A siri foe a Sneki — Fa den poeroe en kon na doro?

„Mi sa poti feantifasi na mindri joe nanga na oema èn na mindri joe siri nanga en siri.” — GENESIS 3:15.

1. (a) Foe san ede Jehovah de a kolokoe Gado? (b) San a doe foe meki wi abi wan prati na a prisiri foe en?

JEHOVAH na a kolokoe Gado èn a abi boen reide foe de so. En na a moro bigi èn a moro prenspari Giman foe sani di boen, èn no wan sani no de di kan gens a kontroe foe den prakseri foe en (Jesaja 55:10, 11; 1 Timoteus 1:11; Jakobus 1:17). A wani, taki den foetoeboi foe en abi prati na a prisiri foe en, èn a e gi den boen reide foe den kan abi a prisiri disi. So boen, na wan foe den moro takroe pisi ten na ini libisma historia — na oproeroe na ini Eden — a ben gi wi a fondamenti foe loekoe go na a tamara nanga howpoe. — Romesma 8:19-21.

2. Fa Jehovah ben sorgoe gi wan fondamenti foe howpoe gi den pikin foe Adam nanga Eva, di a ben koti kroetoe gi den oproeroeman na ini Eden?

² Didjonsro, wan foe Jehovah en jeje manpikin ben meki ensrefi kon tron Satan Didibri, foe di a ben gens Gado èn ben froeteri ogri-ati lei foe en. Den fosi libisma, Eva èn baka dati Adam, ben kon na ondro a makti foe en èn den ben pasa a wet, di Jehovah ben taki krin. A ben fiti taki den ben kisi dedestrafoe (Genesis 3:1-24). Tokoe, di Jehovah ben koti kroetoe gi den oproeroeman disi, a ben gi den bakapikin foe Adam nanga Eva wan fondamenti foe howpoe. Na sortoe fasi? Soleki fa skrifi na ini Genesis 3:15, dan Jehovah ben taki: „Mi sa poti feantifasi na mindri joe nanga na oema èn na mindri joe siri nanga en siri. A sa masi joe na a ede èn joe sa masi en na a bakafoetoe.” A profeititori dati na wan sroto foe froestan heri bijbel, so srefi den sani di pasa kaba èn di e pasa now di abi foe doe nanga grontapoe èn nanga den foetoeboi foe Jehovah.

San a profeititori wani taki

3. Soleki fa den sori na ini Genesis 3:15, dan sori soema na (a) a Sneki, (b) „na oema”, (c) a „siri” foe a Sneki, (d) a siri foe na „oema”.

³ Foe kan froestan san a wani taki, loekoe den difrenti pisi foe a profeititori srefi. A sma di den e taki nanga en na ini Genesis 3:15, na a Sneki — a no a soso sneki, ma a sma di ben gebroiki a sneki (Openbaring 12:9). „Na oema” a no Eva, ma Jehovah en hemel organisâsi, a mama foe den foetoeboi foe en na grontapoe, di salfoe nanga santa jeje (Galasiasma 4:26). A „siri” foe a Sneki, na a siri foe Satan, den pikin foe en — ogri jeje nanga libisma, so srefi libisma organisâsi di e sori den eigifasi foe Satan èn di e sori feantifasi gi a „siri” foe na oema (Johanes 15:19; 17:15). A „siri” foe na oema de na a fosi presi Jesus Krestes, di ben salfoe nanga santa jeje na ini 29 G.T. Den 144.000, di „gebore ete wan tron . . . foe watra nanga jeje”, èn di de erfgenaam foe a hemel Kownoekondre nanga Krestes, na wan di foe toe pisi foe a siri dati foe wan pramisi. Den ben bigin poti den disi na a siri foe na oema foe sensi a Pinksterfesa foe 33 G.T. — Johanes 3:3, 5; Galasiasma 3:16, 29.

4. Fa Genesis 3:15 abi foe doe nanga a tron di grontapoe sa tron wan paradijs, di sa foeroe nanga sma di no abi sondoe èn di no e dede?

