Fa wi kan tan hori ’wi fosi lobi’?
1. Den dienstknegti foe Gado leki groepoe ben lasi na ini na ten disi foe den laatste dé a „lobi di den ben abi fosi”?
„A PIPEL FOE JOE sa pristeri ensrefi nanga en heri ati tapoe na dé foe joe sroedati makti” (Psalm 110:3). Soleki ben taki na fesi na ini na profétitori disi, dan den dienstknegti foe Gado ini a ten disi ben doe nanga foeroe krakti a wani foe Gado èn ben tan hori nanga dati na a fosi lobi foe den gi Jehovah. Na ini a ten foe na heri pisiten foe na moeilek „bosroiti foe na seti foe sani” Jehovah Kotoigi ben tan hori na prisiri nanga faja foe den gi na dienst, leki wan orga pipel. — Mattéus 24:3, 14.
2, 3. (a) Foe san-ede wan sma kan lasi en ’fosi lobi’? (b) San wi moe doe efoe wi e si taki so wan fasi e gro a wi?
2 Tokoe a kan, taki wan aparti kristen e lasi na lobi di a ben abi fosi. Den aladé problema kan tjari en so fara foe frigiti den toemsi bigi sani di Jehovah ben doe gi en. A kan kon weri foe wakti te leki Jehovah prakseri kon troe èn a kan bigin firi na hari di den winimarki foe goedoe èn skin fasi di na grontapoe e pristeri e hari en ofoe kande a e firi wan bepaalde fanowdoe foe gi moro ten na ontspanning leki a ben gwenti. Den kristen frantwortoe soleki na go na komakandra ofoe congres, a sreka foe lezing èn a teki prati na a velddienst kan bigin tron wan hebi lai.
3 Efoe wi si taki so wan sortoe libifasi bigin gro na wi, dan wi moe waka baka na rai roe Jezus gi na gemeente Efese foe kweki na ’lobi baka di wi ben abi fosi’ èn foe proberi foe doe den „wroko foe fosten” (Openbaring 2:4, 5). Wi moe ferstan taki wi fosten faja lobi gi Jehovah èn wi faja èn wi prisiri gi en dienst moe kon baka. Fa wi kan doe dati.
Kweki lobi gi Jehovah
4. Fa wi kan waka na baka na toemsi boen libifasi foe na Psalmsingiman? (Psalm 119:97)
4 Na psalmsingiman di ben abi na leri foe Jehovah e taki: „Fa mi lobi joe wet! Na heri dé a abi mi heri belangstelling” (Psalm 119:97). Fa a de wan bigi sani foe prakseri so foe a wet foe Gado! A e gi moro pai foe dini Jehovah nanga so wan sorgoe fasi leki foe moesoe tan gi den foe doe den sani san wi sabi de joisti. Wi moe kweki wan lostoe foe doe san de joisti èn foe doe en foe di wi wani doe en sote. — Psalm 25:4, 5.
5. (a) San Paulus ben rikomanderi leki wan kibri gi wi jejefasi? (b) Fa wi kan sorgoe taki wi fetipak e tan gi nofo kibri?
5 Satan ben sa wani poti wi sote na ondro druk foe tjari wi so fara foe lasi wi ’fosi lobi’, bikasi en de wi moro bigi féjanti foe wi jejefasi. Na apostel Paulus ben gi den Efesesma tranga foe kakafoetoe gi Satan foe di den moe weri „na heri fetipak foe Gado” (Efesesma 6:13). Na fetipak dati abi fo toemsi prenspari fasi di e marki wan sma leki kristen: waarheid, regtvaardikifasi, bribi èn na howpoe foe ferloesoe (Efesesma 6:14-17; 1 Thessalonikasma 5:8). A no de foe taki taki wi e leri den fasi disi te wi e kon na ini kontakti nanga na gemeente. Ma wan fetipak foe metaal kan froestoe te joe no e ondrow en boen. Efoe foe dat’ede wi no tan wroko na den toemsi prenspari fasi disi, dan na jeje fetipak disi sa go na baka èn no kan gi wi na joisti kibri. Te nanga prijs meki wi tan farawe dati disi pasa.
