Njan boen foe a konsensi di Gado ben gi joe
„Na wet foe en Gado de ini en ati; en foetoe no sa seki.” — Psalm 37:31.
1, 2. Foe san-ede wi moe broko wi ede nanga na afersi foe wi konsensi èn na tiri di wi moe kisi foe en? (Odo 12:15; 14:12)
ALA DI Gado no ben gi kristen wan bigi sistema foe Wet, tokoe a ben gi wi wantoe wet, ofoe direct-lijn regel èn foeroe gronprakseri di wi moe gebroiki akroederi nanga wi bribi èn konsensi. Ma foe abi wan konsensi na wán sani èn foe njan boen foe en krinkrin na wan tra sani. Foeroe sma e firi dati „efoe wan sani no e trobi mi konsensi, dan a boen”. A denki dati joisti?
2 Na bijbel e sori wi dati foe wi sondoe skin ede, wi konsensi kan kori wi; a kan de swaki, a kan tja wi go tapoe wan verdwaal pasi ofoe kon doti. Wi kan waarderi moro betre na denki foe „meki joe konsensi de joe tjariman” te wi teki na prakseri den fosi-eeuw Kretasma, di sma ben sabi leki sma di ben de „léman, ogri boesmeti, tap’ala di no e wroko”. — Titus 1:10-12.
3. Sortoe krakti na konsensi ben abi tapoe den Kretasma?
3 Neleki fa a de nanga ala tra pipel, den Kretasma ben abi wan ingebore konsensi. Ma den no ben njan boen foe en. Na apostel Paulus ben skrifi Titus, di ben de na Kreta: „Ala sani krin gi den krinwan. Ma gi den di no de krin èn di no e bribi, noti de krin, ma den geest nanga den konsensi flaka” (Titus 1:15; Romeini 2:14, 15). Moro foeroe foe den Kretasma ben abi wan konsensi di no ben e bribi èn di no ben e jepi den foe doe den sani di ben de moreel joisti èn krin (1 Tim. 4:2). Ini na ai foe foeroe Kretasma „noti(ben de) krin”. Fa so? Nanga wan konsensi di no ben krin den ben e loekoe ibri situwasi leki wan okasi foe doe ogri. Kande den ben taki wel, ’A no de trobi mi konsensi’. Ma disi ben moe de so! Ma son djoe èn proseliet foe Kreta ben de ini Jeruzalem foe na Pinksterfesa ini 33 G.T. A jeje sabi foe den ben moe jepi den foe no de léman, ogriman ofoe tap’ala. Èn den wan di ben teki Jezus, ben kisi jepi moro fara foe en leri foe abi wan konsensi di e wroko boen. — Tori foe den Apostel 2:5, 11; Tit. 1:5; 2:2-5; 3:3-7.
4, 5. San wi kan leri foe a konsensi ini na tori foe Paulus?
4 Ma a konsensi kan kori wan sma srefi, di ben kon na ondro a krakti foe a Wortoe foe Gado èn di wani doe san boen. Saulus, ofoe Paulus ben sabi den Santa Boekoe èn a ben anbegi Gado fajafaja akroederi nanga na wet. Tokoe a ben misi foe go na fesi nanga na progressief fasi fa Gado ben meki en wani kon troe. Baka di na Messias ben kon, ben préki èn ben dede, ete Paulus ben tan anbegi leki wan Fariséman foe na Judaïsme. En konsensi no ben tapoe en „foe vervolgoe na gemeente” èn „foe bro tapoeskreki nanga kiri tegen den discipel foe Masra”. — Fil. 3:4-6; Tori foe den Apostel 9:1, 2.
5 Den eksempre disi e sori wi dati wi konsensi kan kori wi. Foe di wi moe teki foeroe besroiti di spesroetoe bijbel wet no e taki foe den, ma di de wan afersi foe wi konsensi, dan wi moe sabi fa wi kan oefen wi konsensi èn njan boen krinkrin foe en. Dri kontren de di wi wani go loekoe now.
San Gado Wortoe e sori?
6, 7. San de wan fasi fa a Wortoe foe Gado kan jepi wi ini afersi foe na konsensi?
