Jehovah no sa gwe libi hen pipel
„Jehovah no sa trowe hen pipel, en a no sa gwe libi den soema, disi de foe hen”. — Psalm 94:14.
1, 2. San na proféti Samuël nanga na psalmsingiman ben taki foe na matifasi foe Jehovah nanga hen pipel?
„JEHOVAH no sa gwe libi hen pipel, foe hen bigi nen ede”, so na proféti Samuël ben taki. Tapoe na srefi fasi dati na psalmsingi-man e taki: „Jehovah no sa trowe hen pipel, en a no sa gwe libi den soema, disi de foe hen.” — 1 Sam. 12:22; Ps. 94:14.
2 Joe e poti vertrow ini den wortoe disi? Esther, Mordechaï nanga den djoe ini hen ten ben kan de seker dati Jehovah no ben sa gwe libi hen pipel? Meki wi go loekoe.
HANDRI NANGA VERTROW INI JEHOVAH
3. (a) San e pasa te Esther kon na fesi na kownoe sondro a ben kari hen? (b) San Esther e aksi?
3 Na di foe dri dé ben kon now sensi den djoe ini na kownoekondre foe Persia ben de nanga sari en ben meki wan bigin foe faste en begi na Jehovah. Nanga dekati na oema-kownoe Esther weri hen kownoe krosi en a tanapoe sondro foe na kownoe ben kari hen, ini na inisé gadri foe na oso foe na kownoe. Komoto foe na troon foe hen, Ahasveros e si na oema-kownoe foe hen. A de taki den moe kiri hen? Nono. A de langa na gowtoe tiki gi hen en hen e waka go more krosibé en fasi na edesé foe na tiki. Esther abi na boen-ati foe na kownoe en ai jere hen aksi: „San joe abi, o Esther, oema-kownoe, en san joe wani aksi? Te srefi na afoe foe na kownoekondre — ja, joe sa kisi!” Leki na piki tapoe disi, a de kari Ahasveros nanga na fosi minister Haman foe wan fesa-njanjan en na kownoe e teki na moi kari foe hen. — Esther 5:1-5.
4. San e pori na prisiri foe Haman baka na fesa-njanjan foe Esther?
4 Na kownoe foe Persia nanga na Agagiet Haman moro lati tapoe na dé dati de tapoe na wan fesa-njanjan. Baka wan pisiten na kownoe e aksi Esther: „San de na sani di joe wani aksi?” Leki wan piki tapoe dati, a de kari Ahasveros nanga Haman baka foe kon tapoe wan fesa-njanjan tamara foe hen. Haman e prisiri te a de gwe. Te na djoe Mordechaï, di e hori hen getrow fasi, no e béfi gi hen, na Amalekiet e kon foeroe nanga atibron, aladi a de dwengi hensrefi. Di Haman doro hen oso, a kari hen oema nanga hen mati kon na hen. A no kan dwengi hensrefi foe no gafa en foe verteri den fa Ahasveros ben poti hen more hé more ala tra granman nanga dinari foe na kownoe. — Esther 5:6-11.
5. San na oema foe Haman nanga hen mati ben gi hen leki rai foe doe nanga Mordechaï?
5 „En san de moro”, so Haman e go doro, „Esther, na oema-kownoe, no kari no wan tra soema leki mi nanga na kownoe foe kon tapoe na fesa-njanjan, di a ben sreka, en ooktoe tamara mi nanga na kownoe de na hen.” Tog wan sani de di no de so switi gi na Agagiet, bikasi a de taki moro fara: „Ma ala disi — noti foe disi e gi mi prisiri, solanga mi e si na djoe Mordechaï sidon ini na portoe foe na kownoe.” Na oema foe Haman nanga hen mati de seker dati den abi na loesoe. „Meki den meki wan postoe, di hé 50 el”, so den e taki. „Taigi na kownoe tamara-mamanten dati den moe anga Mordechaï na dati. Baka dati, go nanga prisiri nanga na kownoe na a fesa-njanjan.” Go prakseri pikinso! Na dede skin foe Mordechaï sa ben anga na wan postoe, di hé 50 el (22 meter) „Heri boen!”, na hémemre Haman e prakseri, en a meki den opo na postoe. — Esther 5:12-14.
