A howpoe di a mekisani abi — Wakti a kontroe foe en
„Howpoe dati ooktoe den mekisani srefi sa meki fri foe na katibo foe pori en sa abi na glori fri foe den pikin foe Gado.” — Rom. 8:20, 21.
1, 2. Fa wi de tra fasi leki grontapoe sma di „Kontra howpoe” e howpoe tapoe den libisma mekisani?
GI NA libisma-famiri agersi leki no wan enkri fundamenti foe howpoe de! Foeroe sma e prakseri so.
2 Tog joe abi sma di e howpoe „kontra howpoe”. Dati wani taki, den e tan howpoe sondro foe den abi wan gron, dati den kan verwakti dati na howpoe foe den sa kon troe. Wi abi wan howpoe tapoe wan stéfi fundamenti, di wi kan verwakti dati na glori howpoe foe wi sa kon troe. Ini disi wi gersi wan man foe owroe ten.
3. Tapoe soema wi gersi ini disi, en fa na howpoe disi tapoe joisti fundamenti foe na famiri-edeman dati foe owroeten ben kon troe?
3 Na man dati ben de wan man foe Oostsé, di ben nen Abraham, en di ben libi ini na bigin ini san wi e kari now Irak. Foedi a ben poti bribi ini wan spesroetoe howpoe di ben poti na hen fesi, a ben hari go na a birti foe na foto Berséba, na noordsé foe na schiereilanti Sinaï. Ini na tori foe Abraham na howpoe ben sa tnapoe ofoe fadon gi bepaalde naatsi nanga na aksi ofoe hen wefi Sara ben sa abi wan manpikin baby. A ben de kaba ini 99 libijari en hen wefi 90. Ondro normaal omstandigheid dan na toemsi hé libimarki foe den ben sa meki den lasi ala howpoe tapoe na geboortoe foe wan manpikin. Ma Abraham ben kisi na pramisi foe wan SMA di nooiti no doe leki fa a pramisi, foe taki hen Gado, Jehovah. San Abraham ben doe dan? A ben hori na a howpoe di Gado ben gi hen. Na historia tori ini na bijbel e taki: „Aladi a ben gersi leki howpoe no ben de moro, tog a ben abi tapoe na gron foe howpoe bribi, sodati a ben sa tron papa foe foeroe naatsi, akroederi san ben taki (Gado ben taki): ’So joe siri sa de’” (Rom. 4:18). Abraham fesi no ben fadon ini hen howpoe, bikasi nanga wan wondroe a ben kisi na hen wefi Sara hen manpikin Isaäk. Leki wan bakapisi foe na gebortoe disi, naatsi ben doe kon.
4. (a) Nanga sortoe sani na verwakti gi na libisma mekisani tai, no wawan gi den sma di e libi now, ma te o fara go na baka? (b) Sortoe aksi e kon na fesi tapoe na tori foe na fosi libisma, di a ben moe sorgoe hen wawan hen grontapoe oso?
4 Ini disi ten na verwakti foe na heri libisma mekisani tai ini na howpoe di Gado gi! Na howpoe disi no wawan abi foe doe nanga den sma di e libi now tapoe grontapoe, na tapoe na heri libisma mekisani go baka te na den directe bakapikin foe na fosi libisma tapoe grontapoe, Adam. Na fosi libisma leki wan grani gi hen Mekiman ben meki troe troe volmaakti na skin en na jejefasi. A ben poti ini wan volmaakti grontapoe oso, na djari foe Eden, nanga ala sani foe hori ini libi na volmaakti libisma libi — ini kolokoe. Hen Mekiman, hen hemel Tata, ben tron hen mati, di ben taki geregeld nanga hen komoto foe na kondre di no de foe si. Boiti dati. Adam no ben abi foe firi hensrefi wawan. Ma foe sainde na hemel Tata foe Adam ben poti hen ini na toemsi moi paradijs disi? Foe sorgoe hen oso drape leki wan opzichter ofoe djariman di de hen wawan? O langa a ben sa libi akroederi san Gado ben abi nanga hen na prakseri en njan boen foe ala den boen sani disi foe na anoe foe na Sma di gi hen libi?
