Dopoe — Wan sori foe bribi
„Nanga na ati wan sma e sori bribi go ini regtvaardegfasi, ma nanga a mofo wan sma e taki a publiki go ini verloesoe.” — Rom. 10:10.
1. Akroederi Matteus 28:19, fa wan sma e sori taki a tron wan discipel foe Jezus Kristus?
MASRA Jezus Kristus ben gi wi na eksempre foe meki den dopoe en. Ala sma di wani de en discipel moe dipi go ini watra sosrefi toe. Disi e kon a krin ini a komando di a Manpikin foe Gado ben gi en foetoeboi, baka di a ben opobaka foe dede. Wi e lési: „Meki discipel foe sma foe ala naatsi, dopoe den ini a nen foe a Tata, èn foe a Manpikin èn foe a santa jeje.” — Matt. 28:19.
2. (a) San a dopoe ini watra wani taki? (b) San Gado e verwakti foe wan sma di e meki den dopoe en, efoe a dopoe foe en wani abi troetroe waarde?
2 San a dopoe ini watra wani taki troetroe? Wan sma di meki den dopoe en, e sori nanga dati a publiki taki a drai baka gi ensrefi foe gi en srefi abra a Jehovah Gado leki wan discipel foe Jezus Kristus. Efoe a stap disi wani abi troe troe waarde ini a ai foe wi hemel Tata, dan nanga wan sma fri wani èn sondro foe a ori wan sani a baka a moe doe. No wawan a dopoe na ensrefi, ma ala sani di abi foe doe nanga a dopoe-régeling, de fanowdoe foe verloesoe. A sma di wani meki den dopoe en, moe abi berouw foe en sondoe, moe drai baka ofoe moe drai baka krinkrin gi wan fowtoe fasi foe doe, èn poti a wan sé ala reti di a abi tapoe ensrefi, foedi a de gi ensrefi krinkrin abra a Gado èn e tron wan dienstknegti foe a Moro Héwan nanga en Manpikin (Matt. 16:24; Tori foe den Apostel 2:38; 3:19; 1 Thess. 1:9, 10). Bifo a dopoe-kandidaat dopoe ini watra, dan akroederi nanga Romeini 10:9 Gado e verwakti foe en taki a taki ini publiki foe sori dati a de froestan boen den prenspari afersi disi. A tekst disi de so: „Bikasi efoe ini publiki joe meki bekenti a ’wortoe dati ini oen égi mofo’, dati Jezus de Masra èn e sori ini joe ati taki Gado ben opo en baka foe dede, dan joe sa kisi verloesoe.”
3. San den wortoe foe 1 Petrus 3:21 e bewijsi foe a dopoe?
3 Den wortoe foe 1 Petrus 3:21 e bewijsi taki a eri dopoe-régeling nanga a sori foe bribi ini publiki, de fanowdoe foe verloesoe. Na apostel e skrifi: „Now joe e kisi verloesoe so srefi toe nanga san e akroederi nanga dati, namkoe a dopoe (no a poeroe foe doti foe a skin, ma a begi a Gado foe wan boen konsensi), tapoe a gron foe a opobaka foe Jezus Kristus.”
4. Sortoe waarde den wortoe „tapoe a gron foe na opobaka foe Jezus Kristus” abi?
4 A de krin taki a dipi go ondro watra na ensrefi no e gi verloesoe. Aladi watra kan wasi doti poeroe, tog a „poeroe foe doti foe a skin” nanga wan plegteg wasi a dorosé no abi verloesoe leki bakapisi. Petrus e sori taki verloesoe e psa „tapoe a gron foe a opobaka foe Jezus Kristus”. Disi wani taki dati a sma de kisi dopoe moe abi a bribi taki a de kon wawan foedi a Manpikin foe Gado ben dede wan ofrandi dede èn ben opobaka baka dati na a di foe dri dé. Sosrefi toe a moe erken troetroe taki Jezus de en Masra ofoe Méster, nanga ala makti foe kroetoe den libiwan nanga den dedewan, bikasi Petrus ben taki morofara: „A de na a reti-anoe foe Gado, bikasi a ben go a hemel, èn engel nanga makti nanga krakti ben poti na en ondro.” — 1 Petr. 3:22.
