Troe fri na ondro na Kownoekondremakti
„Den mekisani srefi sa kon fri . . . foe na katibo foe pori en abi na glori fri foe den pikin foe Gado.” — ROMEINI 8:21.
1. Soema wawan kan sorgoe foe den fri di libisma abi so tranga fanowdoe, èn foe san-ede disi de so?
LIBISMA abi tranga fanowdoe foe kon fri foe den foeroe sari toestand di de so langa kaba na grontapoe. Ma soleki na historia ben sori dan libisma no ben man foe tjari den sortoe fri disi kon. „Foeroe foe den plan na ini na ati foe wan man de, ma a de na rai foe Jehovah di sa tan” (Odo 19:21). Na „rai” foe Jehovah abi na pramisi na ini dati a sa „figi ibri watra poeroe foe den ai, èn dede no sa de moro, no wan sari no wan babari, no wan pen sa de moro” (Openb. 21:4). Fa disi de wan froewakti di e gi joe dek’ati! Ma a de sroiti moi na na troetroe fri di a bijbel e taki Jehovah sa tjari kon: „Den mekisani srefi sa kon fri . . . foe na katibo foe pori èn sa kisi na glori fri foe den pikin foe Gado”! — Rom. 8:21.
2. Sortoe wrokosani Jehovah e gebroiki foe meki den sortoe fri disi doe kon?
2 Na wrokosani di sa tjari den wondroe fri disi kon, de na tiri di Jehovah e tjari kon foe abi tirimakti na a heri grontapoe, namkoe na hemel kownoekondre foe Gado. Nanga jepi foe na kownoekondre disi na wani foe Gado „sa psa na grontapoe soleki disi e psa na ini hemel” (Matt. 6:10). Nasrefi kownoekondre disi djonsro „sa masi ala den kownoekondre dipi [di de now] èn tjari den kon na wan kaba, èn a sa tan te ten di no abi marki”. — Dan. 2:44.
3. Foe sa-ede wi no meki libisma programma di abi leki prakseri foe loesoe den problema foe disi grontapoe, kori wi?
3 Nono, Gado no sa meki na pori grontapoe disi kon boen. A de so fara dati a no kan meki kon boen moro. Efoe wan sma soboen taki dati efi sma wroko nanga wan ofoe tra libisma programma, dan na heri grontapoe ben sa kan loesoe en problema, no bribi disi dan. Na presi foe dati, a Wortoe foe Gado e sori na ini waarheid, dati na rampoe experiment foe sowan siksi doesoen jari foe libisma tirimakti di ben de sondro foe anga na Gado, de now fara na ini den „laatste dé”. — 2 Tim. 3:1-5, 13.
Wán tiri
4. San na wán Kownoekondretiri sa wani taki gi libisma?
4 Na tirimakti foe Gado hemelkownoekondre sa wani taki dati soso wán tiri de gi na heri grontapoe. Jezus Kristus sa de na moro prenspari tiriman èn makandra nanga en wan pikin groepoe foe tra getrow dienstknegti foe Gado, di teki foe na grontapoe, sa doe dienst leki medetiriman. Prakseri pikinso san wán tiri, di den wet nanga gronprakseri foe Gado e tiri, sa wani taki gi na grontapoe! Ala skotoe di e prati naatsi now na ini féjanti groepoe sa gwe. Den libisma sa tjari kon now na ini wan libismafamiri èn den kan bewégi densrefi fri na a heri grontapoe sondro dati sani poti na den tapoe. Paspoort, visum ofoe douane no sa de moro. — Fil. 2:9, 10; Openb. 14:4; 20:6.
