„Den dedewan ini Kristus sa opobaka fosi”
1. Foe sainde wan opobaka moe de gi na dede libisoema famiri, te a wani libi baka tapoe sortoe presi ooktoe en fa Gado ben poti na fundamenti foe na fanowdoe opobaka?
SORTOE howpoe ben sa moe de gi den dedewan foe na libisoema famiri efoe wan pramisi no ben de foe wan opobaka? Na opobaka foe den dedewan de wan absoluut fanowdoe sani, foedi a no de so dati libisoema sili no e dede. Na sili foe datede no kan go abra ini wan moro foeroe libi tapoe wan moro hé nivo ini wan kondre di joe no kan si (Ezech. 18:4, 20; Jes. 53:12). Efoe na dede libi-soema famiri wani libi baka tapoe sortoe tra presi toe, dan wan opo-baka moe de. Foe datede meki Gado ben poti na fundamenti, sodati tapoe hen joisti ten so wan wondroe ben sa kan pasa. Di hen ben opo tapoe na derde dé hen manpikin, di ben gi hen srefi abra leki wan ofrandi, a ben opo gi na Manpikin disi, di ben sori dati a ben warti foe dati, na pasi foe drai go baka na hemel, pe a ben de bifo. Na Pikin ben teki nanga hen go na heri waarde foe na verloesoe-paiman foe hen volmaakti libisoema ofrandi. Jezus Kristus noiti moro afoe dede. Foe alaten a ben tjari wan libi-soema ofrandi foe sondoe gi na libisoema famiri. Te a de kon foe na tweede tron, dan a no e kon foe si dede ondro ai. — Hebr. 9:28; Rom. 6:9.
2. Fa 1 Korinte 15:22, 23 e sori dati Gado e hori wan bepaalde volgorde ini prakseri?
2 Jehovah Gado e wroko nanga wan bepaalde volgorde tapoe na tori foe a opobaka. Disi na apostel Paulus e tjari kon na wi prakseri, di hensrefi ben si na glori foe na Jezus di ben opobaka foe dede en di ben taki nanga hen. So wan 18 jari baka dati, Paulus ben skrifi wan brifi gi na kristen gemeente Korinte (Grikikondre), pe a de aksi disi: „Efoe foe Kristus now wi ben préki, dati a ben opobaka, fa son wan na mindri oenoe e taki dati wan opobaka foe den dedewan no de?” (1 Kor. 15:12). Te Paulus e go doro tapoe na aksi disi, a de meki kon krin na piki di kon foe santa jeje. Te a de go moro fara a de taki: „Soleki ini Adam ala soema e dede, so ini Kristus ala soema sa kon na libi. Ma ibriwan ini hen égi rang-orde: Kristus, na fosiwan, baka dati den di de foe Kristus, ini na ten foe hen de noja (Griki: parousia)” (1 Kor. 15:22, 23). Gado wawan ben de frantwortoe foe na opobaka foe Jezus.
3. Fa Jezus ben tron na „fosiwan” ini na tori foe na opobaka?
3 Jezus Kristus ben opobaka tapoe 16 Nisan foe na jari 33 foe G.T., na dé di na djoe hépriester ben offer den fosi bosoe foe na koti foe gerst (wan sortoe karoe). Disi e akroederi moi nanga na tori dati Jezus de na „fosiwan” ini na tori foe na opobaka foe den dedesoema (1 Kor. 15:20). Disi ben poti Jezus ini na fosi rangorde. Soleki a ben de ini na djoe koti foe gerst-njanjan, dati ete wan koti njanjan ben moe kon bakaten, na so ooktoe a de nanga na opobaka foe den dedesoema, dati wan bakaten koti njanjan moe de. Ma foedi Jezus Kristus ini rangorde e teki na fosi presi Paulus e kari hen „na fosi-gebore foe den dedewan, sodati a ben sa tron na fosiwan ini ala sani”. — Kol. 1:18.
4. Sortoe officieel sani ben moe bigin fosi, bifo srefi den fosiwan foe den dedesoema ben kisi wan opobaka, en oten na sani disi ben bigin?
4 Nanga hen ofrandi dede, Jezus Kristus ben bai kon fri baka na heri libisoema famiri, di e dede alamala „ini Adam”. Foe datede wi kan taki foe den, dati „den de foe Kristus”. Ma srefi den fosiwan foe den dedesoema ben kan kisi pas wan opobaka baka na „de noja” ofoe parousia foe Jezus Kristus ben bigin. Na de noja disi e bigin officieel nanga hen tweede konbaka. Leki fa na „marki” di Jezus ben taki na fesi e sori en ooktoe leki fa bepaalde bijbel teri foe na ten e sori, dan na „de noja” foe hen di joe no kan si ofoe hen parousia, ben bigin ini na bigi dréten foe na jari 1914 G.T. — Matt. 24:3.
