Joe kan jepi weduwe nanga pikin di no abi papa „ini den benawtoe”
1, 2. (a) San na a difrenti mindri „si” nomo dati wan sma de ini nowtoe èn „sorgoe” troetroe gi so wan sma? (b) Sortoe frantwortoe na troe aanbegi e tjari leki fa Jakobus 1:27 e taki?
WAN bigi difrenti de mindri si nomo dati wan sma de ini nowtoe ofoe sorgoe troetroe gi en. Na troe aanbegi moe kenki sma di a loekoe èn no abi interesse tron jepiman di e sorgoe gi kompe-bribiman, bikasi „na fasi foe aanbegi di foe a sé foe wi Gado nanga Tata de krin èn sondro vlaka, de disi: sorgoe gi wésipikin nanga weduwe ini den benawtoe èn hori ensrefi sondro vlaka foe na grontapoe”. — Jak. 1:27.
2 Na oorspronkelijke Griki wortoe, di vertaal ini Jakobus 1:27 nanga „sorgoe gi”, wani taki „broko joe ede, nanga, sorgoe foe den sani foe tan a libi.” A abi na ini en na prakseri foe loekoe wan sma foe gi na fanowdoe jepi. Na jepi disi e kisi bigi waarderi.
PIKIN KAN GI WARTI JEPI
3, 4. (a) Soema ini 1 Timoteus 5:4 moe broko-ede foe jepi weduwe? (b) Na sortoe fasi pikin foe mama di tanapoe den wawan kan gi jepi, èn san de na moro boen jepi di den pikin disi kan gi?
3 Na apostel Paulus e sori soema moe broko-ede nanga na jepi foe weduwe di a ben taki: „Efoe wan weduwe abi pikin nanga granpikin, meki den dati leri fosi foe sori frede foe Gado èn pai wan paiman di fiti na den mama nanga papa, granmama nanga granpapa, bikasi disi de switi na Gado ai” (1 Tim. 5:4). Aladi dja e taki foe pikin di de bigisma, dan srefi pikin di no de bigisma ete kan leri foe sori frede gi Gado foe pai na den mama nanga papa foe den wan „paiman di fiti”; papa nanga mama di ben doe someni gi den. Fa den kan doe disi? Son pikin e jepi nanga moni soleki wan boi ben doe di ben pristeri ala en moni di a ben kibri foe na afoedé-wroko foe en foe pai wan paiman di ben kon onverwakti. „A sortoe boen-ati-fasi disi foe wan 14 jari manpikin”, en mama ben taki nanga lafoe, „e gi moro tranga leki wortoe”.
4 Winsi pikin no kan foe gi moni, dan tog den kan gi moro prenspari sani — waarderi nanga gi jesi (Spr. 23:22; Ef. 6:1-3). A moro bigi pisi foe mama ofoe papa di tanapoe den wawan e aksi densrefi: „Mi e kweki mi pikin tapoe wan boen fasi?” Prakseri pikinso na prisiri foe wan mama, di ben tanapoe en wawan, di en jongoe pikin ben teken wan karta èn ben skrifi a tapoe: „Mi lobi joe tranga èn mi sabi dati joe e doe ala moeiti.” We, efoe joe de a pikin foe mama ofoe papa di tanapoe en wawan, joe ben ferteri joe papa ofoe mama no so langa pasa kaba omeni waarderi joe abi gi na offer foe en? Joe e gi jesi sondro knoroe? Joe sabi san a wani taki foe wasi dot’sani gehoorzaam, foe tjari dot’kisi go na dorosé, foe meki joe skorowroko, kon biten na oso, foe poeroe sani èn moro foeroe, foe studeri alaten joe bijbelles? So wan sondro knoroe gi jesi de na moro boen jepi di joe kan gi na joe papa ofoe mama.
FA NA GEMEENTE KAN JEPI
5. (a) San a wani taki foe „sori firi gi trawan”, èn foe sanede disi de so prenspari? (b) Na sortoe fasi na gemeente foe wi ben kan sori „firi” gi mama ofoe papa di tanapoe den wawan?
