„San sa de a marki foe joe denoja?”
„Oten den sani disi sa de, èn san sa de a marki foe joe denoja èn foe a kaba foe a seti foe sani?” — MATEUS 24:3.
1, 2. San e sori taki sma abi belangstelling gi a ten di e kon?
MORO foeroe foe den sma abi belangstelling gi a ten di e kon. Joe toe? Na ini en boekoe Future Shock, Profesor Alvin Toffler ben sori tapoe „a gro di organisâsi di ben e gi densrefi na a stoeka foe a ten di e kon, e gro so wantronso”. A taki moro fara: ’Wi ben si a bigin foe den organisâsi di ben poti prakseri na tapoe a ten di e kon, foe di den e doe ondrosoekoe foe dati; a kon na fesi foe tijdschrift di taki foe a stoeka foe sani di kan pasa ini a ten di e kon ini Ingrisikondre, Fransikondre, Italia, Doisrikondre nanga den Verenigde Staten; a panja foe den lès foe den universiteit di abi foe doe nanga a stoeka foe a fasi fa foe taki sani na fesi, di o pasa ini a ten di e kon.’ Toffler ben bosroiti taki: „A no de foe taki, dati no wan sma kan ’sabi’ a ten di e kon dorodoro.”
2 A boekoe Signs of Things to Come e taki: „A leisi foe anoe, a loekoe ini kristal bol, a loekoe na stari èn a loekoe tapoe karta, I CHING (a nen foe wan boekoe foe Owstoekondre di e taki foe loekoeman-wroko), na alamala fasi foe loekoe sani, a wan moro dangra leki a trawan, foe gi wi wan idea san a spesroetoe ten di de na wi fesi kan tjari kon.” Ma na presi foe drai go na den libisma fasi foe doe sani, a moro boen foe wi loekoe go na wan fonten di ben gi boeweisi taki a boen — Jehovah.
3. Foe san ede a fiti foe loekoe go na Gado foe kisi sabi foe a ten di e kon?
3 A troe Gado ben taki: „Joisti so leki mi prakseri, na so a moesoe pasa; èn joisti so leki mi gi rai, na dati na a sani di sa kon troe” (Jesaja 14:24, 27; 42:9). Ija, Jehovah ben man foe gi libisma rai ini a tori foe den sani di o pasa, foeroetron a ben e doe so nanga jepi foe takiman di ben de libisma. Wan foe den profeiti disi ben skrifi: „Jehovah no sa doe noti, sondro foe tjari den froetrow afersi foe en kon na krin gi den foetoeboi foe en, den profeiti.” — Amos 3:7, 8; 2 Petrus 1:20, 21.
4, 5. (a) Foe san ede Jesus kan de wan jepi gi wi, te a abi foe doe nanga a ten di e kon? (b) Sortoe aksi, di ben abi difrenti pisi na ini, den apostel foe en ben aksi?
4 Jesus Krestes ben de a moro prenspari profeiti foe Gado (Hebrewsma 1:1, 2). Meki wi poti prakseri na tapoe wan foe den moro prenspari profeititori foe Jesus, di e taki na fesi foe den sani di e pasa lontoe wi nojaso. A profeititori disi e gi wi inzicht toe na ini san sa pasa djonsro te a disiten ogri seti foe sani e kon na wan kaba èn Gado poti wan paradijs na grontapoe na en presi.
5 Jesus ben boeweisi taki a ben de wan profeiti (Markus 6:4; Lukas 13:33; 24:19; Johanes 4:19; 6:14; 9:17). Foe dati ede, wi kan froestan taki, foe san ede den apostel foe en, di ben sidon nanga en na tapoe na Olijfbergi e loekoe abra Jerusalem, ben sa aksi en sani di abi foe doe nanga a ten di e kon: „Oten den sani disi sa de, èn san sa de a marki foe joe denoja èn foe a kaba foe a seti foe sani?” — Mateus 24:3; Markus 13:4.
6. Fa Mateus 24, Markus 13 nanga Lukas 21 abi foe doe nanga makandra; èn sortoe aksi moesoe abi wi belangstelling troetroe?
6 Joe sa feni na aksi foe den nanga a piki foe Jesus ini Mateus kapitel 24, Markus 13 nanga Lukas 21.a Na foeroe fasi den tori e froeteri sani di a trawan e mankeri, ma den no de a srefi. Foe eksempre, Lukas wawan e taki foe ’pestsiki ini a wan presi baka a trawan’ (Lukas 21:10, 11; Mateus 24:7; Markus 13:8). A e taki foe ensrefi taki wi moesoe aksi: Jesus ben e taki na fesi foe sani di ben sa feni presi soso na ini a ten di den arkiman foe en ben de na libi, noso a ben abi a ten foe wi na prakseri toe èn san a ten di e kon o tjari gi wi?
