Wi e libi now ini na „laatste dé” dati foe na opobaka
1. Sortoe prakseri ben de ini na ten foe tin tron jari foe na ten di na fika pisi foe kristen di ben de na libi ben sa kisi glori, ma foe sensi na ten dati, ben kon troe san ben taki na fesi ini 1 Thessalonika 4:16, 17?
FOEDI den „dedewan ini Kristus” e kisi wan opobaka ini wan jeje skin tapoe na „laatste dé” dati en na skin dati no de foe si nanga libisoema ai, dan wi leki libisoema moe waka ini bribi en no nanga si tapoe san e pasa now troe troe. Wi kan memre, dati ini wan toe tin-tron jari boen foeroe brada ben abi na prakseri, dati na kisi glori foe ala memre foe na kristen gemeente di ben tan na libi ben sa pasa na a kaba foe den ten foe den heiden, ini na ten foe 1 oktober 1914 (Luk. 21:24). Tapoe na datum dati noti ben pasa di ben akroederi nanga san ben skrifi ini 1 Thessalonika 4:16, 17. Na presi foe dati, feti ben bigin ini hemel en den ben hiti esi trowe den lasiman, Satan nanga hen demoon (Openb. 12:7-13). Na moi foe na sani de ooktoe dati foeroe foe den kristen di kon njoen gebore nanga geest en di ben libi na grontapoe ini 1914 en ben de actief, de ete ini libisoema skin na wi. A gersi leki wan sani no ben boen ini na marki foe na ten foe na „laatste dé”, te na gemeente foe kristen di gebore njoen nanga geest ben sa kisi glori.
2, 3. Ini sortoe ten na kisi glori moe pasa, en sortoe aksi foe dat ede e kon foe na kon troe foe 1 Korinte 15:50-57?
2 Ma tog ini 1914, na a kaba foe den ten foe den heiden, na „de noja” ofoe parousia foe na glori Jezus Kristus ben bigin. Datede wi de, foe sensi na ten dati, ini na pisiten, pe na sani ben sa pasa san ben taki ini 1 Thessalonika 4:16, 17 foe den kristen di ben de ete ini libi en di ben gebore njoen nanga geest. — Joh. 6:54.
3 Oten e bigin na kon troe foe 1 Korinte 15:50-57? „Skin nanga broedoe no kan kisi Gado Kownoekondre en na porifasi no e kisi na fasi di no sa pori. Loekoe! Mi e verteri oenoe wan santa kibri tori: Wi alamala no sa go sribi ini dede (te na pori libisoema skin e dede), ma wi alamala sa kenki, ini wan momenti, ini na ten foe na laatste trompeti. Bikasi na trompeti sa bari en den dedewan sa opobaka sondro foe pori moro en wi (kristen leki Paulus) sa kenki. Bikasi san e pori, moe weri na fasi di no kan pori en disi san e dede, moe weri san no e dede moro, dan na wortoe sa pasa di ben skrifi: ’na dede swari gwe foe tégo’. ’Dede, pe joe wini de? Dede pe na maka foe joe de?’ Na maka di e meki dede kon, na sondoe, ma na krakti foe na sondoe de na wet (foe Mozes). Ma grantangi foe Gado, bikasi hen e gi wi na wini nanga wi Masra Jezus Kristus!”
4. Oten Jezus ben dede, en fa Daniël 9:24-27 e sori disi?
4 Foe kisi wan berekening foe na bijbel, dan wi kan vergelijk sani di pasa ofoe di e akroederi nanga makandra efoe joe loekoe na fasi foe den. Wi e aksi foe datede: Oten Jezus Kristus srefi ben opobaka foe dede foe tron „Kristus, na fosiwan”? Disi ben pasa tapoe sonde, 16 Nisan foe na jari 33 G.T. Toe dé na fesi tapoe 14 Nisan, na dé foe na pascha-fésti, den ben anga hen na wan postoe en a ben dede. Na dé dati di Kristus ben offer, ben de wan ten di ben poti kaba ini na schema di Jehovah Gado ben meki en di ben skrifi ini Daniël 9:24-27. Na dé dati ben de wan marki foe na mindri foe na laatste wiki dati foe „sébi tenti wiki”, dati wani taki, jari-wiki, no wiki foe dé. Na profétitori foe Daniël ben taki na fesi, dati ini na laatste ofoe di foe sébi tenti jari-wiki „Messias ben sa koti poeroe, nanga noti gi hensrefi”. Ma oten precies ini na laatste jari-wiki disi, di ben bigin ini na bigi dréten foe na jari 29 G.T.? Daniël 9:27 e piki: „Tapoe na afoe foe na wiki a sa tjari wan kaba kon na slagti-ofrandi nanga ofrandi-presenti.” Slagti-ofrandi foe meti no ben abi foe datede waarde moro baka na dede foe Jezus.
