Froetrow tapoe Jehovah nanga en Wortoe
„Den sma di sabi joe nen, sa froetrow tapoe joe.” — PSALM 9:10.
1. Foe san ede wi kan abi a froetrow ete tapoe Jehovah nanga en Wortoe na ini a ten foe wi?
NA INI a grontapoe foe a ten disi, a kari di sma e kisi foe froetrow tapoe Gado nanga en Wortoe, bijbel, gersi wan sani kande di no de praktis èn di no de troetroe. Tokoe a koni foe Gado sori wan langa pisi ten kaba foe de wan sani di troe èn di de praktis. A Mekiman foe man nanga oema, na a Sma di seti a trowlibi nanga na osofamiri, èn a sabi moro betre moro ala sma san wi abi fanowdoe. Neleki fa den moro prenspari sani di libisma abi fanowdoe no kenki, na so a moro prenspari fasi fa libisma e kisi san den abi fanowdoe, tan a srefi. Te now ete a koni rai foe bijbel, ala di a skrifi someni jarihondro pasa kaba, e gi a moro boen tiri foe sma kan abi boen bakapisi na ini a libi èn foe loesoe den problema. Te wi e poti prakseri na tapoe a rai dati, dan a e tjari foeroe kolokoe kon gi wi — srefi na ini a boen koni grontapoe disi foe sabidensi, pe wi e libi na ini!
2. (a) Sortoe boen froktoe a pipel foe Jehovah abi leki bakapisi na ini a libi foe den, foe di den e gi jesi na den komando foe Gado? (b) San moro Jehovah e pramisi den sma di e gi jesi na en èn na en Wortoe?
2 Te wi e froetrow tapoe Jehovah èn e gebroiki den gronprakseri foe bijbel na ini wi libi, dan dati e tjari praktis wini kon ibri dei. Disi de foe si na ini a libi foe den miljoenmiljoen Kotoigi foe Jehovah na heri grontapoe, di ben abi na overtoigi nanga a deki-ati foe gebroiki a rai foe bijbel na ini den libi. Gi den, a ben de wan joisti sani foe froetrow tapoe a Mekiman nanga en Wortoe (Psalm 9:9, 10). Foe di den gi jesi na den komando foe Gado, meki den kon tron moro betre sma ini a tori foe krinfasi, eerlijkfasi, a wroko di den e wroko tranga, a lespeki di den abi gi a libi nanga den goedoe foe tra sma, nanga a bescheide di den de bescheide nanga njanjan nanga dringi. Disi meki taki na ini na osofamiri den e sori a joisti lobi èn den e gi a joisti leri — foe lobi foe teki sma na oso, foe abi pasensi, foe abi sari-atifasi, èn foe gi makandra pardon — èn wan lo tra sani ete. Foe a moro bigi pisi, den ben man wai pasi gi den takroe bakapisi di e kon foe atibron, bita-atifasi, a kiri foe trawan, djaroesoe, frede, lesifasi, heimemre, lei, a froeteri di sma e froeteri ogri-ati lei foe trawan, jajolibi, nanga hoeroedoe (Psalm 32:10). Ma Gado e doe moro leki foe pramisi taki a sa go boen nanga den sma di e hori densrefi na den wet foe en. Jesus ben taki dati den sma di e doe soleki fa wan kresten moesoe doe, ben sa kisi „wan hondro tron nownow na ini a pisi ten disi, . . . mama nanga pikin nanga pranigron, makandra nanga froefolgoe, èn na ini a seti foe sani di e kon, têgo libi”. — Markus 10:29, 30.