Den Apostel ben wani sabi
7. San na den sani di den apostel ben aksi spesroetoe, ma san ben de a bradi èn langa foe a piki foe Jesus?
7 Wantoe dei nomo bifo den ben kiri en, Jesus ben froeklari taki Gado trowe Jerusalem, a djoe mamafoto. A foto nanga en moi tempel ben sa kisi pori. Ne wantoe foe den apostel ben aksi foe wan ’marki foe Jesus’ denoja èn a kaba foe a seti foe sani’ (Mateus 23:37–24:3). A no de foe taki, dati na a fosi presi den ben abi a djoe seti foe sani nanga Jerusalem na prakseri, bika den no ben kan graboe a bradi èn langa foe san ben didon na den fesi. Ma di Jesus ben piki den, a ben loekoe go moro fara leki san ben pasa te na a ten dati èn ini 70 Gewoon Teri, di den Romesma ben pori Jerusalem. — Lukas 19:11; Tori foe den Apostel 1:6, 7.
8. San ben de wantoe foe den sani di sa pasa, di Jesus ben taki na fesi?
8 So leki fa joe kan leisi ini den dri Evangelie tori, dan Jesus ben taki foe nâsi di sa opo kontrari nâsi, èn kownoekondre kontrari kownoekondre, mankeri foe njanjan, gronseki, sani di sa de foe si di e gi sma frede èn foe marki foe hemel. Ini den jari na mindri a gi di Jesus ben gi a marki dati (33 Gewoon Teri) èn a pori foe Jerusalem (66-70 Gewoon Teri), falsi profeiti nanga falsi krestes ben sa opo kon. Den djoe ben sa froefolgoe den kresten, di ben e preiki a boskopoe foe Jesus.
9. Fa a profeititori foe Jesus ben kon troe ini a fosi jarihondro Gewoon Teri?
9 Den pisi disi foe a marki ben pasa troetroe, so leki fa a historia skrifiman Flavius Josefus e sori taki a de troe. A e skrifi taki srefi bifo den Romesma ben opo kon feti, falsi mesias ben gi sma deki-ati foe meki oproeroe. Toemoesi takroe gronseki ben de ini Judea èn na tra presi. Feti ben broko na ini difrenti presi foe a Romen tirimakti. Bigi angriten ben de? Ija, na so a de. (Teki gersi Tori foe den Apostel 11:27-30.) Èn fa a ben go nanga a Kownoekondre preikiwroko? Na a pisi ten foe a jari 60 noso 61 Gewoon Teri, di den ben skrifi a boekoe Kolosesma, sma ben jere ”a howpoe foe a boen njoensoe dati” foe a Kownoekondre foe Gado na alasei na ini Afrika, Asia nanga Europa.b — Kolosesma 1:23.
„BAKA DATI” a kaba
10. Foe san ede wi moesoe poti prakseri na tapoe a Griki wortoe toʹte, èn san a wani taki?
10 Ini wantoe pisi foe en profeititori, Jesus ben taki foe den sani di sa pasa leki den ben sa pasa baka makandra. A ben taki: „A boen njoensoe disi foe a kownoekondre sa preiki . . ., èn dan a kaba sa kon.” Bijbel ini Ingrisitongo e gebroiki a wortoe „dan” foeroetron, san wani taki nomo „foe dati ede” noso „ma” (Markus 4:15, 17; 13:23). Ma, na ini Mateus 24:14, „dan” abi en gron tapoe a Griki bijwortoe toʹte.c Griki koniman e taki dati toʹte na wan „bijwortoe di e sori a ten” èn di ben gebroiki „foe sori tapoe sani di e pasa baka makandra akroederi a ten” noso „foe sori sani di e pasa moro fara”. Foe dati ede Jesus ben taki na fesi dati a preiki foe a Kownoekondre ben sa feni presi èn dan (’baka dati’ noso ’moro fara’) „a kaba” ben sa kon. Sortoe kaba?
11. Fa Jesus ben poti prakseri na tapoe den sani di sa pasa èn di abi langalanga foe doe nanga a pori foe Jerusalem?
11 Wan foe den kontroe foe a profeititori foe Jesus, wi kan feni ini den sani di pasa èn di e tjari wi te na a kaba foe a djoe seti. Den orlokoe, gronseki, mankeri foe njanjan, èn so moro fara, di Jesus ben taki na fesi, ben pasa ini wan pisi ten foe 30 jari. Tokoe, foe bigin nanga Mateus 24:15, Markus 13:14 nanga Lukas 21:20, wi e leisi foe sani di pasa èn di ben abi langalanga foe doe nanga a pori di ben de krosibei, di a kaba ben de na a dromofo. — Loekoe a wan lin di meki nanga penti, na tapoe a lijst.