5. Na sortoe sma na piki foe den aksi dati ben didon, en sortoe prenspari aksi a volmaakti Adam ben kan ori ini prakseri?
5 Adam ben kisi foe verstan dati ala disi ben didon na hen! Nanga hen volmaakti verstan, Adam nooiti ben kan frigiti na rai di hen hemel Tata ben gi hen: „Foe ibri bon foe na djari joe kan njan te joe bere foeroe. Ma foe taki foe na bon foe sabi boen nanga ogri, foe dati joe no mag njan, bika na dé di joe sa njan foe dati, joe sa dede nomo nomo.” — Gen. 2:16, 17.
6. Gi sortoe sani na komando dati foe Gado ben opo na pasi, en fa den bakatenpikin foe Adam ben sa kon na libi?
6 Na komando dati foe Gado, ben opo gi Adam na pasi foe libi tégo, efoe dati ben de na wani foe Gado gi hen. Soleki na tori e sori bakaten, dan Adam ben libi troe troe 930 jari, ma a ben kan libi moro langa sondro kaba. Hen de frantwortoe dati wi e dede ini na ten disi. Soleki wi alamala moe verstan, dan na fosi man dati na grontapoe, ben abi bakatenpikin; noso wi no ben sa de djaso. Ma den bakatenpikin disi no ben doe kon nanga san wetenschappelijke experimentator e kari ongeslachtelijke kloonvorming, wan fasi foe meki wan tra libi doe kon, di no e fiti libisma, ma di de na bepaalde sortoe bon nanga wiwiri. Na presi foe dati Gado ben meki gi hen, soleki disi de na fowroe nanga meti foe gron, wan patna, wan oema, di Gado ben poeroe wan lebritji foe Adam foe meki hen. Di Gado ben tai na fosi man nanga na fosi oema tapoe grontapoe ini wan trowlibi, a ben poti na den fesi libi foe tègo tapoe wan grontapoe paradijs. A ben blesi den en a ben taigi den foe kon foeroe leki libisma foe foeroe na heri grontapoe, pe na paradijs foe den ben bradi hensrefi go. — Gen. 2:18-24; 1:26-28.
7. Na gro kon foe sortoe situatie ini na libisma afersi Adam nanga Eva no ben verwakti, en foe sainde wi no moe poti na fowtoe foe na gro kon bigi foe den libisma afersi tapoe a sneki?
7 Na verwakti gi na libisma famiri ben de nanga foeroe howpoe! Adam nanga Eva no ben verwakti nooiti foe ondrofeni, dati den bakatenpikin foe den „ben sa soktoe makandra en ben sa njan pina makandra” foe na fysiek, moreel nanga sociaal toestand ede pe wi de na ini tide. Na trangajesi njan foe na froktoe foe na bon foe sabi boen nanga ogri, tapoe hensrefi kan gersi wan pikin sani, ma na doe dati ben de tog frantwortoe foe na situatie ini disi ten. Foedi fosi Eva en baka dati Adam ben doe na sondoe disi, den ben broko pispisi na howpoe di Gado ben gi den tapoe wan momenti dati den no ben abi pikin ete. Efoe Gado no ben kon na mindri tapoe wan ofoe tra fasi, dan now wi ben sa de ini wan toestand sondro howpoe. A de so dati ini na djari foe Eden wan sneki ben de ini na tori, ma meki wi no poti na fowtoe foe ala sani tapoe na meti dati. Na presi foe dati na bijbel e sori wi tapoe na jeje bidrigiman di no ben de foe si na baka na sneki. Soema a ben de? Wan hemel engel di ben abi na fasti bosroiti foe poeroe Adam nanga Eva foe poti na howpoe foe den tapoe Jehovah Gado.