5. San e sori dati den e si na fanowdoe foe wán tiri gi na heri grontapoe?
5 Son sma e froestan boen langa kaba dati wán tiri de fanowdoe. Na ini na Bulletin Today, wan boekoe na tapoe den Fillippijnen na skrifiman Gwynne Dyer taki: „A.J.P. Taylor, wan foe den moro barinen skrifiman foe wi ten, ben ferteri mi no sa langa ten psa kaba leki fa en e froestan a tori dan a sa man soso foe abi na howpoe dati wan rampoe foe wan grontapoe-feti pe na beschaving ben sa kon na wan kaba, ben kan komoto a pasi, te wan sma sa meki wan grontapoe-kownoekondre kon . . .. Tapoe wan ofoe tra fasi wi moe loesoe wisrefi foe wi disiten situwasi, pe wide a ini ini [moro leki 150] aparti soevereine kondre di alamala abi fetisani psa marki èn di alamala so esesi kan go ini pori, èn soekoe foe kisi na wán enkri grontapoe-makti . . . Èn wi moe doe disi es’esi. Na sari swaki èn prati toestand foe den Verenigde Naties e meki wi si o fara wi moe go . . . Den owroe wortoe foe den jari féfitenti abi krakti te now ete: „wán grontapoe ofoe no wan.”
6. Sortoe tiri na Kownoekondre sa de?
6 A sa de wan grontapoe, na ondro wan tiri foe Gado. Fa a sa de wan blesi foe de na ondro wán tiri pe ibri wan sma den e behandel tapoe wan switi, regtvaardiki èn no-partijfasi! Na bijbel e taki na profétifasi foe na hemel kownoe, Jezus Kristus: „Nanga regtvaardikifasi a sa kroetoe den mofinawan, èn na opregtifasi a sa gi pir’ai foe na boen foe den safri-ati sma na grontapoe” (Jes. 11:3, 4). Ija, Kristus sa doe san de joisti. A ben bewijsi disi di a ben de na grontapoe, bika a ben teki na waarheid èn a ben poeroe hoigrifasi bere kon na doro. A ben feti gi na afersi foe den wan di den ben kwinsi èn a no ben de gi den goedoewan nanga maktiwan, aladi a no ben disko den toe. Nanga’ sowan bekwaam tiriman di ben kon na ondro tesi èn di ben wroko na ondro Jehovah tiri, „soso getrowfasi sa gro srefi komoto foe grontapoe, èn soso regtvaardikifasi foe den hemel sa loekoe srefi go na ondro”. — Ps. 85:11, 12.
Troe vréde nanga boen-ede
7. San den sma di sa psa libilibi na kaba foe a seti foe sani, ben sa doe bifo den go na ini na Njoen Seti?
7 Fa a sa de wan prisiri foe no libi moro langa na ondro den prati libisma tirimakti di ben gi densrefi abra foe hori wan toemsi bigi legre-makti tanapoe èn e feti alaten nomo! Den hulpbron foe na grontapoe no sa gebroiki moro langa foe pori sani, ma presi foe dati, den hulpbron dati sa gebroiki foe sani foe vréde èn foe bow sani. Den sma di Gado sa kibri èn di sa psa libilibi na kaba di e kon foe na disten seti foe sani, sa meki foe troe na profétitori foe Micha 4:3 kon troe kaba: „Den sa moesoe meki den feti-owroe tron ploegoe èn den lansri kon tron kron-nefi. Den no sa opo no wan fet-owroe, naatsi tegen naatsi èn den no sa leri feti moro.” Soema na mindri ala den folkoe foe grontapoe e meki a profétitori dati kontroe now kba? A tori foe na disiten historia e sori dati Jehovah Kotoigi e doe disi. Den de na libi kotoigi foe na troe tori dati vréde na heri grontapoe na ondro na tiri foe Gado sa de wan troetroe sani foe di grontapoe vréde now kaba de wan troetroe sani na mindri den.
8, 9. O bigi na vréde nanga na boen-ede sa de na ondro na kownoekondre-tirimakti?
8 Na ini Gado njoen seti vréde sa panja go na ala pisi foe grontapoe. Na ini Jesaja 32:17, 18 den e taki foe „korostoefasi èn sékerfasi te ten di no abi marki” aladi den e taki moro fara: „Mi pipel moe libi na ini wan vréde tanpresi èn na ini foto foe libi foe fertrow dorodoro èn ini rostoe-presi pe sani no e trobi joe.” Prakseri pikinso dati joe e libi na ini sowan toestand foe sékerfasi, dati joe no abi foe sroto joe doro srefi èn dati ibri momenti foe na dé ofoe na neti joe kan waka alape sondro foe frede foe den foefoeroe joe ofoe ferkrakti joe leki oemasma. Nanga boen réde a bijbel e taki: „Foe troe den sa feni den switi prisiri na ini vréde psa marki.” — Psalm 37:11.