Teki leri èn go teki prakseri dipi
6. Fa wan zendeling di ben de na ini doengroe-oso ben loesoe a problema foe kibri en jejefasi?
6 Na ini 1958 na Stanley Jones ben bigin psa wan strafoe-oso strafoe foe sébi jari na ini China pe en wawan ben de na ini wan kamra. Fa a ben hori na lobi foe en gi Jehovah tranga ala di a ben de sondro foe abi wan bijbel srefi, ben de aparti foe en kristen brada nanga sisa? A e ferteri dati a ben skrifi ala tekst di ben kon na ini en prakseri èn a ben poti ala pisi foe bijbeltekst di a ben feni na ini den „kerki” kolom foe kranti di ben seni gi en sontron. Na so a ben bow wan heri maksin foe bijbeltekst di ben de na fundamenti foe wan programma foe persoonlek leri èn prakseri foe sani. Foe sma de lontoe en di ben de kontrari foe san a ben bribi, a ben sabi taki efoe a no ben foeroe en ati nanga ferstan nanga prakseri foe Gado en bribi heri esi ben sa kon mendri.
7. Wi de opo-opo gi sortoe druk, èn fa wimoe kibri wisrefi gi en?
7 A de troe taki moro foeroe foe wi no ben sidon na ini doengroe-oso. Tokoe wan bigi pisi foe wi ten wi de opo-opo gi na denki foe na grontapoe disi. Awasi na ontspanning di na grontapoe e pristeri no de alaten langalanga kontrari nanga den kristen gronprakseri, tokoe séker a no e meki den sortoe sani disi leki waarheid, regvaardikifasi, bribi nanga na howpoe foe ferloesoe kon na fesi. Foe dat’ede efoe wi no e gi ten foe tranga wi ati nanga wi memre, dan kande wi kan kon swaki na jejefasi èn wi lobi sa kon kowroe.
8. Sortoe blesi wan sma e kisi di e leri èn e prakseri dipi foe a Wortoe foe Gado?
8 Efoe wi gi wel ten foe tranga wisrefi nanga jepi foe persoonlek studi nanga prakseri dipi foe sani, dan wi sa de leki na man di en „lostoe de na ini na wet foe Jehovah” èn di e lési dé nanga neti nanga wan safri sten na ini. Na psalmskrifiman e taki foe so wan sma: „A sa kon de séker leki wan bon, di prani na liba, di e gi en égi froktoe te a de na joisti ten foe dati èn di den wiwiri foe en no e flaw èn ala san a e doe sa waka boen.” — Psalm 1:2, 3.
9. Fa wi kan kweki lobi gi leri èn prakseri dipi foe na bijbel?
9 A no de foe taki taki a de so taki foeroe foe wi foe nature no abi na firi foe studeri. Ma efoe wi wani doe disi, dan wi kan oefen wel na ini studie foe meki a de wan prisiri sani. Prakseri pikinso na wan sma di foe froeferi ede e go lon safrisafri. Na bigin en tité kande sa hati en. Ma safri-safri en skin sa fiti ensrefi na a lon disi èn leki wan sma di e hori doro na ini a safri lon disi, dan es’esi a sa feni na boewégi disi foe skin wan switi sani. Paulus e taki gi Timotéus: „Oefen joesrefi nanga a frede foe Gado leki joe marki” (1 Timotéus 4:7). Studeri a bijbel, de wan pisi foe na frede foe Gado (Odo 2:1-6). Na ini a bigin a dwengi foe joesrefi sa de fanowdoe foe teki ten troetroe foe en. Ma heri esi wi sa go kisi belangstelling troetroe foe leri njoen sani ofoe foe kisi wan moro betre ferstan foe sani di wi ben sabi kaba. A stoeka foe wi troetroe sa de wan prisiri. — Psalm 119:103, 104.
10. Foe san-ede studi materiaal e behandel moro leki wan tron?
10 Son sma kande e denki taki den no kan gi moro langa ten na persoonlek studi, foe di den sabi den fundamenti leri foe na bijbel. Kande den e kragi srefi te materiaal foe a srefi sortoe tori e kon moro leki wan tron na ini den boekoe foe behandel leki bijbelstudi. Tokoe leki fa a bijbel e taki a de fanowdoe taki wi kisi memre alaten baka foe bepaalde sani (Psalm 119:95, 99; 2 Petrus 3:1; Judas 5). Efoe wi no tan denki na a waarheid, na Gado regtvaardiki markitiki, a wi bribi nanga wi howpoe foe ferloesoe, dan tra sani kan abi krakti na tapoe wi ati.
11. Sortoe sani Paulus e taki foe den na ini en brifi gi den Efesesma?
11 Loekoe a brifi foe Paulus pikinso gi den sma foe Efese. A e memre den na a situwasi pe den ben de na ini bifo den ben tron kristen èn a ben taki foe na orga di den ben de wan pisi foe en (Efesesma 2:12; 4:4-6, 17, 18). A ben taki foe Jehovah toemsi moi prakseri gi na libisma famiri èn na prati foe na libisma na ini na prakseri dati (Efesesma 1:8-12; 2:4-6). Èn a ben memre den na kristen gronprakseri di ben kan jepi den foe sani waka boen na ini na osofamiri èn na ini na gemeente. — Efesesma 4:1, 2; 5:21–6:4.
