Wi tjari kon na wan ini anbegi na ondro wi Herder-kownoe
„Disi Masra Jehovah ben taki: ’Loekoe, mi e teki den manpikin foe Israël poeroe . . . , èn wán kownoe den alamala sa kisi leki kownoe.’” — EZECHIËL 37:21, 22.
1, 2. (a) San de toe pisi oedoe foe Ezechiël 37:16 e agersi? (b) San ben psa nanga den toe „pisi oedoe” disi?
KOWNOEKONDRE-WANFASI wi e taki. Èn dati e klop precies nanga na laatste pisi foe kapitel 37 foe Ezechiël profétitori. Drape, na ini vers 16, Jehovah e taigi Ezechiël dati a moesoe teki toe pisi oedoe. Na tapoe a wan a moesoe skrifi: „Gi Juda èn gi den manpikin foe Israël, en patna.” A tapoe na trawan a moesoe skrifi: „Gi Jozef, a pisi oedoe foe Efraïm, èn na heri oso foe Israël en patna.” Den pisi oedoe disi e teki na presi foe san?
2 Den e teki na presi foe den toe pisi foe na kownoekondre foe Israël, di prati na ini Juda, na ini Zuidsé èn Efraïm na ini noordsé. Ala toe pisi ben go ini katibo — na noordsé kownoekondre na ini 740 b.G.T. èn na zuidsé kownoekondre na ini 607 bifo G.T. Ma na ini 537 bifo G.T. wan fikapisi foe ala twarfoe lo foe Israël ben drai go baka na Jeruzalem, foe meki na wánfasi anbegi foe Jehovah kon boen baka drape. Fa disi e kon na fesi na ini na profétitori foe Ezechiël?
3. San ben moe de na mindri a pipel foe Gado di ben kon boen baka, soleki kon na fesi na ini Ezechiël 37:19?
3 Arki pikinso na den wortoe foe Jehovah gi Ezechiël, ini vers 19:
„Taki dan gi den: ’Disi na Masra Jehovah ben taki: „Loekoe, mi e teki na oedoe foe Jozef, di de na ini na anoe foe Efraïm, èn den lo foe Israël, en patna èn mi wani poti den na tapoe, dati wani taki, a tapoe na oedoe foe Juda, èn mi sa meki den oedoe kon tron wan pisi oedoe, èn den moe kon tron wán na ini mi anoe.”’”
Wán fasi ben moesoe de a mindri Jehovah pipel di ben drai go baka na den kondre!
Wi tjari kon na wan ini anbegi
4. Fa Ezechiël 37:21 ben kon troe na ini (a) 537 bifo G.T.? (b) ten di no psa so langa ete?
4 A pipel foe Gado no ben sa prati moro langa ini toe naatsi, nanga banti foe getrowfasi di ben prati na mindri na noordsé èn na zuidsé kownoekondre, ma den ben sa tron troetroe „wan naatsi ini na kondre”. Ezechiël e taki tapoe na komando foe Jehovah trowstoe wortoe gi den:
„Èn taki gi den: ’Disi Masra Jehovah ben taki: „Loekoe, mi e teki den manpikin foe Israël poeroe a mindri den naatsi pe den ben go, èn mi wani tjari den foe lontoe kon na wan èn tjari den kon na tapoe den gron . . . èn wan kownoe den alamala sa kisi leki kownoe”’” (Ezechiël 37:22).
Neleki fa den wortoe disi ben kontroe na tapoe na fikapisi foe Israël di ben tjari kon na wan di den ben drai baka komoto foe katibo na ini 537 bifo G.T., na so na disiten fikapisi foe den salfoe Kotoigi di ben kon boen baka e ondrofeni na prisiri foe de wán na ini na paradijskondre foe den foe jeje go na fesi — Loekoe ooktoe Ezechiël 36:33-36.
