Libi akroederi na bosroiti foe wi
1. San ibriwan foe wi moe doe foe kan tan hori na a bosroiti foe wi, soleki e kon na krin ini Spreuken 16:9 nanga 1 Petrus 1:13?
TE WI teki na libi di Gado poti na wi fesi, dan wi e teki toe foe waka na pasi foe Gado — na heri, opregti, kristen pasi. Wi moe tan waka na pasi dati, en disi e aksi foe wi foe poti bribi ini den pramisi foe Gado, foe span wisrefi krakti en foe sori horidoro. Ma te wi e sori den moeiti disi, dan wi e loekoe na Gado foe tjari wi ini den bosroiti foe wi, aladi wi e tan hori na a fosi bosroiti di wi ben prakseri boen foe hen. Na bijbel e taki: „Na ati foe na grontapoe sma kan denki na pasi foe hen, ma Jehovah srefi e tiri den foetoestap foe hen” (Spr. 16:9). Petrus e taki foe na afersi dati: „Tranga foe datede joe verstan foe activiteit, hori joe denki alamala na wan; poti joe howpoe tapoe na boen-ati-fasi di joe sa kisi nanga na kon na krin foe Jezus Kristus.” — 1 Petr. 1:13.
2, 3. San kan jepi wi toemsi foe tranga na verstan foe wi foe a kan doe positief sani?
2 San wi kan doe moro boen „foe tranga na verstan foe wi”? Fa wi kan de seker dati „wi e hori wi denki alamala na wan” en no komoto foe wi balans?
3 Ini na fosi presi wi kan prakseri dipi foe na blesi di no abi hen speri en di wi ondrofeni, foedi wi ben kisi na waarheid foe Gado. Now wi e njan boen foe wan moro betre libi en wi no e go so boekoendoen ondro den sorgoe, sari nanga pina di na grontapoe e ondrofeni. Efoe wi e ondrofeni tog pina, dan wi e sabi foe sortoe sani na pina dati e kmoto en wi sabi toe, dati te wi horidoro ondro na pina ini bribi nanga vertrouw, dan moro betre kristensma wi sa tron . . . En di wi abi na howpoe tapoe wan opobaka, dan foeroe foe na frede foe dede nanga na sari foe lobiwan di dede, e poeroe. A de meki ala den takroe sani di wi e ondrofeni leki noti foe na tégo libi ede di de na wi fesi. Jezus ben taki gi hen discipel: „Kolokoe den ai de di e si den sani di oenoe e si. Bikasi mi taki gi oen taki: Foeroe proféti nanga kownoe ben wani si den sani di oen e si, ma den no ben si den, en foe jere den sani di oen e jere, ma den no ben jere den.” — Luk. 10:23, 24.
4, 5. (a) San ben bewégi engel foe sori so wan belangstelling foe na fasi di libisma kan kisi jepi soleki 1 Petrus 1:12 e sori? (b) Fa wi moe firi wisrefi, foedi wi sabi na standpunt foe den?
4 Ja, na redding di wi e prisiri na ini de wan bigi prijs en Gado e gi libisma hen tapoe wan wondroe fasi. Petrus e taki dati den proféti nanga ala prisiri ben wani sabi fa na redding dati ben doe kon en dati „engel ben gridi foe loekoe ini den srefi sani dati” (1 Petr. 1:10-12). Wi sabi dati den engel ben de kaba di na grontapoe ben meki, en srefi foeroe jari na fesi na ten dati (Job 38:7). Den ben si na glori, na koni nanga na makti nanga tra fasi foe den égifasi foe Gado ini den miljard miljard mekiwroko. Ma dja na grontapoe wan sani ben de di den no ben sabi ete. Fa Gado ben sa jepi na sondoe libisma famiri? Den engel ben abi foeroe belangstelling foe disi. Den ben wani sabi fa na sondoe foe libisma ben kan kisi pardon tapoe na gron foe wan libisma ofrandi, bikasi so wan sani den no ben si nooiti ete. Na toemsi moi égifasi sari-ati, wan moro fini égifasi foe Gado, di e hari sma kon en e waran na ati, moro leki makti ofoe srefi koni, ben sori, foedi a ben seni Kristus foe bai na libisma famiri fri. Ooktoe na lobi foe Gado gi sondari ben sori, foedi a ben gi tiri na den sma di ben sori bribi ini hen Manpikin.