⁴ A sma di ben meki taki a libisma famiri lasi a Paradijs foe a bedrigifasi foe en ede, ben gebroiki a troetroe sneki na ini Eden leki wan jepisani foe taki. Genesis 3:15 ben sori na a ten te den sa masi a sma di ben gebroiki a sneki dati na wan koni fasi foe doe san en wani. Dan a pasi sa opo baka gi libisma foetoeboi foe Gado foe libi na ini a Paradijs, sondro sondoe nanga dede. Dati troetroe sa de wan prisiri ten! — Openbaring 20:1-3; 21:1-5.

5. Sortoe eigifasi e sori spesroetoe soema na den jeje pikin foe Didibri?

⁵ Baka na oproeroe na ini Eden, sma nanga organisâsi ben bigin kon di ben sori eigifasi leki di foe Satan Didibri — oproeroe, lei, gongosa, nanga kiri, makandra nanga a gens di den ben gens a wani foe Jehovah èn den wan di e anbegi Jehovah. Den eigifasi dati ben sori soema ben de den pikin, den jeje pikin foe Didibri. Wan foe den ben de Kain, di ben kiri Abel di Jehovah ben feni na anbegi foe Abel boen, na presi a di foe Kain (1 Johanes 3:10-12). Nimrod ben de wan sma di en nen srefi ben sori taki a ben de wan oproeroeman èn wan sma di ben tron wan makti ontiman nanga tiriman di ben gens Jehovah (Genesis 10:9). Boiti dati, a wán owroeten kownoekondre ben kon baka a trawan, pe Babilon ben de na ini toe, nanga den relisi foe den di lanti ben horibaka gi èn di ben abi den fondamenti na tapoe lei, èn den kownoekondre disi ben kwinsi den anbegiman foe Jehovah na wan ogri-ati fasi. — Jeremia 50:29.

„Feantifasi na mindri joe nanga na oema”

6. Na sortoe fasi Satan sori feantifasi gi na oema foe Jehovah?

⁶ Na ini a heri pisi ten disi, feantifasi ben de na mindri a Sneki nanga na oema foe Jehovah, na mindri Satan Didibri nanga Jehovah en hemel organisâsi foe loyaal jeje mekisani. A feantifasi foe Satan ben de foe si di a ben tjalensi Jehovah èn ben soekoe foe pori Jehovah en hemel organisâsi, foe di a ben kori engel foe libi den joisti tanpresi (Odo 27:11; Judas 6). A ben de foe si di Satan ben gebroiki den ogri jeje foe en foe proeberi foe gens den engel boskopoeman di Jehovah ben seni kon (Danièl 10:13, 14, 20, 21). A ben de toemoesi krin foe si na ini a di foe 20 jarihondro disi di Satan ben soekoe foe pori a Mesias Kownoekondre di disi ben seti. — Openbaring 12:1-4.

7. Foe san ede den loyaal engel foe Jehovah ben abi feantifasi gi na agersi Sneki, ma tokoe fa den dwengi densrefi?

⁷ Na a sei foe Jehovah en oema, ala den loyaal engel makandra, feantifasi ben de toe gi na agersi Sneki. Satan ben pori Gado boen nen foe di a ben froeteri ogri-ati lei; a ben meki sma tweifri toe na a soifri retifasi foe ala den mekisani foe Gado di abi froestan, so srefi den engel, èn a ben proeberi fajafaja foe meki den lasi den loyaalfasi na Gado (Openbaring 12:4a). Loyaal engel, keroebim, nanga serafim no ben kan doe tra fasi leki foe firi wan tegoe gi a sma di ben meki ensrefi kon tron Didibri nanga Satan. Ma tokoe den wakti tapoe Jehovah foe seti afersi na en eigi ten nanga fasi. — Teki gersi Judas 9.

Feantifasi gi a siri foe na oema foe Gado

8. Soema Satan ben wakti e loekoe?

⁸ Ma now, Satan ben wakti e loekoe soema ben o de a Siri foe na oema di den ben froeteri na fesi foe dati, a sma di Jehovah ben taki dati a ben sa masi a Sneki na a ede. Di na engel foe hemel ben meki bekènti taki Jesus, di ben gebore na ini Betlehèm, ben de a „Froeloesoeman, di de Krestes, a Masra”, dan disi ben de wan krin boeweisi taki a ben o tron a Siri foe na oema di den ben froeteri na fesi foe dati. — Lukas 2:10, 11.

