A „toemsi boen herder” nanga a „pikin ipi”
„No frede, pikin ipi, bikasi oen Tata ben feni en boen foe gi oenoe a kownoekondre.” — Lukas 12:32.
1. Nanga san a psalmsingiman David nanga a proféti Jesaja e gersi Jehovah leki wan sorgoeman?
A WANTEN herderboi foe Bethlehem, kownoe David, ben bigin wan foe den psalm foe en nanga den wortoe: „Jehovah na mi Herder. Noti sa mankeri mi” (Ps. 23:1). Wan kompe-bijbel-skrifiman, na proféti Jesaja, gersi Jehovah toe nanga wan herder te a de taki: „Leki wan herder a sa loekoe en skapoe. Nanga en anoe a sa tjari den pikin skapoe konmakandra” (Jes. 40:11). Ma Jehovah abi sosrefi toe wan ondro-herder. A de kari en a wan joisti fasi „David, mi knegti”.
2. (a) Soema de na David di a profétitori foe Ezechiël 37:24 e sori a tapoe? (b) Fa Jezus ben sori a kon troe foe a profétitori foe Zacharia 13:7 èn foe sanede?
2 Hondro hondro jari baka di David dede, Jehovah ben meki wan tra bijbel-skrifiman, Ezechiël, taki a fesi ondro krakti foe en santa jeje: „Èn mi knegti David sa de kownoe foe den . . . èn wán herder den alamala sa kisi . . . èn David, mi knegti, sa de edeman foe den te ten di no abi marki” (Ezech. 37:24, 25). A proféti-tori dati moesoe foe sori tapoe Jehovah ondro-herder, a Moro Bigi David, Jezus Kristus. Di den ben tori Jezus Kristus na a neti foe 14 Nisan 33 G.T. èn den ben kisi en èn a ben tanapoe a fesi en feanti, dan a profétitori foe Zacharia 13:7 ben kon troe: „’O feti-owroe, wiki kon tégen mi herder, ja, tégen a tranga man a skinfasi, di de mi kompe’, so Jehovah foe den fetiman e taki. ’Naki a herder, èn meki den skapoe foe en ipi panja.’” Jezus Kristus srefi ben tjari a profétitori disi kon tapoe en tapoe a fasi disi. — Matt. 26:31; Mark. 14:27.
3, 4. (a) Foe sanede meki den djoe di ben stré nanga en foe a dresi foe a man di ben gebore breni, no ben kon fri foe den sondoe? (b) Foe sanede a no ben teki den djoe di ben stré bakaten nanga en leki en „skapoe” ini a winter, di a wijefesa foe a tempel ben hori?
3 Jezus Kristus foe datede ben de ini orde èn no ben teki wan positie di no ben de foe en, di a gersi ensrefi nanga wan herder èn a ben kari ensrefi „a toemsi boen herder” (Joh. 10:6, 11, 14). Disi ben pasa ini a tori foe wan wondroefasi dresi foe wan man di ben gebore breni. Den sma a mindri en égi pipel di no e bribi ben stré nanga en foe disi èn ben aksi: „Sonte wi breni toe”? San ben kon tapoe a tjalansi aksi disi? „Jezus ben taki gi den: ’Efoe oenoe ben breni, dan oenoe no ben sa abi sondoe. Ma now oenoe e taki: „Wi e si.” Oen sondoe e tan”’ (Joh. 9:40, 41). Wan pisi ten a baka, ini a ten foe a wijefesa foe a tempel foe Jeruzalem, ini a winterten (december) foe 32 G.T., Jezus ben taki gi seker djoe di no ben bribi èn di ben lontoe en:
4 „Den wroko di mi e doe ini a nen foe mi Tata, den dati e kotoigi foe mi. Ma oenoe no e bribi, foedi oenoe no de foe mi skapoe. Mi skapoe e jere mi sten, èn mi sabi den èn den e waka na mi baka. Èn mi e gi den tego libi, èn seker den no sa kisi pori noiti èn no wan sma sa hari den poeroe foe mi anoe. San mi Tata ben gi mi, de moro bigi moro ala tra sani, èn no wan sma kan hari den poeroe foe a anoe foe mi Tata. Mi nanga a Tata de wan.” — Joh. 10:19-30.
