Efoe Jehovah abi wan organisaatsi, san de na organisaatsi dati dan?
1. Sortoe fasi son sma e sori ini na ten disi tapoe na tori foe den wortoe „Gado organisaatsi”, èn foe sanede?
NA WAN vreemde sani dati ini na pisiten disi foe bigi koni, dati foeroe sma e degedege ofoe Gado abi wan organisaatsi. Son sma e drai-drai now, ja, e frede srefi foe gebroiki den wortoe „Gado organisaatsi”, foedi den si dati a wortoe „organisaatsi” no e tjari kon nanga tori di abi foe doe nanga Gado ofoe e gebroiki kwetkweti ini na vertaling foe den.
2. (a) Te wi loekoe Romeini 13:1, 2, wi kan taki-go-taki-kon dati den regering foe na kristenheid de Gado organisaatsi di joe kan si? (b) Sortoe aksi e kon na fesi foe Jehovah Kotoigi, di sensi 1922 orga densrefi foe meki kontroe Matteus 24:14?
2 Séker nowan redelek sma no sa prakseri-go-prakseri-kon dati den boen georganiseerde regering foe now, srefi di foe na kristenheid de Gado organisaatsi ofoe de srefi wan pisi foe en. Nowan sma ben sa kan bewijsi disi, srefi efoe wan sma ben sa gebroiki den wortoe foe na apostel Paulus ini Romeini 13:1, 2: „No wan makti de dan leki foe Gado. Èn den di de, Gado ben seti den — sodati en gi kakafoetoe gi na makti, e kakafoetoe gi gi na seti foe Gado” (Rotherham). Tokoe Jehovah Kotoigi, spesroetoe sensi na jari 1922, ben orga densrefi toemsi boen foe tjari na profétitori foe Jezus kontroe, di tnapoe ini Matteus 24:14: „Na boen njoensoe disi foe na kownoekondre sa préki tapoe na heri grontapoe leki wan kotoigi gi ala naatsi, èn dan na kaba sa kon.” We, fa disi e meki den de nanga Gado, Jehovah foe den fetiman? Den de soso wan organisaatsi di libisma ben meki èn di Gado kan gebroiki te a wani doe disi ofoe den de na grontapoe pisi foe Gado organisaatsi di joe kan si? Meki wi meki den troe tori taki foe densrefi!
3, 4. (a) Fa wi kan teki na boskopoe di na kristenheid ben meki bekenti ini den eeuw di psa èn gersi en nanga na „evangelium” di Jehovah Kotoigi ben meki bekenti sensi 1914? (b) Fa wawan disi ben kan pasa ondro vervolgoe nanga gens èn san Openbaring 14:6, 7 e sori?
3 Meki reti-ati sma teki na préki foe na evangelium foe na Kownoekondre soleki den kerki seti foe na kristenheid doe disi ini ala den hondro hondro jari èn gersi dati nanga na préki di Jehovah Kotoigi ben doe sensi na kaba foe na fosi Grontapoefeti ini 1918. Na préki foe ala toe, ben kenki. San Jehovah Kotoigi e préki de troe troe „evangelium” ofoe „boen njoensoe” foe Gado hemel kownoekondre di ben opo foedi En Manpikin Jezus Kristus ben poti tapoe na troon na a kaba foe den ten foe den heiden ini 1914 (Luk. 21:24). Na kotoigiwroko foe disi na a heri Grontapoe, aladi internationaal vervolgoe nanga gens ben kon tapoe den Kotoigi, ben man soso nanga jepi foe Gado victori jeje. Na kotoigiwroko disi no ben kan doe no nanga na jeje foe libisma èn no nanga di foe Satan. A ben doe nanga jepi foe Gado santa èngel soleki Openbaring 14:6, 7 e sori disi:
4 „Èn mi si wan tra èngel e fré ini na mindri foe na hemel, èn a ben abi tego boen njoensoe, foe meki dati bekenti leki bréti ten gi den sma di e libi na grontapoe èn gi ibri naatsi èn lo èn tongo èn ibri volkoe, taki nanga wan tranga sten: ’Frede Gado èn gi en glori, bikasi na joeroe foe na kroetoe foe en ben kon, èn anbegi foe datede En di ben meki hemel nanga na grontapoe nanga na se nanga den watra-fonten.’”