5. Fa na pipel foe Gado ben kon krin foe doti libi?
5 Na a srefi ten a pipel foe Gado ben kon krin foe ala jeje dotifasi di a grontapoe makti foe falsi religie foe Satan, „Babylon na bigi bigiwan”, ben tjari kon (Openbaring 17:5; 18:2, 4). Na fri di den kon fri foe falsi kerkileri èn gwenti de na disiten kontroe na wan moro bigi fasi foe na profétitori di na ini pikinfasi ben kontroe na tapoe den Israëlsma foe owroeten di ben tjari kon baka na ini na kondre foe den komoto foe na katibo na ini na letterlek Babylon:
„Èn den no sa doti densrefi moro langa nanga den kroektoe gado foe den èn nanga den tegoe sani foe den èn nanga ala den pasa di den e pasa na wet; èn séker mi sa ferloesoe den komoto foe ala den tanpresi pe den ben sondoe, èn mi wani krin den, èn den moe tron mi pipel, èn misrefi sa tron a gado foe den” — Ezechiël 39:23.
6. (a) Foe san-ede meki na jeje Israël e prisiri now na ini fertrow demakandra nanga en Gado? (b) Sortoe wánfasi wi moe tan hori awinsi wan sma drifi komoto foe na waarheid?
6 A pipel foe Jehovah di ben kon boen baka ben trowe den tegoe afkodré foe den fasi foe anbegi foe na kristenheid èn na heidendom. Den no e anbegi morolanga mekisani noso e waka na baka na gwenti foe den grontapoe fasi foe anbegi, soleki na hori foe „féstidé” di e afrontoe Gado. Na anbegi foe den no de tapoe dri gado na ini wan, na sokari gado fasi foe wan kibritori Driwanfasi, ma den tjari kon na wan leki na wán pipel di e anbegi na wán Gado Jehovah. Na ini wánfasi den e prijse na soeverein Masra foe na universum èn disi e tai den makandra foe tron wán wánfasi di no wan tra pipel na grontapoe sabi! (Jesaja 52:8) Awinsi wan fosten patna meki wan takroe konsensi gro na ini en èn a drifi komoto foe na waarheid patron di Jehovah ben gi, wi e tanapoe leki wan man nanga na organisaatsi foe Gado na ini en wroko èn ini na diri matifasi nanga wi Gado. — Odo 3:32; Hebrewsma 10:22, 23.
Erken na kownoe
7. Sortoe tra krakti di e tjari sani kon na wan boiti na troe anbegi, a pipel foe Gado e kisi leki pramisi?
7 Di na Israël foe owroeten ben tjari kon baka na ini en „kondre”, dan na troe anbegi ben de a mindri den wan krakti di ben tjari sani kon na wan. Ma na kownoekondre no ben kon baka. Foe san-ede Jehovah e taki na ini den vers 22 nanga 24 foe Ezechiël 37 foe wan „kownoe”? Den vers 24 nanga 25 e taki:
„Èn mi knegti David sa de kownoe tapoe den èn wán herder den alamala sa kisi èn na ini mi kroetoe bosroiti den sa waka èn mi wet den sa hori èn troetroe den sa doe den. Èn den sa libi troetroe ini na kondre di mi ben gi na mi knegti, na Jakob, pe den fosten tata foe joe ben libi na ini, èn den sa libi na ini troetroe, den nanga den manpikin èn den manpikin foe den manpikin te ten di no abi marki, èn David, mi knegti, sa de na edeman foe den te ten di no abi marki.”
8. (a) Foe san-ede meki den vers disi e tjari kon na tapoe na jeje Israël? (b) Fa wi kan sabi soifri na ten foe na kontroe?
8 Na pisi dati foe na profétitori noiti kon troe na ini na Israël na skinfasi èn dati no sa psa noiti. Foe dat’ede a moesoe kontroe na tapoe na jeje lsraël. Ma oten a ben kon troe? We, oten wan kownoe ben kon sidon baka na tapoe na troon foe David, di ben abi na wettelek „reti” a tapoe? Disi ben psa na a kaba foe „den faste ten foe den naatsi” na ini na jari 1914 di no psa langa ete. Di den ten foe den heiden ben kon na wan kaba dan „na kownoekondre foe grontapoe ben tron na kownoekondre foe wi Masra” Jehovah, di sa „tiri leki kownoe tégo alaten”, èn ooktoe „foe en Kristus”, na Sma foe soema David ben de wan agersi prenki. — Ezechiël 21:26, 27; Lukas 21:24; Openbaring 11:15.