9 Na vréde dati sa go makandra nanga boen-ede, a presi dati miljoenmiljoen sma ibri jari e dede leki wan bakapisi foe mankeri foe njanjan soleki de now. Foe di Jezus ben abi na makti foe gi doesoendoesoen sma njan foe di na tapoe wan wondroefasi a ben kan meki wantoe brede nanga wantoe fisi kon moro foeroe, dan so a sa kan gi libisma na ondro en kownoekondre tiri den sani san Psalm 72:16 e taki foe den: „Karoe sa de na grontapoe srefsrefi; na den ede foe den bergi sani sa de psa marki.” Èn foe di Gado Kownoekondre sa poeroe ala politik skotoe, sotoe bisnis, gridifasi èn strélibi di e fermorsoe sani, dan a gi di a grontapoe sa gi sani psa marki foe na boen foe na libisma famiri sa de èn no wawan gi wantoe sma. Na ogri prenki foe angri pikin nanga finfini anoe nanga foetoe èn bere di sweri sa gwe krinkrin foe alaten.
Switi wroko pe joe e meki sani kon
10. Fa na wroko na ini na Njoen Seti sa de tra fasi leki na wroko na ini disi ten?
10 Na ini na ten disi foeroe sma e firi densrefi ongolokoe nanga den sortoe foe wroko di den moe doe foe sorgoe foe den sani foe tan na libi. Miljoenmiljoen tra sma no abi wroko kwetkweti. Ma ini Gado njoen seti den sma sa njan boen foe den wroko. Èn gefar no sa de, dati den moeiti foe den no go doro foedi takroe economia toestand, wan ongolokoe ofoe feti de. „Foe troe den sa bow oso èn libi na ini èn foe troe prani froktoe djari èn njan den froktoe foe den. Den no sa bow èn wan tra sma go libi na ini; den no sa prani èn wan tra sma njan foe en . . . Na wroko foe den égi anoe den sma di mi ben teki sa gebroiki krinkrin. Den no sa wroko foe soso.” — Jes. 65:21-23.
11. San den onderdaan foe Gado Kownoekondre sa doe na ini na tori foe a grontapoe disi nanga a libi a tapoe?
11 Te den sortoe wroko-opstandigheid disi de, di e meki libisma firi ensrefi boen èn den libisma abi troetroe lobi gi den sma na wi sé, dan den onderdaan foe na kownoekondre moe meki na grontapoe disi nanga libi a tapoe kon moro boen, sa doe sani di doesoentron de moro ferwondroe leki ala sani san na grontapoe disi ben si wanten. Foe dat’ede meki Jezus ben kan sori na fesi tapoe na paradijs di e kon (Luk. 23:43). Jesaja e taki foe disi na fesi: „Na sabana sa singi èn njanpré foe prisiri; a sa de net so moi leki den bergi foe na Libanon èn net so nanga froktoe leki den firi foe Karmel èn Saron . . .. Liba foe watra sa lon psa na sabana; na hati santi sa tron wan liba èn dré gron sa foeroe nanga fonten. . . . Den sa de kolokoe foe tégo, tégo te fri foe sari nanga pen.” — Jes. 35:2, 6, 7, 10, Today’s English Version.
No wan siki èn dede moro
12. Fa Jezus ben sori na toemsi bigi programma foe dresi sma, di en sa tjari kon te a abi kownoekondremakti?
12 Ma a ben sa de wan sari sani foe abi ala den sani disi èn dan foe moe lasi den, foe di wan sma e siki èn e kon owroe èn e dede. Ma san datra nanga koniman no kan doe now, Gado sa doe na ondro en kownoekondre tirimakti. Gado ben meki na skin, na ferstan èn den firi foe libisma. En sabi san kan meki libisma kon gesontoe èn volmaakti. Di Jezus ben de na grontapoe a ben sori sortoe krakti foe dresi sma a ben kisi foe Gado èn sa gebroiki en ini na njoen seti: „Ne bigi ipi sma ben kon na en di ben abi na den lanman, malengriman, breniman, babaw-man èn foeroe trawan èn den ben trowe den na en foetoesé èn a ben dresi den, sodati na ipi sma ben ferwondroe di den ben si dati den babaw-wan ben taki èn den lanman ben waka èn den breniman ben kan si” (Matt. 15:30, 31). Te libisma opo kon kisi libisma volmaaktifasi na ondro na kownoekondretirimakti dan sosrefi toe ’na dede sa swari gwe foe tégo’ (Jes. 25:8). Na lobi foe Jehovah sa panja go ooktoe na den sma di ben dede langa ten kaba, bika den sa kisi na okasi foe libi na ini Gado njoen seti foe di den e tjari kon baka na ini na opobaka foe libi. Boen foeroe tron na prisiri sa kon na dan baka di e meki wi denki na san ben psa di Jezus ben wiki wan jongoe pikin èn den ai-kotoigi ’ben ferwondroe psa marki”. — Mark. 5:41, 42; Joh. 5:28, 29.