5 We, efoe engel ben si na sari-ati disi foe Gado leki wan foe den moro bigi sani, omeni moro wi di ben kisi na sari-ati disi en ondrofeni hen ibri dé moe prisiri foe dati en poti hen sari-ati tapoe ala tra sani! We, sortoe moro bigi dekati wi ben sa kan abi foe prisiri foe na bosroiti foe wi en foe hori wi srefi na hen!
Bijbelstudi de toemsi prenspari
6. Te wi loekoe 1 Petrus 1:2, 3, dan sortoe prenspari presi na lési nanga stoeka foe na bijbel moe abi ini wi libi?
6 San wi foe wi sé kan doe ini disi ten foe meki na howpoe foe wi fasti? Petrus e piki: „Kweki leki njoen gebore baby wan lostoe na a merki di no falsi di de foe na wortoe, dati nanga jepi foe dati joe kan gro foe kisi redding, efoe joe ben tesi dati Masra de boen” (1 Petr. 2:2, 3). Soso te wi lési en stoeka na bijbel opregti en soifri, wi kan abi na jeje krakti di wi moe abi. Wan tra pasi no de. Wi moe lési wisrefi na bijbel en prakseri dipi san tanapoe na ini. Ooktoe wi moe lési na bijbel nanga wi osofamiri en taki foe den waarheid di tanapoe na ini. Te wi doe disi, dan wi sa kweki wan moro bigi lobi gi na wortoe en wani sabi moro. Efoe na wet foe Gado ben aksi foe den kownoe ini Israël dati den ben moe meki gi densrefi wan boekoe foe na wet, di den ben abi ini na ten foe den, en dati ibri dé den ben moe lési na ini nanga safri sten, fa wi, di abi na heri bijbel, di kan meki wi koni foe kisi redding, kan doe wan sani di de moro mendri? — Deut. 17:19, 20; 2 Tim. 3:15.
7, 8. (a) San den sma ini na synagoge ini Beréa ben doe, sodati foe na sé foe Gado den ben kisi prijse? (b) Fa a doe kon dati a de so prenspari foe lési joesrefi den waarheid ini na bijbel troetroe?
7 Soema Gado ben prijse ini hen wortoe, di den Apostel ben préki na „boen njoensoe”? Den sma ini na synagoge ini Beréa, bikasi, so wi e lési ini na bijbel, „den ben teki na wortoe (foe na boen njoensoe di Paulus nanga Silas ben préki) nanga den heri ati en ben ondrosoekoe ala dé finifini den Boekoe ofoe den sani disi (di na apostel Paulus srefi ben taki) ben de so.” (Tori foe den apostel 17:10, 11). Den ben meki den sani disi de wan pisi foe den, no wawan foe di den ben arki nomo ma ooktoe foedi den ben ondrosoekoe na bijbel gron foe den di den ben de klari foe teki ini den verstan nanga ati.
8 Wi moe waka baka na opregti fasi dati foe den Beréa sma. Foe sainde? Foedi wi kan jere wel na waarheid nanga wi jesi te libisma leriman e préki ofoe leri hen, ma pas te wi lési na waarheid wisrefi ini na bijbel, dan pas a de tan wan dipi krakti ini wi ati di e bewégi wi bikasi „na wortoe foe Gado abi libi en abi krakti en a srapoe moro leki iniwan feti-owroe di e koti na ala toe sé, en a de soetoe go doro, dati a de prati foe makandra sili nanga verstan, en skroefoe nanga den fatoe foe den en a kan si prakseri foe na ati” (Hebr. 4:12). Te wi stoeka alaten na bijbel, dan wi no sa de na jejefasi leki baby. Na Wortoe foe Gado e meki na jeje foe Hen go dipi ini wi ati en a de meki wi tranga nanga lepi. Na srefi gronprakseri de troe te wi e meki na „boen njoensoe” bekenti gi trawan. Na boskopoe abi moro krakti te wi meki den sma lési hen ini den égi bijbel leki te wi gebroiki wi égi wortoe.