5. Nanga sortoe sma Jezus ben gersi ini Johannes 10:1-5 a sma di ben sa waka na en fesi èn di ben sa pristeri en na Israël?
5 Den sma dati di no ben bribi no ben trowe wawan a kotoigi foe den wroko foe Jezus foe sortoe sma a de, ma den ben trowe sosrefi toe a kotoigi foe a sma di waka na Jezus fesi, a man di ben pristeri Jezus leki a Messias, na Kristus, a den Israëlsma. Jezus ben ferteri dati a troe herder ben abi so wan marki ofoe so sortoe bewijsi foe sabi fanowdoe di a ben taki: „Foetroe, foetroe, mi e taigi oen: A soema di no e pasa a doro foe a skapoe-koi go na ini, ma na wan tra presi e kren go na tapoe, a sma dati de wan foefoeroeman èn wan rover. Ma a sma di e pasa a doro go na inisé, de a herder foe den skapoe. Gi en a doro-waktiman e opo doro, èn den skapoe e jere en sten, èn a de kari en égi skapoe na den nen èn a de tjari den go a dorosé. Te a tjari alamala di de foe en go a dorosé, dan a de go waka a den fesi, èn den skapoe e waka na en baka, foedi den sabi, en sten. Wan vreemde sma den no sa waka kwetkweti na en baka, ma den sa lon gwe foe en, foedi den no sabi a sten foe vreemde sma.” — Joh. 10:1-5.
„A SKAPOE-KOI” NANGA „A DOROWAKTIMAN”
6. Foe sanede na agersi „skapoekoi” pe a „dorowaktiman” ben tjari en go na ini, no abi foe doe nanga a Wetverbontoe?
6 We now, san a „skapoekoi” nanga a „dorowaktiman” wani taki, foedi Jezus ben tron wan temreman ini Nazareth èn noiti ben de wan herder foe letterlijk skapoe? Na a fosi presi wi kan taki dati a „skapoekoi” no de wan agersifasi foe a Wetverbontoe di Jehovah ben poti nanga a naatsi Israël nanga jepi foe Mozes leki mindriman. A no ben de fanowdoe dati wan djoe „dorowaktiman” ben tjari Jezus kon ini a Wetverbontoe. Jezus ben gebore ini a verbontoe dati. Galaten 4:4, 5 e taki: „Ma di a joisti ten ben doro, dan Gado ben seni en Manpikin go na doro, di ben gebore foe wan oema èn di ben kon tanapoe ondro a wet foe bai den sma di ben kon tanapoe ondro a wet kon fri.” Jezus ben dede foe bai den fri.
7. (a) Tapoe sortoe dé ini 33 G.T. Jehovah ben meki wan kaba kon na a Wetverbontoe nanga Israël, èn foe sanede? (b) Foe sanede foe sensi Pinksteren ini 33 G.T. wan Wetverbontoe no ben de moro, pe Jezus ben sa kan tjari den djoe komoto na ini?
7 Dati Jezus ben kan pristeri a verloesoepaiman a Gado, a ben opobaka toe dede tapoe a di foe dri dé baka di a ben dede ini 33 G.T. Na a di foe 40 dé, bigin foe teri foe en opobaka, Jezus ben opo go baka na hemel. Tin dé baka dati, a bakajarifesa Pinksteren ben kon, èn dati ben de tapoe 6 Sivan 33 G.T. Na a dé dati Gado ben gebroiki en foe kanti santa jeje trowe tapoe en discipel di ben e wakti ini Jeruzalem. Disi ben wani taki dati a ben sori ensrefi na fesi foe Gado foe pristeri a waarde foe en volmaakti libisma slagti-ofrandi foe bai ala sma fri di ben seri ondro sondoe, sosrefi den djoe toe. Akroederi nanga disi, meki Jehovah Gado ben tjari wan kaba kon na a Wetverbontoe èn poti ini a presi foe en a njoen verbontoe di ben pramisi èn di a no ben sroto nanga djoe ma nanga den discipel foe a Mindriman Jezus Kristus di ben gebore njoen nanga santa jeje (Kol. 2:13, 14). No wan djoe Wetverbontoe ben de Moro, pe a Herder Jezus ben sa kan tjari den djoe go na ini.