5. (a) Sortoe organisator wi moe frede now ini disi ten foe bosroiti? (b) Ini sortoe hemel konmakandra na fejanti organisator ben kon leki wan fisitiman di den no ben wani?
5 Na Sma di libisma foe dat-ede moe frede now, now di wi e libi ini na ten pe ibri sma moe teki wan égi bosroiti, de na Mekiman, na Universele Organisator. Na boekoe Job e gi wi wan esesi loekoe foe en hemel osofamiri foe èngel-manpikin. Na organisator foe na grontapoe seti foe sani sensi na froedoe foe Noach dé, Satan na Didibri, ben de wan dé wan memre foe na osofamiri dati. Ini Job 1:6, 7 a de agersi nanga wan sma di e soetoe en mofo go ini osofamiri afersi, bikasi wi e lési drape: „Now na dé doro di den manpikin foe na troe Gado ben kon foe tanapoe fesi Jehovah, èn srefi Satan ben kon toe drape na den mindri. Ne Jehovah taigi Satan: ’O pe joe komoto?’ Tapoe dati Satan piki Jehovah èn taki: ’Foe na waka lontoe foe grontapoe èn a koiri na tapoe.’” Ini Job 2:1, 2 wan srefi prenki e sori foe wan bakaten konmakandra foe den manpikin foe na troe Gado ini den hemel di wi no kan si.
6. (a) Tapoe san so wan komakandra foe den „manpikin foe na troe Gado” e sori, nanga Jehovah Gado leki fesiman? (b) Fa den „manpikin foe na troe Gado” ben kisi tranga nanga na eksempre di Job ben gi?
6 Tapoe san den toe konmakandra foe den manpikin foe Jehovah Gado e sori, èn fa den memre foe na osofamiri-groepoe dati ben kan kari nanga reti? Sortoe wortoe ofoe nen di fiti e kon ini joe prakseri? We e libi na piki na a lésiman abra. A ben de formeel konmakandra di na troe Gado nanga reti ben de na fesiman foe den. Dati Satan ben kisi pasi foe ben de tapoe den komakandra dati, no wani taki dati den ben si en ete leki wan foe „den manpikin foe na troe Gado” èn ben de alaten ete wan pisi foe Gado hemel osofamiri. Na wortoe Satan e sori kaba dati disi no de so, bikasi na nen wani taki „Gensman”. A no ben waka lontoe nanga boen prakseri tapoe na grontapoe leki wan jeje di libisma no ben kan si. A ben de kontra ibri sma di ben proberi foe hori getrowfasi na a troe Gado. Nanga pasi foe Gado a ben meki na regtvaardiki man Job di ben frede Gado ini na kondre Uz de na sma di a ben go na en tapoe. Ma a no ben man ini en lagi prakseri foe gi na universele soevereiniteit foe Jehovah Gado sjen na fesi foe libisma na grontapoe èn den engel ini hemel. Na getrow eksempre foe Job ben gi toemsi dekati na Jehovah hemel osofamiri foe èngel-manpikin.
7. Na trangajesi foe Adam nanga Eva ben poti den na dorosé foe sortoe osofamiri, èn omeni mekisani foe na jejekondre ben teki waktiwroko na tapoe den?
