Fa joe e tiri joe libi?
„Kolokoe den sma de di de sondro fowtoe ini den pasi, den sma di e waka ini na wet foe Jehovah.” — Psalm 119:1.
1. San na historia e sori taki de prenspari foe de kolokoe?
’SAN de fanowdoe foe abi wan kolokoe libi?’ Foeroe sma sa gi leki piki tapoe na aksi disi foe kari materiële sani leki njanjan, krosi nanga oso, ofoe difrenti sortoe ontspanning nanga prisiri. Tokoe a historia e sori dati na loekoe foe joe tapoe na libi nanga joe libifasi de moro prenspari gi a kolokoe foe joe. Joe sa ferteri na waarheid te joe e handri nanga basi, tra wrokoman nanga osofamiriman? Joe sa teki sani di no de foe joe? Joe sa teki wroko ofoe teki prati na ontspanning di joe no de séker efoe a boen?
2. Fa son sma e tiri den libi, san e meki sortoe aksi kon a fesi?
2 Foe kan teki wan besroiti ini den sortoe aksi disi, dan son sma e firi moro gi spesroetoe regel di den sabi ofoe di den kan kon sabi efoe a de fanowdoe. Trawan e doe san „gersi” boen ini den konsensi. Ma kande joe abi na firi foe aksi: San na a konsensi, sensi a bijbel abi someni foe taki foe en? Fa a de wroko? A de prenspari ini a teki foe besroiti èn a feni foe kolokoe? Èn fa wi kan taki nanga na apostel Paulus, taki: „Te nanga a dé foe tide, mi ben tjari misrefi na fesi foe Gado nanga wan soifri konsensi”? — Tori foe den Apostel 23:1.
Joe konsensi — San na en?
3, 4. San na a „konsensi”, èn soema abi wan?
3 Moro foeroe sma e si na konsensi leki wan algemeen firi foe san boen èn fowtoe. Ma wi abi wan fonten nanga moro soifri bodoi foe na konsensi — a Wortoe foe Gado. Na bijbel e jepi wi foe froestan dati na konsensi na wan sani di e gi kotoigi inisé foe wi. Paulus ben taki foe datede: „Mi konsensi e kotoigi nanga mi ini santa jeje” (Rom. 9:1). A ben gebroiki a Griki wortoe suneidèsis, di wani taki letterlek: wan sabi makandra nanga joesrefi. Soboen, na konsensi de na man di wan sma man foe loekoe na ensrefi, foe kroetoe ensrefi èn foe gi kotoigi foe ensrefi.
4 Na konsensi no de soso na froktoe foe wan maatschappelijke ontwikkeling, bikasi na bijbel e sori dati Gado ben prani en ini na fosi man nanga oema (Genesis 3:7, 8). Di Paulus ben taki foe na frantwortoe foe djoe nanga heiden, a ben skrifi: „Bikasi alaten te sma foe den naatsi (heiden) di no abi wet, foe densrefi e doe den sani foe na wet, dan den sma disi, winsi den no abi wet, de wan wet gi densrefi. Den de joisti den sma di e sori dati na inbere foe na wet ben skrifi ini den ati, ala di den konsensi e kotoigi nanga den èn den égi prakseri mindri makandra e kragi den ofoe srefi e krin densrefi” (Rom. 2:14, 15). Ia, srefi sma di no abi wan skrifi wet foe Gado, e si sani leki kiri, foefoeroe nanga broedoesjen leki sani di de fowtoe. Ini den vers disi wi kan si toe dati na konsensi na wan wrokomakandra foe na ati nanga na froestan. (den „prakseri”).
5. San na wan fasi fa wi konsensi e wroko?
5 Na wroko fa na konsensi e wroko èn di wi sabi kande moro boen de na wan, pe a de kroetoe wi doe „baka te a sani psa”, baka na fowtoe doe. Te wi kon na a besroiti dati wi ben doe wan fowtoe sani ofoe pe wi ben handri sondro respeki, dan wi konsensi e kragi wi èn e kroetoe wi (Teki gersi 2 Samuël 24:10; 1 Johannes 3:20). Te wi teki disi boen, dan na rol disi foe na konsensi kan jepi wi, foe di a de bewégi wi foe drai baka gi a doe foe so wan fowtoe sani. Èn a kan bewégi wi foe abi beraw, foe ferteri dati a de spéti wi ofoe srefi foe meki na lasi kon boen baka. — Ps. 32:3, 5; Matt. 5:23, 24; Luk. 19:1-8.
