„Wan lobi di de so tranga leki dede”
„Lobi de so tranga leki dede . . . Na hati foe en de leki na hati foe wan faja, na flam foe Jah.” — Hésingi 8:6.
1, 2. Fa a fosi trowlibi ben doe kon? Foe sanede na man nanga en oema ben tai na makandra?
A BEN de na kolokoe trowdé foe den. Dan ete den ben trow ini na paradijs. San ben sa de moro prisiri leki dati? Jehovah ben sorgoe taki na fosi man Adam ben fadon go ini wan dipi sribi. Dan Jehovah ben teki wan foe den lebriki foe a man, ben tapoe na soro baka, èn gebroiki na lebriki leki wan fundamenti foe meki na fosi oema.
2 Di na volmaakti, moi jepiman dati, di ben sa meki Adam boen dorodoro, ben tjari go na Adam, a ben prisiri — ma no sondro wortoe. En firi ben bewégi en so taki ini poewema-tongo a ben taki: „Disi de now fosi bonjo foe mi bonjo nanga meti foe mi meti. Disi sa nen oemasma, bika disi ben teki komopo foe mansma” (Gen. 2:20-23). Wi no sabi fa na oema ben firi na a trowdé dati, aladi bakaten ben taki foe na sondoe, onvolmaakti oema: „Na tranga lostoe foe joe sa go na joe man” (Gen. 3:16). Na fosi oema, Eva, ini en volmaaktifasi ben sa moe prisiri toemsi nanga en patna. Foedi a ben teki komopo foe na skin foe na man srefi, den ben sa tai na makandra. Gado ben taki foe dat’ede: „Dat’ede wan man sa libi en papa nanga en mama, èn a moe tai ensrefi na en oema, èn den moe tron wan skin.” — Gen. 2:24; Matt. 19:4, 5.
3. Foe sanede na trowlibi no ben de soso wan seti taki firi no ben sa de na ini?
3 A trowlibi soleki na Mekiman ben poti disi ini na djari foe Eden, ben poti leki wan banti foe wanfasi di ben moe tan. A ben sorgoe foe matifasi èn a jepi foe makandra, aladi a gron foe a prakseri ben de wan prisiri sani na den fesi — a meki èn a kweki foe sma foe na libisma famiri (Gen. 1:27, 28; Matt. 19:6-9). A trowlibi no ben sa de wan seti sondro firi na ini. Libisma ben meki nanga a makti foe sori lobi — ini na tori foe a trowlibi, a dipi firi foe lobi gi wan sma foe a tra seks, èn disi de na krakti di e poesoe den firi foe na gemeenschap foe trowlibi, nanga a fundamenti foe a waran firi di e tjari wan osofamiri kon makandra.
4. Sortoe aksi wi ben kan aksi te wi loekoe den trowproblema foe lobi nanga a trowlibi?
4 A trowlibi ini a paradijs kan gersi now toemsi idealistisch. Te foe kaba, foeroe osofamiri ini na onvolmaakti libimakandra, e panja. Natuurlek lobi e gersi taki a de go na baka èn den trowbanti e broko. Wan sma ben sa kan aksi ensrefi foe dat’ede: Wan dipi lobi di e tan mindri den sma di trow kan de troe troe? Ofoe a de sempel foe prakseri taki lobi nanga respeki gi makandra kan tan alaten?
„A LOBI DE SO TRANGA LEKI DEDE”
5. San de sjatoe na tori foe na hésingi èn san a bijbelboekoe disi e tjari kon a krin mindri a lobi foe wan man nanga wan oema?
5 Troe lobi mindri wan man nanga wan oema kan de boen tranga, stéfi nanga sondro foe seki. Fa disi ben sori krin ini wan poewema boekoe foe den Santa Boekoe, di dri doesoen jari psa kaba na koni kownoe Salomo foe Israël ben skrifi! A boekoe disi, di nen a Hésingi, e ferteri foe a lobi di no e seki mindri wan herder nanga wan pranasi-meisje foe a pikin foto Sunem (Sulem). Ini a „toemsi moi singi” disi e kon na krin taki na kownoe nanga ala en moisani nanga goedoe, no ben man foe wini na lobi foe na moi Sulamitis meisje dati. — Hésingi 1:1-14; 8:4.
6. Foe sanede a Hésingi de wan dekati gi den sma foe a „bruid” foe Jezus Kristus ofoe a gemeente di gebore njoen nanga jeje?