7 Satan ben kan prakseri dati a ben sa wini en, soleki a ben de ini na tori foe na fosi libisma na grontapoe, Adam, na manpikin foe Gado. Na a kaba foe na di foe siksi mekidé, di nowan libisma ofoe libisma mekisani ben de na grontapoe, Gado ben taki: „Meki wi meki libisma na a prenki foe wi, akroederi den fasi foe wi.” Gado no gebroiki dja na pluralis modestiae (bescheidenheidsmeervoud) „Wi”, leki a ben taki nanga ensrefi. A ben taki a moro pikinso nanga wan tra sma di a ben wani tjari kon ini na mekiwroko (Gen. 1:26). Nowan enkri sma di no e kroetoe sani na fesi sa wani dati dja hemel wroko-makandra no ben de fanowdoe. A de wan troetroe sari sani, dati den fosi libisma mekisani, Adam nanga Eva, ben teki na sé foe na jeje mekisani di no ben de foe si na baka na sneki di ben de foe si, na wan di ben sorgoe dati na sneki kari Gado wan léman. Na trangajesi foe den na Gado ben poti dja na dorosé foe Gado universele osofamiri foe pikin èn den ben poti na dorosé foe na djari foe Eden. Moro fara „Gado ben poti na a oost-sé foe na djari foe Eden den cherubs èn na brenki blad foe wan fet’owroe di e drai lontoe sondro foe stop, foe wakti na pasi di e go na a bon foe libi” inisé foe na djari (Gen. 3:24). A moro pikinso toe cherubs ben de, èn den ben de memre foe Gado hemel osofamiri di ben kisi na makti foe teki libisma skin èn sori densrefi na libisma.
8. Soboen a ben kon na krin dati trawan ben de ini Gado osofamiri, èn san Job 38:6, 7 e sori foe dati?
8 Na so fasi a de kon na krin dati na a froekoe bigin foe na de foe libisma trawan ben de kaba ini Gado hemel osofamiri. Disi e verklari toe foe sanede Jehovah Gado, di a ben aksi aksi foe na fundamenti foe grontapoe, ben taki disi: „Ini san den stonfoetoe foe en ben saka poti, ofoe soema ben poti en oekoeston, di den mamantenstari ben opo makandra wan prisiri-babari, èn ala den manpikin foe Gado ben bigin bari nanga wàn mofo foe brétifasi?” — Job 38:6, 7.
9. Sortoe rang foe hemel mekisani e kari ini Psalm, ini Jesaja 6:2 èn ini Daniël profétitori?
9 Ini Psalm 80:1 nanga 99:1 wi e lési dati Jehovah „e sdon tapoe den cherubs”. Na fasi foe skrifi so kande ben teki abra foe na dorosé vorm foe na santa ark foe na verbontoe, di ben de ini na Morosanta-pisi foe na tempel ini Jeruzalem. Tapoe na ark dati toe gowtoe cherubs ben tanapoe di den fré foe den ben sori go na makandra, aladi na mindri, na tapoesé drape na sokari Sjekina-leti ben sori ensrefi, di ben agersi dati Jehovah Gado ben de noja ini na tempel. Ini wan wondroe visioen foe na inisé foe na tempel a proféti Jesaja si Jehovah sdon tapoe en troon aladi jeje mekisani di nen seraf ben dini en (Jes. kap. 6). Boiti den seraf nanga den cherub joe abi èngel in algemeen, soleki den disi e kari ini na laatste boekoe foe na bijbel, Openbaring. Èn meki wi no frigiti toe na hemel mekisani Michaël. A de kari „wan foe den moro prenspari granman” nanga a „granman foe oenoe”, dati wani foe Daniël pipel (Dan. 10:13, 21; 12:1). Wi e lési ini Judas 9 foe datede nanga reti foe na „moro gran èngel Michaël”.
