Vermane èn komando foe na Gado foe na njoen seti foe sani
„Mi ben e hori joe komando èn joe vermane bikasi ala mi pasi de na fesi foe joe.” — PSALM 119:168.
1. Na sortoe fasi vermane e jepi foe meki Jehovah pipel kon kolokoe?
GADO regtvaardiki njoen seti foe sani de krosbé! Jehovah Kotoigi, di lobi en regtvaardiki wet, moesoe kisi fermane foe en Wortoe èn nanga jepi foe en organisaatsi, na tapoe ten te a fanowdoe de foe firi. Bikasi den e teki den fermane foe Gado na ati, den de kolokoe. Den sortoe fermane dati e tjari den foe go soekoe Gado, wan sani di e tjari kolokoe. Na Sranatongo wortoe „fermane” di de wan vertaling foe na Hebrew wortoe ’edoth de wan moro tranga èn krakti vertaling leki „gi kotoigi” (soleki fa a na Griki Septuaginta-vertaling e sori foe na wortoe martúria). A e tjari kon na krin taki Jehovah, te na fanowdoe de foe dati, e tjari kon baka na ini wi prakseri en wet, en komando, order, gebod èn inzettine. Na sowan fasi a e sorgoe taki wi no frigiti den krinkrin. Efoe den sortoe vermane disi no e ferferi oenoe, ma wi e poti den na ini wi libi, dan disi e meki wi kon kolokoe.
2. Sortoe gron na skrifiman foe Psalm 119 ben abi foe di a ben sori so tranga tapoe so meni fermane?
2 Efoe na na kaba foe na di foe féfi jarhondro bifo wi gewoon teri na psalmsingiman ben skrifi, dan a ben abi ala Hebrew Boekoe foe Genesis te nanga Maleachi na en. Na di foe féfi boekoe nen Deuteronomium (Griki Septuaginta-vertaling, soleki fa wi kan si disi a tapoesé dja), sortoe nen wani taki „na di foe Toe Wet”. Leki fa a e sori, dan foe na moro bigi pisi na inhoud foe a boekoe disi den ben e loekoe en leki wan ferklari foe na Wetverbontoe di Jehovah ben meki nanga Israël nanga Mozes leki mindriman. Soboen, Deuteronomium moesoe abi leki wan sani foe memre, fermane, aladi ala tra boekoe foe na bijbel toe abi Gado fermane gi wi.
3. (a) San e kon baka na ini wi prakseri te wi e teki pisi foe den Hebrew Boekoe? (b) Fa wi kan kisi wan moro bigi kolokoe leki na kolokoe di na psalmsingiman ben abi?
3 Den hondrohondro aanhaling foe den Hebrew Boekoe di skrifi ini den Griki Boekoe de leki fermane no wawan foe memre san Jehovah ben leri en pipel ondro na Wet, ma sosrefi toe foe en heri moi prakseri di ben abi foe doe nanga kristen gemeente èn na libisma famiri di bai fri. Den disiten discipel foe Jezus Kristus, a Moro bigi Mozes, abi now moro foeroe fermane di e komoto foe Jehovah leki na psalmsingiman ben abi, èn te den e hori densrefi getrow na den dan den ben moesoe de moro kolokoe leki na psalmsingiman. Te den e soekoe Jehovah fermane nanga jepi foe bijbelstudie, dan den e soekoe en troetroe nanga den heri ati.
4. Presi foe a e ferferi oenoe, sortoe fasi foe prakseri foe den fermane foe Gado de na joisti wan nanga san wi e waka na baka na psalmsingiman?
4 Wi moesoe abi warderi gi na sani di e gi wi boen rai èn di e tapoe wi foe no teki prati ini na lot foe den kroektoedoewan. Na psalmsingiman ben prakseri na a fasi dati foe den fermane foe Gado (Psalm 119:24, 119, 167). Ooktoe den disiten Kotoigi foe Jehovah no e ferferi foe di Jehovah Gado ben feni en boen foe vermane den nanga jepi foe den bijbelstudie noso nanga en organisaatsi noso foe memre den na sani di abi foe doe nanga en wet. Na wan loyaalfasi den wani foe hori densrefi na en vermane. „Mi ben tan hori misrefi tranga na joe vermane. O Jehovah, no meki mi kisi sjen.” — Psalm 119:31.