6. Sortoe jeje fasi den salfoe kristen e sori ini na ten disi leki Mordechaï nanga Esther?
6 Te wi e wakti foe si den sani di o pasa na tamara foe hen, dan wi abi ten foe prakseri na fasi foe Mordechaï nanga Esther. Ala toe ben poti den vertrow tapoe Jehovah en den ben soekoe hen tiri. Foe na lobi foe hen gi Jehovah, meki Esther ben wani srefi foe lasi hen libi, di nanga dekati go na a kownoe sondro foe a ben kari hen. Soleki Mordechaï nanga Esther, dan salfoe kristen ini na ten disi e sori so wan srefi lobi gi na heri pipel foe Gado. En winsi kerki féjanti e vervolgoe den, den dienstknegti foe Gado ini na ten disi e handri nanga wan troe troe vertrouw ini Jehovah.
NA ANOE FOE JEHOVAH E KON MORO KRIN
7. San Jehovah kan doe nanga rigeriman, sodati den kan doe hen wani?
7 Efoe Jehovah wani dati dan a kan tjari en tiri rigeriman so, dati den doe hen wani. Wan odotaki nanga reti e taki: „Na ati foe wan kownoe de leki watrakriki ini na anoe foe Jehovah. Ala presi pe hen wani foe a go, a de meki a go” (Spr. 21:1; Dan. 2:21). Meki wi loekoe fa na anoe foe na Moro Héwan ini den dé foe Mordechaï nanga Esther ben kon moro krin.
8. San e pasa na wan seker okasi te Ahasveros no man sribi?
8 Na neti bifo na di foe toe fesa-njanjan, Ahasveros no man sribi, kande foe di na anoe foe Jehovah ben e wroko. Foedi na kownoe feni dati a frigiti foe doe wan sani tapoe wan ofoe tra fasi, a de meki den lési gi hen ini na boekoe foe tori di pasa. Te foe kaba a de jere na tori foe na loyaliteit, di Mordechaï ben sori, di a ben meki kon na krin na mofo, di Bigtan nanga Teres ben meki foe kiri na kownoe. Na kownoe e kon sabi dati na doe disi foe loyaliteit no ben kisi pai. Na so fasi na kownoe foe Persia e teki na bosroiti dati Mordechaï sa kisi grani.
9. Foedi Haman ben prakseri dati na hen ben sa kisi na grani, sortoe sani a ben taki ben moe doe pasa marki?
9 Na tamara mamanten froekoe na falsi Haman e kisi pasi foe go na kownoe Ahasveros. Ma bifo na Agagiet kan doe na ogri-ati plan foe hen, na kownoe e aksi: „San moe pasa nanga na soema di na kownoe srefi ben feni prisiri nanga hen?” Haman e prakseri na hensrefi: „Soema na kownoe ben sa abi moro prisiri foe gi hen grani dan leki mi?” Haman kande e si hensrefi kaba ini na rol foe na man di sa kisi bigi grani, en foe datede a de taki: ’Tjari na asi foe na kownoe go na doro nanga wan kownoe-ati tapoe hen ede. (Wan gewoon asi no boen nofo gi na hémemre Haman!) En meki na man dan weri na kownoe krosi foe na kownoe en meki a rij tapoe na publiki plen foe na foto en meki wan soema waka na hen fesi en bari: „So den e doe nanga na man di ini na grani foe hen na kownoe srefi ben feni prisiri.”’ — Esther 6:4-9.
10. (a) Sortoe bigi naki Haman ben kisi foe ondrofeni? (b) Na Agagiet e kisi pikin trowstoe foe hen oema nanga mati, baka san a doe foe gi Mordechaï grani?