5, 6. Fa 1 Thessalonika 4:13-17 e sori dati Gado sa hori ini prakseri volgorde nanga rangorde foe den soema di e dede „ini Adam”?
5 Jehovah Gado sa hori ini prakseri volgorde nanga rangorde tapoe na tori foe na opobaka foe den soema di ben dede „ini Adam” en di e koti leki bakaten froktoe foe na opobaka. Spesroetoe leki trowstoe gi den fosi-eeuw kristen soema di ben lasi „den di ben sribi ini dede” nanga Kristus, na apostel Paulus ben skrifi:
6 „Disi wi e taki gi oenoe nanga jepi foe Jehovah wortoe, dati wi, den libiwan (kristen di kon njoen gebore nanga geest) di de ini libi te na de noja foe Masra, no sa go na fesi foe den di sribi ini dede (kristen di kon njoen gebore nanga geest), bikasi Masra srefi sa saka komoto foe hemel nanga wan komanderi sten (nanga wan tranga komando, NIV) nanga a sten foe wan aarts-engel en nanga na trompeti foe Gado en den di dede ini wanfasi nanga Kristus sa opobaka fosi. Baka dati, dan wi, den libiwan, di tan abra, sa teki poeroe nanga hen ini wolkoe, go miti Masra ini loktoe, en na so fasi alaten wi sa de nanga Masra.” — 1 Thess. 4:13-17.
7. Foe sortoe dedesoema spesroetoe Paulus ben tai drape, en fa Openbaring 14:12, 13 e sori dati den sa opobaka tapoe wan spesroetoe ten?
7 Djaso na apostel Paulus no e taki foe den dedesoema foe na libisoema famiri ini algemeen, ma foe „den di ben sribi ini dede” nanga Kristus, den „di dede ini wanfasi nanga Kristus”. Ini na laatste bijbelboekoe na apostel Johannes abi wan sani foe taki foe na ten te den sortoe dede kristen dati sa opobaka foe na dedesribi foe den. Ini Openbaring 14:12, 13 Johannes e skrifi: „’Djaso (tapoe na tori foe na grontapoe-organisatie foe internationaal vréde nanga veiligheid) a de kon tapoe horidoro gi den santawan, gi den di e hori den komando foe Gado en na bribi foe Jezus.’ En mi jere wan sten foe hemel taki: ’Skrifi: Kolokoe den dedesoema di foe sensi now e dede ini wanfasi nanga Masra. Ja, na geest e taki, meki den rostoe foe den hebi wroko foe den, bikasi den sani di den ben doe, e go makandra nanga den.’” Now dan, tapoe sortoe spesroetoe ten a de sori nanga den wortoe „foe sensi now”?
8. Foe sainde den wortoe „foe sensi now” e bedoel na ten foe na denoja foe Masra ini geest, en wan kaba e kon na den wroko te den dede ini na ten dati?
8 Te wi loekoe ini na leti foe san na apostel Paulus e skrifi ini 1 Thessalonika 4:16, 17, dan disi moe de ini na ten foe na de noja ofoe parousia foe Jezus Kristus, no bifo disi bigin, ma baka dati. Srefi ini na ten dati a sa de noja ini na geest sondro joe kan si hen, joe sa abi kristensoema na grontapoe di kon njoen gebore nanga geest en di e dede „ini wanfasi nanga Masra”. Spesroetoe den kristen disi joe kan prijse „kolokoe” te den dede ini na ten foe hen „de noja”. Na dede foe den ini skinfasi no e tjari wan kaba kon foe wan bepaalde pisiten na den „wroko foe den”. Foe sainde? We, „den sani di den ben doe e go makandra nanga den” ofoe, letterlijk, leki na Griki tekst e taki, „e waka go nanga den”.