10. Foe sanede orde ben moe de ini na kroetoe di skrifi ini na visioen foe Daniël 7:1-10?
10 Na proféti Daniël e taki foe wan toemsi moi hemel visioen: „Mi tan loekoe te leki troon ben poti èn na Owroewan foe dé ben go sdon. En krosi ben de so weti leki sneeuw, èn na wiwiri foe en ede leki soifri wol. En troon ben de fajavlam; den wiel foe en ben de wan faja di e leti. Wan liba foe faja ben de di ben lon, èn di ben go na en fesi. Joe ben abi doesoen tron doesoen doesoen di ben tan dini en, èn tin doesoen tron tin doesoen di ben tan tanapoe krosbé foe en. Na Kroetoe ben teki presi, èn boekoe ben de di ben opo” (Dan. 7:9, 10). Ini na kroetoe-oso dati foe Gado orde ben moe de, spesroetoe foedi 10.000 tron 10.000 ben dini na Kroetoeman.
11. San Psalm 103:19-21 e taki akroederi nanga san taki dja na fesi, èn fa Jehovah e kari foe bigin foe 1 Samuël 1:3?
11 Akroederi nanga disi meki Psalm 103:19-21 e verklari: „Jehovah srefi ben poti en troon stéfi ini hemel; èn tapoe ala sani en égi kownoefasi ben hori tirimakti. Blesi Jehovah, o oenoe en èngel, makti ini krakti, di e doe en wortoe. Blesi Jehovah. ala oen legre foe en, oen en dinari, di doe en wani.” A de foe datede toe wan sani di fiti dati na Universele Soeverein foe sensi na momenti di 1 Samuël 1:3 ben skrifi ben kari „Jehovah foe den legre foe fetiman”. — Jak. 5:4, Nieuwe-Wereldvertaling.
12. San a de bewijsi dati de ini hemel foedi na mindri Gado hemel dienstknekti joe abi titel nanga spesroetoe nen, ja, „legre foe fetiman”?
12 Ini na leti foe ala den bijbel tekst di ben kari dja na fesi, dan san e kon krin na wi fesi te wi teki ini prakseri dati na mindri Gado hemel dienstknekti joe abi wan gran-èngel, granman, cherub, seraf, èngel nanga legre foe fetiman, aladi ala den mekisani disi foe difrenti rang nanga orde makandra nanga „den legre foe fetiman”, e handri ini volmaakti wanfasi èn e saka densrefi krinkrin na a Owroewan foe dé, Jehovah Gado? We now, a sani disi e sori krin èn e meki en fanowdoe dati ala den hemel dienstknekti disi foe Gado ben orga. Soboen, ala den sortoe dienstknekti e meki Gado organisaatsi. A wani taki dati Gado abi wan organisaatsi, èn foe disi na wortoe histadroeth ini Hebrewtongo èn organosis ini Grikitongo e gebroiki.
NA „OEMA” INI NA HEMEL
13. (a) Sortoe krakti a ben abi tapoe Gado organisaatsi di Adam nanga Eva ben sondoe? (b) San Gado ben taki soleki a sori gi na sneki, sondro dati disi ben de foe froestan gi na meti dati?
13 Di Adam nanga Eva ben sondoe na Gado, dan disi ben abi krakti tapoe En universele organisaatsi, di den ben de a grontapoe pisi foe en di joe ben kan si. Den no ben de moro langa memre foe na osofamiri di en ben de na hemel Tata, nanga Mekiman. Den ben teki na sé foe a jeje mekisani di ben tanapoe baka na lèmofo sneki. Na letterlek sneki séker no ben froestan san Gado ben wani taki, di a ben taki soleki a sori na a meti disi: „Foedi joe ben doe disi, meki joe de na ferfloektoe wan na mindri ala oso-meti èn na mindri ala den wilde meti foe boesi. Tapoe joe bere joe sa kroipi èn stof joe sa njan ala den dé foe joe libi. Èn mi sa poti feantifasi na Mindri joe nanga na oema èn mindri joe siri nanga na siri foe en. Mi sa masi joe ini na ede èn joe sa masi en ini na bakafoetoe.” — Gen. 3:14, 15.
