Kristen bescheidenfasi — Wan sori foe koni

„Nanga na krakti foe na no-ferdini boenfasi di ben gi mi, meki mi e taki gi ibriwan foe oenoe, no denki moro foeroe foe ensrefi leki de fanowdoe, ma nanga wan gesontoe ferstan foe denki, ibriwan na a marki foe bribi di Gado ben gi en.” — ROMEINI 12:3.

1. Sortoe sani e sori taki sma no e warderi now bescheiden fasi?

FA A DE pikinso sma na ini a ten disi di e warderi bescheidenfasi èn di e sori na égifasi disi! Wi e libi na ini wan pisten foe bitastré èn ongewoon stré nanga makandra. Den ras, naatsi, lo, corporatie nanga aparti sma na ini na grontapoe alamala wani foe sori taki den de wan sani noso taki den de a loktoe. No wan sma wani sori bescheidenfasi. Na jejefasi disi ben psa go srefi na ini na osofamiri soleki e kon na krin na ini na oproeroe foe den jongoewan nanga na boewégi foe oemasma foe kon fri.

2. Foe san-ede Jehovah Kotoigi moe abi wan tra loekoe tapoe bescheiden fasi leki na grontapoe?

² Ma na pasi foe na grontapoe no moe de na pasi foe troe kristen. Nono, Jehovah Kotoigi e erken taki den de ferplekti foe waka na ini den foetoestap foe na moro bigi eksempre foe bescheidenfasi di na grontapoe disi oiti ben sabi — Jezus Kristus na Manpikin foe Gado. Na aparti sani foe a bescheidenfasi foe Jezus de den wortoe di a ben taki: „Na Manpikin no kan doe no wan enkri sani foe ensrefi”. „Foe san-ede joe e kari mi boen no wan sma boen boiti wán, Gado” (Johannes 5:19; Lukas 18:19) Ija, alasma di wani waka soifri nanga ala prisiri na ini den foetoestap foe Jezus Kristus moe sori bescheidenfasi. Boiti foe dati dan ala sma di e doe dati, no sa lasi, ma sa si taki na pasi foe na kristen bescheidenfasi e pai èn de troetroe wan sori foe koni.

3. Na sortoe fasi na wortoe bescheiden fasi e gebroiki ini algemeen?

³ Na wortoe ’bescheidenfasi’ kan sori na tapoe na „skotoe foe a bradi, langa, hé nanga so moro fara foe wan sani, foe a omeni ofoe a bigi foe wan sani”. Ofoe a kan abi foe doe nanga san de soifri èn krin, nanga a marki foe fri foe „grofoefasi, no firi sani fini, no abi maniri”. Moro fara a kan sori ooktoe na tapoe „na ferstan di wan sma e ferstan o fara a man foe go”, na tapoe „na ferstan di wan sma e ferstan o fara a man foe go”, ofoe „a no abi foe égi memre noso a no abi foe sosofasi”. Na ondro na krakti foe na santa jeje foe Gado na apostel Paulus ben gi kompe bribiman tranga foe sori bescheidenfasi, bika a ben skrifi: „Nanga na krakti foe no-ferdini boenfasi di mi ben kisi, meki mi ben taki gi ibriwan foe oenoe no foe denki foe ensrefi moro leki a de fanowdoe, ma foe denki nanga wan gesontoe ferstan ibriwan nanga na marki di Gado ben gi en” (Romeini 12:3). Ija, a de fanowdoe foe denki wan sani foe wisrefi. Ma wi no mag denki toemsi foe wisefi foe di wi e prakseri taki wi natuurlek bekwaamheid nanga koni di wi kisi de toemsi prenspari.

Bescheidenfasi èn sakafasi no de a srefi

4. (a) Pe wi e feni na Hebrew wortoe na ini bijbel di vertaal nanga „bescheiden fasi”? (b) San wi kan taki foe san na wortoe disi wani taki na ini Odo 11:2?