5. Fa wan sma e kisi wan „boen konsensi”?
5 Petrus sosrefi toe e tjari „a begi foe wan boen konsensi” kon akroederi nanga a dopoe. Foe kisi wan boen konsensi, dan ala sma di moe dopoe, moe abi berouw foe den sondoe, drai baka gi wan fowtoe fasi foe doe, èn gi ensrefi krinkrin a Gado abra nanga jepi foe Kristus. A dopoe de a publiki marki taki sma ben gi ensrefi abra a Gado nanga en eri ati, so srefi toe a sori foe a bribi di a taki nanga en mofo. Te a dopoe discipel doe den sani di Gado e aksi foe en, dan a de kisi wan boen konsensi. Solanga a de ori a boen konsensi, dan a de ini wan toestand foe verloesoe. Foe a sé foe Gado wan takroe kroetoe no sa kon tapoe en.
6. Nanga san a dopoe-régeIing e akroederi? (b) Fa bribi abi foe doe nanga dati?
6 San na apostel ben wani taki di a ben taki: „San e akroederi nanga dati”? Leki fa a vers a fesi ben taki dan den aiti libi sili, di foe Noach toe, „ben tjari boen pasa a watra foe a froedoe” (1 Petr. 3:20). Densrefi watra di ben kiri den sma dorosé foe na ark, ben verloesoe ofoe fri Noach nanga den sébi sma foe en osofamiri foe wan ogri geslacht. Ma Noach no ben sa ondrofeni na moro bigi verloesoe disi sondro bribi. Hebreeër 11:7 e ferteri wi: „Nanga bribi, Noach ben sori frede gi Gado èn ben bow wan ark foe verloesoe foe en osofamiri, baka di a ben kisi wan warskow foe Gado foe sani di no ben de foe si ete (dati wani taki, bewijsi no ben de foe si foe a kon foe wan grontapoe froedoe nanga a wai poeroe foe a libi foe libisma nanga meti); èn nanga bribi a ben kroetoe a grontapoe, èn a tron wan erfgenaam foe a regtvaardegfasi di de akroederi bribi.” Soleki Noach ben abi bribi fanowdoe foe bow wan ark, a so ala sma di de dopoe discipel foe Jezus Kristus, moe abi bribi foe kakafoetoe gi a druk di e kon tapoe den foe wan ogri grontapoe nanga a Gado foe en. — Joh. 12:31; 2 Kor. 4:4.
Foe sanede bribi de fanowdoe
7. Sortoe rai Jezus Kristus ben gi ini Lukas 14:26-33 èn foe sanede?
7 Ala sma di e tron dopoe discipel foe Jezus Kristus, èn di gi densrefi abra, kan verwakti moeilekheid. Foe dat’ede meki a Manpikin foe Gado ben gi a rai disi:
„Efoe wan sma e kon a mi èn a no wani foe si na ai en papa, nanga mama nanga oema nanga pikin nanga brada nanga sisa, ja srefi en égi sili, a no kan de mi discipel. A sma di no e tjari en pina-postoe èn no e waka baka mi, no kan de mi discipel. Soema foe eksempre foe oenoe di wani bow wan toren, no e go sidon fosi foe bereken den kostoe, foe si efoe a abi nofo foe klari en? Noso a ben kan pasa taki a poti a fundamenti foe en, ma a no man foe klari a wroko èn dan ala sma di e loekoe kande sa go spotoe en èn taki: ’A sma disi ben bigin foe bow, ma a no klari en.’ Ofoe sortoe kownoe, di e opo go feti _nanga wan tra kownoe no e sidon fosi foe prakseri ofoe a kan man foe tanapoe nanga wan sroedatimakti foe tin doesoen man na fesi na sma di e opo kon feti nanga en nanga tenti doesoen man? Bika efi a no kan doe disi, dan a de seni wan boskopoeman, ala di a de farawe a pasi ete, èn begi foe vrede. Foe dat’ede oen kan sabi seker taki no wan foe oenoe kan de mi discipel, efoe a no taki adjosi gi ala en goedoe” (Luk. 14:26-33).
Akroederi nanga den wortoe disi, dan ala sma di o dopoe, moe poti a fesi, boen prakseri san de alamala ini a tori.
