Abi froetrow ini wan grontapoe di e degedege ini bribi
„Blesi foe a tranga man di froetrow tapoe Jehovah, èn di en froetrow, kon de Jehovah.” — Bijbel
’Wan makriki nanga toemsi moi degedege ini bribi (scepticisme) de a fasi di den e froewakti foe wan bigisma di kisi leri.’ — Grontapoe filosofie.
1, 2. Sortoe fasi bepaalde Grikisma ben abi, èn san na hé wetenschap (sabi) foe a grontapoe disi ben tjari kon?
„SAN na waarheid?” A piki dati di Pontius Pilatus ben gi na Jezus Kristus de wan marki foe foeroe soema di e degedege ini bribi (Joh. 18:38). Foe den owroeten Griki sceptici (sma di e degedege ini bribi) den ben taki, dati „den ben proberi foe abi wan korostoe firi, di den ben kan kisi te alaten den de bézig foe wegi kontra argument èn a so fasi tjari ala sani kon ini wan toestand foe onsekerfasi nanga degedege”.
2 Moro krosbé na a ten foe wi, den filosoof leki a Fransman René Descartes, a Hollander Spinoza, na Schot David Hume nanga a Doisri filosoof Kant ben tjari wan pikinso drai kon ini a fasi disi foe scepticisme (degedege ini bribi). Nanga a wroko foe den man disi nanga foeroe trawan, dan methodische degedege tron wan artikel foe bribi foe moro hé leri. Universiteiten (héskoro) ini ala kondre na so fasi ben meki wan geslacht foe sma di e degedege ini bribi doe kon, di „ala sani de betrekkelijk gi den”.
3. (a) San de wan foe den takroe bakapisi foe methodische degedege ini bribi? (b) Sortoe moro betre fasi a bijbel e gi dekati foe dati?
3 Foe a takroe bakapisi foe so wan methodische onsekerfasi wan sabiman e taki: Wan „bakapisi foe relativisme nanga scepticisme ini wi disiten eeuw de wan mankeri foe respeki gi na waarheid”. A de go moro fara foe taki:
Respeki gi a waarheid no de soso a pseudo-cynisme foe wi disiten eeuw, di e proeberi foe „tjari ala sani kon na krin”, nanga na prakseri dati no wan sma èn noti kan taki dati a abi a waarheid. A de a fasi pe prisiri froetrow, dati a waarheid de foe feni e go makandra nanga sakafasi na a waarheid oten èn pe a de kon na fesi. So wan opo joesrefi gi na waarheid de wan marki gi den sma di e aanbegi a Gado foe waarheid . . . Disi de a fasi di a (owroe Testament) èn a (Njoen Testament) e kotoigi foe en. — „New International Dictionary of New Testament Theology”, 1978, Deel 3 blz. 900, 901.
Prisiri froetrow ini a waarheid
4, 5. (a) Fa den Santa Boekoe e gi froetrow èn no degedege ini bribi? (b) Sortoe moro boen fasi a bijbel e gi wi tranga foe en?
4 Ja, a heri bijbel no e meki en lésiman degedege, ma e gi den froetrow. A so wi e lési ini den Hebrew Santa Boekoe: „Blesi foe a tranga man, di froetrow tapoe Jehovah, èn di en froetrow kon de foe Jehovah” (Jer. 17:7). Èn ini den kristen Griki Santa Boekoe Paulus e skrifi: „Mi no lasi a froetrow, bikasi mi sabi tapoe soema mi ben poti mi froetrow, èn mi no e degedege kwet-kweti, dati en abi makti foe kibri ala sani di mi ben libi abra na en, te leki a dé dati.” Ini disi scepticisme (degedege ini bribi) no de kwet-kweti! — 2 Tim. 1:12, The Jeruzalem Bible.
5 Baka di Paulus ben sori en froetrow krinkrin ini Gado a de go doro foe taki: „Tan hori na a patron foe gosontoe wortoe, di oenoe ben jere foe mi, nanga na bribi èn lobi di de akroederi nanga Kristus” (2 Tim. 1:13). Te wi opo wisrefi gi den „gosontoe wortoe” di de foe feni ini a bijbel, dan wi bribi nanga wi lobi sa gro, èn wi sa kan poti prisiri froetrow ini a troefasi foe ala den diri pramisi di Jehovah ben gi. Nanga disi wi e kisi moro fara howpoe, di „de wan ankra foe na sili, di de seker èn faste”. — Hebr. 6:17-19.
