Gado Kownoekondre ’e kon’ — Oten?
1. (a) Foe san ede wi moe „loekoe nanga foeroe froewakti” na a kaba? (b) Fa wi kan „gi wi diniwroko grani”, èn sortoe froetrow wi kan abi?
OTEN wi kan froewakti dati den pramisi foe na kownoekondre e kisi wan toemsi bisi kontroe? Son sma di ben dini Jehovah so wan 20, 30, 40 jari ofoe moro langa getrow, a kan gersi dati „a kaba” e wakti toemsi langa foe kon. Ma hori ini prakseri san Gado proféti Habakuk e ferteri wi: „Srefi a wansi a ben sa wakti foe kon, tan loekoe nanga foeroe froewakti na en; bikasi sondro mankeri a sa kon. A no sa kon toemsi lati” (Hab. 2:3). Wi no abi foe sabi na fesi „na dé nanga na joeroe” te na „bigi benawtoe” sa loesoe kon tapoe na grontapoe disi ini ala en tranga. Na a momenti disi a nofo dati wi e „gi grani na wi diniwroko” foe di wi e préki fajafaja na „boen njoensoe” foe na kownoekondre di opo. Wi kan froetrow dorodoro a tapoe dati te na kownoekondre-préki kon troe ini na fasi di Jehovah wani dati disi pasa, Jezus proféti wortoe sa kon troe: „Èn dan na kaba sa kon.” — Matt. 24:17, 21, 36; Rom. 11:13.
2. (a) San de prenspari foe Jehovah marki foe ten foe sani di e pasa? (b) Oten èn nanga sortoe sani di psa den „laatste dé foe a seti foe sani” ben bigin?
2 Foedi Jehovah abi wan soifri marki foe na ten foe den sani di e pasa, dan disi de prenspari: Gado ben tjari wel a fesi kon na krin den toe bigindatum foe den toe moro prenspari ten ini na libisma historia te na a ten disi. Sortoe pisi ten dati de? Ala toe de pisi ten foe kroetoe. Na fosi wan ben de ’den laatste dé’ foe na djoe seti foe sani, wan pisi ten di ben bigin nanga na dopoe foe Jezus èn na a salfoe foe en leki Messias (Joël 1:15; 2:28-32; Tori foe den Apostel 2:17). Na profétitori foe Daniël di ben gi moro leki 500 jari a fesi, ben sori tapoe na jari 29 G.T. leki na bigin foe den „laatste dé” dati. Fa so?
A marki foe na ten foe na djoe „laatste dé”
3, 4. (a) San de den „70 wiki”, oten den ben bigin? (b) Nanga sortoe sani di psa na laatste „jari-wiki” ben marki leki prenspari?
3 Ini Daniël 9:24-27 wi e lési foe wan pisi ten foe „70 jari-wiki” ofoe „wiki foe jari” (Voetnoten ini Petrus-Canisius-vertaling èn Willibrordvertaling), ofoe wan totaal foe 490 jari, foe bigin nanga a „ten di na wortoe ben go na doro . . . foe bow Jeruzalem baka”. Oten dati ben pasa? Na tori ini na bijbel ini Nehemia 2:1-7 e verklari dati „ini na di foe 20 jari foe Artaxerxes, na kownoe”, foe Persia, na kownoe srefi ben gi komando na en djoe schenker, Nehemia foe drai go baka na a foto foe en fostentata èn „foe bow (disi) baka”. Akroederi na grontapoe historia, dan na di „foe 20 jari foe Artaxerxes”, ben fadon ini 455 bifo G.T. Te wi teri 490 jari foe sensi a datum dati, dan wi e kon tapoe a jari 36 foe wi gewoon teri. Daniël profétitori e ferteri wi dati na laatste „jari-wiki” 29-36 G.T, de spesroetoe prenspari. Èn foe san-ede?
4 Foe di „foe sensi na wortoe ben go na doro foe bow Jeruzalem baka te na a Messias na Tiriman, 7 wiki, èn ook toe 69 wiki sa de”. Soboen, na Messias ben sa sori ensrefi na a di foe 70. Disi ben sa marki ook toe na bigin foe den „laatste dé” foe a djoe seti foe sani, aladi na Messias ini den fosi 7 jari foe na pisi ten disi foe kroetoe ben sa meki na froebontoe foe Abraham kon stéfi gi den djoe di ben teki en. „Na a afoe pisi” foe na jariwiki dati, dati wani taki, ini 33 G.T., na Messias ben sa „koti poeroe” ini dede, ala di en égi bigi slagti-ofrandi foe verzoen sondoe, ben sa abi leki bakapisi dati „slagti-ofrandi nanga offer-presenti (akroederi na wet foe Israël) ben sa tapoe”, foe di den no ben abi no wan waarde moro. — Hebr. 10:12, 18.
5. (a) San e sori dati den djoe ben sabi heri boen na ten-aspect foe den „70 wiki”? (b) Foe san ede na froewakti foe den djoe no ben kon troe? (c) O troe na profétitori foe Daniël ben de?