12. Foe san-ede Paulus e ferteri den Efesesma sani di den ben sabi kaba?
12 Sonwan foe den sani di Paulus ben skrifi foe den, ben kan de njoen gi den kristen na ini Efese, ma foeroe foe den ben moe handri foe sani di den ben jere a fesi kaba. Tokoe ete Paulus ben wani memre den na sani dati èn a ben gi den wan njoen loekoe tapoe den. Na so a ben jepi den Efesesma foe sreka na jeje fetipak foe den èn „foe graboe nanga ala santa wan na jeje fasi san de na bradi èn na langa èn na hé èn na dipi.” — Efesesma 1:15-17; 3:14-19.
13, 14. (a) Fa studi nanga prakseri dipi foe sani sa jepi wi? (b) Sortoe pisi moro fara de foe na „fetipak foe Gado”?
13 Na so na persoonlek studi foe wi sa gi wi kowroe ati èn no wawan meki na inzicht foe wi na ini foeroe fundament punt kon moro bigi, ma jepi wi ooktoe foe ferstan den moro dipi sani foe a Wortoe foe Gado (1 Korintesma 2:10). Na a fasi disi wi „fetipak foe Gado” sa tapoe Satan foe tjari wi go so fara foe lasi wi faja lobi gi Jehovah nanga en Manpikin.
14 Na apostel Paulus ben ferteri foe toe tra pisi foe wi jeje fetipak di wi no ben taki foe den ete. A ben taki taki kristen „ben moe weri na den foetoe den soesoe nanga na de srekasreka nanga na boen njoensoe foe vréde” èn dati den ben moesoe teki „na féti-owroe foe na jeje, dati de na Wortoe foe Gado” (Efesesma 6:11-17). Fa den pisi disi foe na fetipak e jepi wi foe tan hori ’na lobi di wi ben abi fosi’?
Tan actief na ini na kownoekondrepréki
15. Sortoe originele fasi „foe abi foeroe foe doe na ini a wroko foe Masra” wan zendeling di ben de na ini doengroe-oso ben poti na ini en libi?
15 Di na zendeling Harold King na ini 1958 na ini China ben moe psa fo nanga afoe jari na ini doengroe-oso, a ben abi nanga a srefi problema foe doe leki Stanley Jones: Fa foe hori en ’fosi lobi’, en dipi toewijding gi Jehovah na libi. A e ferteri: „foe hori mi warderi gi jeje sani na libi, mi ben meki wan programma foe prékiwroko.” A ben meki wan toe bijbel takmakandra tapoe na gron foe tekst di a ben kan memre èn a ben préki gi sma di ben de na ini en prakseri. Te foe kaba a ben hori bijbelstudi nanga sma di ben de na ini en prakseri. A bakapisi? Di a ben kon fri, a ben de klari èn nanga lostoe foe préki baka gi troetroe sma!
16. San na wan prenspari réde foe san-ede wi abi foeroe foe doe na ini na dienst foe Gado?
16 A ben tjari kon na ini en libi tapoe wan origineel fasi wan prenspari waarheid: foe tan gesontoe na jejefasi wi moe abi foeroe foe doe na ini a dienst foe Gado. Na apostel Petrus ben taki: „Tranga joe memre foe go doe wroko” (1 Petrus 1:13). Èn na apostel Paulus ben gi na dek’ati: „Kon de stanfaste, sondro foe seki, alaten abi foeroe foe doe na ini na wroko foe Masra, sabi taki joe wroko no de foe soso na ini Masra.” — 1 Korintesma 15:58.
17. San ben de so aparti na ini a tori foe den getrow kristen na ini na gemeente na Filadelfia?
17 A de wan aparti sani taki ala di Kristensma na ini Efese ben gi pasi taki a ’lobi di den ben abi fosi’ ben kon kowroe, den sma foe wan tra gemeente na ini na birti ben abi foeroe foe doe èn den abi te now ete wan faja lobi. Jezus ben taki gi a getrow gemeente na ini Filadélfia: „Mi sabi joe wroko — loekoe! Mi ben opo wan doro gi oenoe, di no wan sma kan tapoe.” — Openbaring 3:8.
