Kownoekondre preikiman e wroko fajafaja na heri grontapoe
„Oenoe sa de kotoigi foe mi . . . na den moro farawe kontren foe grontapoe.” — TORI FOE DEN APOSTEL 1:8.
1. Sortoe boskopoe Jesus ben taki dati den bakaman foe en ben sa preiki ini wi ten?
DI JESUS ben taki foe a wroko di Jehovah ben seni en Manpikin foe kon doe na grontapoe, a ben taki: „Mi moesoe meki a boen njoensoe foe Gado kownoekondre bekènti” (Lukas 4:43). Na so toe, di Jesus ben froeteri foe a wroko di den disipel foe en ben sa doe na grontapoe te a ben drai kon baka nanga kownoe makti, a ben taki: „A boen njoensoe disi foe a kownoekondre sa preiki na a heri grontapoe pe sma e libi leki wan kotoigi gi ala nâsi; èn dan a kaba sa kon.” — Mateus 24:14.
2. (a) Foe san ede a de so prenspari taki a Kownoekondre boskopoe moesoe meki bekènti na ala sei? (b) Sortoe aksi wi alamala moesoe aksi wisrefi?
2 Foe san ede njoensoe foe Gado Kownoekondre de so prenspari? Foe san ede a de fanowdoe foe meki a Kownoekondre bekènti na ala sei? Bika a de a Kownoekondre foe a Mesias, di sa regtfardiki Jehovah universeel soevereinfasi (1 Korentesma 15:24-28). Nanga jepi foe a Kownoekondre, Jehovah sa tjari kroetoe kon tapoe a disiten seti foe sani di abi eigifasi foe Satan èn di sa meki a pramisi foe en kon troe foe blesi ala den famiri foe grontapoe (Genesis 22:17, 18; Danièl 2:44). Foe di Jehovah ben meki den gi kotoigi foe a Kownoekondre, meki a feni denwan di a salfoe baka ten foe de kompe-erfgenaam nanga en Manpikin. Nanga jepi foe a preiki foe a Kownoekondre, wan wroko e doe toe ini a ten disi foe prati sma (Mateus 25:31-33). Jehovah wani, taki sma foe ala nâsi moesoe kon sabi san na en prakseri. A wani, taki den abi na okasi foe froekisi foe libi leki borgroe foe en Kownoekondre (Johanes 3:16; Tori foe den Apostel 13:47). Joe abi wan dorodoro prati ini a preiki foe a Kownoekondre disi?
Ala di den ben e froewakti a kaba foe den ten foe den heiden
3. (a) Foe sortoe tori di ben fiti, C. T. Russell ben taki na wan foe den fosi rèis foe orga bijbelstudie groepoe? (b) San den fosi Bijbel Studenti dati ben froestan ini a tori foe a presi di Gado Kownoekondre ben moesoe abi na ini a libi foe den?
3 Na a ten dati ini 1880, Charles Taze Russell, a fosi skrifiman foe a Watch Tower tijdschrift, ben meki wan rèis ini a heri noord-owstoe pisi foe Verenigde Staten foe Amerkankondre foe gi deki-ati na sma foe den seti bijbelstudie groepoe. A ben fiti taki a tori di a ben taki ben de „Sani di abi foe doe nanga Gado Kownoekondre”. So leki fa a ben de foe si ini den fosi tijdschrift foe a Watch Tower, dan den Bijbel Studenti (so leki fa sma ben sabi Jehovah Kotoigi na a ten dati) ben froestan taki efoe den ben o de warti foe abi wan prati ini Gado Kownoekondre, dan den ben moesoe meki a Kownoekondre kon tron a moro prenspari sani di ben abi den prakseri, èn nanga prisiri den ben moesoe gebroiki den libi, a koni foe den èn san den ben abi, foe wroko gi a Kownoekondre dati. Ala tra sani ini libi ben moesoe kisi a di foe toe presi (Mateus 13:44-46). A frantiwortoe foe den ben wani taki toe dati den ben moesoe preiki a boen njoensoe foe Gado Kownoekondre gi trawan (Jesaja 61:1, 2). O fara den ben doro foe doe dati, bifo a kaba foe den ten foe den heiden ini 1914?
