Meki wi prisiri ini „na Gado di e gi wi howpoe”
„Joe de mi howpoe, o Soeverein Masra, Jehovah, mi vertrouw foe sensi mi jongoe jari.” — Ps. 71:5
1, 2. (a) Sortoe bijbel bewijsi wi abi dati Gado e sorgoe gi wi? (b) Fa na prisiri foe wi kan kon boen doro doro?
JOE e tan tanapoe pikinso en prakseri foe na diri matifasi di joe abi nanga Gado? Fa a de wan sani di e meki wi froewondroe foe sabi dati Gado e sorgoe gi wi! Foe na sé foe Jehovah, dan den naatsi de troe troe leki wan dropoe ini wan emre. Leki aparti soema wi moe de foe datede boen njofi ini hen ai. Ma Jezus Kristus e gi wi na djaranti: „Den no o seri toe pikin fowroe foe wan moni di no abi foeroe waarde? Tog no wan foe den sa fadon na gron sondro foe joe hemel Tata sabi foe dati. Ma srefi den wiwiri tapoe joe ede teri alamala. No frede foe datede: joe abi moro waarde leki foeroe pikin fowroe.” — Matt. 10:29-31; Jes. 40:15.
2 Efoe srefi wan pikin fowroe no e fadon tapoe na gron sondro dati Gado si dati, o bigi na sari foe hen moe de gi wi leki libisoema, di a ben meki na a égi prenki foe hen! (Gen. 1:26). Na Gado foe wi de troe troe bigi, ini hen koni en makti foe meki sani, ma a de moro bigi ini hen sorgoe foe na regtvaardiki afersi foe soema di e kisi kwinsi en ini na sori foe na toemsi bigi lobi foe hen gi libisoema (Ps. 33:4, 5). A de troe troe wan grani foe kan de akroederi na djaranti foe Jezus ini na lobi foe Gado en foe kan tan na ini. Jezus ben taki disi: „Efoe oenoe e hori mi komando, dan oen sa tan ini na lobi foe mi, soleki mi e hori den komando foe na Tata en e tan ini na lobi foe hen.” En Jezus ben taki moro fara: „Den sani disi mi ben taki gi oen, sodati na prisiri foe mi kan de ini oenoe en na prisiri foe oenoe kan de boen doro doro. — Joh. 15:10, 11.
3. Foe san ede David en ooktoe wi kan abi troe troe vertrouw ini Jehovah?
3 Ini na moeiliki ten disi wi kan prisiri ooktoe, dati na lobi Gado foe wi e gi howpoe. Agersi leki David ben skrifi na di foe sébi-tenti-na-wan psalm baka di a ben ondrofeni hebi tesi en ini na psalm disi a de gi grani na a Soeverein Masra Jehovah leki hen howpoe nanga vertrouw foe sensi hen jongoe jari. Foe eksempel, di David ben kon tanapoe na fesi na Goliath di ben bewégi hen srefi nanga moeiti a ben verklari: „Jehovah, di ben verloesoe mi foe na anoe foe na lew nanga foe na anoe foe na beer, hen sa verloesoe mi foe na anoe foe na Filistijn disi.” Jehovah ben doe disi ooktoe! (1 Sam. 17:37, 45-50). En te nanga na dé foe tide Jehovah e tan gi na jepi foe hen na den memre foe na salfoe fikapisi foe hen kotoigi, di ben dini hen „foe sensi den jongoe jari foe den” tranga ini howpoe.
NA FANOWDOE FOE WAN LIBI HOWPOE
4. Foe san ede meki den sani di ben skrifi fositen” de wan fonten foe howpoe?
4 Den pramisi di Jehovah ben meki skrifi langaten na fesi ini hen wortoe, de troe troe wan fonten foe wan seker howpoe foe na ten na wi fesi. Na apostel Paulus e taki foe disi: „Ala sani di ben skrifi fositen, ben skrifi foe leri wi, sodati wi ben sa abi howpoe . . . nanga jepi foe, na hori-doro foe wi en nanga jepi foe na trowstoe foe den Boekoe” (Rom. 15:4). Wi abi foe troe howpoe fanowdoe. Ma fa den „sani di ben skrifi na fositen” e gi wan reden foe howpoe? San meki na fanowdoe foe howpoe doe kon?