6 Na volmaakti Wortoe foe Gado abi foeroe sani na ini en di kan gi wi krin leti tapoe a tori foe Gado denki, ofoe gronprakseri, èn di kan gi leri a wi konsensi. Soleki wi ben taki kaba, dan Jozef no ben abi wan skrifi wet foe Gado kontrari soetadoe. Ma Jozef konsensi ben kisi leri na a joisti fasi. Sondro degedege a ben tak-go-tak-kon dati Gado ben abi na prakseri dati man nanga oema („den toe”) ben sa de wán skin, sondro dati wan soetaman di meki dri ben poesoe ensrefi kon na mindri na krosbé matifasi foe den. Èn a no de foe taki dati Jozef ben sabi na ondrofenitori pe Gado mati Abraham ben de na ini, san ben sori fa Gado ben loekoe soetadoe. — Matt. 19:5; Gen. 2:24; 20:1-18.
7 Na a srefi fasi wi kan njan boen foe en. Foe eksempre, wi kan kon na fesi na besroiti efoe wi sa teki na kari foe go njan makandra ofoe doe bisnis nanga wan sma foe wan tra nationaliteit, ras ofoe background. Dati de wan sani di ibriwan foe wi moe teki wan besroiti ensrefi. Ma efoe wi ben soigi foe a bijbel go ini wi na fasi foe Gado foe no abi partij-fasi nanga de fair, dan wi konsensi di kisi leri sa poeroe ala prakseri foe kroetoe sani na fesi na mindri foe san wi ben kweki. Wi sa handri akroederi nanga dati (Tori foe den Apostel 10:34, 35; Jak. 2:1-4). Na so fasi bijbel gronprakseri kan jepi wi toe.
8. San wi moe doe te wi kon tanapoe na fesi wan besroiti pe wi konsensi de ini na tori?
8 Te wi moe teki wan besroiti ini wan afersi sodati wi „hori wan boen konsensi”, dan wi moe soekoe foe kon sabi san Jehovah abi foe taki foe na afersi, bikasi dati kan èn moesoe abi krakti tapoe wi konsensi nanga wi besroiti (1 Petr. 3:16). Boiti dati wi e soekoe na direct-lijn wet, wi moe abi belangstelling foe sabi ofoe ini a tori foe na afersi bijbel gronprakseri de toe. Jezus ben doe ofoe taki wan sani di e sori en denki tapoe so wan besroiti? Wi kan go ondrosoekoe ini bijbel studi-jepisani pe na afersi e taki na ini. Wi kan soekoe na rai foe tra kristen di kande kan jepi wi foe soekoe bijbel gronprakseri di fiti. A no de foe taki, na stap disi wi no moe teki nanga na prakseri dati den e tjari wi frantwortoe èn sosrefi toe wi no moe aksi: ’Efoe joe ben tanapoe na fesi na besroiti disi, san joe ben sa doe?’ — Gal. 6:5.
9. San wi e abi ini prakseri te wi e teki besroiti tapoe a tori foe konsensi-afersi?
9 Ini situwasi pe wan persoonlek besroiti moe teki, opregti kristen moe tjari densrefi so dati den hori wan krin konsensi di no e trobi den na fesi foe Gado. Den moe feni en wan bigi grani foe taki: „Wi konsensi e kotoigi . . . dati nanga santa fasi èn opregti fasi foe Gado . . . wi ben tjari wisrefi ini na grontapoe, ma moro foeroe na joe fesi” (2 Kor. 1:12). Omeni wan kristen lobi Jehovah nanga en gronprakseri, e kon na krin foe den besroiti di a de teki tapoe a tori foe konsens-afersi.
Sortoe krakti wi libifasi abi tapoe trawan?
10, 11. Wan aksi di ben abi foe doe nanga njanjan ini Korinte, e sori tapoe sortoe tweede sani tapoe a tori foe konsensi-afersi?
10 Foe di kristen wani dati a konsensi foe den poesoe den foe waka baka Gado, dan lobi nanga broko-ede gi trawan moe abi foeroe krakti tapoe a teki foe besroiti pe na konsensi de ini a tori. Na sani disi ben kon ini a prenki di Paulus ben taki foe difrenti afersi di ben abi foe doe nanga njanjan.