6 Na „toemsi moi singi” disi e sori na moifasi foe wan lobi di e tan go doro. So wan lobi di no e seki e kon na krin ini a matifasi foe Jezus Kristus nanga en „bruid” ofoe a gemeente di ben kon njoen gebore nanga jeje (Ef. 5:25-32; Openb. 21:2, 9). Foe dat’ede meki a hé-singi kan gi tranga boen a den sma di taki den de foe a „bruid” dati foe tan getrouw a den hemel Bruidegom (2 Kor. 11:2). Tokoe na pisi disi foe bijbel e taki foeroe foe na krin lobi di kan de mindri wan man nanga oema di frede Gado.
7. San sma di no trow ma e dini Jehovah faja moe loekoe te den e soekoe wan trowpatna?
7 Leki wan agersitori disi: A hésingi e sori krin taki a no kan foe abi romantisch lobi gi ibri sma. A Sulamitis wendje foe eksempre no ben firi lobi gi Salomo, èn a taki: „Mi ben poti oenoe ondro wan sweri, o oemapikin foe Jeruzalem, na a oemagazel of na a oemadia foe boesi, taki oenoe no proeberi foe wiki lobi ini mi te leki a firi foe dati” (Hésingi 2:7; 3:5). Fa a de foe dat’ede wan froestan sani te wan sma di no trow ete e wakti nanga pasensi te leki wan sma doro di a kan lobi troetroe! Èn gi den sma di abi faja gi Jehovah, na trowpatna disi di o kon moe de wan man ofoe wan oema toe di gi ensrefi abra a Jehovah èn e dini hen getrouw (Deut. 7:3, 4; Ezra 9:1-15; 1 Kor. 7:39). Dan na anbegi foe Jehovah sa de gi ala toe patna leki a moro prenspari afersi. Makandra den sa kan tnapoe fesi a libi ini wan trow èn jeje wanfasi di sondro dati wan sari légi presi ben sa de.
8. Fa a Sulamitis wendje ben sori dati a ben de leki wan skotoe, no leki wan doro?
8 Te wan sma e go trow nanga wan kompe-bribiman, ma a wani abi na boen-ati foe Gado, dan bifo a ten dati a moe kibri en krinfasi. Den brada foe na Sulamitis meisje ben broko ede nanga en boen waka nanga libi, srefi di a ben de boen jongoe ete. Ini jari a fesi wan foe en brada ben taki: „Wi abi wan pikin sisa di no abi bobi ete. San wi sa doe gi wi sisa na a dé te den sa kon aksi en (foe trow)?” Wan tra brada e piki: „Efoe a de wan skotoe, wi sa bow solfroe lanki na en tapoe; ma efi a de wan doro, wi sa sroto en nanga wan sedre planga.” Kownoe Salomo ben proeberi foe wini a lobi foe a Sulamitis wendje, ma a no ben sori taki a no ben abi pasensi ini lobi nanga boen waka nanga libi. Leki wan doro di e drai lontoe wan pen, di moe sroto foe meki dati a no wai opo gi wan sma di no boen ofoe takroe. A no ben fadon gi den kori foe wan kownoe, ma a ben tan tanapoe leki wan skotoe gi ala goedoe foe kori en. A ben sori taki a ben de wan sma èn sma ben kan si en now leki wan lepi oema nanga boenfasi gronprakseri (Hésingi 8:8-10). Wan toemsi moi eksempre gi oema ini a ten disi di no trow èn di e frede Gado.
9. Fa a herder ben si a Sulamitis wendje di a ben lobi?
9 A sakafasi Sulamitis wendje no ben prakseri toemsi foe ensrefi, ma ini na ai foe a herder, di ben lobi en a ben de wan spesroetoe sma. „Noti moro leki wan saffraan-bromki foe a sjorokondre mi de, wan léli foe den lagipresi”, a ben taki. Ma no ini na ai foe na herder, di ben piki: „Leki wan léli mindrimaka wiwiri, a so mi patna de a mindri den oemapikin” (Hésingi 2:1, 2). Disi no ben wan sori foe law don lobi. A meisje ben dini Jehovah, a ben de bekwaam, èn moi èn a ben abi foeroe tra moi fasi ete. Wan marki no de ini disi, taki kristen meisje di no trow moe leri foe teki den frantwortoe foe oemasma a den tapoe, aladi den e feti toe foe meki a jeje fasi foe en kon moro bigi?
