Wrokosani foe tjari wisrefi leki lagiwan
1. Sortoe bodoi foe na bijbel di wi ben loekoe ini na artikel na fesi, kan jepi wi foe tjari wisrefi leki lagiwan?
SAN sa jepi wi foe tjari wi srefi leki lagiwan? Ala sani di taki ini na artikel na fesi foe den takroe froktoe di e kon te wan sma no e tjari ensrefi leki wan lagiwan, moe de troetroe wan warskow gi wi foe doe disi wel. Wi no sa wani tapoe kwetkweti foe feti baka na libi, a no so? Na a tra sé, ala toemsi boen eksempre foe na bijbel foe den sma di ben tjari densrefi wel leki lagiwan èn den paiman di den ben kisi, moe gi wi dekati foe wani waka na den baka.
2, 3. (a) Fa wan boen matifasi nanga Jehovah kan jepi wi foe tjari wisrefi leki lagiwan? (b) Foe sanede sakafasi kan jepi wi?
2 Aladi kande sonwan foe wi no ben kon tapoe na prakseri disi, tog wan boen matifasi nanga Jehovah Gado de na moro bigi wrokosani ini na tori disi. Te wi poti wi froetrow krinkrin tapoe en, dan wi no sa broko wi ede toemsi dati sma kande sa teki afoe foe san wi moe kisi, sa kisi wan wroko di no de so prenspari ofoe den sa frigiti wi. Ja, wi wani „froetrow tapoe Jehovah nanga wi heri ati èn no hengi tapoe wi égi froestan. Efoe wi poti prakseri ini ala wi pasi tapoe en, a sa meki wi pasi reti, foe na boen foe wi” (Spr. 3:5, 6). Boiti dati, wi abi na froetrow dati a sa meki en wroko wroko makandra foe na boen foe wi. — Rom. 8:28.
4, 5. (a) Fa na teki foe na gronprakseri foe makti na wi tapoe kan jepi wi ini na afersi disi? (b) Fa wi kan agersi disi boen?
4 Sosrefi toe a de wan jepi gi wi te wi e teki na gronprakseri foe makti tapoe wi. Alaten te wroko moe doe pe moro leki wán sma de fanowdoe, dan wan sma moe de di e teki fesi èn di ini na teki foe besroiti abi na laatste wortoe, foedi noso broeja sa de èn sma sa wroko psa makandra. Nanga tra wortoe, organisaatsi de fanowdoe. Wan organisaatsi pe foeroe sma de na ini kan gersi nanga na libisma skin. Fa wi skin abi foeroe memre èn tokoe na wan ede e tjari den alamala. A kan de troe dati son wan foe den memre e kon moro na fesi èn den de moro prenspari leki den trawan, ma soleki na apostel e sori so krin, dan no wan memre kan taki gi wan tra memre: „Mi no abi joe fanowdoe.” Ala memre de fanowdoe. Efoe wi e waka baka na model disi, dan wi no moe de tevréde foe kan abi wan prati na a kontroe foe na gemeenschappelek marki foe na organisaatsi? — 1 Kor. 12:21.
5 O prenspari a de foe teki na gronprakseri foe makti na wi tapoe, wi kan agersi boen te wi denki na wan groepoe pokoeman, wan orkest. Ini wan bigi symfonie-orkest kande so wan hondro koni pokoeman kan de, èn ete ibriwan foe den moe tjari ensrefi leki wan lagiwan. Srefi a tiriman foe den pokoeman moe tjari ensrefi leki wan lagiwan, foedi a de verprekti foe tjari na pokoe kon na so wan fasi na fesi neleki na skrifiman foe na pokoe ben abi dati na prakseri foe a moe de. Èn ala pokoeman ini na orkest moesoe poti prakseri tapoe na tiriman, sodati den de lagiwan na fesi foe en. Èn disi a no ala ete, bikasi ini ibri groepoe pe moro leki wan pokoeman e pré wan bepaalde instrument, wan „fesiman” de, aladi den e froewakti foe ala tra pokoeman ini na groepoe dati, dati den sa waka so soifri leki den kan na en baka. A so joe abi ini na groepoe foe den fosi finjoro na concertmeester. Soso nanga jepi foe so wan seti, moi, harmonisch pokoe kan kon. Ja, nanga na teki foe na gronprakseri foe makti na wi tapoe, wi sa kisi jepi foe tjari wisrefi leki lagiwan.