12. Fa den legre foe Rome ben abi foe doe nanga a kontroe foe Mateus 24:15?
12 Foe di den djoe ben meki oproeroe ini 66 Gewoon Teri, meki den Romesma ondro Cestius Gallus ben opo kon kontrari Jerusalem èn ben lontoe a foto disi di den djoe ben si leki santa (Mateus 5:35). Ala di den djoe ben feti baka teige den, tokoe den Romesma ben broko go nanga tranga na ini a foto. Na a fasi disi den ben bigin „tanapoe ini wan santa presi”, ini akroederi nanga san Jesus ben taki na fesi ini Mateus 24:15 nanga Markus 13:14. Dan wan onfroewakti sani ben pasa. Ala di den Romesma ben lontoe a foto, tokoe wantronso den ben hari gowe. Wantewante den kresten ben e si a kontroe foe Jesus profeititori, èn a hari di den Romesma ben hari gowe ben opo a pasi gi den foe lon gowe libi Judea go na ini den bergi na abrasei foe a Jordan. Historia e taki dati den ben doe so.
13. Foe san ede den kresten ben man foe gi jesi na a warskow foe Jesus foe lon gowe?
13 Ma, efoe den Romesma ben hari gowe foe a lontoe di den ben lontoe Jerusalem, dan foe san ede ala sma ben moesoe lon gowe? Den wortoe foe Jesus ben sori taki san ben pasa, ben boeweisi ’taki a pori foe Jerusalem ben de krosibei’ (Lukas 21:20). Ija, a pori. Jesus ben taki na fesi foe ’wan banawtoe di foe sensi a bigin no ben kon ete èn di no sa kon moro toe’. So wan dri nanga afoe jari na baka, ini 70 Gewoon Teri, dan Jerusalem troetroe ben ondrofeni „bigi banawtoe” foe a legre foe Rome ondro Generaal Titus (Mateus 24:21; Markus 13:19). Ma, foe san ede Jesus ben sa kari disi wan banawtoe di bigi moro leki iniwan bifo noso sensi a ten dati?
14. Foe san ede wi kan taki dati san ben pasa nanga Jerusalem ini 70 Gewoon Teri ben de „bigi banawtoe”, so leki no ben pasa bifo noso no ben pasa moro, sensi a ten dati?
14 Den Babilonsma ben pori Jerusalem srefisrefi ini 607 bifo Gewoon Teri èn a foto ben si toemoesi takroe feti ini wi disiten jarihondro. Tokoe, san ben pasa ini 70 Gewoon Teri, ben de wan bigi banawtoe na wan aparti fasi. Ini wan feti di ben teki pikinmoro leki feifi moen, den sroedati foe Titus ben wini den djoe. Den ben kiri wan sani foe 1.100.000 foe den djoe, èn den ben teki pikinmoro 100.000 go na ini katibo. Boiti dati, den Romesma ben pori Jerusalem. Disi ben boeweisi taki a djoe sistema foe anbegi, di Gado ben feni boen fosi èn di a tempel ben de na ati foe en, ben kon na en kaba foe alaten (Hebrewsma 1:2). Ija, nanga reti sma ben kan si den sani di ben pasa ini 70 Gewoon Teri, leki ’banawtoe so leki sensi a bigin foe grontapoe no ben kon [na tapoe a foto dati, nâsi nanga sistema] èn no sa kon moro toe’. — Mateus 24:21.d
So leki fa a profeititori ben taki, dan moro ben sa kon ete
15. (a) Foe sortoe sani Jesus ben taki na fesi, taki den ben o pasa baka a banawtoe na tapoe Jerusalem? (b) Na sortoe bosroiti wi moesoe kon dan ini a tori foe a kontroe foe a profeititori foe Jesus, te wi loekoe san Mateus 24:23-28 e taki?
15 Ma Jesus no ben taki na fesi foe a banawtoe wawan ini a fosi jarihondro. Bijbel e sori taki foeroe sani ben sa kon ete baka a banawtoe dati, so leki wi kan si ini a gebroiki foe a wortoe toʹte noso „dan” ini Mateus 24:23 nanga Markus 13:21. San ben sa pasa ini a ten baka 70 Gewoon Teri? Baka a banawtoe na tapoe a djoe sistema, dan moro falsi krestes nanga falsi profeiti ben sa opo kon. (Teki gersi Markus 13:6 nanga 13:21-23.) Historia e sori taki a de troe, taki den sortoe sma disi ben opo kon ini den jarihondro sensi a pori foe Jerusalem ini 70 Gewoon Teri, ala di den no ben kori den sma di ben abi wan srapoe fasi foe si sani na jejefasi èn di ben e froewakti „a denoja” foe Krestes (Mateus 24:27, 28). Tokoe, den sani disi di pasa baka a bigi banawtoe foe 70 Gewoon Teri, e gi wi wan fasi foe sori taki Jesus ben e loekoe moro fara leki a banawtoe dati, di ben de wan fosi kontroe nomo.