11 Ini na gemeente Korinte broko-ede ben kon foe meti di ben gi leki ofrandi na kroektoe gado. A ben sa de afkodré gi wan kristen te a ben sa njan ofrandi meti na a ten foe afkodrépré. Ma Paulus ben tjari kon na krin dati a no ben de wan sondoe foe njan meti di ben tan abra èn di joe ben kan bai ini wan sortoe njanjan-oso di ben miti nanga na tempel ofoe ini wan wowojo di e seri meti (1 Kor. 8:10; 10:25; Tori foe den Apostel 15:29). Ma ete son kristen ben de di ben anbegi fosten kroektoe gado, èn now ben firi sani esi (den ben abi wan swaki konsensi) tapoe na tori foe a njan foe so wan meti, srefi te a ben seri na publiki, loesoe foe sani foe bribi. Ala di Paulus no e taki boen foe wan swaki konsensi, tog a de gi trawan tranga foe hori den brada disi ini prakseri. A no ben sa de wan sori foe lobi foe doe wan sani sodati den bribiwan disi ben sa stotoe den foetoe fadon ofoe ben sa abi leki bakapisi dati den sa firi densrefi fri baka nanga den konsensi foe go doe afkodré.
12, 13. Foe san-ede wi moe hori na loekoe èn konsensi foe trawan a prakseri? Gi wan eksempre foe disi.
12 Paulus ben sori na fasi di wi alamala moe abi: „Efoe njanjan (ofoe wan tra sani) e meki mi brada stotoe foetoe fadon, dan noiti mi sa njan meti moro.” Efoe tapoe a tori foe wan afersi di libi abra na wi konsensi èn pe wi kan handri foe datede leki fa wi wani, e doe leki wi no e si na konsensi foe trawan èn na so fasi „e broko wi brada saka foe soema Kristus ben dede gi”, dan wi ben kan lasi wi boen posisi na fesi foe Gado. Paulus ben aksi: „Foe san-ede na konsensi foe wan tra sma moe kroetoe na fri foe mi?” (1 Kor. 8:3, 11-13; 10:29) Winsi wan sma e prakseri dati a de go foe wan „persoonlek konsensi-afersi”, dan tog en libifasi kan meki dati Jehovah kroetoe en, efoe disi e doe ogri na tra sma. Disi e sori fa a de wan kori sani foe prakseri dati „ala sani san mi e doe de boen, solanga a de wan sani foe mi konsensi”.
13 Loekoe foe eksempre na ondrofenitori foe wan man nanga oema ini Amerkankondre di ben kisi bijbelstudi, ben e go na konmakandra èn di ben go na fesi foe teki dopoe. Wan owroeman ini na gemeente ben ferteri na man dati a ben firi switi nanga wan bepaalde film. Na man ben piki: ’San dati! Joe e go na „R”-film?’ (Takroe film di tini di no de 17 jari no mag si) Na owroeman ben proeberi foe taki boen foe en fasi foe doe, foe di a taki dati son foe den film disi abi wan seker waarde efoe joe no e poti prakseri tapoe den pisi di no boen (di srefi na grontapoe e si leki takroe). Ma a gersi dati disi no ben wroko boen tapoe na man. Baka disi a no ben go so esi moro na fesi leki na oema foe en. Efoe na owroeman ben go prakseri tekst leki Kolosse 3:2-8, Efese 5:3-5 èn Matteus 7:12, kande disi ben sa abi wan boen krakti tapoe en konsensi nanga en libifasi. — 1 Kor. 9:22, 25-27.
14, 15. Fa na konsensi foe na skin foe owroeman ben sa kan abi krakti tapoe bepaalde persoonlijke afersi?
14 Hori trawan ini prakseri wani taki toe, dati wan sma no moe aksi foe den foe feni wan sani boen san de kontrari na konsensi foe den. Foe eksempre, den owroeman foe na gemeente abi na frantwortoe foe taki ofoe trowceremonie (ofoe wan trowlezing, loekoe Na Wachttoren foe 1 augustus 1974, blz. 475-478) sa hori ini na Kownoekondrekonmakandrapresi, fa den moe hori, fa a konmakandrapresi moe seti moi, nanga so moro fara. Den owroeman ini wan gemeente e skrifi: „Na wan trow ala den bruidsmeisje ben waka na a pasi mindri den stoeroe, ala di den ben wai winti nanga a wawai ini den anoe. Na tra trow ben moesoe wini na fosi wan, sodati den bruidsmeisje ben drai wan prasoro lontoe di den ben waka tapoe a pasi mindri den stoeroe. Na trow di ben kon na baka dati ben moesoe de moro bigi èn moro boen; den ben wani 20 bruidsmeisje èn 20 bruidsjonker. Safri-safri na konmakandrapresi ben gebroiki leki wan circus.”
