Now a de na ten foe préki na Wortoe
„Sondro foe stop den ben tan ini na tempel èn leri sma oso foe oso èn meki bekenti na boen njoensoe foe na Kristus.” — Tori foe den Apostel 5:42.
1, 2. (a) Foe sortoe fosi eeuw bakapisi foe na kownoekondre-préki na bijbel e ferteri foe en? (b) Fa Jezus ben sori ini Matteus 28:19, 20 nanga Tori foe den Apostel 1:8, dati en bakaman ben sa de prékiman?
BAKA na kanti foe santa jeje na Pinksteren, den bakaman foe Jezus Kristus ben de nanga krakti èn dekati foe leri sma èn meki bekenti na boen njoensoe foe na Kristus. San ben de den bakapisi ini na fosi eeuw? Den e ferteri wi, dati foeroe foe den sma di ben arki na a taki foe den bakaman foe Jezus, ben tron bribiman. Ala nanga ala srefi so wan féfi doesoen man ben poti bribi ini a boen njoensoe (Tori foe den Apostel 4:4). Na bijbel tori e ferteri wi, dati na nomroe foe bribiman ini Masra ben tan kon moro foeroe na wan tra okasi, ipi-ipi foe mansma èn oemasma. — Tori foe den Apostel 1:14.
2 Foedi den bakaman foe Kristus sondro foe stop ben tan leri sma na boen njoensoe foe Kristus, dan ini wan sjatoe ten baka Pinksteren letterlek doesoen-doesoen sma ben tron bribisma. Na wan span sani foe lési san den sma di ben teki prati na a meki bekenti foe a boen njoensoe ben doe ini a fosi eeuw foe wi gewoon teri, sjatoe baka na dede èn opobaka foe Jezus, . . . èn sortoe moi wroko den ben doe leki wan bakapisi foe na kanti foe na santa jeje. Wi getrow brada nanga sisa ini na fosi eeuw ben de troetroe wrokoman, tranga wrokoman, di ben doe den sani di den ben kisi na komando foe den foe Jezus Kristus. — Matteus 28:19, 20; Tori foe den Apostel 1:8.
3, 4. (a) Oten ini disi ten sani ben sreka foe wan kon na libi foe a prékiwroko? (b) Sortoe sani Jehovah seti, aladi na kristenheid ben gens na kownoekondre-préki foe doe en wroko, nanga sortoe bakapisi ini wan span ten ini na historia foe libisma?
3 Disi de ini na di foe 20 eeuw moro pikinso? Meki wi ondrosoekoe den troe tori. Hori ini prakseri foe na fosi eeuw nanga na bigin foe na kristendom na sani di e kon: A ben bigin alamala nanga wán man, na Masra Jezus Kristus. Na kristendom ben gro ini wan sjatoe ten foe dri nanga afoe jari so esi, dati en kerki gensman ben taki: „Loekoe! Na grontapoe ben go na en baka” (Joh. 12:19). Ini wi ten, spesroetoe na a kaba foe na di foe 19 eeuw, na ten ben kon dati Jehovah ben moe bigin foe doe Gado bigi kotiwroko nanga jepi foe Kristus Jezus (Matt. 13:24-30, 36-43). Na kristenheid ben de kaba someni eeuw, ma na presi dati a meki go na fesi na leti foe na waarheid foe na boen njoensoe foe Kristus nanga a kownoekondre pe kristensma ben moe begi foe en èn ben moe loekoe na en, a ben kibri na leti dati nanga en foeroe falsi leri. Ma Jehovah no ben kan kisi gens, now di a ten ben kon dati en Manpikin ben sa teki Kownoekondre-makti na en tapoe. Nanga jepi foe wan groepoe bijbel-ondrosoekoeman di ben de opregti, Jehovah santa jeje ben bigin gi froestan na den sma di lobi regtvaardikifasi èn di ben abi na opregti lostoe foe doe en wani nanga wroko. Den bakapisi sensi den froekoe dé dati ben de span, soleki disi ben de so ini na fosi eeuw. Leki fa den bereken dati leti bifo na laatste kenki foe na eeuw dan 4 doesoen sma ben meki na publiki na howpoe foe den bekenti.