16. Sortoe tra pisi foe a profeititori foe Jesus, Lukas 21:24 e gi wi èn san disi wani taki?
16 Efoe wi teki Mateus 24:15-28 nanga Markus 13:14-23 gersi nanga Lukas 21:20-24, dan wi e feni wan di foe toe fasi foe sori taki den sani di Jesus ben taki na fesi e go moro fara leki a pori foe Jerusalem. Memre taki Lukas wawan ben kari pestsiki. Sosrefi, en wawan ben tapoe a pisi disi nanga den wortoe foe Jesus: „Den nâsi sa trapoe Jerusalem, te leki den fasti ten foe den nâsi [„ten foe den heiden”, King James Version] sa kon na wan kaba”e (Lukas 21:24). Den Babilonsma ben poeroe a lasti kownoe foe den djoe ini 607 bifo Gewoon Teri èn baka dati den ben trapoe Jerusalem, di ben teki presi gi Gado Kownoekondre (2 Kownoe 25:1-26; 1 Kroniki 29:23; Esekièl 21:25-27). Ini Lukas 21:24, Jesus ben sori taki a situwâsi ben sa go doro te ini a ten di e kon, te leki a ten foe Gado kon foe poti wan Kownoekondre baka.
17. Sortoe di foe dri fasi foe sori wi abi taki a profeititori foe Jesus ben o doro fara te ini a ten di e kon?
17 Djaso wi e si wan di foe dri fasi foe sori taki Jesus ben sori go toe na wan kontroe di de fara ete: Akroederi den Boekoe foe bijbel, a Mesias ben moesoe dede èn ben moesoe kisi wan opobaka, baka dati a ben sa sidon na Gado leti-anoe te leki a Tata seni en go foe poti sani na en ondro (Psalm 110:1,2). Jesus ben sori tapoe a sidon di a moesoe sidon na a leti-anoe foe en Tata (Markus 14:62). Na apostel Paulus ben sori taki a de troe, taki Jesus di ben opo baka, ben de na Jehovah leti-anoe e wakti a ten foe de Kownoe èn a Sma di Gado sa gebroiki foe tjari kroetoestrafoe kon.— Romesma 8:34; Kolosesma 3:1; Hebrewsma 10:12, 13.
18, 19. San Openbaring 6:2-8 abi foe doe nanga a profeititori di de a srefi ini den Evangelie?
18 Foe wan di foe fo èn lasti fasi foe sori taki Jesus profeititori foe a kaba foe a seti foe sani e go moro fara leki a fosi jarihondro, wi kan go na Openbaring kapitel 6. Apostel Johanes ben skrifi someni tenti jari baka 70 Gewoon Teri, foe san a ben si, namkoe, wan span tafereel foe asi tjariman di e lon plakatá-plakatá (Openbaring 6:2-8). A profeitis fasi disi foe loekoe go te na ini „a dei foe Masra” — a dei foe en denoja — e meki wi kon sabi a di foe 20 jarihondro foe wi, leki wan ten foe spesroetoe orlokoe di sma feti (vers 4), mankeri foe njanjan na alasei (vers 5 nanga 6), nanga „plaag di e tjari dede kon” (vers 8). A de krin taki disi e kroederi nanga san Jesus ben taki ini den Evangelie èn e boeweisi taki a profeititori foe en abi wan moro bigi kontroe ini a ’dei [disi] foe Masra’. — Openbaring 1:10.
19 Sma di stoeka sani e erken taki a marki di meki foe difrenti pisi, di den ben taki na fesi foe en ini Mateus 24:7-14 nanga Openbaring 6:2-8, ben kon na krin sensi a fosi broko foe grontapoe orlokoe ini 1914. Jehovah Kotoigi ben meki bekènti na heri grontapoe, taki Jesus profeititori abi a di foe toe èn moro bigi kontroe now, so leki a kon na krin ini den toemoesi takroe orlokoe, gronseki di e pori sani, tranga angriten, nanga takroe siki di ben panja na ala sei. Foe a lasti penti disi, U.S.News & World Report (27 juli 1992) ben taki: „A siki AIDS (SIDA) di e panja go na alasei . . . e kiri miljoenmiljoen sma èn kan tron djonsro a moro diri èn takroe plaag ini a historia. A blaka dede (wan sortoe takroe siki di ben tron wan plaag), ben kiri sowan 25 miljoen sma di ben pina foe dati ini a di foe 14 jarihondro. Ma komopo na pikinmoro 12 miljoen sma na a dei foe tide, te wi doro a jari 2000, dan 30 miljoen te 110 miljoen sma sa abi HIV, a virus di e gi AIDS. Efoe na a ten dati, dresi no de ete, dan sondro misi alasma di sa abi a HIV virus, sa dede.”