⁴ Na ini foeroe bijbelvertaling den e broeja bescheidenfasi nanga sakafasi. A Hebrew wortoe di vertaal nanga ’bescheidenfasi’ de foe feni na ini Odo 11:2 nanga Micha 6:8. San a wani taki? A kan wani taki dati wan sma de bescheiden, maniri, soifri nanga krin ofoe abi krinfasi na skinfasi. Ma a kan sori a tapoe taki wan sma e ferstan taki a no man doe ala sani. Ini Micha 6:8 na Hebrew wortoe ben kan abi ala toe betekenis, bika wi e kisi tranga drape foe ’waka bescheiden nanga wi Gado’, ma dati no de so na ini Odo 11:2 pe tanapoe: „Efoe bigimemre kon? Dan sjen sa kon; ma koni de na den sma di de bescheiden.” Djaso bescheidenfasi e poti abrasé foe bigimemre. Na tra sé foe bigimemre de dja bescheidenfasi na ini na fasi dati wan sma no e ferberde foeroe foe ensrefi ofoe teki wan sani sondro foe abi na reti a tapoe, ma dati wan sma e ferstan ofara a kan go èn dati a no man doe ala sani.

5, 6. Fa wi kan sori na difrenti na mindri sakafasi nanga bescheiden fasi na ini na tori foe Jehovah Gado?

⁵ Wan difrenti de na mindri sakafasi nanga bescheidenfasi. Foe Jehovah Gado na psalmsingiman David e taki foe eksempre: „Joe égi sakafasi sa meki mi kon bigi” (Psalm 18:35). Ija, foe di Jehovah ben de klari foe saka ensrefi ofoe foe lagi ensrefi foe poti prakseri na tapoe David èn foe handri nanga pasensi nanga en meki David ben tron wan bigi kownoe na Israël. Na so wi e lési ooktoe foe Jehovah: „Soema de leki Jehovah, wi Gado, en di e meki en tanpresi na hemel? A BEN SAKA ensrefi foe loekoe hemel nanga grontapoe.” (Psalm 113:5, 6). Degedege no de foe disi — na Mekiman de so hé, dati a moe saka ensrefi foe poti prakseri tapoe den sani san e psa na ini hemel nanga grontapoe.

⁶ Ma wi kan taki foe Jehovah taki a de bescheiden na ini a fasi dati a e ferstan den skotoe foe en? Nono! Fa wi ben kan taki foe Gado taki a abi skotoe, bika en koni nanga makti no abi kaba, sondro fowtoe dorodoro èn volmaakti a de ini geregtigheid èn a de a soema di de ini persoon lobi. Nanga reti meki no wan sma kan teki ensrefi gersi nanga en. — Jesaja 40:12-31.

7. (a) Foe san-ede wan sma kan taki dati wan sma kande abi sakafasi, ma tokoe ete no abi bescheiden fasi? (b) Fa disi e kon a krin ini na geval foe na apostel Petrus?

⁷ Libisma na a tra sé kan abi sakafasi èn de tog de onbescheiden. Den kan de nanga sakafasi, èn tokoe no e sori taki den de gesontoe ini ferstan, sodati den no e ferstan den égi skotoe foe den. Na apostel Petrus foe eksempre ben de wan sakafasi man. Di a ben si Jezus doe wan wondroe di ben sori taki a ben abi na makti abra libimekisani, a ben fadon na Jezus foetoe èn ben taki: „Komoto gwe foe mi bika mi de wan sondoe man” (Lukas 5:8). Sosrefi toe wi ben si taki Petrus ben kisi pir’ai, ma noiti wi ben si taki Petrus ben naki foetoe na a pir’ai dati (Mattéus 16:21-23; Galaciasma 2:11-14; 2 Petrus 3:15, 16). Sondro degedege Petrus ben de wan sakafasi apostel. Ma a ben de troetroe bescheiden ini na fasi taki a ben ferstan den skotoe foe en? No ala ten. Efi disi ben de so, dan a no ben kan taki nanga krakti taki awinsi ala tra apostel ben sa gwe libi na méstri foe den, en no ben sa doe disi, nanga leki bakapisi na wan enkri sani dati a ben misi èn a ben taki dri tron taki a no sabi Jezus! — Markus 14:29, 30, 66-72.

