Kweki kristen bescheidenfasi
1. Sortoe wortoe e sori taki son sma ini na grontapoe ben si na warti foe bescheidenfasi?
BESCHEIDENFASI na wan fasi di wan dé den koniman foe na grontapoe disi ben warderi. Na so wi ben kisi foe jere: „Sma e gi alaten wan jesi na wan sma di de bescheiden, bika no wan sma e benij wan sma di no e wiki na indruk taki a e poti prakseri na en srefi nomo.” Den e taki wel: „Na bescheidenfasi foe wan sma na wan leti di e skijn, a e opo na ferstan foe kisi sabi èn na ati foe kisi waarheid”. A sma di e mankeri bescheidenfasi no abi wan ferstan leki fa a sori foe teki sani na ini.
2. Fa bepaalde bekende man ben sori bescheidenfasi?
2 Dan wan toe man de di ala sma sabi foe di den ben feni boen sani èn di ben sori taki den de nanga bescheidenfasi. Na so Albert Einstein ben taki wan dé dati „wan ferstan e sori ensrefi na ini den wet foe na universum, wan ferstan di bigi sondro kaba moro leki di foe libisma, èn wan ferstan di wi moe firi wisrefi nanga a koni foe wi nanga sakafasi”. Èn sir Isac Newton di foeroe sma e si leki a moro bigi koniman foe alaten ben taki wan dé: „Efoe mi ben si moro fara leki tra sma, dan disi ben kon foe di mi ben tan tanapoe na tapoe na skowroe foe reus.” Agersi leki wantoe datra di ben opereer Jehovah Kotoigi abi net so wan jejefasi. Baka di moeilek operatie di den ben doe ben waka boen, sondro foe gebroiki broedoe den ben taigi den kotoigi sikiman taki Gado moe kisi na grani, no den datra.
Eksempre foe bescheidenfasi
3. (a) San sa jepi wi foe kweki bescheidenfasi? (b) San wi kan taki foe Mozes nanga bescheidenfasi?
3 San sa jepi wi foe kweki na fanowdoe égifasi foe bescheidenfasi di wi wani abi sote? A no de foe taki, wi sa kisi jepi na ini disi te wi loekoe den sani di tanapoe na ini na artikel na fesi di e go foe na bescheidenfasi na ini wi libi. Ete wan jepi ini na kweki foe bescheidenfasi, de foe loekoe na tapoe sortoe toemsi bigi fasi Jehovah ben gebroiki en bescheiden dienstknegti. Fa Gado ben sa gebroiki sma di ben wani foe kisi égi prijse èn ben sa wani poti prakseri na densrefi na presi foe na tapoe na Mekiman foe den. Mozes ben doe disi soso wan tron — aladi a ben de na ondro bigi druk nanga a soekoe di den ben soekoe en mofo. Ma fa a ben moesoe pai foe dati! Ma dati Mozes ben de troetroe bescheiden e kon na krin na ini na sani disi, taki biginbigin a ben sjensjen foe go na Farao. Boiti foe dati, na bijbel e taki dati „Mozes ben de farawe na moro safri-ati sma foe ala sma di ben de na tapoe na fesi foe grontapoe”. — Numeri 12:3; Exodus 4:10-17.
4. Fa Elihu nanga Jozef ben sori bescheidenfasi di fiti?
4 Ete wan toemsi moi eksempre foe bescheidenfasi ben de na jonkoeman Elihu. A ben wakti nanga pasensi foe taki te leki den sma di ben de moro owroe na ini jari leki en namkoe Job nanga en dri mati, ben go wan mofo. Elihu no ben teki wan fasi taki a de moro leki den ma a ben gi ala grani na en Mekiman (Job 32:4-11, 21; 36:9). Jozef, a pikin foe a famiri-edeman Jakob, sori wan bescheidenfasi di fiti di a ben tjari go na fesi na makti Farao èn den ben aksi en ofoe a ben kan tjari na dren foe na kownoe dati kon na krin. Jozef ben gi na grani foe na poeroe foe den dren na Jehovah. — Genesis 40:8; teki gersi Daniël 2:26-30.
