Begi ini den laatste dé disi
„Tan wakti en begi alaten.” — Lukas 21:36.
1. (a) Pe Lukas e verteri foe na fosi tron foe begi? (b) Fa Jezus ben doe nanga na aksi „Masra, leri wi begi”?
ALADI Lukas ini na bigin foe hen evangelium e taki foe begi en dati ben de foe „na tranga begi” foe Zacharias na Gado (ini kapitel 1 vers 13), a de taki finifini san Jezus ben leri foe na tori disi. Foe bigin, Jezus e piki na aksi foe hen discipel: „Masra, leri wi begi, soleki Johannes ben leri ooktoe hen discipel” (Luk. 11:1). Jezus ben piki:
„Te oen e begi, oen moe taki: ’Tata, joe nen moe de santa. Joe kownoekondre moe kon. Gi wi tide na njanjan foe wi. En gi wi pardon foe wi sondoe, bikasi wi toe e gi pardon na den soema di doe sondoe na wi; en no tjari wi go ini tesi.’” — Luk. 11:2-4.
2. (a) Soboen, fa Gado nen e kisi grani, en akroederi nanga sortoe tekst? (b) Sortoe heri tra situatie de ini grontapoe, en fa na situatie disi sa kon boen?
2 Ini 1 Koningen 8:41-43 en Jesaja 56:6-8, tekst di wi ben feni ini na artikel na fesi, joe ben kan si fa Jehovah nen e kisi na fosi presi en now joe e si dati Jezus e doe a srefi ini Lukas 11:2-4. Ini na grontapoe foe now, wi no e si soema e santa Jehovah nen. Na geest foe nationalisme, foe prakseri na joesrefi fosi en foe prisiri joesrefi en de tevréde nanga „wan sortoe Gadolibi, ma no sori na tranga foe hen”, en moro foe den sortoe toestand disi, ben abi leki bakapisi, dati, Gado nen ben kisi sjen ofoe ben si leki wan soso sani (2 Tim. 3:5). Foe jere na begi disi, dan Gado moe santa hen égi nen (Ezech. 36:23). Na sjen situatie sa kon boen baka te Gado kownoekondre, ini anoe foe Kristus Jezus, sa opo doe wan sani nanga den naatsi en den tiriman foe den, soleki Psalm 2 e skrifi so moi.
3. Sortoe warskow nanga sortoe pramisi Petrus e gi ini disi?
3 Den sani disi sa pasa tapoe Jehovah dé, di leki den bijbelprofétitori di e kon troe e sori de now so krosibé. Foe datede, wi e doe boen foe poti prakseri tapoe Petrus vermane nanga warskow:
„Tog oen verwakti foe go miti na kon foe na bigi dé foe Jehovah esi, na dé, disi den hemel sa bron na ini faja, gowe, en den elementi sa smelti na ini na tranga faja! Ma wi de wakti wan njoen hemel nanga wan njoen grontapoe, soleki hen ben pramisi; en na drape geregtigheid sa libi. Foe datede, oen lobiwan! di oen de verwakti den sani disi, doe moeiti dan, foe hen moe feni oen sondro vlaka en sondro fowtoe en nanga vréde.” — 2 Petr. 3:12-14.
4. Fa den toe fosi sani ini na wi Tata begi abi foe doe nanga makandra en fa disi e jepi wi nanga den tra begi?
4 Te ala den sani disi pasa, dan Gado nen sa kon poti reti en kon santa dorodoro. Foe datede meki den toe sani ini Lukas 11:2 di wi e begi foe den, abi foe doe nanga makandra en dati meki den e kon tapoe na fosi presi ini na wi Tata begi. Disi de den troe troe bigi sani foe wi ten en foe na ten di e kon. Te wi hori disi boen ini prakseri, dan wi sa kisi jepi foe loekoe tapoe wan balansi fasi den aladé fanowdoe nanga problema foe wi, di na begi e leri moro fara. Na presi foe wi prakseri wi srefi nomo en disi de so makriki, wi sa aksi wisrefi fosi: Sortoe fasi foe doe nanga libi foe mi sé sa de akroederi nanga Gado wani, soleki disi e kon krin ini hen Wortoe en foe datede sa grani hen nen?
DEKATI HORIDORO E KISI PAI
5. (a) Sortoe algemene regel de foe Jezus agersitori foe den sma di gebroiki na ini? Gi wan eksempel? (b) Sortoe sma e kari ini Lukas 11:5-8, en sortoe rol den e pré?