20. Foe san a fosi kontroe foe Mateus 24:4-22 ben sa handri, ma sortoe tra kontroe de krin foe si?
20 Na sortoe bosroiti wi moesoe kon dan, foe a fasi fa Jesus ben gi piki tapoe na aksi foe den apostel? A profeititori foe en ben froeteri sani soifri na fesi, sani di ben abi leki bakapisi èn di ben abi na ini toe a pori foe Jerusalem, èn a ben kari wantoe sani di ben pasa baka 70 Gewoon Teri. Ma a moro bigi pisi foe disi, ben sa abi wan di foe toe èn moro bigi kontroe ini a ten di e kon, di sa tjari wi na wan bigi banawtoe, di ben sa tjari wan kaba kon na tapoe a disiten ogri seti foe sani. Disi wani taki, dati san Jesus ben taki na fesi ini Mateus 24:4-22, èn den pisi foe Markus nanga Lukas di e kroederi nanga Mateus, ben kon troe foe bigin nanga 33 Gewoon Teri te go miti a banawtoe foe 70 Gewoon Teri. Tokoe, den srefi vers ben sa abi wan di foe toe kontroe, di ben sa abi na ini wan moro bigi banawtoe ini a ten di e kon. A moro bigi kontroe disi de leti na wi dja; ibri dei wi kan si dati.f
Sa tjari wi te na san?
21, 22. Ope wi e feni profeiti fasi foe sori taki tra sani di sa pasa, sa kon ete?
21 Jesus no ben tapoe en profeititori nanga a kari di a ben kari falsi profeiti, di e gi bidrigi marki ini a langa pisi ten bifo ’den fasti ten foe den heiden ben sa kon na wan kaba’ (Lukas 21:24; Mateus 24:23-26; Markus 13:21-23). A ben go doro foe taki foe tra sani di sa pasa èn di e tjari sekiseki kon, sani di sma ben sa si na heri grontapoe. Den sani disi ben sa abi foe doe nanga a kon foe a Manpikin foe libisma ini krakti èn glori. Markus 13:24-27 na wan eksempre foe Jesus profeititori di e go moro fara:
22 „Ma ini den dei dati, baka a banawtoe dati, a son sa kon doengroe, èn a moenkenki no sa gi a leti foe en, èn den stari sa fadon komoto na hemel, èn den sa seki den krakti foe den hemel. Èn dan den sa si a Manpikin foe libisma e kon ini den wolkoe nanga bigi krakti èn glori. Èn dan a sa seni den engel go èn den sa tjari denwan di a froekisi kon makandra, komoto na ala oekoe foe grontapoe, foe a kaba pisi foe grontapoe te go miti a kaba pisi foe hemel.”
23. Foe san ede wi kan froewakti a kontroe foe Mateus 24:29-31 langa baka a fosi jarihondro?
23 A Manpikin foe libisma, Jesus Krestes, di ben kisi wan opobaka, no ben kon na a fasi dati nanga foeroe poebliki pranpran, baka a pori di ben tjari wan kaba kon na a djoe seti foe sani ini 70 Gewoon Teri. A de seiker taki ala den lo foe grontapoe no ben kon sabi en, so leki fa Mateus 24:30 e sori, èn den engel foe hemel no ben tjari ala den salfoe kresten foe heri grontapoe kon makandra ini a ten dati. So boen, oten a tra pisi disi foe Jesus profeititori na wan froewondroefasi, ben sa kon troe? A e kon troe ini den sani di e pasa lontoe wi now, noso a e gi wi na a presi foe dati a Gado fasi foe si sani na ini den sani di wi kan froewakti ini a ten di de krosibei na wi fesi? Seiker wi moesoe wani foe sabi dati, bika Lukas ben skrifi a froemane foe Jesus: „Te den sani disi bigin foe pasa, opo tanapoe leti-opoe èn opo oen ede, bika oen froeloesoe e kon krosibei.” — Lukas 21:28.
[Foetoewortoe]
a Pisi foe den kapitel disi wi kan feni ini a lijst na bladzijde 24 nanga 25; den lin di meki nanga penti, e sori den pisi di de a srefi.
b Foe kisi wan historia verslag foe den sani disi di ben pasa, loekoe ini De Wachttoren foe 15 juli 1970, bladzijde 426-428.
c Den gebroiki a wortoe toʹte moro leki 80 leisi ini Mateus (9 leisi ini kapitel 24) èn 15 leisi ini a boekoe Lukas. Markus ben gebroiki toʹte 6 leisi nomo, ma 4 foe den leisi a ben abi foe doe nanga „a marki”.
d Na Ingrisi skrifiman, Matthew Henry, ben taki: „A pori di den Kaldewsma ben pori Jerusalem ben de takroe srefisrefi, ma disi ben de takroe moro dati. Pikinmoro a gersi leki a ben sa kiri ala . . . den djoe.”