9. Fa Satan ben sori ogri-ati feantifasi, baka di Jesus gebore?

⁹ Heri esi na ogri-ati feantifasi foe Satan ben de foe si di a ben meki heiden astroloog teki wan waka di ben tjari den go fosi na kownoe Herodes na Jerusalem èn baka dati na a oso na Betlehèm pe den ben feni a jongoe boi Jesus nanga en mama Maria. Sjatoe baka dati, kownoe Herodes ben gi komando foe kiri ala den boi di ben de toe jari noso moro jongoe, na ini èn na lontoe Betlehèm. Nanga disi, Herodes ben sori taki a ben abi wan didibri sortoe bita-ati gi a Siri. A ben de krin taki Herodes ben sabi heri boen taki a ben proeberi foe kiri a sma di ben o de a Mesias (Mateus 2:1-6, 16). Historia e boeweisi taki kownoe Herodes ben de wan sma di no ben hori ensrefi na no wan gronprakseri, a ben de nanga triki, èn ben lobi foe kiri sma — foe troe a ben de wan siri foe a Sneki.

10. (a) Fa Satan srefi ben proeberi foe gens a prakseri foe Jehovah ini a tori foe a pramisi Siri, baka di Jesus teki dopoe? (b) Fa Satan ben gebroiki den djoe relisi fesiman foe doro den marki foe en?

¹⁰ Baka di Jesus ben kisi salfoe nanga santa jeje na ini 29 G.T. èn Jehovah ben taki na hemel dati a ben erken Jesus leki en Manpikin, dan Satan ben proeberi ibri leisi baka foe meki Jesus broko kindi gi tesi, èn na so fasi a ben soekoe foe gens a prakseri di Jehovah abi nanga en Manpikin (Mateus 4:1-10). Di a no ben man doe dati, a ben go doro foe gebroiki libisma jepiman foe doro en marki. Den hoigri relisi fesiman ben de na mindri den sma di a ben gebroiki foe proeberi foe gi Jesus wan takroe nen. Den ben meki lei nanga gongosa, den sortoe triki di Satan srefi ben gebroiki. Di Jesus ben taigi wan lanman: „Hori deki-ati, . . . joe kisi pardon foe joe sondoe”, dan den leriman foe wet, sondro foe wakti foe si efoe a man troetroe ben kon betre, ben kroetoe Jesus leki wan sma di ben afrontoe Gado (Mateus 9:2-7). Di Jesus ben dresi sma na Sabadei, dan den Fariseiman ben kroetoe en leki wan sma di ben broko a Sabadeiwet èn den ben poti mofo makandra foe kiri en (Mateus 12:9-14; Johanes 5:1-18). Di Jesus ben jagi poeroe ogri jeje na sma tapoe, den Fariseiman ben kragi en taki a ben abi foe doe nanga „Be-èlsebub, a tiriman foe den ogri jeje” (Mateus 12:22-24). Baka di Lasarus ben opo baka na dede, dan foeroe sma ben poti bribi na ini Jesus, ma den edeman-priester nanga Fariseiman ben poti mofo makandra agen foe kiri en. — Johanes 11:47-53.

11. Soema Jesus ben sori, dri dei fosi a dede, taki den ben de wan pisi foe a siri foe a Sneki èn foe san ede?

¹¹ Tapoe 11 Nisan 33 G.T., Jesus, di ben sabi heri boen san den ben abi na prakseri, ben go na ini a tempel djari na Jerusalem èn drape, sondro foe frede, a ben meki a kroetoe na tapoe den bekènti na poebliki. Leki wan groepoe, den leriman foe wet nanga Fariseiman doronomo ben sori sortoe sma den ben de; dati meki Jesus ben taki: „Heloe foe oenoe, leriman foe wet nanga Fariseiman, hoigriman! bika oenoe e sroto a kownoekondre foe hemel gi den sma; bika oensrefi no e go na ini, èn den sma di de na pasi foe go na ini, oenoe no e gi den pasi foe go.” Na wan krin fasi Jesus ben froeklari taki den ben de wan pisi foe a siri foe a sneki, di a ben taki: „Sneki, sneki pikin, fa oenoe sa man lon komoto gi a kroetoe foe Gehèna?” (Mateus 23:13, 33) Den wortoe di a ben gebroiki e memre wi na a profeititori na ini Genesis 3:15.

