„Den sani disi moesoe feni presi”
„Jesus ben piki den: ’. . . Den sani disi moesoe feni presi, ma a kaba no e kon ete.’” — MATEUS 24:4-6.
1. Sortoe tori moesoe abi wi belangstelling?
SEIKER joe abi belangstelling gi joe libi èn gi a tamara foe joe. Dan joe moesoe abi belangstelling toe gi wan tori di ben abi a belangstelling foe C. T. Russell na ini a jari 1877. Russell di baka ten ben bigin a Waktitoren Genootschap, ben skrifi The Object and Manner of Our Lord’s Return (Foe san ede wi Masra e drai kon baka èn na sortoe fasi). A brochure disi di abi 64 bladzijde ben taki foe a kon di Jesus ben drai kon baka, noso a kon di a ben o kon baka na ini a ten di e kon (Johanes 14:3). Wan leisi di a ben de na tapoe na Olijfbergi, den apostel ben aksi en o ten a ben o kon baka: „O ten den sani disi sa de, èn san sa de a marki foe joe denoja [noso, [te joe e] „kon”, King James Version] èn foe a bosroiti foe a seti foe sani?” — Mateus 24:3.
2. Foe san ede so foeroe denki de di de kontrari makandra, foe den sani di Jesus ben taki na fesi?
2 Joe sabi èn e froestan san Jesus ben piki? A piki de foe feni na ini dri foe den Evangelie. Profesor D. A. Carson e taki: „Foeroe kapitel no de na ini Bijbel di wiki someni kesekese na mindri sma di e froeklari sani, leki Mateus 24, Markus 13 nanga Lukas 21 di e taki foe a srefi tori.” Dan a e gi en eigi denki — èn dati na ete wan foe den denki foe libisma di de kontrari makandra. Pikinmoro na ini a lasti jarihondro, foeroe foe den denki disi e sori taki sma no abi bribi. Den sma di ben abi den denki disi ben bribi taki Jesus noiti ben taki den sani di wi e leisi na ini den Evangelie, ma taki sma ben kenki den sani di a ben taki, noso taki den sani di a ben taki na fesi no ben kon troe — den denki disi na foe sma di e kroetoe Bijbel. Wan man di e gi komentaar ben ondrosoekoe na Evangelie foe Markus nanga jepi foe a filosofia foe Mahayana-Boedabribi srefi!
3. Fa Jehovah Kotoigi e prakseri foe a profeititori foe Jesus?
3 Kontrari foe dati, Jehovah Kotoigi e bribi taki Bijbel troe èn taki a de foe froetrow, èn dati de so toe nanga den sani di Jesus ben taigi den fo apostel di ben de nanga en na tapoe na Olijfbergi dri dei bifo a dede foe en. Foe sensi den dei foe C. T. Russell, a pipel foe Gado safrisafri kon froestan a profeititori di Jesus ben gi drape moro boen. Na ini den lasti jari disi, A Waktitoren meki a pipel foe Gado kon froestan a profeititori disi moro boen srefi. Joe teki den leri dati, èn joe si a krakti di a abi na ini joe libi?a Meki wi go loekoe en baka.
Wan sari kontroe didjonsro
4. Foe san ede den apostel ben sa aksi Jesus foe a ten di e kon?
4 Den apostel ben sabi taki Jesus ben de a Mesias. Foe dati ede, di den ben jere en e taki dati a ben o dede, ben o kisi wan opobaka, èn ben o drai kon baka, dan den ben moesoe aksi densrefi: ’Efoe Jesus sa dede èn sa gowe, dan fa a kan doe den kefalek moi sani di wi e froewakti taki a Mesias sa doe?’ Boiti dati, Jesus ben taki foe a kaba foe Jerusalem nanga en tempel. Den apostel ben sa kan aksi densrefi: ’O ten èn fa dati sa feni presi?’ Foe froestan den sani disi, den apostel ben aksi: „O ten den sani disi sa de, èn san sa de a marki te ala den sani disi sa kon na wan kaba?” — Markus 13:4; Mateus 16:21, 27, 28; 23:37–24:2.