5. Fa wi e bereken na bigin foe na di foe 70 jari-”wiki”, san ben marki na bigin foe disi, en sortoe ten ben doro gi Jeruzalem nanga na djoe seti foe sani?
5 Foedi Jezus ben gi hen volmaakti libi leki wan ofrandi „tapoe na mindri foe na wiki”, ofoe tapoe 14 Nisan foe na jari 33 G.T., dan na wiki dati ben bigin dri nanga afoe moenjari na fesi tapoe 15 Tisjri foe na jari 29 G.T. We, san ben marki na bigin foe na di foe 70 jari-„wiki” dati? Jezus ben de na Messias, san wani taki „Salfoewan”. Dati ben de na ten, di Johannes na Dopoeman ben dopoe Jezus. No langa na baka dati Jezus ben „salfoe” nanga santa jeje foe tron na Messiaanse kownoe foe Jehovah pipel. Jezus ben de na a ten dati 30 jari (Luk. 3:21-23; 4:1-21). Na sani disi ben de wan marki troe troe foe na bigin foe na „ten foe na kaba” gi Jeruzalem nanga na djoe seti foe sani. A no ben de srefi 41 jari na baka, ofoe ini na bigi alenten (zomer) foe 70 G.T. na foto nanga hen tempel ben pori. Disi ben taki na fesi ini Daniël 9:26: „Na foto nanga na santa presi, na pipel foe wan tiriman (generaal Titus), di e kon (ini 70 G.T.), sa tjari pori kon tapoe den. En na kaba foe hen sa de nanga wan froedoe (den Romein sroedati). En te nanga na kaba feti sa de.”
6, 7. San ben kon wantron wantron baka na kaba foe den ten foe den heiden ini 1914 en sortoe sani di ben taki ini hemel ben kisi krakti tapoe na grontapoe foe wi nanga den dedewan foe hen?
6 Now no parallel. Di ini na bigi dréten (herfst) foe 1914 den „ten foe den heiden” ben kon na wan kaba, dan na „ten foe na kaba” foe na seti foe sani disi ben bigin (Dan. 12:4). Wantron wantron baka na kaba foe den ten dati foe den heiden, Gado ben poti na salfoe Jezus di ben de ini hemel leki Kownoe, leki na Erfgenaam di e tan foe hen fositen papa foe owroeten, kownoe David foe Jeruzalem. Dan na sani di ben taki ini hemel ben kisi krakti, baka di na di foe sébi engel ben blo tapoe hen trompeti. Foe disi wi e lési ini Openbaring 11:15-18:
7 „En na di foe sébi engel ben blo tapoe hen trompeti. En tranga sten ben de foe jere ini hemel, di ben taki: ’Na kownoekondre foe grontapoe kon tron na kownoekondre foe wi Masra (na Soeverein Masra Jehovah) en foe hen Kristus en hen (na Soeverein Masra Jehovah) sa tiri foe tégo!’ . . . ’Wi e taki joe tangi, Jehovah Gado, na Almakti Wan, di de en di ben de, dati joe ben teki joe bigi krakti en ben go tiri leki kownoe. Ma den naatsi ati ben kon bron en jòe atibron ben kon, en na joisti ten foe kroetoe den dedewan en foe pai den srafoe en den proféti foe joe en den santawan en den di e frede joe nen, den pikin wan en den bigi wan en foe pori den di e pori na grontapoe.’”
8. (a) Nanga soema den naatsi ati ben kon bron, en o fara? (b) Fa disi ben waka parallel nanga san ben pasa „ini na mindri foe na wiki” nanga na salfoe foe Jezus?