5. (a) Sortoe marki vermane foe Gado Wortoe nanga en organisaatsi e dini? (b) Fa wi persoonlek kan sori na srefi hé respeki gi Jehovah vermane leki na psalmsingiman?
5 Jehovah no e gi en vermane foe meki en Kotoigi kisi sjen, ma nanga den a e kibri den foe wan sjen pasi. Den wani taki na roetoe foe na bewégi foe ati. foe den e go na a sé foe sani di sa de boen troetroe ini ala ten di de na wi fesi; foe dat’ede den e begi makandra nanga na psalmsingiman: „Meki mi ati kon foe de so foe teki joe vermane, èn no foe kisi wini” (Psalm 119:36). A no de foe ferwondroe taki den no wani lasi den sani disi di e tan abi winimarki, foe di den e kon kowroe ini den bijbelstudie noso ini na konmakandra dorodoro nanga Jehovah pipel di gi densrefi abra (Psalm 119:111). Foe di den lobi Gado nanga den heri sili, meki dati e tjari den foe doe so. Nanga aladi a kan wani taki taki den kisi boen stéfi pir’ai, Jehovah Kotoigi tokoe e prisiri taki Jehovah e tjari den tapoe en pasi foe vermane foe di a e kibri den foe no laspasi èn lasi gwe foe tégo: „Ini na pasi foe joe vermane mi ben feni prisiri foe troe, neleki abra ala warti sani.” — Psalm 119:14.
6. Fa Jehovah Kotoigi e meki moeiti foe de eerlek nanga densrefi na fesi foe Gado?
6 Nanga aladi Jehovah Kotoigi ben ondrofeni hebi kritiek foe sma foe di den ben meki fowtoe èn foeroe ben libi den gwe srefi, den de na fesi foe den Gado eerlek nanga densrefi. Den wani waka na pasi di en boekoe foe vermane e poti a den fesi. A disiten historia foe den e sori taki den ben doe neleki fa na psalmsingiman foe owroeten ben doe: „Mi ben prakseri foe mi pasi, foe drai mi foetoe kon baka na joe vermane” (Psalm 119:59). Nomo te den e doe disi den kan begi Gado foe hori den na libi foe tan doe na wroko di a komanderi foe doe nanga aladi den abi den féjanti di e soekoe broedoe (Psalm 119:88). Foe di den e taki taki den de Gado srafoe — foe di den gi densrefi abra na en nanga jepi foe Kristus — èn den e èrkèn taki den moesoe ferstan na troe méne foe san a ben meki den skrifi na ini en Wortoe, den e taki: „Mi na joe knegti. Opo mi ferstan sodati mi kan sabi joe vermane.” — Psalm 119:125.
7. San de den réde foe abi tangi, èn foe san den e begi?
7 Den sani san Gado ben tjari kon na krin gi den sensi na kaba foe na Fosi Grontapoe feti ini 1918, de so wan ferwondroe sani gi den dati den wani doe san den sani disi e meki den kon ferstan (Psalm 119:129). Jehovah Gado abi ala reti foe tjari en vermane kon na ondro wi prakseri èn foe poti den leki komando gi wi. Wi e prisiri foe èrkèn disi ini begi nanga den wortoe foe na psalmsingiman: „Joe ben gi joe vermane ini regtvaardikifasi èn na ini getrowfasi psa marki” (Psalm 119:138). Wi de grantangi foe di wi abi so wan getrow Gado!
8. Na sortoe fasi tégo libi didon na a horitan èn ondrohow foe Gado vermane?
8 Ini a ten disi Jehovah Kotoigi e ferstan heri boen taki tégo libi ini Jehovah regtvaardiki njoen seti foe sani den kan kisi wawan te den e ferstan den sani di a wani den moesoe kon sabi èn di baka dati den moe libi akroederi den soleki fa a moesoe de (Psalm 119:144). Ini wan féjanti grontapoe den ben abi foe begi na Gado, na Jereman foe begi foe fri den komoto foe situwasi di e tapoe skreki gi sma, spesroetoe ini den dé disi pe ala naatsi e tjari kon na wan gi na „feti foe a bigi dé foe Gado na Almaktiwan” na Har-mágedon (Openbaring 16:13-16). Na begi di e kon now fiti troetroe: „Mi ben kari joe. O jepi mi! Èn mi sa ondrohow joe vermane.” — Psalm 119:146.