5 „A de moeilek, èn sontron a de wan hebi na mi tapoe”, wan mama di tanapoe en wawan nanga siksi pikin nanga wan twelengi foe wan nanga afoe jari. „Ma, wawan tron wan foe den brada ofoe sisa (ini a gemeente) e taigi mi: ’Joan, joe e doe wan boen wroko. Joe sa piki troetroe den froktoe foe en.’ Foe sabi dati trawan e prakseri joe èn e broko-ede nanga joe, de troetroe wan bigi jepi.” Disi e sori fa ala sma kan jepi. Na apostel Petrus e gi na tranga: „Oen alamala moe abi wan prakseri, sori firi gi trawan, sori brada lobi, sori safrifasi” (1 Petr. 3:8). Poti joesrefi ini na presi foe trawan. Wan switi wortoe, wan opregti lafoe, kan taki someni. De nanga safoefasi na presi foe feni fowtoe.
6. Foe sanede meki wan sma di ben sa handri leki na sma di 1 Johannes 3:17 skrifi foe en, de nanga fowtoe na fesi foe Gado?
6 Ini troetroe lobi moro de na ini leki switi wortoe. Let bifo na apostel Johannes ben gi kristensma foe sori na lobi foe den nanga jepi foe wroko, a ben skrifi: „Ma efoe wan sma abi den sani foe na grontapoe disi foe tan na libi èn e si en brada e pina èn tog a de sroto na doro foe en safoe sari-ati gi en, ini sortoe fasi na lobi foe Gado e tan dan ini en?” (1 Joh. 3:17). Na oorspronkelijke wortoe foe „si” no wani taki soso iti wan ai frafra na wan sma ofoe wan sani, ma sondro haasti èn nanga ala prakseri foe loekoe wan sani. A wortoe e gebroiki ini a tori foe wan generaal di e waka loekoe wan legre. So wan generaal de troetroe wan sma di nanga foeroe belangstelling e loekoe sani finifini. Soboen tjari kon ini prakseri na tafereel, di Johannes e skrifi foe en: Wan sma di abi den sani foe jepi, e si, baka di a ben loekoe finifini na en brada, dati wan fanowdoe de, ma baka dati a de sroto na doro foe en ati, èn a de tapoe disi. A de wégri foe jepi. Fa a de sondro firi! Kolokoe dati den negatief doe disi bijna no de kon na mindri Jehovah Kotoigi. Boen foeroe bericht e sori na boen-ati foe den gi den sma di e „njan pina”.
7. Te pôti osofamiri nanga wan mama e libi na wan sé, dan san de foeroe tron na problema, èn fa disi kan kisi jepi?
7 Ma geval ben de pe sma ben libi na wan sé. Nofo tron disi ben kon, foedi wan sma no ben „si” na fanowdoe. A ben misi foe ’loekoe fini fini’, nanga belangstelling na den sma di de pôti. Wi kan aksi foe dat’ede fa a de nanga a situwasi na oenoe ini na gemeente? Joe e froestan troetroe den omstandigheden foe den weduwe nanga wésipikin? Oten joe ben doe foe na laatste tron moro leki taki odi soso? Joe ben kari den oiti kon foe wan njanjan ofoe wan neti foe abi wan switi de makandra, foe kan leri sabi den moro betre? Den sortoe aksi disi e jepi wi foe froestan ofoe wi e „si” troetroe ini sortoe situwasi wan osofamiri nanga wan mama de.
8. Fa son wan ben jepi pôti osofamiri nanga wan mama nomo?
8 Bigi goedoe no de fanowdoe foe jepi. Foeroe sma di ben si troetroe wan bigi fanowdoe, ben, prati èn gi ekstra njanjan ofoe krosi, di den pikin foe den no man foe weri moro. Son wan ben leri mama di tanapoe den wawan wan bepaalde koni, soleki nai krosi, sodati den disi ben kan pasa moro boen nanga den moni foe den. Wan owroe Ingrisi odo e taki: „Gi wan man wan fisi èn joe gi en njanjan foe a dé dati. Leri en fa foe fisi, èn joe e gi en njanjan en heri libi langa”. Wan mama di tanapoe en wawan ben skrifi: „Wan sisa ben gi mi wan naimasjien, toe pisi krosi èn nailes. Sensi a ten dati mi ben kibri hondro hondro dollar.”
