Bow na joe toekomst nanga na orga foe Jehovah
„De na ini na frede foe Jehovah, naheri dé. Bika na ini na geval dati, dan toekomst sa de, èn joe égi howpoe no sa koti poeroe.” — ODO 23:17, 18.
1, 2. San na apostel Johannes ben si so na a kaba foe na fosi jarhondro G.T.?
JEHOVAH e tjari kon na krin gi en pipel sani di moe psa, èn dati e gi den na okasi foe handri koni (Jesaja 42:9). Na a kaba foe na fosi jarhondro foe gewoon teri foe eksempre Gado ben gi na owroe apostel Johannes visioen foe wan toekomst di e gi howpoe. Fa wi kan bréti dati Johannes ben gi kotoigi foe „ala sani di a ben si” èn dati den visioen disi ben skrifi na ini na boekoe Openbaring. — Openbaring 1:1, 2.
2 Johannes ben si fo engel di ben ori „winti” di ben sa tjari na „bigi banawtoe” kon. O langa ten den ben de verprekti foe ori den? Wan tra engel ben taigi den: „No doe ogri na grontapoe noso na a se noso na den bon te leki wi poti wan marki na den fes’ede foe den srafoe foe wi Gado.” — Openbaring 7:1-3; Mattéus 24:21, 22.
3. San bo psa, èn nanga jepi foe san, bifo den „winti” o loesoe pori Satan orga?
3 Den winti di sa loesoe sa pori na grontapoe organisaatsi foe Satan Didibri, ija den sa pori den krinkrin. (Teki gersi Jeremia 25:32, 33). Ma bifosi disi psa, dan na fikapisi foe den salfoewan di sa tiri nanga Jezus Kristus ini hemel, sa kisi wan séker marki. Na poti foe wan ségelmakri „ini den fesi-ede” foe den „srafoe disi foe wi Gado” e psa nanga jepi foe Gado santa jeje ofoe wrokokrakti, di ben gi na salfoe kristen leki wan panti foe den hemel erfenis (2 Korintesma 1:21, 22; Efesesma 1:12, 14). Nanga jepi foe na prékiwroko foe na boen njoensoe foe na kownoekondre di e doe na „ini a laatste pisi foe den dé” na tjari kon makandra foe den „di den ben teki poeroe” e kon klari. — Micha 4:1; Mattéus 24:14, 31.
4. Omeni srafoe foe wi Gado sa kisi wan ségelmarki di sa tan èn fa joe kan bewijsi joe piki nanga jepi foe na bijbel?
4 Omeni „srafoe foe wi Gado” sa kisi wan ségelmarki di sa tan? Johannes, di ben de wan foe den, ben ferteri getrow: „Mi ben jere a nomroe foe den di ben kisi wan ségelmarki, 144.000.” Den de „na Israël foe Gado”, na jeje Israël, di de foe twarfoe lo nanga ibri wan lo 12.000 sma (Openbaring 7:4-8; Galaciasma 6:16). Fa disi de wan orga! Na ondro na kownoe Jezus Kristus den 144.000 sa de „wan kownoekondre èn . . . priester foe wi Gado”, „èn den sa tiri leki kownoe abra na grontapoe”. — Openbaring 5:10; 14:1-4.
5. Soema sroiti densrefi now na a pisi foe jeje Israël? (b) San ala sma di e frede Jehovah de nanga makandra, èn san e wakti den leki fa Odo 23:17, 18 taki?
5 Bakadi na apostel Johannes ben si na jeje Israël, a ben si wan „bigi ipi” èn a ben aksi ensrefi soema den disi ben de. A ben kisi foe jere: „Den disi de den sma di komoto foe na bigi benawtoe, èn den ben wasi den langa krosi èn den ben meki den kon weti na ini a broedoe foe a Lam.” Den sma di de wan pisi foe a „bigi ipi”, de den grontapoe onderdaan foe na kownoekondre, èn bijbel ben taki a fesi dati „na Lam”, Jezus Kristus, „ben sa tjari den go na fonten foe watra foe libi” — ija, tégo libi na tapoe wan paradijsgrontapoe (Openbaring 7:9, 14, 17; Lukas 23:43). Na ini a ten foe wi „den tra skapoe” disi de wan „ipi” nanga na fika pisi foe kownoekondre erfgenaam, èn ala den sma disi di e frede Jehovah, de makandra na grontapoe orga foe Gado (Johannes 10:16). Te den tan getrow na en dan wan blesi toekomst e wakti den, bika wi e lési: „De ini a frede foe Jehovah, na heri dé bika na ini a geval dati wan toekomst sa de, èn joe égi howpoe no sa koti poeroe.” — Odo 23:17, 18.