8. (a) San a „skapoekoi” e agersi foe datede? (b) Pe den bakaten-pikin foe Abraham na skinfasi ben loekoe soboen foe kon?
8 Ini a leti foe san taki dja a fesi, na aksi di e kon e pristeri ensrefi nanga moro krakti na wi: San a „skapoe-koi” di Jezus ben kari ini Johannes 10:1 e agersi troetroe? A de krin dati a de agersi wan sani di ben de kaba èn di ben de moro bigi èn di ben sa tan moro langa leki a Wetverbontoe di ben sroto ini 1513 bifo G.T. Wi e taki foe a verbontoe nanga Abraham. Di a famiri-edeman Abraham ini 1943 bifo G.T. ben koti abra a liba Eufraat èn ben go ini a pramisi Kondre dan Gado pramisi di ben gi na en nanga en bakaten-pikin ben kon troe: „Mi sa blesi troetroe a soema di e blesi joe, èn a soema di e begi ogri gi joe, mi sa froekoe, èn ala famiri foe a grontapoe foe troe sa blesi densrefi nanga jepi foe joe” (Gen. 2:3). Di jari a baka Abraham ben sori dati a ben de klari foe offer en manpikin Isaäk, dan Gado ben poti den wortoe disi na en pramisi: „Èn nanga jepi foe joe siri ala naatsi sa blesi densrefi foetroe, foedi joe ben jere mi sten” (Gen. 22:17, 18). Foe sensi a ten dati, den bakaten-pikin foe Abraham ben bigin foe loekoe na a kon foe a „siri” dati. A „skapoekoi” ben agersi foe datede a verbontoe nanga Abraham. Den sma di ben de gersi skapoe èn ben de na ini, ben agersi den sma di ben wakti tapoe a kon foe a pramisi „siri”.
9. Soema a „dorowaktiman” no ben sa gi pasi foe go ini a „skapoekoi”?
9 Efoe den sma di ben gersi skapoe ben kisi sabi ofoe no ben kisi sabi a fesi foe a „siri”, wan sani de so dati den ben sa bari odi gi en te den ben sa kon sabi foe en èn a „siri” disi ben sa pristeri na den. Iniwan sma di ben proberi nanga bidrigi sani foe tron masra foe den „skapoe”, foe kan soigi den, ben sa de „wan foefoeroeman èn wan rover”. A dorowaktiman foe a skapoe-koi no ben sa tjari so wan falsi Kristus ofoe Messias kon na inisé. A sma di ben sa waka pasa a „dorowaktiman” dati go ini a doro na ini, ben sa de a troe „herder” a „siri” foe Abraham.
10. Soema ben de a „dorowaktiman” dati, èn akroederi nanga sortoe profétitori?
10 Ma soema ben de a „dorowaktiman”? A ben de Johannes a Dopoeman, wan man di ben de foe a priester famiri foe a lo foe Levi. Gado ben pramisi dati bifo a pramisi „siri” foe Abraham ben sa kon, a ben sa seni fosi wan soema di ben waka a fesi. Disi ben taki a fesi ini Maleachi 3:1: „’Loekoe! Mi e seni mi boskopoeman, èn a moe wai wan pasi opo na mi fesi. Èn wantronwantron sa kon na en tempel a troe Masra, di oenoe e soekoe, èn a boskopoeman foe a verbontoe, di oenoe abi prisiri ini en. Loekoe! A sa kon troetroe’, Jehovah foe den legre taki” (Mark. 1:1-11). Johannes foe datede ben loekoe na kon foe a pramisi „siri foe Abraham” èn akroederi nanga disi a ben de wan sma sosrefi toe di ben gersi wan skapoe leki den sma di ben de ini a Verbontoe nanga Abraham. Baka di Johannes ben doe en wroko wan jari ofoe moro langa, den ben kiri en. A ben dede bifo Pinksteren foe a jari 33 G.T. èn a no ben teki poti ini „a pikin ipi” salfoe erfgenaam foe a hemel kownoekondre. — Matt. 11:11-14; 14:1-12; Luk. 12:32; Gal. 3:16.
