Fa mama di tanapoe den wawan e kakafoetoe ini a disiten grontapoe

„Na oema, di de troetroe weduwe, èn di libi na baka èn abi fanowdoe foe sani, moe poti en howpoe na Gado èn a de horidoro ini tranga begi nanga begi na dé èn na neti.” — 1 Tim. 5:5.

1-3. (a) San wan weduwe ben skrifi? (b) Den osofamiri nanga wan mama nomo ben kon moro foeroe, èn san de wan toe foe den problema di den osofamiri disi moe kakafoetoe gi?

„MI DE wan weduwe foe 28 jari nanga toe pikin. Mi de nanga toemsi brokoskin, bikasi mi no wani kweki mi pikin sondro wan papa. A gersi srefi leki nowan sma e broko-ede nanga mi. Mi pikin e si mi e kré foeroetron èn disi e abi krakti tapoe den. Mi sabi dati mi no kan go so doro foe firi so, ma san mi moe doe?” Na brifi disi e ferteri ini algemeen foe wan tranga begi foe son sma di tanapoe na fesi foeroe problema — mama di tanapoe den wawan.

² Njoensoe di e komoto foe na heri grontapoe e sori dati osofamiri nanga soso wan bigisma e kon moro foeroe. Ini so wan tin jari ten na nomroe foe den ini Amerkankondre kon de toe tron so foeroe èn ini Canada srefi moro leki toe tron. Den de wan tapoe tin foe ala osofamiri ini Australia nanga Bigi-Brittania. Schatting meki dati toe foe ibri féfi pikin di e libi now ini Amerkankondre, sa pasa wan pisi foe en libi ini wan osofamiri pe a mama de nomo.

³ Foeroe réde de dati moro foeroe foe den osofamiri disi e doe kon. Oorlog nanga oto-ongolokoe ben poeroe ini foeroe osofamiri a papa na plei. Foedi a osofamiri-libi e go na baka, a de wan gewoon sani te wan sma libi en trowpatna, prati nanga en ofoe den no e libi makandra. Son mama di no trow ben teki na bosroiti foe kweki na pikin densrefi na presi dati den ben meki den poeroe na bere ofoe meki tra sma teki na pikin. Wan mama di tanapoe en wawan moe kakafoetoe gi foeroe problema. Na firi dati den de den wawan, na kweki foe den pikin, na sorgoe foe den sani foe tan na libi, seks lostoe nanga tiri foe wan oso, de soso wan toe foe den.

NA KRISTENDOM E TJARI VERLEKTI

4. Leki wan bakapisi foe sortoe toestand ini na ten foe na fosi eeuw meki dati foeroe osofamiri nanga soso na mama ben doe kon?

⁴ Ini na fosi eeuw, di na kristendom ben de ini en bigin jari, joe ben abi sosrefi toe foeroe weduwe nanga pikin sondro papa, leki wan bakapisi foe siki, moreel fadon nanga den pori di oorlog ben tjari kon. Brokotrow ofoe gwe libi a tra patna, ben de foeroetron na regel. Nofotron den njofi pikin ben libi gi na mama, di ben moe kweki den en wawan now. Na grontapoe foe na Romein kownoekondre ben de wan maatschappij sondro firi èn di ben veragti den swakiwan. Weduwe ben abi en foe datede ebi. Son wan foe den ben gi densrefi abra na motjo-libi, soso foe ben kan sorgoe nanga disi ini den sani foe tan na libi.

5. Ini sortoe toe fasi na kristendom ben gi jepi?

⁵ Na kristendom ben tjari wan troetroe kenki kon. Sari-ati ben sori now gi den sma di no ben abi foeroe. Ma srefi boiti disi, dan den leri foe na kristendom ben gi mama di tanapoe den wawan na moreel krakti foe loesoe densrefi poeroe foe na porifasi foe na ten dati. Na presi dati na kristendom ben meki oema kon di no abi sjen foe densrefi, a ben meki oema kon di kan dwengi densrefi, di ben abi wan krin libi èn di ben lobi den osofamiri. Srefi sma di no ben de kristen ben erken na difrenti, sodati wan foe den ben bari taki: „Fa den kristensma abi boen oema!”

6. Nanga jepi foe sortoe kristen gronprakseri, mama di tanapoe den wawan, èn sosrefi toe ala kristen, kan kisi jepi foe kakafoetoe gi druk foe disi ten?

