„Na lobi di joe ben abi fosi”
„Mi abi disi nanga joe, taki joe ben libi a lobi di joe ben abi fosi. Prakseri foe dat’ede foe pe joe ben fadon èn abi beraw.” — OPENBARING 2:4, 5.
1, 2. (a) Sortoe rai Jezus ben gi na a gemeente na Efese? (b) San den wortoe disi ben sa kan doe?
JOE na wan kotoigi foe Jehovah di abi foeroe jari foe getrow dienst na joe baka kaba? Efoe disi de so, fa joe ben sa feni en dan, te wan sma di joe ben abi foeroe respeki gi, ben kon taki nanga joe na a fasi leki fa a tanapoe dja na tapoesé? Joe ben sa kisi atibron foe dati? Ofoe joe ben sa denki taki a ben meki wan fowtoe èn ben abi wan heri tra sma na en fesi?
2 We, pikinmoro leki 1900 jari pasa kaba na gemeente, ofoe ecclesia, na Efese na Pikin-Asië ben kisi den wortoe disi foe jere na ini wan boskopoe di no wan tra sma moro leki Jezus Kristus di ben opo komoto baka foe dede ben taki gi en. Den wortoe foe en ben moe ben seki den. Den kristen dati na Efese ben hori doro na ini wan pisi ten foe sowan fotenti jari na ini na nen foe Jezus èn den ben kakafoetoe gi na krakti foe sma di ben fadon komoto na bribi (Tori foe den Apostel 18:18, 19; Efesema 1:1, 2). „Mi sabi oen wroko”, Jezus ben taki, „èn oen tranga wroko èn oen horidoro, èn mi sabi taki oen no kan si takroe sma na ai, èn dati oenoe e tesi den sma di e taki taki den de apostel ma den no de dati èn oen ben si taki den ben de léman” (Openbaring 2:2). Den ben de te now ete „na ini na waarheid”, soleki wi e taki dati. Ma san ben de dan a problema?
3. San ben de a problema foe den kristen foe Efese?
3 Den ben lasi ’na lobi di den ben abi wan dé.’ Den no ben doe dienst moro langa nanga a srefi faja foe kristen lobi gi Jehovah leki fa a ben de na a bigin. Leki wan bakapisi foe dati den ben go doe en moro safrisafri. Foe dat’ede Jezus ben warskow den: „Prakseri . . . foe pe joe ben fadon èn abi beraw èn doe den wroko foe fosten.” — Openbaring 2:5.
4. Sortoe warskow na ondrofeni foe den Efesesma abi gi wi?
4 Na ini disi wan warskow de gi Jehovah dienstknegti na ini a ten disi. A de wan sani di de krin taki srefi na lobi foe sma di abi kaba wan langa ondrofeni leki faja kristen kan kon kowroe. Na dorosé ben kan sori ete taki den tranga, ma na inisé den ben lasi na dipi lobi di den ben abi wan de gi Jehovah. Paulus ben warskow na ini wan brifi gi den Korintesma: „A soema foe dat’ede di denki taki a tanapoe, moe loekoe boen taki a no fadon” (1 Korintesma 10:12). Loekoe pikinso fa den Efesesma ben kisi a lobi foe den, foe kan kisi jepi na ini a tori disi, èn fa den ben kisi jepi foe tan hori a lobi dati.
Na kristendom na ini Efese
5, 6. Fa èn oten na prékiwroko foe na boen njoensoe ben bigin na Efese?
5 Na ini na fosi jarhondro foe wi G.T. na foto Efese ben de wan goedoe, grontapoe foto pe foeroe bisnis ben e doe èn na centrum foe wan anbegi foe na heiden oemagado Artemis (ofoe Diana) di ben e kon moro bigi. Na leri foe Jezus leki na Messias foe Jehovah no ben de foe jere drape dan leki baka a jari 52 G.T. di Paulus makandra nanga a man nanga oema Aquila èn Priskilla ben kon drape foe Korinte. Paulus srefi no ben kan tan drape, ma Aquila nanga Priskilla wel. Di Apollos, wan man di ben kan taki boen, ben bigin leri drape „nanga joistifasi” foe Jezus, dan na kristen man nanga oema disi di ben trow ben jepi en foe tjari kon na krin den fowtoe prakseri di a ben abi foe na dopoe. Apollos ben tron wan faja wrokoman na ini na fosi-jarhondro gemeente. — Tori foe den Apostel 18:24-28.