4. Na sortoe fasi a pikin groepoe foe Bijbel Studenti ben prati bijbel poeblikâsi bifo 1914?
4 Foe den jari 1870 te kon miti 1914, a nomroe foe den Bijbel Studenti no ben de so bigi, te joe ben teki den gersi nanga trawan. Ini 1914, so wan 5100 sma nomo ben abi wan fajafaja prati foe gi kotoigi na poebliki. Ma fa dati ben de wan toemoesi aparti kotoigi! Ini 1881, soso toe jari baka di den ben tjari a Watch Tower kon na doro foe a fosi leisi, den ben bigin prati a poeblikâsi di abi 162 bladzijde, di ben nen Food for Thinking Christians (Njanjan gi kresten di e denki). Bifo wan toe moen pasa, den ben prati 1.200.000 eksemplaar. Na ini wan toe jari, tin miljoen tron tin miljoen traktaat ben prati ibri jari na ini foeroe tongo.
5. Soema ben de den colporteur, èn sortoe jeje den ben sori?
5 San ben bigin toe ini 1881, ben de taki wan toe sma ben go wroko leki colporteur evangelie preikiman. Den disi ben de denwan di ben de den fosi pionier (foeroeten evangelie preikiman) ini a ten disi. Wan toe foe den colporteur, di ben waka nanga foetoe noso ben teki baisigri, ben preiki densrefi ini pikinmoro ibri pisi foe a kondre pe den ben libi. Trawan ben go te na kontren dorosei foe den kondre èn den ben de den fosiwan di ben tjari a boen njoensoe go na den presi leki Finland, Barbados, nanga Birma (di sma sabi now leki Mianmar). Den ben sori a faja foe wan zendeling, neleki a faja di Jesus Krestes nanga den apostel foe en ben abi. — Lukas 4:43; Romesma 15:23-25.
6. (a) Omeni brada Russell ben rèis foe panja bijbel waarheid? (b) Sortoe tra sani ben doe foe meki a boen njoensoe go na fesi ini freimde kontren, bifo a kaba foe den ten foe den heiden?
6 Brada Russell srefi ben rèis foeroe foe panja a waarheid. Ibritron baka a ben go na Kanada; a ben taki ini Panama, Jamaica, nanga Cuba; a ben meki omeni rèis go na Europa; èn a ben rèis heri grontapoe lontoe foe doe na evangeliewroko. A ben seni tra man toe foe bigin preiki a boen njoensoe èn teki fesi na ini a wroko dati na kontren dorosei foe den kondre. Afoepasi foe den jari 1890 den ben seni Adolf Weber go na Europa, èn a diniwroko foe en ben go foe Switserland doro te na Fransikondre, Italiakondre, Doisrikondre nanga Belgia. Den ben seni E. J. Coward go na den Kribisi kontren. Ini 1912 Robert Hollister ben kisi a toewijzing foe go wroko ini den Owstoesei kondre. Drape den ben sreka spesroetoe traktaat ini tin tongo, èn sma foe India, China, Japan nanga Korea ben panja miljoenmiljoen foe den eksemplaar disi na ini den eigi kondre. Efoe joe ben libi ini a ten dati, joe ati ben sa boeweigi joe dan foe doe serjoesoe moeiti foe go nanga a boen njoensoe na trawan ini joe birti èn na kontren di ben de moro fara?
7. (a) Fa njoensoe koranti ben gebroiki foe gi moro kotoigi? (b) San ben de a „Fowtow-Drama foe a meki di Gado meki sani”, èn omeni sma ben si dati ini soso wán jari?