13. Sortoe sani sma ben sa kan doe na ini na Njoen Seri efoe den wani?
13 Prakseri pikinso san joe ben sa kan doe te joe ben sa abi na ini wan regtvaardiki njoen seti foe vréde nanga boen-ede, wan volmaakti ferstan èn wan volmaakti skin sondro foe dede oiti. Fa foeroe sani no de di joe ben wani doe sote, ma di joe no ben abi na ten ofoe di joe no ben kan gi joesrefi pasi! Prakseri pikinso den mogelekheid foe kon sabi boen den bigi bergi, den boesi nanga switi loktoe, den firi nanga park nanga moi bromki, na libi foe den meti di moi, liba di moi èn di de sondro morsoe, doti sani èn na switi njanjan foe difrenti folkoe èn a okasi di joe abi foe kan njan switi foe ala den sani disi. Proeberi foe tjari kon na joe fesi sortoe talent man nanga oema sa meki gro na a kontren foe ala sortoe koni, bowkunst, a meki foe djari, a inisé osoarchitectuur, èn ala sortoe fasi foe sori kunst nanga pokoe toe. Libisma sondro degedege sa poesoe go na njoen hé foe expressie nanga e moifasi foe sani. Prakseri toe foe na mogelijkheid foe kon sabi moro boen na Sma di meki ala den sani disi, Jehovah Gado. Na sabi disi di kon moro foeroe foe en universum di e foeroe joe nanga respeki nanga ala den merkipasisistema, stari nanga planeet, sa de toemsi moi toe. Ija, foe troe, „den mekisani srefi sa kon fri foe na katibo foe pori èn kisi na fri foe den pikin foe Gado”. — Rom. 8:21.
Teki na waarheid
14. Foe san-ede wi kan poti fertrow dorodoro na ini Jehovah pramisi?
14 Joe kan bribi troetroe ala den pramisi disi foe Gado? Ija, dati kan. Joe kan prakseri precies so foe en leki na man Jozua di ben frede Gado èn di ben taki: „No wan wortoe foe ala boen wortoe di Jehovah joe Gado ben taki gi joe, no tan sondro foe kon troe. Ala sani ben kon troe gi joe. No wan wortoe foe dati tan sondro foe kon troe” (Joz. 23:14). Ija, joe kan poti joe libi na ini gefar gi den pramisi foe Gado foe di san en e taki, de na waarheid èn sa psa sondro mankeri. — Jes. 46:9-11.
15. Sortoe fasi foe na grontapoe disi Gado dienstknegt e trowe?
15 Na bijbel e sori krin dati waarheid de, san a wani taki, pe a de èn soema abi en. Na aksi di ibriwan foe wi de na en fesi de: Wi wani troetroe sote foe leri sabi na waarheid? „We”, son sma kande sa taki, „na moro bigi pisi foe libisma sa wani sabi sote na waarheid?” Nono, bikasi Jezus ben taki dati na pasi di e go na tégo libi de smara èn dati pikinso sma de a tapoe (Matt. 7:13, 14). Na denki foe na moro bigi ipi sma ini disi ten e kroederi nanga san a bijbel e taki ini Job 21:14-16: „Den e taki gi na troe Gado: ’Drai komoto foe wi! Èn ini na sabi foe joe pasi den no ben feni prisiri. San na Almaktiwan wani taki, dati wi ben sa dini en, èn sortoe wini ai tjari gi wi dati wi ben sa de ini kontakti nanga en?’” Ma Job e taki: „Na rai srefi foe den ogri sma ben tan farewe foe mi.” Na denki foe den no abi en fundamenti na tapoe a waarheid, ma tapoe na fundamenti foe a lé foe Satan dati libisma abi en moro boen te den no e anga foe Gedo.
