Joe sa kisi froeloesoe te Gado sa handri?

„Efoe den no ben koti den dei dati sjatoe, dan no wan skin no ben sa kisi froeloesoe; ma foe den wan di [Gado] froekisi ede, den dei dati sa koti sjatoe.” — MATEUS 24:22.

1, 2. (a) Foe san ede a de wan gewoon sani foe abi belangstelling gi a tamara foe wi? (b) A abi di sma abi belangstelling gi a tamara ben kan abi foe doe nanga sortoe prenspari aksi?

O MENI belangstelling joe abi gi joesrefi? Foeroe sma na ini a ten disi e broko den ede soso gi a boen foe densrefi, den e prakseri densrefi nomo. Tokoe bijbel no e kroetoe a abi di wi abi joisti belangstelling gi sani di abi krakti na wi tapoe (Efeisesma 5:33). Dati wani taki so srefi a belangstelling di wi abi gi a tamara foe wi. So boen, a ben sa de wan gewoon sani efoe joe ben sa wani sabi fa a tamara foe joe tan. Joe abi belangstelling gi dati?

² Wi kan de seiker taki den apostel foe Jesus ben abi so wan belangstelling gi a tamara foe den (Mateus 19:27). Pikinmoro seiker dati ben de wan reide foe san ede den ben poti wan aksi di den ben de nanga Jesus na tapoe na Olijfbergi. Den ben aksi: „O ten den sani disi sa de, èn san sa de a marki te ala den sani disi sa kon na wan kaba?” (Markus 13:4) Jesus no ben weigri foe poti prakseri na tapoe a normaal belangstelling di sma abi gi a tamara — a belangstelling foe den èn foe wi. Ibri tron baka a ben poti krakti na tapoe foe sori fa a sani di ben sa pasa na ini a ten di e kon, ben sa abi krakti na tapoe den bakaman foe en èn san ben sa pasa te foe kaba.

3. Foe san ede wi e taki dati a piki foe Jesus abi foe doe nanga a ten foe wi?

³ A piki foe Jesus ben gi wan profeititori di abi wan bigi kontroe na ini a ten foe wi. Wi kan si disi na den grontapoe orlokoe èn tra feti na ini wi jarihondro, den gronseki di meki taki kefalek foeroe sma lasi libi, a mankeri foe njanjan di tjari siki nanga dede, nanga den plaag — bigin nanga a Spanjoro Griep di ben panja na ala sei, foe 1918 te go miti na AIDS krawasi foe a ten disi. Ma foeroe foe a piki foe Jesus ben abi wan kontroe toe na ini sani di ben kon na fesi èn na ini a pori foe Jerusalem nanga jepi foe den Romesma na ini 70 G.T. Jesus ben warskow den disipel foe en: „Loekoe boen gi oensrefi; den sa gi oenoe abra na den kroetoebangi foe a kontren, èn den sa fon oenoe na ini den snoga èn den sa meki oenoe tanapoe na fesi foe tiriman nanga kownoe foe mi ede, leki wan kotoigi gi den.” — Markus 13:9.

San Jesus ben taki na fesi, èn fa a ben kon troe

4. San na wan toe warskow di ben de na ini a piki foe Jesus?

⁴ Jesus no ben taki na fesi wawan fa tra sma ben sa handri nanga den disipel foe en. A ben warskow den toe fa densrefi moesoe handri. Foe eksempre: „Te oenoe e si a tegoe sani di e tjari pori kon, e tanapoe na wan presi pe a no moesoe tanapoe (a leisiman moesoe gebroiki a koni foe man si sani krin), dan meki den wan di de na Judea lowe go na den bergi” (Markus 13:14). A tori di de a srefi na Lukas 21:20 e taki: „Te oenoe e si taki legre kampoe lontoe Jerusalem.” Fa dati ben sori foe de soifri so na ini a fosi kontroe?

5. San ben pasa na mindri den djoe na Judea na ini 66 G.T.?

⁵ The International Standard Bible Encyclopedia (1982) e taigi wi: „Den djoe ben kakafoetoe moro nanga moro na ondro a tiri foe Rome èn den tiriman foe foto ben doe moro nanga moro ogridoe nanga tranga, den ben ogri-ati, èn no ben de eerlijk. Na wan opo fasi oproeroe ben bigin na ini 66 G.T. . . . A feti ben bigin di den Selowtoesma ben teki Masada, èn baka dati, na ondro a tiri foe Menahem den ben teki waka go na Jerusalem. Na a srefi ten den ben slakti den djoe na ini a foto Cesarea di ben de na ondro wan tiriman, èn njoensoe foe a kefalek takroe ogridoe disi ben panja go na a heri kondre. Den ben kerfoe Jari 1 te go miti Jari 5 foe na oproeroe, na tapoe den njoen pikin moni di den ben meki.”