7 Di den ten foe den heiden ben e doro den kaba, den ben gebroiki koranti foe skrifi bijbel taki, di brada Russell ben hori. A sani di den ben poti moro foeroe krakti na tapoe no ben de a jari 1914, ma na presi foe dati, a prakseri foe Gado èn a seikerfasi taki a prakseri dati ben sa kon troe. Moro leki 2000 koranti, di 15.000.000 leisiman ben kisi, ben poti den taki disi doronomo na a srefi ten na ini den koranti. Baka dati, di a jari 1914 ben kon moro krosibei, dan a Genootschap ben bigin foe sori a „Fowtow-Drama foe a meki di Gado meki sani”, na poebliki. Ini fo pristeri di ibriwan foe den ben teki toe joeroe, den ben pristeri bijbel waarheid foe sensi di Gado meki sani te kon na ini a Doesoen Jari Tiri. Ini soso wán jari, wan poebliki foe moro leki neigi miljoen sma ini Noord-Amerikan, Europa, Australia nanga Njoen-Selanti ben si a Fowtow-Drama disi.
8. Omeni kondre den Bijbel Studenti ben doro nanga a boen njoensoe na a ten foe 1914?
8 So leki fa den sani di skrifi foe na afersi disi e taki, dan na a lasti pisi foe 1914, a fajafaja groepoe foe evangelie preikiman disi ben bradi a preiki di den ben preiki foe Gado Kownoekondre go na ini 68 kondre.a Ma dati ben de soso a bigin!
Preiki fajafaja a Kownoekondre di opo
9. Fa den ben poti spesroetoe prakseri tapoe a kotoigiwroko foe a Kownoekondre na den kongres foe Cedar Point?
9 Di den Bijbel Studenti ben kon na makandra ini 1919 na Cedar Point, Ohio, dan J. F. Rutherford, di na a ten dati ben de presidenti foe a Waktitoren Genootschap, ben froeklari: „A ben de èn a de a kari di wi kisi foe Gado foe bariwroko gi a glori Kownoekondre foe a Mesias di e kon.” Ini 1922 na a di foe toe kongres na Cedar Point, brada Rutherford ben trowe leti tapoe a tori taki na a kaba foe den ten foe den heiden, ini 1914, ’a Kownoe foe glori ben teki en bigi makti na en tapoe èn a ben bigin tiri’. Baka dati, a ben poti na aksi krin gi a poebliki foe en, foe di a ben taki: „Oenoe e bribi taki a Kownoe foe glori bigin nanga en tiri? Dan go baka na a veld, oen manpikin foe a moro hei Gado! . . . Meki a boskopoe bekènti na alasei. Grontapoe moesoe sabi taki Jehovah na Gado èn taki Jesus Krestes na Kownoe foe den kownoe èn Masra foe den masra. Disi na a dei foe ala den dei. Loekoe, a Kownoe e tiri! Oenoe na en poebliki bariwrokoman.”
10, 11. Fa radio, oto nanga boksoe na tapoe, nanga plakati pe sani ben skrifi na tapoe, ben gebroiki na wan boen fasi foe go na sma nanga Kownoekondre waarheid?
10 Moro leki 70 jari pasa sensi den kongres dati ben hori na Cedar Point — pikinmoro 80 jari sensi di Jehovah ben bigin sori en soevereinfasi nanga jepi foe a Mesian tiri foe en Manpikin. O fara Jehovah Kotoigi ben doro foe doe a wroko troetroe, di skrifi gi den ini Gado Wortoe? Sortoe prati joesrefi abi na disi?