6 Di Paulus baka wantoe moen na baka dati ben drai go na Efese, a ben feni wan groepoe foe sowan twarfoe discipel di ben kisi dopoe nanga na dopoe foe Johannes. Den ben teki den wortoe foe Paulus heri boen èn ben kisi dopoe njoen baka. Morofara Paulus ben préki so wan dri moen langa na ini na snoga. Ma di a moro bigi pisi foe den djoe no ben teki wan boen fasi na préki, Paulus nanga den njoen discipel ben go na a zaal foe na skoro foe Tyránnus, pe a ben hori ala dé lezing. — Tori foe den Apostel 19:8-10.
7, 8. Sortoe spesroetoe sani di ben pasa ben marki na fosi gro foe na gemeente na ini Efese?
7 Now wan toemsi span pisi ten ben bigin na ini Efese. Nanga na jepi foe Paulus Jehovah ben doe krakti wroko foe dresi sma. Sma di ben fasi soso en krosi, ben kon boen èn na njoensoe foe en préki ben panja ensrefi go na ini na heri kontren (Tori foe den apostel 19:11-17). Na ini wan brifi di a ben skrifi, Paulus ben taki foe na gemeente na ini Korinte na abrasé foe na se foe Efese: „Te na a pinksterfesa mi e tan . . . na ini Efese, bikasi wan bigi doro di e tjari joe go na ini wroko de opo-opo gi mi, ma foeroe gensman de.” — 1 Korintesma 16:8, 9.
8 Paulus ben tan moro leki toe jari na ini Efese. Foeroe sma ben jere foe na toemsi bigi lobi di Jehovah ben sori di a seni en wan enkri gebore Manpikin, sodati den sma di ben sa sori bribi, ben sa kisi tégo libi. Den ben teki na waarheid èn ben sori wan krakti lobi gi Jehovah nanga en Manpikin. Fosten sma di ben doe towfroewroko, „ben tjari den boekoe foe den kon makandra, bron den meki ibriwan sma ben si èn den ben bereken na heri prijs foe den, di ben sori taki abi wan waarde foe féfitentidoesoen solfroe moni. Na so fasi na wortoe foe Jehovah ben tan gro na tapoe wan makti fasi èn ben e teki sani abra” (Tori foe den Apostel 19:19, 20). Tjari disi kon pikinso na ini joe prakseri fa disi ben de wan kefalek bigi kotoigi!
9. Fa na dipi foe na lobi foe na njoen gemeente ben tjari kon na krin?
9 Ma heri esi den tesi ben kon di ben tjari na dipi foe na lobi foe den Efesesma kon a doro. Na ini Efese foeroe smetiman foe solfroe sani ben e feni wan boen pisi brede na ini na meki foe solfroe tempel foe Artemis. Wan foe den, Demétrius, di ben si na jongoe kristen gemeente leki wan gefar foe na moni di a ben wroko, ben taki nanga en kompe-solfroe smeti nanga faja èn a ben meki wan oproeroe kon. Den kristen ben de ini gefar foe den libi, te leki na skrifiman foe na foto ben bedari na ipi sma di no ben sori orde fasi (Tori foe den Apostel 19:23-41). A kande taki moro foe den sortoe tesi dati ben de di no tanapoe na ini na bijbel, foe di Paulus ben e taki go na a sé dati taki ’a ben feti na Efese nanga wilder meti’ (1 Korintesma 15:32). Tokoe den Efesesma ben kisi jepi foe hori doro nanga jepi foe na faja lobi di den ben abi gi Jehovah.
10. Fa Paulus ben proberi moro fara foe gi den owroeman foe Efese tranga?
10 Te foe kaba Paulus ben gwe libi Efese. Ma na ini 56 G.T. a ben kon na sjoro na a foto Miléte di a ben waka go na Jeruzalem, sowan 48 kilometer moro fara foe Efese. A ben hori foe dat’ede wan komakandra nanga den owroeman foe Efese èn a ben gi den tranga foe waka baka en eksempre èn foe loekoe na ipi foe Gado di ben fertrow na a sorgoe foe den. A ben warskow den spesroetoe gi wolfoe di ben o druk sma èn di ben sa opo tanapoe foe den mindri èn di ben sa kori den discipel. Sosrefi toe a ben tjari kon na krin taki a no ben sa si den noiti moro kande. Foe dat’ede ’wan heri kré ben bigin a den mindri èn den ben fadon na a neki foe Paulus èn bosi en’. — Tori foe den Apostel 20:17-38.
