A waktiman ben taki: „A fadon!”
1. Foe sanede wi moe sreka wisrefi foe ondrosoekoe a „visioen” di ben ferteri a Jesaja?
A VISIOEN foe san o pasa ini a ten di e kon esesi, de tranga. A so a proféti Jesaja e tjari na afersi kon na wi prakseri, di a ben taki profétitori ini den dé, di na Assyria kownoekondre ben abi makti tapoe a heri grontapoe na a ten dati. A visioen de toemsi „tranga” foe wi ondrosoekoe en ini a ten disi? Meki wi sreka wi srefi foe arki san Jesaja e taki: „Wan tranga visioen ben ferteri na mi: A toriman e handri feradelek, èn a sma di e foefoeroe sani nanga tranga, e foefoeroe nanga tranga.” — Jes. 21:2.
2. (a) Soema wi e kon sabi leki „a sma di e foefoeroe sani nanga tranga”, èn a sortoe fasi? (b) Nanga soema spesroetoe a „toriman ben handri feradelek” èn foe sanede?
2 Wi kan kon sabi a sma di e kari dja „toriman”, aladi en nen no e kari. Disi ben de na owroe Babylon, di ben tron a di foe dri Grontapoe-makti. Babylon ben kisi wan takroe nen tapoe wan veragti fasi, foedi a ben foefoeroe sani foe a foto Jeruzalem nanga tranga, aladi drape srefi a ben foefoeroe nanga tranga sani foe a Moro Santa (kamra) foe a tempel foe Jehovah. A troe dati Jehovah ben gebroiki a kownoe foe Babylon, Nebukadnezar leki en „knegti” foe gi a kownoekondre Juda tranga leri, ma tog Babylon ben handri feradelek nanga Jehovah verbontoepipel. A no ben abi a prakseri foe loesoe den djoe katiboman, sodati den ben kan drai go baka na a kondre di a Gado foe den ben gi den, srefi aladi pikinmoro 70 jari ben pasa kaba (Jes. 14:3-17). A winiman foe a Babylon kownoekondre ben de a sma di ben de fanowdoe foe meki a kan dati ini 537 bifo G.T. „den strafoeman” ben drai go baka na oso. A visioen di ben ferteri a Jesaja ben de foe datede „tranga” gi Babylon, a foefoeroeman di e foefoeroe den naatsi nanga tranga, spesroetoe foe a pipel foe Jesaja Gado.
3. Wi kan taki foe a disiten eksempre foe Babylon dati a de handri feradelek èn e foefoeroe sani nanga tranga?
3 Fa a de now nanga a disiten eksempre foe a Babylon foe owroeten? Nanga a fasi fa a ben doe nanga den kristen di de ini wan verbontoe nanga Jehovah Gado, dan te wi loekoe den leri foe a kristendom, dan a no ben de pikinso na baka foe de feradelek. Sondro ati a ben foefoeroe den sortoe kristen disi nanga tranga, foedi den e hori den komando foe Gado èn di e doe a wroko, di de ini a gi kotoigi foe Jezus Kristus di poti tapoe a troon leki kownoe (Openb. 12:17). A kristenheid teki a fosi presi ini a handri feradelek èn foefoeroe sani nanga tranga, spesroetoe sensi a Fosi Grontapoefeti. Foe datede dati spesroetoe a kristenheid sa firi a krakti foe a tranga „visioen” te a de kon troe tapoe a disiten grontapoerigeri foe falsi religie, a Bigi Babylon. Ma soema Jehovah sa gebroiki foe meki a „tranga visioen” kon troe djonsrode?