5. (a) Fa na fanowdoe foe howpoe ben doe kon? (b) Foe san ede nanga reti den fosi papa nanga mama foe wi ben tjari na dede strafoe kon tapoe den, en foe san ede na strafoe disi e kisi wi ooktoe?
5 Den „sani di ben skrifi fositen”, e sori krin fa Gado ben meki den fosi papa nanga mama foe wi en ben poti den ini wan paradijs foe prisiri, nanga na den fesi, foe libi foe tégo en foe meki lobi, kolokoe libisoema di noiti ben sa dede tapoe na grontapoe (Gen. 1:26-28; 2:7-9, 18-25). Ma Adam nanga Eva ben lasi na grani disi. Fa disi ben doe kon? Foedi den ben sondoe en na so fasi ben lasi na marki foe gi jesi na den Tata, Jehovah Gado, tapoe wan volmaakti fasi. Na Soeverein Masra Jehovah ben kroetoe nanga reti na tranga-jesi man nanga oema foe a dede. Den ben kon de tranga-ede, onafhankelijk en presi no ben de moro gi den na mindri den loyaal mekisani foe Jehovah. Boiti dati, den no ben tjari na dede-strafoe kon na den tapoe wawan, ma den ben tjari disi kon ooktoe tapoe den miljard miljard pikin di ben sa gebore foe den leki sondoe papa nanga mama. Paulus e verteri wi foe disi: „Foe datede, soleki nanga wan soema na sondoe ben kon ini grontapoe, en nanga na sondoe na dede, en na so fasi na dede ben panja hensrefi go na ala soema, bikasi den alamala ben sondoe.” — Rom. 5:12.
6. Tapoe na gron foe sortoe howpoe den mekisani kon ini katibo?
6 Ma Paulus e go doro foe taki, dati aladi „den sari di meki ben de ondro sosofasi”, disi ben pasa „tapoe na gron foe howpoe”. Sortoe howpoe? Na libi howpoe dati „den ben sa meki kon fri foe na katibo foe porifasi en ben sa abi glori fri foe den pikin foe Gado”, soleki wi fosi papa nanga mama ben prisiri densrefi ini so wan fri ini na paradijs. Soboen, na howpoe disi ben sa abi na ini hen na howpoe foe tégo libi. Soso Gado ben kan gi sa wan howpoe. — Rom. 8:20, 21; Joh. 17:5.
HOWPOE TAPOE NA „SIRI”
7. Fa wi e kon sabi na „siri” foe pramisi?
7 Leki wan foe den fosi „sani di ben fositen”, wi e lési na pramisi foe Gado dati na „siri (na bakatenpikin)” foe na organisatie foe hen ini hemel di gersi wan oema „sa masi (na sneki) ini hen ede”, nanga tra wortoe, dati a sa pori Satan nanga ala hen sneki broedoe (Gen. 3:14, 15). Ma soema de na „siri” disi? Bakaten den e taki foe hen, dati a de ooktoe na „siri” foe na mati foe Gado, Abraham, di nanga jepi foe na siri foe hen „ala naatsi foe grontapoe sa blesi densrefi foe troe”. Na apostel Paulus e meki wi kon sabi na „siri” disi nanga den wortoe: „Den pramisi now ben taki gi Abraham nanga hen siri. . . . ’En na joe siri’ dati na Kristus.” — Gen. 22:18; Gal. 3:16.
8. (a) Fa na libi en waka foe Jezus ben taki langaten na fesi? (b) Fa na lobi foe Gado ben sori gi libisoema?