11 Na a bigin foe den jari 1920, radio ben kon de wan wrokosani di ben kan gebroiki foe meki a Kownoekondre boskopoe bekènti farawe. Ini den jari 1930, kongres lezing di ben taki foe a Kownoekondre leki a howpoe gi grontapoe, ben de foe jere na wan toe groepoe radiostation noso na wan toe radio programa èn nanga jepi foe telefon na heri grontapoe. Den ben gebroiki oto toe nanga boksoe na tapoe foe drai bijbel-lezing na tapoe plaat, na poebliki presi. Baka dati ini 1936 na Glasgow, Scotland, den brada foe wi ben bigin waka nanga plakati, di ben anga na den neki noso tai na den skin, ini bisnis kontren foe bariwroko gi poebliki taki. Ala den sani disi ben de boen wrokosani foe gi kotoigi na foeroe sma na a ten dati, di wi no ben de someni.
12. San na wan foe den moro boen fasi gi wi leki aparti sma foe gi kotoigi, so leki fa den Boekoe foe bijbel e sori?
12 A no de foe taki, dati den Boekoe foe bijbel e sori krin taki leki kresten, wi leki aparti sma abi a frantiwortoe foe gi kotoigi. Wi no kan meki njoensoe koranti noso radio programa doe a wroko nomo. Doesoendoesoen loyaal kresten — mansma, oemasma nanga jongoewan — teki a frantiwortoe dati. Leki wan bakapisi foe dati, na oso-foe-oso preikiwroko kon tron wan marki di sma kan kon sabi Jehovah Kotoigi. — Tori foe den Apostel 5:42; 20:20.
Doro te na heri grontapoe pe sma e libi
13, 14. (a) Foe san ede son Kotoigi e froisi go na tra foto, èn e go srefi na tra kondre, foe go doro nanga a diniwroko foe den? (b) Fa a lobi di sma ben lobi den sma ini a kondre pe den ben gebore, ben jepi den foe panja a boen njoensoe?
13 Foe di wan toe Jehovah Kotoigi ben sabi taki a Kownoekondre boskopoe ben moesoe preiki na heri grontapoe pe sma e libi, meki den prakseri serjoesoe san densrefi ben kan doe foe go na den kontren dorosei foe den eigi birti.
14 Foeroe sma leri waarheid baka di den ben froisi gowe foe a presi pe den ben gebore. Ala di den froisi kande foe feni wini na skin fasi, den feni wan sani di warti moro, èn wan toe foe den ben firi taki den ben moesoe drai go baka na a kondre noso a birti pe den ben gebore, foe prati a waarheid nanga sma. So boen, na a bigin foe a jarihondro disi a preiki foe a boen njoensoe ben go te na Skandinafia, Grikikondre, Italiakondre, den kondre foe Owstoe Europa, nanga foeroe tra kontren. Srefi now, ini den jari 1990, a Kownoekondre boskopoe e panja na a srefi fasi.
15. San wan toe sma ben doe ini den jari 1920 nanga den jari 1930, di a fasi foe den ben de neleki san skrifi ini Jesaja 6:8?
15 Foe di den ben poti a rai foe Gado Wortoe na ini den libi, meki wan toe sma ben man foe gi densrefi foe dini na ini presi pe fosi den no ben libi. W. R. Brown (di den ben kari nofotron „Bijbel Brown”) ben de wan foe den sma disi. Ini 1923 a ben froisi foe Trinidad go na West Afrika, foe meki na evangelie wroko go na fesi. Ini den jari 1930, Frank nanga Gray Smith, Robert Nisbet nanga David Norman, ben de wan toe foe den sma di ben tjari a Kownoekondre boskopoe te na a owstoesei sjoro foe Afrika. Trawan ben jepi foe meki a Zuid Amerkan veld gro. Na a bigin foe den jari 1920, George Young, wan Kanadasma, ben abi prati ini a wroko na Argentinia, Brasjonkondre, Bolivia, Chili, nanga Peru. Juan Muñiz, di wroko ini Spanjorokondre, ben go wroko toe ini Argentinia, Chili, Paraguay, nanga Uruguay. Ala den sma disi ben sori wan jeje neleki fa a skrifi ini Jesaja 6:8: „Dja mi de! Seni mi.”