5 Bakadi Lukas ben taki foe san wi ben taki dja na tapoesé, a de verteri moro fara foe wan gersitori, di Jezus ben verteri en di abi wan spesroetoe sani na ini. Foeroe tron a de so, dati te den e gebroiki ini wan gersitori wan ofoe moro soema, dan ibri wan foe den e akroederi nanga den soema di den sortoe soema dati e agersi. Efoe foe eksempel, soleki a de ini na gersitori foe na lasi manpikin ini Lukas 15:11-32, dan wi no abi moeiti foe si fa na tata foe na manpikin dati, nanga san a de taki en doe, de wan boen agersi foe na hemel Tata. Dati wi no kan taki foe na gersitori foe Jezus di e kon now:
„Efoe wan foe oen abi wan boen mati, kaba a sa go na hen na mindrineti, taki gi hen taki: Tangi, tangi, mi mati, leni mi dri brede, bikasi wan kompe foe mi ben komoto na pranasi kon na mi en mi no abi noti foe poti gi hen na tafra. En efoe a soema piki hen taki: No trobi mi; doro tapoe kaba, en den pikin foe mi didon e sribi nanga mi na ini kamra dja, mi no kan opo, gi joe brede. Mi taki gi oen taki, alwasi foe dati ede wawan a no sa opo, gi hen brede, foedi a de hen mati, tog foe na asranti horidoro di hen mati ben horidoro a sa opo, gi hen so meni leki a abi fanowdoe.” — Lukas 11:5-8.
6. Fa wan bepaalde soema ben de tra fasi leki Jehovah en tapoe san Jezus ben poti krakti nanga dati?
6 Wi e si dja, dati na soema di ben de ini na positie foe jepi na aksiman nanga san a abi fanowdoe, na a bigin ben wégri foe doe wan sani, nanga den wortoe: „No trobi mi.” A no ben wani kwetikweti. Na presi leki a ben sori dati a ben de leki na hemel Tata, a ben de joisti trafasi. Na fasi disi e meki na leri foe na gersitori moro krakti. Efoe na man dati, di ben didon switi nanga hen osofamiri ini bedi, ben sa de klari foe ben opo foe san ben aksi, dan na aksiman no ben sa afoe foe „asranti horidoro”. Tapoe dati Jezus ben poti krakti.
7, 8. Fa den tra wortoe foe Jezus ben sori disi, en fa disi e gi wi foeroe dekati?
7 Disi e kon krin ini den tra wortoe foe Jesus: „We, foe datede mi taki gi oen taki: Tan aksi en oen sa kisi; tan soekoe en oen sa feni; tan naki doro en den sa opo gi oen” (Luk. 11:9). Dan Jezus moro fara tapoe nanga den wortoe, aladi a de meki na tegenstelling kon krin ete: „We, efoe oen di de ogri, tog sabi foe gi oen pikin sani, disi boen, omeni moro oen Tata na ini hemel no sa gi . . . santa jeje na den di e aksi hen?” — Luk. 11:13.
8 Prakseri pikinso na man di foe na „asranti horidoro” foe hen, srefi na mindrineti ben kisi san a ben abi fanowdoe! Fa disi de wan dekati foe doe leki fa Jezus ben taki: „Tan aksi — soekoe — naki doro.” No kon swaki ini begi ofoe ini na bribi leki wan bakapisi foe na alaten gensi foe na kownoekondre-prékiwroko ofoe activiteit foe joe ini na meki foe discipel ofoe, foedi joe de ini wan prati oso ofoe foedi joe e proberi foe wini wan égi swakifasi, di go moro dipi leki joe ben prakseri.
9. Sortoe eksempel foe horidoro ini begi nanga doe di e kon na hen baka, wi e feni ini Tori foe den Apostel 4:24-30 en 5:41, 42?
9 Wan moi eksempel foe so wan horidoro ini begi, di e go makandra nanga doe di fiti, wi e feni ini den bigin dé foe na kristen gemeente. Loekoe na begi makandra di ben seni go na Gado, di Petrus nanga Johannes ben kon verteri foe na gensi di den ben ondrofeni foe na Sanhedrin. Disi tanapoe ini Tori foe den Apostel 5:41, 42: „En den apostel komoto foe na Sanhedrin, den prisiri, disi den ben abi na boenede, foe soema gi den sjen foe Jezus ede. En den no kaba foe leri soema ala dé ini tempel en oso foe oso, en foe préki na boen njoensoe foe Jezus Kristus.” No wan foe den apostel dati ben ondrofeni moro tranga gensi leki na apostel Paulus, en na publiki a ben taki: „Foe ala sani mi abi na tranga foe hen di gi mi krakti.” — Fil. 4:13.