12, 13. (a) Fa den edeman-priester nanga den leriman foe wet ben gi moro boeweisi foe soema a jeje papa foe den ben de? (b) Soema ben moksi densrefi nanga den? (c) Fa den masi a Siri foe na oema na a bakafoetoe, leki wan kontroe foe Genesis 3:15?

¹² Di den ben jere Jesus wortoe, den ati ben sari, so taki den ben kan begi Gado foe kisi a sari-ati foe En? Den ben abi berow foe a godelowsoefasi foe den? Nôno! Markus 14:1 e froeteri taki a srefi dei baka dati ete, na wan konmakandra na ini a fesi djari foe a granpriester, „den edeman-priester nanga den leriman foe wet ben soekoe wan fasi foe graboe [Jesus] na wan triki fasi èn kiri en”. Den ben tan sori a jeje di Satan abi foe wani kiri sma, a sma disi di Jesus ben kari wan kiriman kaba (Johanes 8:44). No langa baka dati, Judas Iskariòt, di Satan ben meki tron wan sma di ben fadon komoto na bribi, ben moksi ensrefi nanga den. Judas ben gowe libi a Siri foe Gado oema, di ben de sondro fowtoe, èn ben go moksi ensrefi nanga a siri foe a Sneki.

¹³ Froekoe mamanten 14 Nisan, den memre foe a djoe relisi kroetoe ben tjari Jesus leki wan strafoeman go na a tiriman foe Rome. Now a ben de den edeman-priester di ben teki fesi foe bari taki den ben moesoe spikri en na wan postoe. Di Pilatus ben aksi: „Mi sa spikri oen kownoe na wan postoe?”, dan a ben de den edeman-priester di ben piki: „Wi no abi no wan tra kownoe boiti caesar” (Johanes 19:6, 15). Ija, den ben sori na ala fasi taki den ben de wan pisi foe a siri foe a Sneki. Ma a ben de seiker taki den no ben de den wawan. A tori di skrifi na ini Mateus 27:24, 25 na ondro krakti foe santa jeje, e froeteri disi: „Pilatus ben teki watra èn ben wasi en anoe na fesi foe na ipi.” Baka dati a heri pipel ben taki: „En broedoe sa kon na wi tapoe èn na tapoe wi pikin.” Na so fasi foeroe djoe foe a geslakti dati ben meki sma kon sabi den leki wan pisi foe a siri foe a Sneki. Bifo a kaba foe a dei dati, Jesus dede. Nanga a gebroiki di Satan ben gebroiki en siri di sma ben kan si nanga ai, a ben masi a Siri foe Gado en oema na a bakafoetoe.

14. Foe san ede a no ben wani taki dati Satan ben wini di a ben masi a Siri foe na oema na a bakafoetoe?

¹⁴ Satan ben wini? Kwetikweti! Jesus Krestes ben wini grontapoe èn a ben wini a tiriman foe grontapoe (Johanes 14:30, 31; 16:33). A ben hori en loyaalfasi na Jehovah te na en dede. A dede foe en leki wan volmaakti libisma ben sorgoe gi a loesoe-paiman di ben de fanowdoe foe bai a reti foe libi baka di Adam ben lasi. Na so fasi a ben opo a pasi foe têgo libi gi den wan di ben sa sori bribi ini a seti dati èn di e gi jesi na den komando foe Gado (Mateus 20:28; Johanes 3:16). Jehovah ben opo Jesus na dede foe go libi na hemel sondro foe man dede. Na Jehovah en reti ten, Jesus sa masi Satan kiri. Na ini Genesis 22:16-18, dan den ben taki nanga jepi foe profeititori taki Jehovah sa sori boen-ati na ala den famiri foe grontapoe di e doe san de fanowdoe foe blesi densrefi nanga jepi foe a loyaal Siri dati.