14. Foe sanede a ben sa de wan sani di no de joisti foe tjari Gado wortoe kon letterlek tapoe na sneki èn sortoe sneki nanga oema a ben moe wani taki?
14 Efoe wi ben sa teki den wortoe dati letterlek, san den sa wani taki dan? Dati wan dede bita-ati ben sa de na mindri na letterlek sneki nanga a letterek oema. Sosrefi toe dati na siri ofoe na bakapikin foe Eva ben sa de na sondro-sari feanti foe den pikin foe na sneki dati; na sneki dati ben sa moe tan na libi te leki na siri foe na oema ben sori ensrefi. Moro fara na sneki ben sa masi na „siri” dati ini na letterlek bakafoetoe, aladi na „siri” di kisi mankeri foe en sé ben sa masi na sneki ini na ede, a de krin foe kiri na sneki. Ma omeni trowstoe disi ben sa gi na libisma-famiri èn omeni winimarki disi ben sa tjari kon gi den? Foe poeroe so wan tori letterlek kon na krin no ben abi no wan wini sref-srefi. A de tjari someni moeilijkheid dati ibri bijbel-ondrosoekoeman di de ini balans na jeje fasi de verprekti foe piki dati Gado wortoe ini Genesis 3:14, 15 wani taki wan sani na agersi fasi. Na sneki di ben aksi Eva na kori-aksi, moe agersi wan moro bigi sani, aladi na ’oema’ di kari ini disi moe de wan agersi „oema”
15. Foe sanede wi no abi foe lai soema de na agersi sneki èn o owroe a de now, foedi a de na „fosi sneki”?
15 We now, wi moe go lai foe sabi soema na na agersi sneki? Nono! Na bijbel e taki ensrefi gi wi. Ini Openbaring 12:9 na bijbel e kari na kibritori-sneki „na bigi kaiman”, „na fosi sneki, di nen Satan nanga Didibri”. A ben de na a bigin na agersi sneki èn na a ten foe 96 G.T., na a pisi ten di na apostel Johannes skrifi na boekoe Openbaring, dan Satan na Didibri leki na agersi sneki ben owroe moro leki 4100 jari kaba. Ini disi ten, now di na visioen foe Openbaring de foe kon troe, dan na „fosi sneki” dati owroe so wan 6000 jari, wan pisi ten di langa moro leki a ten di sortoe letterlek sneki ben libi oiti toe. Ini Johannes 8:44 tanapoe dati a „de wan léman èn na Tata foe na lé.”
16. (a) Sortoe toe prenspari sma e tanapoe fesi na fesi akroederi Openbaring kapitel 12, èn san kan gebore tokoe tapoe wan boen fasi? (b) Pe èn foe sanede na agersi mama kan kisi njanjan na jeje fasi na ondro waktiman ai?
16 Foedi Eva no de na oema di Genesis 3:15 e taki èn di Satan na Didibri ben lé gi nanga jepi foe na sneki, dan soema de na „oema” disi dan? Agen na boekoe Openbaring e jepi wi foe kisi wan joisti froestan. Ini kapitel 12 e taki foe a tnapoe fesi na fesi foe Satan na Didibri nanga wan „oema” di foe ede te na foetoe weri leti foe na son, na moen nanga den stari (12 stari). Na gesontoe froestan foe wi e taigi wi dati disi na wan agersi „oema” di moe de ini hemel, bikasi no wan foe den hemel èngel e kari oemasma. A oema de nanga bere èn Satan na Didibri e wakti leki wan kaiman foe swari na pikin di a de meki. Ma na hemel Tata foe na pikin dati de nanga ai èn e tapoe Satan, sodati te wan manpikin gebore, disi „e poeroe tjari go na Gado nanga en troon”, sodati foe na presi dati „a ben sa kan tiri ala naatsi nanga wan isri tiki” (Openb. 12:1-5). Na kownoe gebortoe dati no e meki wan kaba kon na a feantifasi foe Satan gi na agersi „oema” disi, bikasi a abi kibri foe na sé foe Gado fanowdoe tegen Satan, te a de kisi njanjan na jeje fasi. Dan oorlog e opo ini hemel.
