Gado Wortoe abi libi

Sortoe Gado joe wani dini?

Na aksi di de dja na tapsé de na ini na ten disi net so aktueel leki pikinmoro 3.000 jari psa kaba. Na ini a ten dati Jehovah proféti Elia ben aksi na pipel Israël: „O langa oen sa tingatinga ete tapoe toe difrenti prakseri”? Na pipel no ben man foe teki wan bosroiti sortoe Gado den ben sa dini. Foe dat’ede Elia ben taki dja: „Efoe Jehovah de na troe Gado go waka na en baka ma efoe a de Baäl go waka na en baka.”

Fa den Israëlsma ben kan si sortoe bosroiti den ben kan teki? Elia e taki foe teki wan proef nanga faja. ’Meki den 450 Baäl proféti foe joe teki wan jongoe mankaw’, ai taki, ’èn koti dati pispisi èn poti en leki ofrandi tapoe na oedoe, ma den no moe poti faja na en. Èn mi sa teki wan tra jongoe mankaw è doe a srefi nanga en. Meki den kari na nen foe Baäl èn mi sa kari na nen foe Jehovah. Èn na Gado di sa piki nanga faja de na troe Gado.’ Ala sma e agri nanga dati, dati disi na wan boen proef.

Fosi den proféti foe Baäl e sreka wan jongoe mankaw tapoe na altari foe den. Dan den e bari foe mamanten te go miti bakadina: „O Baäl, piki wi!” Ma no wan piki e kon. Te a doro bakadina, dan Elia e go spotoe nanga den: ’Bari moro tranga, bika kande a gwe na plé. Noso kande ai sribi èn a moe wiki.’ Dan den proféti foe Bahl e bari so tranga leki den kan èn e koti densrefi nanga dolknefi èn lansri te leki a broedoe e dropoe foe den skin. Ma Baäl no e piki srefsrefi.

Now Elia e seti na altari boen foe Jehovah di ben broko poeroe. Ai koti na jongoe mankaw pispisi èn ai poti en na tapoe na oedoe. Dan ai meki dritron den kanti watra abra na ofrandi, den oedoe nanga den ston foe na altari. Ooktoe na bigi gotro di a ben diki lontoe na heri altari a de foeroe nanga watra.

Te foe kaba, te neti doro, Elia e begi: „Piki mi, o Jehovah, piki mi, sodati a pipel disi kan sabi dati joe, Jehovah, de na troe Gado.” Tapoe dati faja foe Jehovah e kon na gron. A de bron na ofrandi, den pisi oedoe, den ston nanga na doti èn ooktoe na watra ini na gotro. Te a pipel e si disi, dan den e fadon na tapoe den fesi èn den e taki: „Jehovah de na troe Gado! Jehovah de na troe Gado!” — 1 Kownoe 18:21-40.

Joe ben teki na bosroiti kaba sortoe Gado joe wani dini? Joe no kan tingatinga na tapoe toe difrenti prakseri. Soso wan pasi de. Na gado foe na seti foe sani disi Satan Didibri, sma e begi ooktoe now, ma no na a fasi dati den e hori dienst gi wan gado foe prani gron foe wan presi soleki Baäl na ini owroeten. Na a tra sé sma e dini Satan te den e poti goedoe tapoe na fosi presi, e dini den égi afersi na presi foe na wani foe na Mekiman foe den, Jehovah Gado. Soboen joe moe teki wan bosroiti. Jezus ben meki sma si san de na joisti bosroiti di a ben teki wan pisi foe na Wortoe foe Gado èn taki: „Jehovah, oen Gado, oen moe anbegi èn doe santa dienst gi en wawan.” — Mattéus 4:10.