8 Ini na fosi grontapoe-feti (1914-1918) „den naatsi ati ben kon bron”, en den ben kowroe na atibron foe den tapoe na pipel foe na Soeverein Masra Jehovah. Foe sainde? Foedi den dienstknegti disi di ben gi den srefi abra ben préki dati ini 1914 den ten foe den heiden ben kon na wan kaba en dati na kownoekondre foe Kristus ben opo ini hemel. Na atibron disi foe den naatsi ben doro wan hémarki ini na lente foe 1918, en dati ben de ini wan fasi di ben de foe si krin ini den Verenigde Staten foe Amerkankondre. Disi ben de dri nanga afoe jari baka na kaba foe den ten foe den heiden en a poti na wroko foe na salfoe Jezus leki hemel kownoe. San ben pasa nanga den kownoekondre-prékiman tapoe grontapoe ini 1918, e waka bijna parallel nanga san ben pasa nanga Jezus ini Jeruzalem „ini na mindri foe na wiki”. Ini na tori foe Jezus wan opobaka foe dede ben moe feni presi. Tapoe na srefi fasi ini 1918, den ben „kiri” den prékiman foe hen kownoekondre, so den vervolgoeman ben prakseri, sodati wan kon na libi baka foe na kownoekondre-préki, wan opobaka ben de fanowdoe.
9. (a) Foe sainde na kon na libi ofoe agersi opobaka foe den vervolgoe kownoekondre-prékiman foe wan njoen activiteit no ben de wan boen parallel foe na opobaka foe Jezus tapoe 16 Nisan ini 33 G.T.? (b) Soema ben moe kisi fosi wan jeje opobaka, bifo den salfoe kristen di ben de na libi ete ben „hari poeroe”, go miti Masra?
9 Na opobaka foe Jezus tapoe 16 Nisan foe na jari 33 G.T. ben de wan jeje opobaka, foedi a ben opobaka go na hemelkondre, aladi a ben de foe wan grontapoe grebi. Ini na tori foe den kownoekondre prékiman di ben de ete na skinfasi, wi e taki foe wan kon na libi baka foe wan grontapoe activiteit, foe wan njoen préki foe „na boen njoensoe foe na kownoekondre” tapoe na heri grontapoe pe soema e libi „leki wan kotoigi gi ala naatsi” (Matt. 24:14). Den kristen dati di ben kon njoen gebore nanga geest, no ben sa kisi glori ini hemel ete, foe ben hari poeroe go „ini den wolkoe, go miti Masra ini na loktoe”. Na sani disi gi den no ben sa waka na fesi na opobaka foe kristen di te nanga 1918 „ben sribi ini dede nanga Jezus”. A ben sa de moro foeroe soleki ben kon na krin ini 1 Thessalonika 4:14-17, da foe taki „dati den di ben dede ini wanfasi nanga Kristus sa opobaka fosi”. Tapoe wan fasi di fiti den ben sa opobaka fosi en na sani disi ben sa pasa fosi na kon na libi baka foe den kownoekondre-prékiman, di ben sa kisi njoen libi foe ben kan go doro ini na „ten foe na kaba” nanga na wroko foe den ini skinfasi tapoe grontapoe. Na kon na libi disi ben feni presi ini na lente foe 1919.
10. Na opobaka foe soema en di ben feni presi tapoe sortoe ten, ben sa de na troe parallel foe na opobaka foe Jezus tapoe 16 Nisan ini 33 G.T.?
10 Na jeje opobaka foe „den dedewan ini Kristus”, di ben feni presi ini na lente foe 1918, dri nanga afoe jari baka di Jezus ini na bigi dréten foe 1919 na a kaba foe den ten foe den heiden, ben poti tapoe na troon ben sa waka parallel nanga Jezus égi opobaka tapoe 16 Nisan foe na jari 33 G.T., tapoe „na mindri foe na wiki” (Dan. 9:27). Foe datede „den fosi ben opobaka”. Na opobaka foe den ben waka na fesi foe na opobaka foe den wan di ben tan na libi te na „de noja” ofoe parousia foe Kristus en na kiri foe na kownoekondre prékiwroko.
11. Sortoe overeenkomstige pisiten e kon ini na tori foe den profétische kotoigi foe Gado ini Openbaring 11 en na sani di na opo go na hemel foe den e agersi, de wan kon troe foe 1 Thessalonika 4:17?
11 Na wan srefi sortoe pisiten e kon ini na tori foe den profétische kotoigi foe Gado, di Openbaring 11 e skrifi foe den. Leki fa Openbaring 11:3-7 e sori den den ben kiri den baka di den ben taki profétitori 1260 dé ofoe 31/2 jari. Ma den e kisi wan opobaka: „Baka den dri nanga afoe dé libi-geest foe Gado ben go ini den, en den ben go tanapoe tapoe den foetoe, en bigi frede ben fadon tapoe den soema di ben loekoe den. Den jere wan tranga sten foe hemel taki: „Opo kon dja” (Openb. 11:11, 12). Nanga disi na proféti fasi a ben sori dati na fikapisi foe kristen di ben gebore njoen nanga geest ben kisi njoen libi ini na Kownoekondre-prekiwroko ini na lente foe 1919. Dati den ben opo go na fesi foe na heri grontapoe ini wan hé positie, no ben de wan kon troe foe 1 Thessalonika 4:17. Nanga disi wi kan memre dati den 120 discipel foe Jezus Kristus ben kon ini wan njoen publiki activiteit ini Jeruzalem pas 51 dé baka na Masra foe den ben anga na wan postoe en ben beri.