5. Fa den sani di Jesus ben taki ben kon troe na ini a fosi jarihondro?
5 Jesus ben taki na fesi taki orlokoe, angriten, pestsiki, gronseki, bita-ati èn froefolgoe teige den Kresten, falsi mesias, nanga a preiki foe a boen njoensoe foe a Kownoekondre na ala presi, sa de. Dan a kaba ben sa kon (Mateus 24:4-14; Markus 13:5-13; Lukas 21:8-19). Jesus ben taki disi na ini a bigin foe a jari 33 G.T. Na ini den someni tenti jari na baka, den disipel foe en di ben de na ai ben kan si taki den sani di Jesus ben taki na fesi, ben e feni presi na wan fasi di wani taki wan sani. Ija, a historia e sori taki a marki ben kon troe na a ten dati, èn dati ben meki taki den Romesma ben tjari wan kaba kon na a Djoe seti foe sani na ini a pisi ten foe 66-70 G.T. Fa dati ben feni presi?
6. San ben feni presi na mindri den Romesma nanga den Djoe na ini 66 G.T.?
6 Na ini a faja zomer foe a jari 66 G.T. na ini Judea, den Djoe Zelootsma ben go feti nanga den waktiman foe Rome na ini wan fortresi krosibei foe a tempel na ini Jerusalem, èn dati ben soetoe faja gi ogri di e doe nanga tranga na tra presi foe a kondre. Na ini History of the Jews, Profesor Heinrich Graetz e froeteri: „Cestius Gallus di ben de Granman foe Siria èn di ben abi a plekti foe meki sma tan lespeki den legre foe Rome, . . . no ben man si moro fa na oproeroe ben panja na en lontoe sondro foe doe wan sani foe no meki a kon moro bigi. A ben kari den legre foe en kon makandra, èn den tiriman foe den birtikondre ben de klariklari foe seni den legre foe den kon.” A legre disi foe 30.000 man ben lontoe Jerusalem. Baka di den ben feti wan pisi ten, dan den Djoe ben hari go na baka den skotoe di de krosibei foe a tempel. „Feifi dei baka makandra den Romesma ben proeberi foe broko den skotoe, ma ibritron baka den ben moesoe hari go na baka bika den Judeasma ben soetoe sani kon na den tapoe. Te foe kaba, na tapoe a di foe siksi dei den ben man broko wan pisi foe a noordsei skotoe foe di den ben diki olo na en ondro, na fesi a Tempel.”
7. Foe san ede den disipel foe Jesus ben si sani na wan tra fasi leki moro foeroe foe den Djoe?
7 Prakseri fa den Djoe ben moesoe broeja foe di den ben bribi langa ten taki Gado ben o kibri den nanga a santa foto foe den! Ma den disipel foe Jesus ben kisi warskow na fesi, taki wan rampoe ben o miti Jerusalem. Jesus ben taki na fesi: „Den dei sa kon na joe tapoe te den feanti foe joe sa bow wan skotoe foe postoe nanga srapoe ede na joe lontoe èn den sa lontoe joe èn sa banawtoe joe na ala sei, èn den sa masi joe nanga den pikin foe joe na ini joe te na gron, èn na ini joe den no sa libi no wan ston na tapoe wan trawan” (Lukas 19:43, 44). Ma dati ben sa tjari dede kon gi den Kresten di ben de na ini Jerusalem na ini a jari 66 G.T.?
8. Foe sortoe rampoe Jesus ben taki na fesi, èn soema ben de „den wan di [Jehovah] froekisi” èn di den dei ben o sjatoe gi den?
8 Di Jesus ben piki den apostel na tapoe na Olijfbergi, dan a ben taki na fesi: „Den dei dati sa de dei foe wan banawtoe soleki no ben pasa ete foe sensi a bigin foe den sani di Gado ben kria te na a ten dati, èn di no sa pasa moro toe. Foe taki en leti, efoe Jehovah no ben sjatoe den dei, dan no wan skin no ben sa kisi froeloesoe. Ma foe den wan di a froekisi ede, meki a sjatoe den dei” (Markus 13:19, 20; Mateus 24:21, 22). So boen, den dei ben o sjatoe èn „den wan di a froekisi” ben o kisi froeloesoe. Soema na den sma disi? Den a no den Djoe kwetikweti di ben oproeroe èn di ben froeklari taki den e anbegi Jehovah, ma no ben erken en Manpikin (Johanes 19:1-7; Tori foe den Apostel 2:22, 23, 36). Den wan di Jehovah ben froekisi troetroe na a ten dati, ben de den Djoe èn den wan di no ben de Djoe èn di ben bribi na ini Jesus leki a Mesias èn a Froeloesoeman. Gado ben froekisi den wan disi, èn na tapoe a Pinksterfesa foe 33 G.T., A ben meki den tron wan njoen nâsi na jeje fasi, „na Israèl foe Gado”. — Galasiasma 6:16; Lukas 18:7; Tori foe den Apostel 10:34-45; 1 Petrus 2:9.