10 „Esesi” Ahasveros e taki, „teki na krosi en na asi, joisti soleki joe ben taki en doe so nanga na djoe Mordechaï di sidon ini na portoe foe na kownoe. Loekoe boen dati joe doe ala den sani di joe ben taki.” Fa disi ben de wan bigi naki gi na hémemre Haman! Ma san a kan doe? No gi jesi na a komando disi ben sa wani taki wan seker dede. Foe datede a no de teki langa ofoe Mordechaï, di weri na kownoe krosi en di sidon tapoe na asi foe na kownoe, e rij tapoe na publiki plen, en na hen fesi wan Haman di den lagi en di e bari tranga: „So den e doe nanga na man di ini na grani foe hen na kownoe srefi ben feni prisiri.” Baka dati Mordechaï e drai go na a portoe foe na kownoe, aladi Haman e feti foe go na oso, ai sari nanga hen ede ini sjen. Hen oema nanga mati no e gi hen trowstoe ma den e taki: „Efoe joe bigin foe fadon gi Mordechaï, di de foe na siri foe den djoe, dan joe no sa man tanapoe na hen fesi, ma sondro mankeri joe sa fadon na hen fesi.” Ja, dati a ben moe gi Mordechaï grani ini publiki, de gi na oema nanga mati foe na Agagiet wan marki na fesi, dati Haman sa fadon na fesi foe na djoe disi. Pikinmoro Haman no ben jere den takroe wortoe efoe den oso-wrokoman foe na kownoe doro baka foe tjari hen go na di foe toe fesa-njanjan foe Esther. — Est. 6:10-14.
BEWIJSI NANGA DEKATI SOEMA WAN SOEMA DE EN SONDRO FREDE TJARI DATI KON NA KRIN
11, 12. (a) San Esther e taki foe hensrefi nanga hen pipel na mindri na di foe toe fesa-njanjan pe Ahasveros nanga Haman de? (b) Fa Haman e doe te a bewijsi gi, dati a de wan gongosaman en foe sainde Esther no e meki hen ati kon safoe?
11 Na mindri foe na fesa-njanjan Ahasveros e aksi: „San joe wani aksi, o Esther, na oema-kownoe?” Dekati de fanowdoe foe piki, ma na oema-kownoe e taki: „Efoe mi feni boen-ati ini joe ai, o, kownoe, en efoe a de boen gi a kownoe dan meki den gi mi mi égi sili tapoe na begi foe mi en na pipel foe mi tapoe na begi foe mi. Bikasi den seri mi nanga mi pipel foe pori en kiri wi poeroe. Efoe den ben seri wi soso leki srafoe en soso leki oema-foetoeboi, dan mi ben sa tapoe mi mofo. Ma na nowtoe no fiti te a de go makandra nanga sjen gi na kownoe.” — Esther 7:1-4.
12 San disi wani taki? Ja, oema-kownoe Esther na wan djoe-oema en na komando ben meki dati na pipel foe hen moe kiri poeroe! Ahasveros wani sabi soema de frantwortoe foe disi. Nanga dekati Esther e taki: „Na man, na stréman nanga féjanti, de na takroe Haman.” Na oema-kownoe de so fair foe tjari now kon na krin na Amalekiet di skreki, en di de drape hensrefi. Nanga dekati Esther e kragi Haman leki na soema di de frantwortoe foe meki soema si na afersi krin krin verkeerti, aladi a meki den kon sabi hen leki wan takroe gongosaman, di e doe ogri na den afersi foe na kownoe foe Persia. Nanga atibron na kownoe e waka gwe ini na palési-djari. Na Haman di skreki en di sabi dati a no kan verwakti sari-ati foe Ahasveros, e fadon tapoe na rostoe-bedi pe Esther ben didon na heri ten. A de begi efoe a kan tan na libi. Esther no e meki hen ati kon safoe, bikasi disi no ben sa de wan prisiri sani ini na ai foe Jehovah, di ben poti na komando dati den Amalekiet soema ben moe kiri poeroe krin krin. — Esther 7:5-8.
