Pasa a bigi banawtoe libilibi
„Den na den wan di komoto na a bigi banawtoe, èn den wasi den langa krosi foe den èn meki den weti ini a broedoe foe a Pikin Skapoe.” — OPENBARING 7:14.
1. Soema sa gi den wan di opo baka foe libi na grontapoe, wan switi kon?
TE MILJOENMILJOEN sma di wi no man teri sa opo baka ini na ’opobaka foe den regtfardikiwan nanga den onregtfardikiwan’, dan den no sa kon na libi baka na ini wan leigi grontapoe (Tori foe den Apostel 24:15). Den sa wiki ini kontren di kon moro boen na wan toemoesi moi fasi, èn den sa si taki tanpresi, krosi, nanga njanjan pasa marki, sreka gi den. Soema sa sreka ala den sani disi? A de krin, taki sma sa libi ini a njoen grontapoe bifo na opobaka na grontapoe sa bigin. Soema? Bijbel e sori taki den sa de sma di sa pasa a bigi banawtoe libilibi. Sondro tweifri, foe ala den bijbelleri, disi na wan di troetroe abi a belangstelling foe sma — taki wan toe getrow sma sa pasa a bigi banawtoe libilibi èn taki noiti den no sa abi foe dede. Ini den Santa Boekoe foe bijbel den e taki dati a howpoe disi de troe.
Neleki den dei foe Noa
2, 3. (a) Sortoe sani na mindri den dei foe Noa nanga a ten foe wi de a srefi? (b) San a pasa di Noa nanga en osofamiri ben pasa a Froedoe libilibi e sori?
2 Na Mateus 24:37-39, Jesus Krestes ben agersi den dei foe Noa nanga den lasti dei na ini san wi de nownowde. A ben taki: „Neleki fa den dei foe Noa ben de, na so a denoja foe a Manpikin foe libisma sa de. Bikasi neleki fa den ben de ini den dei bifo a froedoe, den ben e njan èn ben e dringi, man ben e trow èn den ben e gi oema foe trow, te leki a dei di Noa ben go na ini na ark; èn den no ben poti prakseri na tapoe, te leki a froedoe ben kon èn a ben figi den alamala poeroe, èn na so a denoja foe a Manpikin foe libisma sa de.”
3 A Froedoe di ben kon na tapoe grontapoe, ben figi ala sma poeroe di no ben poti prakseri na tapoe a warskow boskopoe foe Gado. Ma a no ben figi Noa nanga en osofamiri poeroe. Den „ben go na ini na ark”, so leki fa Jesus ben taki. Foe di den ben gi densrefi ini na anbegi foe Gado, meki Jehovah ben gi den wan pasi foe lowe. A di foe toe boekoe foe Petrus, kapitel 2:5, 9, e sori go na a pasa di Noa nanga en osofamiri ben pasa libilibi, èn a e taki: „En [Gado] . . . ben kibri Noa, wan preikiman foe regtfardikifasi, makandra nanga seibi tra sma di a ben tjari wan froedoe kon na tapoe wan grontapoe foe ogri sma. Jehovah sabi fa foe kibri sma foe tesi, di e gi densrefi ini na anbegi foe en.” Jesus ben agersi den dei foe Noa nanga den lasti dei, foe sori taki moro foeroe sma no ben sa waka na baka a warskow boskopoe foe Gado. Tokoe, ini na agersitori dati, a ben sori taki a troe toe taki Noa nanga en osofamiri ben gi jesi na Jehovah Gado, taki den ben go na ini na ark, èn taki den ben pasa a bigi Froedoe libilibi. A pasa di Noa nanga en osofamiri pasa libilibi, e sori tapoe a pasa di den getrow foetoeboi foe Gado sa pasa a kaba foe a grontapoe disi libilibi.