4. Soema de den soema di Jesaja 21:2 e kari foe go feti nanga Babylon èn foe sanede den Persiasma no kari djaso?
4 Jesaja e poti a fundamenti gi a piki te a de taki moro fara: „Opo waka, o Elam! Lontoe a foto, o Mediakondre! Ala a soktoe foe en ede mi e meki kon a wan kaba” (Jes. 21:2). Elam ben didon na oostoesé foe a liba Tigris èn ben tron wan pisi foe san e kari Persia, aladi ini disi ten Iran abi a gebied dati. Médiakondre ben de a moro bigi gebied na oostoesé foe a lagi presi foe Mesopotamia. So wan 200 jari baka a profétitori foe Jesaja, a Bigi Cyrus (2) ben wini den Médiasma, sodati a kownoekondre Persia ben kon moro tranga leki Média. Cyrus mama ben de wan Médiasma, èn a moro bigi pisi foe en sroedati ben de Mediasma. A Cyrus disi de a Cyrus, ofoe Kores, di Jesaja ben taki foe en a fesi ondro a krakti foe Gado santa jeje (Jes. 44:28 te nanga 45:7). Ini a ten foe Jesaja a Média-Persia-kownoekondre no ben opo ete, sodati den Persiasma no ben kon ete na fesi. Foe dat-ede meki Jehovah e kari soso Elam nanga Média na den nen leki kondre di ben sa go feti nanga Babylon.
5. Fa Jehovah ben sorgoe dati „ala a soktoe foe en ede ben kon a wan kaba”, èn a „strafoeman” ben loesoe foe ben kan go na oso baka?
5 Den fetiman dati ben sa wini èn tjari wan kenki kon ini a situwasi ini Zuidwest-Asia nanga a Midden-Oosten? Ja! Disi wi kan si ini den tra wortoe foe Jesaja: „Ala a soktoe foe en ede mi e meki kon a wan kaba.” Disi de troetroe den wortoe foe „Jehovah foe den fetiman”, a Soeverein Masra foe na universum. Nanga jepi foe Elam nanga Média leki en wrokosani, a ben sorgoe dati „ala a soktoe” leki wan bakapisi foe a Babylon di ben kwinsi sma, ben sa kon a wan kaba. Ini wan begi na Jehovah Gado foe kisi fri foe winiman di no e broko ede ofoe den lsraëlsma ben sa de ini a toestand foe den ini strafoe, a psalmsingiman ben taki: „Dati a soktoe foe a strafoeman srefi kon na joe fesi. Kibri nanga a bigi foe joe anoe a sma di a skrifi taki a moe dede” (Ps. 79:11-13; Jes 14:17). Gado ben jere a begi disi ini a di foe 70 jari foe a katibo foe den djoe ini Babylon, foedi a Bigi Cyrus ben meki wan kownoe bosroiti go a doro. — Jes. 35:8-10.
FA JOE E DOE NANGA A FADON FOE BABYLON
6, 7. Fa Jesaja e skrifi foe a krakti di a fadon foe Babylon ben abi tapoe den sma di a ben wroko takroe tapoe den?
6 A fadon foe a bigi di foe dri Grontapoemakti ini 539 bifo G.T., san ben de spesroetoe boen gi a pikin kondre lsraël, ben de wan sani di ben de moeilek foe bribi. Wan bigi kenki ben kon de ini a grontapoe-historia. Sma di a fadon foe a (grontapoe)makti, di a centraal pisi ben didon ini a „sabana foe a se”, ben sa wroko takroe tapoe den, ben sa de nanga skreki-ati. A krakti di disi ben sa abi tapoe den sortoe sma disi ben agersi ini den wortoe foe Jesaja, di e taki so foe a „tranga visioen”:
7 „Foe datede meki mi djonkoe kon de foeroe nanga hebi pen. Ja, krampoe kisi mi, leki den krampoe foe wan oema di moe meki. Mi kon de ini broeja, sodati mi no e jere moro; mi ben kon skreki sodati mi no e si moro. Mi ati ben waka lontoe; ja béfi ben meki mi skreki. A mofoneti, di mi ben lobi, ben tron wan béfi gi mi.” — Jes. 21:3, 4.
8. San den wortoe foe Jesaja e sori tapoe a krakti di a fadon foe a grontapoe-rigeri foe falsi religie sa abi tapoe den kerki fesiman foe a kristenheid nanga a heidendom?