15 Disi ben de wan „konsensi-afersi” pe wan sma ben kan teki ensrefi wan besroiti? Nono. Winsi na konsensi foe wan man nanga oema di pramisi makandra foe trow e gi den pasi foe doe so wan sani pasamarki ofoe aparti, na konsensi foe ala den owroeman no ben moe poti na wan sé. Ala di den no sa wani dati trawan moe teki san fiti den ai, tokoe den abi na vréde, na wanfasi èn na boen jeje fasi foe na heri gemeente na prakseri. Èn den moe jepi sma nanga den heri konsensi foe froestan „fa den moe tjari densrefi ini a osofamiri foe Gado, di de wan pilari nanga jepi foe na waarheid”. — 1 Tim. 3:15; 1 Kor. 10:31.
16. San wi moe loekoe te wi moe teki wan besroiti ini wan afersi di den libi abra na wi konsensi?
16 Soboen, te wi moe teki wan besroiti tapoe a tori foe wan ’konsensi-afersi’ dan wi moe go denki foe (1) san a Wortoe foe Gado e taki foe dati èn (2) fa wi besroiti ben sa kan abi krakti tapoe trawan ofoe ben sa kan hari den kon ini na tori. Ma ete wan prenspari sani de ete.
Fa wisrefi sa firi na krakti foe en
17. Fa a konsensi ben wroko tapoe wan brada ini a foto New York?
17 Ini na tijdschrift Natural History foe augustus 1981 wan artikel ben tanapoe foe baisigri-boskopoeman ini na foto New York, di ben tjari tranga fanowdoe paki nanga brifi go a bisnispresi alape ini na foto. Wi e lési foe wan foe den foeroe sma di teki a sortoe wroko disi: „Donald, wan 41-jari boskopoeman, kan sorgoe en oema nanga en 15-jari manpikin foe a moni di a de kisi. Donald ben de wan filmlaborant, ma a libi en wroko, foe di en leki wan Kotoigi foe Jehovah no ben kan taki boen foe na prati di a ben abi ini na meki foe pornografisch materiaal. Leki boskopoeman a no abi wawan na firi dati en konsensi de soifri, ma a kan seti en wroko leki fa a wani foe kan gebroiki moro ten ini a meki foe proselietsma.”
18. (a) Fa a brada disi ben kan doro na besroiti foe en? (b) San wi kan leri foe disi?
18 Difrenti sani abi krakti tapoe na besroiti di kristen moe teki tapoe a tori foe a wroko foe den (loekoe a lijst foe bladzijde 254). Neleki a ben de nanga Donald, wan kristen ben sa kan wroko gi wan firma di e wasi film — fowtow, privéfilm, reclamefilm ofoe bisnis préfilm. Safri-safri, dan den e teki pornografisch materiaal (fisti film). Wan momenti sa kon dati na konsensi foe na kristen e bigin foe taki. Kande a de kon si dati a de poesoe go ini pornografie nanga tra sani di no mag. Kande a de feni — ofoe den e si en a srefi leki nanga wan firma di e handri pornografie ofoe foe na wroko di den e aksi en foe doe — foe libi na wroko foe de „sondro fowtoe”, san de spesroetoe prenspari gi sma di wani abi grani ini na gemeente ofoe di ben sa wani abi grani so te. Te a de soekoe tra wroko, a kan bow tapoe Jehovah blesi nanga foeroe froetrow (1 Tim. 3:2, 8-10; Rom. 13:5). Sondro degedege foeroe kristen ben libi den sortoe wroko disi na presi foe den gi pasi dati den meki dotilibi njan den na ondro. (Teki gersi Matteus 5:28) Te wi kon tanapoe na fesi wan besroiti tapoe na tori foe na konsensi, wi moe aksi wisrefi: ’Fa disi sa wroko tapoe mi te mi doe disi ofoe wégri foe doe disi?’ Wi no moe poti wi konsensi na wan sé, sodati wi e bron en tapoe, sodati a de moro makriki ini a ten di e kon foe doe san takroe. — 1 Tim. 4:2; Jud. 10; Ef. 4:18, 19.