9. Foe sainde den „santawan” di e dede ini na ten dati de dan „kolokoe”, soleki Openb. 14:13 e taki?
9 Disi e aksi wan go abra tapoe wan tra kontren foe wroko, foe wroko na skinfasi tapoe grontapoe, go na wroko ini geest ini na hemel-kondre. Foe den „soema di e dede ini wanfasi nanga Masra”, na apostel Paulus e taki: „So a de ooktoe nanga na opobaka foe dedewan. Den e sai na pori skin, ma a sa opo baka so, foe a no kan pori moro. Wan veragti sani den e sai, ma a sa opobaka nanga glori. Wan swaki sani den e sai, ma a sa opo baka nanga kragti. Wan grontapoe skin den e sai, ma skin disi abi geestfasi sa opobaka. Bikasi wan skin de, disi abi grontapoefasi, en wan skin de, disi abi geestfasi” (1 Kor. 15:42-44). Den soema disi di den kari „kolokoe” en di opobaka na dede e libi den „hebi grontapoe wroko” na baka en e go doro nanga den wroko ini wan jeje skin ini na jeje-kondre. Den no afoe foe sribi ini dede en wakti tapoe na kon foe na de noja foe Kristus.
NANGA SAN MASRA E SAKA KOMOTO FOE HEMEL
10. (. . .)?
10 Na apostel Paulus e verteri wi nanga sortoe sani na saka komoto foe hemel foe Masra na jejefasi e go makandra te a de taki: „Wi, den libiwan, di e tan na libi te na de noja (parousia) foe Masra, no sa go den dedewan na fesi (ini na kisi foe wan opobaka), bikasi Masra srefi sa saka komoto foe hemel nanga wan komanderi sten, nanga na sten foe wan aarts-engel en nanga na trompeti foe Gado, en den di dede ini wanfasi nanga Kristus sa opobaka fosi. — 1 Thess. 4:15, 16.
11. Soema e jere en e gi jesi na a komanderi sten te Masra Jezus Kristus e saka komoto foe hemel?
11 Soema e jere na „komanderi sten” nanga di Masra Jezus Kristus o saka kon foe hen hemel positie na a reti anoe foe Gado? A de krin, dati a de den kristen di kon njoen gebore nanga geest en di te nanga na ten dati ben dede ini wanfasi nanga Masra”. Wi sabi dati sensi a ben saka na jejefasi kon, dati wani taki sensi hen „de noja” ofoe parousia di joe no kan si ben bigin, no wan libisoema tapoe grontapoe ben de di ben jere rechtstreeks hen sten. Ma „den dedewan ini Kristus” (Luther-vertaling) ben jere hen en ben gi jesi na hen.
12. (a) Oten na „laatste dé” e bigin di Jezus ben taki foe . . . ?
12 Den soema di Jezus Kristus ben opobaka tapoe so wan fasi ben de foe den discipel foe soema hen ben taki: „Efoe joe no njan na skin foe Soemapikin en no dringi hen broedoe, joe no abi libi ini joesrefi. Na soema di njan mi skin en di dringi mi broedoe, abi tégo libi (foe sensi na ten dati a kisi wan opobaka foe dede), en mi sa opo hen baka tapoe na laatste dé” (Joh. 6:53, 54). Ini na „laatste dé” dati kragti de ini na „komanderi sten” foe wiki foe na dedesribi hen discipel di ben abi prati na a spesroetoe grani disi foe hen skin en broedoe. Gi den sortoe discipel disi na „laatste dé” e bigin te den go ini na „tégo libi” ini hemel, foedi den kisi wan opobaka ini wan „jeje skin” leki di foe Kristus. Na „laatste dé” dati abi foe doe nanga na opobaka foe den getrouw kristen di gebore njoen nanga geest, di abi wan hemel howpoe en a no de a srefi foe datede leki a „laatste dé” di Martha foe Bethania ben abi na prakseri, bikasi ini na ten dati a no ben abi no wan prakseri foe wan jeje hemel opobaka.
13. (a) Soema sten den „dedewan ini Kristus” e jere, en soema de na „aarts-engel” (b) Sortoe bewijsi foe na bijbel wi abi foe dati?
13 Na glori Masra Jezus Kristus e saka ooktoe kon nanga na „sten foe wan aarts-engel”. Disi de hen égi sten. Hen de na „aarts-engel”. Ini na gersitori foe den skapoe nanga boko Jezus ben sori na hen srefi ini na positie disi foe aarts-engel, di a taki: „Te Soemapikin sa kon ini hen glori en ala engel nanga hen, dan a sa teki presi tapoe hen glori troon. En ala naatsi sa konmakandra na hen fesi” (Matt. 25:31, 32). Ini hen libi ini hemel bifo a ben tron wan libisoema a ben nen Mikaël. Hen de seker na soema di e bedoel ini na profetitori foe Daniël 12:1, 2. „Ini na ten dati Mikaël sa opo tanapoe, na bigi kownoe, di e opo doe sani foe na boen foe den manpikin foe joe (Daniël) pipel. En seker wan ten foe benawtoe sa kon, soleki noiti ben kon, sensi wan naatsi ben doe kon te leki na ten dati. En ini na ten dati joe pipel sa kon fri, ibri soema di nen ben skrifi poti ini na boekoe. En foeroe foe den sa de di e sribi ini no stofgron, di sa opobaka, den disi foe libi te ten di no abi marki en den dati foe sjen nanga tegoe te ten di no abi marki.”