9. Sortoe balans loekoe den osofamiri nanga wan papa ofoe mama moe abi tapoe a tori foe kisi jepi foe tra sma?
9 Ma mama di tanapoe den wawan ini normaal omstandigheden moe froewakti boen foeroe èn lasi ati te disi no e kon? Wan sma moe hori wan balans loekoe. Aladi wan sma sa de grantangi gi ala jepi di e gi, tog wan sma moe aksi ensrefi: „Mi e doe ala san mi man foe doe wan sani na a situwasi?” Wan mama di tanapoe en wawan ben taki foe disi: „Nowan sma kan teki na sorgoe foe wan ekstra osofamiri na en tapoe. Efoe joe no jepi joe srefi, joe no e teki ala joe frantwortoe. Joe moe leri foe tanapoe tapoe égi foetoe.” Bijbel eksempre de foe getrouw weduwe di ben gi densrefi krinkrin na presi dati den ben froewakti dienst foe trawan (Luk. 2:36-38; Mark. 12:42-44). Wan mama di tanapoe en wawan, di ben fanowdoe moni èn di ben feti foeroe jari foe kweki toe pikin, ben abi wan bord na a skotoe nanga den wortoe: „Wan sma di e tjari son kon ini na libi foe trawan, no kan poeroe disi foe en égi libi.” Twarfoe jari langa a ben doe disi leki wan foeroeten-evangelie-prékiman. A ben gi ensrefi krinkrin, èn now nanga en 73 jari, a de jepi trawan te now ete. Leki wan bakapisi foe disi, noiti a ben pina. — Spr. 11:25.
10. Sortoe bewijsi de dati lepi sisa ini na fosi eeuw ben pré wan prenspari rol ini na jepi foe weduwe nanga wésipikin?
10 Ini na fosi eeuw, dan sondro degedege, lepi oema ben pré wan prenspari rol ini a jepi foe weduwe nanga wési-pikin. Foe son weduwe, wi kan taki dati den „ben assisteri den wan di ben kisi kwinsi”, kande nanga osofamiri pe wàn mama ofoe papa tanapoe den wawan (1 Tim. 5:10). Ini en brifi gi den kristensma ini Rome, dan wan kwart foe den sma di Paulus e gi odi ben de oema di ben doe getrouw nanga ofoe foe na boen foe na gemeente dienst. Foe son sma ben taki spesroetoe dati den ben wroko tranga ofoe doe wroko „ini Masra” (Rom. 16:3-15). Na oema Febe, wan ’oema-dinari foe na gemeente’ (a ben dini, dati de krin, tapoe wan officieuze fasi foe sorgoe foe den persoonlek fanowdoe foe trawan), den e skrifi foe en dati a ben feti gi foeroe sma. Sondro degedege a ben teki fesi foe jepi „foeroe sma”, sodati na gemeente ben kon tranga. Ini disi ten, lepi kristen oema, soleki Febe, e gi lobi, dekati nanga jepi, nanga sani na skinfasi, foe assisteri „den wan di ben kisi kwinsi”. — Rom. 16:1, 2.
11. (a) Sortoe jepi lepi sisa kan gi na mama di tanapoe den wawan? (b) Sortoe eksempre joe kan kari èn joe sabi kande moro eksempre?
11 Foeroe owroe kristen oema e gi jepi na jeje nanga emotioneel fasi foedi den e „leri san de boen, sodati den kan tjari den jongoe oema kon na den froestan”, foedi den e gi den froestan rai (Tit. 2:3-5). Wan mama di tanapoe en wawan ben de foe eksempre nanga-watra ini en ai baka di a ben jere wan bijbellezing foe a trowlibi. Wan owroe kristen oema aksi san psa. „Mi prakseri dati mi e sari misrefi”, a ben taki aladi a ben kré nanga ari bro. Na owroe oema ben bigin foe taki nanga en. A ben sabi fa a oema disi di ben lasi ati ben firi ensrefi, foedi 20 jari a fesi a man foe en ben gwe libi en toe. Na moro jongoe oema ben taki: „A (owroe oema) ben de na moro bigi jepi gi mi. A ben taki foeroe nanga mi èn a ben tjari mi foe go makandra nanga en ini na prékiwroko. Mi lobi en toemsi.” Foeroe lepi kristen oema ben broko-ede nanga den sortoe sma disi èn den ben gi den wan „skowroe di den ben kan kré a tapoe”, aladi den ben taki srefi foe persoonlijke problema, di wan man wawan no ben sa kan taki so boen foe den.