A fosi jarihondro model
4. Sortoe sani ben feni presi bifo a pori foe Jerusalem ini 70 Gewoon Teri, leki wan kontroe foe den wortoe foe Jesus?
4 Jesus ben taki toe foe sani di ben sa feni presi na a kaba foe a grontapoe disi. Na Mateus 24:21, 22 wi e leisi: „Dan wan bigi banawtoe sa de so leki sensi a bigin foe grontapoe te now no ben kon ete èn no sa kon moro toe. Foe taki en leti, efoe den no ben koti den dei sjatoe, dan no wan skin no ben sa kisi froeloesoe; ma foe den wan di froekisi ede, den dei dati sa koti sjatoe.” Den wortoe disi ben abi wan fosi kontroe ini a fosi jarihondro foe wi Gewoon Teri. Ini 66 Gewoon Teri, den legre foe Rome na ondro Cestius Gallus ben lontoe a foto Jerusalem. Den legre foe Rome ben doro a momenti foe meki a skotoe foe a tempel kon swaki foe di den ben diki olo na ondro en, èn foeroe djoe ben de klariklari foe gi densrefi abra. Ma sondro taki den ben froewakti dati, èn sondro taki den ben abi wan reide foe doe dati, Cestius Gallus ben meki den legre foe en hari gowe. Di den kresten si taki den Romesma ben hari gowe, dan den kresten ben handri na tapoe den wortoe foe Jesus, di a ben taki foeroe jari bifo dati: „Te oenoe si den kampoe foe den legre lontoe Jerusalem, dan sabi taki a pori foe en kon krosibei. Dan, meki den wan ini Juda lowe gowe na den bergi, èn meki den wan na mindri foe en hari gowe èn meki den wan di de ini den boiti presi, no kon baka ini a foto” (Lukas 21:20, 21). Den djoe di ben tron kresten, den wan di ben froekisi, ben gowe wantewante libi a foto Jerusalem di ben sa kisi pori, èn na so wan fasi den ben kisi froeloesoe foe a takroe pori di ben kon na en tapoe heri esi baka dati. Ini 70 Gewoon Teri, den legre foe Rome na ondro generaal Titus ben drai kon baka. Den ben meki kampoe lontoe Jerusalem, den ben lontoe a foto foe teki en abra èn den ben pori en.
5. Na sortoe fasi a banawtoe na tapoe Jerusalem ben koti sjatoe na ini 70 Gewoon Teri?
5 A djoe historia skrifiman, Josephus, e froeteri taki 1.100.000 djoe dede ala di 97.000 ben pasa libilibi èn den ben teki den ini katibo. Den djoe dati di no ben de kresten èn di ben pasa libilibi, no ben de kwetikweti „den wan di a ben froekisi” foe Jesus en profeititori. Ala di a ben e taki nanga a djoe nâsi dati di ben opo ensrefi kontrari Gado, Jesus ben taki: „Loekoe! Den e libi oen oso leigi na baka. Bikasi mi e taigi oenoe: Bigin nanga now, oenoe no sa si mi kwetikweti moro, te leki oenoe taki: ’Blesi foe a sma di e kon ini Jehovah nen!’” (Mateus 23:38, 39) No wan tori no skrifi di e taki, dati na a lasti momenti, den djoe dati di ben fasi na Jerusalem, ben erken Jesus leki a Mesias èn taki den ben tron kresten, èn taki Jehovah ben feni den boen. Ma tokoe a banawtoe di ben kon na tapoe Jerusalem ini 70 Gewoon Teri ben koti sjatoe. A lasti tron di a legre foe Rome ben lontoe en foe teki en abra no ben tan langa. Disi ben gi wan toe djoe na okasi foe pasa libilibi, foe den seni den nomo go leki srafoe na difrenti presi foe a tirimakti foe Rome.
Wan bigi ipi foe sma di pasa libilibi
6, 7. (a) Sortoe bigi relisi foto moesoe kisi pori ete, èn foe sortoe banawtoe di no abi en speri, a de wan pisi? (b) San Johanes ben taki na fesi foe a bigi banawtoe di e kon na tapoe a grontapoe disi?