16. Pe, boiti den moro prenspari foto pe sma e libi, a kotoigiwroko ben doe ini den jari bifo na orlokoe?
16 A preiki foe a boen njoensoe ben doro srefi te na den moro farawe kontren. Boto di Kotoigi ben stiri, ben fisiti ala den pikin lanpresi foe Newfoundland, a sjoro foe Norwega te na a Noordpool kontren, den èilanti ini a Stille Zuidse nanga den lanpresi foe Zuid-owstoe Asia.
17. (a) Omeni kondre den Kotoigi ben doro ini 1935? (b) Foe san ede a wroko no ben kaba ete na a ten dati?
17 Na wan froewondroe sani taki, di a jari 1935 doro, Jehovah Kotoigi ben e preiki ini 115 kondre, èn den ben doro na ete 34 kondre. Disi ben kan de te den ben gi kotoigi ini njoen gebied noso te den ben gi kotoigi nanga jepi foe boekoe di den ben seni nanga post. Tokoe a wroko foe den no ben kaba. A jari dati Jehovah ben opo den ai ini a tori foe a prakseri foe en foe tjari „wan bigi ipi” kon na makandra, di ben sa tan na libi foe go ini en njoen grontapoe (Openbaring 7:9, 10, 14). Moro kotoigiwroko ben de foe doe ete!
18. Sortoe prati a Gilead Skoro nanga a Bedinari Skoro ben abi ini a wroko foe preiki a Kownoekondre?
18 Srefi ala di Grontapoe Orlokoe di foe Toe ben e feti hebi na grontapoe èn na ini foeroe kondre wet no ben gi pasi foe den boekoe foe Jehovah Kotoigi prati noso a wroko foe den doe, a Waktitoren Bijbel Skoro Gilead ben opo en doro, foe gi leri na njoen zendeling foe doe srefi wan moro bigi wroko foe preiki a Kownoekondre na ini ala kondre. Te na a dei foe tide, den sma di ben go na Gilead ben wroko ini moro leki 200 kondre. Den ben doe moro leki foe prati boekoe èn foe go baka dati na wan tra kontren. Den ben hori bijbelstudie, ben orga gemeente, èn ben leri sma foe horibaka gi frantiwortoe na theokrasia fasi. Moro ini a ten disi, owroeman nanga dinari ini a diniwroko, di ben go na a Bedinari Skoro, jepi toe pe a ben de tranga fanowdoe foe doe a wroko disi na tapoe siksi pisi foe grontapoe. Wan boen fondamenti ben poti foe meki moro gro kon. — Teki gersi 2 Timoteus 2:2.
19. Na sortoe fasi den foetoeboi foe Jehovah ben doe wan sani tapoe a kari foe go dini ini kontren pe a fanowdoe de moro bigi?
19 Trawan ben kan jepi foe sorgoe gi wan toe foe den kontren pe den no wroko ete? Ini 1957 na tapoe kongres di ben hori na heri grontapoe, aparti sma nanga osofamiri — lepi Kotoigi foe Jehovah — ben kisi a deki-ati foe go prakseri foe froisi go na kontren pe a fanowdoe ben de moro bigi, foe go libi drape èn go doro drape nanga a diniwroko foe den. A kari ben gersi a wan di Gado ben gi na a apostel Paulus, di ben si wan man ini wan fisjoen e begi en: „Kon dja na Masedonia èn jepi wi” (Tori foe den Apostel 16:9, 10). Wan toe sma ben froisi ini den jari 1950, trawan ben doe dati baka ten. Moro leki wán doesoen Kotoigi ben froisi go na Ierland èn na Kolombia toe; hondrohondro foe den ben froisi go na foeroe tra presi. Tindoesoen tron tindoesoen ben froisi go na kontren ini den eigi kondre, pe a fanowdoe ben de moro bigi. — Psalm 110:3.
20. (a) San ben doe sensi 1935 leki wan kontroe foe Jesus profeiti wortoe ini Mateus 24:14? (b) Fa a wroko ben go moro esi ini den wan toe jari di pasa?