8 Den wortoe disi di e handri foe a fadon foe a feradelek di foe Dri Grontapoemakti, e sori wi fa a grontapoe foe kerki sa seki te a den fundamenti foe den, te a disiten eksempre foe Babylon fadon. Disi sa gi moro foeroe pen na a kerki firi foe den disiten agersi Babylonsma leki a boskopoe di e kon tranga èn di Jehovah kotoigi e meki bekenti ini disi ten „foe a kaba” sensi 1914 (Dan. 12:4). Priester nanga tra hésma foe den kerki seti foe a kristenheid nanga a heidendom sa froewondroe èn babaw, leki a de leki den no kan si ofoe no man taki no wan wortoe foe den sani di e psa. A ati foe den sa lasi ala stabiliteit èn kon de sondro rostoe; a no kan de nanga froetrow sondro foe seki tapoe den gado di ben aanbegi wan dé. Wan situwasi di de takroe nofo foe meki den béfi, e tapoe skreki gi den, spesroetoe foedi a kerki falsifasi foe den ben kon a krin. A „mofo-neti”, di e abi na ini en a pramisi foe teki rostoe nanga abi prisiri na a kaba foe wan wrokodé, sa tron wan ten di de wan moro doengroe nanga frede sani gi den. A dé, di den ben kori sma ini den kerki organisatie èn ben kwinsi den, sa kon a wan kaba tapoe wan skrekifasi. Den sa abi krampoe leki oema di e hori den djonkoe foe a pen ini a ten di den de foe meki.
9. Nanga sortoe komando foe Jehovah a toneeldecor, di ben sori a Jesaja, e kenki wantron-wantron?
9 Wantron-wantron a toneeldecor e kenki di ben sori na a proféti Jesaja, soleki wan kenki de na den tafereel ini wan kino. A de jere a komando foe Jehovah: „Meki a tafra sreka, a seti foe den stoeroe, meki den dringi èn njan! Opo tanapoe, oen granman, salfoe a schild. Bikasi disi Jehovah ben taki gi mi.” — Jes. 21:5, 6.
10. San a komando foe Gado e agersi, èn oten a tafereel di ben agersi ben doro en hémarki foe veragti Jehovah Gado?
10 Disi e agersi sjatoe a tafereel ini a paleisi ini Babylon, tapoe a laatste neti foe en grontapoe-tiri. Tapoe wan fasi di joe kan si a joe fesi a de skrifi dja foe a fesa foe Belsazar, a manpikin foe a kownoe Nabonidus di no ben de drape. Troetroe stoeroe ben poti gi den doesoen bigiman foe Babylon. Sondro sorgoe den ben njan èn dringi. Ma disi e go makandra nanga wan sori foe na bigi veragti gi Jehovah Gado, di den ben go gebroiki na a njan nanga dringi foe den, tafra-sani di ben de foe a tempel foe Jehovah te nanga a ten di den Babylonsma ben wini Jeruzalem èn ben pori en tempel.
11. Sortoe wondroe Jehovah e meki pasa now tapoe a fesa foe Belsazar di a afrontoe Gado, èn fa Daniël ben dini na a okasi dati leki tolk?
11 A fesa foe Belsazar e tron now wan fesa di e afrontoe Gado, bikasi Jehovah e tjari kon ini a prenki. Nanga wan wondroe Jehovah e sorgoe dati wantron-wantron wan anoe e sori ensrefi foe skrifi tapoe a skotoe foe a fesa-zaal, pe a kownoe ben kan si en, den wortoe: „Mene, mene, tekel èn parsin.” A djoe proféti Daniël di ben de ini katibo, ben moe tjari kon na inisé foe tjari a kribi-tongo disi kon a krin. A laatste wortoe foe a anoeskrifi, parsin, de a meervoud foe a Chaldew wortoe peres èn wani taki „prati”. Ini san Daniël tjari kon na krin nanga jepi foe Gado jeje, a ben taki foe datede: „Peres, joe kownoekondre prati èn a gi a den Média- nanga den Persiasma.” — Dan. 5:28.