9, 10. Fa den dei foe a feti foe Rome „ben sjatoe”, èn nanga sortoe bakapisi?
9 A ben de so, taki den dei ben kon „sjatoe” èn taki den salfoewan di [Jehovah] ben froekisi èn di ben de na ini Jerusalem ben kisi froeloesoe? Profesor Graetz e taki: „[Cestius Gallus] ben denki taki a no ben sa de wan koni sani foe tan feti nanga fajafaja deki-atiman èn bigin nanga wan langa feti na ini a pisi ten dati foe a jari te na alen foe a herfst ben o bigin didjonsro . . . èn dati ben sa kan tapoe a legre foe kisi sani di ben abi fanowdoe. Kande na foe dati ede meki a ben prakseri taki a de wan moro koni sani foe hari gowe.” Awansi san Cestius Gallus ben e denki, a legre foe Rome ben hari gowe foe a foto, èn dati ben abi leki bakapisi taki den ben kisi foeroe mankeri foe den Djoe di ben kon na den baka.
10 A hari di den Romesma ben hari gowe wantronso ben gi na okasi meki „skin” — den disipel foe Jesus di ben de na ini kefar na ini Jerusalem — kisi froeloesoe. A historia e froeteri taki di na okasi disi ben opo, dan den Kresten ben lowe gowe foe a kontren. Na wan kefalek fasi Gado ben sori taki a man sabi na fesi fa a tamara sa de èn foe sorgoe taki den anbegiman foe en e kisi froeloesoe! Ma san ben pasa nanga den Djoe di no ben bribi èn di ben tan ete na ini Jerusalem nanga Judea?
Den sma di ben libi na ini a srefi pisi ten ben o miti a bigi banawtoe
11. San Jesus ben taki foe „a geslakti disi”?
11 Foeroe Djoe ben prakseri taki a sistema di den abi foe anbegi, di ben abi a tempel leki a moro prenspari presi, ben o tan langa ten. Ma Jesus ben taki: „Leri foe a figabon . . . a sani disi: So esi leki den jongoe taki foe en e kon safoe èn e bigin kisi wiwiri, dan oenoe sabi taki zomer de krosibei. So a de toe, taki te oenoe e si ala den sani disi, dan oenoe sabi taki en de krosibei, na dromofo. Foe troe, mi e taigi oenoe taki a geslakti disi kwetikweti no sa pasa gowe, te leki ala den sani disi feni presi. Hemel nanga grontapoe sa pasa gowe, ma den wortoe foe mi no sa pasa gowe kwetikweti.” — Mateus 24:32-35.
12, 13. Fa den disipel ben froestan a taki di Jesus ben taki foe „a geslakti disi”?
12 Na ini den jari bifo 66 G.T., den Kresten ben o si foeroe foe den pisi foe a marki di meki foe difrenti pisi e kon troe — orlokoe, angriten, srefi wan bigi preikiwroko foe a boen njoensoe foe a Kownoekondre (Tori foe den Apostel 11:28; Kolosesma 1:23). Ma o ten a kaba ben o kon? San Jesus ben wani taki di a ben taki: ’A geslakti disi [Grikitongo, ge·ne·aʹ] no sa pasa gowe’? Foeroe tron Jesus ben taki dati den ipi Djoe di ben gens en èn di ben libi na ini a srefi pisi ten, so srefi den relisi fesiman, ben de „wan godelowsoe èn soetadoe geslakti” (Mateus 11:16; 12:39, 45; 16:4; 17:17; 23:36). So boen, di a ben de na tapoe na Olijfbergi, dan a ben taki baka foe a „geslakti disi” èn soleki fa a sori, a no ben taki foe a heri Djoe ras na ini a heri historia; èn a no ben taki toe foe den bakaman foe en, ala di den ben de „wan geslakti di den froekisi” (1 Petrus 2:9). Èn Jesus no ben e taki toe taki a „geslakti disi” na wan pisi ten.