8. Eva ben kori foe doe sortoe sani, en foe sainde wi no de now ini na fosi djari foe Eden?
8 Na oproeroe gongosaman di ben taki nanga jepi foe na sneki, ben sabi foe kisi Eva nanga bidrigifasi so fara foe proeberi foe de leki Gado. Na so fasi a ben sa bow hen égi howpoe di a ben teki. Te nanga na ten dati Adam ben de na proféti foe Gado gi hen. Adam ben wroko leki takiman foe Gado foe verteri hen foe na komando foe Gado foe no njan foe na froktoe di den no ben moe njan. Ma bakadi a ben poti na prakseri foe tron wan oema-gado nanga na njan foe na froktoe di den no ben moe njan, a ben handri leki wan oema-proféti gi na sneki foe gebroiki na moi sten foe hen foe tjari Adam so fara foe sroto hensrefi na hen ini kroektoedoe. Te foe kaba Adam ben arki „na a sten foe hen oema”, na falsi oema-proféti, foe reden ede di no e gi Gado grani (Gen. 3:17). Foe datede meki Jehovah Gado ben lési a regtvaardiki dedestrafoe gi hen proféti Adam di ben de ontrouw. Na oema foe Adam ben kon ooktoe ondro na kroetoe dati. So boen leki den ben dede kaba, den poeroe poti now na dorosé foe na djari foe Eden foe tjari na libi foe den kon na wan kaba tapoe na grontapoe di no ben bow. Wi alamala di ben de ini na skin foe Adam nanga Eva sondro foe ben gebore, ben poeroe nanga den.
9. Den toe espresi libisoema sondari ben abi wan howpoe na den fesi di ben kenki foe na komando di Gado ben tjari kon na krin gi Adam, en sortoe situatie tan abra gi wi, den bakatenpikin foe den?
9 Den fosi espresi sondari disi, Adam nanga Eva, no ben abi wan verwakti na den fesi di ben kenki foe san ben tjari kon na krin ini na komando di Gado ben gi na Adam. Nanga reti howpoe no ben poti na den fesi, foedi den ben trowe na fosi howpoe di den ben kisi foe Gado. Ma na situatie ben libi gi wi alamala, di de bakatenpikin foe den di no e tjari na frantwortoe, sondro howpoe? Kolokoe dati wi kan piki tapoe disi NONO!
WI BEN KISI WAN HOWPOE DI GADO BEN GI
10. Soema ben kisi drape ini Eden na fosi tron kroetoe, sortoe nen na libisani disi ben kisi en fa a ben sa waka nanga hen ini na toko di ben taki na fesi?
10 Woortoe foe howpoe no ben taki gi Adam nanga Eva, aladi den ben jere den wel. Den woortoe foe Gado, di, ini den wan fundamenti de gi wi foe howpoe, ben taki gi a oproeroe jeje libisani, di tapoe wan bidrigi fasi ben meki gebroiki foe na sneki foe tjari Eva so fara foe tron wan boen oema-proféti gi hen. A ben kisi na nen Satan na Didibri. Foedi a ben gi tranga foe ala bakabakafasi nanga triki nanga na marki foe bidrigi en ben gebroiki srefi ini disi wan sneki ini Eden, a ben kari ooktoe „na fosi sneki” (Openb. 20:2). Na libisani disi di ben opo hen srefi foe de wan gado, a fosiwan di ben lé gi Gado nanga na oema, ben de na fosiwan di ben kisi foe jere foe Gado wan kroetoe. Tapoe hen Gado ben taki hen vloekoe gi en nanga dati a ben taki na fesi wan stré pe na „fosi sneki” nanga den sma di ben teki hen sé ini na toko ben sa lasi.
11. Fa ben kon na krin ini den woortoe foe na strafoe foe na „fosi sneki” dati howpoe ben sa de gi den bakatenpikin foe Adam nanga Eva?
11 Gi na „fosi sneki” Gado ben taki: „Mi sa poti féjanti-fasi mindri joe nanga na oema en mindri na siri foe joe nanga na siri foe hen. A sa masi joe ede en joe sa masi hen bakafoetoe” (Gen. 3:14, 15). Disi wani taki na pori foe na „fosi sneki” nanga hen bakatenpikin. Ma na kroetoe bosroiti disi foe Gado ben gi wan fundamenti foe howpoe foe na boen foe den bakatenpikin foe Adam nanga Eva? Nono. no wantron wantron, ma joe ben kan verstan dati na ini ofoe a ben didon na ini.