6. Na oproeroe di den djoe ben meki, ben meki den Romesma handri na sortoe fasi?

⁶ A di foe Twarfoe Legioen foe Rome na ondro Cestius Gallus, ben waka go komoto na Siria, ben pori Galilea nanga Judea, èn baka dati den ben go feti nanga a mamafoto, èn den ben teki srefi a tapoesei pisi foe „Jerusalem, a santa foto” (Nehemia 11:1; Mateus 4:5; 5:35; 27:53). A boekoe The Roman Siege of Jerusalem e taki sjatoe fa sani ben waka: „Feifi dei langa den Romesma ben proeberi foe kren abra a skotoe foe Jerusalem, ma ibri tron baka den ben jagi den go na baka. Te foe kaba, den djoe fetiman ben gi abra, bikasi den no ben man nanga den peiri di ben fadon kon na den tapoe leki alen. Den sroedati foe Rome ben meki wan testudo — a fasi fa den ben poti den skilt foe den na makandra na tapoe den ede foe kibri densrefi — nanga san den ben diki olo na ondro a skotoe èn ben proeberi foe soetoe faja gi a portoe. Den sroedati [foe Jerusalem] ben kon broeja kefalek.” Den kresten di ben de na ini a foto ben kan memre den wortoe foe Jesus èn ben kon si taki a tegoe sani ben e tanapoe na ini wan santa presi.a Ma nanga a lontoe di den ben lontoe a foto, fa den kresten disi ben kan lowe gowe soleki fa Jesus ben gi a rai?

7. Di den Romesma ben de foe wini na ini 66 G.T., san den ben doe?

⁷ A historia skrifiman Flavius Josephus e froeteri: „Cestius [Gallus] no ben sabi taki den sma di a ben lontoe ben lasi howpoe èn a no ben sabi so srefi den firi foe a pipel, tokoe wantronso a ben komanderi den man foe en foe tapoe nanga a feti, èn ala di a no ben lasi a feti, tokoe a ben libi a howpoe di a ben abi foe wini a feti, èn ben doe wan sani di no wan sma ben prakseri, a ben hari gowe foe a foto” (The Jewish War, II, 540 [xix, 7]). Foe san ede Gallus ben hari gowe? Awansi san a reide ben de toe, a hari di a ben hari gowe, ben gi den kresten na okasi foe gi jesi na a komando foe Jesus èn foe lowe gowe na den bergi pe den ben kan kisi kibri.

8. San ben de a di foe toe pisi foe a moeiti di den Romesma ben doe teige Jerusalem, èn san den sma di ben tan na libi, ben ondrofeni?

⁸ A gi di den ben gi jesi, ben hori den na libi. No langa na baka, den Romesma ben opo foe masi na oproeroe. A feti na ondro a tiri foe generaal Titus ben abi wan heimarki na ini a lontoe di a ben lontoe Jerusalem bigin na ini april te go miti augustus 70 G.T. A e gro wan sma skin foe leisi a sani di Josephus skrifi foe a fasi fa den djoe ben pina. Boiti den djoe di ben dede na a feti nanga den Romesma, groepoe foe djoe di ben gens makandra ben slakti makandra, èn angri ben meki taki sma ben njan tra libisma. Na a ten foe a wini foe den Romesma, 1.100.000 djoe ben dede.b Foe den 97.000 sma di ben tan na libi, den ben kiri wan toe wantewante; èn trawan den ben meki tron srafoe. Josephus e taki: „Den wan di ben owroe pasa tinaseibi jari, den ben poti na ini isri boei èn ben seni den foe go doe tranga strafoeman-wroko na Egipti, ala di Titus ben gi foeroe foe den na den distrikt foe dede na ini den theater nanga jepi foe a feti-owroe noso nanga jepi foe werdri meti.” Ala di den ben loekoe foe si san moesoe pasa nanga den te foe kaba, 11.000 foe den strafoeman ben dede foe angri.