Sorgoe taki joe no e froetrow tapoe a koni foe grontapoe
3. Nanga sortoe problema kresten e kisi foe doe son tron, te den e tan poti froetrow tapoe Jehovah nanga en Wortoe?
3 Wan problema di onvolmaakti libisma abi na taki den abi a firi foe frigiti san Gado e aksi foe den noso den e si disi leki wan sani di no de so prenspari. Makriki den e bigin denki taki den sabi sani moro betre noso taki a koni foe den koniman foe grontapoe hei moro di foe Gado, taki a fiti moro na a ten disi. Foetoeboi foe Gado kan kisi so wan fasi foe denki toe, foe di den e libi leti na ini a grontapoe disi. So boen, te wi hemel Tata e gi wi a lobi kari foe arki a rai foe en, dan a e gi wi den joisti warskow toe: „Mi manpikin, no frigiti mi wet èn meki joe ati gi jesi na mi komando, bika joe sa kisi foeroe dei nanga foeroe jari foe libi nanga vrede na tapoe. Froetrow tapoe Jehovah nanga joe heri ati èn no froetrow tapoe joe eigi froestan. Poti prakseri na tapoe en na ini ala joe pasi, èn ensrefi sa meki joe pasi kon reti. No kon koni na ini joe eigi ai. Frede Jehovah èn drai joe baka gi san no boen.” — Odo 3:1, 2, 5-7.
4. O fara „a koni foe a grontapoe disi” doro, èn foe san ede a de wan „don sani gi Gado”?
4 A koni foe a grontapoe disi de foe kisi bogobogo èn a e kon foe ala sei. Foeroe presi de pe sma kan kisi leri, èn „wan kaba no e kon na a meki di sma e meki foeroe boekoe” (Preikiman 12:12). Now joe abi a sani di sma sabi leki a bigi pasi foe kisi bodoi nanga jepi foe computer, èn den e djaranti taki a e gi ala bodoi foe pikinmoro iniwan tori. Ma taki grontapoe abi ala a sabi disi, no e meki en kon moro koni noso e loesoe den problema foe en. Na presi foe dati, a situwâsi na grontapoe e kon moro takroe dei foe dei. Wi kan froestan foe san ede bijbel e froeteri wi taki „a koni foe a grontapoe disi na don sani gi Gado”. — 1 Korentesma 3:19, 20.
5. Sortoe warskow bijbel e gi ini a tori foe „a koni foe a grontapoe disi”?
5 Na ini a kriboi pisi disi foe den lasti dei, sma kan froewakti nomo taki a moro bigi bedrigi man, Satan Didibri, ben sa kon nanga wan heri ipi lei foe no meki sma abi froetrow na ini a troe di bijbel troe. Sma di e ondrosoekoe efoe den boekoe foe bijbel troe noso efoe den no troe, e skrifi wan lo boekoe nanga tori di e tjalensi a fasi fa bijbel doe kon èn a froetrow di sma kan froetrow na en tapoe. Paulus ben warskow a kompe kresten foe en: „O Timoteus, kibri den sani di den gi joe, èn drai joe baka gi soso takitaki di e pori santa sani èn gi den sani di na wan lei fasi den e kari ’sabi’, ma di no e kroederi nanga makandra. Foe di son sma ben prodo nanga a sortoe sabi dati, meki den fadon komoto na bribi” (1 Timoteus 6:20, 21). Bijbel e warskow moro fara: „Loekoe boen: kande wan sma de, di sa tjari oenoe gowe leki wan sani di a kisi nanga jepi foe filosofia nanga bedrigifasi di de wan soso sani, akroederi den gwenti foe libisma, akroederi den fondamenti sani foe grontapoe èn no akroederi Krestes.” — Kolosesma 2:8.