12. Sortoe „oema” ben tjari kon ini na tori ini den woortoe foe Gado na Satan, en foe sainde Maria, na mama foe Jezus Kristus, no ben de na „oema” dati?
12 Aha! wan oema e tjari kon ini na tori. Soema a ben sa moe de? A ben moe de wan sma di ben sa sori féantifasi, bita-ati gi na „fosi sneki” nanga hen bakapikin. Eva, di ben meki hensrefi tron wan falsi oema-proféti gi na „fosi sneki”, no ben sa fiti ini na prenki disi. A ben tjari kon so fara foe bribi dati Jehovah Gado ben de wan lé-man. Srefi Maria, na mama foe Jezus Kristus, no ben kan de na oema disi. Fo doesoen jari ben sa pasa bifo na djoe meisje disi leki wan bakatenpikin foe Abraham ben sa gebore ondro na djoe wet. Na fosigebore manpikin foe hen Jezus ben libi soso dri-tenti na dri nanga afoe jari tapoe grontapoe. Di hen grontapoe mama ben si san na manpikin disi di ben gi tapoe wan wondroe fasi ben ondrofeni na Golgotha foe na sé foe na „fosi sneki”, na moro bigi pisi foe hen libi ben pasa kaba. Hensrefi soboen soso wan toe tin-tron jari ben kan sori féjantifasi gi na „sneki”.
13. Soema ofoe San wawan ben sa kan de na „oema” di ben kari dja, en sortoe positie a ben wani teki sote na fesi foe na agersi sneki nanga hen bakatenpikin?
13 A de wan logisch sani dati na „oema” foe na profétitori foe Gado ben de wan sma di ben de na libi en di ben arki di Gado ben taki nanga na „fosi sneki” ini Eden. Na agersi „oema” ben sa de langa baka na dede foe Eva ete na libi, ja, a ben sa libi ooktoe ete te Gado égi ten ben kon foe na „oema” ben meki na pramisi „siri”, san ben pasa moro leki dri doesoen baka Eva dede. Soema moro ben sa kan de na agersi „oema” soboen leki Gado égi „oema”, dati wani taki, hen hemel organisatie foe santa jeje mekisani di ben wégri foe sroto densrefi na a „fosi sneki” ini na oproeroe foe hen? Den ben abi respeki gi na trow foe Gado nanga hen getrouw universele organisatie, den no ben loesoe densrefi nanga wan brokotrow foe ben go moksi densrefi na a organisatie di ben sa trow nanga a „fosi sneki”. Den ben bréti toemsi dati Gado ben poti féjantifasi mindri den nanga na georganiseerde „siri” foe na „fosi sneki”.
14. (a) San ben poti foe datede na fesi foe na „oema” foe Gado, makandra nanga sortoe bakaten ondrofeni foe mama? (b) Wi e gebore leki pikin foe Gado, en sortoe howpoe e poti ete na fesi foe libisma?
14 Ini Eden soboen Gado ben poti na fesi na hemel organisatie di gersi wan oema foe tron mama. Foe sensi na momenti dati a ben kan abi na howpoe foe tron mama foe na „siri” di na Masra foe hen, Jehovah Gado, ben sa tron na Tata. A ben de wan warti sani gi na „oema” foe wakti fo doesoen jari foe na kon troe foe na howpoe disi. A ben de klari foe ondrofeni ala pen foe meki pikin di disi ben sa tjari nanga hen, precies fa disi ben de nanga na agersi oema di ben si ini na visioen di na kristen apostel Johannes ben skrifi foe hen ini Openbaring 12:1-5. Na lostoe foe tron mama na wan normaal sani gi ala oema di de bigisma. Soboen foe sainde na tron foe mama no ben poti na fesi foe Gado hemel organisatie „oema”? Tapoe wan fasi di fiti na howpoe foe tron mama ben gi na Gado „oema”, bifo Gado tapoe wan sari-atifasi ben meki Eva, na oema foe Adam di ben sondoe now, ondrofeni na tron foe mama dorosé foe Eden. Ma a no ben sori tapoe wan blesi di Gado ben taki gi na sondoe oema Eva: „Mi sa meki na pen te joe abi bere kon mori foeroe; nanga skinati joe sa meki pikin” (Genesis 3:16, tra fasi leki 1:28). Di Adam ben verteri hen pikin nanga bakapikin foe Gado profétitori foe na „siri” foe na „oema”, a no ben doe wroko leki Gado proféti; en ooktoe hen oema Eva no ben doe wroko leki wan oema-proféti foe Gado. Ofoe Adam nanga Eva ben bribi Gado pramisi soleki ben skrifi ini Genesis 3:15 ofoe den no ben bribi hen, na prakseri foe Gado ben de ete dati den bakatenpikin foe den tapoe na gron foe na pramisi dati ben sa abi howpoe. Aladi Adam ben meki leki wan „manpikin foe Gado” wi, onvolmaakti, hebi nanga sondoe bakatenpikin foe hen no ben geboroe leki manpikin foe Jehovah Gado (Luk. 3:38). Foe datede wi no abi na kotoigi foe Gado santa jeje nanga wi égi libisma verstan, dati wi de Gado pikin. Howpoe de dati wi sa drai go ini na osofamiri foe Gado? Ja, na howpoe dati de troe troe!