„NA FANOWDOE FOE BEGI ALATEN EN NO KON WERI”
10. Reti na fesi wan tra gersitori foe begi, san Jezus ben taki en disi ben sori tapoe sortoe dobroe vervulling?
10 Di Jezus ben e kon na a kaba foe hen grontapoe wroko, a ben gi ete wan moi eksempel foe na gebroiki foe wan tegenstelling ini wan gersitori foe kan poti krakti tapoe wan sani. Lukas e taki foe disi: „Moro fara a verteri den wan gersitori foe na fanowdoe foe begi alaten en no kon weri” (Luk. 18:1). Wi sa loekoe fosi san meki Jezus taki na gersitori disi. (A wan moi sani foe si, dati Lukas foeroe tron e verteri foe sainde bepaalde gersitori ben gi, soleki wi kan si ini Lukas 18:9 nanga 19:11). Te wi loekoe baka na Lukas 17:22-37, dan wi e si dati Lukas e verteri san Jesus ben taki foe den toestand di ben sa de te „na geslacht disi” ben sa trowe hen (Luk. 17:25). Ala di den wortoe disi foe Jezus di e akroederi pikinso nanga Matteus 24, ben kon troe ini hen dé en ben go doro to na a kaba foe na djoe seti foe sani, tog den abi wan moro bigi vervulling ini wi ten, na „ten foe na kaba” foe na seti foe sani foe disiten. — Dan. 12:4.
11. (a) Fa den toestand ini disi ten e akroederi nanga den di foe den dé foe Noach nanga Lot? (b) San Jezus ben taki spesroetoe, en fa disi e feni hen parallel ini disi ten?
11 En sortoe toestand de na mindri den soema foe disi geslacht? Ja, aladé na situatie e go gersi moro na di foe Noach dé, di „Gado . . . ben si na grontapoe en loekoe! a ben pori, bikasi ala libisoema ben pori hen pasi tapoe grontapoe”; na grontapoe ben de na a ten dati „foeroe nanga ogridoe” (Gen. 6:12, 13). Tog Jezus no ben sori tapoe den sani dati, ma a ben verteri moro foeroe foe wan tra sani di ben sa wani taki moro ete. San na dati? Den aladé sani ben foeroe na libi foe den soema krin krin, soleki „njan en dringi, trow en gi foe trow” en den ben de dorodoro tevréde nanga dati. Na srefi situatie ben de ini „den dé foe Lot” en extra sani den ben kari, soleki, bai, seri sani, prani nanga bow (Luk. 17:26-29). Na presi dati den soema na a ten dati ben broko den ede nanga na goddeloosfasi nanga ogridoe, joe ben kan si wan mi-no-ke-fasi na den. En foe taki foe na moro bigi kotoigi, di Noach ben gi ini wortoe nanga doe foe bow na ark, „den soema no ben poti prakseri na tapoe” (Matt. 24:39; 2 Petr. 2:5). Na srefi sani wi kan taki ooktoe ini algemeen foe na fasi foe den soema ini disi ten, spesroetoe tapoe na tori foe na prékiwroko foe na kownoekondre foe Gado na heri grontapoe, soleki Matteus 24:14 ben taki na fesi. Na moro bigi pisi foe den soema no abi belangstelling; den abi foeroe tra sani na den ede, di e teki na ten nanga na prakseri foe den. Loekoe ooktoe, dati Jezus ben meki kon na krin foe den ten di ben kari na tapoe, dati na tjari kon foe na kriboi kroetoe ben kon esesi en onverwakti „en ben pori den alamala”. — Luk. 17:27, 29.