16. Foe san-ede wi kan de séker dati wan sma di wani leri sabi na waarheid troetroe, sa feni en?
16 ibriwan sma di wani leri sabi na waarheid opregti èn di e aksi Gado foe jepi en nanga disi séker sa tjari go na a waarheid. A no abi trobi pe a sma e libi ofoe na ini sortoe omstandigheid a de. Foe san-ede? Foe di na wroko de foe soekoe sma di lobi waarheid no de soso wan wroko foe libisma, awansi Jehovah e gebroiki en getrow dienstknegti foe grontapoe foe préki na boen njoensoe foe na kownoekondre bifo na kaba kon. Na hemel kownoe Jezus Kristus nanga den foeroe makti legre foe en tanapoe na baka na boskopoe di e meki bekenti na a heri grontapoe na wan krakti fasi moro nanga moro. — Matt. 25:31, 32; Openb. 14:6, 7.
17. San wan sma moe doe di wani leri sabi na waarheid troetroe?
17 Wan heri seti foe sani de tapoe na punt foe kon na wan kaba. Efoe troetroe joe wani sabi na waarheid èn wani tan na libi, dan joe moe sori disi na Gado èn na libisma. Teki soifri sabi foe Gado na ini joe. Kon makandra nanga en pipel. „Soekoe dan fosi na kownoekondre nanga en regtvaardikifasi.” — Matt. 6:33; Joh. 17:3; Hebr. 10:24, 25.
18. Sortoe winimarki den sma e kisi di e libi ini akroederi nanga na waarheid now kaba?
18 Te joe e doe disi, dan srefi now kaba joe sa kisi foeroe winimarki. Den sma di e leri sabi na waarheid èn di e libi na ini akroederi nanga en, e ondrofeni na ferstanfasi èn na den firi wan toemsi figi fri foe di den sabi foe san-ede den ten de so moeilek èn san na ten wani taki. Den e kon fri toe foe soso-libifasi foe den sma na ini na grontapoe disi, di soso e feti baka wini foe sani na skinfasi ma di sa lasi ala den sani disi te na seti foe sani disi e kon na wan kaba (1 Joh. 2:15-17). A de gi boiti dati wan toemsi bigi verlekti foe kon fri foe fowtoe foe kerki.
19. San joe sa doe efoe joe lobi na waarheid?
19 Joe lobi troetroe na waarheid? Dan joe sa lobi na Gado foe waarheid. Joe sa lobi den wondroe waarheid di a de tjari kon na krin foe en kownoekondre tirimakti. Joe sa firi lobi di en organisaatsi na grontapoe di wi e si, di abi ini den sma di a de tjari now kon makandra nanga na prakseri foe tjari den psa libilibi na laatste stré (Jes. 2:2-4). Joe moe sa meki noti, èn noti na ini hemel nanga grontapoe poeroe joe foe doe getrow dienst gi na Gado foe waarheid, di kan meki joe kon fri nanga jepi foe en waarheid. — Joh. 8:31, 32.
Joe kan piki den aksi di e kon now?
□ Fa Jehovah sa gi libisma troetroe fri?
□ San wán grontapoetiri sa wani taki gi libisma?
□ Sortoe libi bewijsi de dati troe vréde na ondro na kownoekondre tiri-makti sa de wan troetroe sani?
□ Sortoe kontrari de na mindri wroko na ini na seti foe sani disi èn wroko di sa doe na ini na Njoen Seti?
□ Foe san-ede wi sa kan de séker dati opregti sma di e soekoe waarheid sa tjari go na a waarheid?
[Prenki na tapoe bladzijde 8]
Den sma di sa psa libilibi na kaba foe na seti foe sani ben sa ’smeti den fet’owroe kaba tron ploegoe’
[Prenki na tapoe bladzijde 10]
Na ini Gado Njoen Seti sma sa feni foeroe prisiri wroko-omstandigheid di e opo libisma go a tapoe