20 Nanga a blesi di Jehovah blesi en pipel, a wroko foe preiki a Kownoekondre e go doro fajafaja. Sensi 1935 a nomroe preikiman ben gro kon tron aiti tron moro bigi, èn a nomroe foe den pionier ben gro kon bigi 60 procent moro a nomroe foe preikiman. Den ben bigin nanga a seti foe oso-bijbelstudie ini den jari 1930. Now wi abi wan gemiddelde foe moro leki fo nanga afoe miljoen oso-bijbelstudie di e hori ibri moen. Sensi 1935 moro leki 15 miljard joeroe ben gi na a wroko foe preiki a Kownoekondre. Ini 231 kondre den e preiki a boen njoensoe doronomo. Di kontren ini Owstoe Europa nanga Afrika ben opo foe preiki a boen njoensoe na wan moro fri fasi, dan den ben gebroiki internationaal kongres na wan boen fasi foe sori a poebliki a Kownoekondre boskopoe na wan krinfasi. So leki fa Jehovah ben pramisi langa ten pasa kaba ini Jesaja 60:22, dan foe troe a e ’meki a wroko go moro esi ini en eigi ten’. Fa a de wan bigi grani gi wi foe abi wan prati na ini dati!
Doro na ala sma nanga a boen njoensoe someni leki a kan
21, 22. San wisrefi kan doe foe de moro boen Kotoigi awansi pe wi e dini?
21 Masra no taki ete dati a wroko kaba. Foeroe doesoendoesoen sma e teki a waarheid ete. Foe dati ede na aksi e kon: Wi e doe ala san wi kan foe meki wan boen gebroiki foe a ten di a pasensi foe Jehovah gi wi foe doe a wroko disi? — 2 Petrus 3:15.
22 A no ala sma kan froisi go na kontren di no e wroko foeroe. Ma joe e meki gebroiki dorodoro foe den okasi di joe e kisi? Joe e gi kotoigi na kompe-wrokoman? na skoromeester noso skoromisi èn na skoromati? Joe ben fiti joesrefi na situwâsi di e kenki ini a kontren foe joe? Efoe, leki wan bakapisi foe a kenki di wroko foe sma e kenki, foeroe sma no de na oso na deiten, dan joe ben fiti joe schema na dati, so taki joe kan go na den na neti-joeroe? Efoe oso meki na so wan fasi taki fisitiman di no kisi kari, no kan go na ini, dan joe e gi kotoigi nanga jepi foe telefon noso joe e gi kotoigi nanga jepi foe brifi? Joe hori a belangstelling waran di sma ben sori èn joe e pristeri den foe hori oso-bijbelstudie nanga den? Joe e doe joe diniwroko dorodoro? — Teki gersi Tori foe den Apostel 20:21; 2 Timoteus 4:5.
23. San moesoe de krin foe si ini wi kefal, ala di Jehovah e loekoe san wi e doe ini en diniwroko?
23 Meki wi alamala doe wi diniwroko na wan fasi taki a e sori Jehovah krin taki wi e warderi troetroe a bigi grani foe de wan foe en Kotoigi ini den toemoesi prenspari ten disi. Meki a de wi grani foe si fa Jehovah sa tjari kroetoe kon na tapoe a kroektoe owroe sistema èn fa a sa bigin a glori Doesoen Jari Tiri foe Jesus Krestes!
[Foetoewortoe]
a Te joe e teri en na a fasi fa grontapoe ben prati na a bigin foe den jari foe 1990.
Wan sjatoe loekoe baka
◻ Foe san ede a de so prenspari foe preiki a Kownoekondre boskopoe?
◻ Te kon miti 1914, o fara den ben doro foe preiki a boen njoensoe?
◻ Na sortoe fajafaja fasi kotoigi ben gi sensi di a Kownoekondre opo?