6 Ala di a pori di Jerusalem ben pori ini 70 Gewoon Teri ben tjari wan „bigi banawtoe” troetroe na tapoe a relisi foto dati, tokoe a moro bigi kontroe foe den wortoe foe Jesus moesoe feni presi ete. Wan moro bigi relisi foto, Babilon a Bigiwan, a grontapoe tirimakti foe falsi relisi, abi foe ondrofeni wan bigi banawtoe di sa tjari dede kon, di sa waka na fesi foe wan banawtoe di no abi en speri, na tapoe a tra pisi foe a seti foe sani foe Satan (Mateus 24:29, 30; Openbaring 18:21). So wan 26 jari baka a pori foe Jerusalem, na apostel Johanes ben skrifi na Openbaring 7:9-14 foe a bigi banawtoe disi di sa lontoe a heri grontapoe. A ben sori taki wan bigi ipi sma ben sa pasa a banawtoe disi libilibi.
7 Sma kan kon sabi den sma disi di e pasa libilibi èn di den e kari a „bigi ipi”, na wan toe fasi fa den e handri sondro foe draidrai. Akroederi Openbaring 7:14, wan foe den 24 owroeman na hemel ben taigi Johanes: „Den na den wan di komoto na a bigi banawtoe, èn den wasi den langa krosi foe den èn den meki den weti ini a broedoe foe a Pikin Skapoe.” Ija, a bigi ipi e prèise Jehovah leki a fonten foe a froeloesoe foe den. Den e sori bribi ini Jesus en broedoe di lon èn den abi wan regtfardiki posisi na fesi foe a Mekiman foe den, nanga na fesi foe a Kownoe di a poti, Jesus Krestes.
8. Sortoe moi matifasi de na mindri a „bigi ipi” nanga den wan di tan abra foe den salfoe brada foe Jesus?
8 Ini a ten disi, pikinmoro feifi miljoen memre foe a bigi ipi e libi na ondro na aktief fesiman-wroko foe a hemel Kownoe Jesus Krestes. Den e saka densrefi na ondro Krestes èn den abi krosibei demakandra nanga den salfoe brada foe en di de djaso na grontapoe ete. Jesus e taki foe a fasi fa a bigi ipi e handri nanga den salfoewan disi: „Foe troe mi e taigi oenoe: ’Foe so fara oenoe ben doe en gi wán foe den moro pikinwan foe den brada foe mi, oenoe ben doe en gi mi” (Mateus 25:40). Foe di den e gi jepi na den salfoe brada foe Krestes, sondro foe prakseri densrefi nomo, meki den wan foe a bigi ipi e kisi a kroetoe taki den doe boen gi Jesus ensrefi. Disi e jepi den foe abi wan fasti matifasi nanga Jesus Krestes èn nanga Jehovah Gado. Den kisi a grani foe moksi densrefi nanga a salfoe fikapisi foe tron Kotoigi foe Gado èn foe tron sma di e tjari a nen foe en. — Jesaja 43:10, 11; Joèl 2:31, 32.
Tan na ai
9, 10. (a) Sortoe sani wi moesoe doe foe tan hori a regtfardiki posisi di wi abi na fesi foe a Manpikin foe libisma? (b) Fa wi moesoe handri so taki wi kan „tan na ai”?
9 A bigi ipi moesoe hori a regtfardiki posisi foe den na fesi foe a Manpikin foe libisma sondro foe stòp, èn disi e aksi foe den taki den moesoe tan na ai te na a kaba. Jesus ben taki disi krinkrin di a ben taki: „Poti prakseri na tapoe oensrefi, taki noiti oen ati no kon hebi nanga njan pasa marki èn nanga dringi pasa marki èn nanga den broko-ede foe a libi, èn a dei dati wantewante, ini wán momenti e kon na oen tapoe leki wan trapoe. Bika a sa kon na tapoe ala den sma di e libi na heri grontapoe. Foe dati ede, tan na ai, ala ten e begi tranga so taki oenoe kan pasa ala den sani disi di troetroe sa feni presi, èn foe tanapoe na fesi foe a Manpikin foe libisma.” — Lukas 21:34-36.