18. Sortoe activiteit sa jepi wi foe hori wi „fosi lobi” na libi?
18 Sortoe wroko sa jepi wan disiten kotoigi foe Jehovah foe hori na ’lobi di a ben abi fosi’? A de wan foe den wroko di e kroederi nanga a gebod foe Jezus: „Go foe dat’ede èn meki discipel foe libisma foe ala naatsi” (Mattéus 28:19). Harold King ben ferstan o prenspari disi de. Na apostel Paulus ben ferstan disi toe. Foe dat’ede Paulus ben gi den Efesesma na rai foe den weri na den foetoe „soesoe nanga na de srekasreka nanga na boen njoensoe foe vréde” èn foe ben abi „na feti-owroe foe na jeje, dati de na Wortoe foe Gado”.
19. Fa na préki, di de wan bewijsi foe wi faja, abi ooktoe leki wan bakapisi taki wi faja bow kon tranga?
19 Wan krosbé demakandra de na mindri faja na wan sé èn na préki èn na meki foe discipel na a tra sé. A de troe taki faja kan tjari wi go so fara foe wani doe a wroko disi nanga prisiri. Ma a prékiwroko foe en sé sa gi tranga na wi faja. Baka di Jezus ben préki gi wan Samaritaan-oema a ben taki gi en bakaman: „Mi njanjan de, dati mi doe a wani foe en di ben seni mi” (Johannes 4:34). Na leri foe na waarheid ben gi en njanjan èn ben bow en. Te wi e taki foe na Kownoekondre nanga tra sma, dan disi abi sosrefi toe leki bakapisi taki boen prenspari waarheid e spikri go na ini wi memre nanga wi ati èn wi koni na ini na verdedig foe na waarheid e bow op (1 Petrus 3:15). Foe di a jeje foe Gado e jepi wi na ini a wroko disi, dan boiti foe dati wi „e kon de faja na ini jeje” èn wi e si fa a jeje disi e wroko tapoe tra sma. — Romeinisma 12:11.
20. Fa préki makandra nanga persoonlijk studi e hori wi tranga?
20 Na préki gi tra sma kan teki na presi foe persoonlek studi? Nono, balans moe de na mindri den toe activiteit disi. Efoe wi abi nofo njanjan na skinfasi foe njan ma no e abi boewégi foe wi skin, dan te foe kaba na skin foe Wi sa kisi problema. Te na a tra sé wi abi foeroe boewégi foe wi skin sondro nofo njanjan dan te foe kaba na skinfasi wi sa „bron krinkrin”. Na so toe, efo e wi gi foeroe ten na persoonlek studi sondro foe préki gi tra sma, dan kande wi lasi wi balans. Na apostel Petrus ben tjari „wroko” kon akroederi nanga ’a hori na wan foe wi ferstan’ (1 Petrus 1:13). Efoe wi e préki gi trawan sondro foe gi ten na persoonlek studi — spesroetoe efoe den sma di wi e préki gi no teki a boskopoe tapoe wan boen fasi — dan wi ben sa kan ’bron krinkrin’. Efoe na a tra sé wi e gi ten na persoonlek studi èn moro fara e go na pasi foe ferteri trawan san wi ben leri, dan wi sa tan gesontoe na jejefasi.
Bai na ten
21, 22. (a) Sortoe bigi moeilijkheid Satan meki doe kon foe tapoe wi foe hori wi „fosi lobi”? (b) Sortoe rai Paulus ben gi na den Efesesma foe na fasi fa den ben kan wini na moeilijkheid disi, èn foe san-ede wi moe waka na baka en rai?
21 Di Stanley Jones ben skrifi foe a moro bigi problema di a ben moe feti nanga en a ben taki: „Mi ben abi someni ten.” En problema ben de precies a tra sé foe san foeroe kotoigi foe Jehovah e ondrofeni. A moro bigi pisi foe wi moe feti nanga a mankeri foe ten. Fa dati doe kon? Na apostel Johannes taki: „Na heri grontapoe didon na makti foe na ogriwan” (1 Johannes 5:19). A grontapoe foe Satan e gi sma ala ten so foeroe sani foe doe taki den abi pikinso okasi foe prakseri, no foe taki srefi foe studeri. Wi no de wan pisi foe na grontapoe, ma wi e firi wel na krakti di na grontapoe abi na tapoe wi nanga ala sani san e psa na ini. Na „ogriwan” e gebroiki na krakti foe na grontapoe foe gi wi foeroe sani foe doe taki presi no de moro gi na dienst foe Gado.