5. Foe san-ede meki na bescheidenfasi foe Gideon ben de prenspari gi Jehovah Gado?
5 Loekoe ooktoe na geval foe Gideon di a ben kisi en komando, a ben taki bescheiden, taki en famiri groepoe ben de na moro mendriwan na ini Manasse èn dati ensrefi ben de na moro pikinwan na ini na oso foe en. Foe dat’ede Gideon ben de precies na joisti sma foe soema Jehovah ben kan meki gebroiki foe en foe fon den Midianietsma, bika Gado ben abi na faste bosroiti foe teki na grani gi ensrefi foe na wini. Soso wan troetroe bescheiden man ben kan doe dienst ini na situwasi dati tapoe wan joisti fasi. — Kroetoeman 6:14-16; 7:2-7.
6. (a) Foe san-ede meki Jehovah ben prisiri nanga na aksi foe na jongoe kownoe Salomo? (b) Sortoe tra jongoe dienstknegti foe Jehovah ben sori bescheidenfasi di fiti, èn na sortoe fasi? (c) Fa na fasi foe na jongoe Elihu, Salomo nanga Jeremia ben abi krakti tapoe jongoe kotoigi ofoe kotoigi foe Jehovah di abi mendri ondrofeni?
6 Di na jonkoeman Salomo ben tron kownoe pas, a ben sori ooktoe bescheidenfasi. Bakadi na ini wan dren Gado ben aksi en san a ben sa wani abi soboen, Salomo ben piki na wan bescheidenfasi: „Mi de soso wan pikin boi. Joe moe gi joe knegti wan ati di e gi jesi foe tiri joe pipel, foe kan si boen foe ogri; bika soema sa man foe tiri na moeilek pipel disi foe joe?” Jehovah ben bréti sote nanga na bescheidenfasi foe Salomo, dati a no ben gi en wawan koni ma ooktoe goedoe nanga glori (1 Kownoe 3:4-14). Foe na bescheidenfasi foe Salomo ede meki Jehovah ben meki a tron na moro koniwan foe ala libisma tiriman. Sosrefi toe Jeremia te joe loekoe na jonkoemanfasi foe en ben sori bescheidenfasi di den ben kari en foe de a proféti foe Jehovah (Jeremia 1:6-8). Joe de wan jongoe kotoigi foe Jehovah sondro ondrofeni? Efoe dati de so, dan joe sa sori séker taki joe koni te neleki na jonkoeman Elihu, Salomo nanga Jeremia joe sori wan beschedenfasi di fiti.
7. Fa den wortoe foe Paulus na ini 1 Korintesma 2:1-5 e gi wan toemsi moi eksenpre foe bescheidenfasi foe kownoekondre prékiman?
7 Na bescheidenfasi foe na apostel Paulus ben de sosrefi toe wan aparti wan. Aladi Paulus ben de wan fariséman di ben kisi leri boen èn Jehovah Gado ben gi en bakaten foeroe dienstgrani, tokoe a no ben e waka meki bigi nanga a sabi nanga koni foe en. A ben taki srefi: „Foe dat’ede brada, meki mi no ben kon nanga foeroe wortoe ofoe koni foe meki na santa kibri tori bekenti di mi ben kon na oenoe. Bika mi ben teki na bosroiti no foe sabi no wan tra sani mindri oen leki Jezus Kristus, na wan di ben anga na wan postoe. Mi ben kon na oen na ini swakifasi èn na ini frede èn nanga foeroe béfi, èn a fasi foe taki foe mi èn san mi e préki, no ben de nanga overedende wortoe foe koni, ma nanga na sori foe jeje nanga krakti, sodati oen bribi no ben sa de na ini libisma ma ini na krakti foe Gado” (1 Korintesma 2:1-5). Wan toe sma na mindri Jehovah Kotoigi komoto na mindri a groepoe foe sma di kisi boen leri. Ma neleki Paulus den e sori bescheidenfasi di den e meki na boen njoensoe bekenti èn dan sofasi den e waka baka na toemsi moi eksempre foe na apostel.