◻ San sa meki taki a prati di wi abi ini a diniwroko sa abi moro boen bakapisi?
[Faki na tapoe bladzijde 13, 14]
JEHOVAH KOTOIGI — Preikiman foe Gado Kownoekondre
Ini 1993 nanga 1994, den ben meki bekènti na hondrohondro kongres na heri grontapoe, taki wan njoen boekoe di ben nen Jehovah’s Getuigen — Verkondigers van Gods Koninkrijk (Jehovah Kotoigi — Preikiman foe Gado Kownoekondre), ben kon na doro. A boekoe disi e leri sma boen foeroe foe a historia foe Jehovah Kotoigi, na wan finifini fasi. A boekoe di abi 752 bladzijde, abi moi prenki, nanga moro leki wán doesoen fowtow di ben tjari kon makandra foe 96 difrenti kondre. Na a kaba foe 1993 den ben tjari en kon na doro kaba ini 25 tongo èn den e vertaal en ini moro tongo ete.
Foe san ede so wan boekoe kon na a joisti ten? Ini den jari di pasa, miljoenmiljoen sma na heri grontapoe kon tron Jehovah Kotoigi. Den alamala moesoe sabi a historia foe na organisâsi di den moksi densrefi nanga dati, heri boen. Moro fara, a preiki di den e preiki èn a fasi fa den e anbegi Gado ben boro go dipi ini den nationaal groepoe nanga ras na heri grontapoe èn jongoe sma nanga owroe sma ben teki dati, ini ibri groepoe na ekonomia sei nanga skoro groepoe. Leki wan bakapisi foe disi, foeroe sma di e si san e pasa, abi aksi di abi foe doe nanga den Kotoigi — no wawan foe a bribi foe den, ma foe fa den bigin toe, a historia foe den, na organisâsi foe den, san na den marki di den wani doro. Trawan ben skrifi sani foe den, ala di a no ala ten a ben de sondro den poti den eigi firi nanga prakseri toe. Ma no wan sma no sabi a disiten historia foe Jehovah Kotoigi moro betre leki den Kotoigi srefi. Den skrifiman foe a boekoe disi doe moeiti foe pristeri a historia dati sondro foe poti den eigi firi nanga prakseri na ini èn na wan eerlijk fasi. Di den doe disi, den skrifi den boeweisi toe foe a ten foe a kontroe, foe a toemoesi prenspari pisi foe a marki foe Krestes denoja di skrifi ini Mateus 24:14, èn den doe disi na so wan finifini fasi di soso sma ben kan gi, di abi boen foeroe foe doe nanga a wroko di a tekst ben froeteri na fesi foe en.
A boekoe prati na ini seibi bigi pisi:
Pisi 1: A pisi disi e sori san ben de a historia roetoe foe Jehovah Kotoigi. A abi na ini wan krakti, ma sjatoe èn finifini loekoe tapoe a disiten historia foe den foe 1870 te kon miti 1992.
Pisi 2: Dja den e meki sjatoe kon na krin, fa den sani di abi foe doe nanga bribi ben doe kon safrisafri, san e meki taki Jehovah Kotoigi de tra fasi leki tra kerki groepoe.
Pisi 3: A pisi disi foe a boekoe e ondrosoekoe a gro foe a fasi fa na organisâsi foe den seti. A e froeteri foe moi troetori di abi foe doe nanga den gemeente konmakandra nanga den kongres foe den, so boen leki a fasi fa den e bow Kownoekondrezaal, moro bigi kongreshal nanga presi foe meki bijbel poeblikâsi. A e froeteri a faja di Jehovah Kotoigi abi foe preiki Gado Kownoekondre èn a lobi di den e sori te den e sorgoe gi makandra ini moeilek ten.