22 Paulus ben ferstan a problema disi èn a ben gi den Efesesma na warti rai di e kon now: „Loekoe foe dat’ede boen fa joe e waka no leki sma di no koni, ma leki koniman, bai a ten gi joesrefi foe di den dé ogri. Foe dat’ede no de moro langa onredelek, ma tan si san a wani foe Jehovah de” (Efesesma 5:15-17). Efoe wi misi foe bai ten foe doe na „wani foe Jehovah”, dan na druk di e doe kon foe di wi e libi na ini ’den ogri dé’ disi, sa abi kande leki bakapisi dati a lobi foe wi kon kowroe.
23. Sortoe sortoe foe persoonlek studi nanga préki sa meki taki wi „fosi lobi” tan na libi?
23 A de troe taki son kristen moe doe den hebi ferplekti foe den ofoe e siki èn leki wan bakapisi foe dati no man doe foeroe na ini na dienst foe Gado (Lukas 21:1-4). Ma na ini kroederi nanga Paulus rai gi kristen srafoe dan wi moe doe san wi kan foe doe nanga wi ’heri sili’ (Efesesma 6:5, 6). Persoonleke studi noiti sa de wan switi sani efoe na mindri televisie programma wi e teki wan toe minuut gi en. A sosrefi toe wi no kan ferwakti dati wi velddienst sa hori wi ’fosi lobi’ nanga faja a libi efoe ibri moen, na mindri pisiten foe ontspanning joe e gi soso wan ofoe toe agersi joeroe. — Teki gersi 1 Timotéus 4:8.
Begi foe kisi jepi
24. Foe sortoe toemsi prenspari jepi moro fara foe na kibri foe wi jeje fasi Paulus e ferteri na den Efesesma?
24 Na a kaba foe en takmakandra foe „na heri fetipak foe Gado”, Paulus ben gi kompe bribiman tranga foe weri ’na feti-owroe foe na jeje, dati de na Wortoe foe Gado èn foe tan begi nanga ibri sortoe foe begi èn tranga begi na ibri okasi’ (Efesesma 6:17, 18). Efoe nanga jepi foe begi wi e kon na ini krosbé kontakti nanga Jehovah dan wi no sa lasi wi ’fosi lobi’, awasi wi moe psa foeroe sortoe foe druk ofoe awasi wi ben doe dienst foeroe jari na ini na seti foe sani disi neleki Johannes. Paulus ben taki ini wan tra brifi: „Gi ala sani mi abi na tranga foe en di e gi mi krakti.” — Filipisma 4:13.
25. Te wi tjari ala sani foe na studi disi kon na wan, dan sortoe sani Jehovah ben seti foe jepi wi foe tan farawe foe lasi ’na lobi di wi ben abi fosi’?
25 Moro foeroe foe wi e weri ten a ten. Ma na boskopoe foe Jezus gi na gemeente na Efese e sori dati wi kan èn moesoe foe doe wan sani foe no lasi wi ’bribi di wi ben abi fosi’. Neleki fa Jehovah ben jepi den Efesesma nanga jepi foe Paulus, Timotéus nanga trawan na so a e jepi wi na ini disi ten nanga jepi foe en organisaatsi. Efoe wi foe wi sé e oefen foe feni studi nanga meditatie wan switi sani èn foe ’tranga wi ferstan’ gi na toemsi moi wroko foe ferteri trawan san wi leri, aladi wi e begi Jehovah ofoe a wani jepi wi foe hori doro na ini na doe foe en wani, dan wi e doe wan toemsi boen wroko. Meki wi, na ini akroederi nanga san Paulus ben taki gi den sma foe Galacia, „no weri foe doe san de boen, foe di na a reti ten wi sa koti, efoe wi no weri.” — Galaciasma 6:9.
San joe ben sa piki?
◻ San kan psa nanga wi lobi gi Jehovah efoe wi no poti ten na wan sé foe studeer èn foe mediteer?
◻ Foe san-ede a de wan warti sani gi wi te wi no wawan stoeka njoen waarheid, ma ooktoe waarheid nanga gronprakseri di wi ben jere langa ten kaba?
◻ Foe san-ede na préki gi trawan de wan toemsi prenspari sani foe tan hori wi ’fosi lobi’?
◻ Fa studi nanga prékiwroko makandra e sorgoe foe tan hori wisrefi gesontoe na jeje fasi?
◻ Foe san-ede wi noiti moesoe afrontoe begi te wi e meki moeiti foe tan hori na ’lobi di wi ben abi fosi’?
[Prenki na tapoe bladzijde 7]
Studie kan de wan prisiri sani, èn a e hori wi lobi gi Gado njoen
[Prenki na tapoe bladzijde 8]
Taki nanga trawan foe na waarheid e tranga wi lobi gi Jehovah