8. Fa wi moe de nanga famiri di no e bribi, èn foe sanede?
8 A no de foe taki dati Jezus no ben taki dati en discipel moe tegoe gi den famiri foe den. Ini a Bergipréki a ben gi wi srefi tranga foe ’lobi wi feanti èn foe begi gi den di e vervolgoe wi’ (Matt. 5:44). A troe foe a tori de taki wi moe abi joisti moro lobi gi den famiri foe wi di no e bribi, aladi nanga ala prisiri wi sa de klari foe doe ala san wi kan foe jepi den foe kisi tego libi (Loekoe Romeini 9:1-3). Ma wan sma di tron wan dopoe discipel, no moe wani „si den na ai” na so fasi dati en lobi gi Jezus Kristus de moro bigi leki en lobi gi den. Foe sanede disi de so fanowdoe? Den famiri foe en no sa feni kande so boen san a de doe. Kande den e meki a froestan boen, dati efoe a meki den dopoe en troetroe, dan den no wani sabi noti moro foe en. A abi soboen bribi fanowdoe foe abi a fasti overtoigi dati a no sa lasi, ma sa de moro boen joisti te a gi ensrefi abra a Jehovah èn meki den dopoe en.
9. Sortoe winimarki dopoe discipel foe Jezus Kristus di gi densrefi abra a Gado e prisiri densrefi?
9 Fa a sa de moro boen gi wi te wi de wan dopoe discipel foe Jezus Kristus di gi densrefi abra? Wi abi a satisfaksi foe sabi taki wi e doe den sani di Jehovah Gado nanga en Manpikin e feni boen. Foe de ini a boen ati foe den, de moro warti leki sortoe sani toe. Den mati nanga famiri foe wi no wan foe den kan gi wi wan jepi nanga tiri di noiti e fadon nanga tego libi. Jehovah Gado e poti den sani disi gi wi foe kisi nanga jepi foe en Manpikin. So srefi toe wi e kisi a jeje fasi brada, sisa, mama nanga pikin. Jezus ben gi na djaranti disi: „Foe troe, mi e taki gi oenoe: Soema no sa de di foe mi ede nanga foe a boen njoensoe ede, ben libi oso ofoe brada ofoe sisa ofoe mama ofoe papa ofoe pikin ofoe firi di no sa kisi now, ini disi ten, hondro tron, oso nanga brada nanga sisa nanga mama nanga pikin nanga firi, nanga vervolgoe, èn ini a seti foe sani di e kon tego libi” (Mark. 10:29, 30). Te wi loekoe san wi e wini, dan san wi e lasi ini a ai foe grontapoe sma, de soso wan ipi doti. — Fil. 3:8.
10. Foe sanede a de troetroe fanowdoe foe lobi Jezus Kristus moro leki wi égi sili foe de getrouw discipel èn foe sanede bribi de fanowdoe foe disi?
10 Foe sanede meki a Manpikin foe Gado e meki krin toe dati wi moe lobi en moro leki wi égi sili? Disi abi foe doe nanga san wi moe verwakti foe a sé foe sma di no e bribi. Ini 2 Timoteus 3:12 tanapoe: „Ala sma di wani libi gi Gado wawan ini Kristus Jezus, sa kisi vervolgoe toe.” Efi a lobi gi wisrefi ben sa de moro bigi leki wi lobi gi Gado Manpikin, dan wi no ben sa de klari foe meki sma kosi ofoe mishandel wi ofoe — efoe a de fanowdoe — foe dede foedi wi de en discipel. Bribi de foe troe fanowdoe foe doe a stap foe a dopoe, foedi wi moe froestan dati disi ini wan ten ini a ten di e kon ben sa kan meki wi lasi wi libi. A bribi disi abi toe ini en a fasti vertrow ini a opobaka (Tori foe den apostel 24:15). Ja, libisma kan kiri wi, ma den no kan poeroe a reti foe wi foe de wan libi sili. Soso Jehovah Gado kan doe disi, èn disi de nanga a poeroe foe tego foe a reti foe wi tapoe libi. Foe dat’meki Jezus ben gi a tranga disi: „No frede foe den di kan kiri a skin, ma no kan kiri a sili; ma frede moro foeroe en di kan wai poeroe èn sili èn skin ini Gehenna.” — Matt. 10:28.