6. San wisrefi abi fanowdoe foe préki a „boen njoensoe” gi trawan?
6 A de a prisiri froetrow disi ini a waarheid di e meki wi hari go foe préki a boen njoensoe foe Gado kownoekondre leki a wan enkri howpoe gi libisma. Wan sma moe abi a overtoigi dorodoro foe a troefasi foe a boskopoe foe howpoe foe kan meki disi bekenti na tra sma. Foe datede, wi kan taki gi den sma di e arki na wi: „A boen njoensoe di wi e préki, no kon wawan na oenoe nanga wortoe, ma sosrefi toe nanga krakti èn nanga santa jeje èn tranga overtoigi.” „Di oenoe ben kisi a Wortoe foe Gado, di oenoe ben jere foe wi, oenoe no ben teki en leki a wortoe foe libisma, ma, san a ben de troetroe toe, leki a wortoe foe Gado.” — 1 Thess. 1:5; 2:13.
7, 8. Soema ben jepi den brada nanga sisa ini a fosi kristen gemeente foe poeroe degedege ini bribi poti a wan sé?
7 Ini den fositen kristen gemeente den getrouw opziener ben jepi den kompekristen brada foe poeroe ala degedege ini bribi poti a wan sé èn foe de standvastig ini a bribi. Nanga a jepi foe a santa jeje, na tiri-skin foe a fosi eeuw foe apostel nanga owroeman foe a gemeente Jeruzalem ben teki bosroiti, ben gi komando èn ben seni getrouw man foe bow den brada nanga sisa. Ini a bijbel boekoe Tori foe den Apostel wi e lési: „Aladi (Paulus, Silas nanga den mati foe den) ben waka pasa den foto, den ben tjari gi den drape den wet di den apostel nanga owroeman ini Jeruzalem ben teki a bosroiti foe den. Ja, foe datede meki den gemeente ben kon moro faste ini bribi alaten, èn dé foe dé moro sma ben kon ini den alaten.” — Tori foe den Apostel 16:4, 5; 15:23-29.
8 Ini en brifi gi a gemeente Korinte, Paulus e taki foe a getrouw kristen Epafras, „di e span ensrefi alaten ini en begi foe a boen foe oenoe, sodati te foe kaba oenoe kan tanapoe volmaakti èn nanga wan faste overtoigi ini a heri wani foe Gado” (Kol. 4:12). Srefi ini a ten dati nowan scepticisme nanga degedege ini bribi ben kan de. Den fositen kristen dati ben moesoe kon „de faste ini a bribi èn abi wan faste overtoigi”.
Wini degedege ini bribi
9. Foe sanede spesroetoe ini disi ten a de prenspari gi kristen foe abi froetrow?
9 A de gi wan kristen ini wi ten sonten no so prenspari foe abi froetrow, now di wi e libi ini wan grontapoe, foe taki leki fa a lngrisi filosoof Bertrand Russell ben taki en, ’wan makriki nanga toemsi moi degedege ini bribi (scepticisme) de a fasi di den e froewakti foe wan bigisma di kisi leri’? Nono. Te joe loekoe en boen dan a de moro prenspari foe abi wan faste overtoigi, bikasi „a geest di de now e wroko ini den manpikin foe trangajesi” moro leki wan tra ten e gi tranga foe no abi froetrow èn foe degedege ini bribi (Ef. 2:2). Foe datede meki wan kristen di degedege ini bribi e kon tapoe en, moe erken a gevaar èn doe den fanowdoe sani foe „te foe kaba (kan tanapoe volmaakti èn nanga wan faste overtoigi”.
10, 11. (a) Sortoe aksi wi moe aksi wisrefi efoe degedege ini bribi e bigin meki roetoe ini wi froestan? (b) Fa moro leki toe miljoen sma ben sa piki den aksi dati?
10 Efoe oiti feradelek degedege ini bribi e bigin kon na wan kristen, a ben sa boen efoe a wegi a situwasi èn aksi ensrefi wan toe aksi:
Pe mi ben leri dati Gado nen a Jehovah, san a nen wani taki, san Gado lobifasi prakseri de nanga libisma èn foe sanede a ben gi pasi dati pina de so langa a grontapoe? — Ps. 83:18; Openb. 21:3, 4; 2 Petr. 3:9, 13.