4 Te wi loekoe na pisi ten foe so wan 80 jari sensi na bigin foe na jari 1900, dan wi e si dati Jehovah ben tan go doro ini na moro moeiliki pisi ten foe na libisma historia foe poti sma kon moro foeroe na den groepoe foe bedinari foe na evangelium di e meki bekenti na boen njoensoe foe na Kristus nanga en Kownoekondre. (Teki gersi Tori foe den Apostel 16:5) Èn na dienstjari 1981 pe Jehovah Kotoigi ben doe den wroko foe den, ben gi den prékiman foe na kownoekondre na a heri Grontapoe foeroe blesi.
San ben psa
5. (a) O bigi na belangstelling ben de ini 1981 gi na Avondmaal foe Masra? (b) Omeni foe den sma di ben de drape ben abi wan prati na a publiki préki foe na Kownoekondre?
5 Te wi poti wi prakseri now tapoe a moro prenspari dé tapoe na kristen kalender, na fesa foe na Avondmaal foe Masra foe memre na dede foe Kristus, dan a de kon na krin dati ini 1981, tapoe sonde 19 pril (14 Nisan, djoe kalender), ini 43.870 gemeente na a heri grontapoe 5.987.893 sma ben komakandra foe na fesa disi. Den miljoen-miljoen sma disi ben arki na a lezing san na dede foe Masra wani taki troetroe èn soifri, soleki na bijbel e leri dati. Foe na nomroe disi, joe ben abi ini na dienstjari 1981 tapoe na heri grontapoe 2.247.486 sma di ben teki geregeld prati na a préki èn leri foe na boen njoensoe foe na Kownoekondre, ini 206 kondre nanga eilanti. Èn wan hémarki foe 2.361.896 Kotoigi tapoe wan bepaalde ten ini na jari ben abi wan prati na a diniwroko disi di Gado ben gi. San den ben doe? O boen sma e kisi jepi nanga a boskopoe foe den? Meki wi go loekoe pikinso.
Na panja foe a wortoe
6. (a) Sortoe kerki leri ben basi sani ini Mindri nanga Zuidamerika, di ben tjari sortoe toestand kon? (b) Ma sortoe kenki ben kon ini den kondre disi?
6 Na lomsoe-katholiek bribi foeroe hondro-hondro jari langa ben basi na denki foe den sma ini Mindri nanga Zuidamerika, nanga na bakapisi dati na moro bigi pisi foe den sma no abi foeroe warderi gi den troetroe leri foe na bijbel (2 Kor. 4:4). Foe datede meki den ben foefoeroe den sma gwe di moe libi sondro na sabi foe Kristus Jezus nanga na boen njoensoe foe na kownoekondre èn den de ini wan toestand di e akroederi nanga na situwasi di Jezus ben feni na mindri den djoe foe en ten, di ben go boekoendoe ondro na dwengi foe den méstri foe Wet nanga Fariséman (Matt. 9:36). Leki wan bakapisi foe a blesi foe Gado tapoe na di foe 20 eeuw prékiwroko foe Jehovah Kotoigi ini den Latijns kondre disi, wan wondroe kenki e feni presi. Foedi na leti ben go skijn leti mindri na jeje doengroe di tapoe na grontapoe, meki doesoen-doesoen reti-ati sma ben tjari konmakandra ini Jehovah organisaatsi. — Jes. 60:1, 2, 8.
7. Ferteri pkinso na moi ondrofenitori foe wan 12 jari oemapikin ini Argentinia?
7 Na waarheid foe a bijbel abi krakti tapoe na libi foe sma foe ala jari èn a de jepi den foe teki na sé foe Jehovah kownoekondre (Ps. 119:129, 130). Wan 12 jari prékiman ini Argentinia, di no ben dopoe ete, ben ferteri fa a de wan bigi prisiri gi en foe hori 8 bijbelstudi nanga sma. A ben skrifi disi: „Spesroetoe ini na ten foe vakantie mi e gebroiki someni ten leki mi kan gi a oso-foe-oso-wroko, na tjari foe gobaka èn a hori foe bijbelstudi. Ala den wroko disi e meki mi prisiri toemsi èn mi e feni en wan bigi grani dati Jehovah kan gebroiki mi leki wan wrokosani ini en anoe foe jepi foeroe sma foe leri sabi en leki na troe Gado.” Heri esi na oemapikin disi wani teki dopoe èn a de tan feti baka na marki foe en leki wan pionier. Èn disi gi wan oemapikin foe 12 jari! Fa a Wortoe foe Gado e gi wi krakti foe a kisi foe wan joisti fasi foe denki!
