Gado Wortoe abi libi
Toe oema nanga wan problema
NA MAN di e teki prati na a kristen diniwroko, na na apostel Paulus, èn den toe oema di de nanga en na Euódia nanga Syntyche, memre foe na fosi jarhondro kristen gemeente na ini na foto Filippi.
Di Paulus ben de wantoe jari baka dati a ini Rome, a ben skrifi gi na gemeente na Filippi: „Tan asisteri den oema disi di ben stré sé na sé nanga mi gi a boen njoensoe” (Filippisma 4:3). Foe san-ede Paulus ben skrifi disi foe Euódia nanga Syntyche?
Paulus ben jere dati wan problema ben kon na mindri den toe oema èn dati den no ben kan feni en nanga makandra. Foe dat’ede a ben skrifi: „Euódia mi e fermane èn Syntyche mi e fermane foe denki a srefi na ini Masra” (Filippisma 4:2). Na bijbel no e ferteri na ini san na problema ben de, ma a ben de ernstig nofo dati Paulus di ben de hondrohondro kilometer moro fara na ini Rome ben jere foe en. Kande a ben de taki den toe ben djaroesoe tapoe makandra tapoe wan ofoe tra fasi. Ofoe kande den ben abi wan ernstig difrenti na ini prakseri soleki e kon dja na fesi, èn den no ben taki nanga makandra moro. San na problema ben kan de ooktoe, Paulus ben gi den rai na ini wan brifi di ben skrifi gi na heri gemeente. — Filippisma 1:1.
We now, Euódia nanga Syntyche ben teki na rai na wan boen fasi èn den ben meki a tori kon boen baka? A bijbel no e tjari disi kon na krin gi wi. Ma foe di den ben de boen oema di na fesi dati ben wroko makandra nanga Paulus na ini na diniwroko, dan wi kan prakseri dati baka na komakandra den ben go na makandra èn ben sreka na trobi foe den na ini wan jeje foe lobi. Na a tra sé den ben kan meki na rai di ben gi kon meki den ati kon moro tranga. Den ben kan teki a fasi disi foe: ’Sortoe reti Paulus ben abi foe ferteri na heri gemeente foe a problema foe wi?’ Èn na a fasi disi na difrenti na ini a prakseri foe den ben kan tan sondro foe ben loesoe èn a ben sa kon srefi moro ogri. Fa a ben sa de efoe disi ben pasa?
We now, na brifi gi den Filippisma ben skrifi so wan 60 G.T. Wantoe jari a baka wan hebi ferfolgoe ben kon tége den kristen na ini Rome. San ben sa pasa efoe na ferfolgoe disi ben panja go na Filippi èn Euódia èn Syntyche ben trowe poti na ini doengr’oso, soleki Paulus nanga Silas ben poti na ini doengr’oso someni jari a fesi? (Tori foe den Apostel 16:19-34) Kon wi taki taki den toe ben de na ini na srefi doengr’oso èn ben sa kon na ini na srefi kamra.
San ben sa pasa efoe den no ben denki a srefi èn na difrenti foe prakseri ben meki ogri-ati firi gi makandra ben kon? Den ben sa kan broko makandra saka na jejefasi èn kande broko na matifasi foe den nanga Jehovah Gado. Fa dati ben sa de wan sari sani! Èn fa disi sa de wan sari sani na ini disi ten efoe wi no abi tranga lobi gi makandra te na „bigi benawtoe” broko loesoe kon abra na seti foe sani disi! — Mattéus 24:21.