„Gado Man Du Ala Sani”
1 A moro prenspari wroko fu a Kresten gemeente na fu preiki a Kownukondre boskopu na heri grontapu (Mat. 24:14). Dati na wan kefalek bigi wroko. Furu sma di e luku fa wi e du a wroko disi e denki taki wi abi moro moni fanowdu leki san wi abi. Trawan no e bribi srefisrefi taki a wroko disi man du, fu di sma e spotu wi, e gens wi, èn e frufolgu wi (Mat. 24:9; 2 Tim. 3:12). Sma di no lobi fu teki sani seryusu abi na overtoigi taki a wroko disi na wan sani di no man du. Ma toku, Yesus ben taki: „Gado man du ala sani.”—Mat. 19:26.
2 Bun Eksempre Di Wi Kan Teki: Yesus ben bigin du en diniwroko ala di heri grontapu ben de teige en. Gensman di ben pruberi fu tapu en fu du a wroko disi, ben wisiwasi en na iniwan sortu fasi di yu man prakseri, èn te fu kaba den kiri en na wan ogri-ati fasi. Ma na a kaba Yesus ben taki nanga frutrow: „Mi wini grontapu” (Yoh. 16:33). Trutru, disi na wan sani di sma no ben fruwakti taki a ben o pasa!
3 Den disipel fu Yesus ben sori taki den ben abi a srefi deki-ati nanga faya na ini a Kresten diniwroko. Sma ben fon, naki èn poti den disipel na strafu-oso, noso kiri den srefi. Ma toku den ben „prisiri taki den ben feni den warti fu kisi syen fu en nen ede” (Tori. 5:41). Ala di a ben gersi taki a wroko bigi èn taki a muilek srefisrefi, toku den ben man preiki a bun nyunsu „te na a moro farawe presi fu grontapu”.—Tori. 1:8; Kol. 1:23.
4 A Fasi fa Wi Man Du a Wroko Bun na ini Wi Ten: Wi srefi e du a Kownukondre preikiwroko disi fayafaya, awansi a gersi taki wi no man du dati srefisrefi. Ala di wi no man preiki fri na son presi, ala di sma e frufolgu wi, ala di sma e poti wi na dungru-oso, èn e du tra ogri-ati sani fu tapu wi, toku wi man du a wroko. Fa dati kan? „’No nanga yepi fu wan srudati legre, no nanga krakti, ma nanga yepi fu mi yeye,’ Yehovah fu den legre taki” (Sak. 4:6). Fu di Yehovah e tanapu na wi baka, meki no wan sani man tapu a wroko fu wi!—Rom. 8:31.
5 Te wi e preiki dan wi no abi no wan reide fu syensyen noso fu fredefrede noso fu firi taki wi no koni nofo (2 Kor. 2:16, 17). Wi abi bun furu reide fu meki muiti fu panya a bun nyunsu fu a Kownukondre. Nanga a yepi fu Yehovah, wi man du „sani di no kan”!—Luk. 18:27.