12. San wi kan leri foe Lukas 17:31-37, en doe dati?
12 Wi e howpoe nanga wi heri ati, dati joe de wan foe den weiniki soema di e broko-ede foe den disiten grontapoe-situatie en di de klari foe poti prakseri tapoe san Gado Wortoe e taki foe den sani disi. Efoe joe e si leki san Lukas 17:31-37 e taki, dati joe no kan de moro langa wan pisi ofoe de wan jepiman foe na disiten seti foe sani en efoe joe no proberi foe „hori joe sili (libi)” sondro foe prakseri na trawan, meki ten no lasi dan. Teki na sé foe Jehovah nanga hen kownoekondre. Poti den sani di joe e verwakti ini disi ten soleki ini na ten di e kon, ini Jehovah anoe foe gi joesrefi abra na hen foe doe hen wani. No loekoe na baka na den sani di joe ben libi. „Prakseri na frow foe Lot” (Luk. 17:32). Si joesrefi moro foeroe leki den soema di, soleki Jezus ben taki: „no de wan pisi foe na grontapoe, soleki mi no de wan pisi foe grontapoe”. — Joh. 17:14-17.
13. San de den moro prenspari punt ini na gersitori foe Lukas 18:2-5?
13 Te wi loekoe na gersitori now ini Lukas 18:2-5, dan ete wan soema de di e aksi tranga wan sani, na tron disi wan weduwe, en ooktoe wan man di de ini wan positie foe kan sorgoe den fanowdoe foe hen, en di ben de wan „kroetoebakra, di no ben frede Gado en di no ben abi respeki foe no wan soema”. Te foe kaba nanga tegoe, a gi hen reti, ma soso, leki fa a taki „foedi a no kaba foe ferferi mi”. No wan degedege ben de ini na horidoro foe hen, en disi e sori o fanowdoe a de „foe begi alaten en no kon weri”.
14. (a) San Gado sa doe leki fa Jezus taki, trafasi leki na „onregtvaardiki” kroetoebakra? (b) San wi kan leri foe disi te wi loekoe na factor foe na ten?
14 Na kroetoe-bakra e akroederi nanga na man ini Lukas 11:7, bikasi ooktoe dja wi e si wan troe troe tegenstelling nanga fa Gado de troe troe. Loekoe moro fara san Jezus taki, dati Gado sa doe en a de gersi hen nanga na „onregtvaardiki” kroetoebakra. Gado sa „meki den soema, di a ben verkisi foe hen kisi reti . . . alwasi a abi pasensi nanga den”. A sa meki disi pasa „esi-esi” (Luk. 18:6-8). Wi kan leri foeroe sani foe den sani di taki dja. Foe datede wi moe doe moeiti foe si ala sani leki fa Gado e si den, ofoe a de now wan égi afersi ofoe a abi foe doe nanga na fasi fa de nanga na kon troe foe hen prakseri. Nanga reti Petrus e taki: „Jehovah no e drai nanga dasani, disi hen pramisi, soleki son soema e denki taki, a de drai langa toemsi; ma a de hori pasensi nanga wi, a no wani no wan soema no moe go lasi, ma dati ala soema drai hen libi.” Foe na kon troe foe na visioen, na proféti ben taki den wortoe foe Jehovah so: „Srefi, alwasi a ben meki a wakti tapoe hen, tan loekoe na kon troe foe hen nanga foeroe verwakti; bikasi sondro mankeri a sa kon troe. A no sa kon toemsi lati.” — 2 Petr. 3:9; Hab. 2:3; loekoe ooktoe Openbaring 6:10, 11.
15. Fa disi abi foe doe nanga égi problema e san moe libi na an sé?
15 Te wi abi égi problema, dan wi kan de seker, dati ibri tron te a gersi dati Gado no jere wi begi, dati disi no kon foedi Gado de onbekwaam ofoe no wani. Efoe leki na weduwe wi e ondrofeni kroektoedoe ofoe vervolgoe, fa wi e sori bribi, dati wi sa kisi wi reti? Wi no moe tan begi wawan, ma waka ooktoe baka wan getrouw fasi foe libi. Efoe wi e poti na wan sé san wi e bribi, soso foe no kisi vervolgoe, dan a no de fanowdoe foe tan begi . . . Disi no ben sa de wawan wan mankeri foe bribi, ma a ben sa abi ooktoe leki bakapisi dati wi no kan bewijsi moro dati wi de wan kristen dienstknegti foe Gado. — 2 Kor. 11:23-27; 2 Tim. 3:12.