e Foeroe sma e si wan kenki ini a tori foe Lukas [wan kenki ini nadruk], baka Lukas 21:24. Datra Leon Morris e taki: „Jesus e go moro fara foe taki foe den ten foe den heiden. . . . Akroederi a prakseri foe moro foeroe foe den sabiman, a ben poti prakseri now na tapoe a kon foe a Manpikin foe libisma.” Profesor R.Ginns e skrifi: „A kon foe a Manpikin foe libisma — (Mt 24:29-31; Mk 13:24-27). A taki di den e taki foe den ’ten foe den heiden’ e gi wan bigin na a thema disi; a si di [Lukas] ben si den sani na fesi, e go now moro fara leki a pori foe Jerusalem te na a ten di e kon.”
f Profesor Walter L. Liefeld e skrifi: „A de seiker taki wi kan denki dati den sani di Jesus ben taki na fesi ben poti toe pisi ten makandra: (1) den sani di ben pasa ini 70 Gewoon Teri èn di ben abi foe doe nanga a tempel èn (2) denwan ini a ten di de farawe na wi fesi, èn di den ben taki foe en ini a fasi fa Openbaring e sori den.” A froeklari di John R. Dummelow ben gi, e taki: „Foeroe foe den moro serjoesoe problema ini a prenspari taki disi, e komoto te wi e erken taki wi Masra no ben sori na ini en tapoe wán sani nomo di ben o pasa, ma tapoe toe sani èn dati a fosiwan ben de wan eksempre fa a di foe toe ben sa de. . . . [Lukas] 21:24 spesroetoe, di e taki foe ’den ten foe den heiden’,. . . e poti wan pisi ten di kon na mindri, di no abi marki, na mindri a pori foe Jerusalem nanga a kaba foe grontapoe.”
Joe e memre disi ete?
◻ A piki foe Jesus na tapoe na aksi ini Mateus 24:3, ben abi sortoe kontroe di e tjari wi te na 70 Gewoon Teri?
◻ Fa a gebroiki foe a wortoe toʹte e jepi wi foe froestan a profeititori foe Jesus?
◻ Na sortoe fasi wan „bigi banawtoe” ben de ini a fosi jarihondro, so leki no ben pasa noiti ini a ten bifo dati?
◻ Na tapoe sortoe toe aparti sani foe a profeititori foe Jesus, di abi foe doe nanga wi ini a ten disi, Lukas ben sori?
◻ Sortoe boeweisi wi abi di e sori na wan di foe toe èn moro bigi kontroe foe a profeititori ini Mateus 24:4-22?
[Schema na tapoe bladzijde 24, 25]
4 „Èn Jesus ben taigi den: ’Loekoe boen taki no wan sma no e kori oenoe; 5 bika foeroe sma sa kon ini mi nen, èn den sa taki: „Mi na a Krestes”, èn den sa kori foeroe sma. 6 Oenoe sa jere foe orlokoe èn njoensoe foe orlokoe; loekoe boen foe oenoe no frede. Bika den sani disi moesoe pasa, ma a kaba no de ete.
7 Bika nâsi sa opo kontrari nâsi èn kownoekondre kontrari kownoekondre, èn ini a wan presi baka a trawan, mankeri foe njanjan nanga gronseki sa de. 8 Ala den sani disi na wan bigin foe pen foe banawtoe.
9 Dan den sa gi oenoe abra na banawtoe èn kiri oenoe, èn foe mi nen ede ala nâsi no sa wani si oenoe na ai. 10 Dan foeroe sa naki foetoe fadon èn sa tori makandra èn no sa wani si makandra na ai. 11 Èn foeroe falsi profeiti sa opo kon èn den sa kori foeroe sma; 12 èn foe di kroektoedoe sa kon moro foeroe, meki a lobi foe moro foeroe sma sa kon kowroe. 13 Ma a sma di horidoro te na a kaba, na en sa kisi froeloesoe. 14 Èn a boen njoensoe disi foe a kownoekondre sa preiki na heri grontapoe pe sma e libi leki wan kotoigi gi ala nâsi, èn dan a kaba sa kon.
------------------------------------------------------------------
15 Foe dati ede, te oenoe e si a tegoe sani di e tjari pori kon, tanapoe ini wan santa presi, so leki a profeiti Daniel ben taki foe en (a leisiman moesoe geboiki a koni foe man si sani), 16 dan meki denwan di de ini Judea, lowe gowe na den bergi. 17 Meki a man di de tapoe a dak, no saka go ini en oso foe teki den goedoe foe en; 18 èn meki a man di de ini a prani-gron, no drai kon baka na oso foe teki a tapoesei krosi foe en. 19 Heloe foe den oema di de nanga bere èn denwan di abi jongoe pikin na bobi ini den dei dati! 20 Tan begi dati a lowe di oenoe sa lowe gowe, no sa pasa ini a winterten, noso tapoe a sabadei; 21 bika, dan wan bigi banawtoe sa de so leki sensi a bigin foe grontapoe te now no ben kon ete èn no sa kon moro toe. 22 Foe taki en leti, efoe den no ben koti den dei sjatoe, dan no wan skin no ben sa kisi froeloesoe; ma foe den wan di a froekisi ede, dan den dei sa koti sjatoe.