13 Na presi foe dati, Jesus ben taki foe den Djoe di ben gens en na a ten dati èn di ben sa ondrofeni a kontroe foe a marki di a ben gi. Profesor Joel B. Green e taki foe a „geslakti disi” di skrifi na Lukas 21:32: „Na ini a di foe Dri Evangelie, ’a geslakti disi’ (èn den lin di abi foe doe nanga dati) wani taki doronomo foe wan groepoe sma di de teige a prakseri foe Gado. . . . [A e taki] foe sma di na wan tranga-ede fasi e drai den baka gi a prakseri foe Gado.”b
14. San a „geslakti” dati ben ondrofeni, ma fa sani ben waka heri tra fasi gi den Kresten?
14 A godelowsoe geslakti foe den Djoe gensman di ben kan si a kontroe foe a marki, ben o ondrofeni so srefi a kaba foe a Djoe sistema (Mateus 24:6, 13, 14). Èn den ben ondrofeni dati troetroe! Na ini a jari 70 G.T., a legre foe Rome ben kon baka na ondro a tiri foe Titus, wan manpikin foe Kèiser Fespasianus. A pina foe den Djoe di ben fasi baka na ini a foto, ben bigi so kefalek taki joe no man bribi en.c Flavius Josephus di ben si den sani disi e froeteri taki di den Romesma ben pori a foto kaba, dan so wan 1.100.000 Djoe dede èn den ben tjari so wan 100.000 Djoe gowe na ini katibo, èn moro foeroe foe den ben o dede heri esi na wan kefalek takroe fasi foe angri noso na ini den arena foe Rome. Foe troe, a banawtoe na ini a pisi ten foe 66-70 G.T. ben de a moro bigiwan di Jerusalem nanga a Djoe sistema oiti ben ondrofeni noso oiti ben o ondrofeni. A bakapisi ben de heri tra fasi gi den Kresten di ben gi jesi na a profeiti warskow foe Jesus èn di ben gowe libi Jerusalem na baka di den legre foe Rome ben gowe na ini a jari 66 G.T.! Den salfoe Kresten di „a ben froekisi” ben kisi „froeloesoe”, noso ben tan na libi na ini 70 G.T. — Mateus 24:16, 22.
Wan tra kontroe moesoe kon ete
15. Fa wi kan de seiker taki a profeititori foe Jesus ben o abi wan moro bigi kontroe na baka 70 G.T.?
15 Ma dati no ben de a kaba foe a tori. Bifo dati, Jesus ben sori taki baka te a foto ben pori, dan a ben o kon na ini a nen foe Jehovah (Mateus 23:38, 39; 24:2). A ben froeklari disi moro krin na ini en profeititori di a ben taki na tapoe na Olijfbergi. Baka di a ben taki foe a „bigi banawtoe” di moesoe kon ete, dan a ben taki dati baka ten den falsi Krestes ben sa kon, èn den nâsi ben sa trapoe Jerusalem wan langa pisi ten (Mateus 24:21, 23-28; Lukas 21:24). A ben kan taki wan tra moro bigi kontroe ben moesoe kon ete? Den troetori e piki ija. Te wi e teki Openbaring 6:2-8 (di ben skrifi baka a banawtoe di ben kon na tapoe Jerusalem na ini 70 G.T.) gersi nanga Mateus 24:6-8 nanga Lukas 21:10, 11, dan wi e si taki orlokoe, a mankeri di njanjan ben o mankeri, nanga plaag ben o kon moro foeroe na ini a ten di e kon. A moro bigi kontroe disi foe den wortoe foe Jesus, feni presi foe sensi a Fosi Grontapoefeti ben bigin na ini a jari 1914.
16-18. San wi kan froewakti ete?
16 Someni tenti jari kaba den Kotoigi foe Jehovah leri sma taki a disiten kontroe foe a marki e boeweisi taki wan „bigi banawtoe” moesoe kon ete. A disiten godelowsoe „geslakti” sa si a banawtoe dati. A gersi taki wan bigin pisi sa de baka (wan feti nanga ala falsi relisi), neleki fa a ben de di Gallus ben opo go feti na ini 66 G.T. nanga Jerusalem èn dati ben bigin a banawtoe gi Jerusalem.d Baka dati, baka wan pisi ten di wi no sabi o langa a sa de, dan a kaba sa kon — a pori na heri grontapoe, di de a srefi leki a wan na ini 70 G.T.