10. Fa a Sulamitis wendje ben si a herder?
10 Ma loekoe fa a Sulamitis wendje ben loekoe a herder: „Leki wan aprabon a mindri den bon foe den boesi”, so a ben taki, „So mi lobiwan de mindri den manpikin” (Hésingi 2:3). A no ben de somaar wan foe den bon ini wan boesi. En herder ben de soso foe dini Jehovah, a ben abi libisma fasi nanga koni èn a ben moe de troetroe wan jongoeman nanga jejefasi (Loekoe 1 Kor. 2:6-16). Ini na ai foe a Sulamitis wenke a ben de „leki wan aprabon na mindri den bon foe a boesi”. Wan kristen man di no trow ete no moe doe moeiti taki hen lobi meisje si en wan dé a so fasi?
11. Akroederi den wortoe foe a Sulamitis wenke, fa troe lobi kan agersi nanga dede èn nanga Sjeool?
11 No wan degedege de taki a Sulamitis wenke nanga a jongoe man ben lobi makandra tranga. A meisje ben tjari na afersi kon boen na ondro wortoe di a ben taigi hen lobi herder: „Poti mi leki wan ségel tapoe joe ati, leki wan ségel tapoe joe anoe; bika lobi de so tranga leki dede, a tanapoe tapoe a dini foe Gado wawan, no de foe drifi leki Sjeool. A hati foe hen de a hati foe wan faja, a flam foe Jah (Jehovah). Srefi foeroe watra no kan kiri a lobi, srefi liba no kan wasi en poeroe. Efi wan man (soleki Salomo) ben sa gi ala warti sani foe en oso foe lobi ede, sma ben sa wiswasi en foe troe” (Hésingi 8:6, 7). Fa disi de troe! Lobi no de foe bai nanga goedoe. Ma troe lobi de so tranga leki dede, di no wan sma foe a libisma-famiri di kisi kroetoe no kan komoto a ondro. Ja, a tanapoe foe en tapoe a dini foe Gado wawan kan gersi leki a tranga-ede foe dedekondre (Sjeool), di no e komopo foe en reti foe kisi den dedeskin foe a libisma-famiri. Ma san wi kan taki foe a „flam foe Jah”? Wan bijbelsabiman ben taki wan dé taki „flam foe lobi di bigin bron ini a libisma ati, komoto foe Jehovah”, a Gado foe lobi, di ben poti a moi krakti foe lobi ini libisma (1 Joh. 4:8). Troe lobi no e fadon noiti foe troe; a de loyaal, a e tan alaten. (loekoe 1 Korinte 13:8). Fa a de wan froestan sani te den sma di e prakseri foe trow, wakti, èn doe moeiti foe „meki wan lobi gro di de so tranga leki dede”!
FA LOBI E GRO
12. Sortoe ondrofeni ofoe sani ini a libi kan meki lobi mindri wan man nanga en oema gro?
12 Tog lobi kan gro te a libi foe man nanga oema e kon frekti moro nanga makandra. Na a lepi libimarki foe fo tenti jari Isak no ben de wan jongoe fréri moro di a ben teki leki oema, nono, no soso wan meisje, ma wan „jongoe oema”. „A ben bigin lobi en” so wi e lési (Gen. 24:57-67). Te den jari e psa, trowpatna di frede Gado e prati jeje sani nanga makandra. Makandra den e kakafoetoe gi den tesi nanga problema foe a libi. Nanga den moeiti di den e meki makandra, diri memre e bow di e ari den kon moro krosbé a makandra. Srefi sempel sani — kande switi takimakandra te den e waka makandra ini boesi nanga firi — e tron sani foe memre. Ja, a moi Sulamitis wenke ben angri foe koiri makandra nanga en herder ini den firi! (Hésingi 2:8-14). Baka di den ben trow kaba, den ben sa doe disi foeroetron ete.