9. Sortoe sékerheid wi abi taki gadofasi vermane alaten sa de foe wi kan abi den?
9 Ala di ala den skrifi vermane foe Jehovah Gado ben skrifi èn „seti” kaba tinanégihondro jari psa kba nanga a kon klari foe a bijbel di abi ala nanga ala 66 boekoe tog den de foe kisi ini a ten disi èn den sa tan foe wi kan gebroiki den te ten di no abi marki di de na wi fesi ete. Den wortoe di taki gi Gado ini Psalm 119:152 sori taki den de troe: „Langa ten psa mi ben kon sabi wantoe foe joe vermane, bikasi foe ten di no abi marki joe ben seti den.” Nanga na sabi di den ben abi foe wantoe foe den vermane foe Jehovah den ben bigin nanga na tjari kon na doro foe na tijdschrift Zion’s Watch Tower and Herald of Christ’s Presence. Tide na dé a tijdschrift disi, baka di a e kon 105 jari kaba na doro, te now ete den e prati en, ma now abra na heri grontapoe ini 102 tongo. Aladi kande den féjanti foe Jehovah Kotoigi e kisi permisi foe tapoe na tjdschrift disi foe wi kan prati en, den noiti sa man foe meki na bijbel, na ini san Jehovah vermane tanapoe di abi den roetoe tapoe wan tégo noso te ten di no abi marki fundamenti, lasi gwe.
Doe den komando foe A Sma di de Moro hé leki wi
10. Fa Psalm 119 e meki na prensparifasi foe Gado „komando” kon boen na fesi?
10 Bakadi na Psalmsingiman ben taki na wan prisirifasi foe den toe fosi vers foe en psalm foe na kolokoe foe den sma di e waka nanga Jehovah èn di e poti prakseri tapoe en vermane, a e taki moro fara: „Troetroe den no ben doe onregtvaardikifasi. En pasi den ben waka na tapoe. Joe joesrefi ben gi joe komando na wan komanderifasi, sodati den hori den soifri” (Psalm 119:3, 4). Ini na psalm disi na sma di meki en e gebroiki a wortoe „komando” 21 tron, leki wan jepi foe tan hori den na ini prakseri.
11. (a) Foe san-ede na psalmsingiman ben loekoe boen fa a ben tjari ensrefi, soleki e kon na fesi na ini Psalm 119:168? (b) Sortoe prenspari méne de ini a wortoe „komando”?
11 Na psalmsingiman ben ferteri fa a ben prakseri foe den „komando” foe Gado disi èn san a ben doe na a sé foe den. Na a fasi disi a ben de leki wan betrouwbaar eksempre gi wi ini a ten disi. A ben sabi taki Gado ben e loekoe a fasi fa a ben e libi, èn taki a ben moesoe loekoe boen fa a ben e libi na ondro Gado Wetsverbontoe. „Mi ben tan hori joe order èn vermane, bikasi ala mi pasi na joe fesi den de” (Psalm 119:168). Vermane di e memre wi na Gado wet, e troesoe wi foe memre sani, ma komando de sani foe sori na pasi di wan sma di de moro hé e gi wan sma di de na en ondro. Na ini dati den e sori san wan knegti, srafoe, wrokoman noso sroedati di moe doe en prekti getrow èn fa a moesoe doe en wroko. Komando de sani di de moro krakti leki order èn na Hebrew wortoe di den vertaal so, namkoe piqudím, wani taki „sani di seti so; opdracht”. Den komando disi foe Gado ben gersi na psalmsingiman leki den ben de wan hebi noso den ben meki a tegoe gi den, spesroetoe te sma ben gi en pornen noso sma ben taki kroektoe foe en foe di a ben e hori ensrefi na den? Meki wi arki en: „O loekoe taki mi ben lobi joe komando. O Jehovah hori mi na libi na ini joe lobi boenfasi.” — Psalm 119:159, 169.