5 Sondro degedege, den djoe ben sabi heri boen na ten-aspect foe den „70 wiki”, bikasi na bijbel-skrifiman Lukas e ferteri wi dati ini den „dé dati na pipel ben loekoe a fesi foe a kon foe a Kristus nanga foeroe froewakti (Luk. 3:15). Ma a howpoe foe den ben de tapoe na kon foe wan bari-nen fetiman-kownoe di ben sa tjari den djoe foe wini den Romein kwinsiman. A bribi foe den no ben go so fara dati den ben bribi dati na Messias „ben sa koti poeroe” ini 33 G.T. Ooktoe den no ben poti bribi tapoe na proféti warskow dati Jeruzalem nanga den sma di ben libi drape ben sa kisi agen wan „pori”. Ma fa na profétitori foe Daniël ben de troe ini na jari 70 G.T. di den Romein legioen ondro generaal Titus ben pori Jeruzalem!
„Laatste dé” gi na heri grontapoe — oten?
6. (a) Sortoe tra datum Jehovah ben tjari kon na krin na fesi, èn leki na bigin foe san?
6 Ma san de den tra bigindatum di Jehovah ini en boen-ati ben tjari kon na krin? A de na bigin foe „den laatste dé” foe Satan heri seti foe sani (2 Tim. 3:1-5). Disi de „tranga ten, di moeiliki foe pasa” di ben bigin na a heri grontapoe ini a jari 1914.
7, 8. (a) Èn fa bijbelondrosoekoe-man ben si na datum dati sensi 1880 te ini den jari 1980? (b) Sortoe verklari foe man foe grontapoe di sabi sani boen ben poti ook toe prakseri tapoe 1914?
7 Bijbelondrosoekoeman di e opo den ai boen ben loekoe 34 jari kaba a fesi na a datum dati. Sensi 1880 foeroe tron ini Na Wachttoren sma prakseri ben poti a fesi kaba tapoe na prenspari fasi foe na jari dati. Èn now, 68 jari baka 1914, wi e loekoe na a jari dati baka leki wan jari di wani taki bigi sani. No wi wawan e bribi disi. Wan skrifiman di sabi sani boen ben kari 1914 na jari pe ’na grontapoe soleki sma ben sabi èn teki en na a ten dati ben kon na wan kaba’. Wan tra skrifiman ben skrifi foe 1914 leki na bigin foe ’na pisi ten foe now di ben sa kan kon na wan kaba ini na pori foe ipi-ipi sma’. — Loekoe ook toe na boekoe „Joe kownoekondre moe kon”, den bladzijde 127-140, 186-189.
8 Moro leki 50 jari baka 1914 na Doisri tiriman Konrad Adenauer ben taki di a ben e prakseri: „Prakseri nanga prenki e kon na mi fesi bifo na jari 19l4, di troetroe vréde, rostoe nanga sekerfasi ben de na a grontapoe disi — wan ten pe wi no ben sabi frede . . . Sekerfasi nanga rostoe sensi 1914 ben komoto ini a libi foe den libisma.” Èn no langa pasa kaba, ini november 1980, na Brits tiriman Harold Macmillan ben loekoe baka na den 86 libijari foe en èn a ben taki nanga sari foe na „automatische go na fesi” ini na eeuw foe koningin Victoria. A ben taki: „Ala sani ben sa kon moro boen . . . Na so na grontapoe ben de di mi ben gebore. . . . Ne, na wan mamanten ini 1914, wantronso, onfroewakti wan kaba kon na ala sani.”
9. (a) Fa a ben doe kon dati bijbelondrosoekoeman ben si a fesi dati na jari 1914 ben kan de prenspari? (b) Sortoe bodoi foe Daniël profétitori ini kapitel 4 ben tjari na loekoe disi kon?
9 Ma fa opregti bijbelondrosoekoeman, di sma sabi now leki Jehovah Kotoigi, ben si kaba dati 1914 ben sa tjari so wan kenki kon? Disi doe kon, foedi a „getrow èn koni srafoe” (Matt. 24:45-47), di de salfoe kristen di e doe dienst na ondro den Masra, Jezus Kristus, akroederi nanga den wortoe foe 2 Petrus 1:19 „ben poti prakseri tapoe na proféti wortoe leki tapoe wan lampoe di e skijn ini wan doengroe presi”. Ini na profétitori foe Daniël kapitel 4 den ben kon sabi dati na trowe na gron foe na famiri-lin foe kownoe foe kownoe David ini Jeruzalem, ini na jari 607 bifo G.T., no ben marki foe alaten na kaba foe Jehovah tiri-makti na grontapoe. Na „bon” foe Gado kownoe makti ben sa sproiti njoen baka. Baka „7 ten”, ofoe 2520 jari, foe tirimakti na grontapoe foe heiden leki meti, dan agen ben sa kon bekenti „dati na Moro Héwan de Tiriman ini na kownoekondre foe libisma èn dati a de gi en na a sma di a wani èn a de poti srefi na moro lagiwan foe a libisma famiri na ini”. — Dan. 4:14-17.