Problema di e kon foe na mankeri foe bescheidenfasi

8. Foe san-ede wan sma kan taki taki ala moeilekheid na ini na universum doe kon foe wan mankeri foe bescheidenfasi?

⁸ Mankeri foe bescheidenfasi no wawan ben tjari problema kon gi na apostel Petrus, ma wan sma ben sa kan taki taki ala moeilekheid na grontapoe, ija na ini na universum — ben kon foe na mankeri foe bescheiden fasi. Fa so? We, a ben de foe na mankeri foe bescheidenfasi dati wan séker engel ben tron Satan Didibri. A ben misi foe erken en skotoe leki wan sma di Gado ben meki. Foe di a no ben de tevréde foe na presi di Gado ben gi en meki a ben wani de leki Gado. Bakaten na bigimemre fasi disi ben kon na fesi di Didibri ben pristeri ala kownoekondre foe grontapoe na Jezus efoe na a ben doe soso wan fasi foe anbegi. Ma soleki Jezus ben tjari kon ini na prakseri foe na tesiman dati, dan na anbegi de wan sani foe Jehovah wawan. Na mankeri foe bescheidenfasi foe Satan, di meki a waka na pasi foe bigimemre èn di a e waka ete, ben tjari sjen kon gi en èn a sa wani taki te foe kaba pori gi en. — Mattéus 4:8-10; Hebrewsma 2:14.

9. Na sortoe fasi Eva ben sori mankeri foe bescheidenfasi?

⁹ Na mankeri foe bescheidenfasi ben de sosrefi toe na fadon foe Eva na ’mama foe ibri sma di e libi’ (Genesis 3:20). Na prakseri foe de leki Gado foe sabi boen nanga ogri ben kori en. Foe san-ede? Foe di a no ben sori bescheidenfasi. Efoe a ben tan abi bescheidenfasi, dan te joe loekoe en reti a ben kan taki gi na tesiman: ’Foe san-ede mi ben sa wani foe de leki Gado? Mi de tevréde dorodoro nanga a seti foe Gado, taki mi de wan jepi gi na volmaakti Adam. Boiti foe dati a moro betre mi aksi Adam foe dati, bikasi a ben ferteri mi taki wi no mag njan foe na froktoe disi’. Ma nono, Eva drai baka gi bescheidenfasi. Na ini na tori foe en nanga en Mekiman nanga en masra. En mankeri foe bescheidenfasi, meki Eva lasi en libi èn a ben tjari en masra go so fara foe waka go ini wan pasi di ben de a srefi leki kiri joesrefi. Bescheidenfasi soboen de prenspari? Ija, srefi so prenspari taki wan sma libi e anga foe en! — Genesis 3:1-19.

10. Foe san-ede a de wan moeilek sani gi wi alamala foe abi troetroe bescheidenfasi?

¹⁰ Wi alamala gersi taki wi ben kisi foe wi fosi papa nanga mama wan firi foe sori mankeri foe bescheidenfasi. Na so Gado ben taki na baka na Froedoe: „Na firi foe libisma ati de takroe foe sensi en jongoe jari” (Genesis 6:21). Di kownoe David ben fadon go na ini wan bigi sondoe, a ben kan taki foe dat’ede na tranga begi di e kon gi Gado: „Loekoe! Nanga fowtoe mi mama ben meki mi nanga pen, èn ini sondoe mi mama kisi mi” (Psalm 51:5). Èn foe dat’ede Jehovah Gado nanga mofo foe en proféti Jeremia ben kan taki: „Na ati de wan feradelek sani moro leki ibriwan tra sani èn noti a e loekoe psa. Soema kan sabi en”? — Jeremia 17:9.

