Tan krin ini na tjari foe presenti
„Gi Jehovah na glori di fiti hen nen; tjari wan presenti en kon na den gadri foe hen. Boigi na fesi foe Jehovah ini santa moi fésti-krosi.” — Psalm 96:8, 9.
1, 2. Foe sainde na pipel foe Gado moe de soifri, en fa disi ben poti ini na prakseri foe den djoe?
NA SANTAFASI, soifrifasi ofoe krinfasi foe Jehovah e aksi dati hen pipel tan soifri (1 Petr. 1:14-16). Na sani disi ben poti tapoe wan krakti fasi ini na prakseri foe den Israëlsoema nanga jepi foe den seti foe na wet foe Mozes. Den ben moe tan aparti foe den hoeroedoe nanga porifasi foe den naatsi di ben libi lontoe den en den ben moe loekoe boen foe no fasi wan dede skin, ofoe wan tra sani san ben kan doti den en ooktoe den no ben moe njan meti di no ben krin. — Lev. 11:4-8, 10-20, 24, 25; 18:3-24.
2 Te den Israël soema ben go feti leki sroedati, dan den ben de ondro na komando foe hori na kampoe foe den sroedati krin. Na wet ben taki: „Na kampoe foe joe moe de troe troe santa, sodati Jehovah no si wan sani di no fiti na joe en troe troe sa drai baka foe waka nanga joe” (Deut. 23:14). Efoe wan Israël soema no ben de krin tapoe wan ofoe tra fasi, dan a ben moe „wasi hen krosi en te leki na neti a no ben de krin” (Lev. 11:40). Srefi wasi no ben de nofo. Soso te baka sondongo, wan njoen dé ben bigin, soleki den Hebré-soema ben gwenti foe teri dé, dan na soema ben sa kon ini wan joisti positie baka na fesi foe Jehovah. Ini na pisiten dati Israël ben waka lontoe ini na sabana, nanga someni miljoen soema ini na kampoe, a no ben de wan pikin sani foe hori na wet foe Gado foe krinfasi hé.
3. Sortoe frantwortoe den priester foe na lo foe Aäron ben abi tapoe na tori foe krinfasi?
3 Foe ben kan tjari wan ofrandi kon di Gado ben sa teki, dan wan Israëlsoema ben moe de krin na ceremonieel fasi (Lev. 15:31). Den priester ben abi na wroko foe hori na wet foe Gado foe krinfasi hé, en densrefi ben moe hori soifrifasi en jepi den kompe Israëlsoema foe den foe de ini wan boen fasi foe tjari ofrandi di Gado ben sa feni boen. — Mal. 2:7.
4. Fa Jehovah ben si slagti-ofrandi foe den Israëlsoema di no ben hori hen wet?
4 Di den Israëlsoema no ben hori den wet foe Gado foe wan joisti waka nanga libi, dan no wawan den slagti-ofrandi foe den no ben abi warde, ma den ben de troe troe wan tegoe sani gi Jehovah Gado. Na bijbel taigi wi: „Na slagti-ofrandi foe wan ogrisoema de wan tegoe sani gi Jehovah, ma na begi foe den opregtiwan de wan prisiri gi hen” (Spr. 15:8). „Na soema di slagti wan man kaw, de leki wan soema di naki wan man trowe. Na soema di tjari na skapoe leki ofrandi, de leki wan soema di e broko na neki foe wan dagoe. Na soema di e tjari wan presenti — agoe-broedoe! Na soema di e pristeri switi smeri kandra leki wan sani foe memre, de leki wan soema di e taki wan blesi nanga afkodré wortoe. Den de ooktoe den soema di ben teki den égi pasi en ini den tegoe sani foe den den sili foe den ben abi prisiri.” — Jes. 66:3.