Feti nanga a firi foe tweifri
6. Foe san ede a de fanowdoe foe de na ai so taki tweifri no poti ensrefi sidon na ini na ati?
6 Wan tra triki fasi di Didibri e gebroiki, na taki a e poti tweifri na ini a prakseri foe sma. Ala ten a de klariklari foe feni wan swakifasi ini a bribi foe wan sma èn a e meki wan fowtoe gebroiki foe disi. Ibriwan sma di e abi tweifri, moesoe memre taki a sma di de na baka den sortoe tweifri dati na a sma di ben taigi Eva: „A de troetroe so, taki Gado ben taki dati oenoe no moesoe njan foe ibri bon foe a djari?” Di a Tesiman ben poti tweifri na ini a prakseri foe Eva, dan a sani di a ben doe baka dati ben de, foe froeteri en wan lei di a ben bribi (Genesis 3:1, 4, 5). Efoe wi no wani taki tweifri e pori a bribi foe wi, soleki fa dati ben pasa nanga Eva, dan wi moesoe de na ai. Efoe pikinso tweifri ini a tori foe Jehovah, en Wortoe, noso en organisâsi bigin tan na ini joe ati, dan joe moesoe poeroe dati esi-esi, fosi a kon tron wan sani di kan pori a bribi foe joe. — Teki gersi 1 Korentesma 10:12.
7. San wan sma kan doe foe poeroe tweifri?
7 San wi kan doe? A piki de baka, taki wi moesoe froetrow tapoe Jehovah nanga en Wortoe. „Efoe wan foe oenoe no abi nofo koni, meki a tan aksi Gado, bika a e gi ala sma pasa marki èn sondro foe sori en tapoe en fowtoe; èn a sa kisi en. Ma meki a tan aksi nanga bribi, èn a no moesoe tweifri kwetikweti, bika a sma di e tweifri, de neleki wan skwala foe se di winti e wai go-kon” (Jakobus 1:5, 6; 2 Petrus 3:17, 18). So boen, foe begi Jehovah serjoesoe na a fosi sani di joe moesoe doe (Psalm 62:8). Baka dati, no draidrai foe aksi den lobi opziener na ini a gemeente foe jepi joe (Tori foe den Apostel 20:28; Jakobus 5:14, 15; Judas 22). Den sa jepi joe foe ondrosoekoe foe san ede joe e tweifri, san ben sa kan de foe heimemre ede noso wan fowtoe prakseri.
8. Fa wan sma nofo tron e bigin denki leki wan sma di fadon komoto na bribi, èn san a kan doe na dati?
8 A ben de foe di joe leisi noso arki prakseri foe sma di fadon komoto na bribi noso den filosofia foe grontapoe, taki joe kisi takroe tweifri? A koni rai di bijbel e gi na: „Doe ala san joe man foe sori joesrefi na Gado leki wan sma di a feni boen, leki wan wrokoman di no abi foe sjen foe noti, di e gebroiki a wortoe foe waarheid na wan reti fasi. Ma tan farawe foe soso takitaki di e pori santa sani; bika den sa doe ogridoe moro nanga moro èn a wortoe foe den sa panja ensrefi leki wan takroe siki” (2 Timoteus 2:15-17). A de wan moi sani foe si taki foeroe sma di fadon komoto na bribi ben bigin foe go fowtoe kaba foe di den ben kragi fosi fa den ben abi a firi taki sma no ben handri boen nanga den na ini na organisâsi foe Jehovah (Judas 16). Baka ten den ben soekoe fowtoe na a bribi. Neleki fa wan kotidatra e koti wan takroe siki poeroe esi-esi, na so joe moesoe feni iniwan firi foe wani kragi, noso a firi taki joe no de tevrede nanga a fasi fa sani e waka na ini a kresten gemeente èn poeroe dati esi-esi na ini a prakseri (Kolosesma 3:13, 14). Poeroe iniwan sani di e meki den sortoe tweifri dati kon. — Markus 9:43.
9. Fa a sa jepi wi foe tan gosontoe ini a bribi, te wi e doe theokrasia sani doronomo èn na wan boen fasi?
9 Tan skinskin na Jehovah nanga en organisâsi. Doe na wan loyaalfasi soleki fa Petrus ben doe, di ben taki nanga krakti: „Masra, na soema wi sa go? Joe abi wortoe foe têgo libi” (Johanes 6:52, 60, 66-68). Abi wan boen schema foe studeri a Wortoe foe Jehovah so taki joe kan meki joe bribi tan tranga, neleki wan bigi skilt di man „kiri ala den faja peiri foe na ogriwan” (Efeisesma 6:16). Tan de aktief ini a kresten diniwroko, foe di joe e prati a Kownoekondre boskopoe nanga trawan na wan lobi fasi. Ibri dei joe moesoe prakseri dipi èn nanga warderi fa Jehovah blesi joe. De nanga tangi taki joe sabi waarheid. Te joe e doe ala den sani disi doronomo na wan boen fasi soleki wan kresten moesoe doe, dan dati sa jepi joe foe de kolokoe, foe horidoro, èn foe no kisi tweifri. — Psalm 40:4; Filipisma 3:15, 16; Hebrewsma 6:10-12.