12, 13. (a) Fa na markitiki di na psalmsingiman ben poti ben meki den dienstknegti foe Gado ben kan psa den tesi ini èn na baka foe na Fosi Grontapoefeti? (b) Nanga aladi den ben kon morsoe nanga ’létori’, soema komando den sma foe na fikapisi e gi jesi na den?
12 Fa disi ben de wan heri moi fasi foe prakseri foe sani di na psalmsingiman ben seti dja gi troe kristen di ben sroiti den srefi na Jehovah organisaatsi di ai kan si èn di e libi a mindri foe a grontapoe disi di foeroe nanga kroektoedoe èn di de sondro lobi! Foe libi na sowan fasi ben tjari winimarki. Ini den birti pe den e libi di foeroe nanga féjanti foe den Gado den e firi densrefi netsoleki na psalmsingiman — leki wan „dorosésma” (Psalm 119:19, 54). Tokoe den e firi taki noti no de so leki na joisti libi kroederi den regeling foe Gado. Di na Fosi Grontapoe feti ben e feti ini 1914-1918, pikinsomoro den no ben psa na pori libilibi. Ini den jari dati foe na krasi foe a feti den féjanti ben graboe den moro héman foe Jehovah organisaatsi di ai kan si foe den kan meki na pori foe Jehovah pipel kon moro gaw, èn den ben go so fara dati den ben sroto srefi na presidenti èn tra troetroe frantwortoe man tapoe na edekantoro foe na Watch Tower Bible and Tract Society sondro taki den ben abi fowtoe. Na ondrofeni ben de leki san Psalm 119:69 e ferteri: „Den prefoeroesma ben morsoe mi skin nanga létori. Mi foe mi sé, nanga mi heri ati mi sa hori joe komando.” A Moro Hé Gado, na sma di de na den tapoe, den moe gi jesi presi foe den ben gi jesi na libisma, di de djaso na gron na tapoe Gado foetoebangi.
13 Ija, di na Fosi Grontapoefeti ben doro en hémarki dan den féjanti ben prakseri, te joe ben sa loekoe dorosé sani di ben e sori leki sani ben waka boen gi den foe troe di den ben opo tége den sma di ben e hori Gado komando dati den ben de so fara foe pori Gado pipel di e gi jesi èn di ben gi densrefi abra na en. Den sma disi ben kan taki soboen: „Pikinmoro den ben sa kan pori mi komoto foe grontapoe, ma misrefi no ben libi joe komando” (Psalm 119:87). Na Moro Héwan foe na universum ben meki na lagi barki foe den prefoeroe féjanti go pori.
14. Na sortoe fasi na fika pisi ben kan taki den wortoe foe Psalm 119:45?
14 Baka di den ben kon fri baka a feti, den ben firi na fanowdoe foe soekoe den komando foe Gado soleki noiti a fesi, sodati den ben kan leri san a ben seti gi den foe doe ini a ten foe vréde di den no ben froewakti. Den ben kan taki den wortoe foe na psalmsingiman: „Èn mi sa waka lontoe na wan bigi presi, bikasi mi ben soekoe joe komando.”
Now èn te na ini a ten di de na wi fesi
15. (a) Sortoe fasi foe prakseri, di de na ini Psalm 119, Gado pipel ben meki a tron na di foe den? (b) Foe doe san den ben poti den prakseri sensi 1919?