6. Fa wi konsensi kon wroko moro ete?
6 Wi konsensi kan doe dienst tapoe ete wan fasi. Ala di son sma e taki dati wi konsensi de soifri te a tan pi, tokoe wi konsensi moe taki ofoe gi wi tranga foe doe boen ini situwasi pe wi e kon tanapoe fesi wan problema ofoe wan besroiti foe teki. Wi e feni wan boen eksempre ini a wégri di Jozef wégri foe teki den kari foe a oema foe Potifar foe kon krosbé foe en. Ala di Gado no ben gi wan skrifi wet kontrari soetadoe, tokoe na konsensi foe Jozef ben gi en tranga foe poti hoeroedoe farawe foe en (Gen. 39:1-9). Efoe wi bifo wi go so fara foe handri, arki na wi konsensi, dan wi sa lon komoto foe na pen foe konsensifonfon.
7. San wi wani kon sabi so te nanga na studi disi?
7 Na aksi e tan: O tranga a krakti foe wi konsensi moe de? Joe e bribi dati wan besroiti moe teki tapoe na gron foe na konsensi ini moro foeroe moreel nanga persoonlek afersi? Ofoe regel moro boen? Disi wi moe sabi. Sosrefi toe wi moe sabi efoe gevaar de di wi moe loekoe boen nanga den. San a Wortoe foe Gado e sori, di e taki dati a „de boen foe leri sma, foe gi piri-ai, foe seti sani reti, foe gi tranga leri ini regtvaardiki fasi”? — 2 Tim. 3:16.
A loekoe foe sani foe a wan kriboi sé go na tra kriboi sé
8. Foe sortoe toe fasi foe loekoe sani sma ben loekoe moraliteit?
8 Na stré mindri regel nanga na konsensi de hondro-hondro jari kaba. Ini na artikel „Casuistiek” na Encyclopaedia Britannica (di foe erfoe uitgave) e tjari kon na krin dati moraliteit „moe loekoe sontron leki wan dorosé wet èn sontron leki wan inisé fasi ofoe firi. . . . Den sma di e bribi ini wet ben poti den froetrow ini makti, ofoe logica, ala di den sma di e bribi dati libisma moe meki den inisé fasi tiri den, moro foeroe e loekoe na wi instinctieve fasi — konsensi, gosontoe froestan ofoe firi.” Di Jezus nanga den apostel ben e waka lontoe a grontapoe, ala toe fasi foe loekoe sani foe a wan kriboi sé go na a tra kriboi sé ben de. Wi kan froestan moro betre na boen balans nanga na koni foe Gado foe a bijbel te wi poti ala wi prakseri na a situwasi di ben de na a ten dati.
9, 10. (a) Fa den Fariséman ben sori wan fasi foe loekoe sani na wan kriboi sé? (b) Kontrari disi, san ben de gewoon na mindri den Griki nanga Romeinsma?
9 Den djoe Fariséman ben de faja ini a préki foe regel. Foe di den no ben de tevréde nanga na wet foe Mozes, den ben meki boen foeroe regel ofoe „libisma-komando”, sodati den komando foe Gado ben lasi den krakti. Boiti dati den ben meki den regel disi di ben go moro fara leki san Gado ben aksi, ma a loekoe foe den foe sani nanga wet, ben gi tranga toe foe prakseri dati regtvaardiki fasi wan sma kan kisi te a sabi èn hori den libisma regel disi. — Matt. 15:1-20; 23:1-5; Luk. 18:9-12.
