Seti Sani gi a Ten Di E Kon—Nanga Sortu Marki?
1 Wi alamala e prakseri den sani di wi wani du na ini a ten di e kon. Den wan nanga a howpu fu libi na grontapu e luku go na fesi fu libi fu têgo na ini Gado regtfardiki nyun grontapu. Ma sani de di kan puru a tranga howpu dati di wi abi na prakseri. Wi musu du seryusu muiti fu poti Kownukondre afersi na tapu a fosi presi na ini wi libi èn wi no musu meki den lostu fu a skin hari wi prakseri puru fu dati.—1 Yoh. 2:15-17.
2 Grontapu no man frustan kwetikweti sortu marki sma di e poti prakseri na sani na yeye fasi, wani doro (1 Kor. 2:14). Ala di tra libisma e feti fu kisi barinen, makti noso gudu, wi e meki muiti fu feni gudu na yeye fasi (Mat. 6:19-21). Efu wi ben pruberi fu si a ten di e kon neleki fa grontapu e du dati, dan oiti wi ben o doro den marki fu wi na yeye fasi? Wi heri ati ben o poti prakseri na grontapu sani. Fa wi kan sorgu taki disi no pasa nanga wi?
3 „Waka Baka na Eksempre fu Yesus Krestes”: Wan fu den fasi fu luku efu wi e seti a tamara fu wi nanga Kownukondre afersi na prakseri, na fu luku den tori di wi lobi fu taki. A de so taki, ala ten wi e taki fu gudu, noso fu grontapu sani? Efu dati de so, dan wi musu luku efu wi ati no e poti so furu prakseri moro na tapu sani na yeye fasi. Kande a de fanowdu taki wi e poti prakseri fu ’waka moro baka na eksempre fu Yesus Krestes na presi taki wi e seti sani na fesi gi den lostu fu a skin’.—Rom. 13:14.
4 Yonguwan kan ’waka na baka na eksempre’, fu di den e seti sani na fesi gi a dei di den o teki a furuten diniwroko. Wan yonguwan di ben wani teki a gewoon pionierwroko ben gro kon bigi na ini wan libimakandra pe a gwenti de, taki wan yonkuman musu seti en libi fosi so taki a no abi moni problema. Fu dati ede, a ben go so dipi na ini bisnis taki a ben kon tron wan plekti nomo fu go na den konmakandra èn fu teki prati na a diniwroko. Ma di a bigin poti bribi na ini den wortu fu Yesus di de fu feni na ini Mateus 6:33, èn di a tapu nanga a libi pe a ben naki en skin fu soso, dan a ben teki a furuten diniwroko leki wan libiwroko. Now di a abi wan krin konsensi, dan soleki fa a e taki en, a e dini Yehovah ’so furu leki a man’.
5 Bijbel e taki dati a bun fu seti sani gi a ten di e kon (Odo 21:5). Meki a de so, taki wi alamala e du dati nanga a wani fu Gado leki a moro prenspari sani na prakseri.—Ef. 5:15-17.