10. Fa na kon foe na Messias ini 1914 de tra fasi leki en fosi kon?
10 Ja, ini na rampoe jari dati 1914, na „Lagiwan”, di „ben koti poeroe” na en fosi kon leki Messias na wan ogri-ati fasi, nanga noti gi ensrefi”, ben sa kon sori ensrefi agen. Ma a tron disi Kristus ben sa kon sondro soema ai si en, ini hemel glori, èn ala santa engel nanga en, foe teki „presi tapoe en glori troon”. — Dan. 9:26; Matt. 25:31.
Na libisma-lo foe 1914
11. (a) Sortoe libisma-lo no sa psa gwe, bifo den sani di Jezus taki ben psa? (b) San sma di tan abra foe na „libisma-lo” disi kan froewakti foe ondrofeni?
11 Ne, na a bigin foe Kristus de-noja, ofoe parousia, a ben de sondro libisma kan si en. Ma na libisma-lo foe 1914 ben si wel san ben psa dja na grontapoe leki „wan bigin foe pen” gi na libisma-famiri (Matt. 24:8, vertaling foe Voorhoeve). Èn den sma di ben tan abra foe na libisma-lo dati foe 1914, e taki te now ete foe en. Son wan foe den sa taki foe en ete te a ten doro dati Satan ogri seti foe sani e figi poeroe foe a fesi foe wi grontapoe ini na „bigi benawtoe”. Bikasi Jezus Kristus srefi ben gi wi na djaranti: „Foe troe, mi taki gi oen, dati na libisma-lo disi (na libisma-lo di ben si na ’bigin foe den pen foe benawtoe’ ini 1914) no sa pasa gwe (krinkrin) te leki ala den sani pasa. Hemel nanga grontapoe sa pasa gwe, ma mi wortoe no sa pasa srefsrefi.” — Matt. 24:3, 8, 34, 35.
12. (a) Sortoe sani di psa sensi 1914 moe overtoigi wi foe na soifri fasi foe bijbelprofétitori? (b) Ma ini san wi bribi ankra? (c) Tapoe soema na „boen njoensoe” e poti prakseri?
12 Den „pen” di ben taki na fesi dati den ben sa bigin ini 1914, ben broko loesoe kon wantronso nanga skreki tapoe na grontapoe. Èn na libisma-famiri te now ete e kisi kwinsi foe den! Den e gi na overtoigi „marki” dati 1914 de na bigin foe na „besroiti foe na seti foe sani”. Ma wi bribi no sdon soso tapoe wan datum, soleki 1914. Wi bribi ankra stéfi ini na heri Wortoe foe Gado, ini na „boen njoensoe” di Jezus nanga en discipel ben préki fosi, ini na kontroe na wan wondroe fasi foe someni bijbelprofétitori ini wi ten, spesroetoe den di abi foe doe nanga na „getrow èn koni srafoe” èn en kompewrokoman, sodati sma kan kon sabi den. Joisti na „boen njoensoe disi foe na kownoekondre”, na heri boskopoe foe na bijbel, de na fundamenti foe wi bribi. Ala disi e sori tapoe Jezus Kristus leki na centrale figuur, Gado Manpikin di en hemel Tata ben seni kon na grontapoe foe bai na libisma-famiri fri èn di e tiri now tapoe glori fasi ini na kownoekondre di opo na ini hemel (Matt. 24:3, 14, 45-47; 25:31-33; Openb. 19:10). Foedi wi abi bribi, meki wi kan froestan ook toe fa na Kownoekondre sa ’kon’ foe ferloesoe ala sma di lobi èn e doe regtvaardiki fasi. Fa dati sa pasa?
[Faki na tapoe bladzijde 174]
„SÉBI-TENTI JARIWIKI” (Dan. 9:24-27)
Foe sensi na ten di na kownoe toe Persiakondre „ben meki na wortoe go a doro” na Nehemia, ini 455 bifo G.T.
455 — 1 b.G.T. = 454 jari
1 b.G.T. — 1 G.T. = 1 jari
1 G.T. — 36 G.T. = 35 jari
455 b.G.T. — 36 G.T. = 490 jari
Na Messias ben „koti poeroe na a mindri foe na wiki” ini april 33 G.T.
Te na a kaba foe spesroetoe boen-ati gi den djoe ini 36 G.T. nanga na bekering foe Cornelius osofamiri
[Faki na tapoe bladzijde 175]
„DEN FASTE TEN FOE DEN NAATSI” (Dan. 4:14-25; Luk. 21:24-26)
Jehovah soevereiniteit na a bigin foe den ten foe den heiden ini 607 bifo G.T. ben poti ini banti
„7 TEN” = 2520 jari
(Openb. 12:6, 14; Ezech. 4:6b)
607 — 1 bifo G.T. = 606 jari
1 b.G.T. — 1 G.T . = 1 jari
1 G.T. — 1914 G.T. = 1913 jari
607 b.G.T. — 1914 G.T. = 2520 jari
Jehovah soevereiniteit ben kon baka ini a Messias kownoekondre, 1914 G.T.