8 Ini den sani „di ben skrifi fositen”, ben taki na fesi na heri waka nanga libi di Jezus Kristus ben sa abi na grontapoe. Soleki Jesaja ben taki na fesi moro leki sébi hondro jari, dan den ben veragti Jezus, leki a no de noti, a ben pina, en „leki wan skapoe di e tjari go foe slagti”. Akroederi nanga na wani foe hen Tata „a ben trowe hen sili ini dede”, sodati a ben kan verloesoe „foeroe” foe na katibo na sondoe (Jes. 53:3-12). Jehovah ben opo hen foe dede en ben poti hen ini hemel leki na „Moro Prenspari Fesiman foe Libi”, sodati ibriwan di e bribi ini hen, sa abi tégo libi”. Gado ben meki na seti disi, foedi a „ben lobi na grontapoe foe libisoema sote” (Joh. 3:15, 16; Tori foe den apostel 3:15). Fa wan toemsi moi howpoe ben man foe kon nanga disi! — Joh. 5:24-29.
WAN BOEN FUNDAMENTI FOE HOWPOE TAPOE TÉGO LIBI
9. (a) Sortoe sani e gi wan djaranti na a howpoe foe wi? (b) Sortoe krakti na howpoe foe wi moe abi tapoe wi?
9 Na nen foe wi Gado, Jehovah e gi wi na djaranti tapoe wan howpoe di abi wan boen fundamenti. Na nen dati wani taki „A de meki sani kon tron”, en disi e sori, dati na a kon troe foe hen prakseri a de meki spesroetoe sani pasa. A de na Gado „di no ben lé” en di ben gi „na fundamenti foe howpoe” „bifo ten di didon fara ini owroeten” (Tit. 1:2). San na howpoe dati wani taki gi joe? Joe e si hen leki fa den soema foe na kristenheid e si na religie foe den — leki wan gwenti di den e dini soso nanga den mofo? Ofoe na foe na moro dipi pisi foe joe ati joe ben gi joe heri persoon, joe heri libi abra „na a Gado di e gi howpoe”? (Rom. 15:13). Na howpoe dati ben kon de so krakti gi joe kaba, dati agersi leki de wan troe sani kaba? Efoe ja, dan a tron na bribi foe joe — wan bribi di sa de foeroe nanga boen froktoe, foedi joe e taki nanga trawan foe na howpoe foe joe. — Hebr. 11:1; Jak. 2:17.
10. (a) San e gi na howpoe foe wi inhoud? (b) Foe san ede salfoe kristen moe prisiri now ini na howpoe foe den?
10 Foedi na Soeverein Masra foe wi Jehovah e libi foe tégo, dan den pramisi foe hen e gi wan fundamenti foe wan „libi howpoe”. En hen Manpikin di opobaka foe dede, Jezus Kristus, e gi na howpoe dati inhoud, bikasi „a man ooktoe foe jepi den soema di e go na Gado nanga wroko foe hen, foedi a de libi ala ten foe a de na afkati foe den” (Hebr. 7:24, 25). Na so na apostel Petrus ben skrifi gi salfoe kristen: „Blesi foe na Gado en Tata foe wi Masra Jezus Kristus, bikasi akroederi na bigi sari-ati, foe hen a ben gi wi wan njoen gebortoe foe wan libi howpoe, foe wan goedoe di no e pori en di no abi vlaka en di no e flaw, nanga jepi foe na opobaka foe Jezus Kristus foe dede. A poti na wan sé gi joe ini hemel, di e tan kibri nanga na krakti foe Gado nanga jepi foe bribi foe wan redding di de klari foe kon na krin ini na laatste pisiten. Ini na sani disi joe e prisiri toemsi” (1 Petr. 1:3-6). Now di wi doro na „laatste pisi ten”, dan wan dwingende reden de gi salfoe kristen foe prisiri ini na howpoe dati.
11. (a) Sortoe „libi howpoe” den memre foe na „bigi ipi” abi ooktoe? (b) Sortoe fasti fundamenti de foe na howpoe dati?