11. San Paulus ben jere foe den Efesesma di a ben de na ini Rome?
11 Di Paulus ben doro na ini Jeruzalem, skowtoe ben kisi en èn te foe kaba den ben seni en leki wan straf’man go na Rome. Drape a ben prakseri agen den brada na ini Efesè èn a ben skrifi na brifi di wi e feni na ini na Njoen Grontapoevertaling na ondro na nen „Gi den Efesesma”. A lobi di den kristen na ini Efese ben abi gi Jehovah nanga en Manpikin, ben de te nanga na ten dati tranga ete, bika Paulus e taki gi den: ’Foe di mi ben jere foe na bribi di oenoe abi na ini Masra Jezus èn gi ala santawan meki mi no e tapoe toe foe taki tangi gi oenoe.’ — Efesesma 1:15-17.
12. Sortoe rai Paulus ben skrifi komoto foe Rome, sodati den Efesesma ben kisi jepi foe tan hori ’na lobi di den ben abi fosi’?
12 Paulus ben gi na ini na brifi foe en toemsi boen rai di ben abi leki marki foe jepi den foe tan hori na faja lobi foe den. A ben memre den dati den ben libi na ini ogri dé èn foe dat’ede ’den moe bai na josti ten’ èn no ben moe gi pasi dati tra afersi ben sa poesoe a wani foe Gado go na wan sé (Efesesma 5:15-17). Paulus ben memre den Efesesma sossrefi toe taki den troetroe féjanti foe den no ben de den libisma gensman foe den. Na presi foe dati a ben taki: ’Wi abi wan stré foe stré kontrari den ogri jeje krakti na ini den hemel kontren.’ Foe dat’ede a ben gi den tranga na wan krakti fasi foe weri na jeje fetipak èn nanga jepi foe begi tan ini krosbé kontakti nanga Gado. — Efesesma 6:11-18.
13. Fa Timotéus ben kan jepi den Efesesma?
13 Paulus ben skrifi en brifi gi den Efesesma na ini a ten foe 60 ofoe 61 G.T. (Efesesma 1:1). No langa a baka dati Timotéus ben tjari wan fisiti na Efese èn di a ben de drape a ben kisi na brifi foe Paulus di wi e kari Wán Timotéus. Na ini na brifi disi Paulus gi dek’ati na a jongoeman disi foe tan na ini Efese foe a „komanderi séker sma foe no tjari no wan tra leri èn ooktoe foe na poti prakseri na no wani létori èn na geslakti register, di te foe kaba no e tjari wi go na no wan pe” (1 Timotéus 1:3, 4). Sondro degedege na de foe Timotéus na ini Efese ben jepi a moro bigi pisi foe den kristen di ben libi drape foe tan hori a bribi gi Jehovah aladi takroe krakti ben de di ben lontoe den.
14. (a) Fa Jehovah ben tranga den Efesesma? (b) San ben pasa tokoe ete nanga den?
14 Na ini a pisiten foe 65 G.T. Paulus ben skrifi en Tweede brifi gi Timotéus. Na ini disi a ben skrifi taki a ben o seni ete wan boskopoeman, Tychikus, go na Efese (2 Timotéus 4:12). Dati ben de a laatste sani san wi ben lési foe Efese, te leki Jezus ben seni en boskopoe di skrifi na ini na boekoe Openbaring. Den kristen na ini Efese ben de den froktoe foe na préki foe na apostel Paulus. Den ben njan boen foeroe foe fisiti di ben tjari kon gi den bakaten foe den sortoe aparti kristen leki Timotéus, ben kisi rai foe wan brifi di ben kon foe santa jeje èn di ben de wan pisi foe na ’wan skin’ (Efesesma 4:4). Tokoe den ben lasi na ’lobi di den ben abi fosi’.
Krakti rai de fanowdoe
15, 16. (a) Foe san-ede son sma kande e denki taki a ben de wan sani di joe kan ferwakti taki na faja foe a lobi, di den Efesesma ben abi ben sa kowroe pikinso? (b) Jezus ben prakseri a srefi foe disi?