5. Foe sainde wi moe broko wi ede now foe na positie foe wi na Gado?
5 Den retidoe gronprakseri di ben poti ini na wet di Gado ben gi lsraël, no kenki. Alaten ini ala situatie en ondro ala omstandigheden joe kan gebroiki den. Foe datede, den kristen kotoigi foe Jehovah e doe boen ini disi ten foe ondrosoekoe ernstig den égi positie na fesi Jehovah. Ibri soema ben sa kan aksi hensrefi: „Mi e span misrefi nanga mi verstan, na moreel, skin nanga jeje-fasi foe tan krin? Misrefi e doe wan sani foe na krin fasi foe na kristen gemeente go na fesi — wan krinfasi, di de trafasi leki na ogri doti geslacht? Ini na fasi fa mi e sorgoe foe mi oso nanga tra goedoe en a fasi fa mi e gebroiki disi en ini disi de ooktoe mi skin foe meti, mi e sori dati mi e hori misrefi soifri na a pasi foe Jehovah? Mi kan taki disi foe na heri fasi foe waka nanga libi foe mi”. Na ja-piki foe wi tapoe den aksi disi, ben sa kan de wan bewijsi, dati wi e poti prakseri tapoe na bijbel vermane foe kibri wisrefi foe „ibri vlaka foe skin nanga geest”. — 2 Kor. 7:1.
LERI FOE TRA SETI FOE NA WET FOE SLAGTI-OFRANDI DI GADO E TEKI
6. San na wet ben taki foe na salfoe-oli?
6 Na sani di taki ini na wet foe Mozes foe na salfoe-oli e sori ooktoe krin o prenspari a de foe hori Gado wet foe santafasi hé. Di Mozes ben kisi na spesroetoe recept foe meki na salfoe-oli, a ben kisi fini komando foe na gebroiki foe na oli disi. Wi e lési: „Disi moe tan wan santa salfoe-oli gi mi ini joe geslacht. Joe no moe wrifi no wan soema skin nanga hen en no wan sani moe meki nanga den srefi sani disi na ini. A de wan santa sani. A de tan wan santa sani gi joe. Ala soema di meki so wan salfoe en na soema di poti pikinso foe hen tapoe wan vreemde soema, moe koti poeroe foe hen pipel” (Ex. 30:31-33). Efoe wan soema no ben tan respeki na santa prakseri foe na salfoe-oli, dan wan soema ben meki na fowtoe di a verdini foe dede.
7. Sortoe toemsi prenspari leri wi kan leri foe den komando foe Gado foe na salfoe-oli?
7 Disi e gi wi toemsi prenspari leri. Ne bijbel e tjari kon na krin dati na oli de wan sani di e teki na presi foe santa jeje. (Loekoe Zacharia 4:2-6). Na bigi Kownoe-priester Jezus Kristus no ben salfoe nanga salfoe-oli, ma nanga santa jeje (Matt. 3:16, 17; Luk. 4:18; Hebr. 1:8, 9). Wi moe abi foe datede troe troe na moro bigi respeki gi Gado jeje en doe ala moeiti foe waka baka na tiri foe hen. Ini disi de ooktoe, dati wi tan hori wan boen konsensi, „foe wi no moe meki na geest sari” ofoe veragti hen (Ef. 4:30). En foedi Jehovah Gado, e bow na kristen gemeente nanga jepi foe hen jeje, dan wi moe loekoe boen, dati wi no gi libisoema na grani foe sani di e doe kon (1 Kor. 3:5, 6). Na fasti bribi foe wi ini den bijbel profétitori e sori toe dati wi abi wan joisti houding gi na jeje (geest) di de frantwortoe foe den profétitori disi (2 Petr. 1:21). Den wortoe nanga doe foe wi e sori, dati wi e „verwakti njoen hemel nanga njoen grontapoe” en dati wi wani srefi srefi, dati someni tra soema leri sabi na bigi howpoe disi? — 2 Petr. 3:13, 14.
8. San na wet ben skrifi foe switi smeri ofrandi?
8 Soleki a ben de nanga na salfoe-oli, na so Gado wet gi Israël spesroetoe komando foe na switi-smeri ofrandi. Baka te a bijbel kari den sani di moe de ini na switi smeri en fa a ben moe meki, dan a de taki: „A moe de santa gi oenoe. En na switi smeri di joe meki nanga den sani disi, joe no moe meki gi joesrefi. A moe de gi joe wan santa sani gi Jehovah. Ibri soema di meki so wan sani foe feni na smeri foe hen switi, moe koti poeroe foe na pipel foe hen” (Ex. 30:34, 38). Na gebroiki foe na santa switi smeri tapoe wan fasi di no fiti, no ben mag. San wi kan leri foe disi?