12. San ben de a „schild” di den granman ben moe salfoe, èn tapoe san a komando ben sori foe salfoe a „schild” dati?
12 Leki wan paiman Daniël ben kisi grani foedi a ben kisi wan kownoe krosi foe weri èn a ben tron a di foe „dri tiriman” ini a kownoekondre. Disi no ben de wan kon troe foe Jehovah komando tapoe den bigiman foe Babylon: „Opo tanapoe, oen granman, safoe a schild” (Jes. 21:5). Sosrefi toe den granman no ben kisi a komando foe poti oli gi den schild foe den foe go feti nanga den sma di ben lontoe Babylon. A wortoe „schild” ben gebroiki moro foeroe gi a sma di ben de kownoe èn edeman foe a naatsi. (Tek agersi Psalm 89:10) San a komando wani taki dan foe „safoe a schild”? Disi: dati kownoe Belsazar ben kan dede ibri momenti, sodati a fanowdoe ben kon dati wan tra sma ben sa teki a positie foe „tweede tiriman” ini a kownoekondre foe Babylon. A poti disi foe wan njoen agersi „schild” nanga jepi foe salfoe no feni presi noiti. A takroe dede foe Belsazar no ben abi troetroe leki bakapisi dati wan tra sma ben go sidon tapoe a troon foe a kownoe famiri.
13. A komando di ben gi ini Jesaja 21:2 ben gi soboen foe soso, èn a positie foe Daniël di a ben kisi pas ben tan so ini na njoen tiri?
13 Daniël 5:31 e taki: „A srefi neti dati ete, Belsazar, a Chaldew kownoe ben dede, èn Darius a Médiasma srefi ben kisi a kownoekondre, aladi a ben de 62 jari.” Fa disi ben de wan esesi kenki ini a grontapoe politiek! No foe soso Jehovah ben gi en komando: „Opo waka, o Elam, lontoe a foto, o Médiakondre!” (Jes. 21:2). Di Babylon ben fadon gi den Média- nanga Persiasma, dan Darius a Médiasma ben teki a presi foe wan „tweede tiriman” ini Babylon, A positie foe Daniël di a ben kisi pas foe de a „di foe dri tiriman” ini Babylon no ben tan so ini a Média-Persia rigeri. Tog Daniël no ben dede makandra nanga Belsazar.
14. (. . .)
14 A onverwakti fadon foe a owroe Babylon de wan marki di e sori a fesi foe a wantronwantron fadon foe en disiten eksempre, a Bigi Babylon. A sa fadon kon onverwakti tapoe den grontapoe kerkiman. Efoe soboen sma de di e bribi dati a grontapoe-rigeri foe falsi religie no kan wini, soboen no e verwakti dati a sa fadon, dan a satisfaksi firi disi foe den sa seki tapoe wan grofoe fasi.
SAN A WAKTIMAN MOE FERTERI
15. San a komando di ben gi baka di ben skrifi foe Belsazar fesa, wani sori tapoe a owroe Babylon nanga en eksempre?
15 Ma foe sanede Jesaja e sori a fesa foe Belsazar a fesi ini a neti foe pen ini 539 bifo G.T.? Foe a sani di ben sa kon na en baka; boskopoe ben sa tjari namkoe gi Jehovah verbontoepipel, di ben prisiri foe a fadon foe „a toriman”. Jesaja 21:5, 6 e sori san ben sa kon wantronwantron baka a fadon foe Babylon, nanga den wortoe: „Opo tanapoe, oen granman, salfoe a schild. Bikasi disi Jehovah ben taki gi mi: ’Go, poti wan wakti-oso, foe joe kan ferteri san joe e si precies.’” Aha, a sani di pasa ben moe meki bekenti gi heri grontapoe! A so fasi a fadon foe a Bigi Babylon moe kon ini a grontapoe-njoensoe!
16. San wi kan taki foe a „waktiman” di ben poti ini a geval foe Babylon foe owroeten èn sortoe wan poti ini a geval foe a Bigi Babylon?
16 Jesaja ben kisi a komando foe poti wan „Waktiman” di ben sa go ferteri san a ben sa go si. Jesaja no ben libi langa nofo foe si san a ben taki a fesi, èn foe san a ben gi oenoe wan skrifi tori. Wan tra sma foe Jesaja égi pipel ben sa moe dini leki a „waktiman” di ben poti. Ini den dé di ben didon farawe ete ini a ten di ben sa kon ini den dé dati foe a fadon foe a Bigi Babylon di ben e kon, a so wan srefi „waktiman” ben poti. Den disi ben bewijsi foe de a klasse sma di kisi salfoe nanga Jehovah geest, wan klasse di tapoe wan fasi di fiti ben tai densrefi nanga a tijdschrift di e tjari te now ete alaten a nen Wachttoren. Djonsro a bewijsi sa gi, dati Jehovah Gado ben poti foe wroko a „waktiman”-klasse nanga jepi foe Jezus Kristus. Te leki a joeroe disi foe a „neti” di no e pramisi boen èn e trowe en doengroe tapoe a heri grontapoe, a ben doe wroko leki so (Matt. 24:45-47). Sortoe boskopoe foe a „wakti-man” disi wi kan verwakti na a reti ten?