9. Sortoe negatief krakti, tesi nanga moeilijkheid ben kan abi tapoe wi, en san sa jepi wi foe lon gwe gi so wan fowtoe krakti?
9 Te na apostel Petrus e tjari kon na krin san wi leki kristen moe doe foe djaranti wi redding te foe kaba en kisi wan paiman foe Gado, dan a de gi na rai foe no meki moeilijkheid, tesi nanga vervolgoe meki wi lasi ati. Wi no moe gi pasi dati den sani disi meki wi ati kon bita en meki wi tron trangajesi sma, di no kan dwengi densrefi. Di Gado bai wi nanga na moro warti sani di de na broedoe foe Jezus Kristus di ben tjari na sondoe foe wi di a ben dede, dan wi moe de „dedesma” gi sondoe. Wi e verstan dati di wi teki na zoenofrandi foe Kristus gi wi sondoe, wi e erken dati wi no moe tan doe sondoe moro langa. Foe datede, no wan momenti wi no moe hori na prakseri ofoe gi wi srefi abra na sortoe takroedoe, bidrigifasi, falsifasi, bigi-ai nanga bakabaka sani ooktoe. — 1 Petr. 2:1.
10. Fa wi kan waka baka na rai foe na apostel, dati den gwenti foe na grontapoe di no krin no moe kon na wi mindri „foe taki” srefi?
10 Na apostel Paulus e tjari na afersi tapoe wan krakti fasi ondro wortoe, foedi a de taki, dati den sani di na grontapoe e doe en di wan kristen kande ben doe, bifo a ben kon na wan sabi foe na waarheid, de so ogri, dati srefi na mindri kristensma den no moe „kon foe taki” srefi (Ef. 5:3). A no de foe taki, dati Paulus ben „taki” wel foe sani di no de bijbel sani, ma soso foe marki den leki sani di no boen. Ma a ben gi den kristensma na rai foe no tan prakseri den, no verteri foe den finifini ofoe foe taki foe na fasi fa den sani disi moe doe ofoe foe gebroiki den leki tori foe taki nanga makandra. Wan sma di ben gi hensrefi abra na den sortoe sani disi ini na ten di pasa, no moe tjari den kon ini hen prakseri baka nanga na firi foe prisiri na lostoe foe na skin, ma moe sjen foe dati. — Rom. 6:21.
11. Sortoe positief sori foe wi bribi Petrus e sori ini 1 Petrus 4:8, 9 leki wan sani di de toemsi prenspari gi wi en fa den sortoe sani disi e kon na krin?
11 Wan kristen di e waka na pasi e tjari hen go na a kon troe foe na howpoe di de na hen fesi moe doe moro ete leki foe lon kmoto foe den takroe negatief sani. Na apostel Petrus e skrifi ini 1 Petrus 4:8, 9: „Abi moro foeroe faja lobi gi makandra, bikasi lobi e tapoe foeroe sondoe. Sori lobi foe teki makandra na oso, sondro knoroe.” Wi abi alaten wan plekti na wi naaste, spesroetoe na den di abi na srefi bribi leki wi. Nanga na lobi foe wi, wi sa loekoe psa den foeroe fowtoe nanga sondoe ini wi brada. Troe kristen no e meki hen leki na wroko foe den foe feni fowtoe na trawan; ooktoe den no sa prakseri takroe foe wan trawan ofoe kroetoe hen foedi den e si fowtoe ini hen. Wi e angri foe sori taki wi lobi teki sma na wi oso? Wi de klari foe doe moeiti foe sori switifasi nanga gi jepi na makandra? Ofoe wi e knoroe efoe so wan okasi de? Efoe a de so, dan wi e poeroe gi wisrefi ala na prisiri di wi ben sa abi dan, en wi e lasi ooktoe na paiman di wi ben sa kisi, foedi wi e doe boen. Sani di wi no e doe nanga wi heri ati, no e prisiri Gado.
Meki wan joisti gebroiki foe na presenti foe Gado
12. (a) Soema e kisi boen ’presenti’ ini na gemeente, en Gado e verwakti foe wi alamala dati wi abi den srefi bekwaamheid? (b) Na sortoe fasi den sma disi e tron „opzichter”, en nanga sortoe frantwortoe?