8. Sortoe wondroe kon-moro-foeroe ini na nomroe foe kownoekondre-prékiman ben feni presi ini Mindri èn Zuidamerika?
8 Ini 1945, na a kaba foe na di foe toe Grontapoefeti di ben hari psa tapoe a grontapoe, dan ini heri Mindri nanga Zuidamerika nanga Mexico toe, 4720 sma ben teki prati na a préki foe a boen njoensoe foe a Kownoekondre! Ini na dienstjari 1981 ini densrefi kondre disi wan nomroe foe 373.919 prékiman ben préki na „boen njoensoe”. Na waarheid watra séker ben lon foeroe ini den dré kondre dati èn sma nanga dréwatra tapoe wan wondroe fasi ben teki en. — Teki gersi Johannes 7:37, 38.
9. Fa na situwasi ben de sensi na bigin foe na di foe 20 eeuw gi den Kownoekondre-prékiman ini Europa?
9 Na boen njoensoe foe na Kownoekondre ben poti en roetoe dipi ini foeroe kondre foe Europa. Foe sensi na bigin foe a di foe 20 eeuw, èn ini son kondre srefi na fesi na ten dati, den Kotoigi foe Jehovah, di den ben sabi ini na ten dati leki Internationaal Bijbelondrosoekoeman, ben panja na boen njoensoe foe na Kownoekondre na mindri den sma. Na fosi tori foe wan prékiwroko di ben doe ini Doisrikondre, e go foe eksempre te na a ten foe na kenki foe na eeuw. Na fosi présidenti foe na Wachttorengenootschap, Charles T. Russell, ben fisiti Doisrikondre ini 1891, èn baka dati sani ben seti foe druk wantoe boekoe ini Doisritongo. Satoe bifo 1901 gemeente ben opo ini Doisrikondre.
10. Sortoe ondrofenitori ini Doisrikondre e sori o boen na oso-foe-oso-wroko de?
10 Jehovah Kotoigi ini Doisrikondre te nanga na dé foe tide e bribi dati na oso-foe-oso-wroko boen srefsrefi foe panja na boen njoensoe foe na Kownoekondre foe Jehovah (Luk. 9:1-6). Leki wan bakapisi foe na préki di ben gi na wan masra èn wefi di den ben miti oso-foe-oso, baka dati den ben bigin wan bijbelstudi nanga wan groepoe foe 12 te 14 sma. Bakaten na osofamiri ben froisi go na Australia, èn drape na heri osofamiri, boiti wan oemapikin di ben trow, ben tan studeri nanga Jehovah Kotoigi. Na papa nanga mama foe sensi na ten dati ben teki dopoe.
11. Fa wan grani malengri Kotoigi foe Jehovah ini West-Berlijn e denki foe a diniwroko?
11 Den wortoe foe wan 84 jari sisa ini West-Berlijn, di, aladi a ben malengri na skin sé, ben kan teki prati na a jepipionierwroko, e meki wi froestan na warderi foe en gi na waarheid èn na fanowdoe foe préki na Wortoe foe Gado now. A ben taki: „Mi lobi Jehovah sote, dati mi e firi misrefi verprekti foe teki prati na a dienst èn foe go na konmakandra foe bewijsi disi na en.” — Teki gersi Psalm 122:1.
12. (a) O fara ltalia ben kisi na boen njoensoe spesroetoe sensi 1945? (b) Sortoe bodoi di e gi dekati foe na kownoekondrewroko wi abi ini den kondre Italia, Portugal nanga Spanje?
12 Ini Italia pe na lomsoe-katholiek Kerki ben basi na libi foe den sma hondro-hondro jari, na wroko foe Jehovah Kotoigi ben kon na fesi nanga den sani di ben psa den laatste jari. Foe so wan 90 sma ini 1945, Jehovah Kotoigi ben gro kon de na di foe toe bigi kerki organisaatsi ini Italia (Jes. 60:22). Foe na dienstjari 1981 na bijkantoro drape ben ferteri foe wan hé-marki foe 90.553 kownoekondre-prékiman. Ini Italia nanga tra Latijns kondre foe Europa leki noiti na fesi na ten de lepi gi na préki foe na boen njoensoe foe na kownoekondre. Soleki wi ben taki, dan ini 1945 so wan 90 prékiman ben de ini Italia, ma leki fa den rapport e sori dan ini na jari dati joe no ben abi nowan kotoigi ini Spanje nanga Portugal di ben meki na boen njoensoe foe na kownoekondre bekenti. Ma ini 1981 wi ben doro ini den dri kondre disi ala nanga ala 159.972 prékiman. A ben de soleki Jezus ben taki: „Na kotiwroko bigi, ma pikinso wrokoman de.” — Matt. 9:37.