15. (a) Fa den apostel foe Jesus ben tan poeroe kon na doro baka a dede foe Jesus, soema ben de a siri foe a Sneki? (b) Sortoe tra feantifasi a siri foe a Sneki sori te na ini a ten foe wi?

¹⁵ Baka a dede foe Jesus, den kresten di salfoe nanga santa jeje, ben tan poeroe kon na doro soema na a siri foe a Sneki, neleki fa a Masra foe den ben doe. Paulus, di santa jeje ben boeweigi, ben warskow gi „a sma foe kroektoedoe” di en denoja ben sa de „akroederi a wroko di Satan e wroko” (2 Tesalonikasma 2:3-10). A „man” disi di de leki wan groepoe, sori foe de den kerki tiriman foe krestenhèit. A siri foe a Sneki, foe en sei, ben froefolgoe den bakaman foe Jesus Krestes na wan ogri-ati fasi. Na ini a profeititori di skrifi na ini Openbaring 12:17, na apostel Johanes ben froeteri na fesi taki Satan ben o tan feti nanga a fikapisi foe a siri foe Gado en oema, te na ini a ten foe wi. Dati na soifri san pasa. Na foeroe kondre, den tapoe a wroko foe Jehovah Kotoigi, bigi ipi sma fon den, den poti den na strafoe-oso, noso trowe den na ini strafoeman kampoe foe di den sori na wan krakti fasi taki den teki a sei foe Gado Kownoekondre nanga den regtfardiki pasi foe en.

Poeroe kon na doro na ini a ten disi soema na a siri foe a Sneki

16. Na ini a ten disi, soema den poeroe kon na doro leki wan pisi foe a siri foe a Sneki, èn fa?

¹⁶ Neleki fa Jesus Krestes ben doe, na so troe kresten, sondro foe frede, no tapoe foe poeroe kon na doro soema na a Sneki nanga en siri. Na ini 1917, den Bijbel Ondrosoekoeman, soleki fa sma ben sabi Jehovah Kotoigi na a ten dati, ben tjari a boekoe The Finished Mystery kon na doro, pe den ben poeroe a hoigrifasi foe den kerki tiriman foe krestenhèit kon na doro. Baka dati, na ini 1924, den ben druk wan bosroiti di ben nen Ecclesiastics Indicted (Wan kragi kontrari den kerki tiriman). Feifitenti miljoen eksemplaar ben prati na heri grontapoe. Na ini 1937, J. F. Rutherford, di ben de presidenti foe a Waktitoren Genootschap na a ten dati, ben poeroe na wan krakti fasi kon na doro soema ben de a siri foe Satan, na ini lezing di ben nen „Den poeroe en kon na doro” nanga „Relisi nanga krestendom”. A jari baka dati, ala di sma ben e arki na 50 kongres na difrenti kondre, a ben gi a lezing „Loekoe den troe tori” nanga jepi foe radio-telefon na Londen, Ingrisikondre. Wan moen na baka, wan bigi groepoe radio station na Amerkankondre ben abi a lezing, di ben nen „Fasisme noso foe de fri”. Den boekoe leki Enemies (Feanti) nanga Religion (Relisi) nanga a brochure Uncovered (Tjari kon na krin), ben horibaka gi a krakti fasi fa den lezing disi ben poeroe sani kon na doro. Akroederi den sani di ben tjari kon na doro foe sensi 1920, a boekoe De Openbaring — Haar grootse climax is nabij!a (Na Openbaring — En moro bigi heimarki de krosibei!), di druk now na ini 65 tongo, e sori soema na den kroektoe politiek tiriman nanga bisnisman di abi bigi-ai èn di no de eerlijk, taki den na wan foe den moro prenspari memre foe a Sneki en siri di wi kan si nanga ai. Te politiek fesiman e meki en tron wan gwenti foe gebroiki lei foe kori den borgoe foe den, foe no sori lespeki gi a santafasi foe broedoe, èn foe kwinsi den foetoeboi foe Jehovah (èn na so fasi e sori bita-ati gi a siri foe Gado en oema), dan troetroe den e sori taki den na wan pisi foe a siri foe a Sneki. Na so a de toe nanga den bisnisman di no de eerlijk, èn di sondro taki a konsensi foe den e fon den, e froeteri lei foe kisi wini na monisei èn di e meki noso e seri sani di sma sabi taki den e tjari siki kon.

