Yeyses libi nanga diniwroko

Na marki fu den lasti dey

A DE now tudewroko bakadina. Te Yeyses e sdon na tapu na Olèyfbergi èn e luku go na a tenpri di de moro lagi, dan Petrus, Andreyas, Yakobus nanga Yohanes e kon na en, ala di no wan tra sma de drape. Den e broko-ede nanga na tenpri, fu di di-dyonsro Yeyses ben taki na fesi taki ’no wan ston sa libi tapu na trawan’.

Ma a de krin taki moro sani de ini den prakseri te den e go na Yeyses. Wantu wiki na fesi, a ben taki fu en „denoya”, wan ten pe „na Manpikin fu libisma sa tyari kon a krin”. Èn na wan okasi na fesi a ben fruteri den fu „na bosroyti fu na seti fu sani”. Den apostru wani sabi moro fu dati-ede.

„Taygi unu”, den e taki, „oten den sani disi sa de [di sa tyari na pori fu Yerusalen nanga na tenpri kon], èn san sa de na marki fu yu denoya èn fu na bosroyti fu na seti fu sani?” Den e aksi wan aksi di de ini dri pisi. Ini na fosi presi den wani sabi moro fu na kba fu Yerusalen nanga en tenpri, dan fu Yeyses denoya ini Kownukondre makti èn te fu kba fu na kba fu na heri seti fu sani.

Ini na langa piki fu en Yeyses e piki ala den dri pisi fu na aksi. A e gi wan marki di e sori oten na dyu seti fu sani sa kon na wan kba; ma a e gi moro. A e gi so srefi wan marki di sa wiki en disipri ini na ten di e kon taki den e libi ini a ten fu en denoya èn krosibey fu na kba fu na heri seti fu sani.

Di den yari ben e psa dan den apostru e bigin fu si na kontru fu Yeyses profeytitori. Iya, den sani di a ben taki na fesi, e bigin fu psa ini den ten. Fu dati-ede meki na pori fu na dyu seti fu sani nanga en tenpri no e kon onfruwakti tapu den kresten di e libi 37 yari na baka ini 70 G.T.

Ma Krestes denoya èn na bosroyti fu na seti fu sani no e feni presi ini 70 G.T. En denoya ini Kownukondre makti e kon bakaten. Ma oten? Te yu go luku Yeyses profeytitori dan disi e kon a krin.

Yeyses e taki na fesi taki „feti nanga nyunsu fu feti” sa de. „Nâsi sa opo teyge nâsi” èn mankeri fu nnyan, gronseki nanga pestsiki sa de. Den no sa wani si en disipri na ay èn kiri den. Falsi profeyti sa opo èn kori furu sma. Na kruktudu libi sa kon moro furu èn na lobi fu moro sma sa kon kowru. Na a srefi ten na bun nyunsu fu Gado kownukondre sa preyki na a heri grontapu pe libisma e libi leki wan kotoygi gi ala nâsi.

Ala di Yeyses profeytitori bifo na pori fu Yerusalen ini 70 G.T. ben kontru na wan skotufasi, toku na moro bigi kontru fu en e feni presi ini na ten fu en denoya èn na bosroyti fu na seti fu sani. Te yu luku den sani finifini baka di psa na grontapu fu sensi 1914 dan dati e tyari kon a krin taki Yeyses tumusi prenspari profeytitori fu sensi na yari dati e kontru na bigi.

Ete wan pisi fu na marki di Yeyses gi de na sori di na „tegu sani di e tyari pori kon” ben o sori en srefi. Ini 66 G.T. na tegu sani disi ben sori en srefi leki na „legre kanpu” fu Rome di ben lontu Yerusalen èn ben diki na ondro na skotu fu na tenpri. „Na tegu sani” ben tanapu pe a no ben mag tanapu.

Ini na moro bigi kontru fu na marki, dan na tegu sani na a Folkubontu èn na organisâsi fu Verenigde Nâsi di kon a baka. Na krestenhèyt e si na grontapu-vrede-organisâsi disi leki wan sani di teki na presi fu Gado kownukondre. Fa disi de wan tegu sani! Baka wan pisiten den politik makti di de na ini na VN, sa dray fu dati-ede srefi teyge na krestenhèyt (na agersi Yerusalen) èn pori en.

Yeyses ben taki na fesi fu dati-ede: „Wan bigi banawtu sa kon so leki fu sensi na bigin fu grontapu te leki now no ben kon, nôno, èn no sa kon moro tu.” Ala di na pori fu Yerusalen ini 70 G.T. trutru ben de wan bigi banawtu, pe leki fa den taki moro leki wan milyun sma ben lasi libi, toku a no ben de wan moro bigi banawtu leki na frudu fu Noach dey di ben kon na a heri grontapu. Fu dati-ede na bigi kontru fu na pisi disi fu Yeyses profeytitori musu kon ete. Mateyus 24:2-22; 13:40, 49; Markus 13:3-20; Lukas 21:7-24; 19:43, 44; 17:20-30; 2 Timoteyus 3:1-5.

◆ San meki den apostru aksi sani, ma leki fa e kon a krin san de na ini den prakseri ete?

◆ Sortu pisi fu na profeytitori fu Yeyses ben kontru ini 70 G.T., ma san no ben psa na a ten dati?

◆ Oten Yeyses profeytitori ben abi wan fosi kontru, ma oten na moro bigi kontru e feni presi?

◆ San na a tegu sani na ini na fosi kontru èn na ini na lasti kontru?

◆ Fu san-ede na bigi banawtu no ben abi en lasti kontru nanga na pori fu Yerusalen?