16. Fa na aksi ini Lukas 18:8 kan de foe na boen foe wi te wi loekoe hen leki wan tjalansi?
16 A gersi kande wan vreemde sani, dati Jezus kaba na taki foe hen nanga wan aksi: „Ma te Soemapikin sa kon a sa feni troe troe na bribi tapoe grontapoe?” (Luk. 18:8). A ben libi na aksi wan opo aksi. Aladi a gersi leki foeroe bribi no ben sa de, wi no kan taki, dati na no wan pe na grontapoe joe ben kan feni troe bribi. Wi kan si na tekst moro foeroe leki wan tjalansi na wi. Wi no moe si wi égi positie leki wan vanzelfsprekend sani, alwasi wi de boen langa dienstknegti foe Jehovah di gi den srefi abra (1 Kor. 10:12, 13). No wawan wi moe poti prakseri tapoe na vermane ini Lukas 11:9 foe „tan aksi — soekoe — naki doro”, ma wi moe „tan loekoe, tan na ai en wakti”, soleki Jezus ben poti krakti tapoe na ten foe wi. Disi wani taki dati na ala fasi wi moe horidoro, aladi wi e kaka foetoe gi na druk foe mi-no-ke-fasi nanga gensi, di e kon foe dorosé en wini ooktoe den swakifasi foe inisé. — Mark. 13:32-37; 14:38.
17. Ini sortoe geest wi moe begi moro foeroe en baka soema eksempel wi moe waka?
17 Tan begi ini bribi, dati joe kan de getrouw en no sa drai baka (Hebr. 10:39). Tan begi ini ten foe tranga tesi — leki Jezus ben doe disi ini den moro moeiliki momenti foe hen — ofoe moro foeroe dati na wani foe Gado mag pasa (Matt. 26:38-44). Gado e prisiri nanga den sortoe begi disi. Wi di e begi na hen, a de gi pasi foe sori na dipi foe na broko-ede foe wi, na tranga lostoe foe wi, na troefasi foe den bewégi foe wi ati. Aladi a abi pasensi, esesi, efoe na ten lepi foe dati, a sa meki wan soema kisi reti. — Ps. 55:16, 17; Rom. 1:9-12.
„TAN NA AI, BEGI ALATEN”
18. (a) Sortoe warskow nanga vermane Jezus ben gi na a kaba foe hen proféti tori? (b) Na sortoe fasi wi kan lon komoto foe ala den sani di sa pasa?
18 Akroederi nanga san wi ben loekoe na fesi, tanapoe ini Lukas evangelium fa Jezus ben warskow na a kaba foe hen profétitori foe na ten foe hen en na ten foe wi foe na doe sani pasa marki, en wi „ati kon ebi nanga njan en dringi pasa marki en sorgoe foe na libi, en na dé dati (foe na kriboi kroetoe) kon wantron wantron, ini wan momenti na wi tapoe”. A ben taki dan nanga krakti: „Tan dan na ai, begi alaten (foe sainde?) dati joe sa man foe lon komoto foe ala den sani di sa pasa troe troe, en tanapoe na fesi Soemapikin” (Luk. 21:34-36). Disi no wani taki, dati wi moe komoto foe doe wroko, ma moro foeroe, dati wi moe doe ala sani foe den no feni wi ini wan verkeerti toestand, leki ini wan trapoe, ofoe ini wan verkeerti kampoe. Na presi foe disi, wi moe begi alaten opregti en doe moeiti foe libi leki fa wi begi, sodati kan kon na krin, dati wi „mag tanapoe (ini wan boen positie) na fesi foe Soemapikin”.
19. San wi kan aksi wi srefi tapoe na tori foe begi foe na boen foe wi en fa na eksempel foe Nehemia de wan jepi gi wi?
19 Omeni tron joe e begi, te wi loekoe ala den foeroe vermane disi tapoe na tori foe horidoro en na fanowdoe foe no kon weri noiti? Joe e doe disi soso tapoe fasti ten, soleki te joe e njan ofoe tapoe konmakandra? Nanga soso joe verstan joe e taki den begi foe joe ofoe soso nanga joe mofo-boeba, ofoe . . . „joe e begi alaten” en joe e tan begi opregti, komoto foe joe ati, kande son tron nanga „djeme”? (Rom. 8:26). Sortoe fanowdoe kan de toe, joe kan doe san Nehemia ben doe sondro foe wan soema ben si, di a ben tanapoe fesi na kownoe: „Wantron wantron a ben begi na a Gado foe hemel” (Neh. 2:4). Hen begi foe bribi Gado ben jere. Hori ooktoe na prakseri, dati aladi den begi foe trawan kan jepi joe, te a de kon tapoe na tori foe begi, troe troe no wan tra soema kan teki joe presi.