12. Fa na kon na libi foe na fikapisi ben taki na fesi ini visioen foe Ezechiël 37:1-14?
12 Na kon na libi disi foe na fika pisi di ben de na libi ete, ben taki ooktoe na fesi ini Ezechiël 37:1-14. Drape Jehovah ben gi na proféti Ezechiël wan visioen foe wan vallei (lagi presi) foeroe nanga dré bonjo foe Israëlsoema. Den bonjo ben go miti baka en bow kon tron libi Israëlsoema, di ben de klari foe libi na katibo foe den ini na heiden Babylon. Te a de verteri fa na visioen ben kon troe, dan Jehovah e taki: „Loekoe, mi e opo den grebi foe oenoe, en mi wani foe oenoe opo komoto foe grebi, o mi pipel (ini katibo foe Babylon), en tjari oenoe go tapoe na gron foe Israël. En oenoe sa moe sabi, dati mi de Jehovah, te mi e opo den grebi, o mi pipel.” — Ezech. 37:12, 13.
13. Fa na visioen disi foe na vallei foe dré bonjo ben kon troe ini na ten disi, en fa disi ben akroederi nanga san pasa nanga Jezus discipel, ma san ben pasa fosi tapoe na „afoe foe na wiki”?
13 Ini na kon troe foe na visioen dati, na fikapisi foe jeje Israëlsoema ben kisi njoen libi ini na lente foe 1919 en den ben kon fri foe na grontapoe kownoekondre foe falsi religie, na Bigi Babylon. No dati wawan, ma den ben kon fri . . . foe na saka den srefi ondro den politiek kroetoebakra nanga sroedati fréri foe hen, di ben dini hen ini na Fosi grontapoefeti nanga san a ben taki. Nanga wan profétische betekenis foe marki na ten foe den sani di ben sa pasa ini disi ten, a de krin, dati na kon kisi njoen libi baka foe Jezus discipel nanga na kon fri foe den foe na djoe seti foe sani ben pasa pas, baka di Jezus ben dede en ben beri en tapoe na di foe dri dé, 16 Nisan foe na jari 33 G.T. ben opobaka foe dede. Disi ben de sjatoe baka na „afoe foe na wiki”, di Jezus ben offer leki verloesoeprijs gi na heri libisoema famiri.
14. Den kotoigi disi foe disi ten di ben kisi njoen libi baka en di ben kon de actief, de foe sortoe groepoe foe 1 Thessalonika 4:15-17, en na sortoe fasi na sani di Jezus e kari na „laatste dé” o de wan „kolokoe” dé gi den?
14 Ini na ten disi, den memre foe na fikapisi, di ben kisi njoen libi baka en di ben de actief baka en di ini na lente foe 1919 ben teki na prékiwroko baka foe doe, ben de den soema di na apostel Paulus ben taki foe den leki „wi, den libiwan di e tan na libi te na de noja foe na Masra” (1 Thess. 4:15). Den e verwakti, baka di den ben gi na kownoekondre-prékiwroko tapoe na heri grontapoe foe dede „ini wanfasi nanga Masra” en ini na ten foe hen de noja. Na dede foe den e feni presi ini na ten foe na „laatste dé” dati ini na ten di Jezus, soleki a ben taki, den discipel dati, di ben abi na grani foe njan hen skin en dringi hen broedoe . . . Disi ben sa wani taki gi den, dati den „sa hari poeroe” foe go miti hen, na Masra foe den, ini loktoe. Na wantron wantron opobaka foe den go na hemel libi e pasa sondro soema di e tan na baka tapoe hen, leki na wolkoe ben poeroe hen na den ai. Den de troe troe „kolokoe”, foedi „foe sensi now (ini na ten foe na „de noja foe Masra”) den e dede ini wanfasi nanga Masra” en no foe wakti ini dede tapoe hen tweede konbaka. — Openb. 14:13; Joh. 6:53, 54; 1 Kor. 15:52, 53.