17. San a „waktiman” ben si, èn san disi e agersi?
17 A profétitori foe Jesaja foe a „waktiman” e go moro fara foe taki: „Èn a ben si wan fetiwagi nanga wan span asi, wan fetiwagi nanga boeriki, wan fetiwagi nanga kameli. Èn a poti boen prakseri foe si sani finifini” (Jes. 21:7). Den wagi dati e ari kon krosibé nanga a gawfasi foe gaw Persia post-asi ofoe rij-asi èn den e komoto kon foe „a sabana foe a se (di ben wini)”. Kande den de colonnes foe fetiwagi. A colonne foe wagi di boeriki e hari, e agersi a legre foe Média ondro Darius a Médiasma. A colonne wagi di moro bigi meti e hari — kameli, di kan waka moro tranga leki asi — e agersi a Persia legre ondro a Bigi Cyrus. A Persiasma disi de na a ede foe den gecombineerde fetiwagi foe den Média- nanga den Persiasma. A no ben de Darius a Médiasma, ma Cyrus a Persiasma ben de a winiman di Jehovah ben taki foe en nanga mofo foe Jesaja dati A ben sa kari en na en nen. Jehovah Gado ben sa opo den isri doro nanga portoe foe Babylon gi a Cyrus disi, dati a ben kan opo komoto kon a tapoe foe a bedi foe a liba Eufraat èn ben kan hari go ini a foto Babylon di ben tap lontoe nanga deki skotoe. — Jes. 44:27 te nanga 45:4; tek gersi Daniël 8:1-4, 20.
18. Sortoe waktiman a „waktiman” ben sa de leki fa Jesaja 21:8, 9 taki èn disi de troetroe so?
18 O getrouw nanga betrouwbaar a waktiman ben sa de leki waktiman? Jesaja 21:8, 9 e ferteri wi disi èn a de taki: „Moro fara a bari leki wan lew: ’Tapoe a waktitoren, o Jehovah mi e tanapoe alaten na dé èn tapoe mi waktipost mi e tanapoe ala neti. Èn loekoe now, drape wan fetiwagi nanga mansma e kon nanga wan span rij-asi!’” Nanga krin ai a ben tan tapoe en post te leki en srapoe ai ben si a sani di ben wani taki foeroe èn di a ben tanapoe sondro foe weri tapoe en post. A so fasi a disiten „waktiman”-klasse nanga jepi foe den uitgave foe A Wachttoren nanga tra theocratisch boekoe nanga publiki lezing ben bari tranga èn sondro frede foe kan doe a wroko di Gado ben gi den foe doe. Nanga jepi foe a krakti foe Jehovah di no e fadon noiti a sa go doro nanga disi te leki a kan ferteri a sani di sma ben wakti langa a tapoe.
19. San e sori efoe a waktiman ben froestan joisti san den fetiwagi di e kon wani taki?
19 A waktiman ben froestan san a ben wani taki di a ben tanapoe tapoe a waktitoren èn ben kisi foe si den fetiwagi. Tapoe a gron foe a ten di Jehovah ben poti — 70 jari foe a pori foe a kondre Juda — èn tapoe a gron foe den profétitori di Daniël ben taki a fesi bifo a fesa foe Belsazar pe a ben afrontoe Gado ini 539 bifo G.T., a waktiman ben kan tjari kon a krin soifri san na kon foe den wagi di no ben de foe Babylon èn di sondro sani kan tapoe den, ben wani taki. „Dan” Jesaja 21:9b e taki, „a bari èn taki: ’A fadon, èn ala popki foe den gado foe en di ben meki nanga anoe ben trowe a gron!’”