12 Petrus e taki ooktoe foe na gebroiki foe den presenti foe wi. Ibri sma abi wan ofoe tra bekwaamheid ofoe koni, ma no wan sma abi den alamala. Boiti dati, son sma abi bepaalde presenti moro foeroe leki tra sma. Wi no kan verwakti dati tra sma sa handri precies so leki wi ofoe sa fiti ini na srefi vorm. Petrus e taki: „Gebroiki na presenti, so leki ibriwan ben kisi hen, foe dini makandra leki boen opzichter foe na boen-ati-fasi foe Gado, di e kon na krin tapoe difrenti fasi” (1 Petr. 4:10). Efoe wan sma abi wan koni di boen gi na gemeente, dan a moe si hensrefi leki wan opzichter di de frantwortoe na Gado te a de gebroiki na presenti dati. A sabi dati na presenti komoto foe Gado, na Sma di e gi ibri boen nanga volmaakti kado. Na sma di abi na presenti e tron wan opzichter di moe gi hen Meester di ben gi hen na presenti, frantwortoe foe na fasi fa a gebroiki na presenti dati (1 Kor. 4:2; Jak. 1:17). A de nanga na boen-ati-fasi foe Gado, dati a ben kisi na presenti en na boen-ati-fasi disi e sorgoe dati na kristen gemeente e kisi san a abi fanowdoe. Na boen-ati-fasi disi tapoe foeroe fasi a de kon na fesi, sodati difrenti sma ini na gemeente e gi den sani di de fanowdoe. Efoe wan foe wi abi wan koni, ma a no e gebroiki disi foe na boen foe na gemeente, dan a de misi na marki foe wan opzichter.
13. Na sortoe fasi den e aksi foe den sma di e taki ini na gemeente dati den taki „den santa wortoe foe Gado”?
13 Na apostel e skrifi moro fara sortoe presenti de en fa den moe gebroiki. A de taki: „Efoe wan sma e taki, meki a taki den santa wortoe foe Gado” (1 Petr. 4:11a). Disi no wani taki, dati a de prakseri dati a abi reti alaten en dati sma moe doe leki fa a taki, te a de taki. Ma te a de taki, dan a no moe tjari hen égi prakseri kon na fesi ofoe taki sani di no abi bewijsi. A moe de seker, dati san a de taki de waarheid — dati a de stéfi tapoe den fundamenti foe den wortoe foe Gado en a de akroederi nanga na geest foe na bijbel — dati den sani di a de taki a kan bewijsi nanga na bijbel. Soso tapoe na fasi disi a kan jepi sma.
14. (a) Akroederi 1 Petrus 4:11, fa wan sma kan „dini” tra sma ini na gemeente? (b) San wan sma di e dini tapoe na fasi dati, moe hori alaten ini prakseri, en fa a sa kisi paiman?
14 Baka di Petrus taki foe na afersi foe taki, a de go moro fara foe taki foe doe, te a de taki: „Efoe wan sma e dini, meki a dini nanga na tranga di e kmoto foe Gado” (1 Petr. 4:11a). Wan memre foe na gemeente di abi goedoe foe jepi wan brada ofoe wan pôti naaste, ofoe di de ini na okasi foe doe wan ofoe tra boen wroko. kan meki na fasi foe lobi mindri hen brada kon moro na fesi. Efoe a abi na bekwaamheid dati, dan a moe gi na jepi nanga ini prakseri dati Gado ben gi hen na okasi nanga den goedoe foe doe disi. Disi no e prisiri na ati foe Gado wawan, ma a de meki na diniwroko foe wan kristen ooktoe moro boen, bikasi Gado sa blesi na sma di e dini nanga sakafasi. Na sma srefi sa kisi wan moro bigi bribi leki paiman en nanga na okasi foe doe moro gi tra sma, soleki na odotaki e tjari kon na fesi: „Na sili di lobi gi sani, sa kon fatoe srefi en na sma di e gi trawan foe dringi foeroe, ooktoe hensrefi sa kisi foe dringi foeroe.” — Spr. 11:25.
