A ben tranga-ede, ma bakaten a gi yesi

A PASA kaba wan leisi taki yu ben tranga-ede èn taki yu no ben wani arki?​—a Kande yu luku wan felem na telefisi, aladi yu mama noso yu papa taigi yu taki yu no musu luku a felem dati. A kan taki bakaten yu prakseri san yu du èn a hati yu taki yu no ben arki. Wan sma di no ben wani arki tu na Naman. Kon meki wi go luku san yepi en fu no tranga-ede moro.

Kon meki wi taki dati wi ben libi na a ten fu Naman. Dati ben de sowan 3000 yari pasa. Naman na wan prenspari legre-edeman fu Siria. A gwenti taigi den srudati fu en san fu du èn na dati den e du tu. Ma now Naman kisi wan takru siki di den e kari gwasi. A siki e meki taki Naman no moi fu si èn a kan taki a abi furu skin-ati.

Wan pikin meisje fu Israel na a umasrafu fu Naman wefi. Wan dei a meisje e taigi en misi taki wan man de na a kondre fu en èn a man nen Elisa. A meisje e taki dati Elisa kan meki Naman kon betre. Te Naman e yere disi, dan wantewante a wani go na Elisa. A e teki furu kado, dan a e go na Israel makandra nanga den srudati fu en. A e go na a kownu fu Israel fu taigi en san a kon du drape.

Te Elisa e yere a tori, a e seni taigi a kownu taki a musu seni Naman kon na en. Te Naman doro na Elisa oso, dan Elisa no e kon na doro, ma a e seni wan boskopuman kon taigi Naman taki a musu wasi seibi tron na ini Yordan-liba. Elisa e taki dati efu Naman du en, dan a o kon betre. Fa yu denki taki Naman e firi te a e yere disi?​—

Naman ati e bron èn dati meki a no wani du san Gado profeiti taigi en. A e taigi den srudati fu en: ’Efu mi wani go wasi, dan mi kan go na den liba na ini mi kondre di bun moro a liba disi.’ Ne Naman e bigin waka gowe. Ma yu sabi san den srudati fu en e aksi en?​— ’Efu a profeiti ben aksi yu fu du wan muilek sani, yu no ben o du en? Now a aksi yu fu du so wan makriki sani. Dan fu san ede yu no wani du dati?’

Naman e arki èn a e du san den srudati fu en taigi en. Siksi tron a e go na ini a liba, dan a e komoto baka. Te Naman e komoto na ini a watra a di fu seibi leisi, a e fruwondru. A siki gowe! A kon betre! Wantewante Naman e drai go baka na Elisa oso sowan 48 kilometer moro fara, fu di a wani taigi Elisa tangi. A wani gi Elisa diri kado, ma a profeiti no wani teki noti.

Dati meki Naman e aksi Elisa wan sani. Yu sabi san a e aksi Elisa?​— ’Gi mi a santi di tu buriki man tyari, dan mi o tyari dati go na oso.’ Yu sabi fu san ede a wani a santi?​— Naman e taki dati na tapu a santi fu Gado pipel Israel, a wani tyari ofrandi gi Gado. Ne Naman e pramisi taki noiti moro a o dini wan tra gado boiti Yehovah. A no tranga-ede moro, ma now a wani gi yesi na a tru Gado.

Fa yu srefi kan de leki Naman?​— Awinsi yu tranga-ede neleki fa en ben tranga-ede, toku yu man kenki. Yu kan meki yu papa nanga mama yepi yu fu no tranga-ede moro.