8. Fa Jezus ben gi na moro bigi eksempre foe bescheidenfasi?
8 Na moro bigi èn moro moi eksempre foe bescheidenfasi de, èn dati no de foe taki, no wan tra sma moro leki Jezus Kristus. Bigi difrenti de mindri na Manpikin foe Gado èn na sma di tron Satan na Didibri! Noiti Kristus na wan onbescheidenfasi ben proeberi foe de speri foe Jehovah Gado (Mattéus 4:8-10; Filippisma 2:5-8). Na a tra sé, Jezus ben de tevréde dorodoro foe de na assisteriman nanga takiman foe en Tata (Odo 8:30; Johannes 1:1). Di a ben de na grontapoe a ben taki alatron baka foe a mendrifasi foe en na ondro Gado (Johannes 5:19, 30; 7:28; 8:28, 42). A no ben aksi grani foe ensrefi ma a ben poti prakseri tapoe Jehovah (Markus 10:18). Èn di Jezus ben tanapoe na fesi na moro bigi tesi en fasi ben de: „Mi Tata efoe a kan meki na beker disi pasa gowe foe mi, ma ete no soleki mi wani, ma soleki joe wani” (Mattéus 26:39). A no de foe taki taki Jezus ben gi wan toemsi moi eksempre na bescheidenfasi. Séker ala den jeje nanga libisma mekisani foe Gado moe de bescheiden.
Bescheidenfasi abi waarde
9. Foe san-ede leki fa 1 Korintesma 4:6, 7 e taki bescheidenfasi foe na sé foe den dienstknegti foe Gado abi waarde?
9 Foe de bescheiden, de wan sani gi wi leki wan sani di no kan tra fasi; a abi waarde. Foe bigin, wi alamala no de onvolmaakti? Soema no kan taki taki disi no de so! (1 Kownoe 8:46). Wi alamala e meki fowtoe na ondrofeni foe wi abi skotoe èn a sabi foe wi no de sondro kaba kwetkweti. Moro leki dati, wi no abi noti san wi no ben kisi. Foe dat’ede na apostel Paulus gi en égi kompebribiman tranga foe no go na dorosé foe den sani di ben skrifi. „Sodati”, soleki fa a de taki en, „no wan sma foe oenoe kisi bigimemre foe na boen foe na wan tege na trawan. Bika soema e meki joe kenki foe a trawan? Ija, san joe abi di joe no ben kisi? Efoe now troetroe joe ben kisi en foe san-ede joe e meki bigi leki joe no ben kisi en?” (1 Korintesma 4:6, 7). A de krin dati san wi de foe wan bigi pisi e anga foe wi genetis erfenis, a presi pe wi e libi èn spesroetoe foe na voorzienigheid foe Gado.
10. Dati sani e waka boen ini wi diniwroko e anga foe sortoe sani èn fa a ferstan foe a sani disi e abi krakti tapoe wi?
10 Boiti foe dati, a no de wan troe tori taki awinsi sortoe winimarki di wi abi gi wi santa dienst, taki ala dati anga foe na blesi foe Jehovah. Foe gi wan eksempre: O tranga wan gronman kan wroko toe, a weer e pré wan toemsi prenspari rol na ini na gro foe den njanjan. Na psalmsingiman nanga reti ben taki: „Efoe Jehovah srefi no bow na oso dan foe soso den basi foe a oso ben wroko. Efoe Jehovah srefi no loekoe a foto, na foe soso den waktiman e wakti.” Na apostel Paulus ben poti na tapoe disi sosrefi toe na prakseri di a ben skrifi foe na wroko foe kristen bedinari: „Mi ben prani, Apóllos ben nati, ma Gado ben meki na sani gro, sodati no na sma die prani, no a sma di e nati de wan sani, ma Gado meki a gro” (Psalm 127:1; 1 Korintesma 3:6, 7). Ija, efoe wi taki go taki kon foe na afersi dan wi moe piki taki bescheidenfasi e fiti wi alamala awasi sortoe koni, prestatie ofoe goedoe wi abi.