15. Sortoe kompe-wrokoman foe na laatste ten sa de te na fikapisi di tan na libi sa gwe na a kaba foe na „laatste dé”, en sortoe adjosi disi ben sa kan de?
15 Den e libi na baka wan „bigi ipi” kristen kompe. Den ben wroko makandra nanga na fikapisi foe jeje Israëlsoema foe gi na laatste kownoekondre-préki na ala naatsi. Na „bigi ipi” disi e verwakti foe pasa libilibi na „bigi benawtoe, pe na grontapoe seti foe sani foe disi ten sa kon na wan kaba (Openb. 7:9, 14). Den sa de foe datede na libi ete te na prisiri ten sa kon dati den laatste wan foe na fikapisi foe jeje Israëlsoema sa „hari poeroe” go miti Masra ini loktoe” (1 Thess. 4:17). Fa a ben sa de wan lobi sani te na „bigi ipi” di e libi ini na laatste dé dati foe na opobaka, kan gi adjosi na a fikapisi di tan na libi te den, na a kaba foe na „laatste dé” e tjari na grontapoe wroko foe den na wan kaba! (Joh. 6:53, 54). Disi no sa de wan makriki adjosi, ma a ben kan go makandra nanga wan tranga sori foe lobi gi makandra mindri den soema di a go en den di e tan tapoe grontapoe. Na „bigi ipi” no sa si den moro.
16. Soema den memre foe na „bigi ipi” sa bari wan prisiri kon tapoe na paradijs-grontapoe, ma na demakandra foe soema den sa misi?
16 Aladi na „bigi ipi” sa lasi na demakandra foe na glori fikapisi, a sa kisi trowstoe foe wan bigi groepoe njoen soema di sa libi tapoe grontapoe. Soema na den disi en pe de komoto? Den de trawan foe na libisoema famiri di ben bai kon fri en sa kisi wan opobaka en na so fasi sa drai komoto foe na „laatste féjanti”, na dede foe Adam (1 Kor. 15:26). Fa a sa de wan bigi prisiri gi na „bigi ipi” foe miti ala den soema disi, di drai komoto foe dede, soema leki Job, ja, Abraham, Isaak, Jakob, Johannes na Dopoeman, ja, srefi den jongoe pikin foe Bethlehem, di na féjanti foe den, Herodes de Grote ben seni go no a kondre foe den dedewan! Fa a sa de wan prisiri ooktoe foe miti boen mati, soleki den „tra skapoe” foe na Toemsi Boen Herder, di no ben tan na libi na a ten foe na „bigi benawtoe” en di no ben go wantron wantron ini na 1000-jari rigeri! (Openb. 20:4, 6; Joh. 10:16) Den memre foe na salfoe fikapisi di o pasa libi libi na „bigi benawtoe” sa de so langa ete ini na Njoen ordening, sodati den sa de kotoigi foe na bigin foe na opobaka foe den grontapoe dedewan tapoe na „laatste dé” foe den? (Joh. 11:24). Na bijbel no e gi wan seker piki foe disi.
17. (a) Ini na tori foe na koti foe den grontapoe dedewan, san den soema di sa opobaka foe dede sa de te joe agersi den nanga Kristus? (b) Na sortoe fasi na „bigi ipi” sa de net so leki soema di e opobaka foe dede, en sortoe blesi situatie sa de na a kaba foe na 1000-jari tiri foe Kristus?
17 Den soema disi di opobaka foe dede, so koti leki wan bakaten njanjan, aladi na Jezus di ben opobaka foe dede, de na fosiwan, ofoe „Kristus, na fosiwan” (1 Kor. 15:20, 22, 23). Aladi na „bigi ipi” soema di sa tan libi no abi fanowdoe foe den opo den baka foe grebi, leki den soema di e opobaka foe dede, tog den sa abi fanowdoe moro fara foe na zoen-ofrandi foe Jezus Kristus. Ala bakapisi foe na sondoe di wi ben kisi moe figi poeroe. Wan blesi groepoe den sa de troe troe na a kaba foe Kristus 1000 jari tiri te leki a „laatste féjanti, na dede sa kon na wan kaba gi na heri libisoema famiri, di bai fri en di e gi jesi na Gado en a den mindri joe abi toe na „bigi ipi” soema di pasa libi-libi na bigi benawtoe. Dan nanga reti, Jehovah Gado sa de „ala sani gi ibriwan”. — 1 Kor. 15:26, 28; Openbaring 1:18; 20:11-14.