekondre. — Matt. 24:3; 1 Petr. 3:18.
7. Sortoe tekst nanga argument e sori, dati toe aparti presi de foe kisi libi gi den soema di e njan boen foe Kristus verloesoe-paiman?
7 Den bijbelondrosoekoeman ben si ooktoe biten ini na historia foe den foe disi ten, dati toe presi moe de gi den soema di o njan boen foe Kristus verloesoe-paiman, wan hemel wan en wan grontapoe wan. Ondro na tiri foe Jezus Kristus den ben kan tjari den tekst di ben taki foe wan hemel paiman, kon akroederi den tekst di e taki foe den blesi foe wan grontapoe paradijs. No wan enkri tra groepoe di taki den de kristen, abi wan krin verstan foe na afersi disi; ma fa ala den sani disi de sani di den soema e verstan, di ini den 100 jari di pasa, ben kisi leri foe na „getrouw en voorzigti srafoe”! Na bijbel e verteri krin, dati na siri foe Abraham ben sa de wan blesi — gi soema? No gi hensrefi, ma gi ala famiri foe libisoema (Gen. 22:17, 18; Gal. 3:16, 29). Den 144000 di tanapoe nanga na Lam tapoe na bergi Sion, sa rigeri nanga Kristus leki kownoe nanga priester — tapoe soema? No tapoe densrefi, ma tapoe den trawan foe na libisoema-famiri di sa libi tapoe wan paradijs-grontapoe. — Openb. 14:1; 20:4, 6; 21:4.
WARDERI GI JEHOVAH
8. San den fosi bijbelondrosoekoeman ben go verstan foe Jehovah nen nanga fundament égifasi?
8 Foedi Jezus Kristus ben gebroiki den memre foe na „srafoe”-klasse disi, na verstan foe den foe Gado Wortoe ben kon moro krin en soifri. Den ben kon verstan dati „Jehovah” de na nen foe na wan enkri troe Gado, di wani taki foeroe, en dati na nen disi de soso foe na Mekiman, na Moro Héwan (Ps. 83:18; 100:3). Gi den soema di e hori vaste na a leri foe Athanasius tapoe na tori foe na Dri-wan-gado, a no kan foe den verstan na waarheid dati. Den ben kisi ooktoe wan aparti verstan foe na moro prenspari égifasi foe Jehovah: koni, makti, geregtigheid nanga lobi. Na leri foe na kristenheid di e leri vagevuur nanga teego pina en di e leri dati heri grontapoe o drai den libi de contrari wan Gado di abi den sortoe moi egi fasi disi. — Rom. 11:33; Gen. 18:14; Deut. 32:4; 1 Joh. 4:8.
9. San den ben leri foe na reden foe sainde Gado ben libi ogridoe? (Job kapitel 1 en 2, Ezech. 23:49)
9 Foedi na leti tapoe Gado Wortoe ben kon moro krin en disi ben de akroederi nanga na gronprakseri di skrifi ini Spreuken 4:18, na pipel foe Jehovah ben bigin si moro krin foe sainde Jehovah Gado ben libi ala sortoe ogri nanga pina. No wan foe ala den trawan di e kari densrefi kristen ben man foe verklari disi. Foe sainde Jehovah Gado ben libi den sani disi? Foe na stré-aksi ede, di abi foe doe nanga na retifasi foe Jehovah universele soevereiniteit, en ofoe a verdini disi, en Satan nanga hen oproeroe ben taki dati disi no de so, en ooktoe foe na aksi ofoe libisoema ben sa kan hori hen getrouwfasi, wans san didibri ben sa kan doe.
„NO WAN PISI FOE GRONTAPOE”
10, 11. (a) Fa Johannes 17:16 kon de troe tapoe Gado pipel? (b) Sortoe wortoe foe Jezus leki wan bakapisi foe na neutraal standpunt foe den ben kon troe tapoe wan aparti fasi tapoe den?