Jepisani foe kweki bescheidenfasi
11. Fa lobi gi Jehovah Gado sa jepi wi foe abi bescheidenfasi?
11 A mindri den fasi di sa jepi wi foe de bescheiden de lobi, lobi sondro gridifasi. Efoe wi e warderi san Jehovah ben doe gi wi alamala, e doe nownow èn sa doe gi wi ete, dan troetroe wi sa lobi en nanga heri wi ati, heri wi sili, nanga heri wi krakti (Markus 12:30). Dan wi no sa naki tapoe wi borsoe. A kaba foe a tori de so taki meki bigi de na tra sé foe bescheidenfasi. Ma presi foe dati, dan alaten wi sa taki nanga bescheidenfasi di fiti èn handri foe no poti prakseri a tapoe wisrefi, ma tapoe Jehovah Gado foe di wi e gi en ala grani èn glori. Dan wi sa poti prakseri na tapoe na rai: „Na koniwan no moe meki bigi tapoe en koni, èn na trangawan no moe meki bigi tapoe en tranga. Na goedoewan no moe meki bigi tapoe en goedoe. Ma a sma di e meki bigi, meki a meki bigi na tapoe disi, dati a abi inzicht èn a sabi foe mi, dati mi na Jehovab, na Sma di e doe na grontapoe lobiboenfasi, geregtigheid nanga regtvaardikifasi, bika na ini den sani disi mi abi troetroe prisiri, na so den wortoe foe Jehovah de.” — Jeremia 9:23, 24.
12. Fa wan boen matifasi nanga Gado kan jepi wi foe de nanga bescheidenfasi?
12 Wan krosbé matifasi nanga Jehovah Kotoigi, sa jepi wi alaten foe de bescheiden. Den e ferwakti foe wi taki wi e waka bescheiden nanga wi Gado (Markus 6:8). Na ini na fasi di na Mekiman, en granfasi, en majesteiti, èn en égifasi kon de wan troe sani gi wi, a so wi sa tjari wisrefi nanga bescheidenfasi di fiti. Wi wani abi na srefi jejefasi leki Mozes di „ben tan stanfaste leki a ben si na wan di no de foe si” (Hebrewsma 11:27). A de neleki wi de pikinnengre di e graboe na anoe foe wi hemel Tata. Gi wisrefi alaten nanga a Wortoe foe Jehovah njanjan èn ’nanga a horidoro na ini begi’, ija, ’sondro foe stop foe begi’, sa jepi wi foe prisiri na ini na toemsi moi matifasi nanga Gado. — Romeini 12:12; 1 Thessalonicasma 5:17.
13. Na sortoe fasi na lostoe foe wi foe waka baka Jezus Kristus kan jepi wi foe de nanga bescheidenfasi?
13 Lobi nanga warderi gi ala sani san wi méstri Jezus Kristus ben doe gi wi èn foe sabi san a wani foe taki foe waka soifri na ini den foetoemarki sa jepi wi toe foe de bescheiden. Fa Jezus ben gi wan toemsi moi sondro gridifasi èn volmaakti eksempre! Na ini a fasi fa wi sa teki wi ferprekti foe waka soifri na ini en foetoemarki a wan serjoesoefasi, a so wi sa kisi jepi foe de bescheiden. Fa so? Foe di wi sa ferstan dan fa wi ben misi srefsrefi foe waka dorodoro na en baka. Kande wi lobi wisrefi te wi e teki wisrefi gersi nanga trawan. Ma wi abi réde gi sowan lobi efoe wi teki wisrefi gersi nanga Jezus Kristus? Dan presi foe dati, wi moe firi wisrefi net soleki na apostel Paulus foe di wi e ferstan boen, dati wi e tan misi foe doe san wi ben wani foe doe troetroe èn so foeroe tron e doe san wi no wani foe doe troetroe. No wan enkri kristen di e ferstan fa a misi srefsrefi foe waka baka Jezus Kristus, sa abi na firi foe meki bigi foe ensrefi. — Romeini 7:15-25.