Soema ben leri mi taki Jezus no de wan di foe toe pisi foe wan dri-wan-gado, ma dati a de Jehovah wan enkri gebore Manpikin, èn soema ben jepi mi foe froestan krinkrin san a verloesoe foe sondoe nanga jepi foe a verloesoe-ofrandi foe Kristus wani taki? — Joh. 3:16; 14:28; 1 Kor. 15:27, 28.
Sortoe religie ben tjari na aksi kon na krin ini mi froestan soema ofoe san a Santa jeje de, no wan sma, ma Jehovah wroko krakti, èn pe wi ben feni wan groepoe sma di e doe moeiti opregti foe kweki den froktoe foe a jeje? — Tori foe den Apostel 2:33; Gal. 5:22, 23; Kol. 3:12, 14.
Sortoe kerki organisatie jepi mi poeroe foe mi prakseri foe a owroe heiden prakseri dati a libisma sili no e dede, ma foe bewijsi nanga a bijbel dati a sili e dede, sodati a bijbel leri foe wan opobaka troetroe ben kisi waarde èn mi froestan ben kon fri foe a dogma foe hel-faja di e afrontoe Gado? — Ezech. 18:4; Tori foe den Apostel 24:15; Rom. 6:23.
Soema ben préki Gado kownoekondre leki na wan enkri howpoe foe libisma, èn soema ben jepi mi foe si dati wi e libi ini den laatste dé èn dati wi moe de „nanga ai” tapoe a tori foe a kon foe a Manpikin foe libisoema? — Mark. 13:10, 33-37; Luk. 21:34-36; 2 Petr. 3:3-7.
Soema meki mi feni wan troetroe marki ini a libi? Pe a „vrede foe Gado” de èn mi de kibri foe den tesi nanga trapoe foe disi grontapoe, ma so-srefi toe a praktis koni foe loesoe den problema foe a libi? — Matt. 24:45-47; 1 Tim. 3:15; Fil. 4:6-9.
En leki laatste aksi: Sortoe groepoe foe kristensma abi tapoe volmaakti fasi „lobi gi makandra” (Joh. 13:34, 35), abi respeki gi den gronprakseri ini Johannes 17:14, 16 nanga Jesaja 2:4, èn di den e vervolgoe, no foedi den e bemoei nanga politiek, ma soso „foe a nen foe Jezus ede”, dati wani taki, foedi den de troetroe kristen? — Matt. 24:9; Joh. 15:18, 19.
11 Gi moro leki 2 miljoen sma foe moro leki 200 kondre nanga eilanti-groepoe, na opregti piki tapoe den aksi dati de: Jehovah Kotoigi di na „getrouw èn koni srafoe”-klasse nanga en tiri-skin e gi jeje njanjan. — Teki agersi Lukas 12:42-44.
Tan hori wan positief fasi
12. Pe degedege ini bribi e bigin?
12 Efoe wi wani lon komoto dati a geest foe a grontapoe, a geest foe takroe prakseri, a geest foe no abi froetrow nanga scepticisme kisi wi, dan wi moe hori ai tapoe den moro dipi bewégi foe ati foe wi. Gi den erfoe getrouw apostel nanga tra discipel di ben abi moeiti foe bribi dati Kristus ben opobaka foe dede, a ben taki: „Foe sanede oen de nanga skreki-ati èn foe sanede oen ati e degedege?” (Luk. 24:38) Ja, drape degedege ini bribi e bigin — ini na ati.
13, 14. (a) Foe sortoe sani degedege kan de wan marki? (b) Sortoe leri wi kan teki foe na ontrouw Israël?
13 Soboen, efoe oiti wi e bigin kisi problema foe skreki-ati degedege ini bribi, dan wi moe ondrosoekoe fosi wi bewégi foe ati. Den degedege ini bribi foe wi de troetroe, ofoe den de wan sani di wi e meki a de so foe kan doe en moro safri-safri? Den e sori wan mankeri foe horidoro? Den e sori wan mankeri foe bribi ini Gado makti foe gi pardon? (1 Joh. 1:9; Tori foe den Apostel 20:30). Paulus e skrifi: „Loekoe boen, brada, dati ini nowan sma foe oenoe wan goddelosoe ati di no e bribi gro kon, foedi a de hari ensrefi poeroe foe a libi Gado . . . ’No tranga oenoe ati.’” — Hebr. 3:12-15.
