„A no kan!”​—San disi wani taki?

NA INI 1912, a sipi Titanic go na se fositron. Na a ten dati a no ben de a moro bigi sipi nomo, ma a ben de a moro diri sipi tu. Fu di sma ben meki a sipi na a moro nyunmodo fasi, meki den ben denki taki a no ben o man sungu. Ma wi alamala sabi san pasa. A fosi leisi di a go na se, a naki wan ijsbergi na ini a Noord-Atlantis Se èn a sungu. Sowan 1500 sma dede a dei dati. Sma ben e taki dati a sipi dati no ben o man sungu, ma toku a lasi gowe na ini a dipi fu a se na ini wan tu yuru nomo.

Den wortu „a no kan”, wani taki difrenti sani. Te wi e denki taki wi no abi nofo koni fu man du wan sani, noso fu frustan en, dan wi e taki son leisi dati a sani dati no kan. Sma fu fositen ben denki taki furu fu den nyunyun sani di sabiman meki na ini a ten disi, ben de sani di no ben o man kwetikweti. Den ben denki disi, fu di na a ten dati den no ben abi a koni fu meki den sani disi èn den no ben e bribi srefi taki den ben o man meki den. Na ini a ten disi sabiman seni libisma go na a mun. Den seni wan sortu pikin wagi go na a planeiti Mars èn komoto fu grontapu den meki a wagi dati rèi. Den kon sabi tu fa den cel fu wi skin e wroko èn te wan sani e pasa na iniwan presi na grontapu, dan nyunsu e sori disi wantewante. Sowan 50 yari pasa, sma no ben prakseri taki den sani disi ben o man. Dati ben kon na krin di Ronald Reagan, di ben de presidenti fu Amerkankondre fosi, taki nanga wan grupu prenspari sabiman di e ondrosuku difrenti tori. A ben taki: „Unu leki sabiman e kon nanga den moro nyun sani di sma fu fositen no ben man du kwetikweti, ma di tron aladei sani now.”

Fu den furu moi sani di sabiman e du nownowde, Professor John Brobeck ben taki: „Na ini a ten disi sabiman no kan taki dati wan sani no man. A wan-enkri sani di den kan taki na: ’Kande wan sani no man.’ Ma sabiman fu a ten disi kan taki dati den no man fruklari son sani ete, fu di den no sabi ala sani.” A professor e taki tu: „Efu wi leki sabiman denki taki wan sani no o man noiti, dan wán sani de ete di wi abi fanowdu. Dati na taki wi musu kon sabi san na a krakti di wi leki sabiman no sabi ete. A Bijbel fu wi e sori taki a krakti disi na a krakti fu Gado.”

Gado man du ala sani

Langa ten fosi Professor John Brobeck taki a sani disi, Yesus fu Nasaret, di sma e si leki a moro bigi man di oiti ben libi, taki: „Den sani di libisma no man du, na dati Gado man du” (Lukas 18:27). Gado en santa yeye na a moro tranga krakti di de. Nowan nyunmodo sani di sabidensi meki kan marki o tranga a krakti disi de. Santa yeye kan yepi wi fu du sani di wi no ben o man du nanga wi eigi krakti.

Son leisi problema e miti wi èn wi kan denki taki wi no o man lusu den. Fu eksempre, kande wan lobiwan fu wi dede noso kande wi abi so furu problema na ini wi osofamiri taki wi no man teki en moro. Noso a kan taki sani pasa nanga wi di e meki wi firi brokosaka, so taki wi e lasi howpu. Kande wi e denki taki yepi no de èn wi kan lasi-ati. San wi kan du?

Bijbel e fruteri wi taki te wan sma e bribi na ini na Almakti Gado èn a e begi en fu gi en a santa yeye fu en, aladi a e du ala san a man fu plisi En, dan Gado kan yepi en fu lusu problema di a denki taki a no o man lusu. Luku sortu deki-ati Yesus gi wi: „Fu tru, mi e taigi unu taki efu wan sma e taigi a bergi disi: ’Opo trowe yusrefi go na ini se’, èn a sma dati no e tweifri na ini en ati, ma a e bribi taki san a e taki o pasa trutru, dan na so a o pasa tu” (Markus 11:23). Efu wi e meki Gado Wortu nanga en yeye abi krakti na tapu wi libi, dan nowan problema no de di wi no man lusu.

Luku wan eksempre. Wan man ben trow 38 yari di en wefi dede fu kanker. A man ben broko saka trutru. A ben denki taki a no ben o man tyari a hebi dati. Son leisi a ben wani dede, na presi fu libi sondro en wefi. A ben taki dati a ben gersi leki a ben e waka na ini wan lagipresi di dungru pikapika. Te a e prakseri a ten dati, dan a e bribi taki fu di a ben e begi nanga furu watra-ai, fu di a ben e leisi Bijbel ibri dei èn fu di a ben e suku a yepi fu Gado en santa yeye, meki a ben man tyari a hebi di a denki taki a no ben o man tyari.

Wan trowpaar ben abi furu problema na ini a trowlibi fu den. A masra ben de wan sma di ben lobi du ogri-ati sani èn a ben abi takru gwenti. A wefi fu en ben abi a firi taki a no ben man moro nanga a libi dati. Dati meki a pruberi fu kiri ensrefi. Ne a masra bigin studeri Bijbel nanga Yehovah Kotoigi. San a leri, ben yepi en fu tapu nanga den takru gwenti fu en èn fu no kisi faya atibron moro. A wefi fruwondru di a si taki en masra kenki, aladi a ben denki taki dati no ben o man.

