A ben wani yepi tra sma

YU SABI wan sma di siki seryusu?— Yu ben winsi taki yu ben man du wan sani fu yepi en?— San yu ben o du efu a sma dati ben de fu wan tra kondre noso fu wan tra bribi? Yu ben o wani yepi en ete fu kon betre?— Wan yongu meisje di ben libi na ini Israel sowan 3000 yari pasa ben du dati. Kon meki wi go luku san ben pasa.

Na ini a ten dati, nofo tron den sma na ini Israel, pe a meisje e libi, e feti nanga den sma fu a kondre Siria, di de krosibei (1 Kownu 22:1). Wan dei, den Siriasma kon na Israel èn den e tyari a pikin meisje go na ini katibo. Den e tyari en go na Siria, pe a tron a futuboi fu a wefi fu Naman, na edeman fu a legre fu Siria. Naman abi wan takru siki di sma e kari gwasi, èn a siki disi kan meki taki pisi fu wan sma en skin e pori gowe.

A meisje disi e taigi a wefi fu Naman, fa a masra fu en kan kon betre. A meisje e taki: ’Efu Naman ben de na ini Samaria, Elisa, a profeiti fu Yehovah ben o man dresi a gwasi fu en.’ We, a fasi fa a meisje e taki fu Elisa, e meki Naman bribi taki a profeiti o man dresi en trutru. Sobun, nanga a primisi fu Ben-hadad, a kownu fu Siria, Naman nanga wan tu futuboi fu en e teki a langa pasi fu sowan 150 kilometer fu go suku Elisa.

A fosi sani di den e du, na taki den e go na Yoram, a kownu fu Israel. Den e sori en a brifi fu Kownu Ben-hadad, pe skrifi taki Naman e kon fu suku yepi. Ma Yoram no e bribi na ini Yehovah noso a profeiti Elisa. Yoram e denki taki Ben-hadad e suku fu kon feti nanga en. Te Elisa e yere a tori disi, a e taigi Kownu Yoram: „Grantangi, meki a man kon na mi.” Elisa wani sori taki Gado abi a makti fu dresi Naman fu a takru siki di a abi.—2 Kownu 5:1-8.

Te Naman e doro na a oso fu Elisa nanga den asi èn nanga den asiwagi fu en, dan Elisa e seni wan boskopuman fu taigi en: ’Yu musu go wasi seibi tron na ini Yordan-liba èn yu sa kon betre.’ Naman e atibron. A e fruwakti fu Elisa taki a e kon na dorosei èn du wan sani nanga en anu so taki a siki gowe. Na presi fu dati, a e si a boskopuman wawan! Fu dati ede, nanga bigi atibron Naman e drai èn a e bigin go na oso baka.—2 Kownu 5:9-12.

San yu ben o du efu yu ben de wan fu den futuboi fu Naman?— We, den futuboi e aksi en: ’Efu Elisa ben o aksi yu fu du wan muilek sani, yu ben o du en? Dan fu san ede yu no e du a sani disi di no muilek srefisrefi? Na wasi yu musu wasi nomo èn yu o kon krin.’ Naman e arki den futuboi fu en. ’Ne a saka go na ini Yordan-liba èn seibi tron a dukrun go na ini . . . , èn baka dati en skin tron baka leki a skin fu wan pikin boi.’

Naman e drai go baka na Elisa èn a e taigi en: „Luku, now mi sabi taki nowan Gado de na grontapu, boiti a wan fu Israel.” A e pramisi Elisa taki noiti moro a o ’tyari wan bron-ofrandi noso wan srakti-ofrandi gi nowan enkri tra gado, boiti Yehovah’.—2 Kownu 5:13-17.

Yu ben o wani de leki a pikin meisje?— Yu ben o wani yepi wan sma fu kon sabi suma na Yehovah èn san na den sani di A man du?— Di Yesus ben de na grontapu, wan man di ben abi gwasi ben poti bribi na ini en èn a ben taki: ’Efu yu wani yepi mi trutru, yu kan du dati.’ Yu sabi san Yesus piki en?— „Mi wani.” Yesus dresi a man disi neleki fa Yehovah ben dresi Naman.—Mateyus 8:2, 3.

Yu sabi taki Yehovah o tyari wan nyun grontapu kon pe ala libisma o de gosontu èn den o libi fu têgo?— (2 Petrus 3:13; Openbaring 21:3, 4) We, a no de fu taki dati yu sa wani fruteri trawan fu den tumusi moi sani disi.