Den froemane foe Jehovah e wiki wi na jejefasi?
1 A psalmsingiman ben prèise Jehovah, foe di a ben taki: „Den froemane foe joe abi mi belangstelling troetroe” (Ps. 119:99). A Hebrew wortoe gi „froemane” abi a prakseri na ini taki Jehovah e memre wi foe san de na ini den wet foe en, den ordroe foe en, den markitiki foe en, den komando foe en, nanga ala den gebod foe en. Efoe wi e arki, dan den sa wiki wi na jejefasi èn den sa meki wi kolokoe.—Ps. 119:2.
2 Leki a pipel foe Jehovah, doronomo wi e kisi froemane nanga rai. Foeroe foe den wi jere kaba. Ala di wi e warderi a deki-ati disi di wi e kisi, tokoe son leisi wi e frigiti (Jak. 1:25). Jehovah e gi wi froemane na wan lobifasi èn nanga pasensi. Na apostel Petrus ben skrifi son wan foe den froemane disi foe ’wiki wi krin fasi foe denki, so taki wi ben sa memre den gebod foe Masra’.—2 Petr. 3:1, 2.
3 Ibri leisi baka den e memre wi o prenspari persoonlijk studie nanga a fisiti foe konmakandra de. Wi kisi disi, foe di den sani disi di wi e doe de so prenspari gi a boen foe wi na jejefasi.—1 Tim. 4:15; Hebr. 10:24, 25.
4 A moro bigi tjalensi gi son wan, na foe doe a wroko di wi kisi leki kresten foe preiki. Dati wani taki, wi moesoe meki moeiti, abi wan fasti bosroiti, èn wi moesoe horidoro. Ala di a e aksi foeroe foe wi, tokoe wi e kisi jepi foe „tanapoe kánkan”, foe di wi e „weri a wrokosani foe a boen njoensoe leki soesoe na wi foetoe”.—Ef. 6:14, 15.
5 A no a sabi nomo di wi sabi san na den sani di Jehovah e aksi foe wi, moesoe boeweigi wi foe doe wi diniwroko. Na apostel Paulus e memre wi taki na ati e gi wi a tranga di wi abi fanowdoe foe meki „bèkenti na poebliki foe kisi froeloesoe” (Rom. 10:10). Efoe wi abi wan tranga bribi èn efoe wi ati e boeweigi wi foe teki den froemane foe Jehovah, dan wi sa wani foe taki fri te wi e prèise a nen foe Jehovah.—Ps. 119:36; Mat. 12:34.
6 Te wi e wroko tranga na ini a doe di wi e doe boen wroko, dan wi kan froewakti nanga reti taki disi sa tjari prisiri kon gi wi (Preik. 2:10). Paulus e taki foe prisiri leki wan froktoe foe Jehovah en jeje, èn wi moesoe soekoe foe gro na ini a fasi fa wi e sori taki wi abi prisiri (Gal. 5:22). Petrus ben taki toe taki wan „opregti moeiti” sa kisi pai nanga wan diniwroko di e gi froktoe, èn disi e gi prisiri leki bakapisi.—2 Petr. 1:5-8.
7 Te wi kisi foe doe nanga wan tjalensi, dan wi moesoe memre fa den apostel ben tanapoe kánkan, soleki fa den ben froeklari taki: „Wi no kan tapoe foe taki foe den sani di wi si èn jere” (Tori 4:20). Wi e kisi tranga foe go doro te wi memre taki ’te wi e doe den sani disi, dan wi sa kibri wisrefi èn den wan di e arki wi’.—1 Tim. 4:16.
8 Wi no e mândi noso atibron foe di wi e kisi froemane doronomo. Na presi foe dati, wi abi dipi warderi gi a toemoesi hei waarde foe den (Ps. 119:129). Na ini den moeilek ten disi, wi de Jehovah tangi taki A e tan gi wi froemane foe wiki wi na jejefasi èn foe boeweigi wi foe de fajafaja na ini toemoesi boen wroko!—2 Petr. 1:12, 13.