Na owroe seti disi no abi wan toekomst
6. Pe wi de now na ini na lon foe a ten?
6 Wi kon doro now boen fara na ini „den laatste dé” foe na ogri seti foe sani disi (2 Timotéus 3:1-5). Te wi poti den sani di e psa na grontapoe nanga na bijbel teri foe ten sé na sé foe makandra dan e kon de faste taki Jezus Kristus na ini na bigi dréten foe 1914 ben go tiri na ini hemel (Psalm 110:1, 2). Ala dé den njoensoe bericht e sori taki na samengesteld „marki” foe Jezus „denoja” èn na bosroiti foe na seti foe sani disi de foe si (kapitel 24, 25 foe Mattéus). A de troe dati na geslagti disi di ben e libi na a ten di na kownoekondre ben opo na ini 1914 kon owroe kaba, ma foe den wortoe foe Jezus e kon na krin dati „na geslagti disi no sa psa kwet’kweti” bifo na „bigi benawtoe” tjari wan kaba kon na a grontapoe disi, na onregtvaardiki libisma maatschappij di „de na ini na makti foe na ogriwan”, Satan Didibri. O esi disi de foe psa? A no kan de langa moro, bika wi e libi na ini na di foe 71 jari foe na kownoekondretiri! — Mattéus 24:21, 34; 1 Johannes 5:19.
7. (a) San sa psa na ini na fosi fase foe „na bigi benawtoe”? (b) San sa psa sjatoe baka na pori foe na falsi fasi foe anbegi?
7 Na „bigi banawtoe” sa kon wantewante leki wan ferwondroesani (Mattéus 24:36-44). Na ini na fosi fase foe en dan „Babylon a Bigiwan”, na grontapoe makti foe falsi fasi foe bribi e kisi pori. Na pori foe na prenspari pisi disi foe Satan seti sa abi krakti toe na tapoe den politiek nanga bisnis elementi. Na ini a tori disi na apostel Johannes ben tjari kon na krin dati „den kownoe foe grontapoe” sa kré: „A wan sari sani, a wan sari sani, joe bigi foto, Babylon joe tranga foto, bika ini wan joeroe a kroetoe foe joe ben kon!” Èn fa a de nanga den bisnis elementi? Johannes e go moro fara: „Ooktoe den reizende koopman foe grontapoe e sari èn e kré bika no wan sma no de moro foe bai den sani foe den di de psa marki” (Openbaring 18:1-19). Sjatoe na baka na pori foe na falsi fasi foe anbegi, dan Jezus Kristus sa gebroiki en hemel legre foe pori na tra pisi foe na ogri seti foe sani disi. A sa go na ondro na ini na „oorlog foe na bigi dé foe Gado na Almaktiwan”, na Har-magedon di e kon es’esi. — Openbaring 16:14-16; 19:11-21.
8. Sortoe orga de na wán enkri wan nanga wan toekomst di sa tan, èn foe san-ede disi de so?
8 San disi wani taki gi den sma di abi wan gosontoe frede gi Jehovah? A wani taki eenvoudig taki a grontapoe disi di Satan e basi no abi wan toekomst! A ten foe en pikinmoro kon na wan kaba! Jehovah organisaatsi foe dat’ede de na wan enkri organisaatsi di wan sma kan bow wan tégo toekomst nanga en.
9. (a) Sortoe aksi wi ben sa kan aksi te wi loekoe san de na wi fesi? (b) Sortoe aktueel rai tanapoe na ini 1 Timotéus 6:7-19?
9 A ben sa de wan sori foe bribi noso srefi foe gosontoe ferstan te wi loekoe san de na wi fesi, efoe wi ben sa proberi foe bow wan séker toekomst ini wan bepaalde pisi foe na seti disi di sa go na pori? Nanga sortoe grontapoe korporatsi noso firma foe eksempre joe sa kan bow veilig na wan toekomst di e tan? Nanga no wan! Foe dat’ede meki a no de wan koni sani foe de tevréde nanga njanjan, krosi nanga wan oso foe libi èn gi ini wi libi na fosi presi na den kownoekondre afersi? (Mattéus 6:33; 1 Timotéus 6:7-12; 2 Timotéus 2:4). Na rai foe na apostel Paulus di e kon now de now actueel srefsrefi: „Rikomanderi den sma abi goedoe na ini a disiten seti foe sani foe no abi hémemre èn foe no poti den howpoe na tapoe goedoe di no de séker ma na tapoe Gado di e gi wi ala sani psa marki foe kan njan boen foe en, foe doe boen, foe de goedoe na ini toemsi boen wroko, foe lobi foe gi sani, e poti gi densrefi wan toemsi moi fundamenti gi na ten di e kon, veilig leki wan goedoe, sodati den kan graboe hori na troetroe libi stéfi.” — 1 Timotéus 6:17-19.