11 Ma san wi kan taki foe „na bigi ipi . . . foe ala naatsi nanga lo nanga volkoe nanga tongo”, di e verwakti foe libi foe, tégo tapoe wan paradijs grontapoe? Ooktoe den abi wan „libi howpoe”, bikasi den ben kisi na pramisi: „Den no sa abi angri nanga dréwatra moro, ooktoe na son no sa skijn tranga tapoe den en ooktoe no wan faja di e bron den, bikasi na Lam, di de ini na mindri foe na troon foe Gado, sa tjari den go na sabana en na fonten foe watra foe libi. En Gado sa figi poeroe ala watra na den ai” (Openb. 7:9, 16, 17). Den soema di tapoe na gron foe na „boen njoensoe” e abi howpoe, den fesi no sa fadon, bikasi a abi wan krakti fundamenti tapoe na Wortoe foe Gado, di skrifi nanga jepi foe Gado jeje. Na apostel Petrus ben gebroiki Jesaja 40:8, di a ben taki foe „na wortoe foe na libi Gado, di e tan”: „’Ala skin de leki grasi; en ala hen glori de leki wan bromki foe na grasi; na grasi e pori en na bromki e fadon, ma san Jehovah taki, e tan foe tégo’. We, disi de na „wortoe”, disi di ben meki bekenti na joe leki boen njoensoe.” — 1 Petr. 1:23-25.
12. O fa Gado de nanga boen-ati ini na gi foe tégo libi?
12 Di Jezus ben kari hensrefi na boen herder „Di e gi hen sili abra foe na boen foe den skapoe”, a ben taki: „Mi ben kon foe den ben sa abi libi en den ben sa abi hen pasa marki” (Joh. 10:10, 11). Na boen-ati disi no de wawan gi den memre foe na „pikin ipi di e tron ini hemel mede-erfgenaam nanga Kristus (luk. 12:32). Nono, en ete wan tron, nono, bikasi Jezus ben taki: „Mi abi tra skapoe ete, di no de foe disi koi; den dati ooktoe mi moe tjari en de sa arki mi sten, en den sa tron wan ipi, wan herder. En mi e gi den tégo libi” (Joh. 10:16, 28) Boiti na „bigi ipi, di abi wan verwakti foe pasa libi-libi na „bigi benawtoe” getrouw dienstknegti bifo na ten foe Kristus sa prisiri densrefi ini libi nanga den miljard miljard tra dedesoema di sa opo kon baka tapoe grontapoe nanga tégo libi na den fesi (Matt. 24:21; Hebr. 11:35; Openb. 20:12). Fa a de wan boen-ati foe na sé foe Gado foe na seti disi foe libi
13. Fa na lobi foe Gado gi na libisoema famiri e kon na krin, en sortoe krakti disi moe abi tapoe wi?
13 Na boen-ati fa Jehovah ben sori hen lobi gi libisoema, e kon na krin ini den wortoe di Jezus ben taki na fesi: „Gado ben lobi na grontapoe (foe libisoema) sote, dati a ben gi hen wan enkri gebore Man-pikin, so dati ibriwan soema di e sori bribi ini hen, no ben sa pori, ma ben sa abi tégo libi. Bikasi Gado no ben seni hen Manpikin kon na grontapoe foe a ben sa kroetoe (feni fowtoe) na grontapoe, ma foe na grontapoe ben sa kisi jepi foe hen. Na soema di e sori bribi ini hen no sa kisi kroetoe” (Joh. 3:16-18). Foedi Jehovah nanga hen Manpikin abi so boen-ati, dan wi no moe abi boen-ati toe en meki na toemsi bigi „boen njoensoe” disi bekenti gi trawan?
14. (a) Foe san ede den soema foe den naatsi de leki soema „di no abi howpoe”? (b) Fa wi kan sori na bribi nanga „libi howpoe” foe wi?