Na kotiwroko ini tra kondre
13. (a) San den rapport e sori foe na panja foe na boen njoensoe ini na werelddeel Afrika? (b) Sortoe ondrofeni e sori dati na ten de troetroe lepi foe na koti foe moro sma di lobi regtvaardiki fasi?
13 Ini foeroe pisi foe Afrika foeroe doesoen-doesoen sma ben teki na waarheid-boskopoe, di Jehovah getrow kotoigi e meki drape bekenti ini na di foe 20 eeuw, boen. Tapoe son presi leki Nigeria, Zuid-Afrika, Zambia, Zimbabwe nanga Malawi, siri foe waarheid ben sai kaba, ini 1923 te go miti 1927, aladi na boskopoe ben meki kownoekondre-prékiman ben kon pas ini tra kondre soleki Mali, Mauritania, Opper-Volta nanga Rwanda ini na pisi ten foe 1962 te go miti 1970. A ten séker de boen foe doe ala san wi man foe jepi den dréwatrawan foe kon na den waarheidwatra bifo Jehovah taki dati na wroko doro en kaba. Ini Zambia wan speciale pionier ben go fisiti wan kapten di ben abi foeroe belangstelling gi na kownoekondreboskopoe. Na kapten disi ben teki trawan nanga en foe teki prati na a takimakandra, sodati ala nanga ala 18 sma ben arki na a boskopoe foe na speciale pionier, san ben abi leki bakapisi dati difrenti osobijbelstudi ben bigin nanga sma. Ini wan sjatoe ten na nomroe foe na gemeente drape ben gro foe 65 go miti 86. Ini a ten disi joe abi pikinso presi ini na werelddeel Afrika pe joe no abi kotoigi foe Jehovah di e préki na boen njoensoe.
14. Sortoe toemsi moi ondrofeni-tori e ferteri foe san ben psa tapoe den eilanti ini na Torres Strati?
14 Den tra rapport di ben kon foe tra pisi foe na grontapoe na jari di psa, e sori tapoe blesi èn na go na fesi foe a wroko. Krosbé foe na moro noordsé foe Australia, joe abi den eilanti foe na Torres Strati. A groepoe disi abi 100 eilanti, di sma e libi tapoe 20 nomo. Tapoe wan foe den eilanti disi, di nen Thursday Eilanti joe abi wan gemeente di e go na fesi. Wan kring-opziener nanga toe brada foe Thursday Eilanti ben go fisiti wan foe den tra eilanti, di ben nen Sue, èn den ben bari den wan switikon drape. Na fesiman foe na eilanti, soleki fa den e kari en, ben aksi den brada foe kon, foedi a abi belangstelling gi na waarheid foe na bijbel èn a wroko foe Jehovah Kotoigi, di a ben abi boekoe foe den. Fa den brada ben froewondroe dati na fesiman disi ben hori ensrefi stéfi tapoe a tori foe na krinfasi foe den sma foe na eilanti, èn ooktoe na libifasi foe den. Geregeld a de seti sani dati den sma abi jeje demakandra tapoe wan ofoe tra fasi. Di den brada ben de drape na fisiti, den ben arki den singi di ben singi na wan foe den konmakandra, di den wortoe foe den ben komoto foe den boekoe foe na Wachttorengenootschap. Den ben kan hori wan lezing gi den sma disi, ala nanga ala so wan 40 sma èn gi den tranga foe go doro nanga a bijbelstudi foe den nanga den boekoe foe na Genootschap.
Na kotoigiwroko na a heri grontapoe
15. San e tan foe datede na frantwortoe foe Jehovah bedinari foe na Kownoekondre?
15 Omeni tron wi no ben gebroiki Jezus wortoe ini Matteus 24:14, pe tanapoe, dati na „boen njoensoe disi foe na kownoekondre sa préki tapoe na heri grontapoe pe libisma de libi leki wan kotoigi gi ala naatsi, èn dan na kaba sa kon”! Den getrow dienstknekti foe Jehovah e gi na kotoigi nanga wortoe èn nanga doe. Te na kotoigiwroko doe nofo kaba — wan sani di Jehovah Gado sa bosroiti — dan na kaba sa kon. Soboen, na wroko foe wi e tan foe go doro nanga na gi kotoigi foe na moro bigi sani di . . . na grontapoe sa ondrofeni, na kon foe Jehovah kownoekondre ini anoe foe en kownoe di e tiri, wi Masra Jezus Kristus.