15. Fa Gado kan kisi bigi nen nanga jepi foe Jezus Kristus foedi e doe wi wroko getrouw leki opzichter?
15 San de na moro prenspari bakapisi te wi e gebroiki wi presenti nanga koni tapoe na fasi disi? A de tjari wi kon moro krosbé foe na troetroe kon troe foe wi howpoe? Ja, bikasi a de meki na moro prenspari sani doe kon, soleki na a bigin wi ben meki wi bosroiti foe dini Gado, da foe taki, dati „Gado moe kisi bigi nen ini ala sani nanga jepi foe Jezus Kristus” (1 Petr. 4:11b). Te wi e doe toemsi moi wroko di de akroederi nanga na bijbel, dan Kristus e kisi bigi nen, bika a de nanga wroko foe hen dati wi de ini wan boen positie na fesi foe Gado, nanga redding na wi fesi. En Gado e kisi bigi nen bika na hen ben teki fesi foe seni hen manpikin. Te wi e prijse Kristus, dan wi e prijse Gado toe.
Fa pina e tjari boen gi wi
16. Foe sainde wan kristen kan abi reden foe prisiri, wans a moe psa ala sortoe vorm foe druk ofoe vervolgoe?
16 Na fasi foe libi disi de wan grani gi Jehovah Gado nanga hen Manpikin Jezus Kristus en a de gi wi now prisiri foe dini hen. Na sabi disi kan meki wi de tevréde en nanga prisiri. A kan de dati foeroe druk kon kon tapoe wi ofoe kande wi moe kaka foetoe gi pina nanga vervolgoe. Ma ete wi kan tan kisi kolokoe foe wi fasi foe libi. Na apostel Petrus e taki ini na tweede brifi foe hen foeroe foe na ondrofeni foe pina — a de tjari kon na krin san de na roetoe foe hen, sortoe marki a abi na prakseri en san a de tjari kon te wi horidoro getrouw. A ben skrifi gi kristensma ini hen ten foe na howpoe, di den ben abi en sortoe kibri Gado ben gi den di a ben taki: „Ini disi joe e prisiri sref-srefi, aladi joe na a momenti disi, foe wan sjatoe ten efoe a moe de so, difrenti tesi e gi joe sari, sodati na tesi fasi foe joe bribi — di de foe moro bigi waarde leki gowtoe, di e lasi gwe, wans faja e tesi hen — wan reden foe prijse nanga glori nanga grani moe feni na a kon na krin foe Jezus Kristus.” — 1 Petr. 1:6, 7.
17, 18. (a) Foe sainde na apostel Petrus e taki, te a de taki foe na pina foe kristensma, „efoe na wani foe Gado e aksi so”? (b) Fa wan kristen ini disi ten moe si pina di e kon na hen tapoe leki na apostel Paulus, foedi a de hori fasti na a bosroiti di a ben teki?
17 Ini kapitel dri foe hen fosi brifi, Petrus e poti prakseri tapoe na pina di wan kristen e ondrofeni en a de taki dan: „Bikasi, a moro betre foe pina foedi joe e doe boen, leki foedi joe e doe ogri, efoe na wani foe Gado aksi so” (vers 17). Foe sainde a de taki foe so wan pina „efoe na wani foe Gado aksi so?” A de verklari: „Lobiwan, no tan loekoe froewondroe foe na faja na oen mindri, di e kon na oen tapoe leki wan tesi, leki na wan vreemde sani e kon na oen tapoe. Kontrari foe dati, tan prisiri, foedi joe abi prati na a pina foe Kristus, sodati joe kan prisiri na a kon na krin foe hen glori. Efoe joe e kisi sjen foe . . . Kristus ede, de kolokoe, bikasi na geest foe na glori, ja na geest foe Gado, de rostoe na joe tapoe.” — 1 Petr. 4:12-14; loekoe Tori foe den Apostel 5:41, 42.