10 Dati Jezus Kristus ben de alaten nanga hen „getrouw en voorzigti srafoe”-klasse, e kon moro fara na krin ini disi, dati den ben go bigin si na bigi difrenti mindri na organisatie foe Jehovah nanga di foe Satan Didibri. No wan intergeloof gi na pipel foe Jehovah! Den no de wroko makandra nanga falsi religie, no nanga no wan tra pisi foe Satan grontapoe (2 Kor. 4:4; 6:14-16). Tapoe den, en tapoe den wawan, Jezus wortoe ini Johannes 17:16 e kon troe: „Den no de wan pisi foe grontapoe, soleki mi no de wan pisi foe grontapoe.” Na neutraliteit foe den ini grontapoe trobi en politiek ben marki Jehovah Kotoigi foe datede troe troe leki aparti. Disi ben de spesroetoe so, di na Tweede Grontapoefeti ben bigin. Aladi na neutraal standpunt foe den ben tjari gi foeroe foe wi brada ini na ten di pasa en ini na ten disi, ebi vervolgoe, strafoe-oso en srefi dede, tog a ben de so, dati na standpunt disi, foeroe tron ben kon den boen en a ben abi leki bakapisi, dati na libi foe den no ben lasi, soleki ini Noord-Ierland, Libanon, Rodesia en tra kondre di feti ben priti den na toe.
11 Na neutraal standpunt disi ben meki srefi, dati den marki Jehovah Kotoigi leki troe kristen. Fa so? Foedi na mindri den, en soso mindri den, Jezus wortoe e kon troe, di wi e feni ini Johannes 13:34, 35: „Mi e gi oen wan njoen gebod, dati oen lobi makandra; soleki mi ben lobi oen, dati oen lobi makandra toe. Nanga disi ala soema sa sabi dati oen de mi discipel, efoe oen abi lobi mindri makandra.” Foedi den abi na lobi disi, den wégri ala kari foe teki prati ini stré mindri lo, naatsi, ras ofoe politiek partij.
12. Sortoe gronprakseri ben jepi kristen soema foe tjari kon akroederi nanga makandra tekst di ben gersi dati den de contrari makandra tapoe na tori foe saka ondro caesar?
12 Foedi Jehovah dienstknegti no de wan pisi foe na grontapoe, den de hori vaste na a gronprakseri di den apostel ben meki bekenti na den djoe rigeriman: „Wi moe gi jesi na Gado leki rigeriman moro leki libisoema” (Tori foe den apostel 5:29). Na a srefi ten den e poti prakseri tapoe na rai di e gi ini Romeini kapitel 13 foe saka ondro den hé makti. Fa den ben tjari kon akroederi nanga makandra den wet disi di gersi den de contrari makandra? Foe gebgb bvroiki na gronprakseri foe relatieve onderworpenheid. Ja, den kristen disi e gi jesi na den soema di abi makti — ofoe disi de now papa nanga mama, ini na tori foe pikin di no doro 21 jari; trowman, ini na tori foe trow-oema; basi ofoe rigeriman — solanga gi jesi no de contrari wan foe den gebod foe Gado. En foe gi jesi ede, no soso foe frede, ma ooktoe foe den konsensi ede, soleki Romeini 13:5 e komanderi den, soema na a heri grontapoe ben go respeki den leki vrédefasi, lobi-orde borgoe, en leki soema di e pai belasting foe den konsensi ede. A de srefi so, dati na ala fasi opregti en foeroe moeiti en horidoro e doe foe poti getrow moreel gronprakseri ini na geest nanga ati foe ala soema di moksi densrefi nanga den kristen disi. Den sortoe moeiti disi foe na sé foe Jehovah getrouw kotoigi de aparti mindri groepoe di e taki dati den de kristen. San e teri na kwaliteit, no o foeroe soema de.
13. Sortoe bijbel standpunt den soema ben teki di moksi densrefi nanga na „srafoe”-klasse tapoe na tori foe na gebroiki foe broedoe?
13 San e marki den kristen disi moro fara leki soema di no de wan pisi foe grontapoe, de na standpunt foe na gebroiki foe broedoe. Den soema disi di e tjari na nen foe Jehovah, de now now den enkriwan di abi wan krin verstan foe na gebod ini bijbel „foe hori joesrefi fri foe broedoe” en den e jere na gebod disi toe, wan gebod di abi foe doe nanga na santafasi foe na libi. Na jeje tanboen foe den e kon tapoe na fosi presi (Gen. 9:4-6; Tori foe den Apostel 15:28, 29). Na standpunt foe den foe broedoe meki den no de popu na foeroe soema bikasi den de hori densrefi na disi te na libi foe den now de foe lasi. Ma foeroe tron na standpunt foe den ben kibri den foe den takroe sébere sani di e kon nofotron nanga broedoetransfusie. O krakti en foeroe tron Gado Wortoe e taki foe na tori disi! Ma joe abi tra soema ete, boiti Jehovah Kotoigi, di nanga den heri ati e taki dati na gebod disi de so? Nono!