11. Sortoe toestand na a heri grontapoe de a bakapisi foe mankeri foe bescheidenfasi?

¹¹ Someni moeilekheid na ini na grontapoe doe kon foe na mankeri foe bescheidenfasi! A abi krakti tapoe ala ras, nationaliteit, lo èn srefi osofamirman. No na oostoe, no na west blok foe naatsi de klari foe erken taki den abi skotoe. Ala toe wani de na loktoe. Sma foe na wan ras e firi densrefi moro hé leki di foe wan tra ras. Sma e ferteri srefi taki na stré na mindri bepaalde Afrikan lo nofotron e kon soso foe a sani dati ibri lo e go a fesi foe bewijsi taki a moro hé.

12. (a) Sortoe ogri jeje kon foe di son trowman ben sori mankeri foe bescheiden fasi? (b) San mankeri foe bescheiden fasi foe foeroe oemasma ben abi leki bakapisi?

¹² San wi kan taki foe na mankeri foe bescheidenfasi foe a osofamiri groepoe? Na ini foeroe geval a ben de so dati man èn oema meki trobi kon foe di den no ben sori bescheiden fasi. Foe na tranga di den tranga na skin èn ekonomiasé, meki masra nofotron ben firi foe pré na rol foe macho ofoe pré basi, èn disi abi bigi sari gi na osofamiri leki bakapisi. Sondro degedege disi na wan bisi di e ferklari na opo foe oemasma boewégi foe fri densrefi, pe den e tjari na kragi kon na fesi foe a lobi di mannengre lobi soso densrefi nomo. Ma san wi kan taki foe oemasma èn moro spesroetoe foe oemasma di trow? Den wan di mankeri bescheiden fasi ben kisi foeroetron sari, makandra nanga osofamiri di ben broko (Galaciasma 6:7, 8). Den sortoe oemasma dati ben poti na fundamenti bijbel marki na wan sé taki den: „Moe saka densrefi na den man leki na masra” (Efesesma 5:21-23, 33; 1 Korintesma 11:3, 7-10). A mindri oemasma foe grontapoe joe abi ooktoe wan bigi mankeri foe bescheidenfasi di panja na ala sé foe no libi wan krin libi. Foe di den oemasma disi e waka seri na moifasi foe den na skinfasi nanga a fasi fa den e taki, e weri den krosi, e tjari densrefi meki den moe tjari na frantwortoe ooktoe taki fri seks-demakandra, ontrow na ini na trowlibi nanga osofamiri di broko de wan sani foe a aladé libl.

13. Sortoe froktoe mankeri foe bescheiden fasi ben tjari kon na mindri foe disiten jongoewan?

¹³ Ala di na mindri den disiten jongoesma toemsi moi eksempre foe bescheiden fasi de, tokoe a de taki na fasi disi de fara foe feni na wan sjenfasi na trawan. Foe di foeroe jongoesma no e sori a fasi disi meki den no man abi pasensi nanga den papa nanga mama ofoe den e loekoe fini na fowtoe di sma foe a owroe geslakti e doe. Ma dan na aksi e kon na fesi: Son wan foe den jonkoeman disi e sori taki den abi sortoe koni, efoe a e go foe de wan srafoe foe drug, droengoe, rij leki wan lawman ofoe go na ini wan hoeroedoe libifasi? Efoe den sortoe jongoesma disi ben sa de nanga bescheidenfasi dan den ben sa arki na den papa nanga mama foe den èn njan boen foe den boen rai di den sortoe sma disi di abi ondrofeni kan gi.

Kristen bescheidenfasi e sori troetroe koni!