OEN OWROEMAN — OEN MEKI „NA ATI FOE WEDUWE PRISIRI”
12. Fa owroeman kan meki na ati foe weduwe kon prisiri?
12 „Na ati foe weduwe mi ben meki de alaten prisiri”, Job a ten bifo Kristus ben taki (Job 29:13). A ben „firi” a pen di weduwe ben firi. Na presi foe meki na pen disi kon moro ogri nanga wan wortoe ofoe doe sondro foe prakseri, a ben sorgoe dati a ben meki den prisiri na inisé — ini den ati. Den owroeman foe wan kristen gemeente ini disi ten kan doe a srefi foe gi den sortoe sma disi na djaranti dati na gemeente de wan switifasi famiri, foedi joe e gi den na firi dati den de wan pisi foe na gemeente. Den opziener ben sa kan lési wan tekst di e gi trowstoe èn di e sori sortoe blesi e komoto foe getrouwfasi. „Firi nanga den makandra” sa jepi den foe proberi foe froestan na bigi druk na emotioneel nanga mentaal fasi di foeroe mama de na ondro (1 Petr. 3:8). Leki wan bakapisi foe dati, dan den wan di fanowdoe sani sa firi densrefi fri foe kon na den foe kisi jepi. Ibri wan foe den man disi di abi jejefasi kan de troetroe leki „wan kibripresi gi sibiboesi, leki liba ini wan kondre sondro watra”. — Jes. 32:1, 2.
13. Foe sanede mama ofoe papa di tanapoe den wawan kan go na owroeman foe kisi jepi ini na teki foe prenspari bosroiti, èn sortoe jepi moe gi?
13 Ini bijbel ben taki na fesi dati Gado ben sa meki kon baka mindri en pipel foe owroeten, bekwaam „raiman” (Jes. 1:26). Na so srefi toe, den mama ofoe papa di tanapoe den wawan ini disi ten kan loekoe na owroeman foe kisi rai ini na teki foe prenspari bosroiti. Te wan sma e go na den owroeman, dan den owroeman moe gi „bekwaam tiri” èn jepi na aksiman foe si sortoe bijbel gronprakseri abi foe doe nanga na afersi. Na rol foe owroeman ofoe soema toe di wan sma e go foe kisi jepi, de di foe wan „raiman”, no di foe wan sma di e teki bosroiti gi tra sma. — Spr. 11:14; Gal. 6:5.
14. (a) Foe sanede owroeman moe proeberi foe meki wan sma kon boen baka di ben meki wan fowtoe? (b) Fa na Griki wortoe „kon boen baka” ben gebroiki ini na fosi eeuw, èn fa na sabi foe na sani disi moe abi krakti tapoe na fasi fa na „kon boen baka” disi moe pasa?
14 Wan owroeman ben sa kan si dati wan mama ofoe papa di tanapoe en wawan, leki wan bakapisi foe druk, e „meki wan fowtoe”, foedi leki eksempre e meki mofo nanga wan sma di no de wan bribiman. A brada ofoe sisa disi kande no e froestan so krin, na ernst foe so wan stap. „Brada, srefi efoe wan sma meki wan fowtoe, bifo a froestan disi”, na bijbel e gi rai, „dan joe, di abi jeje fasi, e proeberi foe meki so wan sma kon boen baka ini safrifasi” (Gal. 6:1). A so fasi owroeman nanga trawan e jepi dati „wan fowtoe” no tron wan tranga-ede waka nanga libi. Na Griki wortoe foe „meki kon boen baka” e gebroiki toe ini na betekenis foe „repareer” (Mark. 1:19). Ini na fosi eeuw a ben gebroiki foe ferteri foe a poti foe wan broko foetoe. Aladi wan datra sa moe druk pikinso, tog a sa wroko so voorzigti leki a kan! Na prakseri de, foe „meki na mankeri kon boen baka”, no foe meki a kon moro ogri. Owroeman di wani doro na ati foe so wan sma, foe dat’ede sa redeneer nanga en tapoe wan switifasi ma krin ini „safrifasi” èn jepi en foe si foe sanede a poti foe na Wortoe foe Gado ini en libi de foe na boen foe en, sodati na jeje gosontoe foe en sa go na fesi.
15. (a) Oten owroeman ben sa moe orga jepi gi weduwe di abi sani fanowdoe? (b) Foe sanede den owroeman abi jepi fanowdoe foe trawan ini na gemeente?