Bow na wan ferstanfasi na joe toekomst
10. Nanga sortoe sani wi moe hori wisrefi bezig ini na fosi presi, now di wi tanapoe let na fesi na „bigi benawtoe”?
10 Fa wan jeje balansfasi e kon na fesi na ini den wortoe dati foe na apostel! Jehovah pipel e si na ini dati wan sroto foe tan na libi, dati wani taki: Hori goedoe na tapoe na joisti presi, na ini a ferstan dati krakti no moe poti tapoe „goedoe di no de séker”, ma tapoe „kon goedoe na ini toemsi boen wroko”. Na ini disi joe abi na teki prati geregeld nanga faja na a kristen diniwroko. Now di den doengroe wolkoe foe na „bigi benawtoe” e sori densrefi kaba a loktoe a no de a ten dan foe meki plan foe wan boen moi toekomst na ini na wan efoe tra grontapoe bisnis efoe foe feti a baka foe doro na ini a wrokope pe joe e wroko na moro hé tren foe na trapoe, A de now a ten foe préki na boen njoensoe foe Gado Kownoekondre èn foe warskow den sma di no e prakseri noti foe na kefar di de a den tapoe ede. Boiti foe dati, Jezus Kristus ben gi na komando foe préki èn foe meki discipel. Leki Jehovah Kotoigi oenoe moe de bezig foe dat’ede nanga dati na afosi presi. — Mattéus 24:14; 28:19, 20; Jesaja 43:10-12.
11. San de wantoe winimarki di sa tan foe na kristen diniwroko?
11 Gi foeroe foe den wroko di den sma foe na grontapoe e doe now, wan kaba o kon na den foe tego na ini a ten foe „a bigi benawtoe”. A de troe dati son sortoe wroko sa doe baka na ini na njoen seti foe sani di Gado pramisi. Ma joe kan kari wan disiten wroko di abi net so meni boen sé leki na kristen diniwroko? Na jeje ontwikkeling di wan sma e kisi èn den go na fesi di wan sma e meki foe di a e teki prati na a wroko disi di Gado ben gi, sa tjari foeroe winimarki kon na ini na njoen seti. Na stéfi matifasi nanga Jehovah di e kon nanga a diniwroko, sa go doro na ini na seti foe sani dati. Èn den leri kapaciteit di kon moro boen, kan de wan heri boen jepi na ini na leri foe miljoenmiljoen sma di sa kisi dan wan opobaka. — Jesaja 54:13; Johannes 5:28, 29; Openbaring 20:12.
12. Sortoe kefarlek moi ferwakti wi abi leki Jehovah dienstknegti, ma san wi moe doe?
12 Efoe wi moro spesroetoe e broko wi ede nanga na prisi foe Gado èn doe en wani, dan den ferwakti foe oenoe de troetroe toemsi bigi (Psalm 40:8; Romeini 12:1, 2). Ija, ’efoe wi de na ini na frede foe Jehovah, dan wan toekomst de gi oenoe èn na howpoe foe oenoe no sa koti poeroe’ (Odo 23:17, 18). Tégo libi sa kon de wan porsi foe wi efoe oenoe tan waka na ini frede foe Gado „na a pasi roe libi” (Psalm 16:11). Ma te wi de a pasi e go dan wi moe poti redelek theocratis marki na wi fesi di wi kan doro ooktoe.
Wantoe redelek marki
13. Foe san-ede meki a de wan joisti sani akroederi a bijbel dati Jehovah anbegi poti go a hé alaten? (b) San de wantoe marki di hondrohondro doesoen sma ben doro?