17 Jesus e taki foe a banawtoe di de krosibei foe wi: „Wantewante baka a banawtoe foe den dei dati, [a pori foe falsi relisi] son sa kon doengroe, èn moen no sa gi a leti foe en, èn den stari sa fadon komoto na hemel, èn den krakti foe hemel sa kon seki. Èn dan a marki foe a Manpikin foe libisma sa kon de foe si na hemel, èn dan ala den lo foe grontapoe sa naki densrefi na ini wan sari krei, èn den sa si a Manpikin foe libisma e kon na tapoe den wolkoe foe hemel nanga krakti èn bigi glori.” — Mateus 24:29, 30.
18 So boen, Jesus srefi e taki dati „baka a banawtoe foe den dei dati”, sani sa de foe si na hemel. (Teki gersi Joèl 2:28-32; 3:15.) Disi sa frede èn skreki den tranga-jesi libisma so kefalek taki den sa „naki densrefi na ini wan sari krei”. Foeroe sma sa „kon weri foe frede, èn foe a froewakti di den e froewakti den sani di sa pasa na a grontapoe pe sma e libi”. Ma a no sa de so nanga den troe Kresten! Den Kresten ’sa opo den ede go na loktoe, bika a froeloesoe foe den e kon krosibei’. — Lukas 21:25, 26, 28.
A kroetoe de krosibei!
19. Fa wi kan doe sabi o ten na agersitori foe den skapoe nanga den bokoboko sa kon troe?
19 Loekoe taki Mateus 24:29-31 e taki na fesi taki (1) a Manpikin foe libisma moesoe kon, (2) taki a sa kon nanga bigi glori, (3) den engel sa de nanga en, èn (4) ala den lo foe grontapoe sa si en. Jesus e taki baka foe den penti disi na ini na agersitori foe den skapoe nanga den bokoboko (Mateus 25:31-46). So boen, wi kan bribi taki na agersitori disi e taki foe a ten, baka te a banawtoe bigin, te Jesus sa kon nanga den engel foe en èn sa go sidon na tapoe en kownoestoeroe foe kroetoe libisma (Johanes 5:22; Tori foe den Apostel 17:31; teki gersi 1 Kownoe 7:7; Danièl 7:10, 13, 14, 22, 26; Mateus 19:28). Soema a sa kroetoe, èn nanga sortoe bakapisi? Na agersitori e sori taki Jesus sa poti prakseri na tapoe ala nâsi, neleki den kon makandra leti bifo a hemel kownoestoeroe foe en.
20, 21. (a) San sa pasa nanga den skapoe na ini na agersitori foe Jesus? (b) San den bokoboko sa ondrofeni na ini a ten di e kon?
20 Man nanga oema di wi kan teki gersi nanga skapoe, sa poti aparti na a reti-anoesei foe Jesus bika Jesus e feni den boen. Foe san ede? Bika den ben gebroiki den okasi di den abi foe doe boen gi den brada foe en — den salfoe Kresten, di sa de toe na ini Krestes en hemel Kownoekondre (Danièl 7:27; Hebrewsma 2:9–3:1). Soleki fa na agersitori e sori, miljoenmiljoen Kresten di wi kan teki gersi nanga skapoe erken den brada na jeje fasi foe Jesus èn wroko foe horibaka gi den. Leki wan bakapisi foe dati, a „bigi ipi” abi a Bijbel howpoe foe libi pasa „a bigi banawtoe” èn baka dati foe libi foe têgo na ini Paradijs, a grontapoe kontren foe Gado Kownoekondre. — Openbaring 7:9, 14; 21:3, 4; Johanes 10:16.