14 Te wi tan hori wan positief fasi èn tan hori alaten ini prakseri san Jehovah ben doe alamala nanga jepi foe en Manpikin Jezus Kristus gi wi èn san wi ben leri alamala foe en prakseri nanga pramisi nanga jepi foe a jeje njanjan di a ben sorgoe nanga a „getrouw èn koni srafoe”, dan noiti wi no sa de sondro tangi leki a pipel Israël, diJehovah ben taki foe den: „Wan kaw sabi en éginari, èn boeriki sabi pe den masra e gi den njanjan. Ma dati de moro leki san mi pipel Israël sabi.” — Jes. 1:3, Good News Bible.
Den ben kisi den froetrow baka
15. Fa wan owroeman ben kisi jepi foe wini den degedege di a ben abi ini bribi?
15 Wàn owroeman ini a westsé foe Fransi-kondre ben bigin foe degedege ofoe a ben de nanga Gado troe gemeente, foedi, soleki a ben taki, a jeje njanjan di ben kon, ben gersi alaten a srefi gi en. A ben aksi foe datede . . . foe den poeroe en foe en kristen frantwortoe leki owroeman. En osofamiri nanga den tra owroeman no ben si en leki wan soema di fadon komoto na bribi. Tapoe wan lobi fasi den jepi en nanga begi èn opbouwende takimakandra. Safri-safri a brada disi ben kisi jepi foe froestan dati a no alaten njoen verklari kan de, ne leki wan mama no kan poti tapoe tafra 365 dé foe wan jari 3 tron ini wan dé soso tra sortoe njanjan. Den srefi fundamenti spesré e kon baka ini difrenti fasi, ma wan grantangi mofo e jepi wi foe firi switi foe a njanjan, foe njan en èn teki krakti foe en. A brada disi ben kisi jepi foe prakseri dati a jeje njanjan na wan tra presi de so pikinso. Safri-safri a ben bigin kisi en froetrow, meki en waarderi kon moro dipi foe den boen sani di a ben leri foe den Wachttoren-boekoe, ben kisi en jeje krakti baka èn ben feni prisiri baka ini Jehovah diniwroko. Now a de baka leki wan kristen owroeman.
16. Fa a doe kon dati degedege ini bribi ben kon na wan jongoe Fransi Kotoigi èn fa en denki ben poti kon reti?
16 Wan jongoe Kotoigi ini a zuidsé foe Fransikondre, di bifo a ben kon ini waarheid, ben de wan fri-denki-man, ben kisi wan boekoe di ben go foe anarchisme („a theorie taki ala fasi foe tiri no nanga reti e tapoe a fri foe wan sma èn ini den presi moe kon groepoe di e wroko makandra èn di e moksi konmakandra tapoe a gron foe fri wani”). A ben lési a boekoe, ben feni en moi, ben bai moro foe den sortoe boekoe dati èn a ben bigin foe lasi en bribi nanga a lési foe den èn ben bigin degedege ini bribi. Ma, soleki ensrefi ben taki, „wan slag a ben kon froestan, dati a ben gi pasi dati takroe jeje njanjan ben meki fasi foe en owroe égifasi kon na tapoesé, soleki wan geest foe oproeroe”. Toe Wachttorenartikel jepi en foe poti en denki kon reti: „A pasi foe libi — smara ma fri” ini na uitgave foe 15 januari 1978, èn „Fa Gado kownoekondre kan tjari wini kon gi joe”, ini a uitgave foe 15 april 1978. A ben kisi en froetrow baka, ben go ini a foeroeten-diniwroko èn de now e wroko leki spesroetoe pionier.
Froetrow e tjari kolokoe kon
17, 18. San Jakobus e taki foe sma di e degedege èn sortoe rai a de gi den?