10 „Na tra kriboi sé ben de na a owroe Grikikondre”, so classicus Samuel H. Butcher e taki. „Na mindri den Griki . . . nowan seti foe leri nanga komando, nowan anoe boekoe nanga makti regel foe moraal ben poti oiti ini wan document . . . Regel di no e kenki ben lan wan sma foe handri.” Na Encyclopeadia Britannica e taki foe den Romeinsma: „Cicero nanga Seneca ben teki na gosontoe froestan leki den tjariman. Den ben kroetoe ibri problema tapoe na gron foe en verdienste èn den ben loekoe moro na a geest leki na a letter.” Na Griki-Romein filosofie disi ben de popu ini na fosi eeuw. A ben sa abi krakti tapoe kristen? Paulus ben skrifi: „Loekoe: kande wan sma sa tjari joe leki en foefoeroe-sani gwe nanga jepi foe na filosofie èn nanga jepi foe bedrigi fasi akroderi den elementair sani foe na grontapoe èn no akroderi Kristus.” — Kol. 2:8; Tori foe den Apostel 17:18-21.
11. Fa den toe kriboi sé foe loekoe sani bakaten ini na historia ben abi sma di ben bribi den?
11 Ini eeuw bakaten toe joe ben abi den 2 kriboi sé disi foe loekoe sani di ben abi sma di ben bribi na ini, srefi na mindri sma di ben taki dati den de kristen. Den Jezuietsma alasma sabi leki sma di e poti krakti tapoe wan moraal di abi en fundamenti tapoe boen foeroe kerki wet. Baka na Hervorming na protestantisme (anitri) ben poti krakti tapoe na sma nanga konsensi. Disi ben meki no langa pasa kaba na loekoe foe sani ben kon, di sma sabi leki „situwasi-ethiek”, di Dr. Joseph Fletcher, memre foe na episcopale Kerki, ben meki gewoon sma kon froestan. Ini The National Observer den ben taki disi foe en: „Dr. Fletcher ben meki wan controversieel manifest foe na fri èn frantwortoe foe wan sma èn di abi en roetoe ini wan ethiek foe brada lobi, di, soleki a taki, moe fri na modern libisma foe tranga regel di kon owroe, soleki den ’Tin komando’ . . . Nanga lobi leki na wan enkri tjariman, dan abortus (poeroe-bere), sekslibi bifo trow, brokotrow, nanga tra doe di sma e si aladé leki fowtoe , e de ini na ai foe Dr. Fletcher ini son situwasi foe datede boen.”
12. Wi moe lon komoto foe sortoe gevaar?
12 A de krin dati libisma e wani foe fadon go te na den kriboi sé — sodati den e tiri densrefi ofoe nanga regel ofoe nanga den konsensi. Son sma di e si na swaki fasi foe wán kriboi sé foe loekoe sani, e teki disi so na ati dati den e fadon go na a tra kriboi sé, neleki na slinger foe wan oloisi e skomroe foe a kriboi reti-anoesé go na a kriboi kroektoe-anoesé. Ini a ten foe den middel-eeuwen foe eksempre na slinger ben skomroe foe na fasi foe den Jezuietsma foe abi regel go na a fasi foe den Hervormers nanga na bigi krakti di den ben poti tapoe fri èn konsensi. Kande joe sa sabi papa nanga mama toe di ben de toemsi strikt ini a kweki foe den pikin. Ma di den pikin disi ben kon bigi, den ben go te na a tra kriboi sé èn gi den égi pikin foe den ala fri di de, nanga ala takroe bakapisi foe dati. Wi kan si na waarheid foe san na bijbel e taki ini Jeremia 10:23: „Mi sabi heri boen, o Jehovah, dati a no de na a grontapoe libisma foe seti en pasi. A no de na wan man di e waka srefi foe poti den foetoe foe en.”