9. Foe san ede den kresten no ben ondrofeni den sani di den djoe ben ondrofeni te foe kaba, ma sortoe aksi e tan de ete?

⁹ Den kresten ben kan de nanga tangi taki den ben gi jesi na a warskow foe Masra èn ben lowe gowe libi a foto bifo a legre foe Rome ben drai kon baka. Na a fasi disi den ben froeloesoe foe wan pisi foe san Jesus ben kari wan ’bigi banawtoe soleki foe sensi a bigin foe grontapoe te now no kon ete, èn no sa kon moro toe’ na tapoe Jerusalem (Mateus 24:21). Jesus ben taki moro fara: „Foe taki en leti, efoe den no ben koti den dei dati sjatoe, dan no wan skin no ben sa kisi froeloesoe; ma foe den wan di [Gado] froekisi ede, den dei dati sa koti sjatoe” (Mateus 24:22). San dati ben wani taki na a ten dati, èn san a wani taki na ini a ten disi?

10. Fa wi froeklari Mateus 24:22 bifo?

¹⁰ Na ini a ten di pasa wi ben froeklari taki a ’skin di ben kisi froeloesoe’ ben sori go na den djoe di ben tan libi pasa a banawtoe na tapoe Jerusalem na ini 70 G.T. Den kresten ben lowe gowe, èn foe dati ede Gado ben kan meki den Romesma tjari wan pori esi-esi. Nanga tra wortoe, na foe di „den wan di [Gado] froekisi” no ben de ini kefar, meki den dei foe a banawtoe ben kan koti sjatoe, di ben meki wan toe djoe „skin” ben kan kisi froeloesoe. Wi ben denki taki den djoe di ben tan na libi ben prenki den sma di ben sa libi pasa a bigi banawtoe di sa kon na ini wi ten. — Openbaring 7:14.

11. Foe san ede a gersi taki wi moesoe loekoe a froeklari foe Mateus 24:22 ete wan tron?

¹¹ Ma a froeklari dati de akroederi a sani di pasa na ini 70 G.T.? Jesus ben taki dati libisma „skin” ben sa kisi „froeloesoe” foe a bigi banawtoe. Joe ben sa gebroiki a wortoe „froeloesoe” gi den 97.000 sma di ben tan na libi, te joe e hori na prakseri taki heri esi doesoendoesoen foe den ben dede foe angri noso taki sma ben slakti den na ini wan theater? Josephus e taki foe wán theater na Cesarea: „A nomroe foe den sma di ben dede na ini feti nanga werdri meti noso na ini feti nanga makandra noso di sma ben bron libilibi, ben de moro leki 2500 sma.” Ala di den no ben dede di den Romesma ben lontoe den, den no ben kisi „froeloesoe” kwetikweti. Èn Jesus ben sa si den neleki den kolokoe sma di ben sa tan na libi pasa a „bigi banawtoe” di moesoe kon?

Skin kisi froeloesoe — Fa?

12. Soema ben de „den wan di [Gado] froekisi” èn di Gado ben abi belangstelling gi, na ini a fosi jarihondro?

¹² Na a ten foe 70 G.T., Gado no ben si den troetroe djoe moro leki a pipel di a ben froekisi. Jesus ben sori taki Gado ben trowe a nâsi dati èn a ben sa meki a mamafoto foe a pipel, a tempel, nanga a sistema foe na anbegi kon na wan kaba (Mateus 23:37–24:2). Gado ben froekisi wan njoen nâsi, Israèl na jejefasi (Tori foe den Apostel 15:14; Romesma 2:28, 29; Galasiasma 6:16). A ben meki foe mansma nanga oemasma di a ben froekisi foe ala nâsi èn a ben salfoe den nanga santa jeje (Mateus 22:14; Johanes 15:19; Tori foe den Apostel 10:1, 2, 34, 35, 44, 45). Wan toe jari bifo Cestius Gallus ben opo go feti, Petrus ben skrifi gi „den wan di [Gado] ben froekisi akroederi a sabi di Gado, a Tata, sabi sani na fesi, nanga a santa di a jeje e santa”. Den wan disi di salfoe nanga santa jeje na „wan geslakti di den froekisi, wan kownoe priesterwroko, wan santa nâsi” (1 Petrus 1:1, 2; 2:9). Gado ben sa teki den wan disi di a froekisi, go na hemel foe tiri nanga Jesus. — Kolosesma 1:1, 2; 3:12; Titus 1:1; Openbaring 17:14.