11. (a) Fa Jezus ben sori dat Johannes a Dopoeman ben sa waka na en fesi? (b) Foe sortoe verbontoe Jezus ben de a „boskopoeman” di a ben go makandra nanga a Masra Jehovah na a tempel?
11 Di Jezus ben taki sortoe pisi Johannes a Dopoeman abi ini a doe foe a prakseri foe Jehovah, a ben taki gi den djoe: „En de a sma di boekoe skrifi foe en: ’Loekoe! Mi srefi e seni mi boskopoeman go na joe fesi, di sa sreka joe pasi a joe fesi’” (Matt. 11:10). A so fasi Jezus ben tjari a profétitori foe Maleachi 3:1 kon tapoe Johannes a Dopoeman leki a sma di ben seni a fesi Jehovah nanga en „boskopoeman foe a verbontoe”. Jezus Kristus, di e go makandra nanga Jehovah te a de kon foe ondrosoekoe a tempel, no de a boskopoeman foe a Wetverbontoe, ma foe a Verbontoe nanga Abraham. Den sma di ben de ini a Verbontoe foe Abraham èn di ben poti bribi ini Jehovah profétitori, ben loekoe na a kon foe a Messiaans „boskopoeman” disi.
12. Fa Johannes ben leri sabi a moro prenspari memre foe a „siri foe Abraham”, soleki ensrefi ben taki?
12 Johannes a Dopoeman ben taki foe a moro prenspari èn fosi memre foe a „siri foe Abraham”: „Mi ben si a jeje leki wan doifi saka komoto foe hemel, èn a tan tapoe en. Misrefi no ben sabi en, ma a Sma di ben seni mi foe dopoe ini watra, ben taigi mi: ’A Sma di joe e si a jeje e saka go tapoe en èn a de tan tapoe en, en de a sma di e dopoe ini santa jeje.’ Èn mi ben si en, èn mi ben kotoigi dati disi de a Manpikin foe Gado.” — Joh. 1:31-34.
13. (a) Oten Johannes a Dopoeman ben opo a „doro” gi a troe Herder? (b) Tapoe sortoe ’siri foe Abraham’ Johannes ben sori na a ten dati?
13 Jezus ben pasa a „doro” go inisé a skapoekoi èn no na wan boropasi. Di a ben abi 30 jari a ben go na Johannes a Dopoeman foe ben kisi dopoe ini watra. Baka di a ben tan 40 dé ini a Sabana, pe a ben kisi tesi, a ben drai go baka nanga foeroe froetrow na a presi pe Johannes a Dopoeman ben de nanga wan toe foe en discipel. Di Jezus ben waka go miti na agersi „dorowakti-man” foe a skapoekoi foe a Verbontoe foe Abraham, dan Johannes ben si en e kon èn a ben bari tranga: „Loekoe, a Lam foe Gado, di e tjari a sondoe foe a grontapoe gowe!” (Joh. 1:29, 36) No a Lam di e tjari a sondoe foe a naatsi Israël gowe, ma „a Lam foe Gado di e tjari a sondoe foe a grontapoe gowe”. A so fasi Johannes a Dopoeman ben opo na agersi „doro” gi a troe Herder, di ben abi da fanowdoe marki ofoe bewijsi foe a Universele Herder, Jehovah Gado. Di Johannes ben poti a prakseri foe en discipel tapoe Jezus di ben e kon krosibé, a no ben sori soso tapoe wan djoe di ben besnij èn tapoe wan bakatenpikin foe a grontapoe Abraham na skinfasi. Nono, a ben sori tapoe a Salfoewan, a bakatenpikin, di ben gebore njoen nanga santa jeje foe a Moro Bigi Abraham, Jehovah Gado. A ben de a moro prenspari ofoe fosi memre foe a „siri” dati foe a Hemel Abraham, di nanga jepi foe en ala famiri foe a grontapoe sa blesi densrefi.
14. (a) Jezus ben soekoe soso djoe a skinfasi nanga tra sma di a ben kon na a „skapoekoi”? (b) Fa wan herder foe a Midden-Oosten ben kan kari wan aparti skapoe kon na en?