17. Na kabapisi foe na oorlog ini hemel ben wani taki gi na „fosi sneki” dati a de masi ini na ede, èn sortoe krakti na kaba foe na oorlog dati ben abi tapoe den sma na grontapoe nanga na se?
17 Na gran-èngel Michaël abi na tiri foe den sroedati-makti foe „Jehovah foe den legre foe fetiman”. Nanga den legre disi foe engel Michaël e stré leki wan jepi gi na pas-gebore pikin foe „na oema” di poti tapoe na troon. Satan, „na fosi sneki” moesoe foe masi ini na ede, èn en nanga en ogrijeje-èngel e lasi na stré. Den e trowe komoto foe hemel èn slenger go na wi grontapoe. Ma nanga dati Satan no e masi ini na ede, bikasi a de te now ete libilibi. A no moe de wan froewondroe sani toe dati komoto foe hemel na kari de foe jere: „Heloe foe na grontapoe nanga na se, bikasi na Didibri saka kon na oenoe, èn a abi bigi atibron, foedi a sabi taki a abi wan sjatoe pisi ten nomo.” — Openb. 12:7-12.
18. Na wini foe Michaël nanga en legre ben de wan sékerfasi foe san gi na „kownoekondre foe Gado” èn soema ben kan prisiri foe datede?
18 Foedi na gran-èngel Michaël nanga en èngel e wini na stré èn na kownoe pikin no e poeroe foe en hemel troon na sé foe Gado, nanga reti e meki bekenti ini hemel: „Now ben kon na ferloesoe nanga na krakti nanga na kownoekondre foe wi Gado nanga a makti foe en Kristus bikasi na kragiman foe wi brada di e kragi den na wi Gado fesi dé nanga neti, ben slenger go na ondro! . . . Oen prisiri foe disi, oen hemel.”
19. San na „oema” e agersi di e meki na „pikin” èn foe sanede?
19 Na manpikin di e kari ini Openbaring 12:5 de, leki a de sori krin, wan agersi wan. Ala sani di e taki foe na „pikin” disi, e sori dati a no e agersi wan aparti sma, ma Gado kownoekondre, nanga en Manpikin Jezus Kristus leki na sma di abi na makti foe tiri ala naatsi nanga wan isri tiki, foe naki den broko pisipisi ini na „feti foe na bigi dé foe Gado na Almaktiwan” di e kon na Har-mágeddon (Openb. 16:14-16). Soleki na „pikin” no de wan aparti sma, na sosrefi toe na „oema”, en mama, no de wan aparti sma toe. Foedi na bere foe na agersi „oema” disi ben doe kon foe Gado, leki en trow-man, dan a moe de Gado jeje organisaatsi. Na organisaatsi disi e gi na groepoe dienstknekti di de wan pisi foe na hemel kownoekondre, a no e gi e wawan na glori Jezus Kristus, di, a de krin, e doe wroko leki na gran-èngel Michaël, ma a de gi sosrefi toe en jeje „brada”, di de toe den „brada” foe Gado jeje organisaatsi. — Openb. 12:10, 11.
20 Wan fika-pisi de ete foe den jeje „brada” disi tapoe na grontapoe foe wi di foeroe nanga heloe, bikasi ini Openbaring 12:17 a de taki moro fara: „Èn na kaiman ben kon atibron tapoe na oema èn a ben go foe stré nanga den wan di libi abra foe en siri, di e hori den komando foe Gado èn di abi na wroko di de ini na gi kotoigi foe Jezus”. Leki wan pisi foe na siri foe Gado „oema” den abi na kownoekondrehowpoe.
20. Fa Openbaring 12:17 e sori ofoe brada de ete foe Gado jeje organisaatsi na grontapoe?