¡Meki Plan na Fesi!
1 Na organisâsi fu Yehovah e gi wan programa fu theokrâsia wroko di e du doronomo èn di meki fu gi wi ala sani di wi abi fanowdu na yeye fasi. A warderi di wi abi sa buweigi wi fu meki bun gebroiki fu ala sani di seti gi wi, soleki den fisiti fu opziener di e rèis, den bigi konmakandra nanga den kongres, èn tra spesrutu wroko di a gemeente seti (Mat. 5:3). Ma son sma e misi fu kisi wini fu den furu sani na yeye fasi di seti gi wi, fu di den meki tra plan. San wi kan du, so taki disi no e pasa? Fa wi kan sorgu taki wroko di no abi fu du nanga a theokrâsia, no e puru „den moro prenspari sani”?—Fil. 1:10.
2 A De Tranga Fanowdu fu Meki Plan na wan Koni Fasi: Odo 21:5 e gi wi a frumane: „Den plan fu a sma di de fayafaya seiker sa abi winimarki, ma ibri sma di e handri tumusi esi-esi, seiker sa pina.” Fu kisi „winimarki” na yeye fasi, dan wi musu meki plan na fesi fayafaya, ala di wi e hori den theokrâsia wroko di seti, na prakseri. Wi musu seti den sani di wi wani du gi wisrefi na wan ten di no sa hendri wi fu kon makandra fu kisi blesi na yeye fasi. Efu wi e meki plan esi-esi gi sani di wi wani du gi wisrefi, sondro fu denki fu den theokrâsia sani di e kon, dan kande wi sa „pina” fu di wi e mankeri sani na yeye fasi.
3 ¡No Misi fu Kisi Wini! Ibriwan fu wi e meki plan gi a tamara, so srefi gi fakansi, rèis di wi musu meki fu wi wroko ede, a fisiti di wi wani fisiti famiriman, èn so moro fara. Bifo yu e meki fasti plan, luku a schema fu theokrâsia wroko di e kon. Efu yu e si taki a kringopziener e kon noso taki wan bigi konmakandra de na tapu a schema na a srefi ten di yu no sa de kande, dan du tranga muiti fu seti yu afersi tra fasi, so taki yu kan abi wan prati na den theokrâsia wroko. Den brada e taigi wi bun langa na fesi sortu bigi sani de tapu a schema gi a ten di e kon. Den owruman na ini yu gemeente kan taigi yu sortu plan meki gi a gemeente.
4 Efu wi e luku na fesi èn e meki plan na fesi gi den moro prenspari sani, dan wi sa „kon furu nanga a froktu fu regtfardikifasi, . . . fu gi Gado glori èn prèise.”—Fil. 1:11.