Pisi 4: Dja joe sa feni toemoesi moi sani di skrifi finifini fa a preiki foe Gado Kownoekondre ben doro te na den bigi kondre èn den moro farawe èilanti na heri grontapoe. Prakseri nomo — den ben preiki ini 43 kondre ini a jari 1914, ma ini 1992 dati ben de ini 229 kondre! Den ondrofenitori foe den sma di ben abi wan prati na a gro disi na heri grontapoe e waran na ati troetroe.
Pisi 5: Foe doe ala a wroko disi foe preiki a Kownoekondre, ben aksi taki na ini ala kondre presi ben moesoe feni foe meki bijbel, so boen leki bijbel poeblikâsi ini moro leki toe hondro tongo. Dja joe sa leri foe a pisi dati foe a wroko foe den.
Pisi 6: Den Kotoigi ben ondrofeni tesi toe — wan toe foe den ben de foe libisma onvolmaakti fasi, trawan foe falsi brada ede, èn srefi moro, foe krinkrin froefolgoe ede. A Wortoe foe Gado ben warskow taki disi ben sa de so (Lukas 17:1; 2 Timoteus 3:12; 1 Petrus 4:12; 2 Petrus 2:1, 2). A pisi disi foe a boekoe e froeteri na wan libilibi fasi san ben pasa troetroe èn fa a bribi foe Jehovah Kotoigi ben meki den wini a strei.
Pisi 7: Na a kaba, a boekoe e poti prakseri na tapoe a reide di e meki taki Jehovah Kotoigi abi a tranga overtoigi taki Gado e tiri troetroe na organisâsi di den de wan pisi foe dati. A e taki toe foe san ede den e denki taki a de fanowdoe, taki a heri organisâsi èn ibriwan sma aparti, moesoe de na ai.
Boiti den sani di skrifi na tapoesei, dan a toemoesi moi boekoe disi, abi wan heri moi pisi na ini foe 50 bladzijde nanga kloroe fowtow, di e gi foeroe bodoi èn di e sori den edekantoro, so boen leki den bijkantoro di Jehovah Kotoigi e gebroiki na heri grontapoe.
Efoe joe no ben doe disi kaba, dan seiker joe sa kisi wini te joe e bai èn leisi wan eksemplaar foe a poeblikâsi disi di e hari a prakseri foe sma.
Wortoe foe wan toe sma di leisi en
San den sma di ben leisi a boekoe disi kaba, e taki? Dja na san wan toe foe den ben taki:
„Didjonsro mi kaba leisi a moi boekoe di e hari sma prakseri, a libilibi boeweisi foe sani di troe, Jehovah’s Getuigen — Verkondigers van Gods Koninkrijk. Soso wan organisâsi di e gi ensrefi loyaal na a waarheid na wan sakafasi, ben kan skrifi so eerlijk, èn na so wan deki-atifasi èn switifasi.”
„A de neleki a boekoe Tori foe den Apostel, foe di a eerlijk èn opregti.”
„Fa a de wan span, njoen poeblikâsi! . . . A de wan historia di skrifi na wan troetroe koni fasi.”
Baka di wan man leisi afoe foe a boekoe, a ben skrifi: „Mi ben kon foeroe nanga respeki, de nanga froewondroe èn pikinmoro mi ai ben lon watra. . . . Ini ala den jari disi, no wan tra poeblikâsi ben skrifi na so wan fasi taki a ben abi krakti so tapoe a firi foe sma.”
„Ibri leisi te mi e denki fa a boekoe disi sa tranga a bribi foe den jongoewan so boen leki den njoenwan di e kon ini na organisâsi ini a ten disi, mi ati e foeroe nanga prisiri.”
„Ala ten mi ben warderi a waarheid, ma di mi ben leisi a boekoe disi, a opo mi ai èn jepi mi foe froestan moro leki oiti taki a santa jeje foe Jehovah de na baka ala den sani disi.”
[Prenki na tapoe bladzijde 14, 15]
Den Kotoigi ben doro na foeroe sma nanga a Kownoekondre boskopoe, srefi di den no ben de someni