13. San e pasa nanga Haman tapoe na komando foe kownoe Ahasveros?
13 Efoe Ahasveros drai baka foe na djari, a de si na Haman di no sabi san a moe doe tapoe na rostoe-bedi foe Esther en a bari tranga: „A wani go didon nanga tranga na a oema-kownoe na ini mi oso ooktoe?” Wantron wantron na kownoe e kroetoe na ogri Agagiet dati a moe dede. A no e teki langa ofoe na dede skin foe Haman e anga na a postoe, di ben meki gi Mordechaï. Soso te disi pasa, dan na atibron foe na kownoe e kon kowroe. — Esth. 7:8-10.
14. Sortoe vergelijking wi kan meki ini na ten disi tapoe na tori, dati Esther ben meki hen srefi bekenti leki wan djoe-oema en nanga dekati ben sori dati Haman de wan féjanti foe na pipel foe Gado?
14 Te wi loekoe baka, dan wi e si, dati na dekati Esther no wawan e tjari kon na krin dati hen de wan djoe-oema, ma ooktoe nanga dekati e sori dati Haman de leki wan féjanti foe na pipel foe Gado. Ini wi ten, den wan di sensi na Fosi Grontapoefeti ben tron salfoe foetoeboi, makandra nanga den fositen salfoewan, tapoe na srefi fasi ben meki densrefi bekenti nanga dekati leki jeje djoe en leki kotoigi foe Jehovah (Jes. 43:10-12). En seker den abi féjanti. Foe eksempel, leki Haman, den kerki-fesiman foe na kristenheid, ben proberi foe Jehovah pipel ben pori. Ma troe kristen nanga dekati ben meki soema kon sabi den takroe-ati féjanti disi — di nanga den plan foe den no e kon moro fara leki na sondro konsensi Amalekiet Haman. Disi de so, foedi Jehovah pipel, di e taki Gado Wortoe nanga dekati, abi na jepi foe Gado foe kaka foetoe gi den barki nanga vervolgoe. — Jes. 54:17; Tori foe den Apostel 4:29-31.
WAN KENKI FOE SARI GO NA PRISIRI
15. San e pasa nanga na oso foe Haman en sortoe positie Mordechaï e kisi?
15 Ahasveros e gi na oso foe na dede Haman na Esther, di ben verteri na kownoe foe na famirifasi foe hen nanga Mordechaï. Ooktoe na kownoe e poeroe hen zegellinga, di a ben teki foe Haman, en gi dati na a loyaal djoe disi en na so fasi Mordechaï e tron fosi minister na presi foe na Agagiet. Akroederi nanga na makti di Esther ben kisi foe na kownoe, meki a de poti Mordechaï tapoe na oso foe Haman. — Esther 8:1, 2.
16. Sortoe makti Ahasveros e gi foe na boen foe den djoe leki wan piki tapoe na begi foe Esther?
16 Ete wan tron Esther e teki na kans foe lasi hen libi foe hen pipel ede, foedi a de go na a kownoe sondro foe disi ben kiri hen en a de nanga watra na ai na hen foetoe. Ahasveros e langa na gowtoe teki gi hen en Esther e opo tanapoe en aksi: „Efoe a boen na a kownoe en mi ben feni boen-ati na hen fesi, dan meki wan papira skrifi foe meki na ogri plan foe Haman kon tron noti. Fa mi kan man foe loekoe na ongolokoe foe mi pipel en na pori foe mi famiri?” Foedi den wet foe den Meden nanga Persen soema no kan kenki moro, meki Ahasveros e gi Esther nanga Mordechaï makti foe skrifi ini hen nen wan kontra-wet foe na boen foe den djoe. — Esther 1:19; 8:3-8.
17, 18. (a) Sortoe boen Mordechaï e doe gi den djoe ini na heri kownoekondre foe Persia en sortoe reti den e kisi nanga na tori foe 13 Adar? (b) Fa den djoe e feni na kontra-wet?