Na balans èn boen tiri foe Gado
13. Sortoe jepi na bijbel e gi wi tapoe na tori foe moraliteit nanga konsensi?
13 Jehovah ben gi ini den Santa Boekoe balans jepi na kristen, sodati wi kan komoto na a pasi foe (1) tapoe wan wettisch fasi poti toemsi foeroe krakti tapoe regel, san kan tjari go na wan sjatoe-froestan èn tranga fasi foe loekoe sani nanga anbegi ofoe (2) foe poti toemsi krakti tapoe na fri foe na konsensi, san ben tjari son wan go na libisma redenering, sodati sma e proberi foe taki boen srefi foe ogridoe. Foe wi kan kisi na balans loekoe foe a Wortoe foe Gado èn njan boen foe a tiri foe en, dan wi abi na fasi foe David fanowdoe: „Meki mi joe pasi bekenti, o Jehovah; leri mi joe pasi. Meki mi waka ini joe waarheid èn leri mi, bikasi joe na mi Gado foe ferloesoe.” — Ps. 25:4, 5.
14, 15. San wi kan leri foe den kristen Griki Boekoe foe na fasi fa den djoe ben loekoe na Wet èn fa Gado ben loekoe na Wet?
14 Na bijbel e tjari kon na krin fa Jezus no ben feni na fasi foe den méstri foe wet nanga Fariséman boen pe ala sani ben drai lontoe regel. Wantoe djoe di no ben wani gebroiki na froestan di Gado ben gi den, ben sa feni en boen kande foe kisi regel pe ben taki te o fara den ben moe wasi den anoe foe den, san den ben si leki wroko tapoe na sabbat, èn foe sortoe njanjan di ben prani a di foe 10 pisi ben moe pai, èn so moro fara. Na fasi dati foe loekoe sani ben meki regel kon di ben kwinsi sma, di ben aksi foe gi bodoi sondro kaba èn di ben poeroe a prakseri foe na geest èn den prenspari sani foe den Santa Boekoe. Jezus ben taki gi den kerki fesiman: „Oen de gi tin procenti foe (den switi smeri wiwiri leki) na munt, dille nanga na komijn, ma den moro prenspari afersi foe na Wet, namkoe geregtigheid nanga sari-ati nanga getrowfasi oen no ben loekoe na wan ai.” — Matt. 23:23; Mark. 7:3, 4.
15 Na wet foe Mozes ben meki na jejefasi, na moraliteit nanga na gosontoe foe den djoe kon na fesi, ala di a ben tjari kon na krin gi den dati leki sondari den abi na Messias fanowdoe (Gal. 3:19, 23-25; Rom. 7:7-14). Foe di na Wet de wan volmaakti markitiki, meki nowan Israëlsma ben kan hori en sondro foe meki wan fowtoe èn na so fasi kisi wan volmaakti konsensi (Hebr. 9:9, 10). Di na prakseri foe Gado nanga a wetboekoe disi ben kon na wan kaba, meki a ben poeroe en na pasi toe, ala di a ben komoto foe Gado. Dan, na presi dati Gado ben handri nanga en Nenpipel tapoe a gron foe wan bigi wetsistema di ben skrifi, „a ben poti en wet ini den froestan èn ini den ati”. — Jer. 31:33; Hebr. 10:16; 2 Kor. 3:5-11.
16. Sortoe leri e gi dja na (a) sma di de toemsi strikt nanga densrefi, èn (b) na wi nanga wi loekoe tapoe a tori foe regel?
16 Nanga disi ini prakseri, meki sma ini disi ten di abi na frantwortoe tapoe trawan ofoe di moe tjari den activiteit foe trawan konmakandra, moe loekoe a tapoe dati den no poti lai a trawan tapoe foe libisma regel di no de fanowdoe. Na firi foe disi, kan de tranga na sma di de strikt gi densrefi ofoe di e aksi foeroe foe densrefi èn di foe datede e méne dati trawan moe si den sani neleki fa den e si den. Ma Paulus ben skrifi gi kristen: No dati wi de basi foe oen bribi, ma wi de medewrokoman foe oen prisiri ede, bikasi oen de tanapoe nanga jepi foe oen bribi” (2 Kor. 1:24). Nanga disi ini prakseri, meki kristen moe loekoe boen ini algemeen foe no wani foe wan sma di abi makti, dati a meki wan regel gi ibri afersi. Na presi foe dati, wi moe kon kisi moro sabi foe san a Wortoe foe Gado e taki, sodati wi e oefen wi konsensi èn wi powa foe si sani. — Hebr. 5:14.