11. Foe sanede wi abi bribi fanowdoe te wi wani kaka foetoe gi economia pina, foedi wi de discipel foe Jezus Kristus?
11 Efoe wi no feni wi libi toemsi diri, dan so srefi toe wi kan tan oridoro, winsi economia pina e kon. Son wan foe den dienstknegti foe Gado ini disi ten ben lasi den wroko foedi den ben ori loyaal a den wet foe Gado. Spesroetoe te wi kon tanapoe fesi problema di abi foe doe nanga a sorgoe foe tan a libi, dan wi abi bribi fanowdoe foe kan abi a vertrow dati wi hemel Tata sa jere a begi: „Gi wi tide wi brede foe disi dé” (Matt. 6:11). Ala sma di e meki den dopoe en, moe abi a vertrow dati Jehovah Gado kan èn sa jepi en pipel ini ten foe nowtoe.
Wan waka nanga libi di bribi de fanowdoe
12. Ini sortoe sani wan sma moe proeberi foe go a fesi baka te a dopoe?
12 Aladi bribi de fanowdoe foe tron wan dopoe discipel foe Jezus Kristus, di gi ensrefi abra a Gado, disi de soso a bigin foe wi libi leki wan kristensma. Baka te wi dopoe, dan wi sa moe tan gro ini bribi èn moe tan go a fesi ini a sori foe den tra froktoe foe Gado jeje — lobi, prisiri, vrede, langa-pasensi, switifasi, boen-fasi, safrifasi nanga dwengi joesrefi. Nanga faja wi sa moe tan verteri tra sma foe wi bribi (Gal. 5:22, 23; 2 Petr. 1:5-8). Njoen discipel moe ori ini prakseri dati den de alaten ete jeje bébi èn moe teki a rai foe na apostel Petrus na ati: „Kweki, leki njoen gebore bébi wan lostoe gi a merki di no falsi èn di de foe a wortoe, foe joe kan gro nanga dati go na verloesoe, efoe joe ben tesi taki Masra de boen.” — 1 Petr. 2:2, 3.
13. Fa wan sma kan meki wan faja lostoe gro gi jeje njanjan?
13 Foe wi meki wan faja lostoe gro gi jeje njanjan, wi moe teki ten foe prakseri nanga warderi foe den sani di Jehovah Gado nanga Jezus Kristus ben doe gi wi èn moro fara gi pasi dati wi ati troesoe wi foe gi wisrefi njanjan alaten nanga a Bijbel. Moro de ini a tori leki a bijbel wawan. Ini begi wi moe prakseri foe den sani di tanapoe na ini èn poti na rai di kon foe santa jeje ini wi égi libi. Wan stoeka foe a bijbel na a anoe foe wan ofoe toe fundament bijbel stoeka-jepi-wrokosani no de nofo foe sabi Gado Wortoe krinkrin. Den Boekoe e gi wi boen foeroe sani moro foe bow nanga tranga wi a jeje fasi.
14. Nanga soema njoen bribiman moe soekoe foe demakandra èn foe sanede?
14 Boen demakandra ini a kristen gemeente de so srefi toe prenspari gi wi foe go a fesi a jeje fasi. Den kompe di wi ben sa wani moro de kompe-bribiman nanga jeje fasi, sma di e taki nanga prisiri foe Gado Wortoe èn di abi bigi belangstelling foe jepi tra sma. Na apostel Paulus ben skrifi gi Timoteus, wan owroeman ini a kristen gemeente: „Ini wan bigi oso, no wawan de now patoe foe gowtoe nanga solfroe, ma so srefi toe foe oedoe nanga tokotoko, èn son wan foe wan respeki prakseri, ma trawan gi wan prakseri di grani no de na ini. Efi foe dat’ede wan sma tan farawe foe a laatste wan, a sa de wan patoe foe wan respeki prakseri, santa, foe en éginari gebroiki, sreka-sreka foe ibri boen wroko. Lon komoto soboen foe den lostoe di de foe den jongoewan, ma feti baka regtvaardegfasi, bribi, lobi, vrede, makandra nanga den di e kari Masra nanga wan krin ati” (2 Tim. 2:20-22). Na apostel ben teki gersi a gemeente soleki a ben gro ini en ten, soboen nanga wan oso pe ala sortoe patoe ben de na ini. Efi a ben de fanowdoe dati wan owroeman ben lon komoto foe „patoe sondro grani” èn no meki den de en krosbé mati, dan disi de troetroe moro tranga fanowdoe ete gi jeje bébi, di „a jeje ai foe den no oefen foe si boen nanga ogri” (Hebr. 5:14). Takroe krakti kan kisi den moro makriki. — Loekoe 2 Petrus 2:18.