9. Sortoe toe sani de now wan troetroe sani di e tjari sani kon na wan?
9 Wi, leki Jehovah Kotoigi, no tjari kon na wan soboen nomo nanga jepi foe na troe anbegi — o prenspari na anbegi dati de toe — ma wi tjari kon na wan foe di wi tjari kon na wan na ondro wi ’edeman’, wi kownoe! Èn na anbegi foe wi èn na kownoekondre de wan troetroe sani gi Wi. Èn ala toe e tjari wi kon na wan na ini wi bradafasi na a heri grontapoe.
10. (a) Fa wi e si wi Herder-kownoe? (b) Fa wi e doe Jehovah „kroetoebosroiti”?
10 Èn fa wi lobi na kownoe foe wi! Gi wi alamala a de wan „herder” — wan boen-ati herder di e tjari wi go na watra foe tégo libi. A sabi ibriwan foe wi na wi nen èn a abi belangstelling gi wi foe tjari wi go na dorosé èn tjari wi go na switi jejegron foe njan grasi. Ma neleki den skapoe foe wan ipi wi moe tan na wan, ’e waka na ini Jehovah kroetoe-bosroiti’. Wi moe tan aparti foe den dri pisi foe Satan organisaatsi di wi o kari now: en pori politiek, en gridi bisnis jejefasi èn en afkodréfasi foe anbegi. Foe di wi e prisiri na ini na srefi wánfasi leki di ben de a mindri Jezus nanga en fosten discipel, meki wi kan sori taki wi no de „wan pisi foe na grontapoe”. Èn disi wani taki toe dati wi e tan farawe foe na hoeroedoe libi foe na grontapoe (Johannes 17:14, 16, 20, 23; 18:36). Pratifasi no mag de na oen mindri, bika wi e hori Jehovah wet èn ’en doe den troetroe’.
11. Fa na libifasi foe wi de tra fasi leki di foe den kerkiman foe na grontapoe?
11 Fa na libifasi disi de krinkrin trafasi leki di foe den kerkiman foe na grontapoe! Na den, joe kan doe gewonlek ala sani. Den e feni na libifasi foe na maatschappij nanga en moreel dotifasi, pe ala sma kan doe san a wani, boen. Foeroetron den abi difrenti markitiki gi difrenti pisi foe na grontapoe. Na ini den kondre pe sani e go boen na fesi dan den e hori densrefi na a seti foe wán man — wán oema; na wan tra pisi foe na grontapoe den e meki sma di abi foeroe oema tron wan memre foe na kerki (Teki gersi Mattéus 19:4-6; 1 Timotéus 3:2, 12). Ma wi di tjari kon na wan na ondro na Herder-kownoe Kristus, ben hori wisrefi na ini ibri pisi foe na grontapoe na den bijbel wet nanga gronprakseri. Èn te naatsi di e opo go feti, dan wi e wégri foe kiri wi brada na ini wan tra naatsi, bika na ini Jesaja 2:3, 4 tanapoe: „Den no sa leri feti moro.”
12. Fa wi e sori taki wi tjari kon na wan „leki skapoe” na ini na koi?
12 Na wánfasi foe na fikapisi foe den jeje Israëlsma e kon moi na fesi na ini na tekst di de ini Micha 2:12, pe Jehovah e tjari kon na fesi: „Na ini wánfasi mi sa poti den, leki skapoe na ini na koi, leki wan ipi leti na mindri den sabana; a sa monjo foe libisma.” Disi de wan sani di wi e si na tapoe congres foe Jehovah Kotoigi: Doesoendoesoen sma di sidon e arki nanga ala prakseri èn na wan korostoe fasi, èn di séker no wani misi no wan wortoe toe na jeje njanjan di den e njan na ondro na Herder-Kownoe Jehovah nanga en Herder-kownoe. Na salfoe fikapisi nanga den tra skapoe — sma foe Azië, blaka sma, weti sma — den de alamala wán. Den congres foe wi, wi kringkomakandra èn wi gemeentekomakandra de wan bewijsi di no wan sma kan poti na wan sé, dati kownoekondre-wanfasi de now wan troetroe sani!