17 Nanga disi, na njoen fosi minister di den ben poti ben bigin foe doe wroko. Tapoe a 23 dé foe Sivan (mei-juni) Mordechaï e seni kari den sekretarsi foe na kownoe en ai meki den skrifi wan kontra-wet. Heri esi den djoe, den tra volkoe-groepoe nanga lantiman — satrapen (ofoe ondro-kownoe), lagi tiriman nanga granman, ini den 127 kroetoe-district foe Persia sa abi hen. Mordechaï meki den papira kisi krakti, foedi a poti na zegelmarki foe na kownoe na tapoe. En san na njoen wet e taki? Dati kownoe Ahasveros ben gi den djoe na reti foe konmakandra en foe feti foe den sili, ja, foe pori den soema di sori féjantifasi gi den. Den sa moe feti tapoe na di foe 13 foe na moen Adar (februari-maart), na dé di ben poti na a bigin foe na kiri poeroe foe den! Sondro drai drai, boskopoeman ini groepoe e gi den gaw post-asi foe den faja foe lon moro tranga foe tjari den kontra-wet go na ala pisi foe na bigi kownoekondre. — Esther 8:9-14.
18 Na fosi minister Mordechaï e go na fesi na kownoe ini wan kownoe blaw krosi nanga linnen. A de weri wan redipurper wol mantel foe fini krosi en a abi wan gowtoe kroon tapoe hen ede. Nanga reti a kan prisiri foe na kontra-wet. Ini Susan foe dat-ede prisiri de en te foe kaba wan prisiri-babari, fesa-njanjan nanga wan boen dé e de gi den djoe ini na heri kownoekondre. Boiti dati, na skreki foe den djoe ben fadon tapoe na heri pipel en son wan foe den tron proseliet soema. — Esther 8:15-17.
19. Efoe joe prakseri na komplot foe Haman, na kontra-wet nanga tra sani di ben abi foe doe nanga dati, joe e si wan tranga-skin ini disi gi kristen ini disi ten?
19 Te kristen soema ini disi ten e prakseri foe san den ben si djonsrode nanga den jeje ai, dan disi e gi den foeroe dekati. Soleki fa Haman ben meki plan foe poeroe den djoe na skinfasi na pasi, na so den kerki tiriman foe na kristenheid ben proberi foe kiri poeroe den disiten jeje djoe, Kristus jeje brada. Jezus, di abi kownoe makti tapoe na grontapoe soleki Ahasveros ben tiri tapoe na heri kownoekondre foe Persia, ben gi pasi na den sortoe moeiti dati, ma a ben meki a de so ooktoe dati Jehovah kristen kotoigi kan feti gi den libi. Boiti dati, foeroe doesoen reti-ati soema, soleki den proseliet foe na ten foe Esther, teki na sé foe den jeje djoe disi, foedi den teki na troe aanbegi. — Zach. 8:23; Gal. 6:16.
JEHOVAH E JEPI HEN PIPEL
20. Fa ai go nanga den djoe nanga den féjanti foe den tapoe 13 nanga 14 Adar?
20 Den moen pasa now kaba en na di foe 13 dé foe na moen Adar doro now. Baka di den konmakandra ini den foto foe den, den djoe e poti anoe na den soema di e soekoe na ongolokoe foe den. No wan soema man foe tanapoe na fesi na pipel foe Gado. Srefi den lantiman e jepi den, foedi na frede gi Mordechaï ben fadon tapoe den sortoe man dati. Ma moro foeroe a ben doe kon, foedi Jehovah ben jepi den foe kiri den soema di no ben wani si den na ai. Soso ini na fortresi Susan wawan den e kiri 500 man, en Haman 10 manpikin den e kiri toe. Den e kiri ini na heri kownoekondre 75 doesoen féjanti, ma no wan pe den djoe e poti anoe tapoe den goedoe foe den féjanti. Akroederi nanga na begi foe Esther na kownoe Ahasveros e gi pasi na den djoe foe feti ete wan dé ini na mamafoto Susan en ini na dé dati den kiri ete 300 man, ma sondro foe den teki wan goedoe. Ooktoe den dedeskin foe den manpikin foe Haman e anga na oedoe. Now di den féjanti foe den dede kaba, den victori djoe ini den dorosé district e meki na di foe 14 nanga 15 dé foe Adar de wan ten foe fesa-njanjan nanga prisiri-babari. — Esther 9:1-19.