9. (a) San wi e lési ini Psalm 141:2 en Openbaring 5:8 foe na betekenis foe na switi smeri ofrandi? (b) Fa wi kan sori dati wi e warderi na grani foe begi?
9 Na switi smeri de wan agersi fasi foe den begi foe Gado getrouw dienstknegti di Gado e teki. Na waarheid disi e kon na fesi ini Psalm 141:2: „Na begi foe mi moe doro te na joe fesi leki switi smeri ofrandi, en te mi opo mi anoe, dati moe de leki wan sabaten-karoe-ofrandi.” Boiti dati, wi e lési ini na boekoe Openbaring (5:8), dati „na switi smeri ofrandi wani taki den begi foe den santawan”. O prenspari a de dati wi e warderi foeroe na grani foe begi! Wi kan sori na warderi disi te wi e begi alaten en foe sorgoe dati den begi foe wi de akroederi nanga na wani foe Gado (1 Joh. 3:21, 22; 5:14, 15). Begi nanga wan verkeerti bewégi foe ati en pe na soema e prakseri hen égi boen nomo, joe ben kan agersi nanga na verkeerti gebroiki foe wierook en na hemel Tata foe wi no sa arki nanga boen den begi dati. — Jak. 4:3.
10. Sortoe rai na bijbel e gi foe soema kan begi na fesi na gemeente na Gado?
10 Foedi begi de so wan prenspari pisi foe na troe aanbegi, dan man di e begi na fesi na gemeente, moe abi wan waka nanga libi di de wan eksempel. Na apostel Paulus ben gi Timoteus na rai disi: „We, foe datede mi wani foe den mansoema moe begi na alape, den moe opo santa anoe sondro atibron en sondro trobi” (1 Tim. 2:8). Sondro vlaka foe deloyale doe na Gado nanga libisoema en fri foe ogri firi, den sortoe man disi ben kan teki presi foe na gemeente na fesi foe Gado. Efoe wi loekoe na ernst foe na begi, dan wi sa moe kibri wi prakseri, foe disi no moe go tapoe tra sani te trawan e begi na Gado foe na boen foe wi.
11, 12. (a) San na wan pramisi? (b) O ernstig a ben de leki fa na wet taki foe no hori wan pramisi?
11 Na seti foe na wet tapoe na meki foe pramisi ben de krosibé nanga na regeling foe tjari slagti-ofrandi. Den Israëlsoema ben kisi na komando: „Joe moe gi Jehovah wan faja-ofrandi, wan bron-ofrandi ofoe wan slagti-ofrandi, foe meki wan spesroetoe pramisi kon troe” (Num. 15:7). Foer pramisi ben meki foe poti krakti gi wan begi foe kisi na boen-ati nanga jepi foe hen. Nanga na kroederi, dati te na Moro Héwan jere na begi, dan na soema di ben meki na pramisi e verplekti hensrefi nanga hen fri wani foe doe wan spesroetoe sani ofoe no doe wan activiteit di a abi na reti foe doe hen.
12 Na pramisi ben abi troe troe na krakti foe wan sweri. Efoe wan soema no ben doe leki fa a ben pramisi, dan disi ben de wan ernstig afersi, soleki e kon na krin ini na verklaring foe na wet di e kon now: „Efoe joe pramisi Jehovah joe Gado wan sani, den joe no moe drai drai foe pai dati, bikasi Jehovah joe Gado sondro mankeri sa aksi dati foe joe, en a ben sa de foe joe sé troe troe wan sondoe. Ma efoe joe no pramisi, dan a no sa tron foe joe sé sondoe.” — Deut. 23:21, 22.