19, 20. (a) Fa na konsensi nanga a bribi kan abi krakti tapoe wi diniwroko? (b) San moe de wi lostoe efoe wi goedoe ofoe no goedoe?
19 Te wi e go denki foe na konsensi-besroiti foe Donald, dan wi moe taki dati a no ben wani de wawan ini wan boen matifasi nanga Jehovah, ma dati a ben soekoe moro bigi okasi foe panja en bribi. Disi e akroederi nanga na fasi fa Paulus e tjari na bribi nanga na konsensi kon na makandra: „Na prakseri foe na komando disi de lobi komoto foe wan krin ati èn foe wan boen konsensi èn foe bribi sondro hoigri fasi.” — 1 Tim. 1:5.
20 A de wan sani foe prijse te wan sma bribi nanga lostoe, foe abi wan boen konsensi e tjari en so fara foe tjari kenki kon, sodati en ’foetoe no sa seki’ èn kan poti prakseri na a panja foe „ala rai foe Gado” (Tori foe den Apostel 20:26, 27). Ma fa wi moe si tra sma di den omstandigheden foe den de so, dati a gersi dati den ben sa kan préki moro, ma di no e doe disi? Kande den e kisi foeroe moni leki wan bakapisi foe na wroko ofoe bisnis foe den èn a gersi dati den abi nofo moni kaba foe wan oso nanga koemakriki sani ini na seti foe sani disi. Ma na presi dati nanga foeroe prisiri den e gi ala den ten na a meki foe discipel, den e tan wroko foe meki na bisnis, na oso èn den koemakriki sani foe den kon moro bigi.a (Teki gersi Markus 10:17-22; Lukas 12:16-21). A no de na wi foe kroetoe trawan tapoe a kontren disi, bikasi „ibriwan foe wi sa gi frantwortoe foe ensrefi na Gado”. Moro foeroe, meki na bribi foe wi sondro hoigri fasi bewégi wi foe dini Gado dorodoro, sodati wi kan prisiri wisrefi ini wan krin konsensi. — Rom. 14:1-4, 10-12.
Tiri foe wan boen konsensi
21. Fa wi konsensi kan wroko tapoe wan positief fasi tapoe wi?
21 Wan joisti kristen konsensi di e firi sani esi sa tiri wi na so wan fasi, dati wi e doe san boen. Ini a tori foe Paulus disi ben so. A ben abi so wan belangstelling gi „en brada”, en mede-djoe: „Mi konsensi e kotoigi nanga mi ini santa jeje, dati mi abi bigi sari nanga pen ini mi ati sondro foe stop” (Rom. 9:1-3). Ia, a ben doe ala san ben de ini en makti foe prati na boen njoensoe foe na kristendom nanga den.
22. Foe san-ede na konsensi séker kan bewégi wi moro leki regel?
22 Disi moe de sosrefi nanga wi. Efoe wi e waarderi na warti foe na konsensi di Gado ben gi wi, dan wi no sa abi na firi foe denki ini wortoe foe regel. Regel sa poti kande minimum vereiste ofoe marki. Ma wan konsensi di lobi nanga bribi e poesoe en, kande séker sa aksi moro foe wi èn bewégi wi foe offer wisrefi moro èn sori moro dati wi no gridi. Na a fasi dati wi sa njan moro foeroe boen foe wi konsensi. A sa tapoe wi foe doe sani, sodati wi tjari Gado atibron kon na tapoe wi, èn a sa jepi foe doe sani di séker a de feni boen. Disi de séker so te wi konsensi e tiri wi foe abi wan moro bigi prati na a barwroko foe na boen njoensoe. San ben sa kan de moro boen leki na sani di Paulus e taki foe en nanga Timoteus? A ben taki: „Poti prakseri alaten na joesrefi èn na joe leri. Tan na den sani disi, bikasi nanga a doe foe disi joe sa ferloesoe joesrefi leki den di e arki na joe.” — 1 Tim. 4:16.