14. Fa brada lobi kan jepi wi foe de nanga bescheidenfasi?
14 Sosrefi toe lobi gi wi kompe kotoigi foe Jehovah èn gi den memre foe wi osofamiri sa jepi wi foe de bescheiden. Wan kownoekondresingi e tjari en kon so ondro wortoe: „Na ai foe lobi no e si ogri; bow den brada, no sabi bita-ati.” Ija, lobi sa meki wi warderi den boen égifasi na ini tra sma. Ma fa disi kan jepi wi foe de bescheiden? Mankeri foe bescheidenfasi e hati a firi toe trawan èn e meki den no e firi densrefi so switi. Foe di wi no wani hati na firi foe den sma di wi lobi, meki opregti bradalobi sa meki wi de bescheiden. Mankeri foe bescheidenfasi e meki stré nanga jo hari jo troesoe kon ofoe e meki trawan firi ensrefi moro lagi. Ma wi lobi „no e meki bigi, no e hé ensrefi”, moro foeroe a de bescheiden. — 1 Korintesma 13:4.
15. Fa dwengi joesrefi kan jepi wi foe de nanga bescheidenfasi?
15 Dwengi joesrefi, wan froktoe foe santa jeje, de ooktoe wan jepi gi wi foe kweki bescheidenfasi (Galaciasma 5:22, 23). Wan troetroe banti de na mindri den toe jejefasi disi? Ja séker. Nofotron wan sma e firi foe taki ofoe foe doe san de foe en égi boen ofoe e poti en na ini wan boen leti, sontron soso foe di a e handri wantron ini wan momenti. Sodra a taki ofoe doe wan sani, dan a e ferstan sortoe fowtoe a ben meki. Disi e doe kon foe di na libisma ati de wan kori sani, feradek bedrigi (Jeremia 17:9, Petrus Canisiusvertaling; Leidse Vertaling). Ma dwengi wisrefi, go prakseri foe sani, go denki fa wi wortoe ofoe doe kan abi en krakti na tapoe trawan kan jepi wi foe sori bescheidenfasi di fiti. A so foe eksempre sondro foe go prakseri nofo foe wan sani, den kan firi foe teki a moro boen èn na moro bigi pisi meti, koekoe ofce froktoe, te na a ten foe njanjan den tjari wan preti kon gi wi. Ma dwengi wisrefi èn go prakseri foe sani sa jepi wi foe kakafoetoe gi na handri na ini wan momenti. A srefi de so na ini a tori foe teki na moro betre presi na a ten foe wan fesa-njanjan tapoe wan onbescheidenfasi. Soleki Jezus ben sori, dan sma ben kan aksi wi foe go sidon na wan mendri prenspari presi. Ma, pikinso denki èn bescheidenfasi sa kibri wi foe meki a tapoe den kontren disi fowtoe di kan gi wi sjen. — Lukas 14:8-11.