20. Foe sanede a no den katibo djoe ben de den sma di ben broko den popki di ben meki nanga anoe, ma soema e broko den?
20 A Sma di den e taki dja e broko popki, de Jehovah Gado, a wan enkri libi nanga troe Gado, a djaroesoe Gado ofoe a „Gado di e aksi foe aanbegi en wawan” (Ex. 20:5). Foedi Jehovah gi pasi dati den Média- nanga Persiasma ben wini Babylon èn den sma disi no ben aanbegi den gado foe Babylon, dan Jehovah tjari a falsifasi foe den afkodré gado foe a di foe Dri Grontapoemakti kon a krin — dati den no de. Den katibo djoe ini Babylon no ben de den sma di opo meki oproeroe nanga a di foe Dri grontapoe-makti èn ben trowe en na gron; a Gado foe den Jehovah no ben gi den a makti dati ofoe ben gi den a wroko dati. A presi foe dati a ben gebroiki Darius a Médiasma nanga Cyrus a Persiasma foe meki a fadon foe a afkodré Babylon leki Grontapoemakti kon. (Dan. 2:32, 36-38). A „waktiman” no ben meki soboen a fadon kon foe a „toriman”, Babylon. A ben gi soso kotoigi foe a fadon foe en, foe Jehovah kisi reti leki a Gado foe profétitori èn leki a Soeverein Masra.
21. Sortoe sani moe meki ete bekenti èn di e akroederi nanga san a waktiman foe Jesaja profétitori ben meki bekenti?
21 Akroederi san ben taki a fesi dan ini wi ten wan sani ben sa bekenti di ben de prenspari gi a heri universum èn di e akroederi nanga san a „waktiman” foe Jesaja profétitori ben bari taki. A kristen apostel Johannes, di ben libi te na a kaba foe a fosi eeuw, ben abi wan visioen foe a sma di ben meki a sani bekenti èn a ben skrifi: „Mi si wan tra engel, saka komoto foe hemel, nanga bigi makti èn a grontapoe ben kon krin nanga a glori foe en. Èn a ben bari nanga wan tranga sten, taki: ’A fadon! A bigi Babylon fadon, èn a kon tron wan tanpresi foe demoon èn wan kibripresi foe ibri doti sani èn wan kibripresi foe ibri doti fowroe!’” — Openb. 18:1, 2.
22. Soema sa meki a Bigi Babylon tron wan presi di légi pe no wan sma de a ini, èn sortoe wrokosani a sa gebroiki foe doe dati?
22 A moro Bigi Cyrus, a glori Jezus Kristus, de a Sma di o meki a letterlijk fadon foe a Bigi Babylon di e kon, sa kon, sodati a sa tron wan presi di de légi èn di no wan sma wani go na ini. Den kristen kotoigi foe Jehovah kan préki ini a ten disi so foeroe leki den kan foe Jehovah kownoekondre nanga a dé foe en wraak, ma ala disi noiti sa meki a fadon-panja foe a grontapoe-rigeri foe falsi religie doe kon. Den e wakti fajafaja a ten te den kan meki bekenti dati a Bigi Babylon fadon (Openb. 18:2). Foedi a Moro Bigi Cyrus no sa gebroiki en vrédefasi discipel na grontapoe foe trowe a Bigi Babylon na gron, dat mek kapitel 17 foe Openbaring e sori dati a sa gebroiki wan wrokosani di gersi wan meti; a de gersi wan redi wilder meti nanga 10 toetoe. Den 7 ede foe en e agersi den 7 grontapoe-makti foe na bijbel historia. Baka a Fosi Grontapoefeti, èn dati ben de ini a ten di a Volkoebontoe ben opo, dan a internationaal hoeroe-oema, na Bigi Babylon ben go rij tapoe a twintigste eeuw agersi meti disi.