15 Wawan tron owroeman sa moe seti jepi gi weduwe di de den wawan. Na Trinidad wan 79 jari kristen weduwe ben kon siki tranga. A ben sori dati a ben abi terminale kanker èn 24 joeroe a wan dé a ben moe kisi sorgoe. Aladi a ben abi wan pikin pensioen, a no ben abi famiri foe jepi en. Foe meki dati na frantwortoe disi no kon tapoe wan toe sma wawan, meki den owroeman orga pikin groepoe foe kristen oema di ben de klari foe gi jepi. Moro leki siksi moen langa den oema disi ben bori gi den kristen sisa, ben wasi en krosi èn ben krin na oso, ben tjari en (nanga oto ofoe so) èn ben wasi ensrefi di a no ben kan bewégi moro. Disi ben de wan eksempre foe lobi di den birti ben froewondroe foe dati. A no de foe taki, den owroeman, no kan doe ala sani, di den fanowdoe ini den geval disi. Den abi foeroetron den égi osofamiri foe sorgoe. Ma den e prisiri foe kan doe san de ini den makti, èn den e waarderi en te trawan teki fesi foe gi jepi ini den sortoe omstandigheden disi.
BRADA — „VERLOESOE BOI SONDRO PAPA”
16. (a) Foe san mama di tanapoe den wawan e broko-ede moro foeroe foe den manpikin foe den? (b) Soema kan jepi èn fa?
16 Na mama ini wan oso nanga wan bigisma e broko-ede foe na krakti foe wan papa di no de spesroetoe gi den manpikin. Den mansma ini na gemeente moe abi na srefi prakseri leki Job, di ben taki: „Mi ben verloesoe den boi di no ben abi papa èn ibri sma di no ben abi wan jepiman” (Job 29:12). Foeroetron a fanowdoe foe opregti belangstelling ben de. Joe ben sa kan kari joesrefi den boi disi foe go nanga joe makandra ini na prékiwroko foe doe bepaalde wroko ini na Koninkrijkszaal èn srefi foe teki prati na gosontoe ontspanning. Na belangstelling disi ben sa kan „verloesoe” ofoe jepi wan boi foe wan grontapoe waka nanga libi èn ari en kon na a gemeente.
17. (a) Soema ben de wan boen eksempre foe wan sma di „ben verloesoe boi sondro papa”, èn nanga sortoe bakapisi? (b) San wan brada di trow moe hori ini prakseri ini na gi foe jepi?
17 Na apostel Petrus ben de wan sma di „ben verloesoe boi sondro papa”. A ben meki mati nanga Johannes Markus èn ben kari en srefi „Markus, mi manpikin” (1 Petr. 5:13). Na mama foe Markus, Maria, ben de kande wan mama di ben tanapoe en wawan, foedi a tori e ferteri wi dati Petrus ben go na en oso, no na a oso foe en man (Tori foe den apostel 12:12). Na toemsi boen jeje demakandra di Markus ben abi nanga Petrus èn tra kristen man, a no de foe taki ben meki dati a tron wan zendeling, di ben skrifi srefi wan bijbelboekoe. A de wan boen eksempre foe boi di wan mama wawan moe kweki den. A no de foe taki dati ibri brada di trow moe froestan dati te joe loekoe en foe a bijbel, abi na fosi frantwortoe — na sorgoe foe en égi osofamiri. Soboen, sondro foe no sorgoe boen gi „den sma foe en oso”, kan doe foeroe boen foe poti prakseri na den boi disi sondro papa ini na fasi dati disi sa tjari boen kon èn so fara leki wan sma omstandigheden e gi pasi. — 1 Tim. 5:8.
NA FUNDAMENTI FOE SO WAN JEPI — LOBI DI E OFFER ENSREFI
18. (a) Sortoe lobi e meki wi kon sabi na troe kristendom, èn fa Jezus ben sori dati? (b) Fa wi kan sori so wan lobi?