⁶ Sortoe kristen gronprakseri ben jepi dati disi de so? Di na apostel Paulus ben gi weduwe rai, a ben taki dati na boen-eksempre weduwe „ben poti en howpoe na Gado èn a de horidoro ini tranga begi nanga begi na dé èn neti.” A ben sori dati wan weduwe di no de moro pikinso leki 60 jari, ben kan poti a tapoe a lijst foe kan kisi jepi efoe a „ben de faja ini ibri boen wroko” (1 Tim. 5:5, 9, 10). Djaso no moro pikinso leki 3 gronprakseri e kon na fesi: (1) Froetrow now na Gado, èn abi na howpoe tapoe na tego libi di a ben pramisi (2) Tan hori wan krosibé égi matifasi nanga Gado, èn (3) Tan de bézig nanga a doe foe boen wroko. Wi sa si fa den dri gronprakseri disi, te wi sa poti den ini wi libi, no wawan sa de wan troetroe jepi gi mama di tanapoe den wawan, ma den sa jepi ala kristen foe kakafoetoe gi na disiten druk.

KAKAFOETOE GI NA FIRI DATI JOE DE JOE WAWAN

7. (a) Foe sanede a firi dati den de den wawan de moeilek gi son mama di de den wawan? (b) Fa na gronprakseri di de ini 1 Timoteüs 5:10 e jepi?

⁷ Wan mama di tanapoe en wawan ben soktoe: „Efoe mi doro oso èn si den fo skotoe, spesroetoe efoe den pikin go na bedi, dan troetroe na firi dati mi de mi wawan e graboe mi.” Ja, na firi dati den de den wawan, de foeroetron na moro bigi problema di mama di tanapoe den wawan moe kakafoetoe gi. Aladi a de jepi te den kisi wan moro krosibé-matifasi nanga den pikin, tog foeroe foe den e angri na a matifasi foe wan bigisma. Tan de druk bézig nanga „ibri boen wroko” de wan boen dresi. Den fosi eeuw-weduwe „ben teki vreemde sma na den oso, ben wasi den foetoe foe santawan (nanga na doe foe persoonlijke dienst) èn den ben e assisteri sma di ben kisi kwinsi” (1 Tim. 5:10). Wan 68-jari kristen weduwe di ben si disi, ben meki a de wan gwenti foe go fisiti tra weduwe di ben libi ini na birti ofoe ini rostoe-oso, te a ben bigin kisi a firi dati a de en wawan. A ben taki: „Mi e si dati mi no abi ten foe firi dati mi de mi wawan, te mi e tjari den fisiti disi, te mi e doe mi osowroko èn te mi e sorgoe dati mi e tan sorgoe misrefi na jeje fasi.”

8. (a) Foe sanede kownoekondreprékiwroko e jepi wi foe feti nanga na firi foe de en wawan nanga hebi-skin? (b) Disi e jepi troetroe?

⁸ Na kownoekondre-prékiwroko de wan „boen wroko” di Jezus gi, wan wroko di kan poeroe na firi foe de en wawan nanga hebi-skin (Matt. 24:14; 28:19, 20). Wan mama di ben de en wawan èn di ben abi hebi-skin, èn ben kon de ini ensrefi wawan, ben kisi tranga foe en mati foe bigin nanga na kotoigiwroko. Disi a ben doe. Na en fosi doro, wan boen malengri oema di ben de nanga toemsi prisiri ben kari en kon na inisé. Fa a ben kan de so kolokoe? „Bikasi mi abi na grani foe kan libi, misi. Mi e libi”, a switifasi piki foe en ben de. Disi ben de wan keerpunt gi na Kotoigi, di ben redeneer: „Mi abi gosontoe, na lobi foe na gemeente, toe toemsi boen pikin, èn moro foeroe Jehovah. Foe sanede mi ben sa de ongolokoe?” Te wi jepi trawan na jeje fasi, dan disi kan jepi foe wi no prakseri wisrefi moro èn gi wisrefi abra na kragi. Te wi e leri trawan dan wi e hori wi égi howpoe a libi èn njoen; a so fasi wi kan tan poti wi „howpoe na Gado”. — 1 Tim. 5:5.