Waka baka a tiri di Jehovah e gi na ini a trowlibi
10. Foe san ede a de spesroetoe prenspari foe soekoe jepi na Jehovah foe kisi tiri na ini a kresten trowlibi?
10 Di Jehovah ben seti sani gi man nanga oema foe libi nanga makandra leki wan trowpaar, dan a no ben de a prakseri foe en nomo foe foeroe grontapoe na wan fasi di fiti, ma a ben abi na prakeri toe foe meki a kolokoe foe den kon de moro bigi. Ma sondoe nanga onvolmaaktifasi tjari serjoesoe problema kon na ini a trowlibi. Kresten toe e kisi foe doe nanga den sani disi, foe di den toe de onvolmaakti èn e ondrofeni a druk foe a libi na ini a ten disi. Ma tokoe, so fara kresten e froetrow tapoe Jehovah nanga a Wortoe foe en, den kan abi boen bakapisi na ini a trowlibi èn te den e kweki den pikin foe den. Na ini a kresten trowlibi, presi no de gi sani di grontapoe e doe noso a fasi fa den e tjari densrefi. A Wortoe foe Gado e froemane wi: „Meki a trowlibi de krin na mindri ala sma, èn a trowbedi sondro flaka, bika Gado sa kroetoe hoeroeman nanga soetaman.” — Hebrewsma 13:4.
11. San ala toe patna moesoe erken, te den wani loesoe problema foe a trowlibi?
11 Wan trowlibi di e waka akroederi bijbel rai abi lobi, a tranga firi di sma abi gi makandra, nanga seikerfasi. A masra nanga a wefi e froestan a gronprakseri di poti gi edeman èn den e lespeki dati. Te problema e kon, dan nofo tron disi de foe di prakseri no poti na tapoe wan toe bijbel rai. Efoe den wani loesoe wan problema di e tan, dan a de prenspari taki ala toe patna e go loekoe na wan eerlijk fasi san a problema de troetroe èn wroko na den reide di e tjari a problema kon, na presi foe wroko na den sani di de a bakapisi foe a problema srefi. Efoe den takimakandra di den ben abi, loesoe a problema pikinso nomo noso a no loesoe en srefisrefi, dan a trowpaar kan aksi jepi na wan lobi opziener di no e teki sma sei.
12. (a) Gi sortoe problema di foeroe sma abi na ini a trowlibi, bijbel e gi rai? (b) Foe san ede a de fanowdoe taki ala toe patna e doe sani na a fasi fa Jehovah wani?
12 A problema abi foe doe nanga komunikâsi, a lespeki di den abi gi den firi foe makandra, a lespeki di den abi gi a wroko noso a posisi foe wan edeman, noso a fasi fa bosroiti e teki? A abi foe doe nanga a kweki foe pikin, noso balansifasi ini a tori foe seks? Noso a abi foe doe nanga den monitori foe na osofamiri, ontspanning, demakandra, efoe a wefi moesoe wroko efoe no, noso pe joe moesoe libi? Awinsi san na a problema, bijbel e gi praktis rai langalanga nanga jepi foe wet noso na wan tra fasi nanga jepi foe gronprakseri (Mateus 19:4, 5, 9; 1 Korentesma 7:1-40; Efeisesma 5:21-23, 28-33; 6:1-4; Kolosesma 3:18-21; Titus 2:4, 5; 1 Petrus 3:1-7). Te ala toe patna no e aksi sani nomonomo, na wan fasi di e sori taki den e prakseri densrefi wawan èn e sori troetroe lobi na ini a trowlibi foe den, dan den sa de moro kolokoe. Ala toe trow patna moesoe abi wan tranga winsi foe tjari den kenki kon di de fanowdoe, èn foe doe sani na a fasi fa Jehovah wani. „A sma di e sori foe abi inzicht na ini wan tori, sa feni boen, èn kolokoe foe a sma di e froetrow tapoe Jehovah.” — Odo 16:20.