14. San de na nen foe na aarts-engel soleki Openbaring 12:7 e sori, en fa Judas 9 e sori tapoe wan kesekese di a ben abi fositen?
14 Ooktoe ini Openbaring 12:7 wi e kisi foe si dati engel moe saka densrefi ondro Mikaël, bikasi wi e lési drape: „En feti ben kon ini hemel, Mikaël nanga hen engel (no den kristen di ben opo-baka foe dede en di ben gebore njoen nanga geest) ben feti.” Boiti dati, ini Judas 9 wan aarts-engel e kari, pe wi e lési: „Na aarts-engel Mikaël ben abi wan kesekese nanga Didibri en ben stré foe na skin foe Mozes.”. Didibri no ben kisi na skin.
15. Fa a ben waka nanga Satan Didibri ini na feti nanga na aarts-engel Mikaël, en a kan meki dati den discipel foe Kristus no sa opobaka foe dede en opo go na hemel foe de na Jezus Kristus?
15 Satan Didibri ben lasi alaten ini na hondro-hondro-jari-owroe stré. Ini na oorlog ini hemel den ben wini hen en den ben trowe hen nanga hen demoon-engel kon na wi grontapoe, en na aarts-engel, da foe taki Masra Jezus Kristus nanga hen engel leki winiman ben tan ini hemel. Foe di na victori Jezus Kristus e gebroiki na sten foe wan aarts-engel te a de gi komando na den di ben dede ini Kristus foe kon na doro, dan hen komanderi sten abi moro makti en wan tranga krakti. Boiti dati, Satan Didibri, di ben lasi, no sa abi nofo makti foe meki dati den soema di ben dede ini Kristus, no kisi wan jeje opobaka en a no sa kan meki dati den no go ini na jejekondre en opo go na hemel foe de na a victori Jezus Kristus.
16. Nanga sortoe prakseri „Gado trompeti” e bari, en sortoe soema sa jere hen leki den fosiwan?
16 Na saka komoto foe hemel foe Kristus e go ooktoe makandra nanga na babari foe „Gado trompeti” (1 Thess. 4:16). Na trompeti ini na pisi tori disi no de wan feti-marki foe a tjari konmakandra foe sroedati foe go feti en foe kiri na féjanti. Na blo foe „Gado trompeti” de moro foeroe foe wan vréde prakseri foe tjari na pipel foe Jehovah konmakandra, soleki ini Mozes ten den ben blo tapoe toe solfroe trompeti foe tjari den 12 lo foe Israël konmakandra (Num. 10:1-10). Ini 1 Korinte 15:52 na apostel Paulus e tjari so wan trompeti di de foe wiki soema foe konmakandra, kon akroederi nanga opobaka foe den dede kristen, te a de taki: „Ini na ten foe na laatste trompeti. Bikasi na trompeti sa bari en den dedewan sa opobaka sondro foe pori en wi sa kenki.” Sortoe soema leki den fosiwan sa jere na „laatste trompeti”, te a bari leki „Gado trompeti” foe kari, foe taki hen so, den dedewan kon makandra en tjari den kon na libi baka? Leki na piki tapoe disi, 1 Thess. 4:16 e taki: „En den di dede ini wanfasi nanga Kristus sa opobaka fosi.”
17. Foe sainde na opobaka foe den soema di „dede ini wanfasi nanga Kristus” no de foe si gi libisoema ai?
17 Na opobaka foe den soema di „dede ini wanfasi nanga Kristus” no de foe si gi den soema foe grontapoe. Foe sainde? Foedi den ben blesi nanga wan jeje opobaka en ibriwan foe den e „opobaka leki wan jeje skin” (1 Kor. 15:44). Foedi libi-soema ai no tranga nofo foe kan si geest, na so soema no e si na opobaka foe den „dedewan ini Kristus”. Foe datede meki na libisoema famiri sensi na „de noja” foe Kristus ofoe parousia, ini 1914, no ben si hen en no ben si ooktoe noti foe na opobaka foe hen discipel.