9. Na firi foe den en wawan sa komoto alaten nanga soso tranga wroko? San e jepi sosrefi toe?

⁹ Wan man di en wefi ben dede ben taki krin: „A firi dati joe de joe wawan no e gwe nanga soso tranga wroko. Foeroetron wan sma moe leri foe libi nanga disi. Na firi foe de joe wawan, joe moe pasa nanga na jepi nanga krakti foe Jehovah.” So wan krakti e kon te wan sma „e horidoro ini tranga begi nanga begi, na dé èn na neti” (1 Tim. 5:5). A de troetroe wan trowstoe, te wi kan ferteri ini a pisiten foe na dé ini begi foe wi activiteit, ini na sabi dati Jehovah e arki alaten na wi, èn dati a de broko-ede nanga den detail foe wi libi. A de jepi te „dé nanga neti” wi tjari kon na doro san de na wi ati — spesroetoe a neti, te, soleki foeroe sma e taki, a problema foe a firi foe de en wawan kan kon moro bigi.

KAKAFOETOE GI SEKS LOSTOE

10. (a) Oten seks lostoe kan de wan ernstig problema? (b) Fa wan sma e kon so fara „foe feni switi ini a prisiri foe den senwe”, èn san disi kan tjari kon?

¹⁰ Foeroe mama di tanapoe den wawan e angri foe a waran demakandra ini na trowlibi nanga den matifasi foe na trowbedi. Den sortoe firi disi no de fowtoe ini densrefi. Na lostoe foe trow baka, de tai foe ensrefi. A problema e kon te wan sma e teki a bosroiti foe prisiri den „seks lostoe” winsi san a sa kostoe. Disi ben pasa ini den dé foe na apostel Paulus. Son wan foe den jongoe weduwe ben gi pasi dati „den seks lostoe foe den ben kon a mindri den nanga Kristus” (1 Tim. 5:11, 12). Disi ben de wan ernstig sani, foedi so wan weduwe ben taki troetroe: „A fanowdoe di mi abi foe seks de toemsi bigi. Mi moesoe doe wan sani foe gi mi skin lekti!” Den skin ofoe seks lostoe disi safri safri ben teki na moro bigi presi ini en libi, srefi wan moro bigi presi leki jeje afersi. Den lostoe disi ben kan doro na marki dati „den feni switi ini a prisiri foe den senwe” èn a so fasi „ben dede aladi den ben libi” (1 Tim. 5:6). A no ben sa abi belangstelling gi jeje sani moro. A srefi kan pasa nanga wan kristen (man ofoe oema) ini disi ten. Wan sma kan „kiri ensrefi na jeje fasi” te a poti bijbel wetti na wan sé tapoe a tori foe moraal, foedi wan sma e gi ensrefi sote na a prisiri foe „seks lostoe”.

11. Fa wan sma kan kiri en „seks lostoe”?

¹¹ A bijbel e taki foe datede nanga tranga: „Kiri den memre foe joe skin tapoe a tori foe sekslostoe” (Kol. 3:5). Ma fa? Te joe kibri joe froestan nanga ati. Efoe foe eksempre joe ben sa proeberi foe hori wan dieet èn joe ben sa moe dwengi a lostoe foe joe foe njanjan, dan joe ben sa lési tijdschrift pe prenki de foe switi njanjan, ofoe joe ben sa loekoe tv-programma di e go foe bori? Joe ben sa de alaten makandra nanga sma di e taki foe njanjan? Kwet-kweti! A srefi de troe nanga „seks lostoe”. Wán weduwe ben taki nanga reti: „Wi e libi ini wan grontapoe di troetroe noiti e stop foe taki foe seks. Foe datede mi de toemsi voorzigti ini ontspanning di mi e teki èn nanga soema mi e abi prisiri demakandra. Wan sma di abi soekroe-siki no sa poti en noso na a grasi foe wan wenkri di e seri switisani.”

12, 13. (a) San de fanowdoe foe bow wan égi matifasi nanga Jehovah? (b) Foe sanede „tranga begi” de so prenspari, èn fa wan sma kan handri akroederi nanga dati?

¹² Ma efoe wan sma wani foe wini den lostoe disi ibri dé baka, dan wan sma moe bow wan krosbé matifasi nanga Gado. Disi wani taki, dati boiti égi studi nanga meditatie, wan sma moe horidoro sosrefi toe ini „tranga begi” (1 Tim. 5:5). Paulus no e kari begi ini algemeen, ma e taki „tranga begi”. Disi de begi na Gado di e sori wan tranga fanowdoe. Wan sma e begi tranga, e aksi a so fasi foe jepi, kande nanga „tranga babari èn watra-ai”. — Hebr. 5:7.

