Poti prakseri na wan lobi-ati fasi na „den boi di no abi papa”
1 Yehovah na „wan tata fu den boi di no abi papa” (Ps. 68:5). A e broko en ede nanga a tanbun fu den, èn dati de fu si na a komando di A ben gi a nâsi Israel fu owruten: „Unu no musu kwinsi nowan weduwe noso iniwan boi di no abi papa. Efu toku yu ben sa kwinsi en, dan efu a bari kari mi, dan sondro tweifri mi sa yere a babari fu en” (Ex. 22:22, 23). Ini a wet fu Gado sani ben seti sosrefi gi den sma disi fu kisi yepi na materia sei (Deut. 24:19-21). Na ini a Kresten seti, tru anbegiman e kisi a frumane „fu luku den pikin di no abi papa nanga mama èn sosrefi den weduwe, na ini a banawtu fu den” (Yak. 1:27). Na wan lobi-ati fasi Yehovah e poti prakseri na den wan di gro kon bigi na ini wan osofamiri di abi soso a papa noso a mama, noso den wan di de ini wan osofamiri pe den no abi a srefi bribi. Fa wi kan waka baka na eksempre fu Yehovah?
2 Gi Bijbel leri: Efu yu na wan papa noso mama di no abi trowpatna, noso yu abi wan trowpatna di no de na bribi, dan a kan de wan tyalensi fu hori wan osofamiri bijbelstudie doronomo nanga den pikin fu yu. Ma wan osofamiri studie di e hori doronomo èn di abi fu du nanga sani di de prenspari gi na osofamiri, sa yepi den pikin fu gro kon tron lepi bigisma di e si sani na wan yoisti fasi (Odo 22:6). A de tumusi prenspari tu fu taki ala dei nanga den fu yeye afersi (Deut. 6:6-9). Sontron, yu kan firi brokosaka, ma no lasi-ati. Aksi Yehovah fu gi yu krakti èn fu sori yu fa fu „tan kweki den [pikin fu yu] na ini a trangaleri èn a seryusu frumane fu Yehovah”.—Ef. 6:4.
3 Efu yu abi yepi fanowdu fu gi leri na den pikin, dan yu kan aksi den owruman fu yepi yu. Den kan yepi yu noso gi yu rai fu kisi wan bun gwenti fu du yeye sani na ini yu osofamiri.
4 Fa tra sma kan yepi: Aladi Timoteyus, di ben libi na ini a fosi yarihondro, ben gro kon bigi na ini wan osofamiri pe den no ben abi a srefi bribi, toku a ben tron wan fayafaya dinari fu Yehovah. A no de fu taki, dati a tranga muiti di en mama nanga granmama ben meki fu leri en den santa buku fu sensi en yongu yari, ben abi furu fu du nanga a fasi fa Timoteyus ben de (Tori. 16:1, 2; 2 Tim. 1:5; 3:15). Boiti dati, a ben kisi wini tu fu a demakandra di a ben abi nanga tra Kresten soleki na apostel Paulus, di ben kari Timoteyus en „pikin di a lobi èn di de getrow na ini masra”.—1 Kor. 4:17.
5 Na ini a ten disi sosrefi, a de wan trutru wini te brada nanga sisa di de lepi Kresten e poti prakseri na wan lobi-ati fasi na den boi nanga umapikin ini a gemeente di no abi papa! Yu sabi a nen fu ibriwan fu den? Yu e taki nanga den te yu de na den Kresten konmakandra èn na tra okasi? Aksi den fu go nanga yu na ini a preikiwroko. Kande ten na ten yu kan gi den wan kari fu kon na a osofamiri studie fu yu, makandra nanga den papa noso mama di no abi patna noso di de den wawan na ini a bribi. Yu kan seti sani tu so taki den kan abi wan moi prisiri ten nanga na osofamiri fu yu. Te den yonguwan disi sa si yu leki den mati, dan den sa de klariklari fu teki na eksempre fu yu èn fu arki te yu sa gi den deki-ati.—Fil. 2:4.
6 Yehovah e broko en ede trutru nanga den pikin di no abi papa èn A e blesi a muiti di wi e meki fu yepi den na wan lobi-ati fasi fu teki a waarheid. Furu yonguwan di gro kon bigi ini wan osofamiri pe soso a papa noso a mama de noso na ini wan osofamiri pe den no ben abi a srefi bribi, ben kisi so wan deki-ati. Now den de getrow pionier, dinari ini a diniwroko, owruman, kringopziener, zendeling noso memre fu a Bethelfamiri. Meki wi alamala suku fa wi kan meki „na ati fu wi kon bradi”, te wi e teki na eksempre fu wi hemel Tata fu sori lobi gi den wan di no abi papa.—2 Kor. 6:11-13.