13. San den wortoe foe Jesus na Mateus 24:22 ben sa kan wani taki?

¹³ A de wan jepi foe kon sabi soema na den wan di Gado ben froekisi, foe di Jesus ben taki na fesi taki den dei foe a banawtoe ben sa koti sjatoe „foe den wan di [Gado] froekisi ede”. A Griki wortoe di vertaal nanga „foe . . . ede” wi kan vertaal so srefi „gi a boen foe” noso „gi . . . boen” (Markus 2:27; Johanes 12:30; 1 Korentesma 8:11; 9:10, 23; 11:9; 2 Timoteus 2:10; Openbaring 2:3). So boen, Jesus ben kan taki: ’Efoe den dei dati no ben koti sjatoe, no wan skin ben sa kisi froeloesoe; ma gi a boen foe den wan di Gado froekisi, den dei dati sa koti sjatoe’c (Mateus 24:22). Wan sani ben feni presi di ben de ’gi a boen foe’ den kresten di Gado froekisi èn di ben fasi na Jerusalem?

14. Fa „skin” ben kisi froeloesoe di a Rome legre ben drai gowe baka na ini 66 G.T. sondro taki den sma ben froewakti dati?

¹⁴ Memre taki na ini 66 G.T. den Romesma ben waka pasa na ini a heri kondre, den ben teki a tapoesei pisi foe Jerusalem, èn ben bigin diki olo na ondro a skotoe. Josephus e taki: „Efoe a ben horidoro pikinso moro langa nomo nanga a lontoe di a ben lontoe a Foto, a ben sa kan teki a Foto wantewante.” Aksi joesrefi: ’Foe san ede a makti legre foe Rome wantronso tapoe nanga a feti èn „ben lowe gowe sondro wan reide’”? Rupert Furneaux, wan sabiman foe froeklari sroedati historia, e taki: „No wan historia skrifiman ben man gi iniwan boen reide gi a freimde èn takroe bosroiti foe Gallus.” Awansi san a reide ben de, a bakapisi ben de taki a banawtoe ben koti sjatoe. Den Romesma ben hari gowe, ala di den djoe ben feti nanga den di den e gowe. Fa a de nanga den kresten di ben salfoe èn „di [Gado] froekisi” èn di ben fasi na Jerusalem? A tapoe di den ben tapoe foe lontoe a foto ben wani taki dati den ben kisi froeloesoe foe iniwan kiri di ben kan de na a ten foe a banawtoe. Foe dati ede, den kresten dati di ben abi winimarki foe a koti di den dei foe a banawtoe ben koti sjatoe na ini 66 G.T., ben de a „skin” di ben froeloesoe, di kari na Mateus 24:22.

Fa a tamara foe joe sa de?

15. Foe san ede joe ben sa taki dati Mateus kapitel 24 moesoe abi wi spesroetoe belangstelling na ini a ten foe wi?

¹⁵ Wan sma ben sa kan aksi: ’Foe san ede mi moesoe abi spesroetoe belangstelling gi den wortoe disi foe Jesus di kon moro krin foe froestan?’ We, nofo reide de foe kon na a bosroiti taki a profeititori foe Jesus ben moesoe abi wan moro bigi kontroe, boiti den sani di ben pasa bifo 70 G.T. èn na ini 70 G.T.d (Teki gersi Mateus 24:7; Lukas 21:10, 11; Openbaring 6:2-8.) Gi someni tenti jari kaba den Jehovah Kotoigi preiki taki a moro bigi kontroe di sa pasa na ini wi ten, e boeweisi taki wi kan froewakti wan moro „bigi banawtoe” leti na wi fesi. Fa den profeiti wortoe na Mateus 24:22 sa kon troe na ini a ten foe a bigi banawtoe?

16. Sortoe troetori di e gi deki-ati, Openbaring e gi foe a bigi banawtoe di e kon moro krosibei?

¹⁶ Sowan toetenti jari na baka a banawtoe na tapoe Jerusalem, na apostel Johanes ben skrifi a boekoe Openbaring. A boekoe ben sori taki a troe taki bigi banawtoe de na wi fesi. Èn foe di wi abi belangstelling gi sani di abi krakti na tapoe wi persoonlijk, meki wi kan firi froelekti foe sabi taki na profeitis fasi Openbaring e gi wi a djaranti taki libisma skin sa libi pasa a bigi banawtoe disi di e kon. Johanes ben taki na fesi foe „wan bigi ipi . . . di komoto na ala nâsi nanga lo nanga pipel nanga tongo”. Soema na den? Wan sten foe hemel e piki: „Disi na den sma di komoto na a bigi banawtoe” (Openbaring 7:9, 14). Ija, sma sa de di sa pasa libilibi! Openbaring e gi wi inzicht toe fa sani sa waka go doro a bigi banawtoe di e kon èn fa Mateus 24:22 sa kon troe.