------------------------------------------------------------------
23 Dan te wan sma e taigi oenoe: ’Loekoe! A Krestes de dja’, noso: ’Drape!’ no bribi dati. 24 Bika falsi krestes nanga falsi profeiti sa opo kon, èn den sa doe bigi marki nanga wondroe, so taki, efoe a kan, den sa kori srefi denwan di a froekisi. 25 Loekoe! Mi ben warskow oenoe na fesi foe dati. 26 Foe dati ede, efoe den sma e taigi oenoe: ’Loekoe! A de ini a sabana’, no waka go; ’Loekoe! A de ini den inisei kamra’, no bribi dati. 27 Bika neleki a faja di koti e komoto na owstoesei èn e skèin te na westsei, na so a denoja foe a Manpikin foe libisma sa de. 28 Awinsi sortoe sei a dede skin foe a meti de, na drape den aka sa tjari kon makandra.
------------------------------------------------------------------
------------------------------------------------------------------
29 Wantewante baka a banawtoe foe den dei dati a son sa kon doengroe, èn a moenkenki no sa gi a leti foe en, èn den stari sa fadon komoto na hemel, èn den sa seki den krakti foe den hemel. 30 Èn dan a marki foe a Manpikin foe libisma sa de foe si na hemel, èn dan ala den lo foe grontapoe sa bari krei, èn den sa si a Manpikin foe libisma e kon tapoe den wolkoe foe hemel nanga krakti èn bigi glori. 31 Èn sa sa seni den engel foe en go nanga wan tranga trompeti babari, èn komoto na ala oekoe foe grontapoe den sa tjari denwan kon makandra di a froekisi, foe a wan kaba pisi foe den hemel te go miti a tra kaba pisi foe den hemel.’”
5 Na so Jesus ben bigin taigi den: ’Loekoe boen taki no wan sma no e kori oenoe. 6 Foeroe sma sa kon ini mi nen, èn den sa taki: „Mi na en”, èn den sa kori foeroe sma. 7 Boiti dati, te oenoe jere foe orlokoe èn njoensoe foe orlokoe, no frede; den sani disi moesoe pasa, ma a kaba no de ete.
8 Bika nâsi sa opo kontrari nâsi èn kownoekondre kontrari kownoekondre, ini a wan presi baka a trawan gronseki nanga mankeri foe njanjan sa de. Den sani disi de wan bigin foe pen foe banawtoe.
9 Ma loekoe boen gi oensrefi; den sa gi oenoe abra na den kroetoebangi foe a kontren, èn den sa fon oenoe ini den snoga èn den sa meki oenoe tanapoe na fesi foe tiriman nanga kownoe foe mi ede, leki wan kotoigi gi den. 10 So srefi a boen njoensoe moesoe preiki fosi ini ala nâsi. 11 Ma te den e tjari oenoe gowe foe gi oenoe abra, no broko oen ede na fesi foe san oenoe sa taki, ma taki foe den sani di oenoe sa kisi foe taki ini a joeroe dati, bika a no oenoe e taki, ma a santa jeje. 12 Moro fara a wan brada sa gi a tra brada abra foe den kiri en, èn wan papa wan pikin, èn den pikin sa opo kontrari den papa nanga mama èn meki den kiri den; 13 èn foe mi nen ede, no wan sma sa wani si oenoe na ai. Ma a sma di horidoro te na a kaba, na en sa kisi froeloesoe.
------------------------------------------------------------------
14 Ma, te oenoe si a tegoe si a tegoe sani di e tjari pori kon, tanapoe na wan presi pe a no moesoe tanapoe (a leisiman moesoe gebroiki a koni foe man si sani), dan meki denwan di de ini Judea lowe gowe na den bergi. 15 Meki a man di de tapoe a dak no saka, noso go ini en oso foe teki wan sani foe en oso; 16 èn meki a man di de ini a pranigron, no drai kon baka na den sani di a ben libi na baka, foe teki a tapoesei krosi foe en. 17 Heloe foe den oema di de nanga bere èn denwan di abi jongoe pikin na bobi ini den dei dati! 18 Tan begi dati a no sa pasa ini a winterten; 19 bika den dei dati sa de den dei foe wan banawtoe so leki sensi a bigin foe den sani di Gado meki, no ben kon, te leki a ten dati èn no sa kon moro. 20 Foe taki en leti, efoe Jehovah no ben koti den dei sjatoe, dan no wan skin no ben sa kisi froeloesoe. Ma foe denwan di a froekisi ede, a koti den dei sjatoe.
