Gado Wortoe abi libi

A ben abi bribi nanga dekati — Èn joe?

Na pikin Israëliet meisje disi wan groepoe foe foefoeroeman foe Syrië kisi en e tjari gwe. Te foe kaba den e tjari en go na a oema foe Naäman, na sroedati edeman foe na legre foe Syriakondre. Na ini na féjanti gebied disi, boen fara foe en oso na ini Israël, ai tron na dienstmeisje foe na oema foe Naäman.

Naäman na wan dek’ati, tranga man, di abi wan hé nen. Ma na bigi legre edeman disi abi gwasi, wan kefarlek siki di e njan pisi foe na skin foe libisma. Di na pikin Israëliet meisje ben de ete na ini Israël èn den no ben kisi en ete tjari gwe, a ben jere foe den wondroe sani di Gado ben doe nanga jepi foe en proféti Elisa, dati a ben tjari srefi a manpikin foe wan oema kon baka na libi (2 Kownoe 4:8-37). Kontrari nanga someni trawan a ben de so dati na meisje ben poti bribi dorodoro na ini den wondroe foe Gado, èn a ben abi na dek’ati foe taki fri foe den.

Èn foe dat’ede a meisje e ferteri, soleki joe kan si dja, na oema foe Naäman wan boen dé: ’Efoe mi meester ben sa go na Samaria, dan Jehovah proféti drape ben sa dresi en foe na gwasi.’ Te foe kaba wan sma e go na Naäman èn e ferteri san na pikin Israëliet meisje ben taki. Dati ben wroko tranga na tapoe Naäman!

Wi kan tjari kon na ini wi prakseri san tanapoe dja na tapoe na prenki, fa Naäman waka go na a meisje èn ben taki sowan sani leki: ’Mi de na edeman foe na legre foe Syriakondre èn tokoe joe abi na prefoeroe foe gi mi dek’ati foe go na joe kondre, na a proféti foe joe Gado, foe mi kan kon, boen foe mi gwasi. Pikin oema fa joe abi wan bigi bribi èn wan dek’ati sondro gridifasi, dati joe teki na risico foe wiki mi atibron foe sori mi na dienst disi. Mi sa aksi na kownoe foe Syriakondre foe go na Israël. — 2 Kon. 5:1-5.

Joe e si joesrefi kaba na ini wan situwasi di e akroederi nanga di foe na Israël meisje? Joe sabi na boenfasi foe Jehovah èn foe en prakseri èn foe meki wan njoen seti foe sani pe alasma sa de gosontoe èn kan libi foe tégo? (2 Petrus 3:13; Openb. 21:3, 4) A moro bigi pisi foe libisma sabi pikinso ofoe srefi not’noti foe den sani disi!

A kan de dati joe, leki wan jongoewan e kon na ini na srefi situwasi leki na jongoe meisje di de dja na tapoe na prenki. Na meester nanga den tra skoro pikin na ini na klas no sabi Jehovah. Efoe joe ben sa kisi na okasi foe doe dati, na ini sowan geval, joe ben sa abi na bribi nanga na dek’ati foe taki fri èn foe jepi trawan foe feni na pasi di e go na a presi pe wi kan feni gosontoe na jejesé?

Ma san ben psa nanga Naäman? A ben kon betre? Dati na wan tra tori, di bakaten, wi sa ferteri foe en.