15 Son sma sa ferstan en kande taki na faja foe na lobi foe den Efesesma ben kon kowroe na wan sékerfasi. Di Jezus ben seni en boskopoe nanga jepi foe Johannes, na gemeente Efese ben de moro leki fotenti jari kaba. Sondro degedege a ben de so dati foeroe foe den no ben kan memre persoonlek na toemsi boen eksempe foe Aquila nanga Priskilla ofoe na faja préki foe Apollos. Na apostel Paulus ben dede sowan dritenti jari kaba. Jeruzalem ben pori sowan twentinaféfi jari kaba. Soboen kande a ben de wan sani foe froewakti taki den kristen na ini Efese ben sa go doe en moro safri èn ben sa lasi a firi foe den foe a tranga fanowdoe foe a ten nanga faja toe.
16 Ma Jezus no ben pardon sowan sortoe firi. Tra sma di neleki den Efesesma ofoe moro langa srefi ben de kristen, no ben lasi ’a fosi lobi’ foe den. Di Paulus ben tjari a boen njoensoe kon na Efese, na apostel Johannes di ben skrifi na boskopoe foe Jezus gi den Efesesma ben de moro leki twenti jari kaba wan bakaman foe Kristus. Boiti foe dati, den sma foe na gemeente foe Filadelfia ben sori krin taki den no ben lasi ’na lobi di den ben abi fosi’. — Openbaring 3:7-11.
17. Sortoe rai Jezus ben gi an den kristen foe Efese?
17 Jezus no ben de foe dat’ede onredelek di nanga wan faste bosroiti a ben taki gi den Efesesma dati, taki efoe den no ben abi beraw èn no ben wiki baka a lobi foe den, taki den ben sa lasi kande. A ben taki: „Mi sa teki joe kandratiki poeroe foe en presi efoe joe no abi beraw” (Openbaring 2:5). Disi no ben de wan sortoe tapoe skreki leki a ben de wel wan lobi warskow gi den kristen dati, foe ben kan gi den tranga foe handri na wan konifasi èn no lasi nanga dati den grani foe den.
San e meki a ’fosi lobi’ go lasi
18, 19. (a) O faja den Israëlsma ben de di den ben kon fri foe Egypte? (b) San meki den lasi na faja dati?
18 Fa a ben doe kon taki sma e lasi a fosi lobi foe den gi Jehovah èn na faja foe den na ini a doe foe na wani foe en? A bijbel no e taki gi wi san ben pasa nanga den sma dati foe Efese. Ma tra eksempre de na ini bijbel di e meki wi si wan srefi sortoe sani. Prakseri pikinso den Israëlsma di Mozes ben tjari komoto foe Egypte. Baka di den ben de kotoigi foe den krakti wroko foe Jehovah den ben doro wan hémarki na ini na pori foe Farao nanga en legre na ini na Redi se, den Israëlsma di ben kon fri ben bréti. „Soema na mindri den gado de leki joe, o Jehovah?” den ben singi nanga faja (Exodus 15:11; Psalm 136:1, 15). Di Jehovah ben meki bakaten na ferbontoe nanga den, den alamala ben taki leki wan man: „Ala san Jehovah ben taki, wi de klari foe doe, èn wi wani foe gi jesi.” — Exodus 24:7.
19 Tokoe na prisiri foe den Israëlsma ben kenki es’esi. Wan mankeri foe njanjan foe wan pisiten, wan mankeri foe abi ala sortoe njanjan, frede gi den Kanaänsma èn tra problema ben meki taki den ben frigiti den makti wroko foe Jehovah èn na ferbontoe di a ben meki nanga den. Ija, Egypte srefi, a kondre foe a katibo foe den, ben gersi wan toemsi moi sani gi den komoto foe na fara presi pe den ben de boen! Den ben frigiti na takroe ogri-atifasi foe den Egyptesma èn den ben kan denki soso na ’na fisi, den komkomoro, den watramoen, na prei, den ajoen, èn na knofrokoe’ di den ben njan drape wan lési. — Numeri 11:5.
20, 21. (a) Sortoe span njoensoe den djoe na ini Cyrus ten ben jere èn sortoe krakti disi ben abi tapoe den? (b) San ben meki den faja lasi gwe?