17 Disi de soso toe eksempre foe kristen di degedege ini bribi ben kon tapoe den, ma di den ben wini èn ben fini prisiri baka ini a diniwroko foe Gado. Efoe den ben gi densrefi abra a den degedege ini bribi foe den, dan now den ben sa de ongolokoe èn sondro howpoe. A bijbel e taki: „A soema di e degedege de leki wan skwala foe se, di a winti e drifi èn di e slenger go slenger kon” (Jak. 1:6). Ja, degedege ini bribi kan meki sani miti wi. Jakobus e taki moro fara dati „wan man di no e teki bosroiti, a no de faste ini ala en pasi”. — Jak. 1:8.
18 Wan krakti froetrow ini Jehovah, ini en Wortoe, èn ini en organisatie e poeroe degedege di kan lan joe èn e gi troetroe kolokoe. „Efoe wan sma foe oenoe mankeri foe datede koni”, so Jakobus e taki, „dan a moe tan aksi Gado, bikasi a de gi na ala soema fri èn sondro verwijti; èn a sa kisi en. Ma a moe tan aksi ini bribi, a no moe degedege kwet-kweti.” — Jak. 1:5, 6.
19. Foe sanede wi moe tan farawe foe a „geest foe grontapoe” èn san sa jepi wi foe „hori stéfi na a froetrow di wi ben abi na a bigin”?
19 Efoe wi teki a „geest foe a grontapoe” abra, dan degedege ini wi bribi sa de wan pisi foe a denki foe wi. Ma Paulus e skrifi: „Now wi no ben kisi a geest foe a grontapoe, ma a geest di e kon foe Gado, sodati wi ben sa sabi den sani di Gado ben gi wi foe en boen-ati ede” (1 Kor. 2:12). Efoe wi sabi boenboen „den sani di Gado ben gi wi foe en boen-ati ede” èn efoe wi e erken opregti dati wi ben kon sabi den sani disi foedi wi ben studeri a bijbel nanga Jehovah Kotoigi, dan a bigi tangi foe wi gi Jehovah sa bewégi wi foe poeroe degedege gwe èn „hori na a froetrow di wi ben abi na a bigin, stéfi te na a kaba”. — Hebr. 3:14.
20. Sortoe toe sortoe blesi e kari dja leki wan bakapisi foe froetrow?
20 Efoe wi e „hori stéfi” na wi froetrow ini Gado, na en Wortoe di no kan fadon èn na a grontapoe gemeente di Kristus e tjari, dan wi sa koti now èn ini a ten di e kon bigi blesi. Wan foe den blesi disi, di wi no mag si leki noti, de vréde foe wi verstan. A psalmsingiman ben skrifi: „Vréde pasa marki de foe den di lobi joe wet, èn gi den no wan ston foe naki foetoe de” (Ps. 119:165; loekoe sosrefi toe Kolossensen 3:15). San de wan bigi blesi toe de a gosontoe demakandra foe wi nanga getrouw kristen, di abi waarderi gi „den sani di Gado ben gi wi foe en boen-ati ede” — nanga jepi foe en geest, en wortoe èn en gemeente di wi kan si. — Ps. 1:1-3; 2 Thess. 3:6, 14; Hebr. 10:24, 25.
21, 22. (a) Sortoe blesi froetrow e tjari moro kon ete? (b)San wi sa si ini a artikel di e kon?
21 Te wi „hori stéfi a froetrow di wi ben abi na a bigin” dan wi e man foe de fajafaja ini a diniwroko foe Gado, èn disi e gi Jehovah èn wi prisiri (Spr. 27:11). A prisiri di wi e firi de kaba wan blesi (Matt. 25:23), ma a de toe wan kibri, wan „Fortresi” gi wi (Neh. 8:10). A prisiri dati ini a diniwroko foe Jehovah e gi wi wan positief loekoe di e kon moro krin o moro wi e si den profétitori e kon troe. Wi abi wan marki ini a libi. Wi sabi na sortoe sé wi e go. Wi abi wan moi howpoe, di de tapoe a „foto” ofoe a Messiaans kownoekondre, di Abraham ben loekoe foe a kon. — Hebr. 10:16.
22 Ma „na wortoe di taki nanga na krakti foe santa jeje e taki nanga tranga taki ini den pisiten di e kon son sma sa fadon komoto foe a bribi” (1 Tim. 4:1). Fa disi doe kon, èn foe sanede wi no moe firi brokoskin foe dati? Wi sa si disi ini na tra artikel.