13. Foe sanede wan man kan abi réden foe lobi wan „bekwaam oema”?
13 A no de foe taki, lobi e gro nanga tra boen sani toe. „Wan bekwaam oema de wan kroon foe en éginari,” en man, di abi foe troe réden foe lobi en (Spr. 12:4). Foe taki en nanga den wortoe foe Lemuël (kande di foe Salomo), „wan bekwaam oema” de moro diri leki spesroetoe warti sani nanga moimoisani di meki foe moi krara. A de getrouw èn e pai hen masra „nanga boen, no nanga ogri, ala den dé foe en libi” (Spr. 31:1, 10-12). Nanga anoe di de klari foe wroko a sa meki kande waran krosi gi en osofamiri (Spr. 31:13, 19, 21-24). Nanga en eri konsensi a de sorgoe toe taki na osofamiri abi gosontoe njanjan foe njan. (vers 14, 15). Foeroe sani foe na oso kan libi nanga korostoe ati na en. foedi a lobi foe wroko èn de troetroe koni (vers 16-18, 27). So wan oema e taki nanga switifasi, lobi gi sani a trawan èn e doe boen a sma dorosé foe na osofamiri toe (vers 20, 26). Efoe a moiskin foe van oema di e frede Gado ben sa go a baka soboen te den jari e psa, dan ete en inisé moifasi e gro, di e meki a de wan diri sani gi en lobiwan. „Charme kan bidrigi èn moifasi a sososani”, Lemuël e taki, „ma na oema di e frede Jehovah, èn e kisi prijse.” — Spr. 31:30; 1 Petr. 3:3, 4.
14. Sortoe marki foe wan man di frede Gado e meki wan kristen oema abi dipi respeki gi en?
14 Wan di e frede Gado na a tra sé e poti en skowroe krinkrin ondro den frantwortoe di a de tjari leki ede, ma a no e doe disi tapoe wan dwengi fasi (Gen. 3:16; Mal. 2:14-16; 1 Kor. 11:3). A de tan lobi en oema èn a de sori dati tapoe difrenti fasi. Foe eksempre, a no e kisi bita atibron nanga en (Kol. 3:19). A de wroko tranga foe sorgoe foe den skin nanga den jeje fanowdoe foe en oema nanga trawan di a lobi èn de diri gi en (1 Tim. 5:8). Ja, wan man di frede Gado e sori gi en oema a srefi lobi sorgoe di Jezus ben sori gi En gemeente (Ef. 5:25-32). Sortoe kristen oema no ben sa abi wan dipi respeki gi so wan man?
15. Te man nanga oema e ori densrefi a den bijbel marki foe a trowlibi, ini sortoe matifasi den sa prisiri densrefi?
15 Foe ori wisrefi na den marki di wi kari djonsro, kan de so wawan te wi doe moeiti alaten foe dati, gebroiki den Santa Boekoe ini wi libi, èn ini begi froetrow tapoe Jehovah. Ma ini a trowlibi di e doe kon tapoe a fasi disi, lobi sa gro foe troe. Na masra no sa moe abi foe aksi respeki. Na oema foe en nanga jeje fasi èn di behandel boen, foe ensrefi sa sori respeki gi en. A no abi foe kragi toe: „Joe no lobi mi!” Sortoe kristen man no ben sa firi wan tra sani leki lobi gi en bekwaam oema di e frede Gado? (Loekoe Rechters 14:15-17 nanga Ruth 3:11). Ini so wan osofamiri pe ala toe patna e doe joisti leki fa bijbel taki, a no sa de moeilek foe teki a rai foe na apostel: „Meki . . . ibriwan foe oenoe (trowman) aparti lobi en oema leki ensrefi; na oema na a tra sé moe abi dipi respeki gi en man.” — Ef. 5:33.
„PRISIRI NANGA NA OEMA FOE JOE JONGOE JARI”
16. Fa Spreuken kapitel 5 e gi tranga foe de getrouw a wan trow patna foe wan sma?
16 Na prakeri foe trow ben de foe gi sma prisiri. Ma efi wan sma wani ondrofeni disi èn wani trow-lobi tan go doro, dan wan sma moe tan getrouw na en patna. Bijbel ini agersi tongo e gebroiki den wortoe „Watrafonten” foe sori tapoe wan fonten foe kowroe seks-lostoe, wan sani di no, moe soekoe dorosé foe a trowlibi. A lobi mindri man nanga oema nanga reti abi na ini, trow libimakandra, ma den diri krosbé matifasi foe en no mag prati gi nowan sma dorosé foe a trowverbontoe. Gi a masra foe dat’ede den e taki: „Dringi watra foe joe égi alenbaki . . . Den fonten foe joe moe lon panja kande a dorosé foe a oso? Meki den bewijsi foe de soso foe joe wawan, no foe freemde sma nanga joe. Meki a watrafonten foe joe de wan blesi wan, prisiri nanga na oema foe joe jongoe jari, wan lobifasi oema-dia nanga wan moi stonkrabita . . . Meki alaten joe e prisiri toemsi foe en lobi”. — Spr. 5:15-23; 7:6-23.