20 Prakseri ooktoe pikinso na den djoe di ben drai kon baka na ini 537 bifo G.T. foe na katibo foe Babylon. Prakseri pikinso a prisiri foe den di den ben jere Cyrus ben meki bekenti: „Jehovah ben komanderi den foe bow en wan oso na ini Jeruzalem, dati de na ini Juda. Ala sma di de na mindri oenoe foe heri en pipel, meki a Gado foe en de nanga en. Meki a opo go foe dat’ede na Jeruzalem, dati de na ini Juda, èn bow na oso foe Jehovah baka, na Gado foe Israël” (Ezra 1:2, 3). Foeroe tin doesoen sma ben teki na sani disi na wan boen fasi, èn di te foe kaba na fundamenti foe na njoen tempel ben seti, bigi prisiri ben de. — Ezra 2:64; 3:10-13.
21 Ma na faja nanga prisiri disi ben kon saka esi. Féjanti di ben de na ini na birti no ben wani ini a bow go doro èn nanga konkroe den ben meki a kon so fara dati wan officieel komando ben meki bekenti pe wan stop ben tjari kon na ini na bow foe na tempel (Ezra, kapitel 4). Den djoe ben bigin meki moi oso gi densrefi (Haggaï 1:4). Den si densrefi ala ten leki sma di ben e sori bribi na ini a djoe anbegi, èn dati no de foe taki. Den no ben drai baka gi na djoe bribi foe den. Ma na faja di den ben abi gi Jehovah nanga den belang foe na troe anbegi ben lasi gwe. Sondro degedege den ben sa prakseri taki den ben de ini balans ofoe redelek na ini den sani di den ben doe. Ma Jehovah no ben agri nanga dati. A ben seni den proféti Haggaï nanga Zacharia foe wiki na faja foe den baka, foe gi den dek’ati foe klari na bow foe na tempel foe Jehovah. — Ezra 5:1, 2.
22, 23. (a) San kan meki kristen lasi na ini disi ten na lobi di den ben abi fosi? (b) Sortoe aksi wi moe loekoe ete?
22 Wan srefi sani kan pasa nanga kristen na ini wi ten. Den aladé problema foe a libi e drai kon baka alaten na ini wan grontapoe di no de kristelek kan meki a prisiri foe den kon flaw. Nanga a pasa foe a ten a kan pasa dati na waarheid no de moro langa wan fris nanga span sani gi den. A kan pasa srefi taki wan kristen, o moro a ten e figi a memre poeroe foe san a wani taki foe de na ini grontapoe, e go loekoe nanga foeroe lostoe na a sokari fri — na mankeri foe frantwortoe — di sma foe a grontapoe abi (Efesesma 2:11, 12). Sosrefi toe kristensma kan kon weri nanga na fasi foe den sma di lontoe den. Den kan meki na prakseri gro dati a moesoe de moro redelek foe teki a dienst foe Gado moro makriki èn foe doe en pikin safrisafri. — Jeremia 17:9
23 Na sowan sani ben moesoe pasa nanga den kristen na ini Efese, ma Jezus ben sabi krin taki den ben kan kon boen baka. Nanga jepi foe na apostel Paulus den ben kisi foe troe foeroe rai kaba, di efoe den ben poti en ini den libi ben sa jepi den ’foe na lobi di den ben abi fosi’ bigin gro njoen baka. Na ini san na toemsi warti pirai disi ben de? Èn a rai disi sa jepi wi foe kibri ’na fosi lobi’ na ini disi ten? Disi wi sa si na ini na tra artikel di wi o taki foe en.
Joe kan memre ete —
◻ Sortoe problema ben de na ini na gemeente foe Efese?
◻ Sortoe jepi Jehovah ben gi den?
◻ Foe san-ede den Israëlsma na ini Mozes ten ben lasi den faja?
◻ San ben tjari den Israëlsma na ini Ezra ten so fara foe lasi na prisiri foe na faja foe den?
◻ San kan tjari oenoe so fara ’foe lasi a lobi di wi ben abi fosi’?
[Prenki na tapoe bladzijde 2]
A kande foe na lobi foe goedoe ede, meki den memre foe na gemeente foe Éfese libi na lobi di den ben abi fosi
[Prenki na tapoe bladzijde 5]
Haggaï ben aksi den djoe: ’A de a ten now foe libi na ini oenoe oso di temre moi, la di na oso foe Gado de sondro foe a bow?’