¹³ Den begi foe joe foe kan dwengi joesrefi èn foe kisi krakti de so tranga? Joe e horidoro na ini? Joe e begi na a srefi momenti te den lostoe disi kon de tranga? Joe de specifiek, pe kande joe e tjari sani kon na krin gi wi Tata, di joe no ben sa wani ferteri wan tra sma? Wàn kristen oema ben taki: „No aksi ofoe Jehovah wani jepi joe foe wini seks lostoe efoe joe e prakseri seks alaten. A de troe dati seks lostoe ini bepaalde pisi foe a moen kande toemsi bigi. Tranga joe froestan foe doe wan tra sani. Go loekoe wan tra sma. Go koiri ofoe doe wan tra sani foe poeroe joe prakseri. Tan de druk bézig ini a pisi dati foe a moen.” Wan trawan di ben froestan fa a de prenspari foe tan de druk bézig nanga „ibri boen wroko”, ben agri nanga disi èn ben taki: „Go krin joe fensre. Skoeroe joe vloer. Krin joe heri oso. Mi ben doe en. A de jepi!” Te joe si dati Jehovah jepi joe nanga a problema disi — nono, no nanga na doe foe wan wondroe, ma foe gi joe a krakti foe kakafoetoe ala dé gi disi — dan joe sa kon moro krosbé na hen.

14. (a) San kan pasa efoe wan sma no abi wan krosbé matifasi nanga Jehovah? (b) San mama di tanapoe den wawan kan doe, aladi den e wakti wan kristen patna?

¹⁴ Sondro na diri „froetrow demakandra disi nanga Jehovah”, dan wan sma ben sa kan go soekoe, winsi san a sa kostoe wan trowpatna, aladi a kan meki kan meki srefi mofo nanga grontapoe sma (Ps. 25:14). Wan sma di ben doe disi, ben erken: „A troetroe problema ben de, dati mi no ben tan krosbé foe Jehovah. Di mi ben abi wan kans foe trow, a ben de so boen gi mi. Mi ben frigiti den moreel wet di mi ben kisi leri foe den. Ma wan dé mi ben froestan dati na man ben abi soso belangstelling gi ensrefi èn no gi wan trowlibi. Dan mi ben sa moe libi nanga wan fowtoe konsensi.” Ja, foe de joe wawan sondro trow, kan de moeilek, ma soleki wan oema di ben prati ben taki: „wan sani de di de moro ogri leki de joe wawan sondro foe trow. Dati de foe trow nanga a verkeerti sma!” Alaten a kan dati wan sma feni wan patna na mindri kristensma wan sma „di de ini Masra” (1 Kor. 7:39). Son sma ben wakti foeroe jari so wan patna. Ini ala den ten dati, den no ben kon bita ofoe no meki den omstandigheden masra den. Den ben gebroiki na ten tapoe wan froestan fasi foe kweki den fasi di ben sa meki den tron wan moro betre patna. Wan mama di tanapoe en wawan ben taki foe disi: „Mi de aksi misrefi: ’Mi de na oema nanga jeje fasi di wan sma sa teki?’ Efoe leki wan sma di no trow, sma no kan feni en nanga mi, dan wan sma di trow nanga mi, sa kon de nanga wan sma di a no sa man foe feni en nanga en.”

TIRI WAN OSO ÈN KWEKI PIKIN

15. (a) San son mama di tanapoe den wawan ben doe foe tiri wan oso boen? (b) Joe abi moro rai kande?

¹⁵ Aladi a de wan hebi wroko, tog foeroe mama di de den wawan ben waka baka na koni oema di Odotaki 31 e skrifi foe en. Aladi a ben trow a ben abi na heri loekoe tapoe a oso. A ben kibri moni foe bai sani nanga froestan foe meki sani foe materiaal èn foe no pori njanjan, bikasi a ben sreka „wan pisi di ben seti a fesi” (vers 15, 18, 19). A ben bigin mamanten froekoe èn ben wroko te lati na neti (vers 15, 18). A ben meki sani èn ben seri dati (vers 24). A ben gebroiki en anoe foe doe wroko (vers 17, 19). Foe kan gebroiki den anoe foe den na wan koni fasi, son mama di tanapoe den wawan ini disi ten ben lési doe-en-srefi-boekoe èn den ben aksi na rai foe wrokoman. Foeroetron, baka di den ferteri fa a ben de nanga den, den ben kisi foe soso leri.) Tra wan ben ferteri foe den fanowdoe foe den na kompe-kotoigi foe Jehovah, di ben abi wan bepaalde technische sabi, èn te den Kotoigi disi ben de ini na okasi, den ben gi jepi tapoe wan switi fasi. Nanga ala disi den kostoe kan hori lagi.