14 Foe datede meki a ben verdini en dati a „dorowaktiman” ben gi en pasi foe go ini na agersi „Skapoekoi”, na Verbontoe foe Abraham. A ben de a troe herder, èn a no ben kon foe soekoe djoe ofoe tra sma in het algemeen, ma den sma di ben sa doe wan sani nanga a okasi foe de makandra nanga en wan pisi foe a samengestelde „Siri foe Abraham” di nanga jepi foe en ala naatsi ben sa blesi densrefi. A moro bigi pisi foe den djoe a skinfasi ben trowe en, ma wan fikapisi foe djoe na skinfasi ben teki en wel. Den disi ben de den „skapoe” di ben jere en sten. Soboen. di a ben kari en „égi skapoe” na den nen, den ben doe wan sani, èn dan a ben tjari den go na wégron. Na a Midden-Oosten a ben de wan gwenti dati wan herder ben gi ibri wan foe en skapoe wan nen.
15. (a) Fa wan herder ben kan kari a heri ipi kon wantron na en, èn foe sainde den no ben sa meki den kori den foe waka baka „vreemde sma”? (b) Gi soema ini a ten disi, dati de wan boen eksempre foe waka na en baka?
15 Ma efoe wan herder ben wani kari na heri ipi wantron kon na en, dan a ben gebroiki wan algemene kari, foe eksempre wan babari leki Dr-r-r-r-rt tapoe wan bepaalde toonhoogte, èn nanga wan sten di tra herder no kan meki. „Te a tjari alamala di de foe en go a dorosé, dan a de go waka a den fesi, èn den skapoe e waka na en baka”, foedi den sabi na aparti fasi foe en sten. A jesi foe den srapoe nofo foe sabi soema de „vreemde sma” èn proberi foe meki a sten. Den no sa meki den kori den foe waka baka den sortoe falsi èn kande „vreemde sma” di abi ogri ini prakseri. Disi de wan boen eksempre gi den wan di gersi skapoe foe a „pikin ipi” foe waka soifri na en baka, èn di a Moro Bigi Abraham abi prisiri foe gi den a Kownoekondre.
16. Foe sanede den djoe no ben froestan san na agersitori di Jezus ben taki foe a herder nanga en ipi?
16 Wi e froestan ini disiten san den sani di Jezus ben taki drape wani taki? Den djoe di no ben bribi èn di ben de ini a seti foe a Wetverbontoe, no ben froestan fa na agersi di Jezus ben meki, ben fiti. A tori e taki namkoe: „Na agersitori disi Jezus ben taki nanga den; ma den no ben sabi san den sani di a ben taki nanga den ben wani taki” (Joh. 10:6). Den no ben sabi a sten foe a Messiaans Herder, èn en no ben sabi den na den égi nen. A brenifasi di den srefi ben meki kon, ben tapoe den foe kon sabi en. Meki wi no de leki den ini disi ten.
„A DORO FOE DEN SKAPOE”
17. Nanga sortoe tra pisi foe wan skapoekoi Jezus ben agersi ensrefi leki fa Johannes 10:7-10 e taki?
17 Di Jezus doro a punt disi dan a ben kenki en agersitori foe agersi wan tra toemsi prenspari afersi: „Foe datede Jezus ben taki moro fara: ’Foetroe, foetroe, mi e taigi oen: Mi de a doro foe den skapoe. Ala sma di ben kon ini a presi foe mi, de foefoeroeman nanga rover; ma den skapoe no ben arki den. Mi de a doro; ala sma di e pasa mi go na inisé, sa kisi verloesoe, èn a sa go na inisé èn kon a dorosé èn feni wé. A foefoeroeman e kon soso foe foefoeroe èn foe slagti èn foe pori. Mi ben kon, sodati den ben sa abi libi èn ben sa abi en pasa marki.’” — Joh. 10:7-10.
18. (a) Soema a grontapoe e proeberi foe teki presi leki dorowaktiman foe Jezus, na agersi „doro”? (b) Foe sortoe klasse Jezus ben taki leki wan marki foe a „bosroiti foe sani”, èn a klasse disi e doe wroko leki dorowaktiman gi Jezus leki a „doro”?