Jongoewan — Arki a Wortoe foe Gado
13. Foe san ede a no de makriki gi kresten jongoewan foe gro kon bigi nanga wan tranga bribi ini Jehovah nanga en Wortoe?
13 A no makriki gi kresten jongoewan foe kon tranga ini a bribi te na ogri grontapoe de lontoe den na ala sei. Wan reide de, taki „heri grontapoe e didon na ini a makti foe na ogriwan”, Satan Didibri (1 Johanes 5:19). Na ogri feanti disi e soekoe foe doe jongoewan ogri, foe di a kan meki wan sani di no boen kon gersi wan sani di boen. A fasi di sma e prakseri taki ala ten den eigi wani moesoe kon na a fosi presi, a tranga lostoe di den abi foe kisi moro ala di den e prakseri densrefi wawan, a tranga lostoe gi hoeroedoe èn gi ogri sani, èn a feti di sma e feti na wan toemoesi aparti fasi na baka prisiri — ala den sani disi joe kan poti makandra na ini wán prenspari fasi fa foeroe sma e denki èn di bijbel e kari „a jeje di e wroko now na ini den manpikin foe trangajesi” (Efeisesma 2:1-3). Na wan triki fasi Satan poti a „jeje” disi na ini skoroboekoe, a poti en na ini foeroe foe a pokoe di de foe kisi, na ini sport, èn na ini tra sortoe ontspanning. Papa nanga mama moesoe de na ai foe no meki a krakti di den sani dati abi na tapoe den pikin kon moro, foe di den e jepi den pikin foe den foe gro kon nanga a froetrow di den e froetrow tapoe Jehovah nanga en Wortoe.
14. Fa jongoewan kan „lowe gi den lostoe di jongoe sma abi”?
14 Neleki wan papa, Paulus ben gi rai na Timoteus, a jongoe kompe foe en: „Lowe gi den lostoe di jongoe sma abi, ma feti na baka regtfardikifasi, bribi, lobi, vrede, makandra nanga den sma di e kari Masra nanga wan krin ati” (2 Timoteus 2:22). Ala di a no ala „lostoe di jongoe sma abi” na takroe lostoe, tokoe jongoesma moesoe „lowe gi” den na a fasi disi taki den no moesoe meki den sani disi de sani di e teki ala den ten, èn e libi pikinso ten nomo noso no wan enkri ten foe feti na baka sani foe Gado. Bodybuilding, sport, pokoe, ontspanning, sani di wan sma lobi foe doe, nanga a rèis di wan sma rèis, no abi foe de sani di no boen, ma tokoe den kan de wan trapoe efoe den e tron den prenspari sani na ini wi libi. No hori takimakandra di joe no e leri noti foe en, no gebroiki joe ten foe soso èn gi don sani, no abi toemoesi belangstelling gi seks na wan fasi di no fiti, no sidon e doe noti, e lasi joe ten èn e froeferi joesrefi, èn no kragi taki joe papa nanga mama no e froestan joe.