------------------------------------------------------------------
21 Dan ete, te wan sma e taigi oenoe: „Loekoe! A Krestes de dja”, „Loekoe! A de drape”, no bribi dati. 22 Bika falsi krestes nanga falsi profeiti sa opo kon, èn den sa doe marki nanga wondroe foe kori, efoe a kan, srefi denwan di a froekisi. 23 Loekoe boen dan; mi ben taigi oenoe ala sani na fesi.
------------------------------------------------------------------
------------------------------------------------------------------
24 Ma ini den dei dati, baka a banawtoe dati, a son sa kon doengroe, èn a moenkenki no sa gi a leti foe en, 25 èn den stari sa fadon komoto na hemel, èn den sa seki den krakti foe den hemel. 26 Èn dan den sa si a Manpikin foe libisma e kon ini den wolkoe, nanga bigi krakti èn glori. 27 Èn dan a sa seni den engel go èn den sa tjari denwan di a froekisi kon makandra, komoto na ala oekoe foe grontapoe, foe a kaba pisi foe grontapoe te go miti a kaba pisi foe hemel.’”
8 „A ben taki: ’Loekoe boen taki den no kori oenoe; bika foeroe sma sa kon ini mi nen èn den sa taki: „Mi na en”, èn: „A fasti ten ben kon krosibei.” No waka na den baka. 9 Moro ete, te oenoe jere foe orlokoe nanga broeja, no frede. Bika den sani disi moesoe pasa fosi, ma a kaba no e kon wante wante.’
10 Dan, a ben go doro foe taigi den: „Nâsi sa opo kontrari nâsi èn kownoekondre kontrari kownoekondre; 11 èn bigi gronseki sa de, èn ini a wan presi baka a trawan pestsiki nanga mankeri foe njanjan; èn toemoesi takroe sani di e frede sma sa de foe si èn bigi marki foe hemel.
12 Ma bifo den sani disi o pasa, den sma sa poti anoe na anoe èn froefolgoe oenoe, den sa gi oenoe abra na den snoga nanga doengroe-oso, èn den sa srepi oenoe go na fesi foe kownoe nanga tiriman foe mi nen ede. 13 Ma a sa abi leki bakapisi taki oenoe kan gi wan kotoigi. 14 Foe dati ede, no prakseri na fesi ini oen ati fa foe taki foe poeroe oensrefi, 15 bika mi sa gi oenoe wan mofo nanga koni, di ala oen gensman makandra no sa man kakafoetoe gi noso taki kontrari oenoe. 16 Moro ete, oen papa nanga mama, oen brada nanga oen famiriman nanga oen mati srefi sa gi oenoe abra, èn den sa kiri sonwan foe oenoe; 17 èn foe mi nen ede ala sma no sa wani si oenoe na ai. 18 Èn tokoe na no wan enkri fasi wiwiri na tapoe oen ede sa lasi. 19 Foe di oenoe sa horidoro, oenoe sa wini oen sili.
------------------------------------------------------------------
20 moro fara, te oenoe si den kampoe foe den legre lontoe Jerusalem, dan sabi taki a pori foe en e kon krosibei. 21 Dan, meki denwan ini Judea lowe gowe na den bergi, èn meki denwan na mindri foe en hari gowe èn meki denwan di de ini den boiti presi, no kon baka inisei a foto; 22 bika disi na den dei foe meki gerègtighèit kon, so taki ala den sani di skrifi sa kon troe. 23 Heloe foe den oema di de nanga bere èn denwan di abi jongoe pikin na bobi ini den dei dati! Bika bigi nowtoe sa de ini a kondre èn ati-bron tapoe a pipel disi; 24 èn den sa kiri den nanga srapoe feti-owroe èn den sa tjari den gowe leki katibo na ala nâsi;
------------------------------------------------------------------
èn den nâsi sa trapoe Jerusalem, te leki den fasti ten foe den nâsi sa kon na wan kaba.
------------------------------------------------------------------
------------------------------------------------------------------
25 So srefi, marki sa de ini son nanga moenkenki nanga stari, èn na grontapoe broeja skreki foe den nâsi, di foe krasi sekiseki foe a se no sabi wan pasi foe komoto, 26 ala di den sma e kon weri foe frede èn froewakti foe den sani di e kon tapoe a gronatpoe pe libisma e libi; bika den sa seki den krakti foe den hemel. 27 Èn dan den sa si a Manpikin foe libisma e kon ini wan wolkoe nanga krakti èn bigi glori. 28 Ma te den sani disi bigin foe pasa, opo tanapoe leti-opoe èn opo oen ede, bika oen froeloesoe e kon krosibei.’
[Prenki na tapoe bladzijde 20]
A banawtoe ini 70 Gewoon Teri ben de a moro bigiwan di Jerusalem nanga a djoe sistema ben ondrofeni wanten