16. Foe sanede a de toemsi prenspari foe froetrow tapoe Gado, èn nanga na eksempre foe soema na fanowdoe disi e kon na krin?

¹⁶ Now di den ten e kon de moro moeilek, wan weduwe moe froetrow na Gado foe den ala dé seti, winsi sortoe sani a kan doe. Wan boen eksempre foe wan sma di „poti en howpoe na Gado”, ben de na mama di ben tanapoe en wawan ini den dé foe Gado proféti Elia ini a pikin foto Sarfath. Ondro na tiri foe Jehovah jeje Elia ben aksi en na laatste njanjan foe en, nanga na pramisi dati Gado ben sa sorgoe gi en. San joe ben sa doe? A ben abi nofo foe wan laatste njanjan. Te joe loek en boen, dan na njanjan dati ben de wan sani di a ben kan reken na tapoe. Ma tog a ben libi wan sani di ben de seker gi wan sani di no de seker foe a bribi foe en ede. A wortoe di Gado ben taki nanga mofo foe en proféti ben kon troe. Èn nanga en manpikin noiti den ben mankeri njanjan. Now ala mama di tanapoe den wawan, soleki ala tra kristen toe, moe poti sosrefi toe froetrow ini Gado, foedi den e soekoe fosi na kownoekondre, èn foedi den e miti den regtvaardiki marki foe en. Dan den sa ondrofeni, dati a sa sorgoe ini den fanowdoe foe den. — 1 Kon. 17:8-16; Luk. 4:25, 26; Matt. 6:31, 33.

17. San mama di tanapoe den wawan noiti moe frigiti te den wani foe kweki den pikin foe den tapoe wan boen fasi, èn foe sanede?

¹⁷ Na moeilek wroko foe de „mama” èn „papa” gi den pikin èn kweki den tapoe wan joisti fasi, kan doe soso te na mama noiti frigiti san moe teki na moro prenspari presi ini na osofamiri. Loekoe na piki foe na bijbel:

„Abi pikinso sani ini na frede foe Jehovah, de moro boen leki abi boen foeroe èn abi broeja nanga dati. Abi wan skotriki groentoe pe lobi de, moro boen leki abi wan mankaw di kisi boen njanjan èn abi ogri-ati nanga dati” (Odotaki 15:16, 17).

Na troetroe waarde foe wan njanjan no de ini san de tapoe tafra, ma a de ini san de ini na ati foe den sma di e njan makandra. Lobi nanga wan gosontoe frede gi Gado de den sani di e teri troetoe.

18. (a) San son mama di tanapoe den wawan ben doe foe abi nofo moni èn abi tog ten foe sorgoe den pikin? San joe prakseri ben sa kan doe moro ete?

¹⁸ Foe abi ten foe jepi den pikin foe den foe kweki respeki gi Gado èn tog abi nofo moni, dan mama di tanapoe den wawan, foeroetron nanga jepi foe den, ben seri sani di densrefi ben meki ofoe den ben doe wroko na oso.a Trawan ben meki gebroiki foe wan ofoe tra jepi foe a regering, di den abi na lanti nanga moreel reti na tapoe. Someni foe den ben lagi na standaard foe libi foe den, sodati den kan pasa na libi nanga afoe-dé-wroko, soleki wan kristen oema nanga fo pikin ben doe. A ben taki: „Mi ben wani someni leki mi kan foe de na den pikin. A ben de wan sani di de ogri nofo dati den no abi wan papa, sondro foe den no ben lasi wan mama sosrefi toe.” A no de foe taki dati a no alasma sa kan feni so wan boen wrokopresi. Ma foe froetrow den pikin èn tjari kon na krin foe sanede grontapoe-wroko de fanowdoe èn foe gi someni na den, dan den mama disi kan sorgoe dati wan switi èn lobifasi sfeer sa de na oso.

19. San a wani taki gi mama foe lobi den pikin? (b) Foe sanede disi de gi wan mama di tanapoe en wawan no alaten wan makriki sani?