14. Foe san-ede meki bescheidenfasi fiti so na ini wi matifasi nanga Jehovah Gado?

¹⁴ A sori foe kristen bescheidenfasi de troetroe na pasi foe koni. Na ini na fosi presi a e tjari boen matifasi kon nanga Jehovah. Gado e aksi foe wi taki wi waka nanga en na wan bescheidenfasi (Micha 6:8). Boiti foe dati a de so taki bescheidenfasi fiti srefsrefi foe na sé foe wi te wi e denki na a bigi olo di de mindri wi nanga wi Almakti èn Tégo Mekiman. Den naatsi de gi en soso leki na fini stof tapoe na wegi èn leki soso wan dropoe watra di e fadon komoto foe wan emre! (Jesaja 40:15). Bescheidenfasi sa meki taki wi frede foe meki Jehovah Gado atibron, èn dati de troetroe „na bigin foe koni”. — Psalm 111:10.

15. Fa bescheidenfasi kan de wan jepi gi wan kristen brada?

¹⁵ Bescheidenfasi e meki boen matifasi nanga kompe kotoigi foe Jehovah kon go na fesi. A sa tapoe wan kristen brada foe poesoe ensrefi foe go na fesi ini a tori foe grani foe dienst. Bescheidenfasi sa meki a kon ferstan en skotoe èn poti go boen ini en ferstan dati te a teki trawan gersi nanga en na ini bepaalde fasi a abi mendri sabi nanga ondrofeni. A sa meki ooktoe taki moro foeroe a sa broko en ede foe gro na ini jejefasi leki foe si foe kisi nomo na wroko foe wan dinari na ini na diniwroko ofoe owroeman. Efoe a e tan gebroiki dorodoro ibri okasi foe gro na ini sabi èn jepi en kompe-prékiman, dan a kan de wan verrassing gi en srefsrefi te den rikomanderi en foe wan positsi foe frantwortoe na ini na gemeente èn den poti en na ini na wroko. Disi moro leki wan tron ben de troetroe so.

16. Foe san-ede a de wan sori foe koni te kristen oema e sori bescheidenfasi?

¹⁶ Bescheidenheid de sosrefi toe na pasi foe koni gi den sisa ini na gemeente. Disi no de wawan ini na afersi foe libi wan krin libi, o prenspari disi kan de ooktoe (1 Timotéus 2:9, 10; Titus 2:3-5). Wan kristen oema di e ferstan den skotoe foe en, èn a rol di a kisi ini a gemeente sa sori koni foe dwengi en mofo na ini ala bescheidenfasi. A sa kibri ensrefi foe no taki foeroe èn foe feni fowtoe na tapoe a fasi fa owroeman di den poti e doe sani. — Teki gersi Judas 8, 9, 16.

17, 18. (a) Foe san-ede meki-jongoewan moe sori bescheidenfasi gi den papa nanga mama? (b) Sortoe eksempre foe a bijbel e gi dja foe sori taki a de wan koni sani foe poti prakseri na tapoe na rai foe owroe sma?

¹⁷ Sosrefi toe bescheidenfasi foe na sé foe jongoesma de wan sori foe koni. Jongoesma e meki trwan lobi den te den e tjari densrefi nanga bescheidenfasi. A Wortoe foe Gado nanga reti e komanderi taki den moe respeki den papa nanga mama èn e gi den jesi „na ini ala sani” (Kolossesma 3:20; Efesesma 6:1-3). A e aksi bescheidenfasi foe doe dati èn no foe denki taki jongoesma moro koni leki den papa nanga mama. Èn joe moe taki tangi na joe mama nanga papa? Den ben meki joe kon gebore. Foe sensi na momenti dati te leki now joe papa nanga mama ben sorgoe foe njanjan, krosi, oso foe tan, leri, ontspanning nanga jeje leri. Respeki wawan foe dat’ede no ben sa kan tjari joe go so fara foe sori bescheidenfasi?