13. Fa a moe de nanga wi wortoe leki kristen, akroederi nanga na wet foe Gado?
13 Ini disi wi kan leri na gronprakseri, dati wi hemel Tata e verwakti foe wi dati ini ala pisi foe na libi wi de opregti nanga getrouw. Wi moe abi na srefi lostoe leki na psalmsingiman David: „Meki den wortoe foe mi mofo en da prakseri foe mi ati moesoe de so na joe fesi, foe joe kan teki den, o Jehovah, mi krakti en mi verloesoeman (Ps. 19:14). Te disi de so, dan wi sa poti prakseri tapoe na vermane foe na discipel Jakobus: „Meki na ja foe joe wani taki ja en na No foe joe no, sodati joe no kon ondro wan kroetoe” (Jak. 5:12). Ja, na wortoe foe wi moe de so getrouw leki wan papira pe joe nen de na ondro. Trawan moe abi na vertrouw dati wi e hori wortoe. Foedi Jehovah e verwakti foe hen dienstknegti dati „den taki waarheid ibriwan foe den nanga hen naaste”, dan wan soema di no e hori wortoe en di no de opregti, no kan verwakti, dati na Moro Héwan sa loekoe hen ofrandi nanga boen.
14, 15. (a) Sortoe seti foe fésti na wet ben gi? (b) Den fésti disi e feni den parallel ini den bigi konmakandra foe kristen soema ini disi ten en san 1 Korinte 5:7, 8 e sori?
14 Ete wan kontren foe kristen activiteit de en wi e doe boen foe wegi san na wet ben taki foe dati. Jehovah ben gi hen pipel Israël na komando foe hori dri tron ini wan jari fesa. Ibri Israël soema di ben de wan mansoema moe ben fisiti disi (Deut. 16:16). Gi foeroe foe den a ben wani taki wan hebi reis, nanga na ongemak foe no de na oso. Ini disi ten wi e fisiti ala jari 2 ofoe 3 bigi konmakandra en foe de drape e aksi foe wi kande ofrandi. Wi e doe na fanowdoe moeiti foe fisiti congres, foe di wi wani njan switi foe de nanga wi brada en foe njan switi foe na seti foe na jeje njanjan?
15 Moro sani foe wi de ini na tori disi dan soso foe abi warderi gi congres foe Gado pipel. Foe sainde? Foedi Gado no gi wi soso foe hori spesroetoe dé nanga fésti, soleki den Israëlsoema (Kol. 2:16, 17). Na apostel Paulus skrifi: „Foe datede oen moe poeroe na owroe sroedeki foe oen kan kon wan njoen lala-brede, soleki (foe taki reti) oen de sondro swa kaba. Ja, bikasi wi abi wan Paaskalam toe, di ben slagti foe wi ede, dati na Kristus. Foe datede meki wi hori Paaska no nanga. da owroe sroedeki, en no nanga na sroedeki foe ogri nanga takroedoe, ma nanga den masoo foe opregtifasi nanga waarheid” (1 Kor. 5:7, 8). Jezus Kristus, di de na troe troe Paaskalam, soso wan tron offer hensrefi. Foe datede meki na heri waka nanga libi foe wi ben kan agersi nanga na fesa foe masoo (brede di no abi swa). Wi de klari foe poeroe san de sondoe foe kan hori kibri wi égi krinfasi nanga di foe na gemeente? A de troe troe fanowdoe foe libi aladé nanga den regtvaardiki wet, efoe wi wani dati Gado teki na diniwroko foe wi.
NA BIGI SORGOE FOE JEHOVAH
16. (a) Nanga jepi foe soema Jehovah ben gi krakti vermane ini na di foe féfi eeuw bifo wi G.T.? (b) Fa a ben de ini na ten dati nanga rigerimakti?
16 Foedi Jehovah no e feni wini ma a de moro foeroe gi wi égi tégo tanboen, dati a de kari wi foe tjari ofrandi kon, wi de doe boen foe poti prakseri tapoe den switi warskow foe den sani di e meki a teki wi presenti. Ini na di foe féfi eeuw bifo wi G.T. Jehovah ben gi nanga mofo foe hen proféti Maleachi krakti vermane na den soema di ben taki, dati den ben aanbegi hen. Ini na ten dati, na Grontapoe-makti foe Persia ben de na makti di ben e tiri. Foe kan meki granman tiri tapoe wan fasi di fiti wan grontapoe-kownoekondre en foe teki den belasting gi lanti, dan den tiriman disi ben kisi makti foe kiri en meki na na libi den borgroe foe den difrenti district foe den. Foe na bigi makti foe na granman meki na moro bigi pisi foe den borgroe no ben pai wawan den belasting, ma den ben e tjari wan extra presenti gi hen. Den no ben wani foe hen ati bron nanga den en lasi den égi libi.