18 Na marki foe sabi wan troetroe kristen no de soso lobi, ma lobi di e offer ensrefi. Jezus ben taki gi en discipel: „Mi e gi oen wan njoen komando, dati oen lobi makandra; soleki mi ben lobi oenoe, dati sosrefi toe oenoe lobi makandra. Nanga disi ala sma sabi dati oenoe de mi discipel, efoe oenoe abi lobi gi makandra” (Joh. 13:34, 35). Na eksempre foe en tapoe a tori foe gi, ben sa de na markitiki. A „no ben prisiri ensrefi”. Foe „oenoe ede a ben kon de pôti”. „A ben gi ensrefi foe wi sondoe (foedi a dede wan toemsi pina dede).” Soso foe waka na baka na a model disi foe lobi, den discipel foe en ben sa kan sori na aandacht nanga sorgoe di weduwe nanga pikin sondro papa ben sa kan abi fanowdoe. — Rom. 15:3; 2 Kor. 8:9; Gal. 1:4; Jak. 1:27.
19, 20. A de makriki alaten foe sori lobi di e offer ensrefi? Foe sanede wel ofoe foe sanede no? (b) Soema spesroetoe wi wani jepi nanga ala prisiri?
19 O moro na druk e kon bigi èn a de kon de moro moeilek foe kaka foetoe gi wi égi problema, o moro a de makriki foe no sori firi gi na toestand pe wan tra sma de na ini èn meki wi égi libi teki wi krinkrin abra. Srefi son wan ini na fosi eeuw, „di Gado ben leri foe lobi makandra” ben moe „tan doe en moro boen” (1 Thess. 4:9, 10). Wi no moe loekoe opregti fa wi égi fasi nanga doe de nanga wi égi brada nanga sisa di de ini ongolokoe omstandigheden? Foe abi wan lobi leki di foe Jezus, e aksi dati wi offer wi libi gi wi brada. Ma efoe wi de klari foe gi wi libi abra gi wi brada, fa wi moe prakseri foe prati wi „brede” te wi si wi „brada e pina”? — 1 Joh. 3:17.
20 Na doe foe wi bijbel frantwortoe e meki wi alamala de druk bezig. Foeroetron wi ben sa wani doe moro foe jepi trawan. Ma efoe wi de klari foe doe san wi man, dan wi kan de seker dati Jehovah sabi o fara wi man èn e waarderi san wi e doe. „Meki wi doe, solanga leki na ten boen foe dati, doe boen gi alasma, ma moro foeroe gi den di abi na srefi bribi leki wi.” — Gal. 6:10.
ALA SMA E WROKO MAKANDRA FOE PASA BENAWTOE
21. (a) San mama ofoe papa di de den wawan kan doe foe kaka foetoe gi na druk ini disi ten? (b) Fa trawan ini na gemeente kan jepi den, èn a jepi disi de prenspari?
21 Te wi tjari ala sani kon makandra, wi kan taki dati mama di tanapoe den wawan kan doe san e kon now foe horidoro: (1) Froetrow now alaten tapoe Gado èn loekoe na a ten dati Gado sa meki na howpoe foe wi tapoe tego libi sa kon troe èn na lostoe foe ala sma kon troe (Ps. 37:3, 4). (2) Tan hori nanga jepi foe bijbelstudi nanga tranga begi wan krosbé matifasi nanga Gado. (3) Tan de bezig nanga a doe foe boen wroko, nanga na kownoekondre-préki, na tiri foe wan osofamiri, èn na kweki foe pikin. Lobi di e gi ensrefi sa jepi ala sma ini na gemeente foe sori firi gi na fanowdoe foe jepi mama di tanapoe den wawan. Fa? Nanga na abi foe „firi gi makandra”, nanga na sori foe belangstelling gi den pikin èn nanga na jepi foe den ini jeje nanga skin fasi, foe kari soso wan toe foe den toemsi boen doe foe na boen foe den. Omeni waarde na jepi disi abi? Wan mama di ben tanapoe en wawan ben taki: „Mi ben ondrofeni foeroe sani di no ben de switi èn di mi wani frigiti esi-esi. Ma meki mi taki disi: Sondro na jepi foe lobi èn getrouw brada nanga sisa noiti mi ben sa man foe pasa!”
22. Sortoe bakapisi a sa abi te sorgoe e gi na weduwe di abi sani fanowdoe nanga pikin di no abi papa?
22 Ja, den sma di moe „sorgoe” troetroe gi wan osofamiri nanga wan mama nomo ini nowtoe no sa si soso dati den e horidoro getrouw nomo (Jak. 1:27) Den sa sori sosrefi toe krin na égifasi foe wi hemel Tata, di „e gi jepi na den boi sondro papa nanga den weduwe!”. — Ps. 146:9.