17. Sortoe okasi de ete gi sma nanga bigi nen èn di kande sa kon foe a sistema foe grontapoe?

¹⁷ A no ala sma di relisi foe grontapoe, politiek, noso bisnis pori, sa tan si leki wan pisi foe a siri foe a Sneki te foe kaba. Son wan foe den man nanga oema disi kon lobi Jehovah Kotoigi. Den e gebroiki a makti foe den foe jepi den, èn baka wan pisi ten den e teki waarheid srefi. (Teki gersi Tori foe den Apostel 13:7, 12; 17:32-34.) Na ala den sma disi, a kari disi gi: „O kownoe, sori taki oenoe abi inzicht; meki den poti oenoe tapoe a reti pasi, o kroetoeman foe grontapoe. Dini Jehovah nanga frede èn prisiri nanga beifi. Bosi a manpikin, so taki En ati no e bron èn oenoe no lasi gowe foe a pasi, bika en atibron e opo kon makriki. Kolokoe foe ala den wan di e soekoe froeloesoe na en” (Psalm 2:10-12). Ija, a de toemoesi prenspari gi ala sma di wani a boen-ati foe Jehovah foe doe wan sani now, fosi a hemel Kroetoeman e naki a doro foe okasi tapoe!

18. Soema de tokoe anbegiman foe Jehovah, ala di den no de wan pisi foe a siri foe na oema?

¹⁸ Soso den wan di sa de foe a hemel Kownoekondre, de wan pisi foe a siri foe na oema. Den no de foeroe (Openbaring 7:4, 9). Ma wan bigi ipi tra sma de, ija, miljoenmiljoen foe den, di leki anbegiman foe Jehovah e loekoe go na fesi foe kan kisi têgo libi na ini wan paradijs na grontapoe. Nanga wortoe èn na ini doe, den e taigi den salfoewan foe Jehovah: „Wi wani go nanga oenoe, foe di wi jere taki Gado de nanga oenoe.” — Sakaria 8:23.

19. (a) Sortoe bosroiti ala sma moesoe teki? (b) Soema spesroetoe e kisi wan opregti kari foe handri nanga koni, ala di okasi de ete?

¹⁹ Now a de a ten pe a heri libisma famiri moesoe teki wan bosroiti. Den wani anbegi Jehovah èn hori en soevereiniteit hei, noso den sa meki Satan de a tiriman foe den foe di den e doe den sani di e plisi en? So wan feifi miljoen sma foe ala nâsi teki Jehovah sei makandra nanga den wan di tan abra foe a siri foe na oema, den Kownoekondre erfgenaam. Aiti miljoen trawan sori belangstelling foe di den e studeri bijbel nanga den Jehovah Kotoigi noso foe di den e go na den konmakandra foe den. Jehovah Kotoigi e taigi ala den sma disi: A doro foe okasi opo ete. Teki Jehovah sei sondro foe tweifri. Erken Krestes Jesus leki a pramisi Siri. Moksi joesrefi nanga prisiri nanga Jehovah en organisâsi di wi kan si nanga ai. Meki a de so taki joe abi wan prati na ala den blesi di A sa gi nanga jepi foe a tiri foe a Kownoe, Krestes Jesus.

[Foetoewortoe]

Joe e memre disi ete?

◻ Soema na a Sneki di den e taki foe en na ini Genesis 3:15? Èn soema na a oema?

◻ San na den eigifasi di e sori spesroetoe soema na a siri foe a Sneki?

◻ Fa Jesus ben poeroe kon na doro soema ben de a siri foe a Sneki?

◻ Foe soema den poeroe kon na doro taki den de wan pisi foe a siri foe a Sneki na ini a ten disi?

◻ Sortoe toemoesi prenspari sani wi moesoe doe, so taki sma no e si wi leki wan pisi foe a siri foe a Sneki?

[Prenki na tapoe bladzijde 9]

Jesus ben poeroe kon na doro taki hoigri relisi fesiman ben de wan pisi foe a siri foe a Sneki