15. Fa wi kan kon sabi boen kompe?
15 Disi no wani taki dati wi moe loekoe den memre foe a gemeente nanga takroe prakseri. A no de wan moeiliki sani foe kon sabi boen kompe. Jezus Kristus ben taki: „Komoto foe san de bogobogo ini a ati a mofo e taki” (Luk. 6:45). Den sma di den wortoe foe den e gi wi tranga troetroe foe „lobi nanga boen wroko”, de foe troe loyaal mati (Hebr. 10:24). Demakandra nanga den kan meki dati wi gro kon lepi leki wan kristen.
16. Fa wi e sori a bribi foe wan kristen?
16 Foedi a bigin foe wi waka nanga libi leki kristensma de wan sori foe bribi, dan wi eri libipasi moe sori troe troe wan bribi ini Jehovah Gado nanga ini en Manpikin di no e seki. A bribi dati e sori nanga wroko di e akroederi nanga en. A discipel Jakobus ben skrifi: „Tron . . . doeman foe a wortoe èn no soso Jereman, bidrigi joesrefi nanga falsi prakseri” (Jak. 1:22). Moro e aksi foe wi leki foe arki nanga respeki na gemeente-konmakandra èn gi nanga warderi commentaar tapoe san ben jere. Wi moe poti ala rai foe Gado ini wi libi, èn foe disi a de fanowdoe dati wi doe wroko, èn de klari foe doe wan sani gi den jeje, nanga firi nanga skin fanowdoe foe trawan. So srefi toe a wani taki dati wi abi wan prati na a bigi prékiwroko di moe doe bifo na „kaba” kon. — Jak. 1:27; 1 Joh. 3:16, 17; Matt. 24:14, 21, 22.
17. San wi ben kan aksi wisrefi te wi loekoe na a gersitori foe Jezus foe a saiman?
17 Akroederi nanga a gersi-tori foe Jezus foe a saiman, dan wi leki dopoe discipel foe Jezus Kristus, moe sori taki wi de „boen gron”. A „wortoe foe a Kownoekondre” di ben sai ini wi ati, moe meki froktoe. Wi e graboe ibri okasi foe gi kotoigi, sodati wi e meki froktoe ini a taki foe Gado kownoekondre? (Matt. 13:3-9, 18-23) Akroederi nanga Openbaring 22:1, 2, pe wan pisi foe den seti foe Jehovah foe libi e agersi nanga bon di e gi den froktoe foe den ibri moen, wi e teki a fasti bosroiti foe doe moeiti foe no meki no wan moen pasa sondro dati wi no abi wan prati foe ferteri trawan foe a bribi foe wi? So srefi toe a de prenspari dati wi e proeberi foe doro na ati foe famiri di no e bribi nanga sabiman nanga jepi foe wan kotoigi di e kisi krakti nanga wan toemsi moi eksempre foe wan kristelek libi. Sondro foe wi misi tapoe a tori foe san wi sabi dati de joisti, a no ben sa boen, foe no meki frijaridé, féstidé nanga den sortoe sani disi de foe soso bigi stré ini kontakti foe wi nanga den? A no de moro betre foe poti wisrefi a tapoe foe prati positief prakseri foe a bijbel di e bow den efi okasi e gi pasi foe disi? Na switifasi, nanga opregti broko-ede nanga jepi foe wi foeroe tron ben kan gi wan moro krakti kotoigi leki foeroe wortoe. — Loekoe Romeini 12:17-21.
18. Foe sanede meki a de foe wan kristelek discipel de wan sani di e pai?
18 A de foe wan kristelek discipel abi foe doe troetroe nanga ernstig frantwortoe. Ma omeni winimarki a libi foe wi abi! Srefi now wi e ondrofeni vréde foe wi verstan nanga foe wi ati, foedi wi sabi dati wi abi a boen-ati foe wi hemel Tata nanga en Manpikin. A libi foe wi abi leki spesroetoe marki foe doe moeiti dati a tego tanboen foe wi kompe-libisma go a fesi. Nanga foeroe froetrow wi e loekoe na a kon foe a „libi di e kon”, tego libi ini Gado regtvaardiki njoen ordening (1 Tim. 4:8). A bribi foe wi, di de so tranga fanowdoe foe tron wan dopoe discipel foe Jezus Kristus, kan tjari wi so fara foe kisi a bigi ten disi di e kon.