21. Sortoe fesa Mordechaï e gi den djoe komando foe hori ala jari, en san de na prakseri foe dati?
21 Jehovah ben verloesoe hen pipel, en disi den ben moe hori na prakseri. Foe datede Mordechaï e seni papira gi den djoe ini na heri kownoekondre. Nanga sortoe prakseri? Foe poti na verplekti na den tapoe foe teki 14 nanga 15 Adar leki dé foe fesa-njanjan, na gi foe presenti en foe abi prisiri. Bakaten ete wan brifi e seni go na den djoe foe na afersi disi, di a oema-kownoe Esther e gi hen krakti. Na verloesoe-fesa disi nen Poerim, wan nen di kon foedi Haman ben meki den trowe na Poer ofoe lot foe feni na moro boen dé foe na plan foe kiri den djoe en te foe kaba na sani disi ben kon tapoe hen égi ede. — Esther 9:20-32.
JEHOVAH E VERLOESOE DEN REGVAARDIKI WAN
22. San Mordechaï, di abi wan hé rigeri positie, e tan doe foe na boen foe na pipel foe Gado?
22 Gi Esther, Mordechaï en den tra djoe na toemsi ogri ten pasa kaba. Jehovah no ben libi hen pipel. Baka wan pisi ten kownoe Ahasveros e poti srafoe-wroko tapoe na kondre nanga den eilanti foe se. (Ini na rigeri foe hen a ben meki kon klari foeroe foe den bowwroko di hen papa Darius 1 ben bigin ini Persépolis). Mordechaï abi wan hé rigeri positie — a de baka na kownoe, srefi na di foe toe man. Na getrouw djoe disi di na pipel foe Gado e erken en e respeki, tan wroko gi na boen foe den en e taki fri gi ala den bakatenpikin foe den. — Esther 10:1-3.
23. Sortoe toemsi moi égi fasi Mordechaï nanga Esther ben sori?
23 Troe troe, Mordechaï ben de wan man foe bribi, dekati, foe teki bosroiti nanga loyaliteit na Jehovah nanga hen pipel. Esther ben de wan koni oema di ben tapoe hen mofo, te disi ben de fanowdoe, ma di ben taki sondro frede tapoe na joisti ten. A ben teki rai foe Mordechaï, srefi te na teki foe na rai ben kan meki a lasi hen libi. Na moi en sakafasi oema disi ben sori troe troe lobi, a no prakseri nomo hen égi boen, nanga loyaliteit gi hen pipel. Esther nanga Mordechaï ben bribi ala toe dorodoro tapoe Jehovah en den begi foe Gado kibri den.
24. Sortoe djaranti na pipel foe Jehovah kan abi ini disi ten, efoe wi loekoe san pasa ini fa Gado ben handri nanga Mordechaï, Esther nanga tra djoe?
24 Fa disi de moi eksempel gi den dienstknegti foe Gado ini disi ten! Wans vervolgoe nanga féjantifasi de, tog den doe skowroe na skowroe dienst en den e tan getrouw na Jehovah en nanga makandra. Ja, den e bribi troe troe, dati Jehovah sa jepi den en fri den, soleki a ben jepi en fri Esther, Mordechaï nanga hen pipel (Fil. 1:27-30). A de troe dati „den ongolokoe foe na regvaardiki wan de foeroe, ma Jehovah e verloesoe hen poeroe foe ala dati” (Ps. 34:19). Meki wi meki bekenti na grani foe Gado en meki wi poti alaten vertrouw tapoe hen, bikasi Jehovah no libi hen pipel.