LOEKOE NA FESI
14. Tapoe sortoe sani na den fesi na „getrouw en voorzigti srafoe” e poti ai?
14 Leki wan loyaal waktiman na „getrow en voorzigti srafoe”-klasse e poti ai tapoe san Jehovah abi foe tjari kon. Foe na boen presi pe den de, den ben si na bewijsi di e kon moro bigi foe na kon krosibé foe na bigi benawtoe, di sa marki na kaba foe na seti foe sani, leki wan kon troe foe Jezus proféti wortoe ini Matteus 24 en 25, Markus 13 en Lukas 21. Wi kan de seker, dati baka na benawtoe, ini na njoen seti, bigi blesi poti gi na libisoema famiri. Wan letterlijk grontapoe paradijs, pe wan libisoema famiri e libi di Jezus Kristus ben bai fri! Fa dati de wan bigi sani di de na wi fesi! Ala soema di lobi waarheid nanga regvaardigheid, e lostoe, dati na rigerimakti foe Gado kownoekondre, di de so krosibé kon en den e tan begi foe hen, soleki Jezus ben leri disi. — Matt. 6:10; Op. 20:6; 21:4.
15. (a) San na „srafoe”-klasse ben moe doe, foedi noiti den ben de volmaakti? (b) San den soema di ben moksi densrefi nanga na „srafoe” ben moe doe?
15 Foe na howpoe disi ede, na „getrow en voorzigti srafoe” ben opo na ai foe na heri pipel foe Gado tapoe den marki foe den ten, di e sori tapoe na krosibé foe Gado kownoekondre-rigerimakti. Ma ini disi wi moe taki, dati na „getrow en voorzigti srafoe” disi noiti ben de geïnspireerd ofoe volmaakti. Den boekoe foe bepaalde memre foe na „srafoe”-klasse, di makandra de na kristen pisi foe Gado Wortoe, ben de geïnspireerd en sondro fowtoe, ma disi no de so foe sani di ben skrifi baka dati. San ben tjari kon na doro ini boekoe ini den dé foe Charles Taze Russell, na fosi president foe na Wachttorengenootschap, no ben de volmaakti; ooktoe den boekoe ini den dé foe J. F. Rutherford, na tra president, no ben de volmaakti. Te leki na dé foe tide, na leti di e kon moro krin tapoe Gado Wortoe nanga den historia sani, ben meki a de fanowdoe dati bepaalde kenki ben moe meki. Ma meki wi no lasi noiti na prakseri dati na bewégi foe ati foe na „srafoe” disi alaten ben de soifri en sondro gridifasi; alaten den ben abi wan boen bedoeling. Ooktoe den wortoe di wi e feni ini Romeini 8:28, ooktoe dja abi foe doe nanga dati: „Gado e meki ala hen wroko wroko makandra foe na boen foe den di lobi Gado, den di ben kari kon akroederi hen prakseri.” Ala kenki di ben tjari kon ini inzicht, ben gi den soema, di na „srafoe” disi a dini, troe troe na okasi foe sori no loyaliteit nanga lobi foe den, na sortoe foe lobi, di leki fa Jezus ben taki, ben sa de wan marki foe hen foetoeboi (Joh. 13:34, 35; loekoe 1 Petr. 4:8). Gi den soema di lobi Gado Wet troe troe no wan nakifoetoe de. — Ps. 119:165.
NA VERSTANFASI FOE DOE
16. Te wi loekoe ala sani di taki na fesi, sortoe bosroiti wi moe kon dan?
16 Na sortoe bosroiti wi de kon soleki wi ben loekoe na fesi na a historia foe Jehovah „getrow en voorzigti srafoe”, en te wi vergelijk disi nanga na historia foe na kristenheid? Disi: dati Jezus Kristus ben hori hensrefi na hen pramisi. Foe sensi na ten di a ben opo go na hemel te leki na dé foe tide, a ben de nanga na kristen gemeente di na „srafoe” dati e teki presi foe hen. Ala a ten dati na „srafoe” nanga den soema di moksi densrefi nanga hen e tan jere den gebod foe préki na boen njoensoe foe na Kownoekondre en foe meki discipel, na geest foe Jehovah e de foeroe tapoe den (Matt. 10:7; 24:14; 28:19, 20). Tan na Jezus Kristus, wani taki, tan na den soema di a ben wani foe gebroiki. Sortoe tra organisatie de boiti na troe kristen gemeente? Soso Satan organisatie, di de hen politiek „wilder meti” en hen Babylon grontapoekownoekondre foe falsi religie. — Openb. 13:1, 14, 15; 17:3-6.