13. Fa ini na tori foe na ipi wi kan taki dati ’a e monjo foe libisma’?
13 Ma fa a de nanga den wortoe foe Micha: „A sa monjo foe sma”? San wi ben jere na fesi èn na baka foe den komakandra nanga congres foe wi? We, wi e jere na njoengoenjoegoe foe prisiri ma di e taki nanga makandra, bika a ini switi taki makandra wi e meki trawan ondrofeni na prisiri foe wi èn wi e taki foe na dienst foe wi Gado. Èn na ini na grontapoe gemeente a e ’monjo’ toe na a fasi disi dati a e gro ala ten nomo; foe di njoen gemeente e opo, meki na wanfasi prijsesingi gi Jehovah na a heri grontapoe e gro moro na ini krakti. — Psalm 96:1-3.
14. Gi eksempre foe fa na hrontapoe poti prakseri na tapoe na wánfasi foe wi?
14 Na prisiri wánfasi disi, leki di foe wan ipi na ini wan koi, no de wan sani di na grontapoe no e si. Na ten foe na „Kownoekondre-wánfasi”-districtcongres foe Jehovah Kotoigi na ini 1983 foe eksempre skowtoe na ini Taegu (Korea) ben seni tapoe na fosi dé dritenti skowtoe go na a congres, ma di den ben si na boen orde èn ben si fa Jehovah Kotoigi a dorosé ben seti na verkeer, dan den ben seni den dri tra dé soso toe skowtoe nomo. Na ini Taejon na man di e loekoe a zaal ben taki: „A gersi leki hemel e poesoe oenoe, — disi na wan kefarlek moi sani.” A ben taki a sani pikinso psa marki, ma a ben meki krin san a ben bedoel! Ini Rangoon (Birma) wan memre foe na komte foe na Ghandi Hall ben taki: „Efoe na ini na heri grontapoe sma e libi nanga makandra soleki oenoe e doe, dan den problema sa komoto foe grontapoe.”
Jehovah „verbontoe foe vréde”
15. Sortoe vréde di wi wani Ezechiël 37:26 e skrifi foe en?
15 Troe vréde de foe den di wi Herder-Kownoe Kristus Jezus ben tjari go na boen sabana foe grasi. A de wan vréde di de na bakapisi foe wánfasi, èn na wánfasi dati de séker now wan troetroe sani foe na kownoekondre na ondro Jehovah Kotoigi ini na heri grontapoe. Na wan moi fasi Jehovah e ferteri foe disi ini en wortoe ini Ezechiël na ini kapitel 37 vers 26:
„Èn mi wani sroto wan verbontoe foe vréde nanga den; wan ferbontoe di e tan te ten di no abi marki, mi sa meki doe kon nanga den. Èn mi wani gi den wan presi èn meki den kon foeroe èn poti mi santa presi te ten di no abi marki na mindri den.”!
Vréde nanga Gado! Wan vréde di kan de te foe tégo èn dati doe kon nanga na lobi ofrandi di wi Herder-Kownoe ben tjari di a ben de dja a grontapoe!
16. San meki na ’kon moro foeroe’ foe den „skapoe” kon?
16 Èn now di na jeje Israël ben kon moro foeroe te den doro na nomroe foe 144.000, dan wan bigi ipi „tra skapoe” e djoin den na ini na santa dienst na ini Jehovah santa presi. Wan kaba no e kon na a kon moro foeroe foe den „skapoe” — den de miljoenmiljoen kaba! Na ini na wánfasi na a heri grontapoe den kownoekondreprékiman disi e go oso foe oso. Na publiki anbegi disi de wan troetroe sani èn wani taki wan sani gi wi; a e meki sma kon sabi wi leki a wán enkri pipel di abi belangstelling foe gi grani na Jehovah nen èn foe barwroko gi en kownoekondre foe vréde! Fa wi bréti foe kan teki prati na ini en verbontoe foe vréde!