17. Foe sortoe tra fowtoe loekoe foe sani wi moe loekoe boen?
17 Ma na a tra sé na gevaar de sosrefi toe, dati wan sma e fadon go te na a tra kriboi sé, nanga na firi dati ibri kristen de fri foe doe pikinmoro ala sani san en konsensi e gi en pasi foe doe. No so langa psa kaba wantoe sma ben meki wan punt foe disi, foe di den e taki dati a „kristendom no de wan bribi foe regel”, èn den e sori na tapoe tekst leki: „A no kan tra fasi, brada, den ben kari oen foe de fri; soso no gebroiki na fri disi leki wan okasi foe na skin, ma dini makandra leki srafoe nanga jepi foe na lobi. Bikasi na heri Wet e kon troe ini wan wortoe, namkoe: ’Joe moe lobi den sma na joe sé leki joesrefi’” (Gal. 5:13, 14). A de troe dati kristen no tanapoe na ondro na wet foe Mozes ofoe na ondro sortoe tra bigi sistema foe wet foe Gado toe. Tokoe wi moe loekoe boen dati ’nowan sma kori wi nanga overtoigi argument („overtoigi èn moi argument èn bedrigi wortoe”, Amplified Bible)’ bikasi foe wan opregti ondrosoekoe foe na bijbel e kon na krin, dati a de gi wi wel wantoe wet nanga regel. — Kol. 2:4.
Kristen no de sondro wet
18, 19. Sortoe sé kristen e teki tapoe na tori foe bijbel wet nanga regel?
18 Paulus ben skrifi gi den Korintesma dati wan sma di ben gi ensrefi abra na hoeroedoe ben moe poti na dorosé foe na gemeente. A ben taki moro fara dati hoeroedoeman, soetadoeman, homoseksueelsma, foefoeroeman, gridiman, droengoeman, skempiman nanga afpersers „no sa kisi a kownoekondre foe Gado” (1 Kor. 5:1, 6, 7, 11-13; 6:9-11). Wi e lési toe dati kristen sma moe „tan farawe foe sani di tjari go leki ofrandi gi kroektoe-gado èn foe broedoe èn foe sani di kwinsi kiri èn foe hoeroedoe”, èn dati sokari brada di e panja falsi bribi, ben moe wai poti na wan sé (Tori foe den Apostel 15:28, 29; Tit. 3:10; 2 Joh. 9-11). Dja a de go krin foe wet. Sma di e doe den sortoe sondoe disi no kan de wan troe kristen. Èn efoe wan dienstknekti foe Gado e doe den sondoe disi, a moe poeroe poti dorosé foe na gemeenschap.
19 Wi e feni sosrefi toe regel foe bijbel tapoe na tori foe afersi di no de sondoe pe wan sma kan poti dorosé foe na gemeente. Paulus ben skrifi foe eksempre dati kristen di de den wawan sondro foe trow, dati den moe trow „soso ini na Masra” èn a ben gi ordroe dati ’efoe wan sma no wani wroko, den no moe meki a njan toe’ (1 Kor. 7:39; 2 Thess. 3:10). Son sma ben sa kan tak-go-tak-kon: ’Foe di den no sa poti mi na dorosé foe na gemeente te mi trangajesi na rai dati, dan disi seker no kan de serjoesoe regel.’ Fa disi de wan don denki! Gado e si den regel disi serjoesoe. Paulus no ben ferteri den Thessalonikasma foe „marki” èn foe „tapoe foe hori nanga” sma di foe espresi e trangajesi na regel foe doe wroko? — 2 Thessalonika 3:14, 15.
20, 21. San wi kan leri foe regel foe na gemeente, èn fa wi moe si den regel disi?