10 Efoe wi wani foe tanapoe na fesi foe a Manpikin foe libisma, dan a moesoe feni wi boen. Dati no sa man efoe wi e gi pasi taki a fasi fa a grontapoe disi e denki, abi krakti na tapoe wi. A fasi fa grontapoe e denki, kan kori sma esi-esi èn a kan tjari wan sma so fara foe gi ensrefi abra na prisiri foe a skin noso foe kon hebi toemoesi nanga den problema foe a libi so taki a no e tan hori Kownoekondre afersi na a fosi presi moro (Mateus 6:33). So wan fasi foe waka e meki wan sma kon swaki na jeje fasi èn a ben kan meki taki a abi wan mi-no-ke fasi gi den frantiwortoe di a abi na Gado nanga na tra sma. A ben kan tron inaktief noso a ben kan meki taki a presi di a abi ini a gemeente kon ini kefar, foe di a doe wan serjoesoe sondoe, noso kande a e sori wan fasi srefi taki a no abi berow. Ibri sma persoonlijk ini a bigi ipi moesoe poti prakseri na tapoe ensrefi. A moesoe tan aparti foe na ogri grontapoe disi èn den sani di a grontapoe e doe. — Johanes 17:16.
11. Sortoe bijbel gronprakseri sa jepi wi foe pasa Armagedon libilibi, te wi e fiti a gronprakseri dati ini wi libi?
11 Foe doro a marki dati, Jehovah gi san wi abi fanowdoe, nanga jepi foe en Wortoe, en santa jeje, nanga en organisâsi di wi man si. Wi moesoe njanboen foe den sani disi dorodoro. Boiti dati, wi moesoe abi wan fasi foe begi doronomo èn wi moesoe gi jesi na Gado efoe wi e froewakti foe a feni wi boen. Wan sani di wi moesoe doe, na taki wi no moesoe wani si ogridoe na ai srefisrefi. A Psalm singiman ben taki: „Mi no sidon nanga sma di no e taki troe; èn mi no e go na inisei na den sma di e kibri san den de troetroe. Mi no wani si a gemeente foe ogridoeman na ai, èn nanga na ogriwan mi no e sidon. No teki mi sili makandra nanga den sondari, èn mi libi makandra nanga den man di abi broedoe paiman” (Psalm 26:4, 5, 9). Jongoewan so srefi owroewan ini a kresten gemeente, moesoe skotoe a demakandra di den abi nanga den wan di no gi densrefi abra na Jehovah. Foe meki Gado feni wi boen, wi e doe moeti foe de sondro fowtoe èn sondro flaka foe a grontapoe (Psalm 26:1-5; Jakobus 1:27; 4:4). Foe dati ede, wi sa de seiker taki, na Armagedon, Jehovah no sa figi wi poeroe foe dede makandra nanga den ogri sma.
Son wan „kwetikweti no sa dede noiti”
12, 13. (a) Bifo Jesus ben opo Lasarus baka, sortoe wortoe Jesus ben taigi Marta di Marta no ben froestan dorodoro? (b) San Jesus no ben wani taki di a ben taki foe a dede di wan toe sma ’kwetikweti no sa dede noiti’?