13 Son sma bigin pas, foe taki en so nanga na kren foe „na bergi foe na oso foe Jehovah”. Sensi den oorlog jari foe 1914 te 1918 na anbegi foe Jehovah, di en tempel noso „oso” wan dé ben de tapoe na ede foe wan bergi ini Jeruzalem, ben kon alaten moro hé. A „poti stéfi . . . na tapoesé foe den ede foe den bergi”, pe den ben bow a tapoe den tempel gi falsi gado. Na so fasi na anbegi foe Jehovah ben poti hé „tapoesé foe den pikin bergi”. Hipihipi sma e lon go na na hé anbegi foe Jehovah (Micha 4:1-4; Jesaja 2:2-4). Bakadl den ben kisi soifri sabi foe na bijbel, den ben sori beraw, den ben drai den libi, gi densrefi abra na ondro begi na Jehovah èn ben sori dati nanga na dipi di den dipi den go na ondro watra (Johannes 17:3; Tori foe den Apostel 2:38; 3:19). Disi de marki di hondrohondro doesoen sma foe ala naatsi e doro èn di bakadati e dini Jehovah getrow leki wan pisi foe en grontapoe organisaatsi. Fa den de kolokoe dati den ben teki na hé anbegi foe na wan enkri troe Gado a tapoe den! Ma fa a de nanga joe? Joe ben doe den stap disi kaba?
14. Na ini sortoe pasi wi moe tan go na fesi ooktoe baka di wi ben go bigin anbegi Jehovah, èn fa wi kan doro disi?
14 Ooktoe baka te wi go anbegi Jehovah makandra nanga en pipel, a de fanowdoe dati wi kisi wan boen apeteit èn hori a dati. Baka di wi ben leri sabi „na gronleri di e go foe Kristus”, dan wi moe go ’doro foe kon lepi’ foe di wi e meki gebroiki foe ala jeje sani di Jehovah seti nanga jepi foe „na getrow èn koni srafoe” (Hebrewsma 6:1-3; Mattéus 24:45-47). Soboen joe ben sa kan aksi joesrefi: Mi e lési a Wortoe foe Gado ala ten? Mi e stoeka den boekoe di e kon nanga jepi foe na „srafoe”-klasse boen? — Hebrewsma 5:11-14.
15. (a) Sortoe rai Paulus ben gi ini Hebrewsma 10:24, 25, ma na ini sortoe gwenti son sma fadon go? (b) Sortoe rai e gi dja efoe presi de foe persoonlek kenki na ini na go na komakandra noso na ini na kristen diniwroko?
15 Dan wi moe poti prakseri ooktoe na a rai foe Paulus: „Meki wi poti ai na makandra èn gi makandra dek’ati foe sori lobi nanga boen wroko. Wi no moesoe meki en leki wan gwenti foe libi den komakandra foe oen soleki son sma e doe. Joisti wi moe gi makandra tranga, èn dati moro so, te wi e si a dé foe Masra e kon krosbé” (Hebrewsma 10:24, 25, Bigi Njoensoe Bijbel). Na go alaten na kristen komakandra de wan pisi foe wi „santa dienst”. Ma son sma e go ibri wiki soso na na publiki taki èn ben meki a de wan gwenti foe libi na kownoekondre-komakandra-presi bifo na studie foe Na Wachttoren bigin. Trawan e misi nofotron na dienstkomakandra. Den komakandra disi no wani taki foeroe gi den moro foe di den no de toemsi actief ini na oso foe oso kotoigiwroko èn tra pisi foe na kristendiniwroko? Efoe joe si taki na tapoe wan noso moro foe den kontren disi presi de foe joèsrefi meki kenki kon, foe san-ede dan joe no sa ben poti en na fesi foe Jehovah èn aksi en foe jepi joe ini ala pisi foe joe „santa dienst” foe kon de geregeld èn leki wan eksempre? — Hebrewsma 12:25-29.
16. (a) Sortoe redelek theokratis marki e kari dja? (b) Efoe ferprekti foe na bijbel e meki dati wi no kan doro den marki disi, san de dan tog mogelek ete?
16 San na wan toe tra redelek theocratis marki? Nownow wan nomroe foe sma di e gro dé foe dé de leki gewone noso jepi pionier na ini na foeroetendienst. Joe ben kan meki na diniwroko foe joe na a sé dati kon moro bigi? Efoe joe ferprekti foe a sé foe a bijbel e tapoe joe foe doro den marki disi, dan natuurlek a de so dati joe kan gi morele jepi na foeroeten prékiman èn doe persoonlek someni na ini na dienst foe Gado leki joe omstandigheid e gi joe pasi. Wi alamala kan sori dati wi ’poti wi howpoe no tapoe goedoe di no de séker, ma tapoe Gado’, nanga getrow anbegi nanga dienst di de leki wan prijse gi Jehovah. Èn gi den di kan teki na pionierwroko na tapoe den, disi de séker wan foe den moro boenfasi foe „graboe hori na troetroe libi stéfi”. — 1 Timotéus 6:17-19.
17. (a) Foe sortoe grani foe na dienst jongoesma spesroetoe ben kan go denki heri boen foe en? (b) Sortoe satisfaksi sma foe na Bethelfamiri abi?