20 Son regel de aparti foe na tanboen foe na gemeente. Ini a ten di psa son kristen foe eksempre ben kan taki ini tongo. Paulus ben bepaal dati soso toe ofoe dri foe den ini wan tron ben moe taki, dati den ben moe doe en wan baka trawan èn dati wan sma ben moe de di ben e poeroe en kon na krin — regel di ben meki na vréde nanga ordroe kon na fesi (1 Kor. 14:26-33). Na a srefi fasi ini disi ten den owroeman foe wan gemeente e sori fa foe hori den doro foe na Kownoekondre-konmakandra-presi fri, foe hori sidonpresi foe soso sondro trawan kan sidon, ofoe foe a poti foe oto, fiets nanga bromfiets, nanga ini prakseri tra sma nanga veiligheid. Den sortoe regel disi foe a gemeente no de dorosé foe a bijbel, foe di a srefi prakseri den abi leki na rai foe Paulus foe a taki ini tongoe (namkoe vréde nanga boen ordroe). Nanga disi ini prakseri na rai foe na bijbel e taki: „Gi jesi na den di e teki fesi na mindri oenoe” (Hebr. 13:17). Foe di wi sa komoto na pasi foe sondoe leki lé èn foefoeroe foe na jere di wi e jere Gado, dan na tekst disi moesoe abi foe doe nanga na a gi jesi di wi moe gi jesi na a tiri di den owroeman e gi ini afersi foe na gemeente. Efoe no nanga ala sortoe pikin wet den „e de leki basi tapoe den di de a goedoe foe Gado”, dan a no sa de moeiliki foe saka na ondro na tiri foe den. — 1 Petr. 5:3.
21 Tra „regel”, ofoe fasi foe doe sani e tjari boen gi na ipi na a heri grontapoe. Foe eksempre, den e aksi foe Jehovah Kotoigi dati den meki wan rapport foe a kotoigiwroko foe den. (Teki gersi Tori foe den Apostel 2:41, 42; 8:14.) Wan sma di fadon go te na a kriboi sé foe na fri di wan sma abi, no ben sa agri nanga na fasi disi foe wroko. Ma prakseri pikinso ala a boen di ben kon, foe di den sma di e loekoe na ipi ben man foe sabi foe den rapport o fara na kownoekondre-kotoigiwroko ben gi, pe jepi de fanowdoe èn oten wan groepoe njoen discipel ben kan tron wan gemeente. Èn wi no ben feni en wan prisiri sani foe lési den rapport foe ala pisi foe na grontapoe? (Ezech. 9:11; Mark. 6:30; Tori foe den Apostel 14:21-23; 15:3; 19:1-6). Ini na froetrow dati Gado e tjari en pipel, meki wi kan sori wan geest foe gi jepi nanga wrokomakandra.
22. Foe san-ede wi moe ondrosoekoe moro fara na afersi foe a konsensi?
22 Boiti aparti wet nanga regel den Santa Boekoe abi boen gronprakseri di koni kristen kan poti ini den libi foe de „sondro fowtoe ini den pasi” (Ps. 119:1). Gronprakseri de spesroetoe konsensi boen foe poti wi konsensi tapoe a denki foe Gado. Ma san dati abi foe doe nanga ’konsensi-afersi’? Son sma ben abi na firi dati ’Efoe a de wan sani di libi abra na mi konsensi, dan san mi e doe de krinkrin wan persoonlek afersi.’ Meki wi go ondrosoekoe na afersi disi ini a tra artikel èn loekoe moro fara fa wi kan oefen wi konsensi foe kan njan a moro bigi boen foe en.
Joe kan tjari kon a krin
□ San na joe konsensi èn na sortoe fasi a kan jepi joe?
□ Sortoe toe kriboi sé de tapoe na tori foe moraliteit?
□ Fa a bijbel e jepi wi foe abi na joisti loekoe tapoe morele tiri?
□ Sortoe fasi fa wi moe loekoe sani foe a sé foe a bijbel wi moe abi tapoe a tori foe wet nanga regel?
[Prenki na tapoe bladzijde 245]
Ini moreel afersi sma ben skomroe foe a wan kriboi sé go na a tra kriboi sé
PREKTI FIRI KONSENSI
WET REGEL MAKTI