18 Meki wi froestan boen dati Jezus no e taki foe wan „dorowaktiman” te a de taki foe ensrefi. A no de taki foe wan sokari „Sma di e teki presi foe Kristus”, na wan ofoe tra kerki edeman di e taki dati a no e meki fowtoe. Jezus ben taki: „Mi de a doro foe den skapoe.” Èn wan toe moen a baka a ben taki moro fara: „Mi de a pasi èn na waarheid èn a libi. Nowan sma no e kon na a Tata dan nanga jepi foe mi” (Joh. 14:6). Nanga disi wi no e poti a wan sé dati di Jezus ben taki foe en uitgebreide profétitori foe „a marki foe en de-noja èn foe a foe a bosroiti foe a seti foe sani”, a ben taki foe troe a fesi foe wan „getrouw nanga koni srafoe” di en masra ben „poti tapoe ala en goedoe” (Matt. 24:3, 45-47). Disi abi foe doe nanga wan srafoe-klasse foe en getrouw nanga koni foetoeboi, di a ben gi a loekoe tapoe ala en goedoe tapoe grontapoe, spesroetoe ini a ten disi foe „a bosroiti foe a seti foe sani”. A wroko disi no e meki a „srafoe”-klasse dati de Jezus „dorowaktiman”.
19. O bigi a ipi de di de ini a skapoekoi foe a Verbontoe-seti foe Abraham, èn nanga jepi foe sortoe pasi den e kisi verloesoe?
19 Jezus de na agersi „doro” foe den foetoeboi foe en di gersi skapoe èn di e tron makandra nanga en wan pisi foe a „siri foe Abraham”. Den de soboen ini a „skapoekoi” foe a Verbontoe-seti foe Abraham. Alamala makandra de soso wan „pikin ipi”, soso 144000 ondro en leki den herder. Den de leki den twarfoe lo foe a jeje Israël èn den e tanapoe nanga Jezus Kristus, „a Lam foe Gado” tapoe a jeje bergi Sion (Luk. 12:32; Openb. 7:1-8; 14:1-5). Den no e taki tangi foe a verloesoe foe den foe go na hemel na wan ofoe tra Sma di e hori presi gi Kristus, ma na a sma di de „a doro foe den skapoe”. Jezus ben taki namkoe: „Ala sma di e pasa mi go na inisé, sa kisi verloesoe, èn a sa go na inisé èn kon a dorosé èn feni wé” (Joh. 10:9). Te na apostel Paulus ini nen foe a „pikin ipi” e taki foe a hemel howpoe, dan a de poti prakseri tapoe „wi Masra Jezus Kristus, di nanga jepi foe en wi ben kisi pasi foe go na a no-verdini boen-ati disi pe wi de na ini nanga jepi foe bribi èn meki wi prisiri tapoe a gron foe howpoe tapoe a glori foe Gado.” — Rom. 5:1, 2; Ef. 2:18; 3:12.
20. Fa Jehovah ondroherder de tra fasi leki den „falsi kristus nanga falsi proféti” èn den sma di ben kon „ini a presi foe en”?
20 Ini en profétitori foe a „bosroiti foe a seti foe sani” Jezus ben taki a fesi dati toemsi bidrigi „falsi kristus nanga falsi proféti” ben sa opo. Den disi ben kon „ini a presi foe” a troe Kristus èn den sma di den sortoe bidrigi-man ben kori waka na den baka, den ben foefoeroe na kerki-fasi èn den slagti den èn bro-ko den te na gron na jeje èn na letterlijk fasi (Matt. 24:3, 24, 25; Joh. 10:8, 10). Jezus na a tra sé ben kon leki wan jepiman foe libismalibi èn foe sorgoe dati libisma ben sa prisiri ini wan libi di den abi now pasa marki, wan libi ini tego volmaaktfasi èn inisé den seti foe veiligheid di a Bigi Herder foe alasma, Jehovah Gado ben seti. Te wi wani kisi datede tego libi foe Gado leki skapoe, dan wi moe waka baka en ondroherder, Jezus Kristus, di offer ensrefi.