¹⁹ A de toemsi prenspari dati mama di tanapoe den wawan „lobi den pikin foe den”, èn ini disi de sosrefi toe, dati den moe gi na fanowdoe tranga leri (Tit. 2:4; Odotaki 13:24). Nanga disi den pikin, di lasi wan papa, sa kisi kibri foe no firi onseker. Foedi son oema e wroko nanga den firi, a kan de wan troetroe moeiti foe gi tranga leri. Ma hori ini prakseri dati tranga leri di wani taki dati strafoe moe gi toe, e meki a pikin sabi, dati joe lobi en nofo foe no meki a kon ini moeilijkheid.

20. (a) San son wan ben doe foe kisi wan krosibé matifasi nanga den pikin? (b) Sortoe toe blesi e kon te wan sma e hori wan krosbé banti nanga en pikin èn e kweki den na wan joisti fasi?

²⁰ Mama di tanapoe den wawan èn di e hori wan krosibé matifasi nanga den pikin, e gi a rai disi:

„Poti wan spesroetoe ten na sé foe de nanga den pikin èn no meki noti kon a mindri dati. Den osowroko sa de alaten, ma no den pikin. Poti joesrefi a tapoe foe bow den pikin na jeje fasi.” „A tranga leri foe mi ben moe kon moro safoe nanga froestan, nanga foe na skreki dati den ben lasi den mama. Mi e taki na ibri okasi nanga den, wansi sortoe ten foe a dé ofoe na neti a de. Wi abi „prisiri momenti” te wi e sreka na njanjan. Dan den pikin e gi mi troetroe na froetrow foe den.”

So wan lobi e abi krakti. Den pikin kan si èn firi disi. Aladi disi e aksi ala moeiti foe meki den pikin gro kon bigi, den bigisma abi na bigi satisfaksi foe si den gro kon de sma di e prijse Jehovah. So wan wroko de boiti dati wan moreel kibri gi na bigisma. — 1 Tim. 2:15.

NA HERI PIKI — NA NJOEN SETI

21. (a) Den problema foe wan mama di tanapoe en wawan kan loesoe makriki? (b) San wan getrouw waka nanga libi e doe?

²¹ „Pikinmoro ibri dé mi abi wan prati na a prékiwroko. Mi e studeri èn begi alaten”, wán weduwe ben taki, di ben taki opregti: „Tog ala neti nanga watra-ai mi e fadon ini sribi.” Ja, den problema di wan mama moe kaka foetoe gi, kan kisi loesoe moeilek. Foeroetron a de wan aladé stré. Tog ibri dé di wan kristen e horidoro, de wan njoen klap ini a fesi foe Satan, di ben gi libisma na nen dati den ben sa stop foe dini Gado te den omstandigheden ben sa kon de moeilek (Job 1:9-11; Spr. 27:11). Sabi dati nowan sma abi wan volmaakti lot ini libi now. „A heri gemeenschap foe oen brada” e njan pina (1 Petr. 5:9). Den problema foe wan tra sma e kenki kande foe di joe abi foe kaka foetoe gi, ma den de gi na sma dati sosrefi toe hebi. A situatie ben sa de alaten moro ogri, wansi nanga sortoe problema joe abi foe doe nanga en. Soboen, proeberi foe prakseri someni leki joe kan den positief sé foe joe libi.

22. (a) Tapoe san wi e hori wi ai, èn foe sanede? (b) San sa taki ini na tra artikel di e kon?

²² Ma moro foeroe wi moe hori wi ai tapoe a libi howpoe foe wan seti foe sani di e kon, di sa gi volmaakti satisfaksi. Na apostel Paulus ben taki ini a tori disi, dati „wi no moe hori wi ai tapoe den sani, di wan sma e si (den benawtoe di kan gi wi brokoskin èn kan trowe wi), ma tapoe den sani di wan sma no e si, (na howpoe tapoe tego libi). Bikasi den sani di wan sma kan si, de foe wan pisi ten, ma den sani di wan sma no kan si, de tego”. Ja, na druk foe a disiten, broeja seti sa stop te foe kaba. Den blesi foe na Njoen Seti, di de so krosbé, no sa abi wan kaba. Hori disi krin na prakseri, bikasi dan joe „no sa lasi ati” (2 Kor. 4:8, 9, 16-18). San trawan kan doe foe jepi mama ofoe papa di tanapoe den wawan? Disi wi sa taki ini na tra artikel.

[Foetoewortoe]