Aksi foe leisiman
„A Waktitoren” foe 1 augustus 1996 ben taki: „Na ini a lasti pisi foe a banawtoe, ’skin’ di lowe go na a sei foe Jehovah, sa kisi froeloesoe.” Dati wani taki, dati na baka a fosi pisi foe a bigi banawtoe, foeroe njoen sma sa abra kon na a sei foe Gado?
Dati no ben de a sani di wi ben tjari kon na krin.
Den wortoe foe Jesus di wi e feni na ini Mateus 24:22, na a fosi presi sa kon troe na ini a ten di e kon te sma sa kisi froeloesoe foe a fosi pisi foe a bigi banawtoe di moesoe kon ete, a feti teige relisi. Na artikel ben taki: „Hori na prakseri taki ’skin’, foe a salfoe fikapisi èn foe a ’bigi ipi’, sa froeloesoe kaba te Babilon a Bigiwan e kisi pori esi-esi èn krinkrin na ini a bigin pisi foe a banawtoe.”
Den getrow sma disi no sa de ini kefar moro te Jesus nanga a hemel legre foe en sa handri na ini a lasti pisi foe a banawtoe. Ma soema sa libi pasa a pisi dati foe a banawtoe? Openbaring 7:9, 14 e sori taki wan bigi ipi di abi wan howpoe foe libi na grontapoe, sa pasa libilibi. Fa a de nanga den kresten di salfoe nanga santa jeje? „Aksi foe leisiman” na ini De Wachttoren foe 15 augustus 1990, ben taki foe san ede wi no kan taki finifini o ten a fikapisi foe den salfoewan sa teki go na hemel. So boen, a njoen artikel (1 augustus 1996) no ben taki a sani finifini, ma a ben taki soso: „So srefi na ini a lasti pisi foe a banawtoe, ’skin’ di lowe go na a sei foe Jehovah, sa kisi froeloesoe.”
Foe a tori efoe njoen sma sa man leri waarheid èn kon abra na a sei foe Gado na baka te a bigi banawtoe bigin, loekoe den wortoe foe Jesus di skrifi na ini Mateus 24:29-31. Na baka te a banawtoe bigin, dan a marki foe a Manpikin foe libisma sa kon de foe si. Jesus ben taki dati ala den lo foe grontapoe sa naki densrefi èn sa row. A no ben taki noti foe sma di ben sa kon froestan a situwâsi, ben sa sori berow, èn ben sa teki a sei foe Gado, èn taki den ben sa tron troe disipel.
Na a srefi fasi, na ini na agersitori foe den skapoe nanga den bokoboko, a Manpikin foe libisma e kon èn leki wan kroetoeman a e prati sma tapoe gron foe den sani di den ben doe noso no ben doe na ini a ten di pasa kaba. Jesus no ben taki noti foe sma di langa ten ben sori eigifasi leki bokoboko èn di ben drai baka wantronso èn ben kon tron leki skapoe. A e kon foe kroetoe tapoe gron foe san sma ben sori foe de kaba. — Mateus 25:31-46.
Ma, na ini a kefal disi, wi no moesoe tan hori wan idea na ini na afersi disi. A pipel foe Gado, den salfoewan nanga a bigi ipi, sabi san den abi foe doe na ini a ten disi — preiki èn meki disipel (Mateus 28:19, 20; Markus 13:10). Nownowde na a ten taki wi moesoe gi jesi na a froemane: „Foe di wi e wroko makandra nanga en, wi e aksi oenoe nanga tranga foe no teki a no-froedini boen-atifasi foe Gado èn misi a marki foe dati. Bika a e taki: ’Na ini wan boen ten mi ben jere oenoe, èn tapoe wan dei foe froeloesoe, mi ben jepi oenoe.’ Loekoe! Now na a spesroetoe boen ten. Loekoe! Now na a dei foe froeloesoe.” — 2 Korentesma 6:1, 2.