15. Dati moro leki fo miljard sma de tapoe grontapoe, e sori sortoe situatie foe libisma?
15 Efoe na zaak ben de sondro howpoe gi wi, foe sainde Gado ben meki someni foe wi leki bakatenpikin foe Adam nanga Eva ben gebore — foeroe moro leki hondro geslagti te nanga now? Baka ala feti nanga tra rampoe di sé siki nanga wan natuurlek dede ben aksi wan extra nomroe sma, now moro leki 4,2 miljard foe wi e libi en sma e taki na fesi dati na a ten foe na jari 2000 G.T. siksi miljard sma sa de tapoe grontapoe. Ala disi ben de foe soso? Nono!
16. (a) Efoe wi loekoe dati libisma no man jepi hensrefi, dan foe na makti foe soema foe doe sani a ben didon foe na kon troe foe na howpoe foe na mekisani? (b) Na geboorte nanga libi foe soema ben de wan keerpunt ini na libisma historia?
16 A no de foe taki dati libisma no kan poeroe densrefi foe na moeilijkheid. Ma na zaak no de sondro howpoe gi na libisma mekisani, aladi na situatie gersi leki weinig howpoe de. Disi wi no abi foe taki tangi foe san libisma srefi kan doe, ma a howpoe disi abi wan stéfi fundamenti tapoe san Gado ben doe kaba en san hen sa doe ete leki fa hen pramisi, di no kan broko e taki. Foedi Gado ben meki so wan 70 generatie ben komoto foe Adam nanga Eva, meki hen Manpikin foe hemel ben kan gebore leki Jezus Kristus. Tapoe grontapoe na Manpikin disi foe Gado ben doe na wani foe Gado foe na boen foe na heri libisma-famiri. Disi ben de wan keerpunt ini na historia foe libisma!
NA LIBISMA MEKISANI „ONDRO SOSOFASI” NANGA HOWPOE TAPOE FRI
17. San na apostel Paulus ben skrifi ini Romeini 8:19-24 foe na soso moeiti di libisma de na ondro en tapoe san na mekisani e wakti ooktoe?
17 So wan 23 jari baka di Jezus Kristus ben tjari hen grontapoe waka kon na wan kaba en ben opo go na hemel, na kristen apostel Paulus ben skrifi disi gi na gemeente Rome: „Na faja verwakti foe na (libisma) mekisani e wakti tapoe na kon na krin foe den manpikin foe Gado. Bikasi na mekisani ben poti ondro sosofasi, no nanga égi wani, ma nanga hen di ben poti hen na ondro, tapoe na gron foe howpoe dati na mekisani srefi sa meki fri foe na katibo foe pori en sa abi na glori fri foe den pikin foe Gado. Bikasi wi sabi dati a heri mekisani te nanga now e soktoe makandra alaten en e njan pina makandra. No dati wawan, ma wi ooktoe, di abi den fosi wan, foe taki na jeje, ja, ooktoe wi e soktoe ini wisrefi, aladi di wi e wakti fajafaja tapoe na teki foe wi leki manpikin, na kon verloesoe foe wi skin nanga jepi foe verloesoe-paiman. Bikasi ini na howpoe disi wi ben kisi jepi.” — Rom. 8:19-24.