15 Now di na kownoekondrewroko foe den panja lontoe go na den kabapisi foe grontapoe, dan den féjanti foe den kon moro foeroe. Ma disi no e frede den foe poti Gado komando na wan sé. Nanga wan faste bosroiti den e tan hori densrefi na den (Psalm 119:93, 94). Bikasi den no kon tron frigitiman di e jere na Wortoe foe Gado san abi na ini toe en positieve komando, ma foe di den tron doeman foe na wroko foe en, san den ben kan taki sondro foe meki bigi, nanga san den e gi Jehovah grani? San e kon now: „Nanga moro ferstan leki owroe man mi e tjari misrefi, bikasi mi ben hori joe égi komando” (Psalm 119:100, 104). We foe sensi na bakajari foe na oorlokoejari 1919 den no ben broko den ede nanga den plan noso regeling foe den naatsi. Sondro foe degedege wan momenti srefi, den ben meki bekenti taki na kownoekondre foe Gado di Kristus e tiri na ini de na wán howpoe èn na wan enkri wan gi na libismafamiri èn dati na grani disi na no wan fasi kan go na na Volkenbond èn en disiten opvolger, na organisaatsi foe den Verenigde Naatsi. Fa disi e sori taki den abi „ferstan”!
16. Nanga aladi den e kwinsi wi foe doe san de kroektoe, san wi sabi séker?
16 Te Gado Wortoe e taigi wi, di e libi now ini a ten disi foe den Verenigde Naatsi, foe no abi lobi gi na grontapoe èn den sani na ini dan a e tjari den komando foe Gado di de gi wi kon abra na wi. Wi moe loekoe den leki joisti èn dati wi e doe toe, bikasi den de boen foe troe! Wi e tanapoe na baka na standpunt di skrifi na ini Psalm 119:128: „Foe dat’ede meki mi ben loekoe ala den komando foe ala sani leki joisti; ibri lépasi mi ben abi bita-ati gi.” Foe di wi teki wan standpunt pe degedege no man kon, meki den grontapoe sma e brok’ai gi wi, ma san de prenspari de a fasi fa Gado e feni wi. Èn foe dat’ede meki wi no wani frigiti en order. — Psalm 119:141.
17. San de den sani di wi abi na wi fesi foe kon ete, èn fa wi sa feni kibri foe Gado te den gensman e lontoe Jehovah pipel?
17 Nanga aladi na kownoekondre foe Gado ini anoe foe Kristus leki na wan enkri howpoe foe na grontapoe foe libisma ben préki kaba sowan 60 jari fajafaja, dan tog, den sma di moesoe studeri den grontapoe-afersi èn meki plan foe dati, no e poti prakseri na tapoe dati. Now wi abi foe doe nanga na skreki taki na heri libismageslakti kan fiti poeroe foe na grontapoe nanga wan oorlog nanga atoomfetisani. Ete wan sani e kon now toe èn dati de taki sma no e lobi kerkisani èn dati e meki sma ati e kon moro nanga moro bita. Te ala sortoe foe falsi religie pori gwe, dan den féjanti foe Gado sa abi foe loekoe san den moesoe doe nanga Jehovah Kotoigi. Te den kontra-religie ferfolgoeman foe Gado kownoekondre lontoe den kotoigi foe Jehovah di tan na libi ete, dan den disi leki noiti a fesi ben sa abi jepi di de moro hé leki di foe libisma fanowdoe. Den sa moesoe ben de na ondro na kowroepe foe wan almakti anoe, Gado anoe. Den sa moesoe abi wan basis tapoe san den sa kan aksi taki na gado anoe dati kon jepi den, soleki skrifi na ini Psalm 119:173: „Meki a de so taki joe anoe de foe jepi mi, bikasi mi ben verkiese foe hori joe komando.” Ondro den troetroe tjalansi situwasi dati, Jehovah anoe no sa sori taki a sjatoe toemsi, sodati a no ben sa kan jepi sma di e frede en èn di e hori en komando. — Jesaja 50:2.
18. (a) Foe san-ede a sa didon na den kompe na mindri foe soema wan sma de ofoe a sa psa na kaba foe na seti foe sani disi ofoe a sa pori gwe? (b) Nnaga san wi sa tan de bezig alaten, foe di wi sabi san sa de na bakapisi gi den sma di e frede Jehovah?