21 Sani sa waka heri tra fasi nanga den bokoboko! Mateus 24:30 e taki foe den taki den sa „naki densrefi na ini wan sari krei” te Jesus e kon. Èn den sa sari foe troe, bika den sa abi a takroe nen taki den no ben teki a boen njoensoe foe a Kownoekondre, taki den ben gens den disipel foe Jesus, èn taki den ben lobi a grontapoe di e pasa gowe (Mateus 10:16-18; 1 Johanes 2:15-17). Na Jesus — a no wan disipel foe en na grontapoe — e bosroiti soema na den bokoboko. A e taki foe den bokoboko: „Den disi sa go na ini a têgo koti poeroe.” — Mateus 25:46.
22. Sortoe pisi foe Jesus en profeititori wi moesoe go ondrosoekoe moro fara?
22 A froestan di wi kon froestan a profeititori na ini Mateus kapitel 24 nanga 25 moro boen, ben span srefisrefi. Ma wan pisi de na ini a profeititori foe Jesus pe wi moesoe poti moro prakseri na tapoe — ’a tegoe sani di e tjari pori kon èn di e tanapoe na ini wan santa presi’. Jesus ben gi den bakaman foe en a deki-ati foe gebroiki koni foe man si sani krin ini a tori disi èn foe de klariklari foe doe wan sani (Mateus 24:15, 16). San na a „tegoe sani” disi? O ten a e tanapoe na ini wan santa presi? Èn san a abi foe doe nanga a howpoe di wi abi ini a libi now èn na ini a ten di e kon? A tra artikel sa taki foe a tori disi.
[Foetoewortoe]
a Loekoe den studieartikel na ini den Waktitoren foe 1 februari 1994; 1 oktober nanga 1 november 1995; nanga 1 augustus 1996.
b Wan sabidensiman foe Ingrisikondre, G. R. Beasley-Murray e taki: „Den wortoe ’a geslakti disi’ no moesoe de moeilek foe froestan gi sma di e froeklari sani. Ala di wi moesoe erken taki genea ben wani taki geborte, bakapikin, èn so srefi ras na ini owroeten Grikitongo, . . . na ini a [Griki Septuaginta] a ben vertaal moro foeroe a Hebrew wortoe dôr, di wani taki den jari di wan sma abi, o owroe a libisma famiri de, noso geslakti te a abi foe doe nanga sma di e libi na ini wan srefi pisi ten. . . . Te a abi foe doe nanga sani di Jesus ben taki, dan a gersi leki den wortoe wani taki toe sani: na a wan sei a e taki ala ten foe den sma di ben e libi na ini a srefi pisi ten leki Jesus, èn na a tra sei alaten a ben gebroiki den wortoe foe kroetoe sma.”
c Na ini History of the Jews, Profesor Graetz e taki dati son tron na tapoe wán dei den Romesma ben kiri 500 strafoeman di den Romesma ben anga na postoe. Den ben koti den anoe poeroe foe tra Djoe di den ben kisi èn dan den ben seni den go baka na ini a foto. Sortoe situwâsi ben de drape? „Moni no ben abi waarde, bika sma no ben man bai brede nanga a moni. Man ben e feti fajafaja na tapoe strati gi a moro fisti èn tegoe njanjan, sani leki pikinso drei grasi, wan pisi leer, noso dotisani di sma ben e trowe gi den dagoe. . . . Den dede skin di den no ben e beri èn di ben kon moro nanga moro, ben meki taki a loktoe na ini a faja zomer ben kan tjari pestsiki kon, èn den sma di ben libi drape dede foe siki, angriten, nanga a feti-owroe.”
d A tra artikel e taki foe a penti disi foe a banawtoe di moesoe kon ete.
Joe e memre disi ete?
◻ Fa Mateus 24:4-14 ben kon troe na ini a fosi jarihondro?
◻ Fa den dei ben sjatoe èn fa skin ben kisi froeloesoe na ini a ten foe den apostel, soleki fa a ben taki na fesi na ini Mateus 24:21, 22?
◻ San na den eigifasi foe a „geslakti” di kari na ini Mateus 24:34?
◻ Fa wi doe sabi taki a profeititori di ben taki na tapoe na Olijfbergi ben o abi wan tra moro bigi kontroe?
◻ O ten èn fa na agersitori foe den skapoe nanga den bokoboko sa kon troe?
[Prenki na tapoe bladzijde 12]
Wan pisi foe a Titusboog na ini Rome, di e sori den goedoe di den ben tjari gowe di den ben pori Jerusalem
[Sma di abi a reti foe a prenki]
Soprintendenza Archeologica di Roma