NA JEJE FOE WAN GESONTOE FROESTAN NANGA GADO SANTA JEJE
6, 7. Na sortoe fasi na jeje foe wan gesontoe froestan kan jepi wi foe tjari wisrefi leki lagiwan?
6 Te wi abi na jeje foe wan gesontoe froestan, dan dati sa de so srefi toe wan jepi gi wi ini a tori disi. Na apostel Paulus e gi wi na rai: „Akroederi na no-ferdini-boenati di ben gi wi, mi e taigi ibri wan foe oenoe, foe no denki moro foe ensrefi leki de fanowdoe, ma foe denki nanga wan gesontoe froestan, ibri wan nanga a bribi di Gado ben gi en” (Rom. 12:3). Te wi loekoe wisrefi nanga krin-ai èn sondro memre èn wi no e gi pasi dati bigimemre ofoe égibelang troeboe na kroetoe foe wi, dan wi kan feni foeroe rede foe tjari wisrefi leki lagiwan. Fa so?
7 Ibriwan foe wi sabi ensrefi moro boen leki sortoe tra sma. Moro boen leki sortoe tra sma wi moe kan si fa wi e misi foeroe ini den sani di wi ben sa moe de èn doe. Paulus ben djeme ini disi: „Mi no e doe san mi wani doe, ma mi e doe joisti san mi e tegoe foe en” (Rom. 7:15, Petrus Canisiusvertaling). Leki kristen wi abi boiti dati na verprekti foe no kroetoe tra sma tranga ma foe loekoe psa den onvolmaakti fasi foe den èn prakseri boen foe den te wan sani no de seker. Ma sondro degedege wi sabi wi égi swakifasi èn wi sabi kande ini sortoe geval wi ben meki wan fowtoe bewégi foe ati abi krakti tapoe wi. Soboen, soso kaba tapoe na gron foe na troe tori disi, wi moe de klari foe tjari wisrefi leki lagiwan na fesi foe tra sma. Degedege no de ini disi: Efoe wi abi na jeje foe gesontoe froestan, dan disi sa jepi wi ini den sortoe afersi disi. — 2 Tim. 1:7.
8. Fa wi kan kisi jepi foe tjari wisrefi leki lagiwan te wi abi waarderi gi na krakti foe Gado santa jeje?
8 Wan boen waarderi foe na krakti foe Gado santa jeje sa jepi wi toe foe tjari wisrefi leki lagiwan. Wansi wi abi kabesa ofoe koni, ini Jehovah organisaatsi a de go foe a santa jeje foe Gado (Zach. 4:6). A ben de na santa jeje dati di ben meki den fosi kristen de so boen ini na diniwroko foe den, sodati den feanti foe den ben kragi, dati den kristen „ben drai na grontapoe ondro kon na tapoe” (Tori foe den Apostel 17:6). A ben de foe Gado jeje ede dati den ben kan taki fri èn sondro frede, di den ben kon tanapoe na fesi den kerki fesiman, aladi den ben de gewoon sma di no ben kisi leri te joe loekoe den foe wan natuurlek standpunt (Tori foe den Apostel 4:13, 29-31). Te wi e froestan dati ala brada nanga sisa abi Gado jeje, dan disi sa jepi wi foe tjari wisrefi leki lagiwan na fesi foe den, wansi wi abi moro koni ini bepaalde sani, te joe loek en foe grontapoe sé. Nanga disi a moe de moro makriki gi wi foe waka baka na rai: „Teki fesi ini na sori foe respeki gi makandra”. — Rom. 12:10.