17, 18. (a) Foe sainde a ben de wan law sani, dati son wan ben gwe libi Jezus foe san a ben taki foe na njan foe hen skin en a dringi foe hen broedoe? (b) Sortoe verstan fasi wi moe teki now foe datede?
17 Di Jezus ben taigi hen discipel, dati den no ben sa abi libi ini densrefi, efoe den no ben njan hen skin en no ben dringi hen broedoe, dan den alamala ben tanapoe fesi wan raitori. Foeroe foe den ben naki foetoe en no ben waka moro nanga Jezus. Soso nanga foe na wan enkri, moeiliki foe verstan verklaring foe Jezus, den ati ben bron sote, dati den ben libi hen. Fa dati ben de wan law sani! Foedi den ben doe so, den no ben loekoe den moi waarheid more na ai, di Jesus ben leri te leki na ten dati. En dan wi no e taki foe ala den wondroe di Jezus ben doe, di e bewijsi dati hen ben de na Messias, na Manpikin foe Gado, di den ben taki foe hen na fesi. — Loekoe Lukas 7:20-23.
18 Nanga reti Jezus ben kan aksi hen discipel: „Oenoe no wani go ooktoe?” Petrus ben abi na joisti piki: „Masra, na soema wi sa go? Joe abi wortoe foe teego libi; en wi ben bribi en wi ben kon sabi, dati joe de na Santawan foe Gado” (Joh. 6:67-69). Nanga wi loekoe dja na fesi, wan soema e doe ooktoe na wan verstan fasi foe tan moksi hensrefi nanga na „getrow en voorzigti foetoeboi”. Na wan sé na „srafoe” disi e meki „den wortoe foe teego libi” kon krin gi wi, aladi na a tra sé a de jepi wi foe poti den „wortoe” dati ini wi libi ini disi ten en foe wi teego tanboen. Wi no moe de Jehovah Gado nanga Jezus Kristus grantangi, dati wi abi na „srafoe” dati ini wi mindri?
19. Na sortoe fasi wi kan sori Jehovah Gado dati wi de grantangi foe den diniwroko foe na „getrow en voorzigti srafoe”?
19 Fa wi kan sori dati wi de grantangi? Tapoe moro leki wàn fasi. Wi kan sori disi foe wrokomakandra nanga na „getrouw srafoe” ini na prékiwroko en na meki foe discipel. Wi kan sori dati wi de grantangi ooktoe te wi njan foeroe foe na jeje njanjan di na „srafoe” disi e gi ini boekoe, tijdschrift, so toe te wi go na konmakandra. Ooktoe wi no moe frigiti foe begi ofoe Jehovah geest wani tjari na „srafoe”-klasse dati en tranga hen foe na wroko di Hen wani meki disi doe. En akroederi nanga den sani di wi abi, wi abi ooktoe na grani foe gi bijdrage na skin fasi, foe tapoe den kostoe di na grontapoe activiteit foe na „srafoe” disi e tjari kon. Ja, tapoe ala dem fasi disi, wi kan sori dati wi abi warderi foe na fasi fa Jehovah e gebroiki na „getrow en voorzigti srafoe” disi, aladi wi e sori nanga disi, dati wi abi wan libi, actief bribi, di de foe si nanga den wroko di wi e doe. — Jak. 2:17, 26.
[Faki na tapoe bladzijde 116]
DEN PRENSPARI LERI DI JEHOVAH KOTOIGI BEN POTI KRAKTI NA TAPOE
● Kon reti foe Jehovah nen nanga soevereiniteit
● Kristus „de noja” ini Kownoekondremakti ini na „ten foe na kaba”
● Jezus verloesoe-paiman e opo na pasi foe opobaka nanga teego libi
● Tata, Manpikin nanga santa jeje kenki foe makandra; no wan Dri-wan-gado
● Na meki foe sani na presi foe evolutie
● Libisoema sili e dede
● De aparti foe politiek nanga ogridoe foe grontapoe
● Respeki gi Gado wet foe broedoe nanga moraliteit
● Kristenheid na moro prenspari pisi foe na „Bigi Babylon”
● Na kweki foe lobi nanga wan kristen égifasi
● Na verplekti foe wan kristen foe préeki en foe meki discipel
● Dopoe de a dipi foe a sma krinkrin ondro watra leki wan marki foe gi hensrefi abra