17 Dini ini wan foe den Betheloso na wan presi na grontapoe de ooktoe wan toemsi moi grani èn spesroetoe jongoesma e doe boen foe loekoe na grani disi na ini begi. Na Betheldienst e gi wan toemsi moi opleiding ini a kontren foe libisma demakandra, bika sma foe na Bethelfamiri e wroko krosbé foe makandra foe meki den kownoekondre afersi go na fesi. Bepaalde capaciteit di wan sma e kisi na Bethel. kan de boen ini na bigi leriwroko di sa feni presi na ini na njoen seti. Foe di foeroe sma de jongoe ete te den bigin nanga na Betheldienst, meki den no e abi foeroe sani tapoe na kontren foe goedoe. Ma den de tevréde nanga njanjan, krosi, nanga wan oso èn abi dipi satisfaksi foe sabi dati a wroko foe den e de wan jepi gi na jeje tanboen foe foeroe trawan. — Prékiman 3:12, 13.
18. San na foeroetendienst kan leri wan sma èn fa na bijbel e hori baka gi disi?
18 Teki prati na a wan noso tra foeroetendienst kan leri wan sma foe libi ensrefi moro tranga na Jehovah Gado. Grontapoe sma di e poti den fertrow tapoe „goedoe di no de séker”, abi nofotron na loekoe foe sani dati wan sma kan loekoe ensrefi. Ma spesroetoe wan foeroeten bedinari sa leri dati Jehovah e seti sani psa marki gi den di ’e soekoe fosi na kownoekondre nanga na regtvaardikifasi’. Doesoendoesoen sma di jari langa ben dini na ini na pionierwroko, kan kotoigi foe dati, dati noiti a ben mankeri den na den sani di de fanowdoe. Taki pikinso nanga den èn joe sa si dati nanga den heri ati den e agri nanga na Psalmsingiman David di ben taki: „Wan dé mi ben de wan jongoeman, ooktoe mi ben kon grani, èn tokoe mi no ben si dati den libi wan regtvaardiki sma krinkrin, noso dati en bakapikin e soekoe brede”. — Psalm 37:25.
Bow na wan séker toekomst
19, 20. (a) Nanga san wi moe de bezig, foe di na ten di de ete gi na seti foe sani disi de so sjatoe? (b) Fa wi kan handri soboen nanga ferstan na ini a tori foe na toekomst?
19 Efoe wi de loyaal kotoigi foe Jehovah, wi e ferstan dati na ten di libi abra ete gi na seti disi, de toemsi sjatoe. Soboen nanga san wi moe de bezig? Wi e doe boen foe handri ini akroederi nanga den wortoe di e kon foe na apostel Petrus: „Foe di ala den sani disi sa kon loesoe soboen, sortoe sma oenoe moe de dan na ini santa libifasi nanga doe foe respeki foe Gado, e wakti èn e hori boen na ini prakseri na denoja foe na dé foe Jehovah, di nanga en den hemel sa bron kon loesoe èn den elementi di faja srefsrefi sa smelter!” — 2 Petrus 3:11, 12.
20 Ooktoe na apostel Johannes ben tjari kon na krin dati na grontapoe disi e psa gowe (1 Johannes 2:15-17). Na owroe seti disi sa psa gwe es’esi. Foe dat’ede meki wi alamala di e frede Gado moe meki ’santa libifasi nanga doe foe frede Gado teki wi abra krinkrin, aladi wi e ferwakti na denoja foe Jehovah dé èn e hori dati boen na ini prakseri.’ No firigiti noiti dati soso Gado organisaatsi sa psa libilibi na kaba foe a seti disi di e go a dede. Handri foe dat’ede nanga ferstan èn meki plan gi na tégo libi foe di joe e bow nanga Jehovah organisaatsi na joe toekomst.
Leki wan loekoe baka foe sani
◻ Ala sma di e frede Gado de wan pisi foe san èn sortoe djaranti e gi na den na ini Odo 23:17, 18?
◻ Soso sortoe organisaatsi abi wan toekomst, èn foe san-ede joe e piki so?
◻ Now di na „bigi benawtoe” de so krosbé dan foe san Jehovah Kotoigi moro foeroe moe broko den ede?
◻ San na wantoe foe den theocratis marki di foeroe sma kan doro?
[Prenki na tapoe bladzijde 7]
Foe di Gado blesi de tapoe na kownoekondreprékiwroko meki bigi ipi sma e lon kon na a anbegi foe Jehovah di de na wan hé presi