[Foetoewortoe]
a Na gemeente pe joe de ben sa njan foeroe boen foe en te moro pionier ben de. Foeroe sma di abi belangstelling èn di abi angri na jeje fasi, de ini gebied pe pikinso sma kan froisi go, foe di wroko no de. Fa a sa de wan blesi te kristen di e prisiri ini sékerfasi na moni sé, ben sa teki boen na kari disi foe gi jepi. — Tori foe den Apostel 16:9, 10.
Joe kan memre disi?
□ Foe san-ede a de kefarliki foe abi na prakseri dati „efoe wan sani no e trobi mi konsensi, a moesoe de boen”?
□ Te joe kon tanapoe na fesi wan afersi di libi abra na joe konsensi, sortoe 3 sani joe moe go loekoe serjoesoe dan?
□ Fa na konsensi moe abi krakti tapoe a fasi fa joe e prijse Gado na publiki?
[Faki na tapoe bladzijde 254]
Sani di abi foe doe nanga wan sma wroko èn di wan sma moe hori na prakseri
Te wan kristen moe teki wan besroiti tapoe a tori foe wan bepaalde wroko, dan na a fosi presi a moe go denki san a wroko de precies. A moe loekoe den toe punt di e kon now:
A bijbel e kroetoe a spesroetoe wroko?
Na bijbel e kroetoe sani leki foefoeroe, afkodré nanga a fowtoe gebroiki foe broedoe, sodati wan kristen moeiliki kan doe wroko, pe a de meki den sortoe sani disi go na fesi.
A doe foe a wroko ben sa tai wan sma so krosbé nanga wan fowtoe doe, dati a de krin dati a abi frantwortoe a ini?
Srefi wan mofodoro-waktiman ofoe wan sma di e ontvange sma ini wan broedoe-bangi ofoe wan fabriek pe soso fetisani e meki, tai direct nanga wroko di de kontrari nanga a Wortoe foe Gado. — Lev. 17:13, 14; Jes. 2:2-4.
Boiti den sani di wan sma troetroe ben sa de bezig nanga en, wantoe tra sani kan abi krakti tapoe na heri prenki foe a tori toe:
A wroko de wan sortoe foe service di te Joe loekoe en foe a sé foe a bijbel no de fowtoe?
Wan postbode e doe wan wroko pe a de tjari brifi go na den oso èn bisnispresi. Wan kristen ben sa handri fowtoe efoe na mindri den presi pe a de tjari brifi wantoe oso de foe foefoeroeman ofoe wan firma di e seri kroektoegado-popki? — Matt. 5:45
O fara wan sma abi makti tapoe san e psa?
Wan kristen di abi wan wenkri, no sa abi kroektoegado popki foe seri. A no de ini a srefi situwasi leki wan wrokoman ini wan supermarket pe boiti den doesoendoesoen tra sani sigaret ofoe broetbere e seri toe.
O fara a sma de ini na tori?
Wan oema di e wroko leki caissière èn wawan tron e seri sigaret toe, ben sa kan kon na a besroiti, dati en situwasi de tra fasi leki di foe wan wrokoman, di pikinmoro a heri dé e doe noti moro leki foe poti sigaret tapoe den planga.
Pe e moni komoto ofoe pe a wroko e doe?
Ini wan kondre pe na tiri gi na kerki na loekoe tapoe ala maatschappelijke programma, wan sma ben sa kan kisi en monisaka foe wan kerki corporatie. Ma foe troe, den publiki park di a de krin, no de foe na kerki. En wroko boiti dati no de wan kerkiwroko ofoe sma no e si en leki wan sani foe meki falsi bribi go na fesi.
Fa a doe foe bepaalde wroko abi krakti tapoe ala sani?
A doe foe a wroko ben sa meki foeroe sma stotoe foetoe fadon, sodati wan sma no de moro langa „sondro fowtoe”? (1 Tim. 3:2, 10). Sortoe krakti a wroko sa abi tapoe na konsensi foe na wrokoman?
[Prenki na tapoe bladzijde 250]
Wan medekristen kan jepi joe foe feni san Gado Wortoe e taki foe wan konsensi-afersi
[Prenki na tapoe bladzijde 251]
Loekoe fa besroiti ofoe doe foe joe abi krakti tapoe trawan