14 Te wi e doe disi, dan wi abi wan prati na „boen wroko, di Gado ben sreka na fesi foe wi ben sa waka na ini”. Wi no de moro langa leki den soema di Paulus e skrifi foe den leki „vreemde soema tapoe na tori foe den verbontoe foe na pramisi” en leki soema di „no abi howpoe” en „di de sondro Gado ini na prontapoe”. Wi no waka moro langa „soleki ooktoe den naatsi e waka ini den sosofasi foe den prakseri, na doengroe di den doengroe ini den ferstan, en de leki vreemde soema foe na libi di de foe Gado, foe na donfasi ede di de na ini den, foe na sondro firi ati foe den” (Ef. 2:10, 12; 4:17, 18). Nono, bikasi wi e waka nanga Gado, ala di den „boen wroko” foe wi leki na préki foe na „boen njoensoe” en na leri di wi gi ini disi, de wan sori foe na bribi nanga „libi howpoe” foe wi, di wi ati foeroe pasa marki nanga hen. — Matt. 4:17; 5:16; 9:35; 24:14.
NA HOWPOE TAPOE WAN REGTVAARDIKI RIGERI
15. (a) Foe san ede wan boen rigeri de fanowdoe, efoe wi wani foe kan abi wan libi howpoe? (b) Sortoe profétitori di e gi tranga Jesaja ben skrifi foe disi?
15 Na libi howpoe foe wi abi foeroe moro na ini leki tégo libi na wi fesi. Prakseri disi pikinso: O switi a ben sa de foe libi foe tégo ondro takroe-ati libisoema rigeri di e kwinsi joe, soleki ben kon nofotron nanga rigerimakti ini na ten foe na historia? Foeroe soema ben sa teki dede na presi foe so wan katibo. Kolokoe dati na libi howpoe foe na pipel foe Gado ai ini hen na howpoe tapoe wan regtvaardikirigeri, na Kownoekondre di kristen soema ben begi langaten foe hen en di sa santa na nen foe Jehovah en di sa sorgoe dati hen wani sa pasa soleki ini hemel, so ooktoe tapoe grontapoe” (Matt. 6:9, 10). Ini na boen langa sreka foe hen foe na kownoekondre, Jehovah ben gebroiki kownoe David foe Israël foe agersi Kristus Jezus ini hen rol leki kownoe. Na proféti Jesaja ben skrifi foe na kownoe dati leki „Vrede-kownoe” nanga den wortoe: „Na a foeroe di na kownoe-rigeri sa foeroe en na a vréde wan kaba no sa kon, tapoe na troon foe David en tapoe na kownoekondre, foe meki a de stéfi en foe gi hen tranga nanga jepi foe geregtigheid en nanga jepi foe regtvaardigheid, foe now te nanga ten di no abi marki. Ja, na faja foe Jehovah foe den fetiman sa doe disi.” — Jes. 9:6, 7.
16. Sortoe sekerfasi Gabriël nanga na psalmsingiman ben gi foe na kownoekondre?
16 Moro leki doesoen jari na baka na engel Gabriël ben sori hensrefi na wan wendje, Maria, en a ben taigi hen: „Joe ben feni boen-ati na Gado; en loekoe! joe sa kisi ini joe bere en meki wan manpikin, di joe moe gi na nen Jezus. Disi sa de bigi en den sa kari hen na Manpikin foe na Moro Héwan, en Jehovah Gado sa gi hen na troon foe hen Tata David, . . . en na a kownoekondre foe hen wan kaba no sa kon” (Luk. 1:30-33). Na „Manpikin disi foe na Moro Héwan” no e gi soboen soso na pasi foe tégo libi, ma ooktoe blesi nanga jepi foe hen kownoekondre. Fa kownoekondre disi sa tiri na heri libisoema famiri ini regtvaardikifasi en sa gi den borgroe foe hen tapoe na heri grontapoe vréde pasa marki.
17. Foe san ede wi moe abi „howpoe pasa marki, en fa wi kan sori na howpoe dati?
17 Aladi na apostel Paulus e sori ete wan tron tapoe „den sani di ben skrifi fositen”, a de skrifi: „Agen Jesaja e taki: ’Na roetoe foe Isai (David Tata) sa de, en wan soema sa opo tanapoe foe tiri den naatsi; tapoe hen den naatsi sa poti den howpoe.’ Meki na Gado di e gi joe howpoe, meki joe kon foeroe nanga ala prisiri nanga vréde, foedi joe e bribi, sodati joe kan abi pasa marki howpoe nanga krakti foe santa jeje” (Rom. 5:12, 13). Na howpoe foe wi tapoe na kownoekondre toe Gado ini anoe foe Kristus de troe troe wan fonten foe prisiri nanga vréde foe ati, en o moro wi e abi howpoe pasa marki, o moro wi e kisi tranga _foe meki na howpoe dati bekenti gi trawan, nanga na krakti di na jeje foe Gado e gi. — Zach. 4:6; Jes. 40:22-31.