18 O moro krosbé wi e kon na na kefarlek kaba foe na seti foe sani disi di kroektoe, èn no abi lobi, wan sani san wani taki toe na kaba foe na wroko di de ini na meki foe wan prati kon a mindri den sma foe den naatsi soleki wan herder e prati den skapoe foe den bokoboko, na ini na gezelschap foe soema wi wani den feni wi dan? Ini a gezelschap foe den sma di agersi nanga bokoboko, di sa koti poeroe foe tégo foe ala libi di de, noso ini a gezelschap foe den sma di agersi nanga skapoe di lobi Jehovah Gado? (Mattéus 25:31-46) A no froekoe toemsi srefsrefi foe teki na joisti sortoe foe gezelschap. A de now na ten foe teki na srefi bosroiti leki na psalmsingiman, di ben taki foe na Moro Héwan: „Mi de wan mati foe ala sma di e frede joe troetroe, èn di e hori joe komando” (Psalm 119:63). Wi sabi san sa de na porsi foe den di e frede Jehovah Gado, èn wi sa wani foe troe foe abi prati ini na pisi disi di e gi satisfaksi, foe prisiri Jehovah srefi. Foe di wi lobi en, meki wi de alaten fajafaja bezig foe doe sani foe plisi en foe di wi e doe san a e aksi foe wi. Na psalmsingiman e tjari wi faste bosroiti kon boen na fesi nanga di a e taki: „Nanga joe komando mi wani hori misrefi bezig foe troetroe, èn mi wani poti prakseri tapoe joe pasi.” — Psalm 119:15.
19. Sortoe wondroe wroko e doe now?
19 Na baka di na ini 1918 wan grontapoe feti ben kaba, na fosiwan foe en sortoe, na Moro Hé Gado ben meki wan wondroe wroko feni presi na mindri foe wan grontapoe di e gens srefsrefi. A de a wroko di a ben komanderi en kotoigi foe doe, dati de na préki foe na „boen njoensoe foe na kownoekondre . . . na ini a heri grontapoe leki wan kotoigi gi ala naatsi”, di abi foe doe nanga na „kaba” foe na seti foe sani disi di owroe kaba doesoendoesoen jari (Mattéus 24:14). Wi wani foe troe foe abi wan prati nanga en na ini en wroko. Wi wani foe doe en wani èn na so fasi wi e aksi en foe meki wi doe en wani. A begi foe wi di e komoto foe wi ati de ten now ete na ini Psalm 119:27: „Meki mi kon ferstan na pasi foe joe komando, sodati mi kan hori misrefi bezig nanga joe wondroe wroko.”
20. Sortoe wan foe den moro wondroe wroko foe Gado moesoe doe ete, èn san den di tan na libi sa taki foe Gado order?
20 Wan foe Gado moro wondroe wroko moro ala trawan, di moesoe psa ete, sa de na wan, di a sa tjari en getrow èn loyaal kotoigi psa na kaba foe na seti foe sani di moesoe kon ete èn tjari den go na ini na Njoen seti foe sani (2 Petrus 3:13). Foe en sé a sa de regtvaardiki te a sa kibri den psa na pori foe na seti foe sani disi di siki foe dede. A sa arki na begi di ben skrifi nanga na wroko foe santa jeje di den e seni go na en: „Loekoe! Mi ben wani abi joe komando foe troe. Tan hori mi na libi na ini joe regtvaardikifasi” (Psalm 119:40). Meki dati de ooktoe joe begi. We, na baka na moro bigi pina, di oiti libisma historia ben kon sabi, ben psa kaba èn joe de, sondro ogri kan miti joe moro, na inisé foe den doro foe na njoen regtvaardiki seti foe sani, dan nanga joe heri ati joe sa taki: „Foe tégo mi no sa frigiti joe komando, bikasi nanga dati joe ben tan hori mi na libi.” — Psalm 119:93.
Wan jepi foe memre sani
◻ Sortoe „vermane” di e kon foe Gado joe kan kisi?
◻ Fa joe kan kisi winimarki foe Gado vermane?
◻ San de den „order” foe Jehovah?
◻ Foe san-ede joe moesoefoe wani foe doe den?
[Prenki na tapoe bladzijde 7]
Gado dienstknegti ini a ten disi abi moro „vermane” foe san den kan njan boen foe den
[Prenki na tapoe bladzijde 9]
Joe ben teki a bosroiti foe de ’wan partner foe „den skapoe” di e hori Gado komando’?