18. (a) Soema ben poti na heri libisma mekisani ondro sosofasi en foe sainde? (b) O fara den moeiti foe libisma ben tjari wi now en na sani di de na mofo doro now de na srefi leki na „fajafaja verwakti” foe na mekisani di e soktoe?
18 Gado ben de na sma di ben poti na libisma mekisani ondro sosofasi ofoe frustratie. No nanga wi égi wani wi ben poti na ondro dati, foedi a no ben didon nanga na sori foe na wani foe wi dati wi ben gebore. Gado ben wani dati wi ben kisi libi, aladi Adam nanga Eva ben kisi na kroetoe foe dede (Gen. 16-24; 5:1-4). Ma wi no ben gebore nanga na „glori fri” di Adam nanga Eva ben abi na a bigin ini na djari foe Eden leki „pikin foe Gado”. Wi ben gebore ini na „katibo foe pori”, ondro na kroetoe foe dede di ben de tapoe ala den bakapikin foe Adam (Rom. 5:12). Foe datede meki wi no ben kan jepi wi srefi. Ala den moeiti foe wi foe jepi wisrefi ben de sosofasi, frustratie. O fara ala den moeiti foe rigeri di libisma ben poti ben jepi wi? San de den bakapisi te nanga na dé foe tide foe ala den sani di libisma seti tapoe sociaal, economisch, financieel, (moni sé), medisch (datra sé) nanga wetenschappelek sé? Wi alamala de ete ondro pori na jeje, skin nanga moreel sé. Ooktoe agersi dati wan kernoorlog pe intercontinentale ballistische raketten sa doenkroen komoto foe den se en fadon foe loktoe kon na ondro, sa wani taki wan wantron wantron kaba foe wi alamala. Wi kan skrifi foe disi leki na „fajafaja verwakti” foe wan mekisani di e soktoe?
19. Nanga sortoe prakseri Gado ben poti na fadon libisma famiri ondro sosofasi, ma tapoe na gron foe sortoe howpoe a ben doe disi?
19 Ma na Mekiman foe libisma hensrefi no de ondro na sosofasi ofoe frustratie. Wan libisma-famiri di pori no kan meki na prakseri foe na Mekiman no kon troe. Foe datede meki hensrefi de wan howpoe gi libisma. Soboen a no wani dati wi poti wi vertrouw tapoe wisrefi, ma tapoe hen. A ben poti wi alamala ondro libisma onmakti, sodati wi no ben sa abi wan fundamenti foe poti howpoe tapoe wisrefi. Leki na wán fonten foe howpoe, a ben poti na libisma famiri ondro sosofasi, ma no tapoe wan fundamenti sondro howpoe. Nono, ma soleki Romeini 8:20, 21 e taki, „tapoe na gron foe howpoe dati na mekisani srefi sa meki fri foe na katibo foe pori en sa abi na glori fri foe den pikin foe Gado.”
20. (a) Na sokari „fri grontapoe” e njan boen foe na „glori fri foe den pikin foe Gado”? (b) Tapoe na kon na krin foe san na „faja verwakti foe na mekisani” e wakti?
20 Ini disiten rigeriman foe wan bepaalde politiek ideologie e kari na gebied foe den „na fri grontapoe” kontrari den sma di e libi ondro rigeri di de tra fasi. Ma san politiek groepoe di no e agri nanga makandra kan taki, no wan foe den abi na „glori fri foe den pikin foe Gado”. Soso na Gado nanga Tata foe Masra Jezus Kristus e poti na howpoe na libisma fesi foe kon baka ini na matifasi di Adam nanga Eva ben de nanga hen di a ben meki den ini na djari Eden. Ma na kon boen disi baka moe wakti tapoe wan sani di Gado e go doe ini na ten di e kon. San disi de, wi e leri ini den wortoe foe na apostel Paulus: „Na faja verwakti foe na mekisani e wakti tapoe na kon na krin foe den pikin foe Gado” (Rom. 8:19). Na apostel di ben skrifi den woortoe disi, ben sori ini Romeini 8:15-17 dati a ben si hensrefi ooktoe leki den „pikin foe Gado” dati.