9. Sortoe krakti a moe abi tapoe wi te wi e froestan dati Jehovah kownoekondre de a moro prenspari sani?
9 Soboen, wi e froestan o prenspari Gado kownoekondre de? Efoe disi de so, dan wi sa de klari foe poti den afersi foe na kownoekondre disi ini na fosi presi ini wi libi. Boiti dati, disi sa jepi wi foe tjari wisrefi leki lagiwan. Foe san-ede wi kan taki dati? Foedi te wi froestan dati na kownoekondrewroko di wi alamala e doe, de na moro prenspari sani èn no wisrefi, dan wi no sa broeja efoe toevallig den djompoe wi abra tapoe a tori foe a grani foe wan wroko, di wi ben wani kisi sote. Wi moe teki Gado wroko tranga èn no wisrefi. Te joe loekoe en boen, na soso wantoe prati de tapoe den difrenti gemeente-konmakandra, soso wantoe prati de tapoe a programma foe wan kringkonmakandra, soso wantoe prati de tapoe na programma foe wan districtscongres. Soboen, a no kan tra fasi dati son wan foe wi no e kisi na okasi. Efoe disi pasa nanga wi, meki wi prisiri nanga den brada di kisi den grani wèl prefoe wi djaroesoe nanga den. Meki wi abi na jejefasi foe na psalm-singiman: „Bikasi wan dé ini joe gadri de moro boen leki doesoen na wan tra presi. Mi ben teki na tanapoe na a dromofo ini na oso foe mi Gado moro bigi leki na waka lontoe ini den tenti foe den ogriwan”. Ja, a moro boen foe de wan lagiwan ini Jehovah organisaatsi leki abi barinen ini Satan ogri organisaatsi di e go na pori. — Psalm 84:10.
PRAKTISCH KONI
10. Foe sortoe situwasi di no switi wi kan kibri wisrefi te wi tjari wisrefi leki lagiwan?
10 Gado Wortoe na bijbel abi foeroe foe taki foe praktisch koni. A de sori foe eksempre fa a de wan koni sani foe gebroiki srapoe wrokosani, sodati wan sma no afoe foe span ensrefi foe soso (Pred. 10:10). A de gi wi sosrefi toe praktisch rai foe na fanowdoe foe tjari wisrefi leki lagiwan. Jezus ben tjari disi kon a krin , soleki wi e lési ini Lukas 14:8-11: „Te wan sma kari joe foe kon tapoe wan trow-oso, dan no go didon tapoe den moro prenspari presi. Kande na a srefi ten wan sma de di de moro prenspari leki joe, di a kari kon, èn dan na sma di ben kari joe leki en kon, sa kon èn taigi joe: ’Gi na presi na a man disi.’ Èn dan nanga foeroe sjen joe moe go na a moro lagi presi. Ma go didon, te den kari joe kon, na a moro lagi presi, sodati te na sma di ben kari joe kon, e kon a sa taigi joe: ’Mati, go moro hé’. Dan joe sa kisi grani ini na ai foe ala tra sma di kon. Bikasi ala sma di hé ensrefi, sa poti go lagi èn soema lagi ensrefi sa poti go na hé.”
11. (a) Foe san-ede meki wan boen matifasi e kon nanga trawan te wi e tjari wisrefi leki lagiwan? (b) Ini sortoe tra sani na jejefasi disi de wan jepi?
11 Nanga reti wi kan taki toe, dati a de wan sori foe praktisch koni te wan sma e proberi foe kon ini wan boen matifasi nanga tra sma. Foe tjari joesrefi leki wan lagiwan, de wán fasi foe doro na marki dati. A de wan fasi foe libisma foe soekoe en égi wini, èn efoe wi e soekoe grani ofoe e poti wisrefi foe de boen dorodoro, dan wi e meki trawan no e firi densrefi boen. Ma efoe wi e tjari wisrefi leki lagiwan, dan wi no de wan gevaar foe na positie foe trawan èn wi no e meki den e firi densrefi no seker of lek wan soso sani. Wi no sa de na sani di e meki den teki na fasi foe feti. Leki wan bakapisi foe dati den sa wani foe sori wi moro switifasi nanga lobi. Moro leki dati, te wi e tjari wisrefi leki lagiwan , dan disi sa tapoe wi foe doe ala san wi man foe stréfasi ede foe sori dati wi boen dorodoro. Disi sa tapoe wi foe de asranti foe go doe sani di wi no abi na koni ofoe den mogelijkheden; a sa tapoe wi, soleki na odo taki, ’poti toemsi dré grasi tapoe wi forkoe’. Ofoe soleki Jezus taki en moro boen, a de wan sori foe koni foe teri den kostoe. Boiti dati, praktisch koni sa tapoe wi foe pramisi moro leki wi kan doe. — Luk. 14:28.