18, 19. (a) Paulus ben bedoel nanga san a ben taki ini 1 Thess. 4:17, dati den kristen dati no ben sa dede, bifo den ben „hari poeroe”? (b) Na sortoe fasi den „e hari poeroe” en ini sortoe skin den e go miti Masra, sodati nanga reti den sa de „kolokoe”?
18 Na apostel Paulus e taki foe hensrefi leki a de wan soema, di de na grontapoe ete te leki na momenti, dati na kolokoe sani disi kon gi den kristen di kon njoen gebore nanga geest, te a de taki: „Baka dati, wi, den libiwan, di e tan abra sa hari poeroe makandra nanga hen ini den wolkoe, go miti Masra ini na loktoe, en na so wi sa de nanga Masra alaten.” — 1 Thess. 4:17.
19 Na apostel Paulus no ben bedoel nanga den wortoe disi, dati den kristen di ben kon njoen gebore nanga geest, soleki hensrefi no ben sa dede ma nanga skin en ala sani ben sa „hari poeroe” go ini loktoe na mindri den letterlijk wolkoe. Paulus ben dede. Den kristen di kon njoen gebore nanga geest ini disi ten, di de ete ini libi ini na ten foe na „de noja” ofoe parousia foe Kristus, moe dede ooktoe. Soleki den siri di prani ini gron, na so ibriwan foe den „moe sai leki wan libisoema skin” en dede leki libisoema (1 Kor. 15:44). Ma fa den de „hari poeroe ini wolkoe” makandra nanga den di „dede ini wanfasi nanga Kristus” èn di e opobaka fosi? Tapoe na fasi disi: Te den sai leki wan libisoema skin, dan den no afoe foe sribi ini dede. Wantron wantron den e ondrofeni wan jeje opobaka en den e libi den libisoema skin na baka tapoe grontapoe en leki wan „jeje skin” den e opobaka. Nanga wan jeje skin den e go miti den hemel Masra. Foe den reden disi, leki fa Openbaring 14:13 taki, den spesroetoe joe kan si leki „kolokoe”.
20. Ini sortoe wolkoe den kristen di tan abra na libi e „hari poeroe” go na ini en san na opo go na hemel foe den e sori?
20 Ma san den e bedoel dati den e „hari poeroe go ini wolkoe”? Wolkoe e drifi hé ini loktoe en e sori tapoe héfasi. Ooktoe den e hori kibri ini den san den abi ini den ofoe san de na tapoesé foe den. Jeje skin no abi foe wolkoe moe tapoe den foe wi no si den. Foe datede ini 1 Thessalonika 4:17 den e bedoel agersi wolkoe, di e poeroe na a ai foe grontapoe na hari poeroe foe den kristen di opobaka foe dede foe go miti na Masra foe den di de na hé. Prakseri ooktoe fa Jezus Kristus ben opo go na hemel 40 dé baka di a opo baka, en fa ini na opo go no hemel foe hen „wan wolkoe ben poeroe hen na den ai (foe den discipel di ben loekoe hen).” — Tori foe. 1:9.
21. Masra e saka komoto foe hemel ini na fasi dati a abi wantron wantron kontakti nanga na grontapoe foe wi en oten wan kaba e kon na a „laatste dé” a de opobaka hen discipel foe dede?
21 San ala den sani disi e bewijsi? Disi: Na Masra Jezus Kristus di e saka kon no e kon wantron wantron ini kontakti nanga na grontapoe foe wi. Wolkoe, leki fa wi lési, den kristen di ben opo baka, en go miti den hemel Masra, e anga hé tapoesé foe na grontapoe. Boiti dati, den kristen di opobaka foe dede e go miti den Masra „ini loktoe”, no dja tapoe grontapoe en ooktoe no ini Jeruzalem, ofoe tapoe na Olijfbergi ofoe sortoe tra presi toe tapoe na grontapoe foe wi. Na „laatste dé” pe na hari poeroe disi e pasa, no de ooktoe wan grontapoe dé foe 24 joeroe, ma wan pisiten, di e kon pas na wan kaba te na laatste wan foe den kristen di gebore njoen nanga geest en abi prati na a „fosi opobaka”, sa kisi opo baka foe hemel libi (Openb. 20:4, 6; Joh. 6:54). Na kon troe foe den bijbel profétitori e sori, dati wi e libi kaba ini na spesroetoe „laatste dé” dati.