16. (a) Sortoe statistiek e gi now foe sori dati Jehovah Kotoigi e froestan dati a de now na ten foe préki na wortoe? (b) Sortoe persoonlek aksi e poti gi ibriwan foe wi?
16 Ini 206 kondre nanga eilanti ini den grontapoe se den 2.361.896 prékiman foe na boen njoensoe foe na kownoekondre ben gebroiki 358.581.547 joeroe foe panja na span boskopoe disi. Den e hori 1.475.177 osobijbelstudi èn ben panja tapoe na heri grontapoe 31.444.062 boekoe nanga pikin boekoe èn 234.163.921 tijdschrift foe Na Wachttoren nanga Ontwaakt! Ala den sani disi, moksi nanga na bigi kotoigiwroko di ben doe ini den foeroe jari foe na di foe 20 eeuw, e sori pasa marki dati Jehovah dienstknekti nanga prisiri e doe na komando foe den foe ferteri ’den safri-ati-wan boen njoensoe, foe tai den wan di ati broko, foe bari fri gi den strafoeman, foe bari na jari foe boen wani foe na sé foe wi Gado èn foe trowstoe ala sma di e sari’ (Jes. 61:1, 2). Joe abi NOW wan prati na a préki foe na Wortoe foe Gado èn en pramisi kownoekondre?
17. Sortoe bewijsi moro fara foe Jehovah blesi wi sa loekoe now?
17 Ini na dienstjari 1981 dan 119.836 sma ben moksi densrefi na den groepoe foe den sma di ben gi den libi abra na Jehovah èn di ben agersi disi nanga na dopoe ini watra. Wi e bari wan switikon gi ala den sma disi ini na kristen bradafasi. Te joe loekoe na tabel di poti dja ini na tijdschrift disi, pe tanapoe sortoe activiteit Jehovah Kotoigi ben doe ini na Kownoekondre-préki ini na dienstjari 1981, dan joe sa si dati foeroe-foeroe doesoen sma foe Ostoe nanga Westsé ben kon na den watra foe libi èn waarheid di Jehovah ben gi èn di ben moksi densrefi na a meki bekenti foe na boen njoensoe foe na kownoekondre.
18. San a wani taki dati a ten di libi abra e kon ala dé moro sjatoe tapoe a tori foe na prenspari fasi foe na prékiwroko foe wi èn san moe de na bosroiti foe wi?
18 Ibri dé na ten e kon moro sjatoe gi na ogri seti foe sani disi, èn disi wani taki dati den okasi foe wi foe préki na boen njoensoe, dé foe dé e kon moro prenspari. Meki a kon krin ibri dé baka dati wi e doe tranga moeiti foe sori dati wi de getrow bakaman foe Jezus, di e doe moeiti foe waka baka na libifasi foe en leki wan sma di meki soifri anbegi go na fesi. Meki, neleki na getrow David, na faja foe Jehovah oso, en soifri èn krin anbegi, bewégi wi foe tanapoe faste ini wi getrowfasi èn foe tan ini den groepoe foe den kownoekondre-prékiman, te leki Jehovah taki, dati a wroko doro en kaba. — Ps. 69:9.
[Faki/prenki na tapoe bladzijde 87]
A kon moro foeroe foe prékiman ini Mindri- èn Zuid-Amerika:
1945 . . . 4.720 prékiman
1981 . . . 373.919 prékiman
[Faki/prenki na tapoe bladzijde 88]
A kon moro foeroe foe prékiman ini Spanjorokondre, Potogisikondre, èn Italia:
1945 . . . 90 prékiman
1981 . . . 159,972 prékiman
[Faki/prenki na tapoe bladzijde 88]
A kon moro foeroe foe Kotoigi ini Afrika:
1945 . . . 19.083 prékiman
1981 . . . 300.989 prékiman
[Raportoe na tapoe bladzijde 89, 90]
1981 DINIWROKO RAPORTOE FOE JEHOVAH KOTOIGI NA HERI GRONTAPOE
(Loekoe a tijdschrift)