21. Soema de na moro prenspari wan foe den „pikin foe Gado”, fa na „bakafoetoe”-soro foe hen ben dresi en san ben kon troe nanga disi soleki fa Hebreeër 2:14, 15 e taki?
21 Den spesroetoe „pikin foe Gado” dati de na siri foe Gado „oema”, di na profétitori ini Eden ini Genesis 3:15 ben taki foe den. Na moro prenspari wan foe na „siri” dati foe Gado hemel organisatie de Jezus Kristus, na sma di Gado ben meki na „fosi sneki” ben masi ini hen bakafoetoe ini na jari 33 G.T. na a dede foe hen na wan pina-oedoe. Gado ben dresi na soro foe na bakafoetoe, di a ben opo foe dede na getrouw Manpikin foe hen tapoe na di foe dri dé, Foedi a ben kisi opobaka leki wan hemel jeje Manpikin, dan Gado hemel „oema” ben kan teki hen baka. Leki fa Hebreeër 2:14, 15 taki, „a sa meki na sma kon tron noti di abi na wroko-sani foe meki dede kon, da foe taki, na Didibri, en foe fri ala den di foe frede ede den heri libi langa ben de ondro katibo”.
22. Soema de den memre foe na „siri” foe Gado „oema” di e kon tapoe na tweede presi?
22 Den memre foe na „siri” foe Gado „oema” di e kon tapoe na tweede presi de den discipel foe Jezus Kristus, den sma di nanga Gado jeje e gebore njoen foe tron jeje „pikin foe en” foe rigeri ini hemel leki mede-erfgenaam nanga na owroe brada foe den Jezus Kristus.
23. Gado ben meki den secundaire memre foe na „siri” kon gebore njoen gi sortoe howpoe leki 1 Petrus 1:3, 4 taki e na howpoe dati de te leki now wan „libi” wan na a lati ten disi?
23 Na apostel Petrus abi hen, foe na hemel howpoe foe den en a de kari dati „wan libi howpoe” te a de skrifi den: „Blesi foe na Gado nanga Tata foe wi Masra Jezus Kristus, bikasi akroederi hen bigi sari-ati a ben gi wi wan njoen geboortoe foe wan libi howpoe nanga jepi foe na opobaka foe dede foe Jezus Kristus, foe wan goedoe di no e pori en flaw en no e vlaka. A poti ini hemel gi joe.” (1 Petr. 1:3, 4). Na howpoe disi foe den de te now ete wan „libi” wan. Gi na fikapisi foe den di de ete tapoe grontapoe, na howpoe disi no de wan „dede” wan, foedi na kon troe foe hen agersi dati joe moe wakti na tapoe. Den e verwakti na howpoe disi heri esi foe kon troe tapoe na fasti ten di na Gado nanga Tata foe den Jehovah ben poti. Na apostel Paulus e poti Genesis 3:15 baka ini wi prakseri te a de skrifi gi den kristen ini Rome di ben kon njoen gebore nanga jeje: „Na Gado di e gi vréde . . . sa masi Satan heri esi ondro wi foetoe”. — Rom. 16:20.
24. Soema e verwakti na kon krin foe den sortoe „pikin disi foe Gado” fajafaja en baka sortoe sani disi e psa?
24 Na „kon na krin” foe den „pikin disi foe Gado”, makandra nanga na moro prenspari Manpikin foe Gado, Jezus Kristus, sa psa ini na krosbé ten di e kon en a de wan sani, di na „faja verwakti foe na (libisma) mekisani” e wakti na tapoe nanga tranga lostoe. Ma sjatoe bifo na sani disi wi e verwakti na „bigi benawtoe”, di na hemel Tata, Jehovah Gado , sa meki loesoe kon tapoe den gensman nanga vervolgoeman, di ben tjari benawtoe kon gi hen jeje manpikin nanga den loyaal mati foe den. — Openb. 7:14, 15; 2 Thess. 1:6-10.