12. Sortoe boen a kan tjari kon te wi tjari wisrefi ini na osofamiri leki wan lagiwan?
12 Praktisch koni di e meki wi tjari wisrefi leki lagiwan, abi foe doe toe nanga na osofamiri. Wan koni oema foe eksempre sa de tevréde foe pré wan sakafasi rol pe ai jepi a fesi foe en trowman, nanga ini prakseri dati disi e jepi na vréde ini na osofamiri èn de boen foe na kolokoe foe den memre foe na oso. Te a de klari foe doe na rol disi, a de wini na lobi foe en masra èn a sa tjari kon so fara foe wani doe sani gi en. Èn san ben sa meki wan oema moro kolokoe dan foe abi wan man di de so boen gi en, dati nanga wortoe èn doe, a de sori alaten dati a abi waarderi gi en èn lobi en? Ini disi a de toe wan sori foe praktisch koni te wan man erken den sani di en oema de boen dorodoro a ini èn a de tevréde foe pré a rol di de moro lagi èn a de gi en na erkenning disi na ondro en makti leki edeman. Disi sa abi a srefi boen krakti tapoe en oema.
LOBI SONDRO GRIDI FASI DE NA MORO BIGI WROKOSANI
13, 14. (a) Fa lobi sondro gridi fasi ben de wan jepi ini na tori disi gi (a) Jonathan, (b) gi Jezus Kristus?
13 Lobi nanga sondro gridi fasi sa jepi wi foe tjari wisrefi leki lagiwan? Ja, èn srefi moro leki ala tra sani! Wi abi wan toemsi moi eksempre ini na persoon foe Jonathan, na manpikin foe kownoe Saul. Wi e lési dati wantron-wantron baka di David ben wini na reus Goliath, „na sili foe Jonathan ben tai kon krosbé na a sili foe David èn Jonathan ben kon lobi en leki en égi sili” (1 Sam. 18:1). Baka wan pisi ten Jonathan bigin froestan dati a no en ma David Jehovah ben teki foe teki na presi foe Saul leki kownoe foe Israël. Ma prefoe Jonathan ben djaroesoe nanga David, a ben taki foe na lobi foe en ede foe David: „No frede; bikasi na anoe foe mi tata Saul no sa feni joe, èn joe sa de kownoe foe Israël, èn mi sa tron baka joe na di foe toe.” — 1 Sam. 23:17.
14 Fa wi abi sosrefi toe wan toemsi moi eksempre ini na persoon foe Jezus Kristus! Jezus ben taki: ’Mi abi lobi gi na Tata.’ Foe na lobi dati ede, meki noiti Jezus prakseri wan momenti foe wani de speri foe en Tata, ma a ben froestan alaten dati Jehovah Gado ben de en edeman (Joh. 14:31; 1 Kor. 11:3; Fil. 2:6). Moro fara Jezus ben de klari foe dede gi en salfoe foetoeboi di ben wani waka ini en foetoestapoe, foe na bigi lobi di a ben abi gi den (Ef. 5:25). Na eksempre foe Jezus tapoe na tori foe sakafasi nanga lobi, moe jepi wi seker foe tjari wisrefi leki lagiwan.