17. Fa den Israëlsoema nanga den priester foe den ini na ten foe Maleachi ben tjari presenti di Jehovah ben teki?
17 Te wi verstan na bakagron disi dan wi e verstan fa den wortoe foe Jehovah nanga mofo foe Maleachi ben fiti. Na Moro Héwan ben tjari wan sani kon ini na prakseri foe den Israëlsoema. Nanga mofo foe Maleachi a ben sori fa a ben de wan sondoe sani foe tjari breni, lan nanga siki meti leki slagti-ofrandi en dati den priester teki den sortoe vlaka ofrandi dati. Moro fara na tjalansi ben kon: Tjari hen (na ofrandi-presenti foe joe) grantangi go na a granman foe joe. A sa abi prisiri nanga joe en teki joe nanga switifasi na oso?” (Mal. 1:7, 8). Den Israëlsoema no ben afoe prakseri foeroe foe verstan, dati na bakapisi no ben sa boen te den ben sa doe so nanga wan libisoema. granman. Fa den ben kan howpoe foe kisi tapoe so fasi na boen-ati foe na bigi Kownoe Jehovah? Disi no ben kan. A ben de toemsi prenspari gi den foe handri akroederi na dekati foe Maleachi: „Now dan, safoe na ati foe Gado, foe a kan sori wi boen-ati” (Mal. 1:9). Soso te den ben doe leki Jehovah ben gi komando, den ben sa kisi hen boen-ati.
18. Fa kristen soema ben kan meki na srefi fowtoe foe no broko den ede soleki den Israëlsoema ini na ten foe Maleachi?
18 Ini na ten disi wi moe ondrosoekoe boen, dati wi njan boen foe den eksempel di skrifi ini den Santa Boekoe (Rom. 15:4). Wi no kan gi pasi foe gi presenti foe skijn nomo soleki Ananias nanga Safira ben doe disi, aladi wi de feti troe troe baka wi égi afersi (Tori foe Apostel 5:1-11). A no ben sa de wan sani di fiti foe gebroiki wi krakti, goedoe en koni tapoe so wan fasi foe wi égi prisiri, dati praktisch noti tan abra foe jepi trawan na skin en jeje fasi. Wi ben sa taki troe troe gi Jehovah taki: „Mi e gi joe san tan abra”. Disi no ben sa meki a mandi? Wi ben sa kan verwakti dati a ben sa loekoe nanga boen so wan symbolisch diniwroko? Fa a de wan krin sani, dati a heri waka nanga libi, wi libi foe dé na dé, jejefasi en wi beweģi foe ati, alamala e abi foe doe nanga den ofrandi foe wi gi Jehovah! Na ala fasi wi moe tan hori kibri soifrifasi.
19. San kan jepi wi foe bepaal efoe wi e gi na moro boen sani di wi abi?
19 Meki a de na wi soleki a ben de na den Israëlsoema, dati „na presenti foe na anoe foe ibriwan foe wi de leki fa Jehovah ben blesi wi” (Deut. 16:17). Meki nanga foeroe warderi wi teri den blesi di wi hemel Tata ben gi wi en no frigiti no wan foe den. Dan wi kan bepaal gi wi srefi ofoe wi e gi Jehovah san de evenredig na den presenti di a ben gi na wi. Fa a de wan wondroe sani dati a sabi den mogelijkheden foe wi en tog a no de skrifi gi wi fini fini san wi moe gi na hen! A de gi wi pasi foe sori na warderi foe wi komoto foe wi ati. En wi no wani gi hen den sani di a verdini, foe taki den moro boen sani di wi abi? Ala sani di de moro weiniki leki dati, no ben sa de nofo. Meki wi gi foe datede na moro boen sani di wi abi na Hen di ben gi wi ala sani di wi abi!
[Faki na tapoe bladzijde 165]
OLI (na geest foe Jehovah)
SWITI SMERI OFRANDI (den begi di Gado e teki)
BRON-OFRANDI (dini Jehovah wawan nanga joe heri sili nanga ati)
MASOO/BREDE SONDRO SROEDEKI (soifri waka nanga libi)