17. A bigin pisi foe a bigi banawtoe sa abi sortoe sani na ini toe?

¹⁷ A bigin pisi foe a banawtoe disi sa de wan feti nanga wan simbôlis hoeroe di nen „Babilon a Bigiwan” (Openbaring 14:8; 17:1, 2). En e prenki a grontapoe makti foe falsi relisi, nanga a krestenhèit di abi a moro bigi fowtoe. Akroederi den wortoe na ini Openbaring 17:16-18, Gado sa poti dati na ini na ati foe den politik groepoe foe go feti nanga a simbôlis hoeroe disi.e Prakseri san a feti dati sa gersi gi den salfoewan „di [Gado] froekisi” èn gi den kompe foe den, a „bigi ipi”. Ala di a feti disi di e tjari pori kon na tapoe relisi e go doro moro nanga moro, a ben sa kan gersi taki a sa figi ala relisi organisâsi poeroe, so srefi a pipel foe Jehovah.

18. Foe san ede a ben sa kan gersi taki no wan „skin” sa kisi froeloesoe na a bigin pisi foe a bigi banawtoe?

¹⁸ Disi na a ten pe den wortoe foe Jesus di wi e feni na Mateus 24:22 sa kon troe na wan moro bigi fasi. Neleki fa a ben gersi taki den wan na Jerusalem di Gado froekisi, ben de na ini kefar, a ben sa kan gersi kande taki den foetoeboi foe Jehovah de na ini kefar foe dede na a feti na tapoe relisi, neleki a feti dati ben sa figi ala „skin” foe a pipel foe Gado poeroe. Ma meki wi hori na prakseri san ben pasa na ini 66 G.T. A banawtoe di den Romesma ben tjari kon, ben koti sjatoe foe meki den salfoewan di Gado froekisi abi nofo okasi foe lowe gowe èn foe tan na libi. Foe dati ede, wi kan abi a froetrow taki a feti di sa tjari pori kon na tapoe relisi, no sa kisi na okasi foe kiri a heri gemeente foe troe anbegiman na grontapoe. A sa pasa heri esi, neleki „na ini wán dei”. Ma na wan noso tra fasi, a feti sa koti sjatoe, a no sa kisi na okasi foe doro a marki foe en, so taki a pipel foe Gado kan kisi „froeloesoe”. — Openbaring 18:8.

19. (a) San sa de krin foe si na baka a fosi pisi foe a bigi banawtoe? (b) Sortoe bakapisi disi sa abi?

¹⁹ Tra pisi foe Satan Didibri en organisâsi na grontapoe sa tan gi wan pisi ten, foe firi sari gi a lasi di den lasi demakandra nanga na owroe relisi hoeroe foe den (Openbaring 18:9-19). Tapoe wan spesroetoe momenti den sa si taki den troe foetoeboi foe Gado tan abra, „e tan na ini seikerfasi, den alamala di e libi sondro skotoe” èn a sa gersi taki a sa de makriki foe kisi den. Den wan di sa opo go feti nanga den sa skreki srefisrefi! Foe doe wan sani na tapoe wan troetroe feti nanga en foetoeboi noso na tapoe a kefar foe wan feti, Gado sa opo foe kroetoe den feanti foe en na ini a lasti pisi foe a bigi banawtoe. — Esekièl 38:10-12, 14, 18-23.

20. Foe san ede a di foe toe pisi foe a bigi banawtoe no sa tjari kefar kon gi a pipel foe Gado?

²⁰ A di foe toe pisi disi foe a bigi banawtoe sa de a srefi leki a sani di ben pasa na Jerusalem èn nanga den sma di ben libi na ini, na a di foe toe tron di den Romesma ben opo go feti na ini 70 G.T. A sa de wan ’bigi banawtoe soleki foe sensi a bigin foe grontapoe te now no kon ete [na a ten dati], nôno, èn no sa kon moro toe’ (Mateus 24:21). Ma wi kan de seiker taki den wan di Gado froekisi, nanga den kompe foe den, no sa de na ini kefar, na ini kefar foe dede. Ija, den no sa abi foe lowe go na wan presi na grontapoe. Den fosi jarihondro kresten na Jerusalem ben kan lowe komoto na a foto dati go na a bergi kontren, soleki na Pella, abra sei foe Jordan. Ma na ini a ten di e kon, den getrow Kotoigi foe Gado sa de na ala presi na grontapoe, so boen a presi pe den sa de no sa bepaal efoe noti sa pasa nanga den noso taki den sa kisi kibri.