12 A e naki wi ati srefisrefi foe prakseri foe a pasa di wi kan pasa a kaba foe a seti foe sani disi libilibi èn na okasi di wi abi taki noiti wi no sa abi foe dede. Disi na a froewakti di Jesus ben gi wi. Leti bifo Jesus ben opo en mati Lasarus baka foe dede, a ben taigi Marta, a sisa foe Lasarus: „Mi na a opobaka nanga a libi. A sma di e sori bribi ini mi, sa kon na libi, awinsi a dede; èn ibri sma di e libi èn e sori bribi ini mi, kwetikweti no sa dede noiti. Joe e bribi disi?” Marta ben bribi ini na opobaka, ma a no ben froestan ala sani di Jesus ben e taki. — Johanes 11:25, 26.
13 Jesus no ben abi na prakseri taki den getrow apostel foe en ben o tan na libi na ini libisma skin èn taki noiti den no ben sa dede. Kontrari foe dati, a ben sori baka ten, taki den disipel foe en ben sa dede (Johanes 21:16-23). Ija, a salfoe di den ben salfoe nanga santa jeje tapoe a Pinksterfesa ini 33 Gewoon Teri, ben wani taki dati den ben sa abi foe dede foe man kisi na erfenis foe den na hemel leki kownoe nanga priester (Openbaring 20:4, 6). Foe dati ede, baka wan pisi ten, ala den kresten foe a fosi jarihondro dede. Ma a sani di Jesus ben taki, a ben taki nanga wan sani na prakseri. Den wortoe foe en, foe libi sondro foe dede oiti, sa kon troe.
14, 15. (a) Fa den wortoe ’kwetikweti no sa dede noiti’ di Jesus ben taki, sa kon troe? (b) San na a situwâsi foe a grontapoe disi, ma sortoe howpoe den regtfardikiwan abi?
14 Wan sani de seiker taki den getrow salfoe kresten noiti sa abi foe dede foe têgo (Openbaring 20:6). Den wortoe foe Jesus e sori so srefi go na wan spesroetoe ten te Gado sa boemoei na ini den afersi foe libisma èn te a sa figi ogridoe poeroe foe grontapoe, so leki fa a ben doe ini den dei foe Noa. Den getrow wan di e doe a wani foe Gado na a ten dati, no sa abi foe dede te Gado tjari en kroetoe kon. Na presi foe dati, neleki Noa nanga en osofamiri, den sa abi na okasi foe pasa a pori foe wan grontapoe libilibi. So wan howpoe de tranga, foe di a abi en gron na tapoe den bijbelleri èn foe di wi kan agersi en nanga eksempre. (Teki gersi Hebrewsma 6:19; 2 Petrus 2:4-9.) A kontroe foe bijbel profeititori e sori taki, heri esi a grontapoe foe a ten disi di meki foe wan onregtfardiki libisma libimakandra, sa kon na wan kaba ini wan pori. A situwâsi foe a ten disi no kan kenki moro, foe di grontapoe ogri sote taki a no man kon boen moro. A sani di Gado ben taki foe a grontapoe ini den dei foe Noa, de troe toe gi a grontapoe foe a ten disi. Orgidoe e foeroe na ati foe a moro bigi pisi foe libisma, èn a prakseri foe den takroe ala ten. — Genesis 6:5.
15 Jehovah gi pasi taki libisma tiri grontapoe foeroe hondro jari langa, sondro taki Gado boemoei na ini den afersi, ma pikinmoro, dan a ten foe den kaba. Heri esi Jehovah sa kiri ala ogrisma foe grontapoe, so leki fa bijbel e taki (Psalm 145:20; Odo 2:21, 22). Ma a no sa pori den regtfardikiwan makandra nanga den ogriwan. Noiti Gado doe so wan sani! (Teki gersi Genesis 18:22, 23, 26.) Foe san ede a ben sa wani foe pori den wan di e doe moeiti foe dini en na wan getrowfasi èn nanga frede gi Gado? A de reidelek nomo taki Jehovah en getrow anbegiman di de na libi ete te a bigi banawtoe sa bigin, sa feni a boen foe en èn den no sa kisi pori, neleki fa Noa nanga en osofamiri no ben kisi pori di na ogri grontapoe foe den dei foe en ben kon na wan kefalek takroe kaba (Genesis 7:23). Den sa feni kibri foe Gado èn den sa pasa a kaba foe a grontapoe disi libilibi.