23. Den fositen bakaman foe a agersi meti sa drai go feti nanga ala krakti nanga soema, èn san a Moro Bigi Cyrus sa doe?
23 Te leki a dé foe tide a Bigi Babylon de a sma di e rij a Verenigde Naties, di waka baka a Volkoebontoe. Ma a no sa de langa moro of den politiek bakaman foe a Verenigde Naties sa kon weri dati a grontapoe-rigeri foe falsi religie de a den tapoe èn den sa trowe en foe den baka èn pori en. Moro fara baka te a „waktiman” bari taki „A Bigi Babylon fadon”, dan nanga ala krakti den sa drai kon tapoe den kristen kotoigi foe Jehovah di tan a libi. Dan a momenti doro dati a Moro Bigi Cyrus, Jezus Kristus, a „kownoe foe den kownoe”, e kon a mindri ala toe èn e pori den fositen bakaman foe a VN ini a „feti foe a bigi dé foe Gado na Almaktiwan” na Har-mágeddon. A salfoe „waktiman”-klasse, èn sosrefi toe a „bigi ipi” di ben teki heri boen den bodoi di ben meki bekenti nanga tranga sten foe a mofo foe wan groepoe sma di de leki wan „waktiman”, sa pasa libi libi a laatste feti ondro a kibri foe Gado, meki Jehovah kon kisi reti leki Soeverein foe a heri hemel nanga grontapoe.
24. Fa a owroe Israël ben de wan „manpikin” foe Jehovah masigron, èn a srefi „masi” disi foe soema wan kaba sa kon na en ini disi ten èn fa?
24 Foedi den djoe katiboman ben tan 70 jari langa ini a owroe Babylon, a ben gersi leki den ben „masi” nanga jepi foe tranga leri. Na agersifasi den ben de a „manpikin” foe a gron foe Jehovah foe masi alési. Baka te Babylon ben fadon, dan a tranga leri „masi” dati ben sa kon a wan kaba. Ini Jesaja 21:10 wi prakseri e poti tapoe dati tapoe wan sari-ati èn trowstoe-fasi: „O mi pipel di den e masi (sjoeroe) èn mi manpikin foe mi gron pe alési e sjoeroe, san mi ben jere foe Jehovah foe den fetiman, a Gado foe lsraël mi ben ferteri oenoe.” A tapoe a srefi fasi a Bigi Babylon kisi pasi foe „masi” Jehovah getrouw kotoigi. Ma baka te a fadon dan a „masi” foe en sa stop. Den fosten politiek fréri foe en sa proberi foe go doro nanga a „masi”. Leki wan paiman den sa masi tapoe Jehovah masigron te leki den pori. — Openb. 14:14, 15; Joël 3:13-16; Micha 4:12, 13.
25. Te wi e loekoe a kon moro krosibé foe a fadon foe a Bigi Babylon, foe sanede a de gi a pipel foe Jehovah moro leki iniwan ten a fesi foe meki sma jere en komando, èn nanga sortoe sani a prakseri?
25 Te wi e loekoe fa a fadon foe a Bigi Babylon e kon moro krosibé, dan a de moro leki iniwan ten gi a „waktiman-”-klasse nanga a „bigi ipi” foe meki sma jere now a komando foe Gado: „Komoto foe en, mi pipel, efoe joe no wani teki prati ini en sondoe, èn efoe joe no wani kisi afoe foe en tanteri” (Openb. 18:4). Ja, „Komoto foe en” no foe go moksi joesrefi na en politiek fréri ofoe den anti-Gado krakti foe disi grontapoe di no e bribi ini Gado, ma foe tron wan pisi foe „mi pipel”, a pipel foe Jehovah di gi ensrefi abra na en (Jer. 51:45). Handri now akroederi Jesaja „wortoe di taki gi a sabana foe a se”. — Jes. 21:1-10.
26. Foe sortoe sani, wi moe taki „Jehovah foe den fetiman” tangi, èn sortoe blesi howpoe den sma abi di e poti prakseri tapoe a boskopoe?
26 Ala tangi e go foe datede a „Jehovah foe den fetiman, a Gado foe Israël”, di ben meki wan „waktiman”-klasse ben gebore njoen èn poti na en presi èn di ben kisi so wan wondroe boskopoe foe meki bekenti na ala presi! Ala sma di e poti prakseri tapoe a boskopoe di komoto foe Gado, abi a blesi howpoe foe pasa libi-libi a kefarlek „neti” di e kon tapoe a grontapoe disi èn foe bari odi gi a glori „mamanten” foe a regtvaardiki njoen seti foe sani ondro a tiri foe a Moro Bigi Cyrus, Jezus Kristus, a Verloesoeman. Disi sa de leki wan prijse nanga prisiri gi „Jehovah foe den fetiman”, wi Soeverein Masra.