18. Sortoe moi prenki foe na ten di e kon Jesaja e gi wi foe na kownoekondre?
18 Di Paulus ben taki foe na „roetoe foe Isai”, a ben teki wan pisi komoto foe Jesaja kapitel 11, pe disi e skrifi foe na toemsi moi prenki foe na ten di e kon foe na kownoekondre-tiri foe Kristus: „Tapoe hen na jeje foe jehovah sa kon sidon, na jeje foe koni en foe verstan, na jeje foe rai en foe krakti, na jeje foe sabi en foe na frede foe Jehovah; en a sa feni prisiri ini frede foe Jehovah. En a no sa kroetoe nanga san hen ai e si wawan, en a no sa gi piri-ai nanga san hen jesi e jere. En nanga regtvaardiki fasi a sa kroetoe den mofina wan en nanga opregti fasi a moe gi piri-ai foe na boen foe den safri-ati soema foe grontapoe.” Baka di a skrifi-foe na vréde fasi foe na jeje paradijs, pe na pipel foe Gado e prisiri hensrefi na ini now, en pe a de leki den wilde meti foe grontapoe kon de tam, na profétitori e verklari: „Na grontapoe troe troe sa kon foeroe nanga na sabi foe Jehovah soleki den watra e tapoe ooktoe den se.” Fa disi de wan glori howpoe! A no de wan froewondroe sani dati foeroe soema foe den naatsi ben go begi na „a roetoe foe Isai”, na Jezus di ben poti tapoe na troon, di „sa tanapoe drape leki wan marki gi den volkoe”. Den vers 1-10.
19. Foe san ede wi moe prisiri wisrefi now spesroetoe ini wisrefi now spesroetoe ini howpoe?
19 Sensi na jari 1914 na libisoema famiri e libi ini na „bosroiti foe na seti foe sani”. Na „Manpikin foe libisoema” ben kon, en ala engel nanga hen, foe sidon tapoe hen glori troon. A ben go abra foe tjari den naatsi kon makandra foe kroetoe en „foe prati den soema soleki wan herder e prati den skapoe foe den boko-boko”. Gi den naatsi nanga den boko-boko a de wan ten foe wan benawtoe sondro howpoe, ma gi den soema di gersi skapoe en di e gi jesi a de wan ten foe „opo densrefi letopoe en foe opo den ede, bikasi na verloesoe foe den e kon krosibé”. — Matt. 24:3-8; 25:31-34; Luk. 21:26-28.
20. San wi moe doe foe kan horidoro now ini howpoe?
20 Ma horidoro de fanowdoe foe kan ondrofeni na kon troe foe na howpoe. Te den „laatste dé” disi e kon na wan kaba dan wi moe e si den sani soleki Jezus ben si den en soleki Paulus ben vermane: „Meki now na Gado, di e gi horidoro nanga trowstoe, gi dati oen abi na srefi jeje fasi” di Kristus Jezus ben abi, sodati oenoe nanga wanfasi en nanga wan mofo kan gi glori na a Gado en Tata foe wi Masra Jezus Kristus (Rom. 15:5, 6). Meki wi foe datede „ini wanfasi” en „nanga wan mofo” go doro nanga horidoro foe doe diniwroko en foe préki na „boen njoensoe” disi foe na kownoekondre „gi ala naatsi leki wan kotoigi”, ini na vertrouw dati baka dati „na kaba sa kon” (Matt. 24:13, 14). Ja, Meki wi abi wan fasti vertrouw ini na Soeverein Masra Jehovah, na „Gado di e gi howpoe”.