16. Foe san-ede meki bribi na ini Jehovah kan jepi wi foe de nanga bescheidenfasi?
16 Ete wan froktoe foe na jeje di kan jepi wi foe kweki bescheidenfasi, na bribi na ini Jehovah, di e komoto foe na boen matifasi nanga en. Wi fadon libismafasi e wani foe wi frede dati wi o lasi den boen sani foe na libi, kande na skinfasi kande na ferstansé, na wi firi ofoe jejefasi. A bribi na ini Jehovah sa kibri wi foe go poti wisrefi foe denki taki wi abi reti na tapoe sani ofoe go poesoe wisrefi na wan onbescheidenfasi go na fesi. Wi sa meki morofoeroe afersi rostoe na ini Jehovah anoe. Te wi de bescheiden dan wi sa wakti te leki Jehovah Gado poti en afersi reti, ofoe sa loekoe taki wi e kisi erkenning ofoe grani. Bifo David ben tron kownoe, a ben sori a bescheidenfasi disi. A ben kan teki den afersi ensrefi na ini anoe, bikasi a ben kisi salfoe leki kownoe. David ben kan tron wantewante na kownoe foe Israël te a ben kiri kownoe Saul, ma nono David wakti na wan bescheidenfasi te leki Jehovah ben sa gi en a kownoewroko, wan sani di Jehovah ben doe tapoe en reti ten toe. — 1 Samuël 24:2-6; 26:10, 11.
17. Na sortoe fasi te wi e poti wisrefi foe firi nanga tra sma, disi sa jepi wi foe abi bescheidenfasi?
17 Ete wan jepi ini na kweki foe bescheidenfasi na empathie, san wani taki dati wan sma e poti ensrefi na ini na presi foe wan trawan. Mankeri foe bescheidenfasi foe eksempre kan meki taki wan owroeman na ini na gemeente alaten baka e psa a ten te a moe doe wan pisi foe na gemeente komankandra. Ma efoe a abi empathie dan a sa poti ensrefi na ini na positsi foe en kompe owroeman, di wani sote nofo ten gi den prati foe den na a programma. Na bescheiden owroeman sa denki toe na en jeje brada nanga sisa di no e feni en boen te wan komakandra sondro réde psa a ten. Empathie sa meki wan sma te joe loekoe en boen de bescheiden ini ala den matifasi nanga den tra libisma no soso na ini na kristen gemeente. Empathie ben tjari Paulus so fara foe tron ’gi den djoe leki wan djoe, gi den di de ondro a wet leki a de na ondro na wet, gi den swakiwan leki a swaki’, nanga so moro fara., Ala den sani disi foe na boen foe na boen njoensoe. Disi wani taki taki a ben de bescheiden èn ben wani den arkiman foe en si taki a no ben e prakseri na ensrefi taki a ben moro betre leki den. — 1 Korintesma 9:19-23.
18. San wi kan taki foe na boen foe kristen bescheidenfasi?
18 Ija, kristen bescheidenfasi e rikomanderi ensrefi na foeroe fasi. Fa someni moeilekheid de kon na ini na waka foe na historia nanga na mankeri foe bescheidenfasi. Na sori foe bescheidenfasi abi waarde gi wan kristen troetroe. A e meki boen matifasi kon nanga Gado, wi kompe kotoigi foe Jehovah, wi égi osofamiri nanga trawan. Bescheidenfasi sa jepi wi pesoonlek srefi, bikasi a sa meki wi de tevréde èn kibri wi foe no kon ini broeja. A Wortoe foe Gado foe koni e jepi wi troetroe foe kon de bescheiden. Meki foe dat’ede wi sori troetroe koni te wi e kweki kristen bescheidenfasi èn e sori disi.
Fa joe ben sa piki?
◻ Fa wantoe jongoe sma ini na tori foe bijbel ben sori bescheidenfasi?
◻ Fa jezus ben gi kristen na moro bigi èn moro boen eksempre foe bescheidenfasi?
◻ Na sortoe fasi lobi gi Jehovah nanga wan boen matifasi nanga en kan jepi wi foe kweki bescheidenfasi?
◻ Fa na lostoe foe wi foe waka na baka Jezus Kristus sa jepi wi foe sori bescheidenfasi?
◻ Foe san-ede brada lobi sa jepi wi leki Jehovah anbegiman foe de bescheiden?
[Prenki na tapoe bladzijde 7]
Elihu nanga respekifasi no ben teki wan fasi foe sori taki a ben de moro hé, gi ala prijse na Jehovah
[Prenki na tapoe bladzijde 8]
Gi wisrefi alaten njannjan nanga a wortoe foe Gado èn ’begi sondro foe tapoe’ sa jepi wi foe kweki respekifasi