16. Sortoe wondroe sani sa feni presi na ini a njoen grontapoe, èn san dati sa wani taki gi den sma di sa pasa libilibi?
16 San sa feni presi baka dati? Ini a njoen grontapoe, blesi di e meki sani kon boen baka, sa lon go na a libisma famiri, te den wini di wi sa kisi foe Jesus en froeloesoe-ofrandi e doe en wroko dorodoro. Bijbel e taki foe wan simbôlis „liba foe watra foe libi, di krin leki kristal, di e lon kon foe a kownoestoeroe foe Gado èn foe a Pikin Skapoe go na a mindri foe na edepasi. Èn na ala toe sei foe a liba, bon foe libi ben de di ben e meki twarfoe tron froktoe, ibri moen den e meki den froktoe. Èn den wiwiri foe den bon ben de foe dresi den nâsi” (Openbaring 22:1, 2). A de wan toemoesi moi sani foe taki, dati „dresi” abi na ini en toe, a wini na tapoe a dede di wi kisi foe Adam! „A sa swari dede troetroe foe têgo, èn a Soeverein Masra Jehovah troetroe sa figi watra-ai foe ala den fesi” (Jesaja 25:8). So boen, den wan di pasa a bigi banawtoe libilibi go na ini a njoen grontapoe, noiti no sa abi foe miti nanga dede!
Wan seiker howpoe
17. O seiker a howpoe de taki son sma sa pasa Armagedon libilibi èn „kwetikweti no sa dede noiti”?
17 Wi kan abi dorodoro froetrow tapoe a howpoe disi di de wan froewondroe sani? Seiker! Jesus ben sori Marta taki wan ten ben sa de pe sma ben sa libi sondro foe dede oiti (Johanes 11:26). Boiti dati, ini kapitel 7 foe na Openbaring di Jesus ben gi Johanes, a ben tjari kon na krin taki wan bigi ipi e komoto na a bigi banawtoe èn den sa pasa en libilibi. Wi kan bribi Jesus Krestes èn a historia tori foe a Froedoe foe a dei foe Noa? Sondro misi! Moro fara, bijbel abi tra tori foe okasi di Gado ben kibri den foetoeboi foe en libilibi pasa den pisi ten foe kroetoe èn di den nâsi ben fadon. Wi moesoe froewakti moro mendri foe en ini a ten disi foe a kaba? Wan sani de di wi Mekiman no man doe? — Teki gersi Mateus 19:26.
18. Fa wi kan de seiker taki wi sa libi ini Jehovah en regtfardiki njoen grontapoe?
18 Te wi e dini Jehovah getrow nownowde, dan wi abi a djaranti foe libi foe têgo ini en njoen grontapoe. Gi foeroe miljoenmiljoen sma, di wi no man teri, libi na ini a njoen grontapoe dati sa kon gi den nanga jepi foe na opobaka. Tokoe, ini a ten foe wi, miljoenmiljoen sma foe a pipel foe Jehovah — ija, wan bigi ipi di no wan sma kan teri noso no kan skotoe a nomroe foe den — sa abi na aparti grani foe pasa a bigi banawtoe libilibi. Èn noiti den no sa abi foe dede.
Grantangi, tjari disi kon na krin
◻ Fa a pasa di sma sa pasa Armagedon libilibi, ben prenki na fesi ini den dei foe Noa?
◻ San wi moesoe doe foe tan tanapoe te Jesus e kon foe tjari den kroetoe foe Jehovah kon?
◻ Foe san ede wi kan taki dati den sma di pasa Armagedon libilibi „kwetikweti no sa [abi foe] dede noiti”?
[Prenki na tapoe bladzijde 25]
Kresten ben lowe foe a banawtoe na tapoe Jerusalem