Wan tra man ben fruteri fa den drugs di a ben gebroiki nanga a huru libi fu en ben meki a lasi-ati. A e taki: „Mi no ben abi lespeki moro gi misrefi.” Di a begi Gado fayafaya, a taki: „Masra, mi sabi taki yu de. Mi e begi yu fu yepi mi!” A bakapisi ben de taki Yehovah Kotoigi bigin studeri Bijbel nanga en èn a ben man kenki en heri libi, aladi a no ben denki taki disi ben o man. A e taki: „Furu leisi mi konsensi ben fon mi èn mi ben firi leki mi no warti. Son leisi mi ben firi brokosaka srefisrefi. Ma Gado Wortu yepi mi fu feti nanga den fruferi firi disi. Te mi no ben man sribi na neti, dan mi ben kari wan tu tekst di mi ben sabi kaba. A sani disi ben yepi mi fu si sani moro krin.” Now a abi wan koloku trowlibi. En nanga en wefi e meki furu muiti fu yepi tra sma fu kon bribi tu taki Gado Wortu abi krakti. Di a ben yongu, a ben firi brokosaka so te taki a ben denki taki a no ben o man kenki en libi.

Den ondrofenitori disi e sori taki Gado Wortu abi krakti trutru èn taki en santa yeye kan du sani na ini wi libi di sma denki taki a no man. Ma kande yu e taki: „Ma dan yu musu abi bribi!” Iya, dati tru. Fu taki en leti, Bijbel e taki dati „sondro bribi wan sma no kan prisiri Gado” (Hebrewsma 11:6). Ma prakseri fu a tori disi: Kande wan bun mati fu yu di de wan driktoro fu wan bangi, noso di abi wan tra hei posisi e taigi yu: „Yu no musu broko yu ede. Efu yu abi wan sani fanowdu, dan yu kan kon na mi.” A tru taki yu o firi korostu te a e pramisi yu a sani disi. Ma na wan sari sani taki nofo tron libisma no man du ala ten san den e pramisi. Kande wan sani e pasa nanga yu mati di e meki taki a no man du moro san a ben pramisi yu, awinsi a ben sa wani du dati. Efu yu mati dede, dan a de krin taki a no o man du nowan fu den bun sani moro di a ben wani du gi yu. Ma Gado de tra fasi leki libisma. Bijbel e gi wi a dyaranti: „No wan sani de disi Gado no kan doe.”​—Lukas 1:37, Da Bijbel na ini Sranantongo.

„Yu e bribi disi?”

Furu tori skrifi na ini Bijbel di e buweisi taki a sani di skrifi na tapusei de so trutru. Luku wan tu eksempre.

Sara, wan uma fu 90 yari, ben lafu di den taigi en taki a ben o kisi wan manpikin. Ma a pipel Israel di de bakapikin fu a boi disi, na wan buweisi taki Sara ben kisi a manpikin disi trutru. Wan bigi fisi ben swari wan man. Aladi a man tan dri dei na ini a fisi, toku a no dede. Dati meki a ben kan skrifi san ben pasa nanga en. A man ben nen Yona. Lukas, di ben de wan datra, ben sabi san a ben wani taki te wan sma kon flaw noso te a dede. A skrifi taki Etikus, wan yongu man, ben fadon komoto na wan fensre fu wan sodrokamra èn a dede, ma a kisi wan opobaka. Den tori disi a no anansitori. Te wi e luku finifini san den e taki, dan wi o si taki den pasa trutru.​—Genesis 18:10-14; 21:1, 2; Yona 1:17; 2:1, 10; Tori fu den apostel 20:9-12.

Yesus ben taigi en mati Marta wan sani di ben e fruwondru en srefisrefi. A ben taki: „A sma di e libi èn di e bribi na ini mi, no sa dede noiti.” Boiti taki Yesus pramisi wan sani di sma ben si leki wan sani di no ben o man, a poti wan prenspari aksi tu: „Yu e bribi disi?” Na ini a ten fu wi na aksi disi de prenspari ete èn a bun fu poti prakseri na en.​—Yohanes 11:26.

Têgo libi na grontapu man trutru?

Na ini wan buku pe skrifi fa sabiman ondrosuku efu sma kan libi langa, wi kan leisi: „Kande a ten pe wi o man libi moro langa leki san wi e libi now, no de fara moro. A kan taki wi o libi fu têgo.” Wan tra buku e sori taki aladi den cel na ini wi skin e dede, e kon owru, noso wan tra sani e pasa nanga den, toku a no a sani disi e meki taki wi skin no e wroko bun moro noso e tapu fu wroko. Sabiman no sabi ete san e meki taki libisma e dede te fu kaba (The New Encyclopædia Britannica).a A buku disi e taki tu: „A kan taki wan sma e kon owru fu di den moro prenspari pisi fu a skin di musu sorgu taki a heri skin man wroko bun, no e du moro san den musu du.”

Sma pruberi fu buweisi na ala sortu fasi fu san ede libisma ben o man libi fu têgo èn kande a moi fu sabi ala den sani disi. Ma toku Bijbel e kon nanga wan moro tranga buweisi di e sori wi taki wi man libi fu têgo. Wi Mekiman Yehovah Gado di e gi libi, e pramisi wi taki a „o swari dede fu têgo” (Psalm 36:9; Yesaya 25:8). Yu e bribi disi? Na Yehovah pramisi wi a sani disi èn wi sabi taki a no man lei.​—Titus 1:2.

[Futuwortu]

[Prenspari pisi na tapu bladzijde 27]

’Den moro nyun sani, di sma fu fositen no ben man du kwetikweti, tron aladei sani now.’​—RONALD REAGAN

[Prenspari pisi na tapu bladzijde 28]

Te yu denki taki yu no man moro nanga a libi, dan na suma yu o go?

[Sma di abi a reti fu a prenki na tapu bladzijde 27]

NASA photo