21. Soema sa feti na a lasti feti, èn nanga sortoe bakapisi?

²¹ A pori no sa de nanga jepi foe den legre foe Rome noso iniwan tra wrokosani foe libisma. Na presi foe dati, a boekoe Openbaring e taki foe den legre di sa tjari strafoe kon, leki den komoto na hemel. Ija, a lasti pisi dati foe a bigi banawtoe sa doe, no nanga jepi foe iniwan legre foe libisma, ma nanga jepi foe „A Wortoe foe Gado”, a Kownoe Jesus Krestes, èn nanga jepi foe ’den legre di de na hemel’, so srefi den salfoe kresten di kisi wan opobaka. A „Kownoe foe den kownoe nanga Masra foe den masra” sa tjari wan strafoe kon di sa de moro krinkrin leki fa den Romesma ben doe na ini 70 G.T. A sa kiri ala libisma di e gens Gado — den kownoe, sroedati komandanti, fri sma nanga srafoe, pikinwan nanga bigiwan. Srefi den libisma organisâsi foe a grontapoe foe Satan sa kon na den kaba. — Openbaring 2:26, 27; 17:14; 19:11-21; 1 Johanes 5:19.

22. Na sortoe tra fasi „skin” sa kisi froeloesoe?

²² Hori na prakseri taki „skin”, foe den salfoe fikapisi èn foe a „bigi ipi”, sa froeloesoe kaba te Babilon a Bigiwan e kisi pori esi-esi èn krinkrin na ini a bigin pisi foe a banawtoe. So srefi na ini a lasti pisi foe a banawtoe, „skin” di lowe go na a sei foe Jehovah, sa kisi froeloesoe toe. Disi sa de kontrari srefisrefi nanga a sani di ben pasa te foe kaba nanga den oproeroe djoe na ini 70 G.T.!

23. San „skin” di tan na libi kan froewakti?

²³ Te joe e prakseri foe den sani di joe kan kisi na ini a tamara foe joe nanga foe den lobiwan foe joe, loekoe san na den pramisi na Openbaring 7:16, 17: „Den no sa pina foe angri noso dreiwatra moro, èn son no sa bron den moro èn no wan faja di e bron sa kisi den, bikasi a Pikin Skapoe di de na mindrisei foe a kownoestoeroe, sa wei den, èn a sa tjari den go na fonten foe watra foe libi. Èn a sa figi ala watra-ai poeroe na den ai.” Foe troe, dati na san a wani taki troetroe foe kisi „froeloesoe” na wan toemoesi moi fasi èn foe têgo.

[Foetoewortoe]

Fa joe ben sa piki?

◻ Sortoe toe pisi ben de na a feti di a legre foe Rome ben feti nanga Jerusalem?

◻ Foe san ede a no gersi taki den 97.000 djoe di ben tan na libi na ini 70 G.T. ben de a „skin” di kari na Mateus 24:22?

◻ Fa den dei foe a banawtoe foe Jerusalem ben koti sjatoe, èn fa „skin” ben kisi froeloesoe na a fasi disi?

◻ Na a bigi banawtoe di e kon moro krosibei, fa den dei sa koti sjatoe èn „skin” sa kisi froeloesoe?

[Prenki na tapoe bladzijde 27]

Djoe pikin moni di druk baka na oproeroe. Den Hebrew fokanti letter e taki „Jari toe”, dati wani taki 67 G.T., a di foe toe jari foe a srefidensi foe den

[Sma di abi a reti foe a prenki]

Pictorial Archive (Near Eastern History) Est.

[Prenki na tapoe bladzijde 28]

Rome pikin moni di druk na ini 71 G.T. Na a kroektoe-anoesei wan man foe Rome de nanga feti-sani; na a reti-anoesei wan djoe oema di e sari. Den wortoe IVDAEA CAPTA wani taki „Judea di den teki abra”

[Sma di abi a reti foe a prenki]

Pictorial Archive (Near Eastern History) Est.