18 Aladi wan kristen no wani foe ondrofeni pina en a no wani pré foe wan sma di sma e pina, tog a de kolokoe efoe a moe ondrofeni pina, foedi a de waka getrouw baka hen Masra Kristus. Wan moro bigi grani no de gi wan kristensma dan foe dede gi na bribi foe hen. Bifo na apostel Paulus ben teki na pasi foe waka baka Kristus, en disi ben go nanga foeroe pina, a ben de wan man di toemsi moi sani ben de na hen fesi foe na sé foe barinen, grani nanga positie. Loekoe pikinso fa a ben tjari kon na fesi fa a ben prakseri foe na afersi: „Ala sani di ben de wini gi mi, foe Kristus ede mi ben si hen leki lasi. Ja, foe taki foe dati, mi e si ala sani toe leki lasi foe na bigi waarde ede foe na sabi foe Kristus Jezus, mi Masra. Foe hen ede mi ben teki na lasi foe ala sani en mi e si den leki wan ipi doti, foe mi kan wini Kristus . . . foe mi kan sabi hen nanga na krakti foe hen opobaka nanga na teki prati ini na pina foe hen, poti mi srefi ondro na sortoe dede foe hen” (Fil. 3:7-10). Paulus na ala fasi ben wani de leki Kristus, sodati foe ben moe dede leki Kristus, ben de na moro bigi grani gi hen.
19, 20. (a) Te o fara Gado e gi pasi dati so wan pina kon tapoe hen dienstknegti? (b) Fa na atibron foe gensman nanga vervolgoeman kan abi te foe kaba leki bakapisi dati sma prijse Gado? (c) Sortoe tra sani ini na pina di Gado gi pasi foe hen, kan gi wi tranga foe horidoro?
19 Boiti dati, Petrus no e sori wawan dati wan paiman e wakti wi, ma te Gado gi pasi foe pina kon, a de gi pasi so fara, dati a de oefen wi en we kisi tranga leri tapoe wan fasi di ibriwan foe wi aparti abi fanowdoe. Na psalmsingiman ben skrifi: „Srefi na atibron foe wan libisma sa prijse joe” (Ps. 76:10). Efoe Gado gi pasi dati libisma kowroe den atibron tapoe wi, dan wi kan de seker dati na pina foe wi ofoe na dede foe wi sa tjari wan boen sani kon. No wawan a sa de wan oefening, ofoe opleiding gi wisrefi, ma Gado no sa meki na prakseri foe den ogri sma kon troe, foedi a sa sorgoe dati trawan, di e si fa wi e njan pina foe na nen foe Gado ede, sa prijse Gado. Ooktoe na pina de sjatoe en wan kaba e kon na hen.
20 Petrus e gi kristensma trowstoe foe datede na a fasi disi: „Baka di joe njan pina foe wan sjatoe ten, dan na Gado foe ala boen-ati-fasi, di ben kari joe kon ini hen tégo glori ini wanfasi nanga Kristus, sa meki na opleiding foe joe kon boen dorodoro, a sa meki joe de stanvaste, a sa meki joe tranga.” — 1 Petr. 5:10.
21. (a) Sortoe aksi wi ben sa kan aksi wisrefi now nanga reti? (b) Sortoe sani na apostel Petrus e taki na a kaba foe hen tweede brifi?
21 Joe abi na prakseri dati joe ben teki na joisti bosroiti? Joe denki dati joe kan tan hori na a bosroiti dati, no wawan foe sdon horidoro, ma foe dini actief? Joe de klari foe span joesrefi foe gebroiki den presenti foe joe foe dini joe brada? Joe abi na lostoe, ja, na faja, foe jepi trawan foe leri sabi na „boen njoensoe” en den teki gi densrefi na srefi bosroiti en joe de klari foe jepi den foe tan horidoro te den sa handri akroederi na bosroiti foe den? Petrus e trowstoe nanga tranga wi nanga den laatste wortoe foe hen tweede brifi: „Oenoe foe dat-ede, lobiwan, loekoe boen, now di joe sabi disi na fesi, dati joe no meki den hari joe go nanga den nanga na sondoe foe sma di e kaka foetoe gi na wet, en joe lasi joe égi stanvastefasi. Nono, ma go doro foe gro ini na boen-ati-fasi nanga sabi foe wi Masra nanga Jepiman Jezus Kristus. Hen moe kisi glori, now en te na dé foe tégo.” — 2 Petr. 3:17, 18.