17. (a) Sortoe wortoe foe gi dek’ati Jehovah e taki ini Ezechiël 37:27, 28? (b) Fa wi sabi dati Jehovah sorgoe foe kibri sma no de soso ini na jeje Israël?
17 Na ini Ezechiël 37 den vers 27, 28 wi e lési den laatste wortoe foe Jehovah di e gi wi dek’ati èn di e taki gi en ipi di tjari kon na wan:
„Èn mi tabernakel sa de troetroe abra den èn troetroe mi sa tron den Gado èn densrefi sa tron mi pipel èn den naatsi sa moesoe sabi taki mi, Jehovah, e santa Israël te mi santa presi kon na den mindri te ten di no abi marki.”
Fa wi bréti taki a kibri foe Jehovah leki wan tenti ben poti abra wi! Na lobi sorgoe disi foe kibri den no de wawan gi na jeje Israël, bika wi e lési foe „na bigi ipi” dati „a sma di sidon na tapoe en troon, sa bradi en tenti abra den”. No wan enkri faja foe Jehovah atibron e kisi den moro. — Openbaring 7:9-17.
18. (a) Fa Jehovah ’e santa’ „Israël”? (b) Fa a doe kon dati na „bigi ipi” ben teki wan regtvaardiki posisi na fesi foe Gado?
18 Fa wi e bréti toe dati Jehovah e libi a mindri na jeje Israël èn e poti en santa presi „te ten di no abi marki” a den mindri. Neleki fa a centrum disi foe anbegi de santa, na so den sma di e kon drape foe anbegi moe de santa, kon tron santa, poti aparti ini a dienst foe den Gado. Den e taki foe den salfoe kristen dati ’den wasi kon krin èn den kon de santa, kon de regtvaardiki na ini na nen foe wi Masra Jezus Kristus nanga na jeje foe Gado’ (1 Korinte 6:11). Èn soleki dja na tapoesé na tekst ini Openbaring 7:9-17 e sori, dan den memre foe na „bigi ipi”, di abi wan grontapoe howpoe, ben wasi „den langa krosi . . . èn den meki a kon weti na ini na broedoe foe na Lam”, sodati den kan doe „dé nanga neti santa dienst gi Gado na ini en tempel”. Fa na dienst disi, di na a heri grontapoe ben tjari sani kon na wan, ben abi leki bakapisi wan kefarlek bigi kotoigi wroko!
19. (a) Fa den sa dwengi den naatsi foe erken san tanapoe na ini Ezechiël 38:23? (b) San wi moe, tan doe nanga wan faste bosroiti na a ten dati?
19 Ma na moro bigi prisiri wi sa kisi ete, te wi e go na fesi a ini kownoekondre-wánfasi, èn doro na sofasi na dé di Jehovah sa regtvaardiki ensrefi. Dan en glori nen sa kon santa, kon soifri foe ala takroe sjen di ben poti na en tapoe. A sa dwengi den naatsi foe de kotoigi foe na ferloesoe foe Jehovah nenpipel. Ma san de moro prenspari, soleki wi Soeverein Masra srefi e taki: „Den sa moesoe sabi taki mi na Jehovah” (Ezechiël 38:23). Meki wi hori dan tranga na kownoekondrewánfasi, di de now wan troetroe sani te leki Jehovah glori nen kon santa troetroe na ini na heri universum!
[Prenki na tapoe bladzijde 9]
Jehovah „ferbontoe foe vréde”, de now nanga en pipel di de na ini wánfasi èn a e gi na djaranti dati sani sa waka boen te na ini na paradijs grontapoe