15. Sortoe toemsi moi eksempre foe wan sma di ben tjari ensrefi leki wan lagiwan, na apostel Paulus ben gi?
15 Wi ben taki kaba dati na apostel Paulus ben tjari ensrefi leki wan lagiwan na fesi foe en kompe kristen. Foe sanede? Foe en bigi lobi gi den. Di a ben skrifi foe datede gi en kompe kristen ini Rome, a no ben loekoe na fesi wawan foe kan tranga den bribi, ma sosrefi toe, leki wan bakapisi foe wan kenki foe dekati, dati den tranga en bribi toe (Rom. 1:8-12). Wan srefi prakseri e kon na fesi ini en wortoe gi den brada ini Korinte: „Wi mofo opo gi oenoe, oen korinte sma, wi ati ben kon moro bradi. Na ini wi oen no de ini wan pikin presi, ma ini oen safri lobifasi oen de ini wan pikin presi. Leki wan paiman, foe kan pai wan sani baka — mi e taki leki nanga pikin — bradi oensrefi sosrefi toe” (2 Kor. 6:11-13). Loekoe wantoe srefi wortoe gi den kristen ini Filippi nanga ini Thessalonika. — Fil. 1:8; 4:1; 1 Thess. 2:7, 8.
16, 17. (a) San wi kan taki foe disi ten eksempre foe sma di e tjari densrefi leki lagiwan? (b) Sortoe jepi lobi e gi ini disi?
16 Ini disi ten wi no abi foeroe toemsi moi eksempre ini na tori disi? Foeroe foe den di abi wan frantwortoe presi e gi wan toemsi moi eksempre foedi den e tjari densrefi leki lagiwan. Nanga sakafasi den e dini den brada foe den di abi jepi fanowdoe. Disi e kon spesroetoe na fesi tapoe wi moro bigi konmakandra. Aladi den abi foe nature krin-ede ofoe positie ini na organisaatsi, tog den alamala e opo doe sani, foe meki na wroko kon klari.
17 Degedege no de ini disi, dati lobi sondro gridifasi sa jepi wi foe tjari wisrefi leki lagiwan. Ja, ’na lobi no e prodo, a no e meki en srefi bigi, a no e soekoe srefi en égi wini’. A no e broko en ede toemsi foe kisi ala sani di a abi reti a tapoe (1 Kor. 13:4, 5). Lobi kan jepi wi troetroe, bikasi a sa bewégi wi „foe no soekoe wi égi wini, ma di foe na trawan” (1 Kor. 10:24). Paulus ben taki ini disi gi den kristen ini Galacia: „Dini makandra leki srafoe nanga jepi foe lobi”. Foe kan dini makandra leki srafoe, dan ibri wan foe wi moe tjari ensrefi seker leki wan lagiwan! — Gal. 5:13.
18. Fa wi kan taki na tori disi sjatoe, dati wi moe tjari wisrefi leki lagiwan?
18 Na tori foe na bijbel, èn sosrefi toe na owroe nanga na disiten grontapoe historia, e bewijsi krin dati a de wan koni sani foe tjari joesrefi wan lagiwan. So wan fasi foe libi e meki dati wi e kon de ini wan boen matifasi nanga Jehovah Gado, nanga wi kompe kristen brada èn nanga den memre foe wi égi osofamiri. Tjari wisrefi leki wan lagiwan, boiti dati, sa meki wi de kolokoe, foedi a wani taki wi e gi trawan den wini nanga san den lobi moro, èn „a de moro kolokoe foe gi sani leki foe teki sani” (Tori foe den Apostel 20:35). Sosrefi toe, foeroe wrokosani de gi wi foe bewégi wi foe tjari wisrefi leki wan lagiwan: poti prakseri tapoe bijbel eksempre, teki na gronprakseri foe makti na wi tapoe, sori na jeje foe gesontoe froestan, waka baka na tiri foe Gado santa jeje èn sori lobi sondro gridifasi nanga praktische koni. Meki wi si en alaten leki wan grani, ja leki wan blesi foe tjari wisrefi leki lagiwan foe na boen foe trawan èn foe wisrefi èn moro foeroe leki wan grani gi Jehovah.
[Prenki na tapoe bladzijde 190]
Efoe ala sma ben de wan tiriman foe pokoeman, pe den pokoeman ben sa de dan?