¹⁸ Na ini bescheidenfasi fertrow joe papa nanga mama sani foe joe èn teki na rai foe den, na a pasi foe koni. Nanga na ondrofeni di den abi meki den de moro koni leki joe. Na ini grontapoe soso broeja de, no foe di mankeri foe sabi de, ma foe di mankeri foe troetroe koni de. „Den ben trowe a Wortoe foe Jehovah, dan sortoe koni den sa abi dan?” (Jeremia 8:9) Srefi na ini so wan persoonlek afersi leki na teki foe joe patna foe a libi joe sa doe koni efoe joe de bescheiden èn sori taki joe e respeki a wan joisti fasi na kroetoe foe joe papa nanga mama, foe di den lobi joe èn di den abi na moro boen belang foe joe na prakseri. Den kan gi joe moro betre rai leki den sma foe joe libiten. Ija, a rai foe den kande no sa de so switi gi joe, ma a sa de moro boen gi joe. Na bijbel e sori taki kownoe Rehabeam foe owroeten ben lasi na moro bigi pisi foe en kownoekondre foe di a ben mankeri bescheidenfasi. A ben trowe na rai foe den owroeman di ben de den raiman foe en papa, èn a ben teki na switi rai foe den sma foe en libiten, den jongoeman di ben kweki makandra nanga en. Den ben de sondro ondrofeni èn nanga wan sjatoe loekoe foe sani leki en. — 1 Kownoe 12:1-24.

19. Fa bescheidenfasi kan kon na a joisti ten te wi e gi kotoigi?

¹⁹ Kristen bescheidenfasi sa jepi wi boen te wi e gi kotoigi ofoe okasi kotoigi foe na nen nanga na kownoekondre foe Jehovah Gado. Efoe wi ben sa taki nanga bigi sékerfasi foe wisrefi, dan tapoe son arkiman wi ben kan meki indruk kande ma wi ben sa kan troesoe foeroe trawan. Alaten wi moe poti na prakseri na tapoe Jehovah, no tapoe wisrefi. Na ini a tori disi na rai die kon now, e fiti srefsrefi: „Santa na Kristus leki Masra na ini joe ati. De alaten klarklari foe verdedig joesrefi na fesi foe ibriwan sma di e aksi wan réde foe joe foe na howpoe di de na ini joe, ma doe disi nanga safrifasi nanga dipi respeki” (1 Petrus 3:15). Bescheidenfasi sa meki en moro makriki foe sori safrifasi èn dipi respeki.

20. (a) San wi ben leri te so fara foe bescheidenfasi èn mankeri foe bescheidenfasi? (b) Sortoe aksi de ete?

²⁰ Na ini san wi taki dja na fesi wi kan si krin taki libisma ben kisi bigi ogri foe na mankeri foe bescheidenfasi. Wi ben si ooktoe taki bescheidenfasi de na pasi foe koni srefsrefi. Den punt disi e jepi wi foe de bescheiden. Ma sortoe jepi wi kan kisi ete foe sori taki wi de becheiden kristen?

Joe kan memre disi ete?

◻ Foe san-ede Jehovah Kotoigi moe abi wan tra loekoe leki na grontapoe tapoe na tori foe bescheidenfasi?

◻ Fa wan sma ben sa kan de nanga sakafasi, ma tokoe de sondro bescheidenfasi?

◻ Foe san-ede a e moeiliki wi foe de troetroe bescheiden?

◻ Foe san-ede a de wan sani di fiti taki wi de bescheiden na ini wi matifasi nanga Jehovah?

◻ Fa bescheidenfasi kan jepi wi na ini wi prékiwroko?

[Prenki na tapoe bladzijde 2]

Jezus ben doe na wan respeki fasi san en hemel Tata ben komanderi en foe doe

[Prenki na tapoe bladzijde 4]

Kristen respekifasi e meki boen matifasi nanga Gado nanga wi kompe kotoigi foe Jehovah doe kon