15. Sortoe sani kan pasa na ini oso di kan meki taki jongoewan e libi wan dobroe libi?
15 Srefi te jongoesma de na den oso, kefar kan de gi den. Efoe den e loekoe telefisi programa nanga video di e sori hoeroedoe noso ogri di e doe nanga tranga, dan a lostoe kan kon na ini den foe doe sani di no boen (Jakobus 1:14, 15). Bijbel e gi leki rai: „O oen sma di lobi Jehovah, no wani si den sani di no boen, na ai” (Psalm 97:10; 115:11). Jehovah sabi te wan sma e proeberi foe libi wan dobroe libi (Odo 15:3). Kresten jongoewan, loekoe a kamra foe joe. Bigi fowtow foe pôpi sportman noso pokoeman di abi wan hoeroedoe libi, de na tapoe den skotoe foe joe kamra, noso joe e anga sani di e bow joe èn di e memre joe na boen sani? (Psalm 101:3) Joe abi krosi na ini joe krosikasi di de bescheide, noso wan toe foe den krosi foe joe e sori den toemoesi freimde sortoe fasi fa a grontapoe disi e weri? Na wan triki fasi Didibri kan tjari joe go na ini wan trapoe, efoe joe e gi pasi na a tesi foe wani doe san no boen. Bijbel e gi a koni rai: „Hori oensrefi, de na ai. Oen gensman, Didibri, e waka lontoe leki wan krasi lew, di e soekoe foe njan wan sma.” — 1 Petrus 5:8.
16. Fa a rai di bijbel e gi, kan jepi wan jongoewan taki ala sma di e teri gi en, breiti nanga en?
16 Bijbel e froeteri joe foe loekoe boen nanga a demakandra di joe abi (1 Korentesma 15:33). Den kompe foe joe moesoe de sma di abi frede gi Jehovah. No broko kindi gi a druk di den speri foe joe e poti na joe tapoe (Psalm 56:11; Odo 29:25). Gi jesi na a papa nanga mama foe joe di e frede Gado (Odo 6:20-22; Efeisesma 6:1-3). Soekoe jepi na den owroeman foe kisi tiri nanga deki-ati (Jesaja 32:1, 2). Hori joe prakseri nanga joe ai na tapoe warti sani nanga marki na jejefasi. Soekoe okasi foe go na fesi na jejefasi èn foe abi prati na sani di e doe na ini a gemeente. Leri fa foe wroko nanga joe anoe. Gro kon tranga èn gosontoe ini a bribi, èn dan joe sa sori foe de wan prenspari sma troetroe — wan sma di warti foe libi na ini a njoen grontapoe foe Jehovah! Wi hemel Tata sa breiti nanga joe, joe papa nanga mama na grontapoe sa prisiri nanga joe, èn joe sa gi den kresten brada nanga sisa foe joe deki-ati. Dati na san e teri! — Odo 4:1, 2, 7, 8.
17. Sortoe wini den wan e kisi di e froetrow tapoe Jehovah nanga en Wortoe?
17 Na ondro a krakti foe santa jeje, a psalm singiman ben skrifi na ini wan poewema: „Jehovah srefi no sa hori san boen na baka gi den sma di e waka sondro foe abi fowtoe. O Jehovah foe den legre, kolokoe foe a man di e froetrow tapoe joe” (Psalm 84:11, 12. Ija, ala sma di e froetrow tapoe Jehovah nanga en wortoe, bijbel, sa de kolokoe èn den sa abi boen bakapisi èn a no sa de so taki a froewakti foe den no e kon troe noso taki den no sa man doe wan sani boen. — 2 Timoteus 3:14, 16, 17.
Fa joe ben sa piki?
◻ Foe san ede kresten no moesoe froetrow tapoe „a koni foe a grontapoe disi”?
◻ San moesoe doe efoe wan sma abi tweifri?
◻ Fa sma kan kisi boen bakapisi nanga kolokoe na ini a trowlibi, te den e doe sani na a fasi fa Jehovah wani?
◻ Fa bijbel e jepi jongoewan foe „lowe gi den lostoe di jongoe sma abi”?
[Prenki na tapoe bladzijde 19]
Kresten e soekoe jepi na Jehovah nanga en Wortoe, ala di den e weigri foe teki „a koni foe a grontapoe disi”, di den e si leki wan don sani
[Prenki na tapoe bladzijde 21]
Osofamiri di e froetrow tapoe Jehovah nanga en Wortoe abi boen bakapisi èn den de kolokoe