17. Sortoe krakti a sori foe switi respeki sa abi tapoe den sma di tai ini a trowlibi?
17 Den sma di tai ini wan trowlibi, abi a verplekti a makandra (foe bijbel) foe doe den trowplekti. Disi de wan fasi foe sori dipi lobi èn te na trowplekti disi e doe kon tapoe wan natuurlek fasi foe dipi lobi inisé foe a trowverbontoe, a ben sa kan gersi nanga wan moi skedré. Fa a de foe datede toemsi prenspari dati trowpatna tan farawe foe pori na tafereel, èn dati den ori densrefi farawe foe doe sani di ben sa morsoe na trowbedi! (Hebr. 13:4). Te den e handel nanga makandra ini den sortoe dipi krosbé afersi disi, dan nanga disi a no sa psa taki a trowlibi panja tapoe wan sari fasi, aladi den e kisi kibri toe foe no fadon ini hoeroedoe. — 1 Kor. 7:1-5.
18. San wan trowman di frede Gado sa abi ini prakseri, te a de proeberi foe sorgoe foe den fanowdoe foe a oema tapoe a tori foe en firi nanga sani di abi foe doe nanga dati?
18 Wan trowman di frede Gado foe dat’ede sa proeberi tapoe wan switi fasi foe sorgoe foe den fanowdoe foe en oema di abi foe doe nanga en firi, ma a sa ori ensrefi na baka tapoe wan fasi di fiti gi wan sma di abi Gado jeje nanga a froktoe foe dati, namkoe dwengi joesrefi. (Gal. 5:22, 23). Wan kristen trowman sa handel nanga „sabi” èn sa „gi en oema grani leki wan swaki patoe, na oemasmafasi” te a ori ini prakseri en skin nanga biologis beperking, soleki Jehovah ben doe disi ini na Wet, di a ben gi na Israël. — Lev. 18:19; 20:18; 1 Petr. 3:7.
19. (a) Ini sortoe osolibi a de wan blesi foe kweki pikin? (b) Sortoe tranga-leri pikin abi fanowdoe?
19 Baka wan pisiten pikin kan kon foe na trowverbontoe, „wan goedoe foe Jehovah” (Ps. 127:3). A de wan blesi te den e kweki ini wan oso, di abi leki marki wan tranga lobi mindri den papa nanga mama nanga wan bigi respeki gi jeje afersi. A de troe taki pikin abi fanowdoe foe rai nanga tranga-leri, „ma a sma di lobi (en pikin) e soekoe en troetroe nanga tranga-leri” (Spr. 13:24). Te a tranga-leri foe wan papa nanga mama di abi leki fundamenti a bijbel, e gi ini lobi, toemsi boen winimarki sa komoto foe disi.
WAKA BAKA A SULAMITIS WENKE INI A SOSO DINI FOE GADO
20. Soboen, sortoe lobi nanga dini foe Gado wawan e psa a lobi mindri sortoe man nanga toe?
20 Na lobi di a herder ben abi gi a Sulamitis wenke, ben de „so tranga leki dede” èn a lobi foe sma di frede Gado èn di de ini disi ten ini wan trowlibi, kan de so dipi. A meisje ben taki toe: „a tan tanapoe foe dini Gado wawan, no de foe drifi leki Sjeool” (Hésingi 8:6). A lobi foe Jezus gi a skin foe en salfoe foetoeboi psa a lobi mindri sortoe man nanga oema, èn a faja foe a gemeente dati gi Kristus no de foe drifi leki Sjeool. Tog Jezus no ben dede ini en lobi soso gi den sma di sa tron en hemel „bruid”, ma gi en „tra skapoe” toe di gersi now wan „bigi ipi” sma nanga blesi a den fesi foe tego libi a grontapoe. — Joh. 10:16; Openb. 7:9.
21. (a) Sortoe toemsi moi eksempre a Sulamitis wenke ben gi? Fa a de tjari boen gi wi te wi go prakseri dipi foe san Jezus ben doe gi wi?
21 Gi ala den dienstknegti disi foe Jehovah a Sulamitis wenke ben gi wan toemsi moi eksempre foe a dini foe Gado wawan. Te wi go prakseri dipi foe a sani di Jezus ben doe gi wi nanga jepi foe en verloesoepaiman èn te wi loekoe en sori foe lobi nanga pramisi, dan wi lobi foe en sa gro. Disi foe en sé sa kibri wi foe feti baka afersi leki gridi lostoe, grontapoe goedoe nanga sani di no de jeje sani. A de tranga a banti foe wi nanga Jehovah toe, a Gado di meki a kan gi libisma foe abi wan lobi di „de so tranga leki dede”.